Hadith 7428–7467

اردو ترجمہ · UrduUnverified translation

سیدنا عبداللہ بن مسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”کچھ لوگ جہنم میں ہوں گے جب تک اللہ نے چاہا وہ اس میں رہیں گے، پھر اللہ تعالیٰ ان پر رحم کرے گا اور انہیں باہر نکالے گا، یہ لوگ جنت میں کمتر درجے کے لوگ ہوں گے۔ انہیں چشمہِ حیات میں غسل دیا جائے گا، اہل جنت ان کا نام جہنمی رکھیں گے۔ اگر ان میں سے کوئی ایک تمام اہل دنیا کے پاس آئے تو ان سب کو کھلا سکتا ہے، پلا سکتا ہے، ان سب کو بستر دے سکتا ہے (راوی کہتے ہیں) میرا خیال ہے روایت میں یہ الفاظ بھی ہیں، وہ ان کی شادیاں کروا سکتا ہے، پھر بھی اس کے پاس جو نعمتیں ہوں گی ان میں کوئی کمی نہیں ہوگی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7428]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ کچھ لوگوں نے عرض کی: یا رسول اللہ! کیا ہم قیامت کے دن اپنے پروردگار کا دیدار کریں گے؟ نبی اکرم صلی اللہ علیہ وسلم نے فرمایا: ”کیا تمہیں بادل کے بغیر سورج کو دیکھنے میں کچھ مشکل پیش آتی ہے؟“ لوگوں نے عرض کی: جی نہیں، یا رسول اللہ! نبی اکرم صلی اللہ علیہ وسلم نے فرمایا: ”کیا تمہیں بادل کے بغیر چودھویں رات کا چاند دیکھنے میں کچھ مشکل پیش آتی ہے؟“ تو لوگوں نے عرض کی: جی نہیں، یا رسول اللہ! نبی اکرم صلی اللہ علیہ وسلم نے فرمایا: ”پھر تم اسی طرح قیامت کے دن اپنے پروردگار کا دیدار کرو گے۔ اللہ تعالیٰ قیامت کے دن تمام لوگوں کو اکٹھا کرے گا اور یہ فرمائے گا: جو جس کی عبادت کرتا تھا وہ اس کے پیچھے چلا جائے، چنانچہ جو لوگ سورج کی عبادت کرتے تھے وہ سورج کے پیچھے چلے جائیں گے، جو چاند کی عبادت کرتے تھے وہ چاند کے پیچھے چلے جائیں گے، جو بتوں کی عبادت کرتے تھے وہ بتوں کے پیچھے چلے جائیں گے اور پھر یہ امت باقی رہ جائے گی، جس میں اس کے منافقین بھی ہوں گے، پھر اللہ تعالیٰ ان کے پاس اس سے مختلف صورت میں آئے گا جس سے وہ واقف ہوں گے، وہ فرمائے گا: میں تمہارا پروردگار ہوں، تو وہ یہ کہیں گے: ہم تم سے اللہ کی پناہ مانگتے ہیں، ہم یہیں رہیں گے جب تک ہمارا پروردگار ہمارے پاس نہیں آتا، جب ہمارا پروردگار ہمارے پاس آئے گا تو ہم اسے پہچان لیں گے۔“ نبی اکرم صلی اللہ علیہ وسلم فرماتے ہیں: ”ان کا پروردگار ان کے پاس اس صورت میں آئے گا جس سے وہ واقف ہوں گے اور یہ فرمائے گا: میں تمہارا پروردگار ہوں، تو وہ کہیں گے: تو ہمارا پروردگار ہے، پھر جہنم پر پل لگایا جائے گا۔“ نبی اکرم صلی اللہ علیہ وسلم فرماتے ہیں: ”سب سے پہلے میں اسے عبور کروں گا، اس دن تمام رسول یہی دعا کر رہے ہوں گے: «اللَّهُمَّ سَلِّمْ سَلِّمْ» ”اے اللہ! سلامتی عطا کرنا، اے اللہ! سلامتی عطا کرنا“ اور اس پل پر کچھ آنکڑے لگے ہوئے ہوں گے جو سعدان نامی پودے کے کانٹوں کی طرح ہوں گے، کیا تم جانتے ہو سعدان کے کانٹے کیسے ہیں؟“ لوگوں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے فرمایا: ”وہ سعدان کے کانٹوں کی مانند ہوں گے، البتہ ان کے حجم کے بارے میں صرف اللہ جانتا ہے اور وہ لوگوں کو ان کے اعمال کے حساب سے اچک لیں گے، تو کوئی شخص اپنے عمل کی وجہ سے ہلاکت کا شکار ہو گا، اور کوئی (جہنم کے اندر) گر جائے گا اور پھر نجات پائے گا، یہاں تک کہ اللہ تعالیٰ اپنے بندوں کے درمیان فیصلہ کر کے فارغ ہو جائے گا، اور اس بات کا ارادہ کرے گا کہ جہنم سے ان لوگوں کو نکالے جو اس بات کی گواہی دیا کرتے تھے کہ اللہ تعالیٰ کے علاوہ اور کوئی معبود نہیں اور اللہ تعالیٰ فرشتوں کو یہ حکم دے گا کہ وہ ان لوگوں کو نکال لیں، تو فرشتے انہیں سجدوں کے نشانات کی علامت کے ذریعے پہچان لیں گے۔“ نبی اکرم صلی اللہ علیہ وسلم فرماتے ہیں: ”اللہ تعالیٰ نے جہنم کے لیے یہ چیز حرام قرار دی ہے کہ وہ ابن آدم کے سجدوں کے نشان کو کھا لے۔“ نبی اکرم صلی اللہ علیہ وسلم فرماتے ہیں: ”وہ لوگ انہیں نکالیں گے جبکہ وہ لوگ جل کر کوئلہ ہو چکے ہوں گے، ان پر پانی بہایا جائے گا، جسے آبِ حیات کہا جاتا ہے، تو وہ یوں اگ جائیں گے، جس طرح سیلابی پانی کے راستے میں دانہ اگتا ہے۔“ نبی اکرم صلی اللہ علیہ وسلم فرماتے ہیں: ”ان میں سے ایک شخص باقی رہ جائے گا، جو اپنے چہرے کے بل جہنم کی طرف ہو گا اور عرض کرے گا: اے میرے پروردگار! اس کی بدبو نے مجھے تنگ کیا ہوا ہے اور اس کی گرمی مجھے جلا رہی ہے، میرا چہرہ جہنم کی طرف سے پھیر دے، وہ مسلسل دعا کرتا رہے گا تو اللہ تعالیٰ فرمائے گا: اگر میں نے تمہیں یہ چیز عطا کر دی، تو پھر تم نے مجھ سے کوئی اور چیز نہیں مانگنی؟ وہ عرض کرے گا: تیری عزت کی قسم! میں اس کے علاوہ تجھ سے کچھ نہیں مانگوں گا، اللہ تعالیٰ اس کے چہرے کو جہنم سے پھیر دے گا۔ اس کے بعد وہ شخص عرض کرے گا: اے میرے پروردگار! مجھے جنت کے دروازے کے قریب کر دے، اللہ تعالیٰ فرمائے گا: کیا تم نے یہ نہیں کہا تھا کہ تم اس کے علاوہ مجھ سے کچھ اور نہیں مانگو گے؟ اے ابن آدم! تمہارے لیے بربادی ہے، تم کتنے وعدہ خلاف ہو! اس کے بعد وہ شخص مسلسل دعا کرتا رہے گا، پروردگار فرمائے گا: اگر میں نے تمہیں یہ چیز عطا کر دی، تو پھر اس کے علاوہ تم مجھ سے کچھ نہیں مانگنا، وہ عرض کرے گا: تیری عزت کی قسم! میں اس کے علاوہ تجھ سے کچھ نہیں مانگوں گا، پھر وہ اللہ تعالیٰ کے ساتھ پختہ عہد کرے گا کہ وہ اللہ تعالیٰ سے کچھ اور نہیں مانگے گا تو اللہ تعالیٰ اسے جنت کے دروازے کے قریب کر دے گا۔ جب اللہ تعالیٰ اسے جنت کے دروازے کے قریب کر دے گا تو جنت اس کے سامنے آئے گی پھر وہ اس میں موجود (نعمتوں کو) دیکھے گا، اور جتنا اللہ کو منظور ہو گا اتنی دیر خاموش رہے گا پھر عرض کرے گا: اے میرے پروردگار! مجھے جنت میں داخل کر دے، پروردگار فرمائے گا: کیا تم نے یہ نہیں کہا تھا کہ تم اس کے علاوہ مجھ سے کچھ نہیں مانگو گے؟ اے ابن آدم! تمہاری بربادی ہے تم کتنے وعدہ خلاف ہو، وہ عرض کرے گا: اے میرے پروردگار! مجھے اپنی مخلوق کا سب سے بدبخت شخص نہ بنا۔“ نبی اکرم صلی اللہ علیہ وسلم فرماتے ہیں: ”وہ مسلسل دعا کرتا رہے گا یہاں تک کہ پروردگار ہنس دے گا، جب وہ اس پر ہنس پڑے گا تو وہ اسے جنت میں داخل ہونے کی اجازت دے گا، جب وہ جنت میں داخل ہو گا، تو اس سے کہا جائے گا: اتنی آرزو کرو، اتنی آرزو کرو، وہ آرزو کرے گا یہاں تک کہ اس کی آرزوئیں ختم ہو جائیں گی، پروردگار فرمائے گا: تمہیں یہ سب کچھ ملتا ہے اور اس کی مانند مزید ملتا ہے۔“ سیدنا ابوسعید خدری رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے کہ: ”تمہیں یہ ملتا ہے اور اس کی مانند دس گنا ملتا ہے“، تو سیدنا ابوہریرہ رضی اللہ عنہ نے کہا: مجھے یہ الفاظ یاد ہیں کہ: ”تمہیں یہ ملتا ہے اور اس کی مانند مزید ملتا۔“ یہ وہ شخص ہے جو جنت میں سب سے آخر میں داخل ہو گا۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7429]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جنت میں سب سے آخر میں داخل ہونے والا وہ شخص ہو گا، جو پل صراط پر چہرے کے بل چل رہا ہو گا۔ آگ اسے جھلسائے گی، یہاں تک کہ جب وہ پل صراط کو عبور کر لے گا، تو اس کی طرف رخ کر کے کہے گا: بابرکت ہے وہ ذات جس نے مجھے اس سے نجات عطا کی۔ اللہ کی قسم! اللہ تعالیٰ نے مجھے وہ چیز عطا کی ہے جو اس نے تمام جہانوں میں کسی کو بھی عطا نہیں کی۔“ نبی اکرم صلی اللہ علیہ وسلم فرماتے ہیں: ”پھر اس کے سامنے ایک درخت آئے گا، وہ کہے گا: اے میرے پروردگار! مجھے اس کے قریب کر دے تاکہ میں اس کے سائے میں آ جاؤں اور اس کے پانی کو پیوں۔“ نبی اکرم صلی اللہ علیہ وسلم فرماتے ہیں: ”پروردگار فرمائے گا: اے ابن آدم! اگر میں نے تمہیں یہ چیز دے دی تو تم مجھ سے کچھ اور بھی مانگو گے۔ وہ عرض کرے گا: جی نہیں میرے پروردگار، پھر وہ معاہدہ کرے گا کہ وہ ایسا نہیں کرے گا، حالانکہ پروردگار یہ بات جانتا ہے کہ وہ ایسا کرے گا؛ کیونکہ اس کو اس پر بھی صبر نہیں ہونا۔ پروردگار اسے اس درخت کے قریب کر دے گا۔ وہ اس کے سائے میں آئے گا، اس کے پانی کو پیے گا۔ پھر اس کے سامنے ایک اور درخت آئے گا، وہ پہلے والے سے زیادہ اچھا ہو گا، تو وہ عرض کرے گا: اے میرے پروردگار! مجھے اس کے قریب کر دے تاکہ میں اس کے سائے میں آ جاؤں اور اس کے پانی کو پیوں۔ پروردگار فرمائے گا: کیا تم نے مجھ سے یہ معاہدہ نہیں کیا تھا کہ تم مجھ سے کچھ اور نہیں مانگو گے؟ وہ عرض کرے گا: جی ہاں اے میرے پروردگار! لیکن تو مجھے اس کے قریب کر دے تاکہ میں اس کے سائے میں آؤں اور اس کا پانی پیوں، تو وہ پروردگار سے یہ عہد کرے گا کہ وہ اس کے علاوہ کچھ اور نہیں مانگے گا۔ پروردگار اسے قریب کر دے گا، حالانکہ پروردگار کو یہ معلوم ہو گا کہ وہ اس کے علاوہ بھی مانگے گا؛ کیونکہ پروردگار کو پتہ ہے کہ اس سے اتنا صبر نہیں ہونا۔“ نبی اکرم صلی اللہ علیہ وسلم فرماتے ہیں: ”پھر اس کے سامنے جنت کے دروازے کے قریب ایک اور درخت آئے گا، جو پہلے والے دونوں درختوں سے زیادہ خوب صورت ہو گا۔ وہ عرض کرے گا: اے میرے پروردگار! مجھے اس درخت کے قریب کر دے تاکہ میں اس کے سائے میں آؤں اور اس کے پانی کو پیوں۔ پروردگار فرمائے گا: کیا تم نے مجھ سے معاہدہ نہیں کیا تھا کہ مجھ سے اس کے علاوہ تم کچھ نہیں مانگو گے؟ وہ عرض کرے گا: جی ہاں میرے پروردگار! لیکن تو مجھے اس کے قریب کر دے۔ جب وہ اس کے قریب ہو گا تو اہل جنت کی آوازیں سنے گا تو عرض کرے گا: اے پروردگار! مجھے جنت میں داخل کر دے۔ اللہ تعالیٰ فرمائے گا: اے ابن آدم! کیا یہ چیز تمہیں راضی کرے گی کہ میں تمہیں دنیا اور اس کی مانند مزید دے دوں؟ تو وہ عرض کرے گا: اے میرے پروردگار! کیا تو میرے ساتھ مذاق کر رہا ہے جبکہ تو تمام جہانوں کا پروردگار ہے؟ تو پروردگار فرمائے گا: میں تمہارے ساتھ مذاق نہیں کر رہا، لیکن میں جو چاہوں اس کو کرنے پر قادر ہوں۔“ راوی بیان کرتے ہیں کہ سیدنا عبداللہ بن مسعود رضی اللہ عنہ جب یہ الفاظ ذکر کرتے: ”کیا تو میرے ساتھ مذاق کر رہا ہے“، تو مسکرا دیتے، پھر وہ یہ فرماتے تھے: ”تم لوگ مجھ سے اس بارے میں دریافت نہیں کرو گے کہ میں کس بات پر ہنسا ہوں؟“ ان سے دریافت کیا گیا: آپ کس بات پر ہنسے ہیں؟ انہوں نے بتایا کہ نبی اکرم صلی اللہ علیہ وسلم جب اس کا ذکر کرتے تھے تو مسکرا دیتے تھے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7430]

اردو ترجمہ · UrduUnverified translation

سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے فرمایا: ”میں جہنم سے نکلنے والے آخری جہنمی سے واقف ہوں، وہ ایسا شخص ہے جو گھسٹ کر باہر آئے گا، تو اسے کہا جائے گا: تم جاؤ اور جنت میں داخل ہو جاؤ۔“ نبی اکرم صلی اللہ علیہ وسلم فرماتے ہیں: ”وہ جائے گا اور داخل ہوگا تو لوگوں کو پائے گا کہ انہوں نے اپنی اپنی جگہ حاصل کر لی ہے، وہ واپس آئے گا اور عرض کرے گا: اے میرے پروردگار! لوگوں نے اپنی رہائش گاہیں حاصل کر لی ہیں۔“ نبی اکرم صلی اللہ علیہ وسلم فرماتے ہیں: ”اس سے کہا جائے گا: کیا تمہیں وہ زمانہ یاد ہے جب تم دنیا میں ہوا کرتے تھے؟ وہ عرض کرے گا: جی ہاں، تو اس سے کہا جائے گا: تم آرزو کرو۔ وہ آرزو کرے گا، تو اس سے کہا جائے گا: تم نے جو آرزو کی ہے وہ تمہیں ملتا ہے اور اس کے ہمراہ مزید ملتا ہے، تو وہ عرض کرے گا: کیا تو میرے ساتھ مذاق کر رہا ہے جبکہ تو بادشاہ ہے؟“ راوی بیان کرتے ہیں کہ میں نے نبی اکرم صلی اللہ علیہ وسلم کو دیکھا، آپ صلی اللہ علیہ وسلم ہنس پڑے یہاں تک کہ آپ کے دندانِ مبارک نظر آنے لگے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7431]

اردو ترجمہ · UrduUnverified translation

صالح بن ابوطریف بیان کرتے ہیں: میں نے سیدنا ابوسعید خدری رضی اللہ عنہ سے دریافت کیا: کیا آپ نے نبی اکرم صلی اللہ علیہ وسلم کو اس آیت ﴿عنقریب وہ لوگ جنہوں نے کفر کیا وہ یہ آرزو کریں گے کہ کاش وہ مسلمان ہوتے﴾ [سورة الحجر: 2] کے بارے میں کچھ ارشاد فرماتے ہوئے سنا ہے؟ سیدنا ابوسعید خدری رضی اللہ عنہ نے بتایا: جی ہاں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اللہ تعالیٰ مومنین میں سے کچھ لوگوں کو جہنم سے نکالے گا، یہ اس کے بعد ہو گا کہ جب وہ انہیں سزا دے چکا ہو گا۔“ نبی اکرم صلی اللہ علیہ وسلم فرماتے ہیں: ”جب اللہ تعالیٰ نے ان لوگوں کو مشرکین کے ہمراہ جہنم میں داخل کیا ہو گا تو مشرکین یہ کہیں گے: کیا تم دنیا میں یہ نہیں کہتے تھے کہ تم دوست ہو، تو پھر تم جہنم میں ہمارے ساتھ کیوں ہو؟ جب اللہ تعالیٰ یہ بات سنے گا، تو وہ شفاعت کرنے کی اجازت دے گا، تو فرشتے اور انبیاء ان لوگوں کی شفاعت کریں گے یہاں تک کہ وہ لوگ اللہ کے حکم کے تحت (جہنم سے) باہر آ جائیں گے۔ جب انہیں نکال دیا جائے گا تو وہ لوگ کہیں گے: اے کاش! ہم بھی ان کی مانند ہوتے اور ہمیں بھی شفاعت نصیب ہو جاتی اور ہم بھی جہنم سے نکل جاتے، تو اللہ تعالیٰ کے اس فرمان ﴿کفر کرنے والے لوگ عنقریب یہ آرزو کریں گے کہ کاش وہ مسلمان ہوتے﴾ [سورة الحجر: 2] سے یہی مراد ہے۔“ نبی اکرم صلی اللہ علیہ وسلم فرماتے ہیں: ”ان لوگوں کا جنت میں نام ”جہنمی“ رکھا جائے گا کیونکہ ان کے چہرے سیاہ ہو چکے ہوں گے۔ وہ عرض کریں گے: اے ہمارے پروردگار! ہم سے اس نام کو دور کر دے۔“ نبی اکرم صلی اللہ علیہ وسلم فرماتے ہیں: ”تو پروردگار انہیں حکم دے گا وہ جنت کی نہر میں غسل کریں گے، تو ان کی یہ (سیاہی) ختم ہو جائے گی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7432]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”کچھ لوگ جہنم میں جتنا عرصہ اللہ تعالیٰ کو منظور ہوگا اتنا عرصہ رہیں گے، پھر اللہ تعالیٰ ان پر رحم کرے گا اور انہیں جہنم سے نکال دے گا اور وہ جنت کے زیریں حصے میں ایک نہر میں آئیں گے جس کا نام «الْحَيَوَان» ”حیوان“ ہوگا۔ اگر تمام اہل دنیا ان کے مہمان بن جائیں تو وہ ان سب کو کھلا دیں، پلا دیں اور انہیں تحفے دیں (پھر بھی ان کے پاس موجود نعمتیں ختم نہیں ہوں گی)۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7433]

اردو ترجمہ · UrduUnverified translation

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب اہل ایمان جہنم سے نجات پا لیں گے، تو انہیں جنت اور جہنم کے درمیان ایک پل پر روک لیا جائے گا اور ان کے درمیان آپس میں دنیا میں جو زیادتیاں ہوئی تھیں ان کا بدلہ دلوایا جائے گا، یہاں تک کہ جب وہ پاک و صاف ہو جائیں گے تو انہیں جنت میں داخل ہونے کی اجازت دی جائے گی۔ اس ذات کی قسم جس کے دستِ قدرت میں محمد صلی اللہ علیہ وسلم کی جان ہے، جنت میں (داخل ہونے والا شخص) اپنے مخصوص ٹھکانے سے اس سے زیادہ واقف ہو گا جتنا وہ دنیا میں اپنے گھر سے واقف تھا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7434]

اردو ترجمہ · UrduUnverified translation

سیدنا جابر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اہلِ جنت کھائیں گے اور پیئیں گے لیکن وہ پیشاب اور پاخانہ نہیں کریں گے، بلغم نہیں نکالیں گے، تھوک نہیں پھینکیں گے۔ انہیں حمد اور تسبیح یوں الہام کی جائے گی جس طرح سانس لینا الہام کیا جاتا ہے اور ان کا کھانا ڈکار کی شکل میں (ختم ہو جائے گا) اس کی خوشبو مشک کی طرح ہو گی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7435]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جنت میں داخل ہونے والے سب سے پہلے گروہ کی شکلیں چودھویں رات کے چاند کی مانند ہوں گی، وہ لوگ جنت میں تھوکیں گے نہیں، بلغم نہیں نکالیں گے، پاخانہ نہیں کریں گے۔ ان کے برتن اور کنگھیاں سونے اور چاندی سے بنی ہوئی ہوں گی، ان کی انگیٹھیوں میں عود سلگے گا، ان میں سے ہر شخص کی دو بیویاں ہوں گی جن کی پنڈلی کا مغز گوشت کے اندر سے بھی نظر آئے گا۔ ان لوگوں کے درمیان آپس میں کوئی اختلاف نہیں ہوگا، ان کے دلوں میں ایک دوسرے کے لیے بغض نہیں ہوگا اور ان سب کے دلوں کی حیثیت ایک جیسی ہوگی۔ وہ صبح و شام اللہ کی پاکی بیان کریں گے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7436]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جنت میں داخل ہونے والا سب سے پہلا گروہ چودھویں رات کے چاند کی مانند ہو گا، پھر اس کے بعد والے لوگ آسمان میں موجود سب سے زیادہ چمکدار ستارے کی مانند ہوں گے۔ وہ لوگ (جنت میں) پیشاب نہیں کریں گے، پاخانہ نہیں کریں گے، تھوک نہیں پھینکیں گے، بلغم نہیں نکالیں گے۔ ان کی کنگھیاں سونے سے بنی ہوئی ہوں گی اور ان کا پسینہ مشک کا ہو گا۔ ان کی انگیٹھیوں میں عود سلگے گا۔ ان کی بیویاں حورِ عین ہوں گی اور ان کی جسامت ان کے جدِ امجد (سیدنا آدم علیہ السلام) کی طرح ساٹھ گز ہو گی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7437]

اردو ترجمہ · UrduUnverified translation

سعید بن مسیب رحمہ اللہ بیان کرتے ہیں کہ ان کی ملاقات سیدنا ابوہریرہ رضی اللہ عنہ سے ہوئی، تو سیدنا ابوہریرہ رضی اللہ عنہ نے فرمایا: میں اللہ تعالیٰ سے یہ دعا کرتا ہوں کہ وہ مجھے اور تمہیں جنت کے بازار میں اکٹھا کرے۔ سعید بن مسیب رحمہ اللہ نے دریافت کیا: کیا جنت میں بازار ہوں گے؟ انہوں نے جواب دیا: جی ہاں! نبی اکرم صلی اللہ علیہ وسلم نے مجھے یہ بات بتائی ہے: ”جب اہل جنت، جنت میں داخل ہو جائیں گے تو وہ اپنے اعمال کے فضائل کے حساب سے اس میں رہائش اختیار کریں گے۔ دنیاوی دنوں کے اعتبار سے جمعے کے دن انہیں اجازت دی جائے گی تو وہ اللہ تعالیٰ کا دیدار کرنے کے لیے آئیں گے اور اللہ تعالیٰ کا عرش ان کے سامنے ظاہر ہو گا۔ اللہ تعالیٰ ان کے سامنے جنت کے باغوں میں سے ایک باغ میں جلوہ افروز ہو گا، ان کے سامنے نور کے منبر رکھے جائیں گے اور موتیوں کے منبر ہوں گے، یاقوت کے منبر ہوں گے، زبرجد کے منبر ہوں گے، سونے کے منبر ہوں گے اور چاندی کے منبر ہوں گے۔ ان میں سب سے کم تر شخص، حالانکہ ان میں کوئی بھی شخص کم تر نہیں ہو گا، وہ بھی مشک کے ٹیلوں پر اور کافور کے ٹیلوں پر ہو گا۔ وہ یہ نہیں سمجھیں گے کہ کرسیوں پر بیٹھنے والے لوگ محفل میں بیٹھنے کے اعتبار سے ان سے زیادہ فضیلت رکھتے ہیں۔“ سیدنا ابوہریرہ رضی اللہ عنہ بیان کرتے ہیں کہ میں نے عرض کی: یا رسول اللہ صلی اللہ علیہ وسلم ! کیا ہم اپنے پروردگار کا دیدار کریں گے؟ نبی اکرم صلی اللہ علیہ وسلم نے فرمایا: ”جی ہاں! کیا تمہیں سورج کو دیکھنے اور چودھویں رات کے چاند کو دیکھنے میں کوئی شک و شبہ ہوتا ہے؟“ ہم نے عرض کی: جی نہیں، تو نبی اکرم صلی اللہ علیہ وسلم نے فرمایا: ”اسی طرح تمہیں اپنے پروردگار کا دیدار کرنے میں بھی کوئی الجھن پیش نہیں آئے گی۔ اس محفل میں جو بھی شخص موجود ہو گا اللہ تعالیٰ اس سے براہ راست کلام فرمائے گا یہاں تک کہ اللہ تعالیٰ ان میں سے کسی ایک شخص سے فرمائے گا: اے فلاں! کیا تمہیں فلاں دن یاد ہے جب تم نے ایسا ایسا عمل کیا تھا؟ تو اللہ تعالیٰ دنیا میں کی گئی اس کی بعض لغزشوں کو یاد دلائے گا تو وہ عرض کرے گا: اے پروردگار! کیا تو نے میری مغفرت نہیں فرما دی؟ تو پروردگار فرمائے گا: جی ہاں! میری مغفرت کی وسعت ہی کی وجہ سے تم اس مقام پر پہنچے ہو۔“ نبی اکرم صلی اللہ علیہ وسلم فرماتے ہیں: ”ابھی وہ لوگ اسی حالت میں ہوں گے کہ ان کے اوپر سے ایک بادل انہیں ڈھانپ لے گا اور ان پر ایسی خوشبو کی بارش برسائے گا جس کی مانند انہوں نے کبھی کوئی خوشبو نہیں سونگھی ہو گی، پھر پروردگار فرمائے گا: تم اس چیز کی طرف اٹھ کر جاؤ جو میں نے تمہارے لیے بطورِ اعزاز تیار کی ہے اور جس چیز کی تمہیں خواہش ہے اسے تم حاصل کرو۔“ نبی اکرم صلی اللہ علیہ وسلم فرماتے ہیں: ”پھر ہم ایک بازار میں آئیں گے جسے فرشتوں نے ڈھانپا ہوا ہو گا، وہ ایسی چیز ہو گی جس کی مانند نہ کبھی کسی آنکھ نے دیکھی ہو گی، نہ کانوں نے سنی ہو گی اور نہ ہی کسی انسانی دل میں اس کا خیال گزرا ہو گا۔“ نبی اکرم صلی اللہ علیہ وسلم فرماتے ہیں: ”پس ہمارے لیے وہاں وہ تمام چیزیں لائی جائیں گی جن کی ہمیں خواہش ہو گی۔ وہاں کوئی چیز فروخت نہیں ہو گی اور نہ کوئی چیز خریدی جائے گی۔ اس بازار میں اہل جنت ایک دوسرے سے ملاقات کریں گے۔“ نبی اکرم صلی اللہ علیہ وسلم فرماتے ہیں: ”پھر بلند مرتبے والا ایک شخص آئے گا اور وہ اس شخص سے ملے گا جو اس سے کم مرتبے کا ہو گا، حالانکہ ان میں کوئی بھی کم درجے کا نہیں ہو گا، وہ شخص اس کے جسم پر موجود لباس کو دیکھ کر اسے پسند کرے گا تو ابھی ان کی گفتگو ختم نہیں ہو گی کہ اسے محسوس ہو گا کہ اس کے اپنے جسم پر اس سے بھی زیادہ عمدہ لباس آ چکا ہے، اس کی وجہ یہ ہو گی کہ وہاں کوئی شخص کسی بھی حوالے سے غمگین نہیں ہو گا۔“ نبی اکرم صلی اللہ علیہ وسلم فرماتے ہیں: ”پھر ہم اپنی رہائش گاہوں کی طرف واپس جائیں گے تو ہماری بیویاں ہمیں یہ کہہ کر ملیں گی: آپ کو خوش آمدید! اے ہمارے محبوب، آپ تشریف لے آئے ہیں، اب آپ کا حسن و جمال اور خوشبو پہلے سے کہیں زیادہ بڑھ گئی ہے جیسا کہ آپ ہمیں چھوڑ کر گئے تھے، تو وہ کہیں گے: آج ہم نے اپنے ربِ جبار کی ہم نشینی اختیار کی تھی، اس لیے ہم اس بات کے حق دار تھے کہ اسی صورتِ حال میں واپس آئیں جس میں ہم آئے ہیں۔“ (امام ابن حبان رحمہ اللہ فرماتے ہیں:) روایت کے الفاظ حسن بن سفیان کے ہیں۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7438]

اردو ترجمہ · UrduUnverified translation

سیدنا جابر بن عبداللہ رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جب اہل جنت، جنت میں داخل کر دیے جائیں گے تو اللہ تعالیٰ فرمائے گا: کیا تم کسی چیز کے خواہش مند ہو؟ تاکہ میں تمہیں مزید عطا کروں، تو وہ عرض کریں گے: اے ہمارے پروردگار! تو نے ہمیں جو کچھ عطا کر دیا ہے اس سے اوپر اور کیا ہو سکتا ہے؟ نبی اکرم صلی اللہ علیہ وسلم فرماتے ہیں: تو پروردگار فرمائے گا: جی ہاں! میری رضا سب سے برتر ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7439]

اردو ترجمہ · UrduUnverified translation

سیدنا ابوسعید خدری رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ فرمائے گا: اے اہل جنت! وہ عرض کریں گے: اے ہمارے پروردگار! ہم حاضر ہیں، سعادت مندی تجھ سے حاصل ہو سکتی ہے، بھلائی تیرے دستِ قدرت میں ہے۔ پروردگار دریافت فرمائے گا: کیا تم لوگ راضی ہو؟ وہ عرض کریں گے: ہم کیوں راضی نہ ہوں گے جبکہ تو نے ہمیں وہ کچھ عطا کر دیا ہے جو تو نے اپنی مخلوق میں سے کسی کو بھی عطا نہیں کیا؟ پروردگار فرمائے گا: کیا میں تمہیں اس سے زیادہ فضیلت والی چیز عطا نہ کروں؟ وہ عرض کریں گے: اے ہمارے پروردگار! اس سے زیادہ فضیلت والی چیز اور کیا ہو سکتی ہے؟ پروردگار فرمائے گا: میں نے تمہارے لیے اپنی رضامندی کو حلال کر دیا ہے، اب میں اس کے بعد کبھی بھی (تم سے) ناراض نہیں ہوں گا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7440]

اردو ترجمہ · UrduUnverified translation

سیدنا صہیب رضی اللہ عنہ بیان کرتے ہیں: نبی اکرم صلی اللہ علیہ وسلم نے یہ آیت ﴿لِلَّذِينَ أَحْسَنُوا الْحُسْنَى وَزِيَادَةٌ﴾ [سورة يونس: 26] ”جن لوگوں نے اچھائی کی ان کے لیے اچھائی ہے اور مزید ہے۔“ تلاوت کی۔ نبی اکرم صلی اللہ علیہ وسلم نے ارشاد فرمایا: ”جب اہل جنت، جنت میں داخل ہو جائیں گے اور اہل جہنم، جہنم میں داخل ہو جائیں گے تو ایک منادی یہ اعلان کرے گا: اے اہل جنت! اللہ تعالیٰ کی بارگاہ میں تمہارے لیے ایک وعدہ ہے، وہ یہ چاہتا ہے کہ وہ اسے تمہارے ساتھ پورا کر دے۔ وہ دریافت کریں گے: وہ کیا ہے؟ کیا اللہ تعالیٰ نے ہمارے میزان کو وزنی نہیں کیا، ہمارے چہروں کو روشن نہیں کیا اور ہمیں جنت میں داخل نہیں کیا اور ہمیں جہنم سے نجات عطا نہیں کی؟“ نبی اکرم صلی اللہ علیہ وسلم فرماتے ہیں: ”تو پردہ ہٹایا جائے گا تو وہ لوگ اللہ تعالیٰ کا دیدار کریں گے۔ اللہ کی قسم! اللہ تعالیٰ نے انہیں جو کچھ بھی عطا کیا ہے ان میں سے کوئی بھی چیز ان کے نزدیک اپنے پروردگار کا دیدار کرنے سے زیادہ محبوب نہیں ہو گی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7441]

اردو ترجمہ · UrduUnverified translation

سیدنا جریر بن عبداللہ بجلی رضی اللہ عنہ بیان کرتے ہیں کہ ہم لوگ نبی اکرم صلی اللہ علیہ وسلم کے پاس بیٹھے ہوئے تھے، نبی اکرم صلی اللہ علیہ وسلم نے چودہ تاریخ کی رات کو چودھویں کے چاند کی طرف دیکھا اور فرمایا: ”عنقریب تم اپنے پروردگار کا اسی طرح دیدار کرو گے، جس طرح تم اسے دیکھ رہے ہو، اسے دیکھنے میں تمہیں کوئی مشکل پیش نہیں آ رہی، اگر تم سے ہو سکے تو تم سورج کے طلوع ہونے سے پہلے والی اور غروب ہونے سے پہلے والی نماز کے حوالے سے مغلوب نہ ہونا۔“ پھر آپ صلی اللہ علیہ وسلم نے یہ آیت تلاوت فرمائی: ﴿وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ الْغُرُوبِ﴾ [سورة ق: 39] ”اور تم اپنے پروردگار کی حمد کے ہمراہ پاکی بیان کرو، سورج طلوع ہونے سے پہلے اور غروب ہونے سے پہلے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7442]

اردو ترجمہ · UrduUnverified translation

قیس بیان کرتے ہیں کہ سیدنا جریر بن عبداللہ رضی اللہ عنہ نے مجھے بتایا: ہم لوگ نبی اکرم صلی اللہ علیہ وسلم کے پاس بیٹھے ہوئے تھے، نبی اکرم صلی اللہ علیہ وسلم نے چودھویں رات کے چاند کی طرف دیکھ کر فرمایا: ”عنقریب تم اپنے پروردگار کا اس طرح دیدار کرو گے، جس طرح تم اسے دیکھ رہے ہو۔ اسے دیکھنے میں تمہیں کوئی مشکل پیش نہیں آتی۔ اگر تم سے ہو سکے تو تم سورج طلوع ہونے سے پہلے والی اور سورج غروب ہونے سے پہلے والی نماز کے حوالے سے مغلوب نہ ہونا۔“ پھر آپ صلی اللہ علیہ وسلم نے یہ آیت تلاوت کی: ﴿فَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ غُرُوبِهَا﴾ [سورة طه: 130] ”تم اپنے پروردگار کی حمد کے ہمراہ پاکی بیان کرو سورج طلوع ہونے سے پہلے اور اس کے غروب ہونے سے پہلے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7443]

اردو ترجمہ · UrduUnverified translation

سیدنا جریر رضی اللہ عنہ بیان کرتے ہیں کہ نبی اکرم صلی اللہ علیہ وسلم چودھویں رات میں ہمارے پاس تشریف لائے، آپ صلی اللہ علیہ وسلم نے فرمایا: ”تم لوگ عنقریب قیامت کے دن اپنے پروردگار کو یوں دیکھو گے، جس طرح تم اسے (یعنی چودھویں کے چاند کو) دیکھ رہے ہو جسے دیکھنے میں تمہیں کوئی مشکل نہیں آ رہی۔“ (امام ابن حبان رحمہ اللہ فرماتے ہیں:) ان تمام روایات میں دیدارِ باری تعالیٰ کا ذکر ہے، ان روایات کو اس شخص نے پرے کر دیا ہے جس نے علم حاصل نہیں کیا اور وہ یہ کہتا ہے کہ یہ بات ممکن ہے کہ اللہ تعالیٰ اپنے بندوں میں سے اپنے منتخب مومن بندوں کو اپنے دیدار کا شرف عطا کرے، اللہ تعالیٰ ہمیں بھی اپنے فضل کے تحت ان لوگوں میں شامل کرے، تاکہ کفار اور اہل ایمان کے درمیان فرق ہو جائے اور کتاب میں بھی سنت کے مطابق حکم مذکور ہے جس کا ہم نے ذکر کیا ہے، جیسا کہ ارشادِ باری تعالیٰ ہے: ﴿كَلَّا إِنَّهُمْ عَن رَّبِّهِمْ يَوْمَئِذٍ لَّمَحْجُوبُونَ﴾ [سورة المطففين: 15] ”خبردار! وہ لوگ اس دن اپنے پروردگار کے حوالے سے محجوب ہوں گے۔“ تو جب کفار کے لیے حجاب کا حکم ثابت ہو گیا، تو یہ اس بات پر دلالت کرتی ہے کہ جو لوگ کفار نہیں ہوں گے وہ محجوب نہیں ہوں گے۔ جہاں تک اس دنیا کا تعلق ہے تو اس دنیا میں اللہ تعالیٰ نے مخلوق کو فنا ہونے کے لیے پیدا کیا ہے، تو یہ بات ناممکن ہے کہ فانی آنکھ باقی چیز کو دیکھ لے۔ جب اللہ تعالیٰ اس مخلوق کو پیدا کرے گا اور انہیں ان کی قبروں سے زندہ کرے گا تو یہ بقا کے لیے ہو گا۔ اس صورت میں یہ ناممکن نہیں ہو گا کہ اس آنکھ کے ذریعے وہ پروردگار کا دیدار کریں جسے ہمیشہ رہنے والی دنیا میں باقی رہنے کے لیے پیدا کیا ہے اور وہ اس چیز کا دیدار کریں جو باقی رہنے والی ہے۔ اس بات کا انکار صرف وہ شخص کر سکتا ہے جو علم سے ناواقف ہو اور الٹی رائے اور منحوس قیاس کے ذریعے اس کا انکار کرتا ہو۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7444]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ کچھ لوگوں نے عرض کی: یا رسول اللہ! کیا ہم قیامت کے دن اپنے پروردگار کا دیدار کریں گے؟ تو آپ صلی اللہ علیہ وسلم نے فرمایا: ”کیا تمہیں صاف دن میں سورج کو دیکھنے میں مشکل پیش آتی ہے، جبکہ آسمان صاف ہو یعنی کوئی بادل نہ ہو؟“ لوگوں نے عرض کی: جی نہیں۔ پھر نبی اکرم صلی اللہ علیہ وسلم نے فرمایا: ”کیا تمہیں چودھویں رات میں چاند کو دیکھنے میں مشکل پیش آتی ہے جبکہ آسمان صاف ہو اور اس میں کوئی بادل موجود نہ ہو؟“ لوگوں نے عرض کی: جی نہیں۔ نبی اکرم صلی اللہ علیہ وسلم نے فرمایا: ”اس ذات کی قسم جس کے دستِ قدرت میں میری جان ہے، اسی طرح تمہیں قیامت کے دن اپنے پروردگار کا دیدار کرنے میں مشکل پیش نہیں آئے گی، جس طرح تمہیں ان دونوں (یعنی سورج اور چاند) میں سے کسی ایک کو دیکھنے میں مشکل پیش نہیں آتی۔ قیامت کے دن بندہ اپنے پروردگار کی بارگاہ میں حاضر ہو گا تو پروردگار فرمائے گا: اے فلاں! کیا میں نے تمہیں پیدا نہیں کیا تھا؟ کیا میں نے دیکھنے اور سننے کی صلاحیت عطا نہیں کی تھی؟ کیا میں نے تمہاری شادی نہیں کروائی تھی؟ کیا میں نے تمہاری عزت افزائی نہیں کروائی تھی؟ کیا میں نے تمہارے لیے گھوڑوں اور اونٹوں کو مسخر نہیں کیا تھا؟ کیا میں نے تمہیں صاحبِ حیثیت نہیں بنایا تھا؟ تو وہ عرض کرے گا: جی ہاں، اے میرے پروردگار! پروردگار فرمائے گا: کیا تمہیں اندازہ تھا کہ تم میری بارگاہ میں حاضر ہو گے؟ وہ عرض کرے گا: جی نہیں، اے میرے پروردگار! پروردگار فرمائے گا: آج کے دن میں تمہیں اسی طرح بھلا دیتا ہوں، جس طرح تم مجھے بھول گئے تھے۔“ نبی اکرم صلی اللہ علیہ وسلم فرماتے ہیں: ”پھر دوسرا شخص پروردگار کی بارگاہ میں حاضر ہو گا۔ پروردگار فرمائے گا: اے فلاں! کیا میں نے تمہیں پیدا نہیں کیا؟ کیا میں نے تمہیں سماعت اور بصارت عطا نہیں کی؟ کیا میں نے تمہاری شادی نہیں کروائی؟ کیا میں نے تمہاری عزت افزائی نہیں کروائی؟ کیا میں نے تمہارے لیے گھوڑے اور اونٹ مسخر نہیں کیے؟ کیا میں نے تمہیں صاحبِ حیثیت نہیں بنایا تھا؟ تو وہ عرض کرے گا: جی ہاں، اے میرے پروردگار! تو پروردگار فرمائے گا: تم نے میرے لیے کیا تیاری کی؟ وہ عرض کرے گا: میں تجھ پر، تیری کتاب پر، تیرے رسول پر ایمان لایا، میں نے تسبیح کی، میں نے نماز ادا کی، میں نے روزہ رکھا۔ تو پروردگار فرمائے گا: اچھا، تو پھر ہم تمہارے خلاف گواہ نہ لے کے آئیں؟“ نبی اکرم صلی اللہ علیہ وسلم فرماتے ہیں: ”وہ بندہ اپنے دل میں سوچے گا: میرے خلاف کون گواہی دے سکتا ہے؟“ نبی اکرم صلی اللہ علیہ وسلم فرماتے ہیں: ”یہ وہ منافق شخص ہے جس پر اللہ تعالیٰ غضب ناک ہو گا۔ اس لیے اللہ تعالیٰ اس کو معذور کرے گا اور اس کے منہ پر مہر لگا دی جائے گی اور اس کے زانُو سے کہا جائے گا: تم کلام کرو، تو اس کا زانُو، اس کی ہڈیاں، اس کے پٹھے اس چیز کے بارے میں بات کریں گے جو وہ عمل کرتا رہا تھا۔ پھر ایک منادی یہ اعلان کرے گا: خبردار! ہر امت اس کے پیچھے چلی جائے جس کی وہ عبادت کرتی تھی، تو صلیب کے عبادت گزار صلیب کے پیچھے چلے جائیں گے، آگ کے پجاری آگ کے پیچھے چلے جائیں گے، بتوں کے پجاری بتوں کے پیچھے چلے جائیں گے، شیطان کے پجاری شیطان کے پیچھے چلے جائیں گے۔ ہر سرکش کا پجاری سرکش کے پیچھے جہنم کی طرف چلا جائے گا۔ اے اہل ایمان! پھر ہم باقی رہ جائیں گے، ہم جو مومن ہوں گے۔ ہمارا پروردگار ہمارے پاس آئے گا، ہم کھڑے ہوئے ہوں گے، وہ فرمائے گا: تم لوگ یہاں کیوں کھڑے ہوئے ہو؟ تو ہم عرض کریں گے: ہم اللہ کے مومن بندے ہیں، ہم اس پر ایمان لائے، ہم نے کسی کو اس کا شریک نہیں ٹھہرایا، ہم یہیں کھڑے رہیں گے جب تک ہمارا پروردگار نہیں آتا، وہ ہمارا پروردگار ہے، وہ ہمیں ثابت قدم رکھے گا، تو پروردگار فرمائے گا: کیا تم اسے پہچانتے ہو؟ تو ہم کہیں گے: اس کی ذات پاک ہے، جب وہ ہمیں پہچان کروائے گا تو ہم پہچان لیں گے۔“ سفیان نامی راوی کہتے ہیں: یہاں ایک کلمہ ہے جو میں تمہارے سامنے بیان نہیں کروں گا۔ نبی اکرم صلی اللہ علیہ وسلم فرماتے ہیں: ”پھر ہم چل پڑیں گے، یہاں تک کہ ہم پل صراط پر آئیں گے جس پر آگ کے بنے ہوئے آنکڑے ہوں گے جو لوگوں کو اچک رہے ہوں گے۔ اس مقام پر شفاعت حلال ہو گی (اور یہ کہا جائے گا:) «اللَّهُمَّ سَلِّمْ سَلِّمْ» ”اے اللہ! سلامتی عطا کر، سلامتی عطا کر۔“ جب پل سے پار ہو جائیں گے تو ہر وہ شخص جس نے اپنے مال میں سے کسی چیز کا جوڑا اللہ کی راہ میں خرچ کیا ہو گا، تو جنت کے تمام دربان اسے بلائیں گے اور کہیں گے: اے اللہ کے بندے! اے مسلمان! یہ بہتر ہے، ادھر آ جاؤ! اے اللہ کے بندے! اے مسلمان! ادھر آ جاؤ، یہ بہتر ہے، اے اللہ کے بندے! اے مسلمان! ادھر آ جاؤ، یہ بہتر ہے۔“ سیدنا ابوبکر رضی اللہ عنہ نے عرض کی—وہ اس وقت نبی اکرم صلی اللہ علیہ وسلم کے پاس موجود تھے—: ایسے شخص کو تو کوئی نقصان نہیں ہو گا، وہ ایک دروازے کو چھوڑ کر دوسرے سے داخل ہو جائے۔ نبی اکرم صلی اللہ علیہ وسلم نے ان کے کندھے پر ہاتھ پھیرتے ہوئے ارشاد فرمایا: ”مجھے یہ امید ہے کہ تم بھی ان میں سے ایک ہو گے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7445]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”اہل ایمان کے بچوں کی کفالت جنت میں سیدنا ابراہیم علیہ السلام کریں گے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7446]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جنت اور جہنم میں بحث ہو گئی۔ جہنم نے کہا: مجھے تکبر کرنے والوں اور جابر لوگوں کے ذریعے ترجیح دی گئی ہے۔ جنت نے کہا: میرے اندر صرف کمزور اور عام سے لوگ داخل ہوں گے۔ اللہ تعالیٰ نے جنت سے فرمایا: تم میری رحمت ہو، میں تمہارے ذریعے اپنے بندوں میں سے جس پر چاہوں گا رحمت کروں گا، اور اللہ تعالیٰ نے جہنم سے فرمایا: تم میرا عذاب ہو، میں تمہارے ذریعے اپنے بندوں میں سے جسے چاہوں گا عذاب دوں گا اور تم میں سے ہر ایک کو بھرنا ہے۔“ (نبی اکرم صلی اللہ علیہ وسلم فرماتے ہیں:) ”جہاں تک جہنم کا تعلق ہے، تو وہ اس وقت تک نہیں بھرے گی جب تک اللہ تعالیٰ اپنا قدم اس میں نہیں رکھے گا، تو وہ عرض کرے گی: «قَطْ قَطْ» ”بس بس“۔ اس وقت وہ بھر جائے گی اور اس کا ایک حصہ دوسرے حصے کو اپنی لپیٹ میں لے لے گا۔ اللہ تعالیٰ کسی کے ساتھ ظلم نہیں کرے گا، جہاں تک جنت کا تعلق ہے تو اس کے لیے اللہ تعالیٰ نے مخلوق کو پیدا کیا ہے۔“ (امام ابن حبان رحمہ اللہ فرماتے ہیں:) پاؤں سے مراد کفار کے وہ مقامات ہیں جہاں وہ اللہ تعالیٰ کی بجائے دوسروں کی عبادت کیا کرتے تھے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7447]

اردو ترجمہ · UrduUnverified translation

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جنت میں اتنی جگہ باقی رہ جائے گی، جس کے بارے میں اللہ تعالیٰ کو منظور ہوگا کہ وہ باقی رہے، پھر اللہ تعالیٰ اس کے لیے نئی مخلوق پیدا کرے گا جتنی وہ چاہے گا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7448]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب اہل جنت، جنت میں اور اہل جہنم، جہنم میں داخل ہوں گے تو ایک منادی یہ اعلان کرے گا: اے اہل جنت! تم ہمیشہ رہو گے، اس میں تمہیں موت نہیں آئے گی۔ اے اہل جہنم! تم ہمیشہ رہو گے، اس میں تمہیں موت نہیں آئے گی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7449]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”قیامت کے دن موت کو لایا جائے گا اور اسے پل صراط پر ٹھہرا دیا جائے گا اور کہا جائے گا: اے اہل جنت! تو وہ لوگ خوف زدہ ہو کر اور پریشان ہو کر چلتے ہوئے آئیں گے اور اپنی جگہ سے باہر نکلیں گے جہاں وہ رہتے ہوں گے، پھر کہا جائے گا: اے اہل جہنم! تو وہ خوش ہوتے ہوئے اور خوش خبری حاصل کرتے ہوئے اس جگہ سے نکلیں گے جہاں وہ رہ رہے ہوں گے، تو پوچھا جائے گا: کیا تم اسے جانتے ہو؟ تو وہ عرض کریں گے: جی ہاں! اے ہمارے پروردگار! یہ موت ہے۔ پھر پروردگار اس کے بارے میں حکم دے گا تو اسے پل صراط پر ذبح کر دیا جائے گا۔ پھر دونوں فریقوں سے یہ کہا جائے گا: تم ہمیشہ یہاں رہو گے، تمہیں اس میں کبھی موت نہیں آئے گی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7450]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جو بھی شخص جنت میں داخل ہو گا اسے جہنم کا ٹھکانہ دکھایا جائے گا کہ اگر اس نے برائی کی ہوتی (تو اسے یہ جگہ ملنی تھی) تاکہ اس کے شکر میں اضافہ ہو، اور جو بھی شخص جہنم میں داخل ہو گا اسے جنت کا ٹھکانہ دکھایا جائے گا کہ اگر اس نے اچھائی کی ہوتی (تو اسے یہ جگہ ملتی تھی) تاکہ اس کو حسرت ہو۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7451]

اردو ترجمہ · UrduUnverified translation

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اہل جنت میں سے کوئی بھی شخص اس بات کی آرزو نہیں کرے گا کہ وہ دوبارہ دنیا کی طرف جائے اگرچہ اس کو دنیا کا دس گنا مل جائے۔ صرف شہید کا معاملہ مختلف ہے کیونکہ وہ اس بات کا آرزو مند ہوگا کہ وہ دنیا میں واپس جائے اور اسے دس مرتبہ شہید کر دیا جائے کیونکہ وہ (شہید ہونے کی) فضیلت دیکھ لے گا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7452]

اردو ترجمہ · UrduUnverified translation

سیدنا عیاض بن حمار رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”اہلِ جنت تین طرح کے لوگ ہوں گے۔ ایسا حکمران جو عدل کرتا ہو، اسے توفیق دی گئی ہو، ایسا شخص جو رحیم ہو، نرم دل ہو، ہر رشتے دار اور مسلمان کے ساتھ اچھائی کرتا ہو اور ایسا شخص جو غریب ہو، مانگنے سے بچتا ہو اور صدقہ و خیرات کرتا ہو۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7453]

اردو ترجمہ · UrduUnverified translation

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جنت اور جہنم نے فخر کا اظہار کیا۔ جہنم نے کہا: میرے اندر جابر، بادشاہ اور معززین داخل ہوں گے۔ جنت نے کہا: میرے اندر غریب اور مسکین داخل ہوں گے، تو اللہ تعالیٰ نے جہنم سے فرمایا: تم میرا عذاب ہو، میں جیسے چاہوں گا تمہارے ذریعے (عذاب دوں گا) اور جنت سے فرمایا: تم میری رحمت ہو، تم ہر چیز سے وسیع ہو، ویسے تم دونوں میں سے ہر ایک نے بھرنا ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7454]

اردو ترجمہ · UrduUnverified translation

سیدنا عمران بن حصین رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”میں نے جہنم میں جھانک کر دیکھا تو مجھے اس کے رہنے والوں میں اکثریت خواتین کی نظر آئی، اور میں نے جنت میں جھانک کر دیکھا تو اس میں اکثریت غریبوں کی نظر آئی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7455]

اردو ترجمہ · UrduUnverified translation

سیدنا اسامہ بن زید رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”میں نے جنت کی طرف دیکھا تو اہل جنت میں اکثریت غریبوں کی تھی، میں نے جہنم کی طرف دیکھا تو اہل جہنم میں اکثریت خواتین کی تھی اور خوش حال لوگوں کو روک لیا گیا تھا اور کفار کو جہنم کی طرف لے جانے کا حکم دیا گیا تھا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا جنت اور جہنم دونوں میں دیکھنا آپ کے جسم مبارک کے ہمراہ تھا اور آنکھوں کے ذریعے دیکھنا تھا، یہ اللہ تعالیٰ کی طرف سے آپ پر فضل تھا تاکہ اس کے ذریعے آپ کے اور دیگر انبیاء کے درمیان فرق ہو جائے۔ جہاں تک ان اوصاف کا تعلق ہے جو آپ نے بیان فرمائے کہ آپ نے اہل جنت کو ان کے اوصاف کے ساتھ موصوف دیکھا اور اہل جہنم کو ان کے اوصاف کے ساتھ موصوف دیکھا تھا، تو یہ وہ اوصاف ہیں جن کی شکل آپ کے سامنے پیش کی گئی تاکہ آپ اس کے ذریعے اپنی امت کے لیے دونوں جہانوں میں اسباب کے اختتام کے مقاصد کے بارے میں جان لیں، تاکہ آپ ان اوصاف کی اطلاع کے ذریعے اپنی امت کو ترغیب دیں تاکہ وہ رغبت حاصل کریں اور جہنم کے اوصاف کے ذریعے انہیں ڈرائیں تاکہ وہ ان خصوصیات کو اختیار کرنے سے بچیں جو جہنم کی طرف لے جا سکتی ہیں۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7456]

اردو ترجمہ · UrduUnverified translation

سیدنا عمران بن حصین رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جنت کے رہنے والوں میں کم تعداد خواتین کی ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7457]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ بیان کرتے ہیں: نبی اکرم صلی اللہ علیہ وسلم نے ہمیں خطبہ دیا، آپ نے چمڑے سے بنے ہوئے خیمے کے ساتھ ٹیک لگا لی، پھر آپ نے ارشاد فرمایا: ” «أَمَّا بَعْدُ!» کیا تم لوگ اس بات سے راضی ہو کہ تم اہل جنت کا چوتھائی حصہ ہو؟“ ہم نے عرض کی: جی ہاں یا رسول اللہ! نبی اکرم صلی اللہ علیہ وسلم نے فرمایا: ”اس ذات کی قسم جس کے دست قدرت میں میری جان ہے! مجھے یہ امید ہے کہ تم اہل جنت کا نصف ہو گے اور جنت میں صرف مسلمان داخل ہو گا، قیامت کے دن کفار کے مقابلے میں عدد کے اعتبار سے مسلمانوں کی تعداد اس طرح ہو گی، جس طرح سیاہ رنگ کے بیل کے جسم پر سفید بال ہو، یا سفید رنگ کے بیل کے جسم پر سیاہ بال ہو۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7458]

اردو ترجمہ · UrduUnverified translation

ابن بریدہ اپنے والد رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”اہلِ جنت کی ایک سو بیس صفیں ہوں گی جن میں سے 80 صفیں اس امت کی ہوں گی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7459]

اردو ترجمہ · UrduUnverified translation

ابن بریدہ رحمہ اللہ اپنے والد رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”اہلِ جنت کی ایک سو بیس صفیں ہوں گی، جن میں سے اسی صفیں اس امت کی ہوں گی اور چالیس صفیں دیگر تمام امتوں کی ہوں گی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7460]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میری امت سے تعلق رکھنے والے دو قسم کے لوگوں کو میں نے نہیں دیکھا۔ ایک وہ لوگ جن کے پاس ایسے کوڑے ہوں گے جو گائے کی دم کی طرح ہوں گے وہ کوڑے لوگوں کو ماریں گے اور وہ عورتیں، جو لباس پہننے کے باوجود برہنہ ہوں گی وہ «مَائِلَاتٌ» ”مائل کرنے والی“ اور «مُمِیلَاتٌ» ”مائل کروانے والی“ ہوں گی ان کے سر بختی اونٹوں کی کوہان کی طرح ہوں گے۔ یہ لوگ جنت میں داخل نہیں ہوں گے اور نہ ہی جنت کی خوشبو کو پائیں گے اگرچہ اس کی خوشبو اتنے، اتنے فاصلے سے آ جاتی ہے۔“ (امام ابن حبان رحمہ اللہ فرماتے ہیں:) «مَائِلَة» سے مراد اترانے والی عورت ہے اور «مَمِیلَة» سے مراد موٹی عورت ہے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7461]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”تمہاری وہ آگ جسے تم جلاتے ہو یہ جہنم کی آگ کا سترواں (70 واں) جز ہے۔“ لوگوں نے عرض کی: یا رسول اللہ! یہی (آگ) کافی ہے۔ نبی اکرم صلی اللہ علیہ وسلم نے فرمایا: ”اسے انہتر (69) گنا فضیلت عطا کی گئی ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7462]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ انہیں نبی اکرم صلی اللہ علیہ وسلم کے اس فرمان کا پتہ چلا ہے: ”تمہاری یہ آگ جہنم کی آگ کا 70 واں جز ہے۔ اس پر سمندر کا پانی ڈالا گیا۔ اگر ایسا نہ ہوتا تو اللہ تعالیٰ نے اس میں کسی کے لیے فائدہ نہ رکھا ہوتا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7463]

اردو ترجمہ · UrduUnverified translation

سیدنا عبادہ بن صامت رضی اللہ عنہ کے بارے میں یہ بات منقول ہے کہ وہ بیت المقدس کی مشرقی دیوار پر کھڑے ہوئے اور رونے لگے۔ کسی نے کہا: اے ابو ولید! آپ کیوں رو رہے ہیں؟ تو انہوں نے بتایا: اس جگہ کے بارے میں نبی اکرم صلی اللہ علیہ وسلم نے ہمیں بتایا تھا: ”آپ نے یہاں سے جہنم کو دیکھا تھا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7464]

اردو ترجمہ · UrduUnverified translation

ابوسلمہ بن عبدالرحمن رحمہ اللہ بیان کرتے ہیں کہ سیدنا عبادہ بن صامت رضی اللہ عنہ بیت المقدس کی مشرقی دیوار پر کھڑے ہوئے اور رونے لگے۔ ان سے دریافت کیا گیا، تو انہوں نے فرمایا: اس جگہ کے بارے میں نبی اکرم صلی اللہ علیہ وسلم نے یہ بتایا تھا کہ ”یہاں سے آپ صلی اللہ علیہ وسلم نے جہنم کے (داروغہ) مالک کو دیکھا تھا کہ وہ انگاروں کو الٹ پلٹ رہا تھا، جیسے وہ انگور کے دانے ہوں۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7465]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جہنم نے اپنے پروردگار کی بارگاہ میں شکایت کی، اس نے عرض کی: اے میرے پروردگار! میرا کچھ حصہ دوسرے کو کھا جاتا ہے، تو مجھے سانس لینے کی اجازت دے، تو اللہ تعالیٰ نے اسے ہر سال میں دو مرتبہ سانس لینے کی اجازت دی۔ ایک مرتبہ سردی کے موسم میں اور ایک مرتبہ گرمی کے موسم میں، تو یہ سردی کی وہ شدت ہوتی ہے جسے تم سردی کے موسم میں پاتے ہو اور گرمی کی وہ شدت ہوتی ہے جو جہنم کی تپش کا حصہ ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7466]

اردو ترجمہ · UrduUnverified translation

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ” «وَيْلٌ» جہنم میں ایک وادی ہے، کافر شخص اس کی تہہ تک پہنچنے سے پہلے چالیس سال تک اس میں گرتا رہے گا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7467]