Hadith 5711–5752

اردو ترجمہ · UrduUnverified translation

سیدنا جندب بن عبداللہ بجلی رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”ایک شخص نے کہا: اللہ کی قسم! اللہ تعالیٰ فلاں شخص کی مغفرت نہیں کرے گا، تو اللہ تعالیٰ نے فرمایا: میں نے فلاں کی مغفرت کر دی اور تمہارے عمل کو ضائع کر دیا۔“ [صحیح ابن حبان/كتاب الحظر والإباحة/حدیث: 5711]

اردو ترجمہ · UrduUnverified translation

سیدنا ضمضم بن جوس رضی اللہ عنہ بیان کرتے ہیں کہ میں نبی اکرم صلی اللہ علیہ وسلم کی مسجد میں داخل ہوا تو وہاں ایک عمر رسیدہ شخص تھا جس کے بالوں کا رنگ زرد تھا اور اس کے سامنے کے دانت انتہائی چمکدار تھے، اس کے ساتھ ایک نوجوان تھا جو بہت خوبصورت اور جوان تھا، اس بوڑھے شخص نے کہا: اے یمامی! تم آگے آؤ، تم کسی بھی شخص کو یہ کبھی نہ کہنا کہ ”اللہ تعالیٰ تمہاری مغفرت نہ کرے“ یا ”اللہ کی قسم! اللہ تعالیٰ تمہیں کبھی جنت میں داخل نہیں کرے گا“۔ میں نے دریافت کیا: آپ کون ہیں؟ اللہ تعالیٰ آپ پر رحم کرے! انہوں نے جواب دیا: میں ابوہریرہ (رضی اللہ عنہ) ہوں۔ میں نے کہا: اس طرح کا کلمہ تو ہم میں سے کوئی شخص اپنی بیوی یا خادم کے لیے استعمال کرتا ہے جب وہ اس پر غصے کا اظہار کرتا ہے، تو سیدنا ابوہریرہ رضی اللہ عنہ نے فرمایا: تم یہ نہ کہنا کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بنی اسرائیل میں دو آدمی تھے جو ایک دوسرے کے بھائی بنے ہوئے تھے، ان میں سے ایک شخص عبادت میں اہتمام کرتا تھا اور دوسرا گنہگار تھا، عبادت گزار شخص نے گناہ کرنے والے شخص کو دیکھا تو اس سے کہا: تم اس میں کمی کر دو، تو دوسرے شخص نے کہا: تم یہ معاملہ میرے اور میرے پروردگار کے درمیان رہنے دو۔ نبی اکرم صلی اللہ علیہ وسلم فرماتے ہیں کہ اس شخص نے اپنی بات اس کے سامنے دہرائی تو اس شخص نے آگے سے یہی جواب دیا: تم مجھے اور میرے پروردگار کو چھوڑ دو، یہاں تک کہ عبادت گزار نے ایک دن اسے گناہ کرتے ہوئے دیکھا تو اسے اس کا گناہ بڑا لگا، اس نے کہا: تمہارا ستیاناس ہو! تم گناہ کرنے سے باز آ جاؤ۔ دوسرے شخص نے کہا: تم مجھے اور میرے پروردگار کو چھوڑ دو، کیا تمہیں مجھ پر نگران بنا کر بھیجا گیا ہے؟ تو عبادت گزار نے کہا: اللہ کی قسم! اللہ تعالیٰ تمہاری مغفرت کبھی نہیں کرے گا (راوی کو شک ہے شاید یہ الفاظ ہیں) اس نے کہا: اللہ تعالیٰ تمہیں کبھی جنت میں داخل نہیں کرے گا۔ (نبی اکرم صلی اللہ علیہ وسلم فرماتے ہیں) پھر ان دونوں کی طرف فرشتے کو بھیجا گیا، اس نے ان دونوں کی ارواح کو قبض کر لیا، وہ دونوں اللہ تعالیٰ کی بارگاہ میں اکٹھے ہوئے تو پروردگار نے عبادت گزار سے دریافت کیا: کیا تم عالم ہو یا تم اس بات پر قدرت رکھتے ہو کہ جو کچھ میرے اختیار میں ہے؟ یا تم میری رحمت کو میرے بندے پر ہونے سے روکتے ہو؟ تم جنت کی طرف جاؤ۔ (راوی کہتے ہیں: یعنی اللہ تعالیٰ نے گنہگار شخص سے یہ فرمایا) اور دوسرے سے فرمایا: اسے جہنم کی طرف لے جاؤ۔ (نبی اکرم صلی اللہ علیہ وسلم یا شاید سیدنا ابوہریرہ رضی اللہ عنہ نے فرمایا:) اس ذات کی قسم جس کے دستِ قدرت میں میری جان ہے! اس نے ایک ایسی بات کہی ہے جس نے اس کی دنیا اور آخرت کو برباد کر دیا۔“ [صحیح ابن حبان/كتاب الحظر والإباحة/حدیث: 5712]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”کوئی بھی شخص یہ نہ کہے: زمانے کا ستیاناس ہو کیونکہ اللہ تعالیٰ ہی زمانے (کو چلانے والا) ہے۔“ [صحیح ابن حبان/كتاب الحظر والإباحة/حدیث: 5713]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک شخص کوئی بات کہتا ہے جس کے ذریعے وہ اپنے ساتھیوں کو ہنسا دیتا ہے لیکن وہ اس کی وجہ سے (جہنم میں) اس سے زیادہ گہرائی میں جائے گا جتنا ثریا (ستارا اونچا ہے)۔“ [صحیح ابن حبان/كتاب الحظر والإباحة/حدیث: 5716]

اردو ترجمہ · UrduUnverified translation

سیدنا عدی بن حاتم رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”آدمی کی خوش بختی اور اس کی بدبختی اس کے دونوں جبڑوں کے درمیان ہے۔“ وہب نامی راوی کہتے ہیں: یعنی اس کی زبان میں ہے۔ [صحیح ابن حبان/كتاب الحظر والإباحة/حدیث: 5717]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں: مشرق کی طرف سے آنے والے دو آدمی خطبہ دینے کے لیے کھڑے ہوئے، ان دونوں نے بات چیت کی، پھر وہ دونوں بیٹھ گئے، پھر سیدنا ثابت بن قیس رضی اللہ عنہ، جو نبی اکرم صلی اللہ علیہ وسلم کے خطیب تھے، وہ کھڑے ہوئے، انہوں نے بات چیت کی، لوگوں کو ان کا کلام پسند آیا، پھر نبی اکرم صلی اللہ علیہ وسلم کھڑے ہوئے، آپ صلی اللہ علیہ وسلم نے خطبہ دیا اور ارشاد فرمایا: ”اے لوگو! عام محاورے کے مطابق بات چیت کیا کرو، کیونکہ کلام کو زیادہ بنانا سنوارنا شیطان کی طرف سے ہوتا ہے اور بعض بیان جادو ہوتے ہیں۔“ [صحیح ابن حبان/كتاب الحظر والإباحة/حدیث: 5718]

اردو ترجمہ · UrduUnverified translation

امام شعبی بیان کرتے ہیں: سیدنا مغیرہ بن شعبہ رضی اللہ عنہ کے سیکرٹری نے مجھے یہ بات بتائی: سیدنا معاویہ رضی اللہ عنہ نے سیدنا مغیرہ رضی اللہ عنہ کو خط لکھا کہ آپ مجھے کوئی ایسی حدیث لکھ کر بھیجیں جو آپ نے نبی اکرم صلی اللہ علیہ وسلم کی زبانی سنی ہو، تو سیدنا مغیرہ رضی اللہ عنہ نے انہیں یہ لکھوایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بے شک اللہ تعالیٰ نے تمہارے لیے تین چیزوں کو ناپسندیدہ قرار دیا ہے: فضول بحث کرنا، مال کو ضائع کرنا اور بکثرت سوال کرنا (یا مانگنا)۔“ ابن علیہ کہتے ہیں: مال کو ضائع کرنے سے مراد یہ ہے کہ اسے ناحق طور پر خرچ کیا جائے۔ [صحیح ابن حبان/كتاب الحظر والإباحة/حدیث: 5719]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے تمہارے لیے فضول بحث کرنے، بکثرت سوال کرنے (یا مانگنے) اور مال کو ضائع کرنے کو ناپسندیدہ قرار دیا ہے۔“ [صحیح ابن حبان/كتاب الحظر والإباحة/حدیث: 5720]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ انہیں نبی اکرم صلی اللہ علیہ وسلم کی یہ حدیث پہنچی ہے، نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ کے نزدیک طاقتور مومن، کمزور مومن سے زیادہ محبوب ہوتا ہے اور ویسے دونوں بھلائی پر ہوتے ہیں، تم اس چیز کی حرص کرو جو تمہیں فائدہ دے گی اور تم عاجز نہ آ جاؤ، اگر کوئی چیز تم پر غالب آ جائے تو تم یہ کہو: «قَدَرُ اللَّهِ وَمَا شَاءَ فَعَلَ» ”یہ اللہ تعالیٰ کی مقرر کردہ تقدیر تھی اور جو اس کو منظور تھا (وہی ہوا)“ اور تم ”اگر“ کہنے سے بچو! (یعنی یہ کہنا کہ اگر یہ ہو جاتا، تو وہ ہو جاتا) کیونکہ ”اگر“ شیطان کے کام کا دروازہ کھولتا ہے۔“ [صحیح ابن حبان/كتاب الحظر والإباحة/حدیث: 5721]

اردو ترجمہ · UrduUnverified translation

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”طاقت ور مومن اللہ تعالیٰ کے نزدیک کمزور مومن سے زیادہ بہتر اور زیادہ پسندیدہ ہوتا ہے، ویسے دونوں ہی بھلائی پر ہوتے ہیں، تم اس چیز کا لالچ کرو جس کے ذریعے تم نفع حاصل کرو اور اس بارے میں اللہ تعالیٰ سے مدد حاصل کرو اور تم عاجز نہ آ جاؤ، اگر تمہیں کوئی نقصان لاحق ہو تو یہ نہ کہو کہ اگر میں نے اس اس طرح کر دیا ہوتا (تو یوں ہو جاتا) بلکہ یہ کہو: «قَدَرُ اللَّهِ وَمَا شَاءَ فَعَلَ» ”یہ اللہ تعالیٰ کی تقدیر (کے مطابق تھا) جو اس نے چاہا ویسا ہی کیا“ کیونکہ لفظ ”اگر“ شیطان کے عمل کا دروازہ کھولتا ہے۔“ (امام ابن حبان رحمہ اللہ فرماتے ہیں:) اس بات کا احتمال موجود ہے کہ ابن عجلان نے یہ روایت اعرج سے سنی ہو اور انہوں نے یہ روایت محمد بن یحییٰ کے حوالے سے اعرج سے سنی ہو، تو ایک مرتبہ انہوں نے یہ روایت ان کے حوالے سے نقل کر دی اور ایک مرتبہ یہ روایت ایک شخص کے حوالے سے نقل کر دی۔ [صحیح ابن حبان/كتاب الحظر والإباحة/حدیث: 5722]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”کوئی شخص یہ ہرگز نہ کہے: «زَرَعْتُ» ”میں نے زراعت کی“، بلکہ وہ یہ کہے: «حَرَثْتُ» ”میں نے کھیتی باڑی کی“۔“ سیدنا ابوہریرہ رضی اللہ عنہ فرماتے ہیں کیا تم نے اللہ تعالیٰ کا یہ فرمان نہیں سنا: ﴿أَفَرَأَيْتُمْ مَا تَحْرُثُونَ * أَأَنْتُمْ تَزْرَعُونَهُ أَمْ نَحْنُ الزَّارِعُونَ﴾ [سورة الواقعة: 63-64] ”تمہاری کیا رائے ہے کیا تم نے اس میں کھیتی باڑی کی ہے کیا تم زراعت کرتے ہو یا ہم زراعت کرنے والے ہیں۔“ [صحیح ابن حبان/كتاب الحظر والإباحة/حدیث: 5723]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا ہے: ”کوئی شخص یہ ہرگز نہ کہے کہ «خَبُثَتْ نَفْسِي» ”میرا نفس خبیث ہو گیا ہے“ بلکہ وہ یہ کہے کہ «لَقِسَتْ نَفْسِي» ”یہ تھکاوٹ کا شکار ہو گیا ہے۔““ [صحیح ابن حبان/كتاب الحظر والإباحة/حدیث: 5724]

اردو ترجمہ · UrduUnverified translation

سیدنا جابر بن سمرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کے اصحاب میں سے ایک صاحب نے خواب دیکھا کہ ان کی ملاقات کچھ یہودیوں سے ہوئی، انہیں ان کی ہیئت پسند آئی تو انہوں نے کہا: تم لوگ بالکل ٹھیک قوم ہو اگر تم لوگ یہ نہ کہتے کہ سیدنا عزیر علیہ السلام اللہ کے بیٹے ہیں، ان یہودیوں نے کہا: تم لوگ بھی ٹھیک قوم ہو اگر تم لوگ یہ نہ کہتے کہ جو اللہ نے چاہا اور جو محمد صلی اللہ علیہ وسلم نے چاہا، پھر ان کی ملاقات کچھ عیسائیوں سے ہوئی، انہیں ان کی ہیئت پسند آئی تو انہوں نے کہا: تم لوگ بالکل ٹھیک ہو اگر تم لوگ یہ نہ کہو کہ سیدنا مسیح علیہ السلام اللہ کے بیٹے ہیں، تو ان عیسائیوں نے بھی کہا: تم لوگ بھی بالکل ٹھیک ہو اگر تم لوگ یہ نہ کہو کہ جو اللہ نے چاہا اور جو محمد صلی اللہ علیہ وسلم نے چاہا۔ اگلے دن صبح انہوں نے یہ واقعہ نبی اکرم صلی اللہ علیہ وسلم کو سنایا تو نبی اکرم صلی اللہ علیہ وسلم نے ارشاد فرمایا: ”میں پہلے بھی یہ الفاظ تمہاری زبانی سنتا تھا اور تم اس کے ذریعے مجھے اذیت پہنچاتے تھے، اب تم یہ نہ کہنا: جو اللہ نے چاہا اور جو محمد صلی اللہ علیہ وسلم نے چاہا۔“ [صحیح ابن حبان/كتاب الحظر والإباحة/حدیث: 5725]

اردو ترجمہ · UrduUnverified translation

سیدنا عیاض بن حمار رضی اللہ عنہ بیان کرتے ہیں: میں نے عرض کی: یا رسول اللہ صلی اللہ علیہ وسلم ! میری قوم سے تعلق رکھنے والا ایک شخص مجھے برا کہتا ہے، وہ مجھ سے کم مرتبے کا مالک ہے، کیا میں اس سے انتقام لوں؟ نبی اکرم صلی اللہ علیہ وسلم نے ارشاد فرمایا: ”ایک دوسرے کو گالی دینے والے دونوں افراد دو شیطان ہوتے ہیں، وہ دونوں جھگڑا کرتے ہیں اور جھوٹ بولتے ہیں۔“ [صحیح ابن حبان/كتاب الحظر والإباحة/حدیث: 5726]

اردو ترجمہ · UrduUnverified translation

سیدنا عیاض بن حمار رضی اللہ عنہ بیان کرتے ہیں: میں نے عرض کی: یا رسول اللہ صلی اللہ علیہ وسلم ! میری قوم کا ایک شخص مجھے برا کہتا ہے وہ مجھ سے کم تر حیثیت کا مالک ہے تو کیا مجھے کوئی گناہ ہو گا اگر میں اس سے کوئی انتقام لوں؟ تو نبی اکرم صلی اللہ علیہ وسلم نے ارشاد فرمایا: ”ایک دوسرے کو برا کہنے والے دو افراد دونوں شیطان ہوتے ہیں جو دونوں بات کو بڑھاتے ہیں اور غلط بیانی کرتے ہیں۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم نے برا کہنے والے شخص کے لیے لفظ شیطان مجاورت کے طور پر استعمال کیا ہے کیونکہ شیطان اس شخص کی رہنمائی اس فعل کی طرف کرتا ہے یہاں تک کہ وہ شخص بات بڑھاتا ہے اور جھوٹ بولتا ہے اس سے یہ مراد نہیں ہے کہ برا کہنے والے دونوں افراد واقعی شیطان بن جاتے ہیں۔ [صحیح ابن حبان/كتاب الحظر والإباحة/حدیث: 5727]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ایک دوسرے کو برا کہنے والے دونوں افراد جو بھی کہتے ہیں، اس کا وبال ان دونوں میں سے آغاز کرنے والے پر ہوتا ہے جب تک مظلوم زیادتی کا مرتکب نہ ہو۔“ [صحیح ابن حبان/كتاب الحظر والإباحة/حدیث: 5728]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ایک دوسرے کو برا کہنے والے دو افراد جو بھی ایک دوسرے کو برا کہتے ہیں، اس کا وبال شروع کرنے والے پر ہوتا ہے جب تک مظلوم زیادتی نہ کرے۔“ [صحیح ابن حبان/كتاب الحظر والإباحة/حدیث: 5729]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک شرابی کے پاس تشریف لائے، آپ صلی اللہ علیہ وسلم نے فرمایا: ”تم لوگ اس کی پٹائی کرو۔“ تو ہم میں سے کسی شخص نے اسے ہاتھ کے ذریعے مارا، کسی نے اسے جوتے کے ذریعے مارا، حاضرین میں سے ایک صاحب نے کہا: اللہ تعالیٰ تمہیں رسوا کرے، تو نبی اکرم صلی اللہ علیہ وسلم نے فرمایا: ”تم اس طرح نہ کہو، تم اس کے خلاف شیطان کی مدد نہ کرو۔“ [صحیح ابن حبان/كتاب الحظر والإباحة/حدیث: 5730]

اردو ترجمہ · UrduUnverified translation

سیدنا زید بن خالد جہنی رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”مرغ کو برا نہ کہو کیونکہ وہ نماز کی طرف بلاتا ہے۔“ [صحیح ابن حبان/كتاب الحظر والإباحة/حدیث: 5731]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”بے شک ہوا، اللہ تعالیٰ کی طرف سے آتی ہے جو رحمت کو لے کر آتی ہے اور عذاب کو بھی لے کر آتی ہے، تو تم اسے برا نہ کہو، تم اللہ تعالیٰ سے اس کی بھلائی مانگو اور اس کے شر سے اللہ تعالیٰ کی پناہ مانگو۔“ [صحیح ابن حبان/كتاب الحظر والإباحة/حدیث: 5732]

اردو ترجمہ · UrduUnverified translation

سیدہ ام کلثوم بنت عقبہ رضی اللہ عنہا بیان کرتی ہیں کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”وہ شخص جھوٹا نہیں ہوتا جو (غلط بیانی کر کے) لوگوں کے درمیان صلح کرواتا ہے، وہ بھلائی پھیلانا چاہتا ہے (راوی کو شک ہے شاید یہ الفاظ ہیں) وہ بھلائی کی بات کہتا ہے۔“ [صحیح ابن حبان/كتاب الحظر والإباحة/حدیث: 5733]

اردو ترجمہ · UrduUnverified translation

سیدنا ابوبکر صدیق رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”تم پر سچائی کو اختیار کرنا لازم ہے کیونکہ وہ نیکی کے ساتھ ہوتی ہے اور یہ دونوں جنت میں ہوں گی اور تم پر جھوٹ سے بچنا لازم ہے کیونکہ یہ گناہوں کے ساتھ ہوتا ہے اور یہ دونوں جہنم میں ہوں گے۔“ [صحیح ابن حبان/كتاب الحظر والإباحة/حدیث: 5734]

اردو ترجمہ · UrduUnverified translation

سیدنا ابوبرزہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”خبردار! بے شک جھوٹ چہرے کو سیاہ کر دیتا ہے اور چغلی کرنا قبر کے عذاب کا باعث ہے۔“ [صحیح ابن حبان/كتاب الحظر والإباحة/حدیث: 5735]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: کوئی بھی برائی نبی اکرم صلی اللہ علیہ وسلم کے نزدیک جھوٹ سے زیادہ ناپسندیدہ نہیں تھی، بعض اوقات کوئی شخص نبی اکرم صلی اللہ علیہ وسلم کے سامنے کوئی غلط بیانی کرتا تو یہ بات مسلسل آپ کے ذہن میں رہتی، جب تک آپ کو اس بات کا پتہ نہیں چل جاتا کہ اس نے بعد میں نئے سرے سے توبہ کر لی ہے۔ [صحیح ابن حبان/كتاب الحظر والإباحة/حدیث: 5736]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”سیدنا ابراہیم علیہ السلام نے کبھی غلط بیانی نہیں کی، صرف تین مرتبہ انہوں نے (ذومعنی کی)، دو مرتبہ اللہ تعالیٰ کی ذات کے بارے میں جب انہوں نے یہ کہا: ﴿إِنِّي سَقِيمٌ﴾ [سورة الصافات: 89] ”میں بیمار ہوں“ اور یہ کہا: ﴿بَلْ فَعَلَهُ كَبِيرُهُمْ هَذَا﴾ [سورة الأنبياء: 63] ”بلکہ ان میں سے بڑے نے ایسا کیا ہے“۔“ نبی اکرم صلی اللہ علیہ وسلم فرماتے ہیں: ”ایک مرتبہ ان کا گزر ایک ظالم حکمران کے پاس سے ہوا، سیدنا ابراہیم علیہ السلام کے ساتھ ان کی اہلیہ سیدہ سارہ رضی اللہ عنہا بھی تھیں، اس بادشاہ کو بتایا گیا کہ یہاں ایک شخص ہے جس کے ساتھ ایک انتہائی خوبصورت خاتون ہے۔“ نبی اکرم صلی اللہ علیہ وسلم فرماتے ہیں: ”اس شخص نے سیدنا ابراہیم علیہ السلام کو بلوایا، سیدنا ابراہیم علیہ السلام اس کے پاس گئے، اس نے ان سے سوالات کیے تو سیدنا ابراہیم علیہ السلام نے بتایا: یہ میری (دینی) بہن ہے۔“ نبی اکرم صلی اللہ علیہ وسلم فرماتے ہیں: ”سیدنا ابراہیم علیہ السلام سیدہ سارہ رضی اللہ عنہا کے پاس آئے اور انہیں بتایا کہ اس حکمران نے مجھ سے تمہارے بارے میں دریافت کیا تھا تو میں نے اسے بتایا: تم میری بہن ہو، تو تم اللہ کی کتاب میں میری بہن ہو، اس لیے تم مجھے جھوٹا قرار نہ دینا۔“ نبی اکرم صلی اللہ علیہ وسلم فرماتے ہیں: ”جب اس حکمران نے سیدہ سارہ رضی اللہ عنہا کو دیکھا تو وہ ان کے پاس آنے لگا، سیدہ سارہ رضی اللہ عنہا نے اس کے لیے دعائے ضرر کی تو وہ گرفت میں آ گیا، اس شخص نے کہا: اللہ تعالیٰ سے میرے لیے دعا کیجیے، میرے اوپر یہ بات لازم ہے میں دوبارہ یہ غلطی نہیں کروں گا، پھر سیدہ سارہ رضی اللہ عنہا نے اس کے حق میں دعا کی، وہ دوبارہ سیدہ سارہ رضی اللہ عنہا کے قریب آنے لگا، سیدہ سارہ رضی اللہ عنہا نے پھر بددعا کی تو اس پر دوبارہ گرفت ہوئی جو پہلی سے زیادہ سخت تھی، اس نے کہا: آپ اللہ تعالیٰ سے میرے حق میں دعا کیجیے، مجھ پر یہ بات لازم ہے میں دوبارہ یہ حرکت نہیں کروں گا۔ سیدہ سارہ رضی اللہ عنہا نے پھر اس کے لیے دعا کی، وہ پھر آگے آنے لگا، سیدہ سارہ رضی اللہ عنہا نے پھر دعائے ضرر کی تو اس کو دوبارہ گرفت میں لیا گیا جو پہلی دونوں مرتبہ کی گرفت سے زیادہ سخت تھی، تو اس نے کہا: آپ اللہ تعالیٰ سے میرے حق میں دعا کیجیے، مجھ پر یہ بات لازم ہے میں دوبارہ یہ حرکت نہیں کروں گا۔ سیدہ سارہ رضی اللہ عنہا نے اس کے حق میں دعا کی تو اس کی طبیعت ٹھیک ہو گئی، اس نے اپنے پاس موجود اپنے وزیر سے یہ کہا: تم میرے پاس کسی انسان کو نہیں لے کر آئے، تم میرے پاس شیطان کو لے کر آئے ہو، پھر اس نے سیدہ سارہ رضی اللہ عنہا کو خادمہ کے طور پر سیدہ ہاجرہ رضی اللہ عنہا دے دیں، جب سیدنا ابراہیم علیہ السلام نے اس خاتون کو دیکھا تو فرمایا: یہ کہاں سے آئی ہے؟ سیدہ سارہ رضی اللہ عنہا نے بتایا: اللہ تعالیٰ نے کافر گنہگار شخص کے فریب کا توڑ کیا اور ہاجرہ رضی اللہ عنہا کو خادمہ کے طور پر دے دیا۔“ سیدنا ابوہریرہ رضی اللہ عنہ جب یہ حدیث بیان کرتے تھے تو ساتھ یہ بھی کہتے تھے: ”اے آسمانی پانی سے سیراب ہونے والے لوگو! وہ تمہاری والدہ ہیں۔“ نضر نامی راوی یہ الفاظ بلند آواز میں بیان کرتے تھے۔ (امام ابن حبان رحمہ اللہ فرماتے ہیں:) سیدہ ہاجرہ رضی اللہ عنہا کی اولاد کے لیے آسمانی پانی سے سیراب ہونے والے کا لفظ اس لیے استعمال کیا گیا ہے کیونکہ سیدنا اسماعیل علیہ السلام سیدہ ہاجرہ رضی اللہ عنہا کے صاحبزادے تھے اور ان کی نشوونما آب زمزم کے ذریعے ہوئی تھی اور یہ آسمانی پانی ہے جس کے ذریعے اللہ تعالیٰ نے سیدنا اسماعیل علیہ السلام کی عزت افزائی کی تھی، اس وقت جب ان کی والدہ سیدہ ہاجرہ رضی اللہ عنہا نے انہیں جنم دیا تھا تو ان کی اولاد وہ اولاد ہے جس نے آسمانی پانی کے ذریعے (نشوونما پائی تھی)۔ [صحیح ابن حبان/كتاب الحظر والإباحة/حدیث: 5737]

اردو ترجمہ · UrduUnverified translation

سیدہ اسماء بنت ابوبکر رضی اللہ عنہما بیان کرتی ہیں: ایک خاتون نبی اکرم صلی اللہ علیہ وسلم کی خدمت میں حاضر ہوئی، اس نے عرض کی: یا رسول اللہ ( صلی اللہ علیہ وسلم ) میری ایک سوکن ہے، کیا مجھ پر کوئی گناہ ہو گا اگر میں خود کو اپنے شوہر کے حوالے سے ایسی بات کے حوالے سے سیر ظاہر کروں جو اس نے مجھے نہیں دی ہے؟ تو نبی اکرم صلی اللہ علیہ وسلم نے ارشاد فرمایا: ”جو چیز نہیں دی گئی اس کے حوالے سے خود کو سیر ظاہر کرنے والا شخص جھوٹ کے دو کپڑے پہننے والے کی مانند ہے۔“ [صحیح ابن حبان/كتاب الحظر والإباحة/حدیث: 5738]

اردو ترجمہ · UrduUnverified translation

سیدہ اسماء بنت ابوبکر رضی اللہ عنہا بیان کرتی ہیں کہ ایک خاتون نبی اکرم صلی اللہ علیہ وسلم کی خدمت میں حاضر ہوئی، اس نے عرض کی: یا رسول اللہ صلی اللہ علیہ وسلم ! میری ایک سوکن ہے، کیا مجھ پر کوئی گناہ ہو گا اگر میں اپنے شوہر کے حوالے سے ایسی چیز کا اظہار کروں جو اس نے مجھے نہیں دی ہے؟ نبی اکرم صلی اللہ علیہ وسلم نے ارشاد فرمایا: ”جو چیز نہیں دی گئی اس کے حوالے سے خود کو سیر ظاہر کرنے والا شخص جھوٹ کے دو کپڑے پہننے والے کی مانند ہے۔“ [صحیح ابن حبان/كتاب الحظر والإباحة/حدیث: 5739]

اردو ترجمہ · UrduUnverified translation

سیدنا عمران بن حصین رضی اللہ عنہ بیان کرتے ہیں: ایک مرتبہ ہم نبی اکرم صلی اللہ علیہ وسلم کے ہمراہ سفر کر رہے تھے، ایک خاتون اپنی اونٹنی پر سوار تھی، اس خاتون نے اس اونٹنی کو جھڑکتے ہوئے اس پر لعنت کی تو نبی اکرم صلی اللہ علیہ وسلم نے ارشاد فرمایا: ”تم لوگ اپنا سامان اس اونٹنی سے اتار لو اور اسے چھوڑ دو کیونکہ اس پر لعنت کر دی گئی ہے۔“ راوی بیان کرتے ہیں: لوگوں نے ایسا ہی کیا، اس اونٹنی کا منظر گویا کہ آج بھی میری نگاہ میں ہے، وہ خاکستری رنگ کی اونٹنی تھی۔ (امام ابن حبان رحمہ اللہ فرماتے ہیں:) ابوقلابہ نامی راوی کے چچا عمرو بن معاویہ بن زید جرمی ہیں جن کی کنیت ابومہلب ہے، امام اوزاعی کو ان کی کنیت کے بارے میں وہم ہوا تو انہوں نے یہ کہا: کہ ان کی کنیت ابومہاجر ہے، اس کی وجہ یہ ہے سوار کو بھی کبھی کبھی ٹھوکر لگ جاتی ہے۔ [صحیح ابن حبان/كتاب الحظر والإباحة/حدیث: 5740]

اردو ترجمہ · UrduUnverified translation

سیدنا عمران بن حصین رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم سفر کر رہے تھے، اسی دوران آپ صلی اللہ علیہ وسلم نے کسی کے لعنت کرنے کی آواز سنی تو دریافت کیا: ”یہ کون ہے؟“ آپ صلی اللہ علیہ وسلم کو بتایا گیا: یہ فلاں خاتون ہے، جس نے اپنی سواری پر لعنت کی ہے، نبی اکرم صلی اللہ علیہ وسلم نے ارشاد فرمایا: ”اس سواری کو چھوڑ دو کیونکہ اس پر لعنت کر دی گئی ہے۔“ راوی بیان کرتے ہیں: تو اس سواری پر سے سامان اتار لیا گیا۔ سیدنا عمران رضی اللہ عنہ بیان کرتے ہیں: اس اونٹنی کا منظر گویا کہ آج بھی میری نگاہ میں ہے، وہ خاکستری رنگ کی اونٹنی تھی۔ [صحیح ابن حبان/كتاب الحظر والإباحة/حدیث: 5741]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں کہ ایک مرتبہ ہم نبی اکرم صلی اللہ علیہ وسلم کے ہمراہ سفر کر رہے تھے، آپ صلی اللہ علیہ وسلم مجدی بن عمرو جہنی کی تلاش میں تھے، ہمارا یہ حال تھا کہ ہم پانچ یا چھ یا سات افراد ایک اونٹ پر باری باری سوار ہوتے تھے، انصار سے تعلق رکھنے والے ایک شخص جن کا نام عقبہ تھا وہ اپنے اونٹ کے پاس آئے، انہوں نے اسے بٹھایا تاکہ اس پر سوار ہوں، پھر انہوں نے اسے کھڑا کیا تو اس اونٹ نے کچھ شوخی دکھائی تو ان صاحب نے کہا: ”اٹھو، اللہ تعالیٰ تم پر لعنت کرے۔“ نبی اکرم صلی اللہ علیہ وسلم نے دریافت فرمایا: ”اپنے اونٹ پر لعنت کرنے والا شخص کون ہے؟“ ان صاحب نے عرض کی: یا رسول اللہ صلی اللہ علیہ وسلم ! میں ہوں۔ نبی اکرم صلی اللہ علیہ وسلم نے فرمایا: ”تم اس سے نیچے اتر جاؤ، تم ہمارے ساتھ کسی لعنت یافتہ کو نہ رکھو، تم لوگ اپنے خلاف بددعا نہ کیا کرو اور نہ ہی اپنے اموال کے خلاف بددعا کیا کرو، کیونکہ تمہیں نہیں معلوم کہ وہ کسی ایسی گھڑی میں ہو جائے جس میں وہ تمہارے لیے مستجاب ہو جائے۔“ [صحیح ابن حبان/كتاب الحظر والإباحة/حدیث: 5742]

اردو ترجمہ · UrduUnverified translation

سیدنا ابوبرزہ رضی اللہ عنہ بیان کرتے ہیں کہ ایک مرتبہ ایک کنیز ایک اونٹ پر سوار تھی جس پر لوگوں کا سامان رکھا ہوا تھا، وہ دو پہاڑوں کے درمیان سے گزر رہی تھی اور پہاڑ کا راستہ تنگ تھا، نبی اکرم صلی اللہ علیہ وسلم اس پہاڑ پر تشریف لائے، جب اس لڑکی نے نبی اکرم صلی اللہ علیہ وسلم کو دیکھا تو وہ کہنے لگی: اٹھو، اے اللہ! اس پر لعنت کر، اے اللہ! اس پر لعنت کر۔ نبی اکرم صلی اللہ علیہ وسلم نے فرمایا: ”ہمارے ساتھ کوئی ایسی سواری نہیں رہے گی، جس پر اللہ تعالیٰ کی طرف سے لعنت ہوئی ہو۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا اس سواری کو چھوڑ دینے کا حکم دینا جس پر لعنت کی گئی تھی، اس میں یہ حکم پوشیدہ ہے جو اس کا سبب ہے اور وہ یہ کہ لعنت کرنے والے کی دعا مستجاب نہ ہو جائے، تو جب لعنت کرنے والے کی دعا کے مستجاب ہونے کے بارے میں علم ہو جائے تو پھر ہم اسے یہ حکم دیں گے کہ وہ اس سواری کو چھوڑ دے، لیکن وحی کے منقطع ہونے کی وجہ سے اس کا علم حاصل کرنے کا امکان نہیں رہا، اس لیے اب کسی کے لیے اس فعل پر عمل کرنا جائز نہیں ہے۔ [صحیح ابن حبان/كتاب الحظر والإباحة/حدیث: 5743]

اردو ترجمہ · UrduUnverified translation

سیدنا ابوسعید خدری رضی اللہ عنہ بیان کرتے ہیں: نبی اکرم صلی اللہ علیہ وسلم عیدالاضحی یا عیدالفطر کے موقع پر عید گاہ کی طرف تشریف لے گئے، آپ صلی اللہ علیہ وسلم نے نماز ادا کی، پھر آپ صلی اللہ علیہ وسلم نے نماز ختم کی، پھر آپ صلی اللہ علیہ وسلم کھڑے ہوئے، آپ صلی اللہ علیہ وسلم نے لوگوں کو وعظ و نصیحت کرتے ہوئے انہیں صدقہ کرنے کا حکم دیا، آپ صلی اللہ علیہ وسلم نے ارشاد فرمایا: ”اے لوگو! صدقہ کرو۔“ پھر آپ صلی اللہ علیہ وسلم وہاں سے مڑے اور خواتین کے پاس تشریف لائے، آپ صلی اللہ علیہ وسلم نے فرمایا: ”اے خواتین کے گروہ! تم لوگ صدقہ کرو کیونکہ میں نے دیکھا ہے جہنم میں اکثریت تم خواتین کی ہے۔“ ان خواتین نے دریافت کیا: یا رسول اللہ صلی اللہ علیہ وسلم ! اس کی وجہ کیا ہے؟ نبی اکرم صلی اللہ علیہ وسلم نے فرمایا: ”تم لوگ لعنت کثرت سے کرتی ہو اور شوہر کی ناشکری کرتی ہو۔ اے خواتین کے گروہ! میں نے ایسی کوئی مخلوق نہیں دیکھی جو عقل اور دین کے اعتبار سے ناقص ہونے کے باوجود سمجھ دار اور تجربہ کار آدمی کی عقل کو رخصت کر دیتی ہے۔“ ان خواتین نے نبی اکرم صلی اللہ علیہ وسلم سے دریافت کیا: یا رسول اللہ صلی اللہ علیہ وسلم ! ہمارے دین اور عقل میں کیا کمی ہے؟ نبی اکرم صلی اللہ علیہ وسلم نے دریافت کیا: ”کیا ایک عورت کی گواہی مرد کی گواہی کا نصف نہیں ہوتی؟“ ان خواتین نے جواب دیا: جی ہاں۔ نبی اکرم صلی اللہ علیہ وسلم نے فرمایا: ”یہ ان کی عقل کی کمی کی وجہ سے ہے۔ کیا جب عورت حائضہ ہوتی ہے تو وہ نماز اور روزہ ترک نہیں کر دیتی؟“ ان خواتین نے جواب دیا: جی ہاں۔ نبی اکرم صلی اللہ علیہ وسلم نے فرمایا: ”یہ ان کے دین کی کمی ہے۔“ پھر نبی اکرم صلی اللہ علیہ وسلم وہاں سے مڑے اور آپ صلی اللہ علیہ وسلم اپنے گھر کی طرف روانہ ہو گئے۔ سیدنا عبداللہ بن مسعود رضی اللہ عنہ کی اہلیہ سیدہ زینب رضی اللہ عنہا نے آپ صلی اللہ علیہ وسلم کے ہاں اندر آنے کی اجازت مانگی۔ نبی اکرم صلی اللہ علیہ وسلم کی خدمت میں عرض کی گئی: یا رسول اللہ صلی اللہ علیہ وسلم ! سیدہ زینب رضی اللہ عنہا اندر آنا چاہ رہی ہیں۔ نبی اکرم صلی اللہ علیہ وسلم نے فرمایا: ”کون سی زینب؟“ آپ صلی اللہ علیہ وسلم کو بتایا گیا: سیدنا عبداللہ رضی اللہ عنہ کی اہلیہ۔ نبی اکرم صلی اللہ علیہ وسلم نے فرمایا: ”جی ہاں، اس خاتون کو اندر آنے دو۔“ اس خاتون کو اندر آنے کی اجازت دی گئی، اس نے عرض کی: یا رسول اللہ صلی اللہ علیہ وسلم ! آپ صلی اللہ علیہ وسلم نے آج ہمیں صدقہ کرنے کا حکم دیا، میرے پاس کچھ زیورات ہیں، میں نے انہیں صدقہ کرنے کا ارادہ کیا تو سیدنا عبداللہ بن مسعود رضی اللہ عنہ کا یہ خیال ہے وہ اور ان کی اولاد اس بات کے زیادہ حق دار ہیں، میں یہ زیورات ان پر صدقہ کروں، تو نبی اکرم صلی اللہ علیہ وسلم نے ارشاد فرمایا: ”اس نے ٹھیک کہا ہے، تمہارا شوہر اور تمہاری اولاد اس بات کے زیادہ حق دار ہیں، تم ان پر صدقہ کرو۔“ [صحیح ابن حبان/كتاب الحظر والإباحة/حدیث: 5744]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ ایک شخص نے نبی اکرم صلی اللہ علیہ وسلم کی موجودگی میں ہوا پر لعنت کی تو نبی اکرم صلی اللہ علیہ وسلم نے ارشاد فرمایا: ”تم ہوا پر لعنت نہ کرو کیونکہ وہ حکم کی پابند ہے، جب بھی کوئی شخص کسی ایسی چیز پر لعنت کرے جو لعنت کی اہل نہ ہو تو وہ لعنت اس کرنے والے کی طرف واپس آ جاتی ہے۔“ [صحیح ابن حبان/كتاب الحظر والإباحة/حدیث: 5745]

اردو ترجمہ · UrduUnverified translation

زید بن اسلم بیان کرتے ہیں کہ عبدالملک نے سیدہ ام درداء رضی اللہ عنہا کی طرف پیغام بھیجا۔ راوی بیان کرتے ہیں کہ وہ خاتون بعض اوقات ان کے ہاں قیام بھی کر لیتی تھیں۔ راوی بیان کرتے ہیں کہ عبدالملک نے اپنے خادم کو بلوایا، اسے آنے میں دیر ہو گئی تو عبدالملک نے کہا: اے اللہ! اس پر لعنت کر دے۔ اس خاتون نے کہا: تم اس پر لعنت نہ کرو، کیونکہ میں نے سیدنا ابودرداء رضی اللہ عنہ کو نبی اکرم صلی اللہ علیہ وسلم کا یہ فرمان نقل کرتے ہوئے سنا ہے: ”بے شک لعنت کرنے والے لوگ قیامت کے دن نہ تو شہید ہوں گے اور نہ شفیع ہوں گے۔“ [صحیح ابن حبان/كتاب الحظر والإباحة/حدیث: 5746]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ انہوں نے نبی اکرم صلی اللہ علیہ وسلم کو فجر کی نماز میں رکوع سے سر اٹھانے کے بعد یہ کہتے ہوئے سنا: «رَبَّنَا وَلَكَ الْحَمْدُ» ”اے ہمارے پروردگار! حمد تیرے لیے مخصوص ہے“، یہ دوسری رکعت کی بات ہے، پھر آپ صلی اللہ علیہ وسلم نے یہ کہا: «اللَّهُمَّ الْعَنْ فُلَانًا وَفُلَانًا» ”اے اللہ! فلاں پر لعنت کر اور فلاں پر لعنت کر“۔ نبی اکرم صلی اللہ علیہ وسلم نے منافقین سے تعلق رکھنے والے کچھ لوگوں کے خلاف دعائے ضرر کی تو اللہ تعالیٰ نے یہ آیت نازل کی: ﴿لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ أَوْ يُعَذِّبَهُمْ فَإِنَّهُمْ ظَالِمُونَ﴾ [سورة آل عمران: 128] ”تمہارا اس معاملے سے کوئی واسطہ نہیں ہے خواہ اللہ تعالیٰ انہیں توبہ کی توفیق دے یا انہیں عذاب دے بے شک وہ ظالم ہیں“۔ [صحیح ابن حبان/كتاب الحظر والإباحة/حدیث: 5747]

اردو ترجمہ · UrduUnverified translation

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”اللہ تعالیٰ چور پر لعنت کرے جو ایک انڈہ (یا ڈھال) چوری کرتا ہے تو اس کے نتیجے میں اس کا ہاتھ کاٹ دیا جاتا ہے، وہ ایک رسی چوری کرتا ہے تو اس کا ہاتھ کاٹ دیا جاتا ہے۔“ (امام ابن حبان رحمہ اللہ فرماتے ہیں:) اس بات کا احتمال موجود ہے کہ نبی اکرم صلی اللہ علیہ وسلم نے اس فرمان میں لفظ ”انڈہ“ کے ذریعے لوہے کا ٹکڑا مراد لیا ہو یا شتر مرغ کا انڈا مراد لیا ہو جس کی قیمت ایک چوتھائی دینار یا اس سے زیادہ کے برابر ہوتی ہے، اسی طرح رسی کے ذریعے وہ رسی لی ہو جو بڑی ہوتی ہے اور جو گہرے کنوؤں میں استعمال ہوتی ہے یا سمندر میں کشتیوں وغیرہ کے لیے استعمال ہوتی ہے، اس کی وجہ یہ ہے کہ اہل حجاز کے ہاں زیادہ تر کنویں گہرے ہوتے ہیں، وہاں ڈولوں کے ساتھ جو رسیاں ہوتی ہیں وہ لٹکتی رہتی ہیں اور انہیں رات کے وقت اسی حالت میں چھوڑ دیا جاتا ہے، اسی طرح سواریوں (یا کشتیوں) کی رسیوں کا عالم ہے، کیونکہ جب سواری کو چھوڑ دیا جاتا ہے تو بعض اوقات اس کی رسیاں خشکی پر اس عالم میں رہ جاتی ہیں جس پر نمی والی ہوا گزرتی ہے، تو نبی اکرم صلی اللہ علیہ وسلم نے ان الفاظ کے ذریعے ایسی کسی بھی چیز کو چھونے سے منع کیا ہے جب کہ آدمی اسے ذاتی ملکیت میں لے، اس سے یہ مراد نہیں ہے کہ اس سے نفع حاصل کرنے سے منع کیا ہے۔ [صحیح ابن حبان/كتاب الحظر والإباحة/حدیث: 5748]

اردو ترجمہ · UrduUnverified translation

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”چھ لوگوں پر میں نے لعنت کی ہے اور ان پر اللہ تعالیٰ نے بھی لعنت کی ہے اور ہر اس نبی نے لعنت کی ہے جس کی دعا مستجاب ہوتی ہے: ایک اللہ کی کتاب میں اضافہ کرنے والا شخص، اللہ کی تقدیر کو جھٹلانے والا شخص، ظلم کے طور پر مسلط کیے جانے والا حکمران تاکہ وہ حکومت کے ذریعے اس شخص کو ذلیل کرے جسے اللہ تعالیٰ نے عزت عطا کی ہے اور اس شخص کو عزت دے جسے اللہ تعالیٰ نے رسوا کیا ہے، اللہ تعالیٰ کی حرام کردہ چیز کو حلال قرار دینے والا شخص، اور میری عترت کے بارے میں اس چیز کو حلال قرار دینے والا شخص جسے اللہ تعالیٰ نے حرام قرار دیا ہے، اور میری سنت کو چھوڑنے والا شخص۔“ [صحیح ابن حبان/كتاب الحظر والإباحة/حدیث: 5749]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”مردوں کے ساتھ مشابہت رکھنے والی خواتین اور خواتین کے ساتھ مشابہت رکھنے والے مردوں پر لعنت کی ہے۔“ [صحیح ابن حبان/كتاب الحظر والإباحة/حدیث: 5750]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”اس شخص پر لعنت کی ہے جو عورتوں کا سا لباس پہنتا ہے اور اس عورت پر لعنت کی ہے جو مردوں کا سا لباس پہنتی ہے“۔ [صحیح ابن حبان/كتاب الحظر والإباحة/حدیث: 5751]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”اس شخص پر لعنت فرمائی ہے جو عورتوں کا سا لباس پہنتا ہے اور اس عورت پر لعنت فرمائی ہے جو مردوں کا لباس پہنتی ہے۔“ [صحیح ابن حبان/كتاب الحظر والإباحة/حدیث: 5752]