Hadith 5523–5562

اردو ترجمہ · UrduUnverified translation

سیدنا براء بن عازب رضی اللہ عنہ نبی اکرم صلی اللہ علیہ وسلم کے بارے میں نقل کرتے ہیں کہ جب آپ صلی اللہ علیہ وسلم سونے کے لیے لیٹتے تھے تو اپنا دایاں دستِ مبارک اپنے دائیں رخسارِ مبارک کے نیچے رکھتے تھے اور یہ دعا پڑھتے تھے: «اللَّهُمَّ قِنِي عَذَابَكَ يَوْمَ تَبْعَثُ عِبَادَكَ» ”اے اللہ! تو اس دن مجھے اپنے عذاب سے بچانا جس دن تو اپنے بندوں کو زندہ کرے گا۔“ [صحیح ابن حبان/كتاب الزينة والتطييب/حدیث: 5523]

اردو ترجمہ · UrduUnverified translation

سیدنا علی بن ابی طالب رضی اللہ عنہ بیان کرتے ہیں کہ ایک مرتبہ سیدہ فاطمہ رضی اللہ عنہا نبی اکرم صلی اللہ علیہ وسلم کی خدمت میں حاضر ہوئیں تاکہ چکی پیسنے کی وجہ سے ہونے والی مشقت کی شکایت آپ صلی اللہ علیہ وسلم سے کریں۔ سیدہ فاطمہ رضی اللہ عنہا کو اس بات کا پتہ چلا تھا کہ نبی اکرم صلی اللہ علیہ وسلم کی خدمت میں کچھ قیدی آئے ہیں، تو وہ نبی اکرم صلی اللہ علیہ وسلم سے خادم مانگنے کے لیے تشریف لائی تھیں۔ ان کی ملاقات نبی اکرم صلی اللہ علیہ وسلم سے نہیں ہوئی، ان کی ملاقات سیدہ عائشہ رضی اللہ عنہا سے ہوئی۔ انہوں نے سیدہ عائشہ رضی اللہ عنہا کو ساری بات بتا دی۔ جب نبی اکرم صلی اللہ علیہ وسلم تشریف لائے تو سیدہ عائشہ رضی اللہ عنہا نے نبی اکرم صلی اللہ علیہ وسلم کو یہ بات بتا دی۔ (سیدنا علی رضی اللہ عنہ بیان کرتے ہیں) نبی اکرم صلی اللہ علیہ وسلم (رات کے وقت) اس وقت ہمارے پاس تشریف لائے جب ہم اپنے بستر میں لیٹ چکے تھے، ہم اٹھنے لگے تو نبی اکرم صلی اللہ علیہ وسلم نے فرمایا: ”تم لوگ اپنی جگہ پر رہو۔“ آپ صلی اللہ علیہ وسلم ہمارے درمیان بیٹھ گئے یہاں تک کہ میں نے آپ صلی اللہ علیہ وسلم کے قدم مبارک کی ٹھنڈک اپنے سینے پر محسوس کی۔ آپ صلی اللہ علیہ وسلم نے ارشاد فرمایا: ”کیا میں تم دونوں کو اس سے زیادہ بہتر چیز کی طرف تمہاری رہنمائی نہ کروں جو تم دونوں نے مجھ سے مانگی ہے؟ تم ۳۴ مرتبہ «اللهُ أَكْبَرُ» ”اللہ اکبر“، ۳۳ مرتبہ «سُبْحَانَ اللهِ» ”سبحان اللہ“ اور ۳۳ مرتبہ «الْحَمْدُ لِلّٰهِ» ”الحمد للہ“ اس وقت پڑھ لیا کرو جب تم اپنے بستر پر لیٹو، یہ تم دونوں کے لیے خادم (کے ملنے) سے زیادہ بہتر ہے۔“ [صحیح ابن حبان/كتاب الزينة والتطييب/حدیث: 5524]

اردو ترجمہ · UrduUnverified translation

فروہ بن نوفل اشجعی رحمہ اللہ اپنے والد رضی اللہ عنہ کا یہ بیان نقل کرتے ہیں کہ میں نبی اکرم صلی اللہ علیہ وسلم کی خدمت میں حاضر ہوا، میں نے عرض کی: اے اللہ کے نبی صلی اللہ علیہ وسلم ! آپ مجھے کسی ایسی چیز کی تعلیم دیجیے جسے میں اس وقت پڑھ لیا کروں جب میں اپنے بستر پر (سونے کے لیے) آتا ہوں۔ نبی اکرم صلی اللہ علیہ وسلم نے فرمایا: ”تم سورۃ الکافرون پڑھ لیا کرو۔“ [صحیح ابن حبان/كتاب الزينة والتطييب/حدیث: 5525]

اردو ترجمہ · UrduUnverified translation

فروہ بن نوفل اپنے والد (سیدنا نوفل رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے دریافت کیا: ”کیا تمہیں ہماری سوتیلی صاحب زادی (کی تعلیم و تربیت) میں دلچسپی ہے تاکہ زینب اس کی کفالت کرے؟“ راوی بیان کرتے ہیں: پھر وہ نبی اکرم صلی اللہ علیہ وسلم کی خدمت میں حاضر ہوئے۔ نبی اکرم صلی اللہ علیہ وسلم نے ان سے (اس بچی کے بارے میں) دریافت کیا تو انہوں نے عرض کی: میں اسے اس کی ماں کے پاس چھوڑ کر آیا ہوں۔ نبی اکرم صلی اللہ علیہ وسلم نے دریافت کیا: ”پھر تم کس کام سے آئے ہو؟“ انہوں نے عرض کی: میں اس لیے آیا ہوں تاکہ آپ مجھے کسی ایسی چیز کی تعلیم دیجیے جسے میں سوتے وقت پڑھ لیا کروں۔ نبی اکرم صلی اللہ علیہ وسلم نے ارشاد فرمایا: ”تم «سُورَةَ الْكَافِرُونَ» ”سورت الکافرون“ کی تلاوت کیا کرو اور ان اختتامی کلمات کے ہمراہ سو جایا کرو، یہ سورت شرک سے بری الذمہ ہونے کا اظہار ہے۔“ [صحیح ابن حبان/كتاب الزينة والتطييب/حدیث: 5526]

اردو ترجمہ · UrduUnverified translation

سیدنا براء رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک شخص کو حکم دیا کہ جب وہ بستر پر جائے، یہاں ابن کثیر نامی راوی نے یہ الفاظ نقل کیے ہیں کہ نبی اکرم صلی اللہ علیہ وسلم نے ایک شخص کو یہ تلقین کی کہ وہ یہ پڑھے: «اللَّهُمَّ أَسْلَمْتُ نَفْسِي إِلَيْكَ، وَوَجَّهْتُ وَجْهِي إِلَيْكَ، وَفَوَّضْتُ أَمْرِي إِلَيْكَ، وَأَلْجَأْتُ ظَهْرِي إِلَيْكَ، رَغْبَةً وَرَهْبَةً إِلَيْكَ، لَا مَلْجَأَ وَلَا مَنْجَا مِنْكَ إِلَّا إِلَيْكَ، آمَنْتُ بِكِتَابِكَ الَّذِي أَنْزَلْتَ، وَبِنَبِيِّكَ الَّذِي أَرْسَلْتَ» ”اے اللہ! میں اپنا آپ تیرے سپرد کرتا ہوں، میں نے اپنا رخ تیری طرف کیا، میں نے اپنی پشت کو تیرے سہارے کر دیا، میں نے اپنا معاملہ تیرے سپرد کر دیا، تیری طرف رغبت رکھتے ہوئے بھی اور تیری (بے نیازی سے) ڈرتے ہوئے بھی، تیرے علاوہ اور کوئی پناہ گاہ اور نجات کی جگہ نہیں ہے، تیرے مقابلے میں صرف تیری طرف رجوع کیا جا سکتا ہے، میں تیری اس کتاب پر ایمان لایا جسے تو نے نازل کیا اور تیرے اس نبی پر ایمان لایا جسے تو نے مبعوث کیا ہے۔“ (نبی اکرم صلی اللہ علیہ وسلم نے فرمایا:) ”ان کلمات کو پڑھنے والا شخص اگر اسی رات میں فوت ہو جاتا ہے تو وہ فطرت (یعنی دین اسلام) پر مرے گا۔“ [صحیح ابن حبان/كتاب الزينة والتطييب/حدیث: 5527]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: «لَا إِلٰهَ إِلَّا اللهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ، وَهُوَ عَلَىٰ كُلِّ شَيْءٍ قَدِيرٌ، لَا حَوْلَ وَلَا قُوَّةَ إِلَّا بِاللهِ، سُبْحَانَ اللهِ، وَالْحَمْدُ لِلهِ، وَلَا إِلٰهَ إِلَّا اللهُ، وَاللهُ أَكْبَرُ» ”اللہ تعالیٰ کے علاوہ اور کوئی معبود نہیں ہے، وہی ایک معبود ہے اس کا کوئی شریک نہیں ہے، بادشاہی اس کے لیے مخصوص ہے، حمد اس کے لیے مخصوص ہے اور وہ ہر شے پر قدرت رکھتا ہے۔ اللہ تعالیٰ کی مدد کے بغیر کچھ نہیں ہو سکتا، اللہ کی ذات عیب سے پاک ہے، ہر طرح کی حمد اللہ تعالیٰ کے لیے مخصوص ہے، اللہ تعالیٰ کے علاوہ اور کوئی معبود نہیں ہے، اللہ تعالیٰ سب سے بڑا ہے۔“ تو اللہ تعالیٰ اس کے تمام گناہوں (راوی کو شک ہے شاید یہ الفاظ ہیں) اس کی خطاؤں کی مغفرت کر دیتا ہے، یہ شک مسعر نامی راوی کو ہے (آگے روایت میں یہ الفاظ ہیں) ”خواہ وہ سمندر کی جھاگ جتنے ہوں۔“ [صحیح ابن حبان/كتاب الزينة والتطييب/حدیث: 5528]

اردو ترجمہ · UrduUnverified translation

سیدنا علی رضی اللہ عنہ بیان کرتے ہیں کہ سیدہ فاطمہ رضی اللہ عنہا خادم مانگنے کے لیے نبی اکرم صلی اللہ علیہ وسلم کی خدمت میں حاضر ہوئیں، تو نبی اکرم صلی اللہ علیہ وسلم نے ارشاد فرمایا: ”کیا میں تمہاری رہنمائی نہ کروں (راوی کو شک ہے شاید یہ الفاظ ہیں) کیا میں تمہیں اس چیز کی تعلیم نہ دوں جو تمہارے لیے اس سے زیادہ بہتر ہو؟ جب تم اپنے بستر پر (سونے کے لیے) جاؤ تو 33، 33 مرتبہ «سُبْحَانَ اللّٰهِ» ”سبحان اللہ“، «اَللّٰهُ أَكْبَرُ» ”اللہ اکبر“ اور «لَا إِلٰهَ إِلَّا اللّٰهُ» ”لا الہ الا اللہ“ پڑھ لیا کرو۔“ سیدنا علی رضی اللہ عنہ بیان کرتے ہیں کہ جب سے میں نے نبی اکرم صلی اللہ علیہ وسلم کی زبانی یہ بات سنی ہے، میں نے اس عمل کو کبھی ترک نہیں کیا۔ لوگوں نے دریافت کیا: کیا جنگِ صفین کی رات بھی نہیں؟ انہوں نے جواب دیا: جنگِ صفین کی رات بھی (میں نے اس عمل کو ترک نہیں کیا)۔ [صحیح ابن حبان/كتاب الزينة والتطييب/حدیث: 5529]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب رات کے وقت بیدار ہوتے تھے تو یہ پڑھتے تھے: «لَا إِلَهَ إِلَّا اللَّهُ الْوَاحِدُ الْقَهَّارُ، رَبُّ السَّمَاوَاتِ وَالْأَرْضِ وَمَا بَيْنَهُمَا الْعَزِيزُ الْغَفَّارُ» ”اللہ تعالیٰ کے علاوہ اور کوئی معبود نہیں ہے، وہ ایک ہے، وہ غلبے والا ہے، وہ آسمان و زمین اور اس کے درمیان موجود تمام چیزوں کا پروردگار ہے، وہ غالب ہے اور مغفرت کرنے والا ہے۔“ [صحیح ابن حبان/كتاب الزينة والتطييب/حدیث: 5530]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب رات کے وقت بیدار ہوتے تھے تو آپ یہ پڑھتے تھے: «لَا إِلَهَ إِلَّا أَنْتَ سُبْحَانَكَ، اللَّهُمَّ إِنِّي أَسْتَغْفِرُكَ لِذَنْبِي، وَأَسْأَلُكَ رَحْمَتَكَ، اللَّهُمَّ زِدْنِي عِلْمًا، وَلَا تُزِغْ قَلْبِي بَعْدَ إِذْ هَدَيْتَنِي، وَهَبْ لِي مِنْ لَدُنْكَ رَحْمَةً، إِنَّكَ أَنْتَ الْوَهَّابُ» ”اللہ تعالیٰ کے علاوہ اور کوئی معبود نہیں ہے، اے اللہ! تو پاک ہے، میں اپنے ذنب کی مغفرت تجھ سے طلب کرتا ہوں، میں تجھ سے تیری رحمت کا سوال کرتا ہوں، اے اللہ! میرے علم میں اضافہ کر اور میرے دل کو، تو نے ہدایت نصیب کی ہے اس کے بعد اسے ٹیڑھا نہ کرنا اور محض اپنے فضل کے تحت مجھے رحمت عطا کر، بے شک تو بہت زیادہ عطا کرنے والا ہے ﴿لَا تُزِغْ قُلُوبَنَا بَعْدَ إِذْ هَدَيْتَنَا وَهَبْ لَنَا مِنْ لَدُنْكَ رَحْمَةً إِنَّكَ أَنْتَ الْوَهَّابُ﴾ [سورة آل عمران: 8] ۔“ [صحیح ابن حبان/كتاب الزينة والتطييب/حدیث: 5531]

اردو ترجمہ · UrduUnverified translation

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم جب بستر پر جاتے تھے تو یہ پڑھتے تھے: «بِاسْمِكَ اللّٰهُمَّ أَمُوتُ وَأَحْيَا» ”اے اللہ! میں تیرے نام سے برکت حاصل کرتے ہوئے زندہ ہوتا ہوں (یعنی بیدار ہوتا ہوں) اور تیرے نام سے برکت حاصل کرتے ہوئے مرتا ہوں (یعنی سوتا ہوں)۔“ جب نبی اکرم صلی اللہ علیہ وسلم بیدار ہوتے تھے تو آپ یہ پڑھتے تھے: «الْحَمْدُ لِلّٰهِ الَّذِي أَحْيَانَا بَعْدَ مَا أَمَاتَنَا وَإِلَيْهِ النُّشُورُ» ”ہر طرح کی حمد اللہ کے لیے مخصوص ہے، جس نے ہمیں موت (یعنی نیند) دینے کے بعد زندگی (یعنی بیداری) دی اور اسی کی طرف لوٹ کے جانا ہے۔“ [صحیح ابن حبان/كتاب الزينة والتطييب/حدیث: 5532]

اردو ترجمہ · UrduUnverified translation

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص اپنے بستر پر جاتا ہے تو ایک فرشتہ اور ایک شیطان اس کے پاس آتے ہیں، فرشتہ یہ کہتا ہے: بھلائی کے ذریعے (اپنے دن بھر کے کاموں کا) اختتام کرو۔ شیطان کہتا ہے: برائی کے ذریعے (اپنے دن بھر کے کاموں کا) اختتام کرو۔ (نبی اکرم صلی اللہ علیہ وسلم فرماتے ہیں:) اگر وہ شخص اللہ کا ذکر کر کے سوتا ہے تو فرشتے رات بھر اس کی حفاظت کرتے رہتے ہیں، جب وہ بیدار ہو جائے تو فرشتہ کہتا ہے: بھلائی کے ذریعے (اپنے دن کے کاموں) کا آغاز کرو، اور شیطان کہتا ہے: برائی کے ذریعے آغاز کرو، اگر وہ شخص یہ پڑھ لے: «الْحَمْدُ لِلَّهِ الَّذِي رَدَّ عَلَيَّ نَفْسِي، وَلَمْ يُمِتْهَا فِي مَنَامِهَا، الْحَمْدُ لِلَّهِ الَّذِي ﴿إِنَّ اللَّهَ يُمْسِكُ السَّمَاوَاتِ وَالْأَرْضَ أَن تَزُولَا﴾ [سورة فاطر: 41] ، الْحَمْدُ لِلَّهِ الَّذِي ﴿وَيُمْسِكُ السَّمَاءَ أَن تَقَعَ عَلَى الْأَرْضِ إِلَّا بِإِذْنِهِ﴾ [سورة الحج: 65] » ”ہر طرح کی حمد اللہ کے لیے مخصوص ہے جس نے میری جان مجھے واپس کر دی اور اسے سونے کے دوران ہی موت نہیں دی، ہر طرح کی حمد اللہ کے لیے مخصوص ہے جس نے آسمانوں اور زمین کو اس بات سے روکا ہوا ہے وہ برباد ہو جائیں (یہ آیت کے آخر تک پڑھنا ہے)، ہر طرح کی حمد اس کے لیے مخصوص ہے جس نے آسمان کو اس بات سے روکا ہوا ہے وہ زمین پر گر جائے البتہ اس کی اجازت سے ایسا ہو سکتا ہے۔““ [صحیح ابن حبان/كتاب الزينة والتطييب/حدیث: 5533]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص اپنے بستر پر جائے تو وہ اپنے تہبند کے اندرونی حصے کے ذریعے اسے جھاڑ لے اور «بِسْمِ اللهِ» ”اللہ کے نام کے ساتھ“ پڑھے؛ کیونکہ وہ یہ بات نہیں جانتا کہ اس کے بعد اس کے بستر پر کیا چیز آئی تھی، پھر جب وہ لیٹنے کا ارادہ کرے تو دائیں پہلو پر لیٹے اور یہ پڑھے: «سُبْحَانَكَ رَبِّي بِكَ وَضَعْتُ جَنْبِي، وَبِكَ أَرْفَعُهُ، إِنْ أَمْسَكْتَ نَفْسِي فَاغْفِرْ لَهَا، وَإِنْ أَرْسَلْتَهَا فَاحْفَظْهَا بِمَا تَحْفَظُ بِهِ عِبَادَكَ الصَّالِحِينَ» ”تو پاک ہے اے میرے پروردگار! میں تیری مدد کے ذریعے اپنا پہلو (بستر پر) رکھتا ہوں اور تیری مدد کے ذریعے اسے اٹھاؤں گا، اگر تو نے میری جان کو روک لیا (یعنی مجھے موت دے دی) تو اس کی مغفرت کرنا اور اگر تو نے اسے چھوڑ دیا (یعنی میں دوبارہ بیدار ہو گیا) تو اس چیز کے ہمراہ اس کی حفاظت کرنا جس کے ہمراہ تو اپنے نیک بندوں کی حفاظت کرتا ہے۔““ [صحیح ابن حبان/كتاب الزينة والتطييب/حدیث: 5534]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص اپنے بستر پر جائے تو اپنے تہبند کا (ایک سرا) باہر نکال کر اس کے اندرونی حصے کے ذریعے اپنے بستر کو جھاڑ لے، پھر وہ دائیں پہلو کے بل تکیے (پر سر رکھے) اور یہ پڑھے: «بِاسْمِكَ رَبِّي وَضَعْتُ جَنْبِي، وَبِكَ أَرْفَعُهُ، إِنْ أَمْسَكْتَ نَفْسِي فَارْحَمْهَا، وَإِنْ أَرْسَلْتَهَا فَاحْفَظْهَا بِمَا تَحْفَظُ بِهِ عِبَادَكَ الصَّالِحِينَ» ”اے اللہ! میں تیرے نام سے برکت حاصل کرتے ہوئے اپنا پہلو (بستر پر) رکھتا ہوں اور تیری مدد سے ہی اسے اٹھاؤں گا: اے اللہ! اگر تو نے اسے روک لیا تو اس پر رحم کرنا اور اگر اسے چھوڑ دیا تو اس کی اس چیز کے ہمراہ حفاظت کرنا جس کے ذریعے تو اپنے نیک بندوں کی حفاظت کرتا ہے۔““ (امام ابن حبان رحمہ اللہ فرماتے ہیں:) سعید مقبری نے یہ روایت سیدنا ابوہریرہ رضی اللہ عنہ سے بھی سنی ہے اور انہوں نے یہ روایت اپنے والد کے حوالے سے بھی سیدنا ابوہریرہ رضی اللہ عنہ سے سنی ہے، اس کے دونوں طرق محفوظ ہیں۔ [صحیح ابن حبان/كتاب الزينة والتطييب/حدیث: 5535]

اردو ترجمہ · UrduUnverified translation

سیدنا براء بن عازب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب تم بستر پر جانے لگو تو نماز کے وضو کی طرح وضو کر لو، پھر اپنے دائیں پہلو کے بل لیٹ جاؤ، پھر یہ پڑھو: «اللَّهُمَّ أَسْلَمْتُ وَجْهِي إِلَيْكَ، وَفَوَّضْتُ أَمْرِي إِلَيْكَ، وَأَلْجَأْتُ ظَهْرِي إِلَيْكَ، رَغْبَةً وَرَهْبَةً إِلَيْكَ، لَا مَلْجَأَ وَلَا مَنْجَا مِنْكَ إِلَّا إِلَيْكَ، آمَنْتُ بِكِتَابِكَ الَّذِي أَنْزَلْتَ، وَبِنَبِيِّكَ الَّذِي أَرْسَلْتَ» ”اے اللہ! میں نے اپنا چہرہ تیرے سامنے جھکا دیا، میں نے اپنا معاملہ تیرے سپرد کر دیا، میں نے رغبت رکھتے ہوئے اور ڈر رکھتے ہوئے اپنی پشت تیرے ساتھ لگا دی (یعنی تجھ پر آسرا کر لیا)، تیرے مقابلے میں تیرے علاوہ اور کوئی جائے پناہ اور جائے نجات نہیں ہے، میں تیری اس کتاب پر ایمان لایا جسے تو نے نازل کیا ہے اور تیرے اس نبی پر ایمان لایا جسے تو نے مبعوث کیا ہے۔“ (نبی اکرم صلی اللہ علیہ وسلم نے ارشاد فرمایا ہے:) ”تم ان کلمات کو اپنی آخری گفتگو بناؤ، اگر تم (اسی رات میں) فوت ہو جاتے ہو تو تم فطرت (یعنی دین اسلام) پر فوت ہو گے۔“ سیدنا براء رضی اللہ عنہ بیان کرتے ہیں: میں نے انہیں یاد کرتے ہوئے لفظ ”تیرے نبی پر ایمان لایا“ کی بجائے ”تیرے رسول پر ایمان لایا“ پڑھ دیا تو نبی اکرم صلی اللہ علیہ وسلم نے ارشاد فرمایا: ”(یہ پڑھو) تیرے اس نبی پر ایمان لایا جسے تو نے مبعوث کیا ہے۔“ [صحیح ابن حبان/كتاب الزينة والتطييب/حدیث: 5536]

اردو ترجمہ · UrduUnverified translation

سہیل نامی راوی بیان کرتے ہیں کہ ابوصالح ہمیں یہ ہدایت کرتے تھے کہ جب ہم میں سے کوئی شخص سونے لگے، تو وہ اپنے دائیں پہلو کے بل (بستر پر) لیٹ جائے اور پھر یہ کہے: «اللَّهُمَّ رَبَّ السَّمَاوَاتِ وَرَبَّ الْأَرْضِ وَرَبَّ الْعَرْشِ الْعَظِيمِ، رَبَّنَا وَرَبَّ كُلِّ شَيْءٍ، فَالِقَ الْحَبِّ وَالنَّوَى، وَمُنْزِلَ التَّوْرَاةِ وَالْإِنْجِيلِ وَالْفُرْقَانِ، أَعُوذُ بِكَ مِنْ شَرِّ كُلِّ شَيْءٍ أَنْتَ آخِذٌ بِنَاصِيَتِهِ، اللَّهُمَّ أَنْتَ الْأَوَّلُ فَلَيْسَ قَبْلَكَ شَيْءٌ، وَأَنْتَ الْآخِرُ فَلَيْسَ بَعْدَكَ شَيْءٌ، وَأَنْتَ الظَّاهِرُ فَلَيْسَ فَوْقَكَ شَيْءٌ، وَأَنْتَ الْبَاطِنُ فَلَيْسَ دُونَكَ شَيْءٌ، اقْضِ عَنَّا الدَّيْنَ، وَأَغْنِنَا مِنَ الْفَقْرِ» ”اے اللہ! اے تمام آسمانوں کے پروردگار اور زمین کے پروردگار اور عظیم عرش کے پروردگار! اے ہمارے پروردگار اور اے ہر چیز کے پروردگار! اے دانے اور گٹھلی کو چیرنے والے! اے تورات، انجیل اور قرآن کو نازل کرنے والے! میں ہر اس چیز کے شر سے تیری پناہ مانگتا ہوں جس کی پیشانی کو تو نے پکڑا ہوا ہے، تو ہی سب سے پہلے ہے تجھ سے پہلے کچھ نہیں ہے، تو ہی سب کے بعد ہے تیرے بعد کچھ نہیں ہے، تو ایسا ظاہر ہے کہ تیرے اوپر کوئی نہیں ہے، تو ہماری طرف سے قرض کو ادا کر دے اور ہمیں غربت سے محفوظ کر دے۔“ سہیل نامی راوی بیان کرتے ہیں کہ ابوصالح نے یہ روایت سیدنا ابوہریرہ رضی اللہ عنہ کے حوالے سے نبی اکرم صلی اللہ علیہ وسلم سے نقل کی ہے۔ [صحیح ابن حبان/كتاب الزينة والتطييب/حدیث: 5537]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم جب بستر پر لیٹتے تھے تو یہ پڑھتے تھے: «اَلْحَمْدُ لِلّٰهِ الَّذِي كَفَانِي وَآوَانِي، وَأَطْعَمَنِي وَسَقَانِي، وَالْحَمْدُ لِلّٰهِ الَّذِي مَنَّ عَلَيَّ فَأَفْضَلَ، وَالْحَمْدُ لِلّٰهِ الَّذِي أَعْطَانِي فَأَجْزَلَ، اَلْحَمْدُ لِلّٰهِ عَلَى كُلِّ حَالٍ، اَللّٰهُمَّ رَبَّ كُلِّ شَيْءٍ وَمَلِيكَهُ، وَإِلٰهَ كُلِّ شَيْءٍ، أَعُوذُ بِكَ مِنَ النَّارِ» ”ہر طرح کی حمد اللہ تعالیٰ کے لیے مخصوص ہے جس نے میری ضروریات کی کفایت کی، مجھے پناہ دی، مجھے کھلایا اور مجھے سیراب کیا؛ ہر طرح کی حمد اس اللہ کے لیے مخصوص ہے جس نے مجھ پر احسان کرتے ہوئے اپنا فضل کیا؛ ہر طرح کی حمد اس اللہ کے لیے مخصوص ہے جس نے مجھے عطا کرتے ہوئے بہترین عطا کیا؛ ہر طرح کی حمد اللہ تعالیٰ کے لیے مخصوص ہے جو ہر حالت میں ہے؛ اے اللہ! اے ہر چیز کے پروردگار، اے ہر چیز کے مالک، اے ہر چیز کے معبود! ہر چیز تیری ملکیت ہے، میں جہنم سے تیری پناہ مانگتا ہوں۔“ [صحیح ابن حبان/كتاب الزينة والتطييب/حدیث: 5538]

اردو ترجمہ · UrduUnverified translation

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم جب بستر پر جاتے تھے تو آپ یہ پڑھتے تھے: «بِاسْمِكَ اللّٰهُمَّ أَمُوتُ وَأَحْيَا» ”اے اللہ! میں تیرے اسم سے برکت حاصل کرتے ہوئے مرتا ہوں (یعنی سوتا ہوں) اور زندہ ہوں گا (یعنی بیدار ہوں گا)۔“ نبی اکرم صلی اللہ علیہ وسلم جب بیدار ہوتے تھے تو یہ پڑھتے تھے: «الْحَمْدُ لِلّٰهِ الَّذِي أَحْيَانَا بَعْدَ مَا أَمَاتَنَا وَإِلَيْهِ النُّشُورُ» ”ہر طرح کی حمد اس اللہ کے لیے مخصوص ہے جس نے ہمیں موت (یعنی نیند) دینے کے بعد زندگی (یعنی بیداری) دی اور اس کی بارگاہ میں دوبارہ زندہ ہونا ہے۔“ [صحیح ابن حبان/كتاب الزينة والتطييب/حدیث: 5539]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں: نبی اکرم صلی اللہ علیہ وسلم جب بستر پر جاتے تھے تو یہ پڑھتے تھے: «الْحَمْدُ لِلّٰهِ الَّذِي أَطْعَمَنَا وَسَقَانَا وَكَفَانَا وَآوَانَا، فَكَمْ مِمَّنْ لَا كَافِيَ لَهُ وَلَا مُؤْوِيَ» ”ہر طرح کی حمد اللہ تعالیٰ کے لیے مخصوص ہے جس نے ہمیں کھلایا، ہمیں پلایا اور ہماری کفایت کی، تو کتنے ہی لوگ ایسے ہیں جن کا کفایت کرنے والا کوئی نہیں ہے، جنہیں پناہ دینے والا کوئی نہیں ہے۔“ [صحیح ابن حبان/كتاب الزينة والتطييب/حدیث: 5540]

اردو ترجمہ · UrduUnverified translation

سیدنا عبداللہ بن عمر رضی اللہ عنہما کے بارے میں یہ بات منقول ہے کہ جب وہ بستر پر لیٹتے تھے تو یہ پڑھتے تھے: «اللَّهُمَّ خَلَقْتَ نَفْسِي وَأَنْتَ تَوَفَّاهَا، لَكَ مَمَاتُهَا وَمَحْيَاهَا، إِنْ أَحْيَيْتَهَا فَاحْفَظْهَا، وَإِنْ أَمَتَّهَا فَاغْفِرْ لَهَا، اللَّهُمَّ إِنِّي أَسْأَلُكَ الْعَافِيَةَ» ”اے اللہ! تو نے میری جان کو پیدا کیا ہے، تو ہی اسے موت دے گا، اس کی موت اور زندگی تیرے ہاتھ میں ہے، اے اللہ! اگر تو نے اسے موت دے دی تو اس کی مغفرت کرنا اور اگر اسے زندہ رکھا تو اس کی حفاظت کرنا، اے اللہ! میں تجھ سے عافیت کا سوال کرتا ہوں۔“ تو سیدنا عبداللہ بن عمر رضی اللہ عنہما کی اولاد میں سے ایک صاحب نے دریافت کیا: کیا سیدنا عمر رضی اللہ عنہ یہ کلمات پڑھتے تھے؟ انہوں نے فرمایا: جی نہیں، بلکہ سیدنا عمر رضی اللہ عنہ سے زیادہ بہتر شخصیت ان کلمات کو پڑھتے تھے؛ راوی بیان کرتے ہیں: ہمارا یہ خیال ہے انہوں نے نبی اکرم صلی اللہ علیہ وسلم کے حوالے سے یہ بات نقل کی ہے۔ [صحیح ابن حبان/كتاب الزينة والتطييب/حدیث: 5541]

اردو ترجمہ · UrduUnverified translation

سیدنا براء بن عازب رضی اللہ عنہ نبی اکرم صلی اللہ علیہ وسلم کے بارے میں نقل کرتے ہیں کہ جب آپ صلی اللہ علیہ وسلم بستر پر لیٹتے تھے تو یہ پڑھتے تھے: «اللَّهُمَّ أَسْلَمْتُ نَفْسِي إِلَيْكَ، وَوَجَّهْتُ وَجْهِي إِلَيْكَ، وَفَوَّضْتُ أَمْرِي إِلَيْكَ، رَغْبَةً وَرَهْبَةً إِلَيْكَ، لَا مَلْجَأَ وَلَا مَنْجَا مِنْكَ إِلَّا إِلَيْكَ» ”اے اللہ! میں نے اپنے آپ کو تیرے سپرد کر دیا، میں نے اپنا رخ تیری طرف کر لیا، میں نے اپنا معاملہ تیرے سپرد کر دیا، رغبت رکھتے ہوئے بھی اور ڈرتے ہوئے بھی، تیرے مقابلے میں تیری ذات کے علاوہ اور کوئی جائے پناہ اور کوئی جائے نجات نہیں ہے۔“ [صحیح ابن حبان/كتاب الزينة والتطييب/حدیث: 5542]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب سونے لگتے تھے تو دونوں ہاتھ ملا کر ان پر پھونک مارتے تھے، پھر آپ سورہ اخلاص، سورہ فلق اور سورہ الناس کی تلاوت کرتے تھے، پھر وہ دونوں ہاتھ اپنے چہرے، اپنے سر اور اپنے پورے جسم پر پھیر لیتے تھے۔ عقیل بیان کرتے ہیں کہ میں نے ابن شہاب زہری رحمہ اللہ کو بھی ایسا کرتے ہوئے دیکھا ہے۔ [صحیح ابن حبان/كتاب الزينة والتطييب/حدیث: 5543]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم جب بستر پر لیٹتے تھے تو آپ اپنی دونوں ہتھیلیاں ملا کر ان پر پھونک مارتے تھے، ان میں ” ﴿سورہ اخلاص﴾ [سورة الإخلاص] ، ﴿سورہ فلق﴾ [سورة الفلق] اور ﴿سورہ الناس﴾ [سورة الناس] “ پڑھ کر دم کرتے تھے، پھر آپ ان دونوں ہاتھوں کو اپنے جسم پر جہاں تک ہو سکتا تھا پھیر لیتے تھے، ایسا آپ تین مرتبہ کرتے تھے۔ [صحیح ابن حبان/كتاب الزينة والتطييب/حدیث: 5544]

اردو ترجمہ · UrduUnverified translation

سیدنا فروہ بن نوفل اشجعی رحمہ اللہ اپنے والد رضی اللہ عنہ کا یہ بیان نقل کرتے ہیں: میں نبی اکرم صلی اللہ علیہ وسلم کی خدمت میں حاضر ہوا، میں نے عرض کی: اے اللہ کے نبی! آپ صلی اللہ علیہ وسلم مجھے کسی ایسی چیز کے بارے میں تعلیم دیجیے جسے میں اس وقت پڑھ لیا کروں جب میں اپنے بستر پر جاتا ہوں، تو نبی اکرم صلی اللہ علیہ وسلم نے فرمایا: ”تم سورہ الکافرون پڑھ لیا کرو۔“ [صحیح ابن حبان/كتاب الزينة والتطييب/حدیث: 5545]

اردو ترجمہ · UrduUnverified translation

سیدنا فروہ بن نوفل اپنے والد رضی اللہ عنہما کا یہ بیان نقل کرتے ہیں کہ نبی اکرم صلی اللہ علیہ وسلم نے دریافت فرمایا: ”کیا تمہیں ہماری سوتیلی بیٹی زینب میں دلچسپی ہے کہ اس کا خیال رکھا جائے؟“ راوی بیان کرتے ہیں کہ پھر وہ نبی اکرم صلی اللہ علیہ وسلم کی خدمت میں حاضر ہوئے، تو نبی اکرم صلی اللہ علیہ وسلم نے ان سے دریافت کیا تو انہوں نے بتایا کہ میں اسے اس کی والدہ کے پاس چھوڑ کر آیا ہوں۔ نبی اکرم صلی اللہ علیہ وسلم نے دریافت فرمایا: ”پھر تم کیوں آئے ہو؟“ انہوں نے عرض کی: میں اس لیے آیا ہوں تاکہ آپ مجھے کسی ایسی چیز کے بارے میں تعلیم دیں جسے میں رات کے وقت پڑھ لیا کروں۔ نبی اکرم صلی اللہ علیہ وسلم نے ارشاد فرمایا: ”تم «سُورَةُ الْكَافِرُونَ» ”سورہ الکافرون“ پڑھ لیا کرو اور پھر اسے پڑھنے کے بعد سو جایا کرو، یہ سورۃ شرک سے بری الذمہ ہونے کا اظہار ہے۔“ [صحیح ابن حبان/كتاب الزينة والتطييب/حدیث: 5546]

اردو ترجمہ · UrduUnverified translation

ہشام بن عروہ اپنے والد کا یہ بیان نقل کرتے ہیں کہ سیدہ عائشہ رضی اللہ عنہا نے مجھے عشاء کی نماز کے بعد بات کرتے ہوئے سنا تو انہوں نے فرمایا: ”اے عروہ! کیا تم اپنے کاتب (یعنی نیکیاں لکھنے والے فرشتے) کو آرام نہیں کرنے دو گے؟ نبی اکرم صلی اللہ علیہ وسلم عشاء کی نماز سے پہلے سوتے نہیں تھے اور اس کے بعد بات چیت نہیں کرتے تھے۔“ [صحیح ابن حبان/كتاب الزينة والتطييب/حدیث: 5547]

اردو ترجمہ · UrduUnverified translation

سیدنا ابوبرزہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”اس (عشاء کی نماز) سے پہلے سونے اور اس کے بعد بات چیت کرنے“ سے منع کیا ہے، راوی کی مراد عشاء کی نماز تھی۔ [صحیح ابن حبان/كتاب الزينة والتطييب/حدیث: 5548]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک شخص کے پاس سے گزرے جو اپنے پیٹ کے بل (الٹا) لیٹا ہوا تھا، نبی اکرم صلی اللہ علیہ وسلم نے اپنے پاؤں کے ذریعے اسے ٹہوکا دیا اور ارشاد فرمایا: ”یہ لیٹنے کا ایسا طریقہ ہے جسے اللہ تعالیٰ پسند نہیں کرتا۔“ [صحیح ابن حبان/كتاب الزينة والتطييب/حدیث: 5549]

اردو ترجمہ · UrduUnverified translation

سیدنا قیس بن طغفہ غفاری رضی اللہ عنہ بیان کرتے ہیں کہ نبی اکرم صلی اللہ علیہ وسلم مغرب کے بعد ہمارے پاس تشریف لائے، ہم اس وقت صفہ (کے چبوترے) پر موجود تھے۔ آپ صلی اللہ علیہ وسلم نے فرمایا: ”اے فلاں! تم فلاں کے ہمراہ روانہ ہو جاؤ“، یہاں تک کہ نبی اکرم صلی اللہ علیہ وسلم نے پانچ افراد کو بھیجا جن میں میں بھی شامل تھا۔ نبی اکرم صلی اللہ علیہ وسلم نے فرمایا: ”تم لوگ ہمارے ساتھ چلو“، ہم نے ایسا ہی کیا، ہم لوگ سیدہ عائشہ رضی اللہ عنہا کے ہاں آئے، یہ حجاب کا حکم نازل ہونے سے پہلے کی بات ہے۔ نبی اکرم صلی اللہ علیہ وسلم نے ارشاد فرمایا: ”اے عائشہ (رضی اللہ عنہا)! ہمیں کھانے کے لیے کچھ دو“، تو انہوں نے «جَشِيْشَة» (مخصوص قسم کا کھانا) ”جشیشہ“ آگے کر دیا، پھر نبی اکرم صلی اللہ علیہ وسلم نے فرمایا: ”اے عائشہ (رضی اللہ عنہا)! ہمیں (مزید کچھ) کھانے کے لیے دو“، تو انہوں نے «حَيْس» (مخصوص قسم کا کھانا) ”حیس“ پیش کر دیا، پھر نبی اکرم صلی اللہ علیہ وسلم نے فرمایا: ”اے عائشہ (رضی اللہ عنہا)! ہمیں (مزید کچھ) پینے کے لیے دو“، تو انہوں نے «عُسّ» (مخصوص قسم کا مشروب) ”عس“ پیش کر دیا۔ نبی اکرم صلی اللہ علیہ وسلم نے اسے پیا، پھر آپ صلی اللہ علیہ وسلم نے فرمایا: ”اے عائشہ (رضی اللہ عنہا)! ہمیں پینے کے لیے کچھ اور دو“، تو وہ مزید «عُسّ» ”عس“ لے آئیں جو پہلے سے کچھ کم تھا، پھر نبی اکرم صلی اللہ علیہ وسلم نے (ان سے) فرمایا: ”اگر تم لوگ چاہو تو تم ہمارے ہاں سو جاؤ اور اگر تم چاہو تو مسجد جا کر وہاں سو جاؤ۔“ راوی بیان کرتے ہیں: تو ہم لوگ مسجد میں سو گئے، رات کے آخری حصے میں نبی اکرم صلی اللہ علیہ وسلم ہمارے پاس تشریف لائے، آپ صلی اللہ علیہ وسلم نے مجھے پیٹ کے بل سوئے ہوئے پایا تو آپ صلی اللہ علیہ وسلم نے اپنے پاؤں کے ذریعے مجھے ٹہوکا دے کر ارشاد فرمایا: ”کیا وجہ ہے تم اس طرح سو رہے ہو؟ یہ سونے کا ایسا طریقہ ہے جسے اللہ تعالیٰ ناپسند کرتا ہے“ (راوی کو شک ہے شاید یہ الفاظ تھے) ”جس سے اللہ تعالیٰ بغض رکھتا ہے۔“ [صحیح ابن حبان/كتاب الزينة والتطييب/حدیث: 5550]

اردو ترجمہ · UrduUnverified translation

سیدنا جابر رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”کوئی انسان اپنی گدی کے بل اس طرح نہ لیٹے کہ اس کا ایک پاؤں دوسرے پر ہو۔“ (امام ابن حبان رحمہ اللہ فرماتے ہیں:) یہ فعل جس سے نبی اکرم صلی اللہ علیہ وسلم نے منع کیا ہے اس سے مراد یہ ہے: آدمی گدی کے بل یوں لیٹے کہ اس کا ایک پاؤں اوپر ہو اور اسے اس نے دوسرے پر رکھ لیا ہو۔ اس کی وجہ یہ ہے کہ وہ لوگ تہبند باندھا کرتے تھے اور جس شخص نے تہبند باندھا ہوا ہو اور شلوار نہ پہنی ہو اگر وہ اس طریقے پر عمل کرے تو ایسا کرنے کے نتیجے میں اس کی شرم گاہ سے پردہ ہٹ سکتا ہے۔ اسی وجہ سے نبی اکرم صلی اللہ علیہ وسلم نے اس سے منع کیا ہے۔ [صحیح ابن حبان/كتاب الزينة والتطييب/حدیث: 5551]

اردو ترجمہ · UrduUnverified translation

عباد بن تمیم اپنے چچا رضی اللہ عنہ کا یہ بیان نقل کرتے ہیں، انہوں نے نبی اکرم صلی اللہ علیہ وسلم کو مسجد میں چت لیٹے ہوئے دیکھا، آپ صلی اللہ علیہ وسلم نے اپنا ایک پاؤں دوسرے پر رکھا ہوا تھا۔ (امام ابن حبان رحمہ اللہ فرماتے ہیں:) یہ وہ فعل ہے جس پر نبی اکرم صلی اللہ علیہ وسلم نے عمل کیا ہے، اس سے مراد یہ ہے: آپ صلی اللہ علیہ وسلم نے اپنے دونوں پاؤں سیدھے کیے ہوئے تھے اور ان میں سے ایک پاؤں کو دوسرے پر رکھا ہوا تھا۔ یہ وہ فعل نہیں ہے جس سے نبی اکرم صلی اللہ علیہ وسلم نے منع کیا ہے اور یہ بات اس شخص کے موقف کے خلاف ہے جو علم حدیث میں مہارت نہیں رکھتا اور وہ اس گمان کا قائل ہے کہ نبی اکرم صلی اللہ علیہ وسلم کے حوالے سے منقول روایات میں تضاد اور اختلاف پایا جاتا ہے۔ [صحیح ابن حبان/كتاب الزينة والتطييب/حدیث: 5552]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ” «اشْتِمَالُ الصَّمَّاءِ» ”اشتمالِ صماء“ اور ایک کپڑے کو «احْتِبَاء» ”احتباء“ کے طور پر لپیٹنے سے منع فرمایا ہے اور (اس بات سے بھی منع فرمایا ہے) کہ آدمی ایک پاؤں دوسرے پر رکھے جب کہ وہ پشت کے بل چت لیٹا ہوا ہو۔“ [صحیح ابن حبان/كتاب الزينة والتطييب/حدیث: 5553]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم سے روایت کرتے ہیں کہ ”آپ صلی اللہ علیہ وسلم نے آدمی کے اس طرح چت لیٹنے سے منع فرمایا ہے کہ اس نے اپنا ایک پاؤں دوسرے پر رکھا ہوا ہو۔“ [صحیح ابن حبان/كتاب الزينة والتطييب/حدیث: 5554]

اردو ترجمہ · UrduUnverified translation

سیدنا مغیرہ بن شعبہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ نے ماؤں کی نافرمانی، بیٹیوں کو زندہ گاڑنے، دوسروں کا حق ادا نہ کرنے اور ان کا حق مارنے کو تمہارے لیے حرام قرار دیا ہے اور اس نے تین چیزوں کو تمہارے لیے ناپسندیدہ قرار دیا ہے: (فضول) بحث کرنا، بکثرت (غیر ضروری) سوال کرنا (یا ضرورت کے بغیر) مانگنا اور مال کو ضائع کرنا۔“ [صحیح ابن حبان/كتاب الحظر والإباحة/حدیث: 5555]

اردو ترجمہ · UrduUnverified translation

امام شعبی بیان کرتے ہیں کہ سیدنا معاویہ رضی اللہ عنہ نے سیدنا مغیرہ بن شعبہ رضی اللہ عنہ کو خط لکھا کہ آپ مجھے کوئی ایسی حدیث تحریر کر کے بھیج دیں، جو آپ نے نبی اکرم صلی اللہ علیہ وسلم کی زبانی سنی ہو، تو سیدنا مغیرہ رضی اللہ عنہ نے اپنے نوجوان (سیکرٹری) وراد کو بلایا اور بولے: تم یہ لکھو کہ میں نے نبی اکرم صلی اللہ علیہ وسلم کو ”بیٹیوں کو زندہ درگور کرنے، ماؤں کی نافرمانی کرنے، دوسروں کا حق ادا نہ کرنے اور ان کا حق مارنے، فضول بحث و تمحیص اور بکثرت سوالات (یعنی غیر ضروری سوالات یا ضرورت کے بغیر مانگنے) اور مال کو ضائع کرنے“ سے منع کرتے ہوئے سنا ہے۔ امام شعبی نے یہ روایت وراد کے حوالے سے سیدنا مغیرہ رضی اللہ عنہ سے نقل کی ہے، یہ بات شیخ نے بیان کی ہے۔ [صحیح ابن حبان/كتاب الحظر والإباحة/حدیث: 5556]

اردو ترجمہ · UrduUnverified translation

سیدنا ابوثعلبہ خشنی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”آخرت میں تم میں سے میرے نزدیک سب سے زیادہ پسندیدہ اور میرے سب سے زیادہ قریب وہ لوگ ہوں گے جن کے اخلاق زیادہ اچھے ہوں گے، اور آخرت میں میرے نزدیک سب سے زیادہ ناپسندیدہ اور مجھ سے سب سے زیادہ دور وہ لوگ ہوں گے جن کے اخلاق زیادہ برے ہوں گے؛ وہ لوگ جو تکلف کے ساتھ خود کو فصیح ظاہر کرتے ہیں، پھیلا کر گفتگو کرتے ہیں اور واہی تباہی بولتے ہیں۔“ [صحیح ابن حبان/كتاب الحظر والإباحة/حدیث: 5557]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”چار لوگوں کو اللہ تعالیٰ ناپسند کرتا ہے: قسمیں اٹھا کر (مال) فروخت کرنے والے کو، غریب متکبر کو، بوڑھے زانی کو اور ظالم حکمران کو۔“ [صحیح ابن حبان/كتاب الحظر والإباحة/حدیث: 5558]

اردو ترجمہ · UrduUnverified translation

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص ہمیں دھوکہ دے (یا ملاوٹ کرے) وہ ہم میں سے نہیں ہے، دھوکہ اور فریب جہنم میں ہوں گے۔“ [صحیح ابن حبان/كتاب الحظر والإباحة/حدیث: 5559]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص کسی بندے کو اس کی بیوی کے حوالے سے دھوکہ دے وہ ہم میں سے نہیں اور جو شخص کسی عورت کو اس کے شوہر کے خلاف اکسائے وہ ہم میں سے نہیں۔“ [صحیح ابن حبان/كتاب الحظر والإباحة/حدیث: 5560]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ہلاکت کا شکار کرنے والی سات چیزوں سے بچو۔“ لوگوں نے عرض کی: یا رسول اللہ! وہ کون سی ہیں؟ نبی اکرم صلی اللہ علیہ وسلم نے فرمایا: ”اللہ تعالیٰ کے ساتھ کسی کو شریک ٹھہرانا، جادو کرنا، ایسی جان کو قتل کرنا جس کو اللہ تعالیٰ نے قابل احترام قرار دیا ہو—البتہ حق کا معاملہ مختلف ہے—سود کھانا، یتیم کا مال کھانا، میدانِ جنگ سے پیٹھ پھیر لینا اور پاک دامن عورتوں پر زنا کا الزام عائد کرنا۔“ [صحیح ابن حبان/كتاب الحظر والإباحة/حدیث: 5561]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ ایک دیہاتی نبی اکرم صلی اللہ علیہ وسلم کی خدمت میں حاضر ہوا، اس نے عرض کی: یا رسول اللہ! کبیرہ گناہ کون سا ہے؟ نبی اکرم صلی اللہ علیہ وسلم نے ارشاد فرمایا: ”کسی کو اللہ کا شریک ٹھہرانا۔“ اس نے دریافت کیا: پھر کون سا ہے؟ آپ صلی اللہ علیہ وسلم نے فرمایا: ”پھر والدین کی نافرمانی کرنا۔“ اس نے دریافت کیا: پھر کون سا ہے؟ آپ صلی اللہ علیہ وسلم نے فرمایا: ”پھر جھوٹی قسم اٹھانا۔“ راوی بیان کرتے ہیں: میں نے اپنے استاد عامر رحمہ اللہ سے دریافت کیا کہ «الْيَمِينُ الْغَمُوسُ» ”یمین غموس“ سے مراد کیا ہے؟ انہوں نے فرمایا: یہ کہ آدمی جھوٹی قسم اٹھا کر کسی مسلمان کا مال ہڑپ کر لے۔ [صحیح ابن حبان/كتاب الحظر والإباحة/حدیث: 5562]