Hadith 4825–4864

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ایک مہم روانہ کی، انہیں مال غنیمت میں اناج اور شہد ملا تو نبی اکرم صلی اللہ علیہ وسلم نے اس میں سے خمس وصول نہیں کیا۔ [صحیح ابن حبان/كتاب السير/حدیث: 4825]

اردو ترجمہ · UrduUnverified translation

ہمام بن منبہ رحمہ اللہ بیان کرتے ہیں کہ سیدنا ابوہریرہ رضی اللہ عنہ نے ہمیں یہ حدیثیں بیان کی تھیں، پھر انہوں نے کچھ روایات ذکر کیں، جن میں ایک روایت یہ ہے کہ نبی اکرم صلی اللہ علیہ وسلم نے ارشاد فرمایا ہے: ”جو بھی بستی اللہ اور اس کے رسول کی نافرمانی کرتی ہے، اس کے (مال غنیمت میں سے) خمس اللہ اور اس کے رسول کو ملے گا اور پھر وہ تمہیں ملے گا۔“ [صحیح ابن حبان/كتاب السير/حدیث: 4826]

اردو ترجمہ · UrduUnverified translation

سیدنا رافع بن خدیج رضی اللہ عنہ بیان کرتے ہیں کہ غزوہ حنین کے موقع پر نبی اکرم صلی اللہ علیہ وسلم نے ابوسفیان بن حرب رضی اللہ عنہ کو ایک سو اونٹ دیے، آپ صلی اللہ علیہ وسلم نے اقرع بن حابس تمیمی رضی اللہ عنہ کو ایک سو اونٹ دیے، آپ صلی اللہ علیہ وسلم نے عیینہ بن حصن فزاری رضی اللہ عنہ کو ایک سو اونٹ دیے اور آپ صلی اللہ علیہ وسلم نے عباس بن مرداس رضی اللہ عنہ کو اس سے کم اونٹ دیے تو انہوں نے یہ شعر کہا کہ آپ نے میرا اور غلام کا حصہ عیینہ اور اقرع کے درمیان رکھا ہے۔ [صحیح ابن حبان/كتاب السير/حدیث: 4827]

اردو ترجمہ · UrduUnverified translation

سیدنا صفوان بن امیہ رضی اللہ عنہ بیان کرتے ہیں کہ غزوہ حنین کے موقع پر نبی اکرم صلی اللہ علیہ وسلم نے مجھے (مال) عطا کیا۔ پہلے آپ صلی اللہ علیہ وسلم میرے نزدیک ناپسندیدہ ترین شخصیت تھے، آپ صلی اللہ علیہ وسلم مجھے مسلسل (عطیات) دیتے رہے یہاں تک کہ آپ صلی اللہ علیہ وسلم میرے نزدیک مخلوق میں سب سے زیادہ پسندیدہ ہو گئے۔ [صحیح ابن حبان/كتاب السير/حدیث: 4828]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ بیان کرتے ہیں: غزوہ حنین کے موقع پر نبی اکرم صلی اللہ علیہ وسلم نے (مال غنیمت) تقسیم کرتے ہوئے کچھ لوگوں کو ترجیح دی، آپ صلی اللہ علیہ وسلم نے اقرع بن حابس کو ایک سو اونٹ دیے، آپ صلی اللہ علیہ وسلم نے عیینہ بن حصن کو بھی اتنے ہی (اونٹ) دیے، آپ صلی اللہ علیہ وسلم نے کچھ عرب سرداروں کو ترجیحی طور پر (زیادہ) ادائیگی کی تو ایک شخص نے کہا: اللہ کی قسم! اس تقسیم میں انصاف سے کام نہیں لیا گیا اور اس میں اللہ تعالیٰ کی رضامندی کا خیال نہیں رکھا گیا۔ (سیدنا عبداللہ رضی اللہ عنہ کہتے ہیں) میں نے کہا: میں نبی اکرم صلی اللہ علیہ وسلم کو یہ بات ضرور بتاؤں گا، میں نبی اکرم صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم کو اس بارے میں بتایا تو نبی اکرم صلی اللہ علیہ وسلم کا چہرہ مبارک متغیر (یعنی غصہ کی وجہ سے سرخ) ہو گیا، پھر آپ صلی اللہ علیہ وسلم نے ارشاد فرمایا: ”اگر اللہ تعالیٰ اور اس کا رسول ہی انصاف سے کام نہیں لیں گے تو پھر کون انصاف سے کام لے گا؟“ پھر آپ صلی اللہ علیہ وسلم نے فرمایا: ” «يَرْحَمُ اللَّهُ مُوسَىٰ» ”اللہ تعالیٰ سیدنا موسیٰ علیہ السلام پر رحم کرے“، انہیں اس سے زیادہ ایذا پہنچائی گئی، لیکن انہوں نے صبر سے کام لیا۔“ (سیدنا عبداللہ رضی اللہ عنہ کہتے ہیں) میں نے طے کیا: اب میں کبھی بھی آپ صلی اللہ علیہ وسلم تک (اس نوعیت کی) کوئی بات نہیں پہنچاؤں گا۔ [صحیح ابن حبان/كتاب السير/حدیث: 4829]

اردو ترجمہ · UrduUnverified translation

سیدنا قبیصہ بن مخارق بلالی رضی اللہ عنہ بیان کرتے ہیں: میں نے اپنی قوم (کے ذمہ لازم) ایک ادائیگی اپنے ذمہ لے لی، میں نے عرض کی: یا رسول اللہ صلی اللہ علیہ وسلم ! میں نے اپنی قوم کی طرف سے ایک ادائیگی اپنے ذمہ لے لی ہے آپ صلی اللہ علیہ وسلم اس بارے میں میری مدد کیجئے، نبی اکرم صلی اللہ علیہ وسلم نے فرمایا: ”تمہاری یہ ادائیگی ہم اپنے ذمہ لیتے ہیں جب صدقہ کے اونٹ آئیں گے تو تمہیں یہ (رقم یا ادائیگی کی چیز) مل جائے گی۔“ پھر نبی اکرم صلی اللہ علیہ وسلم نے ارشاد فرمایا: ”اے قبیصہ بن مخارق! مانگنا کسی کے لیے بھی جائز نہیں ہے صرف تین قسم کے لوگوں میں کسی ایک کے لیے مانگنا جائز ہے۔ ایک وہ شخص جو بھلائی کے ارادے کے ساتھ اپنی قوم کی طرف سے کوئی ادائیگی اپنے ذمہ لے وہ مانگ سکتا ہے یہاں تک کہ جب اس کی ضرورت پوری ہو جائے تو وہ (مانگنے سے) رک جائے۔ ایک وہ شخص جسے فاقہ لاحق ہو اور اس کی قوم کے تین تجربہ کار افراد اس کے حق میں گواہی دیں (تو وہ شخص مانگ سکتا ہے) یہاں تک کہ جب اس کی ضروریات کا سامان دستیاب ہو جائے (یہاں ایک لفظ کے بارے میں راوی کو شک ہے) تو وہ (مانگنے سے) رک جائے۔ ایک وہ شخص جس (کی زرعی پیداوار) کو کوئی آفت لاحق ہو جائے تو وہ مانگ سکتا ہے یہاں تک کہ جب اس کی ضروریات کا سامان دستیاب ہو جائے (یہاں ایک لفظ کے بارے میں راوی کو شک ہے) تو وہ مانگنے سے رک جائے۔ اے قبیصہ! اس کے علاوہ جو بھی مانگنا ہو وہ حرام ہو گا۔“ یہ بات نبی اکرم صلی اللہ علیہ وسلم نے تین مرتبہ ارشاد فرمائی۔ [صحیح ابن حبان/كتاب السير/حدیث: 4830]

اردو ترجمہ · UrduUnverified translation

سیدنا عمیر رضی اللہ عنہ بیان کرتے ہیں: میں غزوہ حنین میں شریک ہوا، میں ایک غلام تھا، میں نے عرض کی: یا رسول اللہ صلی اللہ علیہ وسلم ! (مال غنیمت میں سے) میرا حصہ؟ تو نبی اکرم صلی اللہ علیہ وسلم نے مجھے ایک تلوار عطا کی اور فرمایا: ”اسے تم گلے میں لٹکا لو۔“ اس کے علاوہ آپ صلی اللہ علیہ وسلم نے مجھے عام سا کچھ ساز و سامان بھی عطا کیا۔ [صحیح ابن حبان/كتاب السير/حدیث: 4831]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ایک مہم روانہ فرمائی، میں بھی اس میں شریک تھا، ہمیں مال غنیمت حاصل ہوا تو تقسیم کرتے ہوئے میرے حصے میں بارہ اونٹنیاں آئیں، پھر اس کے بعد نبی اکرم صلی اللہ علیہ وسلم نے ہمیں مزید ایک ایک اونٹنی عطا فرمائی۔ [صحیح ابن حبان/كتاب السير/حدیث: 4832]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے نجد کی سمت ایک مہم روانہ کی، جس میں سیدنا عبداللہ بن عمر رضی اللہ عنہما بھی شریک ہوئے۔ ان لوگوں کو مال غنیمت میں بہت سے اونٹ ملے تو ان میں سے ہر ایک کے حصہ میں بارہ اونٹ آئے اور (ان میں سے ہر ایک کو) مزید ایک ایک اونٹ کی ادائیگی بھی کی گئی۔ [صحیح ابن حبان/كتاب السير/حدیث: 4833]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے نجد کی سمت ایک مہم روانہ کی جس میں سیدنا عبداللہ بن عمر رضی اللہ عنہما بھی شریک ہوئے تو ان میں سے ہر ایک کے حصے میں بارہ اونٹ آئے اور پھر ان (میں سے ہر ایک) کو ان کے علاوہ بھی ایک ایک اونٹ دیا گیا۔ نبی اکرم صلی اللہ علیہ وسلم نے اس میں کوئی تبدیلی نہیں کی۔ [صحیح ابن حبان/كتاب السير/حدیث: 4834]

اردو ترجمہ · UrduUnverified translation

رجاء بن ابو سلمہ بیان کرتے ہیں: میں نے عمرو بن شعیب اور سلیمان بن موسیٰ کو (مال غنیمت میں سے) نفلی ادائیگی کے بارے میں بات چیت کرتے ہوئے سنا۔ عمرو نے کہا: نبی اکرم صلی اللہ علیہ وسلم کے بعد (مال غنیمت میں سے) کوئی نفلی ادائیگی نہیں کی جا سکتی۔ اس پر سلیمان بن موسیٰ نے کہا: آپ طائف میں کشمش کھانے میں ہی مصروف رہے (اور علم حاصل نہ کر سکے) مکحول نے زیاد بن جاریہ لخمی کے حوالے سے سیدنا حبیب بن مسلمہ فہری رضی اللہ عنہ کا یہ بیان نقل کیا ہے: ”نبی اکرم صلی اللہ علیہ وسلم نے آغاز میں خمس کے بعد چوتھائی حصہ نفلی طور پر عطا کیا تھا اور واپسی پر خمس کے بعد تہائی حصہ عطا کیا تھا۔“ [صحیح ابن حبان/كتاب السير/حدیث: 4835]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں کہ غزوہ حنین کے دن نبی اکرم صلی اللہ علیہ وسلم نے ارشاد فرمایا: ”جس نے کسی کافر کو قتل کیا ہو، تو اس (کافر) کا ساز و سامان اسے مل جائے گا۔“ سیدنا ابوطلحہ رضی اللہ عنہ نے اس دن بیس آدمیوں کو قتل کیا تھا، انہوں نے ان سب کا ساز و سامان حاصل کر لیا، تو سیدنا ابوقتادہ رضی اللہ عنہ نے عرض کی: یا رسول اللہ صلی اللہ علیہ وسلم ! میں نے ایک کافر کے کندھے پر وار کیا، اس نے زرہ پہنی ہوئی تھی، تو ایک صاحب بولے: میں نے (اس مقتول کا) ساز و سامان لے لیا ہے، آپ انہیں اس سامان کی طرف سے راضی کر دیں اور وہ سامان مجھے عطا کر دیں (سیدنا انس رضی اللہ عنہ بیان کرتے ہیں) نبی اکرم صلی اللہ علیہ وسلم سے جب بھی کوئی چیز مانگی جاتی تھی تو آپ صلی اللہ علیہ وسلم یا تو وہ چیز عطا کر دیتے تھے یا خاموش رہتے تھے۔ اس وقت بھی آپ صلی اللہ علیہ وسلم خاموش رہے تو سیدنا عمر بن خطاب رضی اللہ عنہ نے کہا: اللہ کی قسم! ایسا نہیں ہو گا کہ اللہ تعالیٰ اپنے ایک شیر کو مال فے میں سے کچھ عطا کرے اور نبی اکرم صلی اللہ علیہ وسلم وہ تمہیں عطا کر دیں، تو نبی اکرم صلی اللہ علیہ وسلم مسکرا دیے اور آپ صلی اللہ علیہ وسلم نے فرمایا: ”عمر نے ٹھیک کہا ہے۔“ [صحیح ابن حبان/كتاب السير/حدیث: 4836]

اردو ترجمہ · UrduUnverified translation

سیدنا ابو قتادہ انصاری رضی اللہ عنہ بیان کرتے ہیں کہ حنین کے سال ہم لوگ نبی اکرم صلی اللہ علیہ وسلم کے ہمراہ روانہ ہوئے، جب ہمارا (اور دشمن کا) سامنا ہوا (تو جنگ کے دوران) مسلمانوں میں بھگدڑ مچ گئی، میں نے ایک مشرک کو دیکھا کہ وہ ایک مسلمان پر غالب آ چکا تھا، میں گھوم کر اس (مشرک کے) پیچھے آ گیا، میں نے اس کے کندھے پر ضرب لگا کر اس کی زرہ کاٹ دی، وہ میری طرف بڑھا اور اس نے مجھے اتنے زور سے بھینچا کہ مجھے موت کی خوشبو محسوس ہوئی، لیکن پھر وہ مر گیا اور اس نے مجھے چھوڑ دیا، میں سیدنا عمر بن خطاب رضی اللہ عنہ سے ملا، میں نے ان سے کہا: لوگوں کو کیا ہو گیا ہے؟ انہوں نے فرمایا: اللہ کا حکم ہے۔ جب لوگ (اس جنگ سے) واپس آ گئے تو نبی اکرم صلی اللہ علیہ وسلم نے ارشاد فرمایا: ”جس شخص نے کسی (کافر) کو قتل کیا ہو اور اس کا ثبوت بھی موجود ہو تو مقتول کا ساز و سامان اس شخص کو ملے گا۔“ سیدنا ابو قتادہ رضی اللہ عنہ کہتے ہیں کہ میں کھڑا ہوا، پھر میں نے سوچا میرے حق میں گواہی کون دے گا؟ تو میں بیٹھ گیا، پھر نبی اکرم صلی اللہ علیہ وسلم نے ارشاد فرمایا: ”جس شخص نے کسی (کافر) کو قتل کیا اور اس کا ثبوت بھی موجود ہو تو اس مقتول کا ساز و سامان اسے ملے گا۔“ میں کھڑا ہوا، پھر مجھے خیال آیا میرے حق میں کون گواہی دے گا؟ میں پھر بیٹھ گیا، پھر نبی اکرم صلی اللہ علیہ وسلم نے تیسری مرتبہ یہی بات ارشاد فرمائی تو میں کھڑا ہو گیا، نبی اکرم صلی اللہ علیہ وسلم نے دریافت فرمایا: ”اے ابو قتادہ! کیا معاملہ ہے؟“ میں نے آپ صلی اللہ علیہ وسلم کو پورا واقعہ سنایا، تو حاضرین میں سے ایک صاحب بولے: یہ ٹھیک کہہ رہے ہیں، اس مقتول کا ساز و سامان میرے پاس ہے، آپ انہیں میری طرف سے راضی کر دیں، تو سیدنا ابوبکر رضی اللہ عنہ بولے: ہرگز نہیں، اللہ تعالیٰ کا ایک شیر اللہ تعالیٰ اور اس کے رسول صلی اللہ علیہ وسلم کی طرف سے جنگ میں حصہ لے اور (نبی اکرم صلی اللہ علیہ وسلم ) اس کا سامان تمہیں دے دیں؟ نبی اکرم صلی اللہ علیہ وسلم نے فرمایا: ”تم وہ اسے دے دو۔“ سیدنا ابو قتادہ رضی اللہ عنہ بیان کرتے ہیں کہ اس نے وہ مجھے دے دیا، میں نے زرہ کو فروخت کر کے بنو سلمہ کے محلے میں کھجوروں کا باغ لے لیا، اسلام قبول کرنے کے بعد یہ وہ پہلی زمین تھی جو میں نے خریدی تھی۔ [صحیح ابن حبان/كتاب السير/حدیث: 4837]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں: غزوہ حنین کے موقع پر ہوازن قبیلے کے لوگ بکریاں اور اونٹ لے آئے، انہوں نے اپنی دو صفیں بنا لیں تاکہ نبی اکرم صلی اللہ علیہ وسلم پر زیادہ شدت سے حملہ کریں۔ راوی بیان کرتے ہیں: جب مسلمانوں اور مشرکین کا سامنا ہوا تو (کچھ) مسلمان پیٹھ پھیر کر واپس پلٹ گئے جس طرح اللہ تعالیٰ نے اس کا ذکر کیا ہے، نبی اکرم صلی اللہ علیہ وسلم نے ارشاد فرمایا: ”میں اللہ تعالیٰ کا بندہ اور اس کا رسول ہوں۔“ پھر اللہ تعالیٰ نے مشرکین کو پسپا کر دیا حالانکہ (ایسا) ہمارے تلوار کے ذریعے (انہیں) مارنے یا نیزے کے ذریعے زخمی کرنے کی وجہ سے نہیں ہوا تھا۔ اس دن نبی اکرم صلی اللہ علیہ وسلم نے ارشاد فرمایا: ”جس نے کسی کافر کو قتل کیا ہو تو اس (کافر) کا ساز و سامان اسے ملے گا۔“ سیدنا ابوطلحہ رضی اللہ عنہ نے اس دن بیس آدمیوں کو قتل کیا تھا، ان کا ساز و سامان انہوں نے حاصل کر لیا۔ سیدنا ابوقتادہ رضی اللہ عنہ نے عرض کی: یا رسول اللہ صلی اللہ علیہ وسلم ! میں نے ایک کافر کی گردن پر وار کیا، اس نے زرہ پہنی ہوئی تھی (پھر وہ مارا گیا) میں اس کی زرہ حاصل نہیں کر سکا، اب آپ صلی اللہ علیہ وسلم دیکھ لیں کہ وہ کس کے پاس ہے؟ تو ایک صاحب کھڑے ہوئے، انہوں نے عرض کی: یا رسول اللہ صلی اللہ علیہ وسلم ! وہ میں نے حاصل کر لی ہے، آپ صلی اللہ علیہ وسلم انہیں میری طرف سے راضی کر دیں اور وہ (زرہ) مجھے عطا کر دیں۔ (سیدنا انس رضی اللہ عنہ بیان کرتے ہیں) نبی اکرم صلی اللہ علیہ وسلم کی یہ عادت شریفہ تھی کہ آپ صلی اللہ علیہ وسلم سے جب کوئی چیز مانگی جاتی تو آپ صلی اللہ علیہ وسلم یا تو وہ چیز عطا کر دیتے تھے یا پھر خاموش رہتے تھے (یعنی آپ صلی اللہ علیہ وسلم ”نہ“ نہیں کرتے تھے) اس پر سیدنا عمر رضی اللہ عنہ بولے: ایسا نہیں ہو گا کہ اللہ تعالیٰ نے اپنے ایک شیر کو وہ (زرہ) مالِ فے کے طور پر عطا کی ہو اور نبی اکرم صلی اللہ علیہ وسلم وہ تمہیں دے دیں۔ تو نبی اکرم صلی اللہ علیہ وسلم مسکرا دیے، آپ صلی اللہ علیہ وسلم نے ارشاد فرمایا: ”عمر نے ٹھیک کہا ہے۔“ (سیدنا انس رضی اللہ عنہ بیان کرتے ہیں: اس موقع پر) سیدنا ابوطلحہ رضی اللہ عنہ کی ملاقات سیدہ ام سلیم رضی اللہ عنہا سے ہوئی، ان کے پاس خنجر تھا، سیدنا ابوطلحہ رضی اللہ عنہ نے دریافت کیا: اے ام سلیم! یہ تمہارے پاس کیوں ہے؟ انہوں نے جواب دیا: میں نے یہ ارادہ کیا کہ اگر کوئی مشرک میرے قریب آیا تو میں اسے اس کے پیٹ میں گھونپ دوں گی، تو سیدنا ابوطلحہ رضی اللہ عنہ نے عرض کی: یا رسول اللہ صلی اللہ علیہ وسلم ! آپ نے سنا ام سلیم کیا کہہ رہی ہے؟ سیدہ ام سلیم رضی اللہ عنہا نے عرض کی: یا رسول اللہ صلی اللہ علیہ وسلم ! میں اس کے ذریعے ان طلقاء کو قتل کر دوں گی، جو آپ صلی اللہ علیہ وسلم کو چھوڑ کر پسپا ہو گئے تھے، تو نبی اکرم صلی اللہ علیہ وسلم نے ارشاد فرمایا: ”اے ام سلیم! بے شک اللہ تعالیٰ نے کفایت کر دی ہے اور (جنگ کا نتیجہ) عمدہ رکھا ہے۔“ [صحیح ابن حبان/كتاب السير/حدیث: 4838]

اردو ترجمہ · UrduUnverified translation

ایاس بن سلمہ اپنے والد (سیدنا سلمہ بن اکوع رضی اللہ عنہ) کا یہ بیان نقل کرتے ہیں کہ ایک شخص نبی اکرم صلی اللہ علیہ وسلم کے پاس سے اٹھ کر گیا، نبی اکرم صلی اللہ علیہ وسلم کو بتایا گیا کہ وہ مشرکوں کا جاسوس ہے، تو نبی اکرم صلی اللہ علیہ وسلم نے ارشاد فرمایا: ”جو شخص اسے قتل کر دے گا تو اس (جاسوس) کا ساز و سامان (یعنی اس کے ہتھیار وغیرہ) اسے مل جائیں گے۔“ (سیدنا سلمہ رضی اللہ عنہ بیان کرتے ہیں) میں نے اس تک پہنچ کر اسے قتل کر دیا، تو نبی اکرم صلی اللہ علیہ وسلم نے اس کا ساز و سامان مجھے عطا کر دیا۔ [صحیح ابن حبان/كتاب السير/حدیث: 4839]

اردو ترجمہ · UrduUnverified translation

سیدنا عبدالرحمن بن عوف رضی اللہ عنہ بیان کرتے ہیں: غزوہ بدر کے موقع پر میں صف میں کھڑا ہوا تھا، جب میں نے اپنے دائیں اور بائیں طرف دیکھا تو میں دو انصاری لڑکوں کے درمیان تھا، ابھی میں اسی حالت میں تھا کہ ان دونوں میں سے ایک نے مجھے ٹہوکا دیا اور بولا: اے چچا! کیا آپ ابوجہل بن ہشام کو پہچانتے ہیں؟ میں نے جواب دیا: جی ہاں! اے میرے بھتیجے، تمہیں اس سے کیا کام ہے؟ اس نے کہا: مجھے یہ بتایا گیا ہے کہ وہ نبی اکرم صلی اللہ علیہ وسلم کو برا کہتا ہے، «وَالَّذِي نَفْسِي بِيَدِهِ» ”اس ذات کی قسم! جس کے دستِ قدرت میں میری جان ہے“ اگر میں نے اسے دیکھ لیا تو میرا جسم اس کے جسم سے اس وقت تک جدا نہیں ہو گا جب تک ہم دونوں میں سے وہ شخص مر نہیں جاتا جسے پہلے موت آنی ہے۔ سیدنا عبدالرحمن بن عوف رضی اللہ عنہ فرماتے ہیں: میں اس کی بات سے متاثر ہوا تو دوسرے نے مجھے ٹہوکا دیا، اس نے بھی اسی کی مانند بات کہی، اسی دوران میں نے ابوجہل کو لوگوں کے درمیان گھومتے ہوئے دیکھا تو میں نے ان دونوں سے کہا: یہ رہا وہ شخص جس کے بارے میں تم دونوں مجھ سے دریافت کر رہے تھے۔ وہ دونوں اس کی طرف لپکے، ان دونوں نے اس پر تلوار کا وار کیا اور اسے قتل کر دیا، پھر وہ دونوں نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم کو اپنے اس عمل کے بارے میں بتایا، نبی اکرم صلی اللہ علیہ وسلم نے دریافت کیا: ”تم دونوں میں سے کس نے اسے قتل کیا ہے؟“ ان دونوں نے یہی کہا: میں نے اسے قتل کیا ہے۔ نبی اکرم صلی اللہ علیہ وسلم نے دریافت کیا: ”کیا تم دونوں نے اپنی تلواروں کو صاف کر لیا ہے؟“ ہم نے (یعنی ان دونوں نے) جواب دیا: جی نہیں! نبی اکرم صلی اللہ علیہ وسلم نے ان دونوں کی تلواروں کا جائزہ لیا اور پھر نبی اکرم صلی اللہ علیہ وسلم نے ارشاد فرمایا: ”تم دونوں ہی نے اسے قتل کیا ہے۔“ پھر نبی اکرم صلی اللہ علیہ وسلم نے (ابوجہل) کا ساز و سامان (یعنی ہتھیار وغیرہ) معاذ بن عمرو بن جموح کو دیے جانے کا فیصلہ دیا۔ (راوی بیان کرتے ہیں) وہ دو لڑکے سیدنا معاذ بن عمرو بن جموح اور سیدنا معاذ بن عفراء رضی اللہ عنہما تھے۔ (امام ابن حبان رحمہ اللہ فرماتے ہیں:) اس روایت کو نقل کرتے ہوئے ہمارے ائمہ کی ایک جماعت کو غلط فہمی ہوئی کہ جس کافر کو قتل کرنے میں دو آدمی حصہ دار ہوں اس کافر (کے ساز و سامان) کے بارے میں امیر کو اختیار ہو گا کہ وہ اس سامان کو دونوں قاتلوں میں سے کسی ایک کو دے دے جسے بھی وہ چاہے، ہم ایک عرصہ تک اس کے مطابق فتوی دیتے رہے۔ پھر ہم نے غور و فکر کیا (تو یہ بات سامنے آئی) یہ واقعہ غزوہ بدر کا ہے اور اس وقت یہ حکم نہیں تھا کہ مقتول کا ساز و سامان قاتل کو ملے گا، تو جب یہ صورتحال تھی تو (اس وقت) اختیار امیر کے پاس تھا کہ وہ اس سامان کو دونوں قاتلوں میں سے جسے چاہے دے دے جس طرح نبی اکرم صلی اللہ علیہ وسلم نے ابوجہل کے سامان کے بارے میں کیا کہ آپ صلی اللہ علیہ وسلم نے وہ سامان سیدنا معاذ بن عمرو بن جموح رضی اللہ عنہ کو دے دیا حالانکہ وہ اور سیدنا معاذ بن عفراء رضی اللہ عنہما (دونوں ابوجہل کے) قاتل تھے۔ جہاں تک نبی اکرم صلی اللہ علیہ وسلم کے اس فرمان کا تعلق ہے: «مَنْ قَتَلَ قَتِيلًا فَلَهُ سَلَبُهُ» ”جو کسی (کافر) کو قتل کرے تو اس (کافر) کا ساز و سامان اسے مل جائے گا۔“ یہ فرمان غزوہ حنین کے موقع کا ہے اور غزوہ حنین، غزوہ بدر کے سات سال بعد پیش آیا تھا۔ اس بنیاد پر میں یہ کہتا ہوں جب دو (مجاہد) کسی (کافر) کو قتل کرنے میں حصہ دار ہوں تو (اس کافر کا) ساز و سامان ان دونوں کو ملے گا۔ [صحیح ابن حبان/كتاب السير/حدیث: 4840]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں: غزوہ حنین کے موقع پر نبی اکرم صلی اللہ علیہ وسلم نے ارشاد فرمایا: ”جو شخص کسی کے خون میں منفرد ہو اس کا ساز و سامان اسے ملے گا۔“ سیدنا انس رضی اللہ عنہ بیان کرتے ہیں: سیدنا طلحہ رضی اللہ عنہ نے اس دن اکیس آدمیوں کا ساز و سامان حاصل کیا۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”جو شخص کسی کے خون میں منفرد ہو اس کا ساز و سامان اسے ملے گا“ (اور آپ صلی اللہ علیہ وسلم کا یہ فرمان:) ”جو شخص کسی کو قتل کر دے اس کا ساز و سامان اسے ملے گا“ ان دونوں کا مطلب ایک ہی ہے کہ جس اکیلے شخص نے کسی کو قتل کیا ہو تو مقتول کا ساز و سامان اسے ملے گا جب وہ اسے قتل کرنے میں منفرد ہو اور اگر کسی شخص کو قتل کرنے میں ایک جماعت حصے دار ہو تو وہ ساز و سامان ان کے درمیان تقسیم ہو گا، اس کی وجہ یہ ہے: ایک قاتل میں جو علت پائی جا رہی ہے وہی کئی قاتلوں میں پائی جا رہی ہے اس وقت جب وہ کسی کے خون میں حصہ دار ہوں، تو ان کا حکم اور منفرد شخص کا حکم ایک ہی ہو گا۔ [صحیح ابن حبان/كتاب السير/حدیث: 4841]

اردو ترجمہ · UrduUnverified translation

سیدنا عوف بن مالک رضی اللہ عنہ بیان کرتے ہیں: ایک مددی شخص نے غزوہ تبوک کے موقع پر ان کا ساتھ دیا۔ رومیوں نے مسلمانوں پر حملہ کر دیا تو اس مددی نے یہ حیلہ اختیار کیا کہ وہ ایک چٹان کے نیچے بیٹھ گیا، جب رومی شخص اس کے پاس سے گزرا تو اس نے اس کے گھوڑے پر حملہ کیا، تو رومی شخص گدی کے بل نیچے گر گیا۔ مددی شخص تلوار لے کر اس پر غالب آیا اور اس نے اسے قتل کر دیا، پھر وہ اس کی زین، اس کی لگام، اس کی تلوار، اس کا پٹکا اور اس کے ہتھیار لے کر آیا۔ یہ دونوں صاحبان سونا اور جواہرات لے کر سیدنا خالد بن ولید رضی اللہ عنہ کے پاس گئے تو سیدنا خالد رضی اللہ عنہ نے اس میں سے کچھ چیزیں رکھ لیں اور بقیہ چیزیں اس مددی کو انعام کے طور پر دے دیں۔ میں نے ان سے کہا: اے سیدنا خالد رضی اللہ عنہ! یہ آپ نے کیا کیا؟ کیا آپ یہ بات نہیں جانتے کہ نبی اکرم صلی اللہ علیہ وسلم سارا ساز و سامان قتل کرنے والے کو عطیے کے طور پر دیتے ہیں؟ سیدنا خالد رضی اللہ عنہ جواب دیتے ہیں: جی ہاں! لیکن میں نے اسے زیادہ خیال کیا (اس لیے میں نے اسے نہیں دیا)۔ (سیدنا عوف بن مالک رضی اللہ عنہ کہتے ہیں:) تو میں نے یہ کہا: اللہ کی قسم! میں نبی اکرم صلی اللہ علیہ وسلم کو ضرور اس بارے میں آگاہ کروں گا۔ جب ہم نبی اکرم صلی اللہ علیہ وسلم کی خدمت میں حاضر ہوئے اور میں نے آپ صلی اللہ علیہ وسلم کو اس صورت حال کے بارے میں بتایا تو نبی اکرم صلی اللہ علیہ وسلم نے سیدنا خالد رضی اللہ عنہ کو بلایا اور انہیں یہ حکم دیا کہ وہ اس مددی کو باقی رہ جانے والا ساز و سامان بھی دیں۔ سیدنا خالد رضی اللہ عنہ ایسا کرنے کے لیے مڑ کر جانے لگے تو میں نے ان سے کہا: اے خالد! آپ نے دیکھا کہ میں نے آپ کے ساتھ کیا ہوا وعدہ پورا کر دیا ہے؟ تو نبی اکرم صلی اللہ علیہ وسلم غصے میں آ گئے۔ آپ صلی اللہ علیہ وسلم نے فرمایا: ”اے خالد! تم اسے نہ دینا۔“ پھر آپ صلی اللہ علیہ وسلم میری طرف متوجہ ہوئے اور فرمایا: ”کیا تم میرے مقرر کردہ امیروں سے درگزر نہیں کر سکتے؟ ان کے معاملے کی اچھائی کا فائدہ تمہیں مل جائے اور ان کی کوتاہی کا وبال ان پر ہو۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”اے خالد! تم اسے نہ دو“ کے ذریعے آپ صلی اللہ علیہ وسلم کی یہ مراد تھی کہ اس وقت میں نہ دو۔ بعد میں نبی اکرم صلی اللہ علیہ وسلم نے انہیں حکم دیا تھا تو سیدنا خالد رضی اللہ عنہ نے اسے وہ چیز دے دی تھی۔ [صحیح ابن حبان/كتاب السير/حدیث: 4842]

اردو ترجمہ · UrduUnverified translation

سیدنا سلمہ بن اکوع رضی اللہ عنہ بیان کرتے ہیں: ہم نے نبی اکرم صلی اللہ علیہ وسلم کے ہمراہ ہوازن کے ساتھ جنگ کی، ایک دن ہم بیٹھے ہوئے دوپہر کا کھانا کھا رہے تھے، اسی دوران ایک شخص اپنے سرخ اونٹ پر سوار ہو کر آیا، اس نے اونٹ کی نکیل کو کھینچ کر اس کے ذریعے اونٹ کو باندھ دیا، پھر وہ شخص آیا اور ہمارے ساتھ بیٹھ کر کھانا کھانے لگا، اس نے لوگوں کا جائزہ لیا کہ ان کے پاس سواریاں کم ہیں اور ان میں سے زیادہ تر لوگ پیدل ہیں۔ جب اس نے لوگوں کا جائزہ لے لیا تو پھر وہ وہاں سے روانہ ہوا، یہاں تک کہ اپنے اونٹ کے پاس آیا اور اس کو ایڑھ لگا دی، وہ کفار کا جاسوس تھا۔ ہم میں سے اسلم قبیلے سے تعلق رکھنے والا ایک شخص اپنی خاکستری اونٹنی پر سوار ہو کر اس کے پیچھے گیا۔ ایاس نامی راوی نے یہ بات بیان کی ہے: میرے والد نے یہ بات بیان کی ہے: میں اس کے پیچھے گیا، میں نے اپنی تلوار سونت کر اس کا سر اڑا دیا، پھر میں اس کی اونٹنی کو ہانک کر ساتھ لے آیا جس پر اس کا ساز و سامان بھی تھا۔ نبی اکرم صلی اللہ علیہ وسلم ان لوگوں کے ہمراہ میرے سامنے آئے تو آپ صلی اللہ علیہ وسلم نے ارشاد فرمایا: ”اسے کس نے قتل کیا ہے؟“ سیدنا ابن اکوع رضی اللہ عنہ بیان کرتے ہیں: میں نے جواب دیا: میں نے! تو نبی اکرم صلی اللہ علیہ وسلم نے ارشاد فرمایا: ”اس کا سارا ساز و سامان تمہیں ملتا ہے۔“ (امام ابن حبان رحمہ اللہ فرماتے ہیں:) اگر اس نوعیت کی تمام روایات کی ہم تحقیق کریں، تو اس میں اکثر سنن داخل ہو جائیں گی کیونکہ نبی اکرم صلی اللہ علیہ وسلم اللہ تعالیٰ کی کتاب میں اللہ تعالیٰ کے بیان کردہ حکم کو اپنے قول اور فعل کے ذریعے بیان کرنے والے تھے اور جو چیز ہم نے ذکر کی ہے اس میں اس شخص کے لیے کافی اشارہ ہے جو اس بارے میں غور و فکر کرنے کا قصد کرتا ہے۔ [صحیح ابن حبان/كتاب السير/حدیث: 4843]

اردو ترجمہ · UrduUnverified translation

سیدنا عوف بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے ”(قاتل کو دیے جانے والے مقتول کافر کے ساز و سامان میں سے خمس نہیں نکالا تھا)“۔ [صحیح ابن حبان/كتاب السير/حدیث: 4844]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ ان کا ایک گھوڑا بھاگ گیا اور دشمن نے اسے پکڑ لیا، پھر جب مسلمان ان پر غالب آ گئے تو انہوں نے سیدنا عبداللہ بن عمر رضی اللہ عنہما کا گھوڑا انہیں واپس کر دیا، یہ نبی اکرم صلی اللہ علیہ وسلم کے زمانہ اقدس کی بات ہے۔ راوی بیان کرتے ہیں کہ ان کا ایک غلام بھاگ کر رومیوں سے جا ملا تھا، جب مسلمان ان پر غالب آ گئے تو ان کا وہ غلام سیدنا خالد بن ولید رضی اللہ عنہ نے انہیں واپس کر دیا تھا، یہ نبی اکرم صلی اللہ علیہ وسلم کے زمانہ اقدس کے بعد کی بات ہے۔ [صحیح ابن حبان/كتاب السير/حدیث: 4845]

اردو ترجمہ · UrduUnverified translation

سیدنا ابوثعلبہ خشنی رضی اللہ عنہ بیان کرتے ہیں کہ نبی اکرم صلی اللہ علیہ وسلم نے غزوہ خیبر کے موقع پر اس بات سے منع فرما دیا کہ ”قیدیوں میں سے حاملہ عورتوں کے ساتھ صحبت کی جائے، اس وقت تک جب تک وہ اپنے پیٹ میں موجود بچے کو جنم نہ دے دیں۔“ [صحیح ابن حبان/كتاب السير/حدیث: 4846]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”میں تم میں کسی شخص کو ایسی حالت میں نہ پاؤں کہ جب وہ قیامت کے دن آئے تو اس کی گردن پر ایک اونٹ ہو جو آواز نکال رہا ہو اور وہ شخص یہ کہے: یا رسول اللہ صلی اللہ علیہ وسلم ! (میری مدد کیجیے) تو میں یہ کہوں کہ میں اللہ تعالیٰ کے فیصلے کے مقابلے میں تمہارے لیے کچھ نہیں کر سکتا، میں نے تمہیں تبلیغ کر دی تھی۔ میں تم سے کسی بھی شخص کو ایسی حالت میں ہرگز نہ پاؤں جب وہ قیامت کے دن آئے تو اس کی گردن پر ایک بکری ہو جو آوازیں نکال رہی ہو اور وہ شخص یہ کہے: یا رسول اللہ صلی اللہ علیہ وسلم ! (میری مدد کیجیے) تو میں یہ کہوں کہ میں اللہ تعالیٰ کے مقابلے میں تمہارے لیے کچھ نہیں کر سکتا، میں نے تمہیں تبلیغ کر دی تھی۔ میں تم میں سے کسی شخص کو ایسی حالت میں ہرگز نہ پاؤں کہ جب وہ قیامت کے دن آئے تو اس کی گردن پر کوئی گھوڑا ہو جو آواز نکال رہا ہو اور وہ شخص یہ کہے: یا رسول اللہ صلی اللہ علیہ وسلم ! (میری مدد کیجیے) تو میں یہ کہوں کہ میں اللہ تعالیٰ کے فیصلے کے مقابلے میں تمہارے لیے کچھ نہیں کر سکتا، میں نے تمہیں تبلیغ کر دی۔ میں تم میں سے کسی شخص کو ایسی حالت میں ہرگز نہ پاؤں کہ وہ قیامت کے دن آئے تو اس کی گردن پر رقاع (یعنی کپڑے کے ٹکڑے وغیرہ) ہوں تو وہ شخص یہ کہے: یا رسول اللہ صلی اللہ علیہ وسلم ! (میری مدد کیجیے) تو میں یہ کہوں کہ میں اللہ تعالیٰ کے فیصلے کے مقابلے میں تمہارے لیے کچھ نہیں کر سکتا، میں نے تمہیں تبلیغ کر دی تھی۔“ [صحیح ابن حبان/كتاب السير/حدیث: 4847]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم ہمارے درمیان کھڑے ہوئے، آپ صلی اللہ علیہ وسلم نے (مالِ غنیمت) میں خیانت کا تذکرہ کرتے ہوئے اس کی اہمیت کو اجاگر کیا، پھر آپ صلی اللہ علیہ وسلم نے ارشاد فرمایا: ”اے لوگو! میں تم میں سے کسی شخص کو ایسی حالت میں ہرگز نہ پاؤں کہ جب وہ قیامت کے دن آئے تو اس کی گردن پر اونٹ ہو جو آواز نکال رہا ہو۔ وہ شخص یہ کہے: یا رسول اللہ صلی اللہ علیہ وسلم ! میری مدد کیجیے، تو میں یہ کہوں: میں اللہ تعالیٰ کے فیصلے کے مقابلے میں تمہارے لیے کچھ نہیں کر سکتا، میں نے تمہیں تبلیغ کر دی تھی۔ میں تم میں سے کسی بھی شخص کو ایسی حالت میں ہرگز نہ پاؤں کہ جب وہ قیامت کے دن آئے تو اس کی گردن پر کوئی بکری ہو جو آواز نکال رہی ہو۔ وہ شخص یہ کہے: یا رسول اللہ صلی اللہ علیہ وسلم ! (میری مدد کیجیے) تو میں یہ کہوں: میں اللہ تعالیٰ کے فیصلے کے مقابلے میں تمہاری کوئی مدد نہیں کر سکتا، میں نے تمہیں تبلیغ کر دی تھی۔ میں تم میں سے کسی شخص کو ایسی حالت میں ہرگز نہ پاؤں کہ جب وہ قیامت کے دن آئے تو اس کی گردن پر کوئی گھوڑا ہو جو آواز نکال رہا ہو، وہ شخص یہ کہے: یا رسول اللہ صلی اللہ علیہ وسلم ! میری مدد کیجیے تو میں یہ کہوں: میں تمہارے لیے کچھ نہیں کر سکتا، میں نے تمہیں تبلیغ کر دی تھی۔ میں تم میں سے کسی شخص کو ایسی حالت میں ہرگز نہ پاؤں کہ جب وہ قیامت کے دن آئے تو اس کی گردن پر کوئی شخص ہو جو چیخ رہا ہو، وہ شخص یہ کہے: یا رسول اللہ صلی اللہ علیہ وسلم ! میری مدد کیجیے تو میں یہ کہوں: میں تمہارے لیے کچھ نہیں کر سکتا، میں نے تمہیں تبلیغ کر دی تھی۔ میں تم میں سے کسی بھی شخص کو ایسی حالت میں ہرگز نہ پاؤں کہ وہ قیامت کے دن آئے اور اس کی گردن میں «رِقَاعٌ» (یعنی کپڑے کے ٹکڑے) ہوں، وہ شخص یہ کہے: یا رسول اللہ صلی اللہ علیہ وسلم ! میری مدد کیجیے اور میں کہوں: میں تمہارے لیے کچھ نہیں کر سکتا، میں نے تمہیں تبلیغ کر دی تھی۔ میں تم میں سے کسی بھی شخص کو ایسی حالت میں ہرگز نہ پاؤں کہ وہ قیامت کے دن آئے تو اس کی گردن پر کوئی خاموش (مال) ہو، وہ شخص عرض کرے: یا رسول اللہ صلی اللہ علیہ وسلم ! میری مدد کریں اور میں کہوں: میں تمہارے لیے کچھ نہیں کر سکتا، میں نے تمہیں تبلیغ کر دی تھی۔“ لفظ «رِقَاعٌ» سے مراد کپڑے ہیں۔ یہ بات امام ابوحاتم رحمہ اللہ نے بیان کی ہے۔ [صحیح ابن حبان/كتاب السير/حدیث: 4848]

اردو ترجمہ · UrduUnverified translation

سیدنا عمر بن خطاب رضی اللہ عنہ بیان کرتے ہیں کہ جب غزوہ خیبر کے موقع پر نبی اکرم صلی اللہ علیہ وسلم کے اصحاب میں سے کچھ لوگ شہید ہو گئے تو لوگوں نے کہا: فلاں شخص شہید ہے، فلاں شخص شہید ہے، یہاں تک کہ لوگوں نے ایک شخص کا ذکر کرتے ہوئے یہ کہا کہ فلاں شخص شہید ہے، تو نبی اکرم صلی اللہ علیہ وسلم نے فرمایا: ”ہرگز نہیں! میں نے اسے ایک «عَبَاءَةٍ» (راوی کو شک ہے شاید یہ الفاظ ہیں) چادر کی وجہ سے جہنم میں دیکھا ہے جو اس نے خیانت کے طور پر حاصل کی تھی۔“ پھر نبی اکرم صلی اللہ علیہ وسلم نے ارشاد فرمایا: ”اے خطاب کے صاحبزادے! جاؤ اور لوگوں میں یہ اعلان کر دو کہ «أَنَّهُ لَا يَدْخُلُ الْجَنَّةَ إِلَّا الْمُؤْمِنُونَ» ”جنت میں صرف مومن شخص داخل ہو گا۔“”سیدنا عمر رضی اللہ عنہ بیان کرتے ہیں کہ میں وہاں سے نکلا اور میں نے لوگوں میں یہ اعلان کر دیا۔ [صحیح ابن حبان/كتاب السير/حدیث: 4849]

اردو ترجمہ · UrduUnverified translation

سیدنا رویفع بن ثابت انصاری رضی اللہ عنہ نبی اکرم صلی اللہ علیہ وسلم کے بارے میں یہ بات بیان کرتے ہیں، غزوہ خیبر کے موقع پر آپ صلی اللہ علیہ وسلم نے ارشاد فرمایا: ”جو شخص اللہ تعالیٰ اور آخرت کے دن پر ایمان رکھتا ہو وہ اپنے پانی کے ذریعے کسی دوسرے کی اولاد کو سیراب نہ کرے اور جو شخص اللہ تعالیٰ اور آخرت کے دن پر ایمان رکھتا ہو وہ مال غنیمت میں سے کوئی جانور حاصل کر کے خود اس پر سوار نہ ہو جائے یہاں تک کہ جب وہ جانور کمزور ہو جائے تو اسے پھر مال غنیمت میں جمع کرا دے اور جو شخص اللہ تعالیٰ اور آخرت کے دن پر ایمان رکھتا ہو وہ مال غنیمت میں سے کوئی کپڑا لے کر پہن نہ لے کہ جب وہ پرانا ہو جائے تو اسے پھر مال غنیمت میں جمع کرا دے۔“ [صحیح ابن حبان/كتاب السير/حدیث: 4850]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں: غزوہ خیبر کے موقع پر ہم لوگ نبی اکرم صلی اللہ علیہ وسلم کے ہمراہ روانہ ہوئے، ہمیں مالِ غنیمت میں سونا یا چاندی حاصل نہیں ہوا، صرف زمینیں، کپڑے اور ساز و سامان ملا۔ نبی اکرم صلی اللہ علیہ وسلم وادیِ قریٰ کی طرف روانہ ہوئے، سیدنا رفاعہ بن زید رضی اللہ عنہ نے نبی اکرم صلی اللہ علیہ وسلم کو ایک سیاہ فام غلام تحفے کے طور پر دیا جس کا نام مدعم تھا، ہم لوگ روانہ ہوئے یہاں تک کہ ہم وادیِ قریٰ میں پہنچے تو مدعم نبی اکرم صلی اللہ علیہ وسلم کے اونٹ سے سامان اتار رہا تھا۔ اسی دوران ایک اندھا تیر آیا، اسے لگا اور وہ مر گیا تو لوگوں نے اسے جنت کی مبارکباد دی، تو نبی اکرم صلی اللہ علیہ وسلم نے فرمایا: ”ہرگز نہیں! اس ذات کی قسم جس کے دستِ قدرت میں میری جان ہے، غزوہ خیبر کے موقع پر اس نے جو چادر مالِ غنیمت میں سے حاصل کر لی تھی جو تقسیم تک نہیں پہنچی تھی، وہ آگ کی بن کر اس پر جل رہی ہے“۔ جب لوگوں نے یہ بات سنی تو ایک شخص ایک تسمہ یا دو تسمے لے کر نبی اکرم صلی اللہ علیہ وسلم کی خدمت میں حاضر ہوا۔ نبی اکرم صلی اللہ علیہ وسلم نے ارشاد فرمایا: ”یہ تسمہ آگ سے بنا ہوا ہے“ (راوی کو شک ہے شاید یہ الفاظ ہیں) ”یہ دو تسمے آگ سے بنے ہوئے ہیں“۔ (امام ابن حبان رحمہ اللہ فرماتے ہیں:) سیدنا ابوہریرہ رضی اللہ عنہ نے دوس قبیلے میں اسلام قبول کر لیا تھا، پھر جب وہ مدینہ منورہ آئے تو نبی اکرم صلی اللہ علیہ وسلم اس وقت خیبر کی طرف روانہ ہو چکے تھے اور مدینہ منورہ کے نگران سباع بن عرفطہ غفاری رضی اللہ عنہ تھے جنہیں نبی اکرم صلی اللہ علیہ وسلم نے نائب مقرر کیا تھا۔ سیدنا ابوہریرہ رضی اللہ عنہ نے سیدنا سباع رضی اللہ عنہ کی اقتدا میں نماز ادا کی، انہوں نے انہیں ﴿وَيْلٌ لِلْمُطَفِّفِينَ﴾ [سورة المطففين: 1] کی تلاوت کرتے ہوئے سنا، پھر وہ خیبر جا کر نبی اکرم صلی اللہ علیہ وسلم سے مل گئے اور غزوہ خیبر میں نبی اکرم صلی اللہ علیہ وسلم کے ہمراہ شریک ہوئے۔ [صحیح ابن حبان/كتاب السير/حدیث: 4851]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ سیدنا رفاعہ رضی اللہ عنہ نے نبی اکرم صلی اللہ علیہ وسلم کو ایک غلام تحفے کے طور پر دیا۔ نبی اکرم صلی اللہ علیہ وسلم اسے ساتھ لے کر خیبر تشریف لے گئے۔ ایک اجنبی تیر اس غلام کو آ کر لگا اور وہ غلام مر گیا تو ہم نے کہا: اسے جنت کی مبارک ہو۔ نبی اکرم صلی اللہ علیہ وسلم نے ارشاد فرمایا: ”اس ذات کی قسم! جس کے دستِ قدرت میں میری جان ہے، وہ چادر اس پر جہنم میں جل رہی ہے جو اس نے مسلمانوں کے مال میں غزوہ خیبر کے موقع پر خیانت کی تھی“، تو ایک انصاری نے عرض کی: یا رسول اللہ صلی اللہ علیہ وسلم ! اس دن مجھے دو تسمے ملے تھے۔ نبی اکرم صلی اللہ علیہ وسلم نے ارشاد فرمایا: ”تمہارے لیے ان دونوں کی مانند جہنم کی آگ میں (تسمے تیار کیے جائیں گے)“۔ [صحیح ابن حبان/كتاب السير/حدیث: 4852]

اردو ترجمہ · UrduUnverified translation

سیدنا زید بن خالد جہنی رضی اللہ عنہ بیان کرتے ہیں: نبی اکرم صلی اللہ علیہ وسلم کے اصحاب میں سے ایک شخص کا غزوہ خیبر کے موقع پر انتقال ہو گیا۔ لوگوں نے نبی اکرم صلی اللہ علیہ وسلم کے سامنے اس کے انتقال کا ذکر کیا تو نبی اکرم صلی اللہ علیہ وسلم نے فرمایا: ”تم لوگ اپنے ساتھی کی نماز جنازہ ادا کر لو۔“ تو اس بات پر لوگوں کے چہرے متغیر ہو گئے (یعنی وہ پریشان ہو گئے)۔ نبی اکرم صلی اللہ علیہ وسلم نے فرمایا: ”تمہارے اس ساتھی نے اللہ کی راہ میں خیانت کی تھی۔“ (راوی بیان کرتے ہیں) جب ہم نے اس کے ساز و سامان کا جائزہ لیا تو اس میں یہودیوں کا ایک ہار ملا جس کی قیمت دو درہم بھی نہیں ہو گی۔ [صحیح ابن حبان/كتاب السير/حدیث: 4853]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کی خدمت میں جب کسی ایسے شخص کی میت لائی جاتی تھی جس کے ذمے قرض ہوتا تھا تو آپ صلی اللہ علیہ وسلم دریافت کرتے تھے کہ کیا اس نے اپنے قرض کی ادائیگی کے لیے کچھ چھوڑا ہے؟ اگر یہ بات بتائی جاتی کہ اس نے ایسی چیز چھوڑی ہے جس کے ذریعے اس کا قرض ادا کیا جا سکتا ہے تو نبی اکرم صلی اللہ علیہ وسلم اس کی نماز جنازہ ادا کر لیتے تھے، ورنہ آپ صلی اللہ علیہ وسلم یہ فرماتے تھے: ”تم لوگ اپنے ساتھی کی نماز جنازہ ادا کر لو۔“ جب اللہ تعالیٰ نے آپ صلی اللہ علیہ وسلم کو فتوحات عطا کیں، تو آپ صلی اللہ علیہ وسلم نے ارشاد فرمایا: ”میں ہر مومن کے لیے اس کی اپنی جان سے زیادہ قریب ہوں، جو شخص ایسی حالت میں فوت ہو کہ اس کے ذمے قرض ہو تو اس کی ادائیگی میرے ذمے ہو گی اور جو شخص مال چھوڑ کر جائے گا وہ اس کے ورثاء کو ملے گا۔“ [صحیح ابن حبان/كتاب السير/حدیث: 4854]

اردو ترجمہ · UrduUnverified translation

سیدنا عبادہ بن صامت رضی اللہ عنہ بیان کرتے ہیں: نبی اکرم صلی اللہ علیہ وسلم بدر کی طرف روانہ ہوئے تو آپ صلی اللہ علیہ وسلم کا دشمن سے سامنا ہوا اور اللہ تعالیٰ نے ان لوگوں کو پسپا کر دیا، تو مسلمانوں کا ایک گروہ ان کے ساتھ لڑنے کے لیے ان کے پیچھے گیا، دوسرا گروہ نبی اکرم صلی اللہ علیہ وسلم کے آس پاس ٹھہر گیا۔ ایک گروہ نے لشکر اور لوٹنے کے معاملات سنبھال لیے۔ جب اللہ تعالیٰ نے دشمن کی طرف سے اطمینان کر دیا اور وہ لوگ واپس آ گئے جو ان کے پیچھے گئے تھے تو انہوں نے کہا: اضافی ادائیگی ہمیں ملے گی، کیونکہ ہم دشمن کے پیچھے گئے تھے اور ہماری وجہ سے اللہ تعالیٰ نے انہیں یہاں سے دور کیا ہے اور انہیں پسپا کیا ہے۔ جو نبی اکرم صلی اللہ علیہ وسلم کے ارد گرد پہرہ دے رہے تھے انہوں نے کہا: اللہ کی قسم! تم اس کے ہم سے زیادہ حق دار نہیں ہو، وہ ہمیں بھی ملے گا کیونکہ ہم نبی اکرم صلی اللہ علیہ وسلم کی حفاظت کر رہے تھے تاکہ کہیں کوئی دشمن آپ صلی اللہ علیہ وسلم کو نقصان نہ پہنچا دے۔ وہ لوگ جو لشکر اور لوٹنے کے نگہبان تھے وہ بولے: اللہ کی قسم! تم لوگ اس کے ہم سے زیادہ حق دار نہیں ہو، یہ ہمیں ملے گا، تو اللہ تعالیٰ نے یہ آیت نازل فرمائی: ﴿يَسْأَلُونَكَ عَنِ الْأَنْفَالِ﴾ [سورة الأنفال: 1] ”لوگ تم سے اضافی ادائیگی کے بارے میں دریافت کرتے ہیں۔“ تو نبی اکرم صلی اللہ علیہ وسلم نے وہ مالِ غنیمت ان کے درمیان تقسیم کر دیا اور نبی اکرم صلی اللہ علیہ وسلم انہیں عطیے کے طور پر چیزیں دیتے رہے۔ جب وہ لوگ وہاں سے روانہ ہوئے تھے تو شروع میں ایک چوتھائی دیا گیا اور جب وہ واپس آ گئے تھے تو انہیں ایک تہائی حصہ اضافی ادائیگی کے طور پر دیا گیا۔ غزوہ حنین کے موقع پر نبی اکرم صلی اللہ علیہ وسلم نے اونٹ کے پہلو کا بال پکڑ کر ارشاد فرمایا: ”اے لوگو! اللہ تعالیٰ تمہیں مالِ غنیمت کے طور پر جو کچھ عطا کرتا ہے اس میں سے اس (بال جتنی بھی) کوئی چیز میرے لیے حلال نہیں ہے سوائے «الْخُمُسِ» ”خمس“ کے، اور خمس بھی تمہاری طرف لوٹا دیا جائے گا، اس لیے تم سوئی اور دھاگہ تک ادا کرو اور خیانت کرنے سے بچنا، کیونکہ یہ قیامت کے دن اپنے کرنے والے کے لیے رسوائی کا باعث ہو گی۔ تم پر اللہ کی راہ میں جہاد کرنا لازم ہے کیونکہ وہ جنت کے دروازوں میں سے ایک دروازہ ہے، جس کے ذریعے اللہ تعالیٰ پریشانی اور غم کو ختم کر دیتا ہے۔“ راوی بیان کرتے ہیں نبی اکرم صلی اللہ علیہ وسلم اضافی ادائیگی کو ناپسند کرتے تھے، آپ صلی اللہ علیہ وسلم یہ ارشاد فرماتے تھے: ”اہلِ ایمان میں سے خوش حال لوگ اپنے غریبوں کو یہ دے دیں۔“ [صحیح ابن حبان/كتاب السير/حدیث: 4855]

اردو ترجمہ · UrduUnverified translation

سیدنا عتبہ بن ندر سلمی رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب تمہاری جنگ ختم ہو جائے اور عزائم زیادہ ہو جائیں اور مال غنیمت حلال قرار دیا جائے تو تمہارے لیے سب سے بہترین جہاد (سرحدوں پر) پہرہ داری کرنا ہے۔“ [صحیح ابن حبان/كتاب السير/حدیث: 4856]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں: سیدنا عمر بن خطاب رضی اللہ عنہ نے مجھے یہ حدیث بیان کی: غزوہ خیبر کے موقع پر نبی اکرم صلی اللہ علیہ وسلم کے اصحاب نے یہ کہنا شروع کیا: فلاں شخص شہید ہے، فلاں شخص شہید ہے، یہاں تک کہ انہوں نے ایک آدمی کا ذکر کرتے ہوئے یہ کہا: فلاں شہید ہے، تو نبی اکرم صلی اللہ علیہ وسلم نے ارشاد فرمایا: ”ہرگز نہیں! میں نے اسے ایک چادر کی وجہ سے جہنم میں دیکھا ہے جو اس نے خیانت کے طور پر حاصل کی تھی (راوی کو شک ہے شاید یہ الفاظ ہیں) ایک عباء کی وجہ سے۔“ پھر نبی اکرم صلی اللہ علیہ وسلم نے ارشاد فرمایا: ”اے خطاب کے صاحبزادے! تم جاؤ اور لوگوں میں یہ اعلان کر دو کہ جنت میں صرف اہل ایمان داخل ہوں گے۔“ سیدنا عمر رضی اللہ عنہ بیان کرتے ہیں: میں وہاں سے نکلا، میں نے اعلان کیا: خبردار! جنت میں صرف اہل ایمان داخل ہوں گے۔ (امام ابن حبان رحمہ اللہ فرماتے ہیں:) اس روایت میں اس بات کی دلیل موجود ہے کہ نیکی کرنے کی وجہ سے ایمان میں اضافہ ہوتا ہے اور گناہ کی وجہ سے اس میں کمی ہوتی ہے، اس میں اس بات کی دلیل بھی موجود ہے کہ بعض اوقات کسی گناہ کے ارتکاب کی وجہ سے کسی مومن شخص سے لفظ ایمان کی نفی کی جاتی ہے، اس سے پورے ایمان کی نفی نہیں کی جاتی، جس طرح اگر کوئی شخص کوئی نیکی کرتا ہے تو اس کے لیے لفظ ایمان استعمال کیا جاتا ہے، اس سے پورا ایمان مراد نہیں ہوتا۔ [صحیح ابن حبان/كتاب السير/حدیث: 4857]

اردو ترجمہ · UrduUnverified translation

سیدنا عبداللہ بن عمرو رضی اللہ عنہما بیان کرتے ہیں کہ نبی اکرم صلی اللہ علیہ وسلم کو مال غنیمت حاصل ہوا، آپ صلی اللہ علیہ وسلم نے سیدنا بلال رضی اللہ عنہ کو حکم دیا تو انہوں نے لوگوں میں تین مرتبہ اعلان کر دیا، لوگ اپنے طور پر مال غنیمت میں ملنے والی تمام چیزیں لے آئے۔ نبی اکرم صلی اللہ علیہ وسلم نے ان میں سے خمس نکال لیا اور باقی کو تقسیم کر دیا۔ اس کے بعد ایک شخص بال سے بنی ایک لگام لے کر آیا، اس نے عرض کی: ”یا رسول اللہ صلی اللہ علیہ وسلم ! یہ ان چیزوں میں شامل ہے جو ہمیں مال غنیمت کے طور پر ملی تھیں۔“ نبی اکرم صلی اللہ علیہ وسلم نے دریافت کیا: ”کیا تم نے بلال کو سنا نہیں تھا، اس نے تین مرتبہ اعلان کیا تھا؟“ اس نے جواب دیا: ”جی ہاں!“ نبی اکرم صلی اللہ علیہ وسلم نے فرمایا: ”پھر تم اسے لے کر کیوں نہیں آئے۔“ اس نے نبی اکرم صلی اللہ علیہ وسلم کی خدمت میں عذر پیش کیا تو نبی اکرم صلی اللہ علیہ وسلم نے ارشاد فرمایا: ”تم ایسے شخص بن جاؤ کہ تم اسے اپنے ساتھ قیامت کے دن لے کر آؤ گے، تو میں اسے تم سے قبول نہیں کروں گا۔“ [صحیح ابن حبان/كتاب السير/حدیث: 4858]

اردو ترجمہ · UrduUnverified translation

سیدنا عمران بن حصین رضی اللہ عنہ بیان کرتے ہیں کہ ثقیف قبیلے سے تعلق رکھنے والے لوگوں نے نبی اکرم صلی اللہ علیہ وسلم کے دو اصحاب کو قید کر لیا، اور نبی اکرم صلی اللہ علیہ وسلم کے اصحاب نے بنو عامر بن صعصعہ سے تعلق رکھنے والے ایک شخص کو قید کر لیا۔ نبی اکرم صلی اللہ علیہ وسلم اس کے پاس سے گزرے، وہ بندھا ہوا تھا، اس نے آپ صلی اللہ علیہ وسلم کو مخاطب کیا: اے سیدنا محمد صلی اللہ علیہ وسلم ! اے سیدنا محمد صلی اللہ علیہ وسلم ! نبی اکرم صلی اللہ علیہ وسلم اس کی طرف متوجہ ہو گئے، اس نے دریافت کیا کہ مجھے کیوں قید کیا گیا ہے۔ نبی اکرم صلی اللہ علیہ وسلم نے ارشاد فرمایا: ”تمہارے حلیفوں کی زیادتی کی وجہ سے۔“ نبی اکرم صلی اللہ علیہ وسلم آگے تشریف لے گئے تو اس نے پھر آپ صلی اللہ علیہ وسلم کو بلایا، نبی اکرم صلی اللہ علیہ وسلم اس کی طرف متوجہ ہوئے، اس قیدی نے آپ صلی اللہ علیہ وسلم کی خدمت میں گزارش کی: میں مسلمان ہوتا ہوں۔ نبی اکرم صلی اللہ علیہ وسلم نے فرمایا: ”اگر تم یہ بات کہتے ہو، تو تم اپنے معاملے کے مالک ہو گے اور تم مکمل طور پر کامیابی حاصل کر لو گے۔“ پھر نبی اکرم صلی اللہ علیہ وسلم آگے تشریف لے گئے تو اس نے پھر آپ صلی اللہ علیہ وسلم کو بلایا، نبی اکرم صلی اللہ علیہ وسلم اس کی طرف متوجہ ہوئے تو وہ بولا: میں بھوکا ہوں، مجھے کچھ کھانے کے لیے دیجیے! نبی اکرم صلی اللہ علیہ وسلم نے فرمایا: ”یہ تمہاری ضرورت کا سامان ہے۔“ پھر نبی اکرم صلی اللہ علیہ وسلم نے اسے ان دو آدمیوں کے فدیے کے طور پر ادا کیا جنہیں ثقیف قبیلے کے لوگوں نے قید کیا تھا۔ (امام ابن حبان رحمہ اللہ فرماتے ہیں:) اس قیدی کا یہ کہنا کہ میں مسلمان ہوں اور نبی اکرم صلی اللہ علیہ وسلم کا اس کی بات پر کوئی توجہ نہ دینا، اس کی وجہ یہ ہے کہ نبی اکرم صلی اللہ علیہ وسلم کو اللہ تعالیٰ کی طرف سے اس بات کی اطلاع مل گئی تھی کہ وہ شخص اپنے اس بیان میں جھوٹا ہے، اس لیے نبی اکرم صلی اللہ علیہ وسلم نے اس کی قید کے دوران اس سے اعتراف کو قبول نہیں کیا، جس طرح کا اعتراف آپ صلی اللہ علیہ وسلم اس طرح کی صورت حال میں قبول کر لیتے جب کہ وہ آدمی قیدی نہ ہوتا۔ جہاں تک آپ صلی اللہ علیہ وسلم کے (بعد کے) دور کا تعلق ہے تو وحی کا سلسلہ منقطع ہو گیا ہے، لہٰذا جب کوئی حربی شخص یہ کہے کہ میں مسلمان ہوں، تو اس سے اس بات کو قبول کیا جائے گا اور اس سے تلوار کو اٹھا لیا جائے گا، خواہ وہ شخص قیدی ہو یا جنگجو۔ [صحیح ابن حبان/كتاب السير/حدیث: 4859]

اردو ترجمہ · UrduUnverified translation

سیدنا سلمہ بن اکوع رضی اللہ عنہ بیان کرتے ہیں کہ ہم لوگ سیدنا ابوبکر رضی اللہ عنہ کے ہمراہ روانہ ہوئے، نبی اکرم صلی اللہ علیہ وسلم نے انہیں ہمارا امیر مقرر فرمایا تھا۔ ہم نے فزارہ قبیلے کے لوگوں کے ساتھ جنگ کرنی تھی، جب ہم پانی کے قریب پہنچے تو سیدنا ابوبکر رضی اللہ عنہ نے ہمیں حکم دیا اور ہم نے وہاں پڑاؤ کر لیا۔ جب ہم نے صبح کی نماز ادا کر لی تو سیدنا ابوبکر رضی اللہ عنہ نے ہمیں یک بارگی حملہ کرنے کا حکم دیا۔ ہم نے پانی کے آس پاس موجود بہت سے لوگوں کو قتل کر دیا۔ سیدنا سلمہ رضی اللہ عنہ بیان کرتے ہیں کہ میں نے لوگوں کی ایک جماعت دیکھی جس میں بچے اور عورتیں تھیں، میں ان کے پیچھے گیا، مجھے یہ اندیشہ ہوا کہ وہ مجھ سے پہلے پہاڑ پر نہ پہنچ جائیں تو میں نے ایک تیر مارا جو ان کے اور پہاڑ کے درمیان جا کر گرا تو وہ لوگ رک گئے۔ میں انہیں پکڑ کر اور ہانک کر سیدنا ابوبکر رضی اللہ عنہ کے پاس لے آیا، یہاں تک کہ میں پانی کے پاس آ گیا۔ ان میں فزارہ قبیلے سے تعلق رکھنے والی ایک عورت تھی جس نے چمڑے کا لباس پہنا ہوا تھا اور اس کے ساتھ اس کی بیٹی بھی تھی جو عربوں کی خوبصورت ترین عورتوں میں سے تھی۔ سیدنا ابوبکر رضی اللہ عنہ نے اس کی بیٹی مجھے بطورِ نفل (انعام) دے دی، میں نے اس کا پردہ نہیں ہٹایا یہاں تک کہ میں مدینہ منورہ آ گیا، پھر میں نے رات بسر کی اور اس کا پردہ نہیں ہٹایا۔ پھر نبی اکرم صلی اللہ علیہ وسلم کی مجھ سے ملاقات ہوئی تو آپ صلی اللہ علیہ وسلم نے فرمایا: ”وہ عورت مجھے ہبہ (تحفے) کے طور پر دے دو۔“ میں نے عرض کی: یا رسول اللہ صلی اللہ علیہ وسلم ! اللہ کی قسم! مجھے وہ بہت اچھی لگی ہے اور میں نے تو ابھی اس کا پردہ بھی نہیں ہٹایا، تو نبی اکرم صلی اللہ علیہ وسلم خاموش رہے اور آپ صلی اللہ علیہ وسلم نے مجھے کچھ نہیں کہا۔ پھر اگلے دن آپ صلی اللہ علیہ وسلم کی مجھ سے بازار میں ملاقات ہوئی تو آپ صلی اللہ علیہ وسلم نے فرمایا: ”اے سلمہ! تم وہ عورت مجھے ہبہ کر دو۔“ میں نے عرض کی: یا رسول اللہ صلی اللہ علیہ وسلم ! اللہ کی قسم! میں نے تو اس کا پردہ بھی نہیں ہٹایا، بہرحال وہ آپ صلی اللہ علیہ وسلم ہی کی ہے (نذر ہے) یا رسول اللہ صلی اللہ علیہ وسلم ! راوی بیان کرتے ہیں کہ پھر نبی اکرم صلی اللہ علیہ وسلم نے اہل مکہ کو پیغام بھیجا، ان کے ہاں کچھ مسلمان قیدی تھے تو نبی اکرم صلی اللہ علیہ وسلم نے ان قیدیوں کے فدیے کے طور پر وہ عورت ادا کر دی اور ان لوگوں کو اس عورت کے عوض میں چھڑوا لیا۔ [صحیح ابن حبان/كتاب السير/حدیث: 4860]

اردو ترجمہ · UrduUnverified translation

سیدنا فدیک رضی اللہ عنہ کے بارے میں یہ بات منقول ہے کہ وہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: یا رسول اللہ صلی اللہ علیہ وسلم ! لوگ یہ کہتے ہیں کہ جو شخص ہجرت نہیں کرتا وہ ہلاکت کا شکار ہو جاتا ہے، تو نبی اکرم صلی اللہ علیہ وسلم نے فرمایا: ”اے فدیک! تم نماز ادا کرتے رہو، برائی سے لاتعلق رہو اور جہاں چاہو اپنی قوم کی سرزمین میں رہائش رکھو۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان «أَقِمِ الصَّلَاةَ» ”تم نماز قائم کرو“ یہ فرض حکم ہے جو مخاطب افراد پر بعض حالتوں میں فرض ہوتا ہے، تمام حالتوں میں فرض نہیں ہوتا۔ نبی اکرم صلی اللہ علیہ وسلم کا یہ فرمان «وَاهْجُرِ السُّوءَ» ”تم برائی سے لاتعلق رہو“ یہ تمام مسلمانوں پر ہر حالت میں فرض ہے تاکہ وہ بھی کسی بھی صورت میں اپنی ذات کے حوالے سے گناہ کا ارتکاب نہ کریں اور کسی دوسرے کے ساتھ کوئی ایسا عمل نہ کریں جس سے اللہ تعالیٰ راضی نہیں ہوتا۔ نبی اکرم صلی اللہ علیہ وسلم کا یہ فرمان «وَاسْكُنْ مِنْ أَرْضِ قَوْمِكَ حَيْثُ شِئْتَ» ”اور تم اپنی قوم کی سرزمین پر رہائش رکھو جہاں بھی تم چاہو“ یہ مباح قرار دینے کے طور پر حکم ہے لیکن اس سے مراد اطلاع دینا ہے کہ برائی کو ترک کرنے والا وہ شخص جس کی صفت ہم نے بیان کی ہے، اس شخص پر کوئی نقصان نہیں ہوگا چاہے وہ کسی بھی جگہ پر رہائش اختیار کرے، اگرچہ وہ شرف والے مقامات پر رہائش کو اختیار نہ کرے۔ [صحیح ابن حبان/كتاب السير/حدیث: 4861]

اردو ترجمہ · UrduUnverified translation

سیدنا فضالہ بن عبید رضی اللہ عنہ بیان کرتے ہیں کہ حجۃ الوداع کے موقع پر نبی اکرم صلی اللہ علیہ وسلم نے ارشاد فرمایا: ”کیا میں تمہیں مومن کے بارے میں نہ بتاؤں؟ مومن وہ ہے جس سے لوگ اپنے مالوں اور جانوں کے حوالے سے مامون ہوں، اور مسلمان وہ ہے جس کی زبان اور ہاتھ سے دوسرے لوگ سلامت ہوں۔ مجاہد وہ شخص ہے جو اپنی ذات کے ساتھ اللہ تعالیٰ کی فرماں برداری کے بارے میں جہاد کرتا ہے اور مہاجر وہ شخص ہے جو اپنی خطاؤں اور گناہوں سے لاتعلق رہتا ہے۔“ [صحیح ابن حبان/كتاب السير/حدیث: 4862]

اردو ترجمہ · UrduUnverified translation

سیدنا عبداللہ بن عمرو رضی اللہ عنہما بیان کرتے ہیں: ”ہجرت دو طرح کی ہوتی ہے؛ دیہاتی شخص کی ہجرت یہ ہے: جب اسے بلایا جائے تو وہ آ جائے اور جب اسے حکم دیا جائے تو فرماں برداری کرے۔ جہاں تک شہری شخص کی ہجرت کا تعلق ہے تو آزمائش کے اعتبار سے یہ شدید ہوتی ہے اور اجر بھی اس کا زیادہ ہے۔“ [صحیح ابن حبان/كتاب السير/حدیث: 4863]

اردو ترجمہ · UrduUnverified translation

سیدنا یعلیٰ بن منیہ رضی اللہ عنہ بیان کرتے ہیں: میں اپنے والد کے ہمراہ نبی اکرم صلی اللہ علیہ وسلم کی خدمت میں حاضر ہوا، میں نے عرض کی: یا رسول اللہ صلی اللہ علیہ وسلم ! آپ میرے والد سے ہجرت پر بیعت لے لیجیے۔ نبی اکرم صلی اللہ علیہ وسلم نے ارشاد فرمایا: ”(جی نہیں) بلکہ میں ان سے جہاد پر بیعت لوں گا کیونکہ ہجرت ختم ہو چکی ہے۔“ [صحیح ابن حبان/كتاب السير/حدیث: 4864]