Hadith 4751–4784

اردو ترجمہ · UrduUnverified translation

سیدنا اسامہ بن زید رضی اللہ عنہ بیان کرتے ہیں: نبی اکرم صلی اللہ علیہ وسلم نے ہمیں جہینہ قبیلے کی شاخ حرقہ کی طرف بھیجا، ہم نے صبح کے وقت ان لوگوں پر حملہ کیا اور انہیں پسپا کر دیا۔ راوی بیان کرتے ہیں: میں اور ایک انصاری ان لوگوں کے ایک شخص کے سامنے آئے۔ جب ہم اس پر غالب آنے لگے تو اس نے کہا: «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“، تو انصاری نے اپنا ہاتھ روک لیا۔ میں نے اپنا نیزہ مار کر اسے قتل کر دیا۔ جب ہم لوگ واپس آئے تو نبی اکرم صلی اللہ علیہ وسلم کو اس بات کی اطلاع مل چکی تھی۔ نبی اکرم صلی اللہ علیہ وسلم نے دریافت فرمایا: ”اے اسامہ! کیا تم نے اس کے «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ پڑھنے کے بعد اسے قتل کر دیا تھا؟“ سیدنا اسامہ رضی اللہ عنہ بیان کرتے ہیں، میں نے عرض کی: یا رسول اللہ صلی اللہ علیہ وسلم ! اس نے جان بچانے کے لیے یہ پڑھا تھا۔ نبی اکرم صلی اللہ علیہ وسلم نے دریافت فرمایا: ”کیا تم نے اس کے «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ کہنے کے بعد اسے قتل کر دیا تھا؟“ اس کے بعد نبی اکرم صلی اللہ علیہ وسلم یہ بات مسلسل دہراتے رہے، یہاں تک کہ میں نے یہ آرزو کی کہ کاش میں نے آج سے پہلے اسلام ہی نہ قبول کیا ہوتا۔ [صحیح ابن حبان/كتاب السير/حدیث: 4751]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ بنو سلیم سے تعلق رکھنے والا ایک شخص نبی اکرم صلی اللہ علیہ وسلم کے کچھ اصحاب کے پاس سے گزرا، اس شخص کے ساتھ بکریاں بھی تھیں۔ اس شخص نے ان لوگوں کو سلام کیا تو ان لوگوں نے کہا: اس نے تم لوگوں کو سلام صرف اس لیے کیا تاکہ تم سے بچ جائے۔ ان لوگوں نے اس پر حملہ کر دیا اور اسے قتل کر دیا اور اس کی بکریاں حاصل کر لیں، پھر وہ لوگ ان بکریوں کو لے کر نبی اکرم صلی اللہ علیہ وسلم کی خدمت میں حاضر ہوئے تو اللہ تعالیٰ نے یہ آیت نازل کی: ﴿يَا أَيُّهَا الَّذِينَ آمَنُوا إِذَا ضَرَبْتُمْ فِي سَبِيلِ اللَّهِ فَتَبَيَّنُوا﴾ [سورة النساء: 94] ”اے ایمان والو! جب تم اللہ کی راہ میں سفر کرو تو پہلے اس بات کی تحقیق کر لو۔“ یہ آیت آخر تک ہے۔ [صحیح ابن حبان/كتاب السير/حدیث: 4752]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم صبح کی نماز کے وقت حملہ کرتے تھے، آپ صلی اللہ علیہ وسلم پہلے غور سے سنتے تھے، اگر آپ صلی اللہ علیہ وسلم کو اذان کی آواز آ جاتی تو آپ صلی اللہ علیہ وسلم رک جاتے تھے ورنہ حملہ کر دیتے تھے۔ راوی بیان کرتے ہیں: ایک مرتبہ آپ صلی اللہ علیہ وسلم نے سننے کی کوشش کی تو ایک شخص «اللّٰهُ أَكْبَرُ اللّٰهُ أَكْبَرُ» کہہ رہا تھا تو نبی اکرم صلی اللہ علیہ وسلم نے فرمایا: ” «عَلَى الْفِطْرَةِ» (یعنی دین فطرت پر گامزن ہے)۔“ اس شخص نے کہا: «أَشْهَدُ أَنْ لَا إِلٰهَ إِلَّا اللّٰهُ» ”میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے“ تو نبی اکرم صلی اللہ علیہ وسلم نے فرمایا: ” «خَرَجَ مِنَ النَّارِ» (یہ جہنم سے نکل گیا)۔“ [صحیح ابن حبان/كتاب السير/حدیث: 4753]

اردو ترجمہ · UrduUnverified translation

سیدنا صخر غامدی رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: «اللَّهُمَّ بَارِكْ لِأُمَّتِي فِي بُكُورِهَا» ”اے اللہ! میری امت کے صبح کے کاموں میں ان کے لیے برکت رکھ دے۔“ راوی بیان کرتے ہیں: نبی اکرم صلی اللہ علیہ وسلم جب کوئی مہم یا لشکر روانہ کرتے تھے تو آپ صلی اللہ علیہ وسلم ان کو دن کے ابتدائی حصے میں روانہ کرتے تھے۔ (راوی بیان کرتے ہیں) سیدنا صخر غامدی رضی اللہ عنہ ایک تاجر تھے، وہ دن کے ابتدائی حصے میں اپنی تجارت کا سامان بھجوا دیا کرتے تھے، وہ صاحب حیثیت بھی ہو گئے اور انہیں بہت سا مال بھی حاصل ہو گیا۔ [صحیح ابن حبان/كتاب السير/حدیث: 4754]

اردو ترجمہ · UrduUnverified translation

سیدنا صخر غامدی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: «اللَّهُمَّ بَارِكْ لِأُمَّتِي فِي بُكُورِهَا» ”اے اللہ! میری امت کے صبح کے کاموں میں ان کے لیے برکت رکھ دے۔“ (راوی بیان کرتے ہیں) سیدنا صخر رضی اللہ عنہ ایک تاجر آدمی تھے، وہ اپنے لڑکوں کو دن کے ابتدائی حصے میں بھیج دیتے تھے تو ان کا مال زیادہ ہو گیا۔ [صحیح ابن حبان/كتاب السير/حدیث: 4755]

اردو ترجمہ · UrduUnverified translation

زیاد بن جبیر بیان کرتے ہیں کہ مجھے میرے والد نے بتایا کہ سیدنا عمر بن خطاب رضی اللہ عنہ نے ہرمزان سے کہا: ”جب تم نے اپنی ذات کے حوالے سے مجھے آزمائش کا شکار کر دیا تو تم میری خیرخواہی کرو۔“ اس کی وجہ یہ تھی کہ سیدنا عمر رضی اللہ عنہ نے اس سے یہ کہا تھا: ”تم بات کرو، کوئی حرج نہیں ہے۔“ سیدنا عمر رضی اللہ عنہ نے اسے امان دے دی تو ہرمزان نے کہا: ”جی ہاں، آج فارس کا ایک سر ہے اور دو پر ہیں۔“ سیدنا عمر رضی اللہ عنہ نے دریافت کیا: ”اس کا سر کہاں ہے؟“ اس نے جواب دیا: ”نہاوند میں بنذ اذقان کے پاس، اس کے ساتھ کسریٰ کے کنگن ہیں اور اہل اصفہان۔“ سیدنا عمر رضی اللہ عنہ نے دریافت کیا: ”اس کے دو پر کہاں ہیں؟“ ہرمزان نے ایک جگہ کا ذکر کیا تھا جو میں بھول گیا ہوں۔ ہرمزان نے کہا: ”آپ ان کے دو پروں کو کاٹ دیں تو اس طرح آپ سر کو کمزور کر دیں گے۔“ تو سیدنا عمر رضی اللہ عنہ نے اس سے فرمایا: ”اے اللہ کے دشمن! تم نے غلط کہا ہے بلکہ میں سر کی طرف جاؤں گا، اللہ تعالیٰ اس کو کاٹ دے گا اور جب اللہ تعالیٰ اسے کاٹ دے گا تو وہ دونوں پروں کو بھی دور کر دے گا۔“ سیدنا عمر رضی اللہ عنہ نے یہ ارادہ کیا کہ وہ بنفس نفیس اس کی طرف جائیں، تو لوگوں نے کہا: ”اے امیر المؤمنین! ہم آپ کو اللہ کا واسطہ دے کر کہتے ہیں کہ آپ اگر بذات خود عجمی علاقوں کی طرف چلے گئے اور وہاں آپ شہید ہو گئے تو مسلمانوں کے پاس کوئی نظام نہیں رہے گا، آپ لشکر کو بھیج دیجئے۔“ راوی بیان کرتے ہیں: تو سیدنا عمر رضی اللہ عنہ نے اہل مدینہ کو بھیجا، سیدنا عمر رضی اللہ عنہ نے اس میں اپنے صاحبزادے سیدنا عبداللہ رضی اللہ عنہ کو بھیجا، مہاجرین اور انصار کو بھیجا۔ انہوں نے سیدنا ابوموسیٰ اشعری رضی اللہ عنہ کو خط لکھا کہ تم اہل بصرہ کو ساتھ لے کر روانہ ہو جاؤ اور سیدنا حذیفہ بن یمان رضی اللہ عنہ کو خط لکھا کہ اہل کوفہ کو ساتھ لے کر روانہ ہو جاؤ یہاں تک کہ تم سب لوگ نہاوند کے مقام پر اکٹھے ہو جاؤ تو تمہارا امیر نعمان بن مقرن مزنی ہو گا۔ راوی بیان کرتے ہیں: جب سب لوگ نہاوند کے مقام پر اکٹھے ہو گئے تو بنذ اذقان علج نے انہیں پیغام بھیجا: ”اے عربوں کے گروہ! ہماری طرف ایک شخص کو بھیجو جس کے ساتھ ہم بات چیت کریں۔“ تو لوگوں نے سیدنا مغیرہ بن شعبہ رضی اللہ عنہ کو اختیار کیا۔ راوی بیان کرتے ہیں: میرے والد نے یہ بات بیان کی ہے، ان کی شکل و صورت کا منظر گویا آج بھی میری نگاہ میں ہے، وہ لمبے تڑنگے شخص تھے، ان کے بال زیادہ تھے اور وہ کانے تھے۔ وہ اس کے پاس گئے۔ جب وہ ہمارے پاس تشریف لائے تو ہم نے ان سے دریافت کیا تو انہوں نے ہمیں بتایا: ”میں نے علج (یعنی ان کے سردار) کو پایا کہ وہ اپنے ساتھیوں کے ساتھ مشورہ کر رہا تھا کہ کیا ہمیں ان کے ساتھ بھرپور شان و شوکت کے ساتھ ملنا چاہیے تاکہ ان پر ہمارا رعب قائم ہو؟ تو اس کے ساتھیوں نے مشورہ دیا کہ ہمیں ان کے ساتھ بھرپور تیاری اور شان و شوکت کے ساتھ ملنا چاہیے۔“ سیدنا مغیرہ رضی اللہ عنہ نے بتایا: ”جب میں ان لوگوں کے پاس آیا تو میں نے اسے ایسے اسلحے سے لیس دیکھا کہ نگاہیں چکا چوند ہوتی تھیں۔ میں نے لوگوں کو دیکھا کہ وہ اس کے سرہانے کھڑے ہوئے تھے اور وہ سونے کے تخت پر بیٹھا ہوا تھا، اس کے سر پر تاج تھا۔ میں جیسا تھا اسی طرح گزرتا چلا گیا اور میں نے اپنے سر کو جھکایا تاکہ میں اس کے ساتھ تخت پر بیٹھوں۔“ سیدنا مغیرہ رضی اللہ عنہ بیان کرتے ہیں: ”تو مجھے وہاں سے دھکیل دیا گیا اور مجھے ڈانٹا گیا تو میں نے کہا: سفیروں کے ساتھ اس طرح کا رویہ اختیار نہیں کیا جاتا۔ ان لوگوں نے مجھ سے کہا: تم ایک کتے ہو، کیا تم بادشاہ کے ساتھ بیٹھنا چاہتے ہو؟ میں نے کہا: میں اپنی قوم میں اس سے زیادہ معزز شمار ہوتا ہوں جتنا یہ شخص تمہارے درمیان معزز ہے۔“ راوی کہتے ہیں: تو اس نے مجھے ڈانٹا اور اس نے کہا: ”تم بیٹھ جاؤ“ تو میں بیٹھ گیا، پھر اس کے قول کا ترجمہ میرے سامنے کیا گیا تو اس نے یہ کہا تھا: ”اے عربوں کے گروہ! تم سب سے زیادہ بھوکے تھے، سب سے زیادہ سنگدل تھے، سب سے زیادہ گندے تھے اور سب سے زیادہ دور دراز کے علاقے کے رہنے والے تھے اور بھلائی سے سب سے زیادہ دور تھے، اگر تم لوگ چلے جاتے ہو تو ہم تمہیں جانے دیں گے، اگر تم لوگ نہیں مانتے تو پھر ہم تمہارے بدلے کی جگہ دکھا دیں گے۔“ سیدنا مغیرہ رضی اللہ عنہ فرماتے ہیں، تو میں نے اللہ تعالیٰ کی حمد و ثناء بیان کی اور میں نے کہا: ”اللہ کی قسم! تم نے ہماری جو حالت اور صورتحال بیان کی ہے اس میں تم نے کوئی غلطی نہیں کی۔ ہمارا علاقہ سب سے زیادہ دور ہے، ہم سب سے زیادہ بھوکے تھے، ہم سب سے زیادہ سنگدل تھے اور بھلائی سے سب سے زیادہ دور تھے یہاں تک کہ اللہ نے ہماری طرف ایک رسول کو مبعوث کیا، اس نے ہمارے ساتھ دنیا میں مدد کرنے کا اور آخرت میں جنت عطا کرنے کا وعدہ کیا، تو جب سے ہمارے پاس اللہ کے رسول صلی اللہ علیہ وسلم تشریف لائے ہم اپنے پروردگار کی طرف سے مسلسل فلاح اور کامیابی کو حاصل کرتے رہے یہاں تک کہ ہم تمہارے پاس آ گئے۔ اللہ کی قسم! ہم نے دیکھ لیا ہے تمہاری بادشاہی کو بھی اور تمہارے طرزِ حیات کو بھی اور اب ہم اس بدبختی کی طرف کبھی واپس نہیں جائیں گے اور تمہارے پاس جو کچھ بھی ہے اس پر غلبہ حاصل کر لیں گے یا پھر ہم تمہاری سرزمین پر شہید ہو جائیں گے۔“ اس پر اس نے کہا: ”اس کانے شخص نے تمہارے ساتھ سچی بات کی ہے جو اس کے ذہن میں تھی۔“ سیدنا مغیرہ رضی اللہ عنہ بیان کرتے ہیں: ”تو میں اس کے پاس سے اٹھ گیا، اللہ کی قسم! میں نے علج (نامی سردار کو) مرعوب کرنے کی پوری کوشش کی۔“ پھر علج نے ہماری طرف پیغام بھجوایا: ”کیا تم (دریا کو) عبور کر کے ہماری طرف نہاوند میں آؤ گے یا ہم عبور کر کے تمہاری طرف آئیں؟“ تو سیدنا نعمان رضی اللہ عنہ نے فرمایا: ”تم لوگ عبور کرو۔“ تو ہم لوگوں نے عبور کر لیا۔ راوی بیان کرتے ہیں: میرے والد نے یہ بات بیان کی ہے، میں نے اس دن جیسا سمندر کبھی نہیں دیکھا، ان کے لشکر کے لوگ یوں آ رہے تھے جس طرح لوہے کے پہاڑ تھے اور ان لوگوں نے آپس میں یہ عہد کیا تھا کہ وہ عربوں کے مقابلے میں فرار نہیں ہوں گے۔ وہ ایک دوسرے کے ساتھ ملے ہوئے تھے یہاں تک کہ وہ سات آدمی ایک دوسرے کے ساتھ جڑے ہوئے تھے اور انہوں نے اپنے پیچھے ایک چکی رکھ دی تھی، ان لوگوں نے یہ کہا تھا: ”ہم میں سے جو شخص فرار ہو گا اسے لوہے کی چکی کچل دے گی۔“ جب سیدنا مغیرہ بن شعبہ رضی اللہ عنہ نے ان لوگوں کی کثرت دیکھی تو فرمایا: ”میں نے آج کی طرح کی خوفناک صورتحال کبھی نہیں دیکھا، ہمارے دشمن کو بھرپور برتری حاصل ہے۔“ راوی بیان کرتے ہیں: سیدنا نعمان رضی اللہ عنہ ایک ایسے شخص تھے جو بہت زیادہ روتے تھے۔ انہوں نے فرمایا: ”اللہ تعالیٰ آپ کو اس طرح کی اور ایسی صورت پھر دکھا دے گا اور آپ کو رسوا نہ کرے گا اور آپ کو ڈگمائے گا نہیں، اللہ کی قسم! میں ان پر صرف اس لیے حملہ نہیں کر رہا، کیونکہ میں نے نبی اکرم صلی اللہ علیہ وسلم کے ہمراہ ایک چیز دیکھی ہے، نبی اکرم صلی اللہ علیہ وسلم جب بھی کسی جنگ میں حصہ لیتے تھے تو آپ صلی اللہ علیہ وسلم دن کے ابتدائی حصے میں لڑائی شروع نہیں کرتے تھے، آپ صلی اللہ علیہ وسلم اس وقت تک لڑائی شروع نہیں کرتے تھے جب تک نماز کا وقت نہیں ہو جاتا تھا اور ہوا نہیں چل پڑتی تھی اور جنگ کی صورتحال تیار نہیں ہو جاتی تھی،“ تو پھر سیدنا نعمان رضی اللہ عنہ نے دعا کی: «اللّٰهُمَّ إِنِّي أَسْأَلُكَ أَنْ تَقَرَّ عَيْنِي الْيَوْمَ بِفَتْحٍ يَكُونُ فِيهِ عِزُّ الْإِسْلَامِ وَأَهْلِهِ وَذِلُّ الْكُفْرِ وَأَهْلِهِ ثُمَّ اقْبِضْنِي عَلَى الشَّهَادَةِ» ”اے اللہ! میں تجھ سے یہ سوال کرتا ہوں کہ تو آج فتح کے ذریعے میری آنکھوں کو ٹھنڈا کر دے کیونکہ اس میں اسلام اور اہل اسلام کی عزت ہے اور کفر اور اہل کفر کی ذلت ہے اور پھر اس کے بعد مجھے شہادت نصیب کر کے میرا خاتمہ کر دینا۔“ پھر انہوں نے فرمایا: ”تم لوگ آمین کہو، اللہ تعالیٰ تم لوگوں پر رحم کرے۔“ تو ہم نے آمین کہا، پھر وہ بھی رونے لگے اور ہم بھی رونے لگے۔ پھر سیدنا نعمان رضی اللہ عنہ نے فرمایا: ”میں اپنا جھنڈا لہراؤں گا تم لوگ ہتھیار تیار کر لینا، پھر میں دوسری مرتبہ لہراؤں گا تو تم دشمن کے ساتھ لڑائی کرنے کے لیے اس کے مدمقابل آ کے تیار ہو جانا، پھر جب میں تیسری مرتبہ لہراؤں گا تو ہر شخص اللہ تعالیٰ کی برکت حاصل کرتے ہوئے اپنے قریبی دشمن پر حملہ کر دے۔“ راوی بیان کرتے ہیں: جب نماز کا وقت ہو گیا اور ہوائیں چل پڑیں تو انہوں نے تکبیر کہی تو ہم نے بھی تکبیر کہی۔ انہوں نے فرمایا: ”یہ فتح کی ہوا ہے، اللہ کی قسم! اگر اللہ نے چاہا (تو ہم فتح حاصل کر لیں گے) اور مجھے یہ امید ہے اللہ تعالیٰ میری دعا کو قبول کر لے گا اور ہمیں فتح نصیب کرے گا۔“ تو انہوں نے جھنڈا لہرایا اور لوگ تیار ہو گئے، انہوں نے دوسری مرتبہ لہرایا، پھر انہوں نے تیسری مرتبہ لہرایا تو ہم سب نے حملہ کر دیا۔ ہر فرد نے اپنے قریبی دشمن پر حملہ کر دیا۔ سیدنا نعمان رضی اللہ عنہ نے فرمایا: ”اگر میں شہید ہو جاؤں تو سیدنا حذیفہ بن یمان رضی اللہ عنہ لوگوں کے امیر ہوں گے، اگر سیدنا حذیفہ رضی اللہ عنہ شہید ہو جائیں تو فلاں صاحب ہوں گے، اگر وہ شہید ہو جائیں تو فلاں ہوں گے،“ یہاں تک کہ سیدنا نعمان رضی اللہ عنہ نے سات آدمیوں کا نام گنوایا جن میں سے آخری فرد سیدنا مغیرہ بن شعبہ رضی اللہ عنہ تھے۔ میرے والد بیان کرتے ہیں: ”اللہ کی قسم! مجھے مسلمانوں میں سے کسی ایسے شخص کے بارے میں یہ علم نہیں ہے جو اس بات کا خواہشمند ہو کہ وہ اپنے اہل خانہ کی طرف واپس جائے یہاں تک کہ یا تو وہ شہید ہو جائے یا کامیاب ہو جائے۔“ ان لوگوں نے ہم پر حملہ کیا تو ہمیں صرف لوہے کی لوہے سے ٹکرانے کی آواز آ رہی تھی یہاں تک کہ بہت سارے مسلمان شہید ہوئے۔ جب ان لوگوں نے ہمارا صبر دیکھا اور انہوں نے دیکھا کہ ہم واپس نہیں جانا چاہتے تو وہ لوگ پسپا ہو گئے۔ ان میں سے کوئی ایک شخص گرتا تو اس کے اوپر ایک ہی لڑی کے سات آدمی بھی گر جاتے تو وہ سب مارے جاتے اور ان کے پیچھے لوہے کی چکی انہیں کچل دیتی۔ سیدنا نعمان رضی اللہ عنہ نے فرمایا: ”جھنڈے کو آگے کرو،“ تو ہم نے جھنڈے کو آگے کر دیا اور ہم انہیں قتل کرتے رہے اور انہیں مارتے رہے۔ جب سیدنا نعمان رضی اللہ عنہ نے دیکھا کہ اللہ تعالیٰ نے ان کی دعا کو قبول کر لیا ہے اور انہوں نے فتح کو دیکھ لیا اور کامیابی ان کے پاس آ گئی، وہ ان کے پہلو میں آ کر لگی اور وہ شہید ہو گئے۔ ان کے بھائی سیدنا مقرن بن مقرن رضی اللہ عنہ آئے، انہوں نے ان پر کپڑا ڈال دیا اور علم کو پکڑ لیا اور اس کو لے کر آگے بڑھ گئے، پھر انہوں نے کہا: ”تم لوگ آگے بڑھو، اللہ تعالیٰ تم پر رحم کرے۔“ اور ہم لوگ آگے بڑھنے لگے۔ ہم نے ان لوگوں کو پسپا کر دیا اور انہیں قتل کر دیا، جب ہم فارغ ہوئے اور لوگ اکٹھے ہوئے تو لوگوں نے دریافت کیا: ”امیر کہاں ہے؟“ تو سیدنا مقرن رضی اللہ عنہ نے فرمایا: ”یہ تمہارے امیر ہیں، اللہ تعالیٰ نے فتح کے ذریعے ان کی آنکھوں کو ٹھنڈا کیا اور آخر میں انہیں شہادت بھی نصیب کر دی،“ تو لوگوں نے سیدنا حذیفہ بن یمان رضی اللہ عنہ کے ہاتھ پر بیعت کر لی۔ راوی بیان کرتے ہیں: سیدنا عمر رضی اللہ عنہ مدینہ میں اللہ سے دعائیں کر رہے تھے اور وہ اس طرح سے منتظر تھے جس طرح کسی حاملہ عورت کی چیخ کا انتظار کیا جاتا ہے۔ سیدنا حذیفہ رضی اللہ عنہ نے فتح کی خوش خبری کا پروانہ ایک مسلمان شخص کے ہمراہ سیدنا عمر رضی اللہ عنہ کی خدمت میں بھیجا۔ جب وہ سیدنا عمر رضی اللہ عنہ کی خدمت میں حاضر ہوا تو اس نے کہا: ”اے امیر المؤمنین! آپ کو فتح کی خوش خبری نصیب ہو۔ اللہ تعالیٰ نے اس جنگ میں اسلام اور اہل اسلام کو عزت عطا کی اور اس میں شرک اور اہل شرک کو ذلت عطا کی۔“ سیدنا عمر رضی اللہ عنہ نے دریافت کیا: ”کیا نعمان نے تمہیں بھیجا ہے؟“ تو قاصد نے کہا: ”اے امیر المؤمنین! نعمان کے بارے میں آپ ثواب کی امید رکھیں (یعنی ان کے لیے دعائے مغفرت کیجئے)۔“ تو سیدنا عمر رضی اللہ عنہ رو پڑے اور انہوں نے «إِنَّا لِلّٰهِ وَإِنَّا إِلَيْهِ رَاجِعُونَ» پڑھا۔ سیدنا عمر رضی اللہ عنہ نے دریافت کیا: ”تمہارا ستیاناس ہو! اور کون (شہید ہوا ہے)؟“ قاصد نے بتایا: ”فلاں اور فلاں اور فلاں،“ اس نے متعدد لوگوں کے نام گنوائے، پھر اس نے بتایا: ”اے امیر المؤمنین! اور لوگ بھی ہیں جن سے آپ واقف نہیں ہیں،“ تو سیدنا عمر رضی اللہ عنہ نے روتے ہوئے کہا: ”ان لوگوں کو کوئی نقصان نہیں ہو گا اگر ”عمر“ ان سے واقف نہیں ہے لیکن اللہ تعالیٰ تو ان سے واقف ہے۔“ [صحیح ابن حبان/كتاب السير/حدیث: 4756]

اردو ترجمہ · UrduUnverified translation

سیدنا نعمان بن مقرن رضی اللہ عنہ بیان کرتے ہیں: میں نبی اکرم صلی اللہ علیہ وسلم کے ساتھ تھا، جب آپ صلی اللہ علیہ وسلم جنگ کرنے لگتے تھے تو دن کے ابتدائی حصے میں جنگ شروع نہیں کرتے تھے، آپ صلی اللہ علیہ وسلم اسے اس وقت تک مؤخر کرتے تھے کہ سورج ڈھل جاتا تھا اور ہوائیں چل پڑتی تھیں اور مدد نازل ہو جاتی تھی۔ [صحیح ابن حبان/كتاب السير/حدیث: 4757]

اردو ترجمہ · UrduUnverified translation

سیدنا صہیب رضی اللہ عنہ بیان کرتے ہیں کہ نبی اکرم صلی اللہ علیہ وسلم غزوۂ حنین کے موقع پر جب نماز ادا کر رہے تھے تو آپ صلی اللہ علیہ وسلم نے پست آواز میں کچھ کہا۔ آپ صلی اللہ علیہ وسلم کی خدمت میں عرض کی گئی: آپ صلی اللہ علیہ وسلم نے ایک ایسا کام کیا ہے جو آپ صلی اللہ علیہ وسلم نے پہلے نہیں کیا تھا؟ تو نبی اکرم صلی اللہ علیہ وسلم نے فرمایا: ”میں یہ پڑھ رہا تھا: «اللّٰهُمَّ بِكَ أُحَاوِلُ، وَبِكَ أُصَاوِلُ، وَبِكَ أُقَاتِلُ» ”اے اللہ! میں تیری مدد کے ساتھ مقابلہ کرتا ہوں (لڑائی میں) کود پڑتا ہوں اور تیری مدد کے ساتھ جنگ کرتا ہوں“۔“ [صحیح ابن حبان/كتاب السير/حدیث: 4758]

اردو ترجمہ · UrduUnverified translation

سیدنا علی رضی اللہ عنہ بیان کرتے ہیں: غزوہ بدر کے دن صبح کے وقت تک نبی اکرم صلی اللہ علیہ وسلم رات بھر جاگتے رہے تھے، حالانکہ آپ صلی اللہ علیہ وسلم مسافر تھے۔ [صحیح ابن حبان/كتاب السير/حدیث: 4759]

اردو ترجمہ · UrduUnverified translation

عبداللہ بن رباح بیان کرتے ہیں: رمضان کے مہینے میں کچھ وفود سیدنا معاویہ رضی اللہ عنہ کی خدمت میں حاضر ہوئے جن میں، میں اور سیدنا ابوہریرہ رضی اللہ عنہ بھی شامل تھے۔ ہم لوگ ایک دوسرے کے لیے کھانا تیار کیا کرتے تھے۔ سیدنا ابوہریرہ رضی اللہ عنہ اکثر اپنی رہائشی جگہ پر ہمیں بلایا کرتے تھے۔ میں نے کہا: اگر میں بھی کھانا تیار کروں اور پھر ان لوگوں کو اپنی رہائشی جگہ پر بلاؤں تو (یہ مناسب ہو گا)۔ میں نے کھانا تیار کرنے کا حکم دیا، کھانا تیار ہو گیا۔ شام کے وقت میری ملاقات سیدنا ابوہریرہ رضی اللہ عنہ سے ہوئی، میں نے کہا: اے ابوہریرہ! آج رات دعوت میری طرف ہے۔ سیدنا ابوہریرہ رضی اللہ عنہ نے فرمایا: ”تم مجھ سے سبقت لے گئے ہو۔“ راوی بیان کرتے ہیں: میں نے ان لوگوں کو بھی اپنی رہائشی جگہ پر بلا لیا، پھر سیدنا ابوہریرہ رضی اللہ عنہ نے فرمایا: کیا میں تم لوگوں کو وہ حدیث نہ سناؤں؟ میں تم لوگوں کو ایک ایسی حدیث سناتا ہوں جو اے انصار کے گروہ! تمہاری حدیث ہے، اتنی دیر میں کھانا بھی آ جائے گا۔ پھر سیدنا ابوہریرہ رضی اللہ عنہ نے فتح مکہ کا ذکر کیا، انہوں نے بتایا: نبی اکرم صلی اللہ علیہ وسلم تشریف لائے اور مکہ میں داخل ہونے لگے تو آپ صلی اللہ علیہ وسلم نے لشکر کے ایک طرف سیدنا زبیر رضی اللہ عنہ کو بھیجا اور بائیں طرف سیدنا خالد بن ولید رضی اللہ عنہ کو بھیجا اور ایک دستے کا امیر سیدنا ابوعبیدہ رضی اللہ عنہ کو مقرر کیا۔ وہ لوگ نشیبی علاقے میں پہنچ گئے جبکہ نبی اکرم صلی اللہ علیہ وسلم اپنے چھوٹے دستے میں تھے۔ قریش نے اپنے اوباشوں اور پیروکار لڑکوں کو اس دستے کی طرف بھیجا، انہوں نے کہا: ہم ان لوگوں کو موقع دیتے ہیں، اگر یہ جیت گئے تو ہم ان کے ساتھ ہوں گے اور اگر یہ مارے گئے تو جو وہ مانگیں گے ہم دیں گے۔ نبی اکرم صلی اللہ علیہ وسلم نے نظر دوڑا کر مجھے دیکھا تو آپ صلی اللہ علیہ وسلم نے ارشاد فرمایا: ”اے ابوہریرہ! انصار کو بلا کر لاؤ، میرے پاس صرف انصار آئیں۔“ سیدنا ابوہریرہ رضی اللہ عنہ نے انہیں بلایا اور وہ لوگ آ گئے اور نبی اکرم صلی اللہ علیہ وسلم کے ارد گرد اکٹھے ہو گئے۔ نبی اکرم صلی اللہ علیہ وسلم نے فرمایا: ”کیا تم نے قریش کے اوباشوں اور پیروکار لڑکوں کو دیکھا ہے؟“ پھر نبی اکرم صلی اللہ علیہ وسلم نے اپنے دائیں دست مبارک کو بائیں پر مارا اور فرمایا: ”تم انہیں کاٹ کے رکھ دینا یہاں تک کہ تم لوگ مجھے صفا پر آ کر ملنا۔“ سیدنا ابوہریرہ رضی اللہ عنہ بیان کرتے ہیں: ہم لوگ روانہ ہوئے اور ہم میں سے جس شخص نے ان میں سے جس شخص کو قتل کرنا چاہا اسے قتل کر دیا یہاں تک کہ پھر ان میں سے کوئی ہمارے سامنے نہیں آیا۔ سیدنا ابوسفیان رضی اللہ عنہ نے عرض کی: یا رسول اللہ صلی اللہ علیہ وسلم ! قریش کے قتل کو مباح قرار دیا گیا ہے، آج کے بعد قریش باقی نہیں رہیں گے۔ نبی اکرم صلی اللہ علیہ وسلم نے فرمایا: ”جو شخص اپنے دروازے کو بند کر لے وہ محفوظ ہو گا، جو شخص ابوسفیان کے گھر میں داخل ہو جائے وہ امن میں ہو گا۔“ تو لوگوں نے اپنے دروازے بند کر لیے۔ نبی اکرم صلی اللہ علیہ وسلم تشریف لائے، آپ صلی اللہ علیہ وسلم نے حجر اسود کا استلام کیا اور آپ صلی اللہ علیہ وسلم نے بیت اللہ کا طواف کیا۔ آپ صلی اللہ علیہ وسلم کے دست مبارک میں ایک کمان تھی، آپ صلی اللہ علیہ وسلم نے اس کمان کو پکڑا ہوا تھا۔ خانہ کعبہ کے ایک پہلو میں ایک بت تھا جس کی وہ لوگ عبادت کیا کرتے تھے۔ نبی اکرم صلی اللہ علیہ وسلم نے اپنی کمان کے ذریعے اس کے پہلو میں مارا اور یہ پڑھا: ﴿جَاءَ الْحَقُّ وَزَهَقَ الْبَاطِلُ ۚ إِنَّ الْبَاطِلَ كَانَ زَهُوقًا﴾ [سورة الإسراء: 81] ”حق آ گیا باطل رخصت ہو گیا۔“ جب نبی اکرم صلی اللہ علیہ وسلم نے طواف مکمل کر لیا تو آپ صلی اللہ علیہ وسلم صفا پر تشریف لائے، آپ صلی اللہ علیہ وسلم اس پر چڑھ گئے یہاں تک کہ جب آپ صلی اللہ علیہ وسلم کی نظر بیت اللہ پر پڑی تو نبی اکرم صلی اللہ علیہ وسلم نے اپنے ہاتھ بلند کیے اور اللہ تعالیٰ کی حمد و ثناء بیان کی اور جو اللہ کو منظور تھا وہ ذکر کیا۔ انصار صفا کے نیچے موجود تھے، ان میں سے کسی ایک نے کسی دوسرے سے کہا: نبی اکرم صلی اللہ علیہ وسلم کو اپنی بستی سے محبت اور اپنے خاندان سے محبت لاحق ہو گئی ہے۔ نبی اکرم صلی اللہ علیہ وسلم پر وحی نازل ہوتی تھی۔ سیدنا ابوہریرہ رضی اللہ عنہ بیان کرتے ہیں: جب نبی اکرم صلی اللہ علیہ وسلم پر وحی نازل ہوتی تھی تو یہ چیز ہم پر مخفی نہیں رہتی تھی، اس وقت کوئی بھی نبی اکرم صلی اللہ علیہ وسلم کی طرف دیکھ نہیں سکتا تھا، وہ انتظار کرتا تھا یہاں تک کہ وحی مکمل ہو جاتی تھی۔ جب نبی اکرم صلی اللہ علیہ وسلم پر وحی کا نزول مکمل ہو گیا تو نبی اکرم صلی اللہ علیہ وسلم نے ارشاد فرمایا: ”اے انصار کے گروہ! تم لوگوں نے یہ بات کہی ہے کہ ان صاحب کو اپنی بستی کی محبت اور خاندان کی محبت نے اپنی لپیٹ میں لے لیا ہے۔“ لوگوں نے عرض کی: یا رسول اللہ صلی اللہ علیہ وسلم ! ہم نے یہ بات کہی ہے۔ تو نبی اکرم صلی اللہ علیہ وسلم نے ارشاد فرمایا: ”خبردار! میں اللہ کا بندہ اور اس کا رسول ہوں، میں نے اللہ تعالیٰ کی طرف اور تمہاری طرف ہجرت کی ہے، میری زندگی تمہارے ساتھ ہے اور میری موت تمہارے ساتھ ہے۔“ تو انصار نے رونا شروع کر دیا اور کہنا شروع کر دیا: اللہ کی قسم! ہم نے صرف اللہ اور اس کے رسول کی محبت کی وجہ سے یہ بات کہی تھی، تو نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ اور اس کا رسول تمہاری تصدیق کرتے ہیں اور تمہارے عذر کو قبول کرتے ہیں۔“ (امام ابن حبان رحمہ اللہ فرماتے ہیں:) یہ روایت اس بات کا واضح بیان ہے کہ مکہ جنگ کے نتیجے میں فتح ہوا تھا، صلح کے نتیجے میں فتح نہیں ہوا تھا۔ [صحیح ابن حبان/كتاب السير/حدیث: 4760]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم جب جنگ میں حصہ لیتے تھے تو یہ دعا مانگتے تھے: ”اے اللہ! تو ہی میرا حامی اور تو ہی میرا مددگار ہے اور میں تیری مدد سے ہی جنگ کرتا ہوں۔“ [صحیح ابن حبان/كتاب السير/حدیث: 4761]

اردو ترجمہ · UrduUnverified translation

سیدنا جابر بن عتیک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک قسم کا غصہ وہ ہے جسے اللہ تعالیٰ ناپسند کرتا ہے اور ایک قسم کا غصہ وہ ہے جسے اللہ تعالیٰ پسند کرتا ہے، اور ایک قسم کا فخر کا اظہار وہ ہے جسے اللہ تعالیٰ پسند کرتا ہے اور ایک قسم کا وہ ہے جسے اللہ تعالیٰ ناپسند کرتا ہے۔ وہ غصہ جسے اللہ تعالیٰ پسند کرتا ہے وہ دینی معاملات میں غصہ ہے اور وہ غصہ جسے اللہ تعالیٰ ناپسند کرتا ہے وہ دین کے علاوہ کے معاملات میں غصہ ہے، اور وہ فخر جسے اللہ تعالیٰ پسند کرتا ہے وہ یہ ہے: آدمی لڑائی کے وقت اپنے اوپر فخر کرے اور صدقہ کرتے وقت فخر کرے، اور وہ فخر جسے اللہ تعالیٰ ناپسند کرتا ہے وہ باطل کے بارے میں فخر ہے۔“ [صحیح ابن حبان/كتاب السير/حدیث: 4762]

اردو ترجمہ · UrduUnverified translation

سیدنا جابر بن عبداللہ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جنگ دھوکہ دہی کا نام ہے۔“ [صحیح ابن حبان/كتاب السير/حدیث: 4763]

اردو ترجمہ · UrduUnverified translation

مسروق بیان کرتے ہیں کہ میں سیدنا عبداللہ رضی اللہ عنہ کے پاس بیٹھا ہوا تھا، وہ ہمارے درمیان لیٹے ہوئے تھے کہ ایک شخص ان کے پاس آیا اور بولا: کندہ کے دروازوں کے پاس ایک واعظ تقریر کرتے ہوئے یہ کہہ رہا تھا کہ دھوئیں کی نشانی (جس کا ذکر قرآن میں ہوا ہے) وہ عنقریب آئے گی اور کفار کی سانسوں کو اپنی گرفت میں لے گی، اور اہل ایمان کو اس کے ذریعے زکام جیسی کیفیت محسوس ہوگی، تو سیدنا عبداللہ رضی اللہ عنہ غصے کے عالم میں سیدھے ہو کر بیٹھ گئے اور انہوں نے فرمایا: اے لوگو! اللہ سے ڈرو، تم میں سے جس شخص کو کسی چیز کا علم ہو وہ اس کے مطابق بات بیان کر دے اور جسے علم نہ ہو تو وہ یہ کہہ دے کہ اللہ زیادہ بہتر جانتا ہے، کیونکہ تم میں سے زیادہ بڑا عالم وہ شخص ہے جو اس چیز کے بارے میں، جس کا اسے علم نہیں ہے، یہ کہہ دے کہ اللہ بہتر جانتا ہے۔ اللہ تعالیٰ نے اپنے نبی صلی اللہ علیہ وسلم سے یہ فرمایا تھا: ﴿قُلْ مَا أَسْأَلُكُمْ عَلَيْهِ مِنْ أَجْرٍ وَمَا أَنَا مِنَ الْمُتَكَلِّفِينَ﴾ [سورة ص: 86] ”تم یہ فرما دو! میں اس پر تم سے اجر نہیں مانگتا اور نہ ہی میں بناوٹ کرنے والوں میں سے ہوں۔“ (سیدنا عبداللہ رضی اللہ عنہ نے وضاحت کی) نبی اکرم صلی اللہ علیہ وسلم نے جب لوگوں کا (اسلام قبول کرنے سے) پیٹھ پھیرنا دیکھا تو آپ صلی اللہ علیہ وسلم نے دعا کی: «اللَّهُمَّ اجْعَلْهَا عَلَيْهِمْ سِنِينَ كَسِنِي يُوسُفَ» ”اے اللہ! ان پر سیدنا یوسف علیہ السلام کے زمانے کی قحط سالی مقرر کر دے۔“ تو ان لوگوں کو قحط سالی نے اپنی گرفت میں لے لیا یہاں تک کہ وہ مردار اور کھالیں کھانے لگے، ان میں سے کوئی ایک شخص آسمان کی طرف دیکھتا تھا تو اسے دھواں نظر آتا تھا۔ پھر ابوسفیان نبی اکرم صلی اللہ علیہ وسلم کی خدمت میں حاضر ہوا اور اس نے عرض کی: اے محمد صلی اللہ علیہ وسلم ! آپ تو اللہ تعالیٰ کی فرمانبرداری اور صلہ رحمی کرنے کا حکم دینے کے لیے تشریف لائے ہیں، جب کہ آپ کی قوم کے افراد بھوک کی وجہ سے ہلاکت کا شکار ہو رہے ہیں، آپ صلی اللہ علیہ وسلم ان کے لیے اللہ تعالیٰ سے دعا کریں، اس پر اللہ تعالیٰ نے یہ آیت نازل فرمائی: ﴿فَارْتَقِبْ يَوْمَ تَأْتِي السَّمَاءُ بِدُخَانٍ مُبِينٍ﴾ [سورة الدخان: 10] ”اس دن کا انتظار کرو جب آسمان واضح دھواں لے آئے گا۔“ (ایک اور مقام پر ارشادِ باری تعالیٰ ہے) ﴿يَوْمَ نَبْطِشُ الْبَطْشَةَ الْكُبْرَىٰ إِنَّا مُنتَقِمُونَ﴾ [سورة الدخان: 16] ”جس دن ہم سخت پکڑ کریں گے بے شک ہم انتقام لینے والے ہیں۔“ تو یہاں پکڑ سے مراد غزوہ بدر کا موقع ہے، جبکہ دھوئیں، پکڑ، لزام اور اہل روم سے متعلق نشانیاں پہلے گزر چکی ہیں۔ [صحیح ابن حبان/كتاب السير/حدیث: 4764]

اردو ترجمہ · UrduUnverified translation

سیدنا عبداللہ بن قیس رضی اللہ عنہ بیان کرتے ہیں کہ نبی اکرم صلی اللہ علیہ وسلم جب کسی قوم پر حملہ کرتے تھے تو یہ دعا مانگتے تھے: «اللَّهُمَّ إِنَّا نَجْعَلُكَ فِي نُحُورِهِمْ وَنَعُوذُ بِكَ مِنْ شُرُورِهِمْ» ”اے اللہ! ہم ان کے مقابلے میں تجھے (اپنا مددگار) بناتے ہیں اور ان کے شر سے تیری پناہ مانگتے ہیں۔“ [صحیح ابن حبان/كتاب السير/حدیث: 4765]

اردو ترجمہ · UrduUnverified translation

سیدنا عیاض اشعری رضی اللہ عنہ بیان کرتے ہیں: میں جنگِ یرموک میں شریک ہوا ہوں، اس میں پانچ امیر تھے: سیدنا ابوعبیدہ بن جراح رضی اللہ عنہ، سیدنا یزید بن ابوسفیان رضی اللہ عنہ، سیدنا شرحبیل بن حسنہ رضی اللہ عنہ، سیدنا خالد بن ولید رضی اللہ عنہ اور سیدنا عیاض رضی اللہ عنہ (یہ وہ والے عیاض نہیں ہیں جو اس روایت کو بیان کر رہے ہیں)۔ سیدنا عمر رضی اللہ عنہ نے فرمایا: ”جب لڑائی شروع ہو تو ابوعبیدہ تمہارے امیر ہوں گے۔“ راوی بیان کرتے ہیں: ہم نے سیدنا عمر رضی اللہ عنہ کو خط لکھا کہ ہمیں موت نے گھیر لیا ہے، ہم نے ان سے مدد مانگی تو انہوں نے ہمیں جوابی خط لکھا: ”تمہارا خط میرے پاس آیا ہے، جس میں تم نے مدد مانگی ہے۔ میں تمہاری رہنمائی اس چیز کی طرف کرتا ہوں جو مدد کے لیے زیادہ فائدہ مند اور لشکر کے لیے زیادہ حفاظت کا باعث ہے، وہ اللہ کی ذات ہے؛ پس تم اس سے مدد مانگو کیونکہ سیدنا محمد صلی اللہ علیہ وسلم کی مدد کی گئی تھی اور تم سے کم تعداد کے ہمراہ کی گئی تھی، جب تمہارے پاس میرا مکتوب آئے تو تم ان کے ساتھ لڑائی کرو اور تم دوبارہ مجھے (مدد کے لیے) نہ لکھنا۔“ راوی بیان کرتے ہیں: ہم نے کفار کے ساتھ جنگ کی اور ہم نے انہیں پسپا کر دیا، چار فرسخ تک ہم انہیں قتل کرتے رہے اور ہمیں بہت سے اموال بھی ملے۔ ان لوگوں نے مشورہ کیا تو سیدنا عیاض رضی اللہ عنہ نے مشورہ دیا کہ ہر آدمی کی طرف سے دس ہوں۔ سیدنا ابوعبیدہ رضی اللہ عنہ نے دریافت کیا: ”کون شخص میری مدد کرے گا؟“ ایک نوجوان نے کہا: ”میں، اگر آپ غصہ نہ کریں۔“ راوی بیان کرتے ہیں: تو وہ ان سے آگے نکل گیا، میں نے سیدنا ابوعبیدہ رضی اللہ عنہ کے کندھوں کو حرکت کرتے ہوئے دیکھا، وہ ایک عربی گھوڑے پر اس کے پیچھے تھے۔ [صحیح ابن حبان/كتاب السير/حدیث: 4766]

اردو ترجمہ · UrduUnverified translation

سیدنا ابودرداء رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”میرے پاس اپنے کمزور لوگوں کو لے کر آؤ، بے شک تمہیں تمہارے کمزور افراد کی وجہ سے رزق دیا جاتا ہے اور تمہاری مدد کی جاتی ہے۔“ [صحیح ابن حبان/كتاب السير/حدیث: 4767]

اردو ترجمہ · UrduUnverified translation

سیدنا جابر بن عبداللہ رضی اللہ عنہ بیان کرتے ہیں کہ سیدنا ابوسعید خدری رضی اللہ عنہ نے یہ بات بیان کی ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”ایک زمانہ لوگوں پر ایسا آئے گا، جس میں کچھ لوگ جنگ میں حصہ لیں گے تو دریافت کیا جائے گا: کیا تمہارے درمیان کوئی ایسا شخص ہے جو نبی اکرم صلی اللہ علیہ وسلم کا صحابی ہو؟ تو جواب دیا جائے گا: جی ہاں! تو ان لوگوں کو فتح نصیب ہو گی۔ پھر لوگوں پر ایسا زمانہ آئے گا جب وہ جنگ کے لیے جائیں گے تو دریافت کیا جائے گا: کیا تمہارے درمیان کوئی ایسا شخص ہے جو نبی اکرم صلی اللہ علیہ وسلم کے صحابہ کے ساتھ رہا ہو؟ تو جواب دیا جائے گا: جی ہاں، تو ان لوگوں کو فتح نصیب ہو گی۔ پھر لوگوں پر ایسا زمانہ آئے گا، جس میں بہت سارے لوگ جنگ کے لیے جائیں گے تو دریافت کیا جائے گا: کیا تمہارے درمیان کوئی ایسا شخص ہے، جو نبی اکرم صلی اللہ علیہ وسلم کے اصحاب کے شاگردوں کے ساتھ رہا ہو؟ تو جواب دیا جائے گا: جی ہاں، تو انہیں بھی فتح نصیب کی جائے گی۔“ [صحیح ابن حبان/كتاب السير/حدیث: 4768]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں کہ جب غزوہ حنین کا موقع آیا تو ہوازن اور غطفان قبیلے کے لوگ اپنے بال بچوں اور ساز و سامان کو لے کر آ گئے۔ نبی اکرم صلی اللہ علیہ وسلم کے ہمراہ دس ہزار افراد تھے اور آپ صلی اللہ علیہ وسلم کے ساتھ وہ لوگ بھی تھے جنہوں نے نیا نیا اسلام قبول کیا تھا۔ وہ لوگ نبی اکرم صلی اللہ علیہ وسلم کو چھوڑ کر پیچھے ہٹ گئے، یہاں تک کہ نبی اکرم صلی اللہ علیہ وسلم تنہا رہ گئے۔ راوی بیان کرتے ہیں کہ اس دن نبی اکرم صلی اللہ علیہ وسلم نے دو مرتبہ بلند آواز میں پکارا اور ان کے درمیان کوئی چیز رکاوٹ نہیں بنی۔ نبی اکرم صلی اللہ علیہ وسلم نے اپنے دائیں طرف رخ کیا اور فرمایا: ”اے گروہِ انصار!“ تو لوگوں نے عرض کیا: «لَبَّيْكَ يَا رَسُولَ اللهِ، أَبْشِرْ نَحْنُ مَعَكَ» ”یا رسول اللہ صلی اللہ علیہ وسلم ! ہم حاضر ہیں، آپ صلی اللہ علیہ وسلم خوش رہیں کہ ہم آپ صلی اللہ علیہ وسلم کے ساتھ ہیں۔“ پھر نبی اکرم صلی اللہ علیہ وسلم نے اپنے بائیں طرف توجہ فرمائی اور فرمایا: ”اے گروہِ انصار!“ تو ان لوگوں نے عرض کیا: «لَبَّيْكَ يَا رَسُولَ اللهِ، أَبْشِرْ نَحْنُ مَعَكَ» ”یا رسول اللہ صلی اللہ علیہ وسلم ! ہم حاضر ہیں، آپ صلی اللہ علیہ وسلم بے فکر رہیں ہم آپ کے ساتھ ہیں۔“ راوی بیان کرتے ہیں کہ نبی اکرم صلی اللہ علیہ وسلم اپنے سفید خچر پر سوار تھے، آپ صلی اللہ علیہ وسلم اس سے نیچے اترے اور فرمایا: «أَنَا عَبْدُ اللهِ وَرَسُولُهُ» ”میں اللہ کا بندہ اور اس کا رسول ہوں۔“ تو مشرکین پسپا ہو گئے۔ نبی اکرم صلی اللہ علیہ وسلم کو کثیر مالِ غنیمت حاصل ہوا، آپ صلی اللہ علیہ وسلم نے وہ مال مہاجرین اور نئے مسلمان ہونے والے افراد کے درمیان تقسیم کر دیا اور انصار کو اس میں سے کچھ نہ دیا۔ اس پر انصار نے کہا: ”جب مشکل آئی تھی تو ہمیں بلایا گیا اور مالِ غنیمت دوسروں کو دے دیا گیا۔“ جب نبی اکرم صلی اللہ علیہ وسلم تک یہ بات پہنچی تو آپ صلی اللہ علیہ وسلم نے ان لوگوں کو ایک خیمے میں جمع کیا اور ارشاد فرمایا: ”اے گروہِ انصار! یہ کیا بات ہے جو مجھ تک پہنچی ہے؟“ وہ لوگ خاموش رہے۔ نبی اکرم صلی اللہ علیہ وسلم نے فرمایا: ”اے گروہِ انصار! کیا تم لوگ اس بات پر راضی نہیں ہو کہ لوگ بھیڑ بکریاں لے جائیں اور تم محمد صلی اللہ علیہ وسلم کو اپنے گھر لے جاؤ؟“ انہوں نے عرض کی: ”یا رسول اللہ صلی اللہ علیہ وسلم ! ہم راضی ہیں۔“ نبی اکرم صلی اللہ علیہ وسلم نے فرمایا: ”اگر لوگ ایک وادی میں چلیں اور انصار ایک گھاٹی میں جائیں، تو میں انصار کی گھاٹی کو اختیار کروں گا۔“ [صحیح ابن حبان/كتاب السير/حدیث: 4769]

اردو ترجمہ · UrduUnverified translation

ابواسحاق بیان کرتے ہیں کہ قیس قبیلے سے تعلق رکھنے والے ایک شخص نے سیدنا براء بن عازب رضی اللہ عنہما سے کہا: کیا آپ لوگ غزوہِ حنین کے موقع پر نبی اکرم صلی اللہ علیہ وسلم کو چھوڑ کر فرار ہو گئے تھے؟ تو سیدنا براء رضی اللہ عنہما نے جواب دیا: نبی اکرم صلی اللہ علیہ وسلم فرار نہیں ہوئے۔ ہوازن قبیلے کے لوگ اچھے تیر انداز تھے۔ میں نے نبی اکرم صلی اللہ علیہ وسلم کو سفید خچر پر سوار دیکھا، سیدنا ابوسفیان بن حارث رضی اللہ عنہ نے اس خچر کی لگام کو پکڑا ہوا تھا اور نبی اکرم صلی اللہ علیہ وسلم فرما رہے تھے: «أَنَا النَّبِيُّ لَا كَذِبْ، أَنَا ابْنُ عَبْدِ الْمُطَّلِبْ» ”میں نبی ہوں، اس میں کوئی جھوٹ نہیں ہے، میں عبدالمطلب کا بیٹا ہوں۔“ [صحیح ابن حبان/كتاب السير/حدیث: 4770]

اردو ترجمہ · UrduUnverified translation

سیدنا ابوذر غفاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”تین لوگوں سے اللہ تعالیٰ محبت کرتا ہے: ایک وہ شخص جو کسی قوم کے پاس آئے اور ان سے اللہ کے نام پر مانگے، وہ ان کے ساتھ اپنی کسی رشتہ داری کی وجہ سے سوال نہ کرے، تو ان میں سے ایک شخص الٹے قدموں واپس جائے اور اسے پوشیدہ طور پر کچھ دے دے، اس عطیے کے بارے میں اللہ تعالیٰ کے علاوہ اور دینے والے شخص کے علاوہ اور کسی کو علم نہ ہو۔ (دوسری قسم کا شخص وہ ہیں) جو رات کے وقت سفر کر رہے ہوں، یہاں تک کہ نیند جب ان کے نزدیک سب سے زیادہ پیاری ہو تو وہ پڑاؤ کریں اور اپنا سر رکھ کر سو جائیں، تو ایک شخص کھڑا ہو کر میری بارگاہ میں مناجات کرے اور میری آیات کی تلاوت کرے۔ (اور تیسرا شخص وہ ہے) جو کسی جنگ میں حصہ لے، جب اس کا دشمن سے سامنا ہو تو اس کے ساتھی پسپا ہو جائیں، لیکن وہ سینے کو لے کر آگے بڑھے یہاں تک کہ شہید ہو جائے یا اس کو فتح نصیب ہو جائے۔“ [صحیح ابن حبان/كتاب السير/حدیث: 4771]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ سیدنا انس بن نضر رضی اللہ عنہ غزوہ بدر میں شریک نہیں ہو سکے تھے، انہوں نے کہا: نبی اکرم صلی اللہ علیہ وسلم نے جو سب سے پہلے غزوہ کیا تھا میں اس میں شریک نہیں ہو سکا، اللہ کی قسم! اگر اللہ نے اب مجھے جنگ کا موقع دیا تو اللہ تعالیٰ اس بات کو ظاہر کر دے گا کہ میں کیا کرتا ہوں، پھر غزوہ احد کا موقع آیا اور نبی اکرم صلی اللہ علیہ وسلم کے اصحاب پسپا ہوئے تو سیدنا سعد بن معاذ رضی اللہ عنہ نے یہ کہنا شروع کر دیا: کہاں ہے؟ کہاں ہے؟ اللہ کی ذات کی قسم! جس کے دستِ قدرت میں میری جان ہے، مجھے جنت کی خوشبو محسوس ہو رہی ہے جو احد کے دوسری طرف ہے۔ راوی بیان کرتے ہیں: انہوں نے حملہ کیا، لڑائی کی اور شہید ہو گئے، تو سیدنا سعد رضی اللہ عنہ نے عرض کی: اللہ کی قسم! یا رسول اللہ صلی اللہ علیہ وسلم ! جو انہوں نے کیا ہے اس کی میں طاقت نہیں رکھتا۔ ان کی بہن بیان کرتی ہیں: میں نے انہیں ان کی پوروں سے پہچانا تھا۔ ان کے جسم پر تلوار کی ضرب، تیر لگنے اور نیزہ لگنے کے 80 سے زیادہ زخم تھے تو اللہ تعالیٰ نے یہ آیت نازل فرمائی: ﴿مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ ۖ فَمِنْهُمْ مَنْ قَضَىٰ نَحْبَهُ وَمِنْهُمْ مَنْ يَنْتَظِرُ ۖ وَمَا بَدَّلُوا تَبْدِيلًا﴾ [سورة الأحزاب: 23] ”اہلِ ایمان میں سے کچھ وہ لوگ ہیں جنہوں نے اللہ تعالیٰ کے ساتھ کیے ہوئے وعدے کو سچ کر دکھایا، ان میں سے کچھ لوگوں نے اپنی نذر کو پورا کر دیا اور ان میں سے کچھ لوگ ابھی انتظار کر رہے ہیں، انہوں نے کوئی تبدیلی نہیں کی۔“ حماد نامی راوی کہتے ہیں: میں نے اپنے والد کے مصحف میں یہ آیت یوں پڑھی ہے: ”ان میں سے ایک وہ شخص ہے جس نے تبدیلی کر دی۔“ [صحیح ابن حبان/كتاب السير/حدیث: 4772]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں: اللہ تعالیٰ نے لوگوں پر یہ بات لازم قرار دی کہ ایک آدمی دس کے ساتھ مقابلہ کرے گا، یہ بات ان کے لیے بڑی پریشانی کا باعث بنی اور انہیں بہت گراں گزری، اللہ تعالیٰ نے ان لوگوں کو آسانی فراہم کی کہ ایک آدمی دو کے ساتھ مقابلہ کرے گا تو اللہ تعالیٰ نے اس بارے میں یہ آیت نازل کی: ﴿إِنْ يَكُنْ مِنْكُمْ عِشْرُونَ صَابِرُونَ﴾ ”اگر تم میں سے صبر کرنے والے بیس افراد ہوں“ [سورة الأنفال: 65] ، یہ آیت کے آخر تک ہے، پھر اللہ تعالیٰ نے ارشاد فرمایا: ﴿لَوْلَا كِتَابٌ مِنَ اللَّهِ سَبَقَ لَمَسَّكُمْ فِيمَا أَخَذْتُمْ عَذَابٌ عَظِيمٌ﴾ ”اگر اللہ تعالیٰ کی طرف سے پہلے فیصلہ نہ ہو چکا ہوتا تو تم نے جو کیا ہے اس پر تمہیں عظیم عذاب اپنی گرفت میں لے لیتا“ [سورة الأنفال: 68] ۔ (راوی بیان کرتے ہیں) اس سے مراد غزوہ بدر کا مال غنیمت ہے اور مراد یہ ہے کہ اگر میں نے پہلے یہ طے نہ کیا ہوتا کہ اپنی نافرمانی کرنے والے کو عذاب نہیں دوں گا۔ [صحیح ابن حبان/كتاب السير/حدیث: 4773]

اردو ترجمہ · UrduUnverified translation

سیدنا جابر بن عبداللہ رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کے ہمراہ روانہ ہوئے، ہمیں اس بارے میں علم نہیں تھا کہ دشمن نے ہمارے لیے کس طرح کا لشکر تیار کیا ہے، ہم حنین کی وادی کے پاس پہنچے، یہ صبح کے وقت کی بات ہے، یہ تہامہ کی وادیوں میں سے ایک نشیبی وادی تھی، لوگ اس میں نیچے کی طرف اتر رہے تھے۔ راوی بیان کرتے ہیں: اللہ کی قسم! لوگوں کا پیچھا کیا جا رہا تھا پر انہیں اس بات کا پتا نہ تھا، اس دوران ہر طرف سے دستے آنے لگے تو لوگوں نے واپس لوٹنے میں پسپا ہونے کا انتظار نہیں کیا۔ راوی بیان کرتے ہیں: نبی اکرم صلی اللہ علیہ وسلم نے دائیں طرف رخ کر کے فرمایا: ”اے لوگو! تم کہاں ہو؟ میں اللہ کا رسول ہوں، میں محمد بن عبداللہ ہوں۔“ (سیدنا انس رضی اللہ عنہ بیان کرتے ہیں) ہوازن قبیلے کے آگے ایک بھاری بھرکم شخص تھا جو سرخ اونٹ پر سوار تھا، اس کے ہاتھ میں سیاہ رنگ کا جھنڈا تھا، جب کوئی شخص اس تک پہنچ جاتا تو وہ اسے نیزہ مار دیتا اور جب کوئی چیز اس کے سامنے آتی تو وہ اسے اپنے پیچھے کر دیتا۔ سیدنا علی بن ابوطالب رضی اللہ عنہ اور انصار سے تعلق رکھنے والا ایک شخص دونوں اس کی گھات لگا کر بیٹھ گئے۔ سیدنا علی رضی اللہ عنہ نے اونٹ کی پشت پر حملہ کیا تو وہ (سردار) گدی کے بل نیچے گر گیا، انصاری نے اس کی پنڈلی پر مارا اور اس کا پاؤں نصف پنڈلی کے قریب کاٹ دیا۔ وہ گرا تو لوگوں کے درمیان لڑائی شروع ہو گئی، یہاں تک کہ وہ لوگ پسپا ہو گئے۔ وہ صفوان بن امیہ کا ماں کی طرف سے شریک بھائی تھا، اس نے کہا: خبردار! آج کے دن جادو جھوٹا ثابت ہو گیا۔ سیدنا صفوان بن امیہ رضی اللہ عنہ اس وقت مشرک تھے، یہ بعد کی بات ہے، نبی اکرم صلی اللہ علیہ وسلم نے (ان کے سینے وغیرہ پر ضرب لگائی تھی)، سیدنا صفوان رضی اللہ عنہ نے اس سے کہا: خاموش رہو! اللہ تعالیٰ تمہارے منہ کو بند کرے، اللہ کی قسم! قریش کا کوئی شخص مجھ سے آ ملے، یہ میرے نزدیک اس سے زیادہ محبوب ہے کہ ہوازن قبیلے کا کوئی شخص مجھ سے ملے۔ [صحیح ابن حبان/كتاب السير/حدیث: 4774]

اردو ترجمہ · UrduUnverified translation

سیدنا براء بن عازب رضی اللہ عنہ بیان کرتے ہیں کہ غزوہِ حنین کے موقع پر جب نبی اکرم صلی اللہ علیہ وسلم کا مشرکین سے مقابلہ ہوا تو آپ صلی اللہ علیہ وسلم اپنے خچر سے نیچے اتر آئے اور آپ صلی اللہ علیہ وسلم پیدل (لڑائی میں حصہ لیتے رہے)۔ [صحیح ابن حبان/كتاب السير/حدیث: 4775]

اردو ترجمہ · UrduUnverified translation

سیدنا انس، سیدنا ابوطلحہ رضی اللہ عنہما کا یہ بیان نقل کرتے ہیں کہ نبی اکرم صلی اللہ علیہ وسلم جب کسی قوم پر غالب آ جاتے تھے تو آپ صلی اللہ علیہ وسلم اس بات کو پسند کرتے تھے کہ ان کے علاقے میں تین دن تک مقیم رہیں۔ [صحیح ابن حبان/كتاب السير/حدیث: 4776]

اردو ترجمہ · UrduUnverified translation

سیدنا انس، سیدنا ابوطلحہ رضی اللہ عنہما کا یہ بیان نقل کرتے ہیں: نبی اکرم صلی اللہ علیہ وسلم جب کسی قوم پر فتح حاصل کر لیتے تھے تو آپ صلی اللہ علیہ وسلم کو یہ بات پسند تھی کہ آپ صلی اللہ علیہ وسلم ان کے علاقے میں تین دن (راوی کو شک ہے شاید یہ الفاظ ہیں) تین راتوں تک رہیں۔ [صحیح ابن حبان/كتاب السير/حدیث: 4777]

اردو ترجمہ · UrduUnverified translation

قتادہ بیان کرتے ہیں: سیدنا انس بن مالک رضی اللہ عنہ نے ہمارے سامنے سیدنا ابوطلحہ رضی اللہ عنہ کا یہ بیان نقل کیا کہ غزوہ بدر کے موقع پر نبی اکرم صلی اللہ علیہ وسلم نے قریش کے چوبیس سرداروں کے بارے میں حکم دیا تو انہیں بدر کے ایک گڑھے میں ڈال دیا گیا، نبی اکرم صلی اللہ علیہ وسلم جب کسی قوم پر غالب آ جاتے تھے تو آپ صلی اللہ علیہ وسلم کو یہ بات پسند تھی کہ آپ صلی اللہ علیہ وسلم ان کے علاقے میں تین راتوں تک مقیم رہیں، جب تیسرا دن آیا تو نبی اکرم صلی اللہ علیہ وسلم کے حکم کے مطابق آپ کی سواریوں پر پالان باندھ دیا گیا، پھر آپ صلی اللہ علیہ وسلم روانہ ہوئے اور آپ صلی اللہ علیہ وسلم کے اصحاب آپ کے پیچھے چلے، لوگوں نے کہا: ہمارا خیال ہے نبی اکرم صلی اللہ علیہ وسلم کسی کام کے سلسلے میں تشریف لے کر جانے لگے ہیں، یہاں تک کہ نبی اکرم صلی اللہ علیہ وسلم اس گڑھے کے کنارے تک آئے، آپ صلی اللہ علیہ وسلم نے ان (کفارانِ قریش) کو ان کے نام اور ان کے باپوں کے نام لے کر مخاطب کیا: ”اے فلاں بن فلاں! کیا اب تمہاری یہ خواہش نہیں ہے کہ تم نے اللہ اور اس کے رسول کی اطاعت کی ہوتی؟ ہمارے پروردگار نے ہمارے ساتھ جو وعدہ کیا تھا ہم نے تو اسے حق پا لیا ہے، کیا تمہارے پروردگار نے تمہارے ساتھ جو وعدہ کیا تھا تم نے اسے حق پا لیا ہے؟“ تو سیدنا عمر بن خطاب رضی اللہ عنہ نے عرض کی: یا رسول اللہ صلی اللہ علیہ وسلم ! آپ ایسے اجسام کے ساتھ کیسے خطاب کر رہے ہیں، جن میں روح ہی نہیں ہے؟ نبی اکرم صلی اللہ علیہ وسلم نے ارشاد فرمایا: ”اس ذات کی قسم جس کے دستِ قدرت میں میری جان ہے! میں جو کہہ رہا ہوں، تم ان لوگوں کے مقابلے میں مجھ سے زیادہ نہیں سن رہے (یعنی وہ بھی اسی طرح سن رہے ہیں جس طرح تم اسے سن رہے ہو)۔“ قتادہ نامی راوی کہتے ہیں: اللہ تعالیٰ نے انہیں زندہ کیا تھا، یہاں تک کہ انہیں (نبی اکرم صلی اللہ علیہ وسلم کی آواز) اس لیے سنائی تھی تاکہ ان کی توبیخ ہو، ان کا کم تر ہونا ظاہر ہو، انہیں ذلت، حسرت اور ندامت ہو۔ [صحیح ابن حبان/كتاب السير/حدیث: 4778]

اردو ترجمہ · UrduUnverified translation

سیدنا عبداللہ بن عمرو رضی اللہ عنہما بیان کرتے ہیں: نبی اکرم صلی اللہ علیہ وسلم نے اہل طائف کا محاصرہ کیا ہوا تھا، لیکن انہیں کوئی نقصان نہیں پہنچا سکے، تو نبی اکرم صلی اللہ علیہ وسلم نے فرمایا: ”اگر اللہ نے چاہا تو ہم (کل) روانہ ہو جائیں گے۔“ آپ صلی اللہ علیہ وسلم کے اصحاب نے عرض کی: کیا ہم فتح حاصل کیے بغیر روانہ ہو جائیں گے؟ نبی اکرم صلی اللہ علیہ وسلم نے فرمایا: ”کل پھر تم حملہ کر لینا۔“ ان لوگوں نے ان پر حملہ کیا تو ان میں سے بہت سے لوگ زخمی ہو گئے۔ نبی اکرم صلی اللہ علیہ وسلم نے فرمایا: ”کل ہم روانہ ہو جائیں گے“، تو لوگوں کو یہ بات اچھی لگی تو نبی اکرم صلی اللہ علیہ وسلم مسکرا دیے۔ [صحیح ابن حبان/كتاب السير/حدیث: 4779]

اردو ترجمہ · UrduUnverified translation

سیدنا عطیہ قرظی رضی اللہ عنہ بیان کرتے ہیں کہ غزوہ قریظہ کے موقع پر مجھے نبی اکرم صلی اللہ علیہ وسلم کے سامنے پیش کیا گیا، ان لوگوں کو میرے بارے میں شک ہوا (کیا میں بالغ ہو چکا ہوں کہ نہیں؟) تو مجھ سے دریافت کیا گیا: ”کیا تمہارے زیر ناف بال اگ گئے ہیں؟“ ان لوگوں نے میری تلاشی لی تو انہیں پتا چلا کہ میرے زیر ناف بال نہیں اگے ہیں، تو مجھے چھوڑ دیا گیا۔ [صحیح ابن حبان/كتاب السير/حدیث: 4780]

اردو ترجمہ · UrduUnverified translation

عطیہ قرظی رضی اللہ عنہ بیان کرتے ہیں: میں ان لوگوں میں شامل تھا جن کے بارے میں سیدنا سعد بن معاذ رضی اللہ عنہ نے فیصلہ کیا تھا، ان لوگوں کو میرے بارے میں شک ہوا کہ کیا میں نابالغ ہوں، یا میں جنگجو لوگوں میں شمار ہوں گا، تو نبی اکرم صلی اللہ علیہ وسلم نے فرمایا: ”اس بات کا جائزہ لو، اگر اس کے زیرِ ناف بال اگے ہیں، تو اسے قتل کر دو اور اگر نہیں اگے تو پھر اسے قتل نہ کرنا۔“ [صحیح ابن حبان/كتاب السير/حدیث: 4781]

اردو ترجمہ · UrduUnverified translation

عطیہ قرظی رضی اللہ عنہ بیان کرتے ہیں: میں ان لوگوں میں شامل تھا جن کے بارے میں سیدنا سعد بن معاذ رضی اللہ عنہ نے فیصلہ کیا تھا، تو انہوں نے مجھے ایسی حالت میں پایا کہ میرے زیرِ ناف بال نہیں اگے تھے، تو اسی وجہ سے میں زندہ رہ گیا۔ [صحیح ابن حبان/كتاب السير/حدیث: 4782]

اردو ترجمہ · UrduUnverified translation

عطیہ قرظی بیان کرتے ہیں: میں وہ پہلا شخص ہوں جس کے بارے میں سیدنا سعد بن معاذ رضی اللہ عنہ نے فیصلہ دیا تھا، مجھے لایا گیا تو میں سمجھ رہا تھا کہ وہ لوگ مجھے قتل کر دیں گے لیکن جب انہوں نے میرے زیرِ ناف حصے کی تحقیق کی تو مجھے ایسی حالت میں پایا کہ میرے زیرِ ناف بال نہیں اگے تھے، تو انہوں نے مجھے قیدیوں میں شامل کر لیا تھا۔ [صحیح ابن حبان/كتاب السير/حدیث: 4783]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں کہ غزوۂ احزاب کے موقع پر سیدنا سعد بن معاذ رضی اللہ عنہ کو تیر لگا جس نے ان کے بازو کی رگ کو کاٹ دیا۔ نبی اکرم صلی اللہ علیہ وسلم نے ان کے لیے آگ جلوائی اور اس کے ذریعے داغ لگوایا تو ان کا بازو پھول گیا۔ نبی اکرم صلی اللہ علیہ وسلم نے انہیں چھوڑ دیا تو خون پھر بہنے لگا۔ نبی اکرم صلی اللہ علیہ وسلم نے دوبارہ داغ لگوایا تو پھر ان کا ہاتھ پھول گیا، جب انہوں نے یہ صورتحال دیکھی تو انہوں نے کہا: اے اللہ! تو میری جان اس وقت تک نہ نکالنا جب تک بنو قریظہ کے حوالے سے میری آنکھوں کو ٹھنڈا نہیں کر دیتا، تو ان کی رگ کا خون نکلنا بند ہو گیا اور اس کے بعد ایک قطرہ بھی نہیں نکلا، یہاں تک کہ جب بنو قریظہ نے سیدنا سعد بن معاذ رضی اللہ عنہ کو ثالث تسلیم کیا تو انہوں نے انہیں بلوایا اور حکم دیا کہ ان کے مردوں کو قتل کر دیا جائے اور ان کی خواتین اور بچوں کو زندہ رکھا جائے، تو مسلمانوں کو مالِ غنیمت بھی حاصل ہوا۔ نبی اکرم صلی اللہ علیہ وسلم نے ارشاد فرمایا: ”تم نے ان لوگوں کے بارے میں اللہ تعالیٰ کے حکم کے مطابق فیصلہ دیا ہے۔“ ان لوگوں کی تعداد چار سو تھی۔ جب لوگ ان کے قتل سے فارغ ہوئے تو سیدنا سعد رضی اللہ عنہ کی رگ سے خون بہنا شروع ہو گیا اور ان کا انتقال ہو گیا۔ [صحیح ابن حبان/كتاب السير/حدیث: 4784]