Hadith 4597–4636

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ کے نزدیک سب سے بہتر عمل ایسا ایمان ہے، جس میں کوئی شک نہ ہو اور ایسا جہاد ہے، جس میں کوئی خیانت نہ ہو اور مبرور حج ہے۔“ سیدنا ابوہریرہ رضی اللہ عنہ فرماتے ہیں: مبرور حج ایک سال کے گناہوں کو ختم کر دیتا ہے۔ (امام ابن حبان رحمہ اللہ فرماتے ہیں:) ابوجعفر نامی راوی امام محمد بن علی بن حسین بن علی بن ابوطالب (یعنی امام محمد الباقر) ہیں۔ [صحیح ابن حبان/كتاب السير/حدیث: 4597]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم سے سوال کیا گیا: کون سا عمل زیادہ فضیلت رکھتا ہے؟ نبی اکرم صلی اللہ علیہ وسلم نے فرمایا: ”اللہ اور اس کے رسول پر ایمان رکھنا۔“ سائل نے پوچھا: پھر کون سا؟ نبی اکرم صلی اللہ علیہ وسلم نے فرمایا: ”اللہ کی راہ میں جہاد کرنا عمل کی کوہان ہے (یعنی سب سے بہترین عمل ہے)۔“ سائل نے دریافت کیا: پھر کون سا؟ نبی اکرم صلی اللہ علیہ وسلم نے فرمایا: ”مبرور حج۔“ [صحیح ابن حبان/كتاب السير/حدیث: 4598]

اردو ترجمہ · UrduUnverified translation

سیدنا ابوسعید خدری رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا اور اس نے دریافت کیا: ”یا رسول اللہ صلی اللہ علیہ وسلم ! کون سا شخص زیادہ فضیلت رکھتا ہے؟“ نبی اکرم صلی اللہ علیہ وسلم نے فرمایا: ”وہ شخص جو اللہ کی راہ میں اپنی جان اور مال کے ساتھ جہاد کرے، پھر وہ مومن جو کسی گھاٹی میں رہ کر اللہ کی عبادت کرتا رہے اور لوگوں کو اپنے شر سے محفوظ رکھے۔“ [صحیح ابن حبان/كتاب السير/حدیث: 4599]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”لوگوں پر ایسا زمانہ بھی آئے گا جب ان کے درمیان قدر و منزلت کے اعتبار سے سب سے بہتر شخص وہ ہو گا جو اپنے گھوڑے کی لگام تھام کر اللہ کی راہ میں جہاد کے لیے چلا جائے گا، جب بھی وہ جنگ کی پکار کو سنے گا گھوڑے کی پشت پر سوار ہو گا اور پھر موت کا طلب گار ہو گا یا وہ شخص جو کسی گھاٹی میں مقیم رہ کر نماز قائم کرتا رہے، زکوٰۃ ادا کرتا رہے اور لوگوں کے ساتھ صرف بھلائی کرے۔“ [صحیح ابن حبان/كتاب السير/حدیث: 4600]

اردو ترجمہ · UrduUnverified translation

سیدنا براء رضی اللہ عنہ بیان کرتے ہیں کہ نبی اکرم صلی اللہ علیہ وسلم کی خدمت میں ایک شخص حاضر ہوا جس نے لوہے کا لباس پہنا ہوا تھا، اس نے عرض کی: ”یا رسول اللہ صلی اللہ علیہ وسلم ! کیا میں جنگ میں حصہ لوں، یا اسلام قبول کر لوں؟“ نبی اکرم صلی اللہ علیہ وسلم نے فرمایا: ”تم اسلام قبول کر لو پھر تم جنگ میں حصہ لو۔“ اس شخص نے اسلام قبول کر لیا، پھر اس نے جنگ میں حصہ لیا اور شہید ہو گیا، نبی اکرم صلی اللہ علیہ وسلم نے ارشاد فرمایا: ”اس نے عمل تھوڑا کیا ہے، لیکن اسے اجر زیادہ ملے گا۔“ [صحیح ابن حبان/كتاب السير/حدیث: 4601]

اردو ترجمہ · UrduUnverified translation

سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”اللہ کی راہ میں (جہاد کے لیے) صبح کے وقت جانا یا شام کے وقت جانا، دنیا اور اس میں موجود تمام چیزوں سے زیادہ بہتر ہے۔“ [صحیح ابن حبان/كتاب السير/حدیث: 4602]

اردو ترجمہ · UrduUnverified translation

سیدنا ابوہریرہ رضی اللہ عنہ کے بارے میں یہ بات منقول ہے کہ وہ کچھ لوگوں کے ساتھ پہرہ داری کر رہے تھے، اسی دوران یہ بات کہی گئی کہ ساحل کی طرف سے خطرہ ہے، پھر یہ بات بیان کی گئی کہ اس میں کوئی حرج نہیں ہے، لوگ واپس چلے گئے لیکن سیدنا ابوہریرہ رضی اللہ عنہ وہیں ٹھہرے رہے، ایک صاحب ان کے پاس سے گزرے انہوں نے دریافت کیا: اے ابوہریرہ! آپ کیوں ٹھہرے ہوئے ہیں؟ تو انہوں نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اللہ کی راہ میں ایک گھڑی تک کھڑے رہنا شبِ قدر میں حجرِ اسود کے پاس نوافل ادا کرنے سے زیادہ بہتر ہے۔“ (امام ابن حبان رحمہ اللہ فرماتے ہیں:) مجاہد نے سیدنا ابوہریرہ رضی اللہ عنہ سے متعین احادیث کا سماع کیا ہے، عمر بن ذر نے ان سے احادیث کا سماع کیا تھا اور اس شخص کو غلط فہمی ہوئی ہے جس نے یہ گمان کیا کہ مجاہد نے سیدنا ابوہریرہ رضی اللہ عنہ سے کسی بھی حدیث کا سماع نہیں کیا ہے، کیونکہ سیدنا ابوہریرہ رضی اللہ عنہ کا انتقال سیدنا معاویہ رضی اللہ عنہ کے عہدِ خلافت میں اٹھاون ہجری میں ہوا تھا، جب کہ مجاہد کی پیدائش سیدنا عمر بن خطاب رضی اللہ عنہ کے عہدِ خلافت میں اکیس ہجری میں ہوئی تھی اور مجاہد کا انتقال ایک سو تین ہجری میں ہوا، تو یہ چیز اس بات کی طرف رہنمائی کرتی ہے کہ مجاہد نے سیدنا ابوہریرہ رضی اللہ عنہ سے سماع کیا ہوا ہے۔ [صحیح ابن حبان/كتاب السير/حدیث: 4603]

اردو ترجمہ · UrduUnverified translation

ابومصبح بیان کرتے ہیں کہ ہم لوگ روم کی سرزمین پر ایک گروہ کے ہمراہ سفر کر رہے تھے جن کے نگران مالک بن عبداللہ خثعمی تھے، مالک کا گزر سیدنا جابر بن عبداللہ رضی اللہ عنہ کے پاس سے ہوا جو اپنے خچر کو ساتھ لے کر پیدل چل رہے تھے، مالک نے ان سے کہا: اے ابوعبداللہ! آپ سوار ہو جائیں، اللہ تعالیٰ نے آپ کو سواری عطا کی ہے، تو سیدنا جابر رضی اللہ عنہ نے کہا: میں نے اپنی سواری کو تیار رکھا ہے اور میں لوگوں سے بے نیاز ہوں، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جس شخص کے دونوں پاؤں اللہ کی راہ میں (جہاد کیلئے جاتے ہوئے) غبار آلود ہو جائیں تو اللہ تعالیٰ اس شخص پر جہنم کو حرام کر دیتا ہے۔“ (راوی بیان کرتے ہیں) تو مالک کو ان کی یہ بات بہت پسند آئی، مالک وہاں سے آگے چلے گئے اور اتنی دور چلے گئے جہاں سے ان کی آواز سیدنا جابر رضی اللہ عنہ تک جا سکتی تھی، وہاں پہنچ کر انہوں نے بلند آواز میں یہ کہا: اے ابوعبداللہ! سوار ہو جائیں، اللہ تعالیٰ نے آپ کو سواری عطا کی ہے، تو سیدنا جابر رضی اللہ عنہ کو یہ اندازہ ہو گیا کہ انہوں نے بلند آواز میں یہ بات کیوں کہی ہے، انہوں نے فرمایا: میں نے اپنی سواری کو ٹھیک رکھا ہوا ہے، مجھے اپنی قوم کی ضرورت بھی نہیں ہے (میں اس لیے پیدل چل رہا ہوں) کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جس کے دونوں پاؤں اللہ کی راہ میں (جہاد پر جاتے ہوئے) غبار آلود ہو جائیں، اللہ تعالیٰ اس شخص پر جہنم کو حرام قرار دے دیتا ہے۔“ تو تمام لوگ اپنی سواریوں سے نیچے اتر گئے۔ راوی کہتے ہیں: ہم نے اس دن سے زیادہ پیدل چلتے ہوئے لوگ کبھی نہیں دیکھے۔ مقری دمشق (کے قریب) ایک گاؤں ہے اور مہری فسطاط میں ایک کوچہ ہے، یہ بات شیخ نے بیان کی ہے۔ [صحیح ابن حبان/كتاب السير/حدیث: 4604]

اردو ترجمہ · UrduUnverified translation

یزید بن ابومریم بیان کرتے ہیں: میں جمعہ کے لیے جا رہا تھا، عبایہ بن رفاعہ میرے پاس پہنچے اور انہوں نے بتایا: میں نے سیدنا ابوعبس رضی اللہ عنہ کو یہ بیان کرتے ہوئے سنا ہے کہ نبی اکرم صلی اللہ علیہ وسلم نے ارشاد فرمایا: ”جس شخص کے دونوں پاؤں اللہ کی راہ میں غبار آلود ہوں، اللہ تعالیٰ اس کے (دونوں پاؤں یعنی اس شخص) کو جہنم کے لیے حرام قرار دے دیتا ہے۔“ (امام ابن حبان رحمہ اللہ فرماتے ہیں:) سیدنا ابوعبس رضی اللہ عنہ نامی راوی اہل بدر سے تعلق رکھتے ہیں، جن کا نام عبدالرحمن بن جبیر بن عمرو بن زید بن جشم بن حارثہ بن حارث بن خزرج انصاری ہے، ان کا انتقال 43 ہجری میں ہوا تھا اور انہیں جنت بقیع میں دفن کیا گیا تھا۔ سیدنا ابوبردہ بن نیار اور سیدنا سلمہ بن سلامہ بن وقش رضی اللہ عنہما ان کی قبر میں اترے تھے۔ اہل شام کی روایت میں ولید نامی راوی یزید بن ابومریم ہو گا اور اہل عراق کی روایت میں برید ہو گا۔ [صحیح ابن حبان/كتاب السير/حدیث: 4605]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”کسی بھی مومن بندے کے پیٹ میں اللہ کی راہ کا غبار اور جہنم کا دھواں اکٹھے نہیں ہوں گے اور کسی بھی بندے کے پیٹ میں ایمان اور حسد اکٹھے نہیں ہو سکتے۔“ [صحیح ابن حبان/كتاب السير/حدیث: 4606]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جہنم کا دھواں اور اللہ کی راہ کا غبار کسی مسلمان کے نتھنے میں اکٹھے نہیں ہو سکتے۔“ [صحیح ابن حبان/كتاب السير/حدیث: 4607]

اردو ترجمہ · UrduUnverified translation

سیدنا انس بن مالک رضی اللہ عنہ اپنی خالہ سیدہ ام حرام بنت ملحان رضی اللہ عنہا کا یہ بیان نقل کرتے ہیں: ایک دن نبی اکرم صلی اللہ علیہ وسلم میرے ہاں سو گئے، جب آپ صلی اللہ علیہ وسلم بیدار ہوئے تو مسکرا رہے تھے، میں نے عرض کی: یا رسول اللہ صلی اللہ علیہ وسلم ! آپ کیوں مسکرا رہے ہیں؟ نبی اکرم صلی اللہ علیہ وسلم نے فرمایا: ”میری امت سے تعلق رکھنے والے کچھ لوگ میرے سامنے پیش کیے گئے جو اس سبز سمندر پر یوں سوار تھے جس طرح بادشاہ اپنے تختوں پر بیٹھے ہوئے ہوتے ہیں۔“ سیدہ ام حرام رضی اللہ عنہا نے عرض کی: آپ اللہ تعالیٰ سے دعا کیجیے کہ وہ مجھے بھی ان میں شامل کر دے۔ نبی اکرم صلی اللہ علیہ وسلم نے اس خاتون کے لیے دعا کر دی، پھر نبی اکرم صلی اللہ علیہ وسلم دوسری مرتبہ سوئے پھر ایسا ہی ہوا، اس خاتون نے اسی کی مانند بات کہی، نبی اکرم صلی اللہ علیہ وسلم نے اسی کی مانند جواب دیا جو پہلے دیا تھا، اس خاتون نے عرض کیا: آپ اللہ تعالیٰ سے دعا کیجیے کہ مجھے بھی ان میں شامل کر دے۔ نبی اکرم صلی اللہ علیہ وسلم نے فرمایا: ”تم پہلے والوں میں ہو۔“ (راوی بیان کرتے ہیں) وہ خاتون اپنے شوہر سیدنا عبادہ بن صامت رضی اللہ عنہ کے ہمراہ جہاد میں حصہ لینے کے لیے گئی تھیں، یہ اس پہلی جنگ کی بات ہے جس میں مسلمانوں نے سیدنا معاویہ رضی اللہ عنہ کے عہد حکومت میں سمندر میں جنگ کی تھی، جب یہ خاتون اس جنگ سے واپس تشریف لائیں ان کی سواری ان کے قریب کی گئی، یہ اس پر سوار ہوئیں تو یہ اس سے گر گئیں اور ان کا انتقال ہو گیا۔ (امام ابن حبان رحمہ اللہ فرماتے ہیں:) اس خاتون کی قبر بحرِ روم میں ایک جزیرے میں ہے، اس جزیرے کو قبرس کہا جاتا ہے، مسلمانوں کے علاقے سے وہاں تک تین دن کا سفر ہے۔ [صحیح ابن حبان/كتاب السير/حدیث: 4608]

اردو ترجمہ · UrduUnverified translation

ابوصالح، جو سیدنا عثمان غنی رضی اللہ عنہ کے غلام ہیں، وہ بیان کرتے ہیں: سیدنا عثمان غنی رضی اللہ عنہ نے منیٰ میں مسجدِ خیف میں یہ بات ارشاد فرمائی: اے لوگو! میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”میں نے تمہارے ساتھ بخل کی وجہ سے اسے تم سے چھپا رکھا تھا، لیکن اب یہ مجھے مناسب محسوس ہوا کہ میں اللہ تعالیٰ اور تمہارے لیے خیر خواہی کرتے ہوئے اسے ظاہر کر دوں۔“ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اللہ کی راہ میں ایک دن گزارنا اس کے علاوہ ایک ہزار دن گزارنے سے بہتر ہے“، تو اب تم میں سے ہر شخص کو اپنے بارے میں جائزہ لے لینا چاہیے۔ (امام ابن حبان رحمہ اللہ فرماتے ہیں:) ابومعن نامی راوی محمد بن معن غفاری ہے، یہ اہل مدینہ سے تعلق رکھتے ہیں، جب کہ ابوعقیل نامی راوی زہرہ بن معبد ہے اور یہ اہل رملہ سے تعلق رکھتے ہیں۔ سیدنا عثمان غنی رضی اللہ عنہ کے غلام ابوصالح کا نام حارث ہے۔ [صحیح ابن حبان/كتاب السير/حدیث: 4609]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ اس شخص کا ضامن ہے جو اس کی راہ میں جہاد کرتا ہے، جو اپنے گھر سے صرف جہاد کرنے اور اس کے کلمے کی تصدیق کرنے کے لیے نکلتا ہے، (اللہ تعالیٰ اس بات کا ضامن ہوتا ہے) کہ اس شخص کو جنت میں داخل کر دے گا یا پھر اسے اس کے اس گھر کی طرف لے آئے گا جہاں سے وہ نکلا تھا اور اس کے ساتھ اجر بھی ہو گا اور مال غنیمت بھی ہو گا۔“ [صحیح ابن حبان/كتاب السير/حدیث: 4610]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک جنت میں ایک سو درجے ہیں، جنہیں اللہ تعالیٰ نے اپنی راہ میں جہاد کرنے والوں کے لیے تیار کیا ہے، ان میں سے دو درجوں کے درمیان اتنا فاصلہ ہے جتنا آسمان اور زمین کے درمیان ہے، تو جب تم اللہ تعالیٰ سے سوال کرو تو اس سے جنت الفردوس کا سوال کرو کیونکہ یہ درمیانے درجے کی جنت ہے اور وہ اعلیٰ درجے کی جنت ہے اور اس کے اوپر عرش ہے اور جنت کی تمام نہریں اسی سے پھوٹتی ہیں۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان کہ ”وہ درمیانے درجے کی جنت ہے“ اس کے ذریعے آپ صلی اللہ علیہ وسلم کی مراد یہ ہے فردوس جنت کے درمیان میں ہے، یعنی چوڑائی کے حوالے سے درمیان میں ہے۔ نبی اکرم صلی اللہ علیہ وسلم کا یہ فرمان کہ ”وہ جنت سب سے بلند درجہ ہے“ اس سے آپ صلی اللہ علیہ وسلم کی مراد یہ ہے: بلند ہونے کے اعتبار سے (وہ سب سے اوپر ہے)۔ [صحیح ابن حبان/كتاب السير/حدیث: 4611]

اردو ترجمہ · UrduUnverified translation

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے ابوسعید! جو شخص اللہ تعالیٰ کے پروردگار ہونے، اسلام کے دین ہونے اور سیدنا محمد صلی اللہ علیہ وسلم کے نبی ہونے سے راضی ہو (یعنی ان پر ایمان رکھتا ہو) تو اس کے لیے جنت واجب ہو جاتی ہے۔“ سیدنا ابوسعید رضی اللہ عنہ کو یہ بات بہت پسند آئی، انہوں نے عرض کی: یا رسول اللہ صلی اللہ علیہ وسلم ! یہ بات میرے سامنے دہرا دیجیے۔ نبی اکرم صلی اللہ علیہ وسلم نے ایسا ہی کیا، پھر نبی اکرم صلی اللہ علیہ وسلم نے ارشاد فرمایا: ”ایک دوسری چیز بھی ہے، جس کے ذریعے بندے کے ایک سو درجے بلند کر دیے جاتے ہیں، جن میں سے ہر دو درجوں کے درمیان اتنا فاصلہ ہے جتنا آسمان اور زمین کے درمیان ہے۔“ تو سیدنا ابوسعید خدری رضی اللہ عنہ نے دریافت کیا: وہ دوسری چیز کیا ہے؟ نبی اکرم صلی اللہ علیہ وسلم نے فرمایا: ”اللہ کی راہ میں جہاد کرنا۔“ [صحیح ابن حبان/كتاب السير/حدیث: 4612]

اردو ترجمہ · UrduUnverified translation

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”اللہ کی راہ میں جنگ میں حصہ لینے والا، بیت اللہ کی طرف حج کرنے والا اور عمرہ کرنے والا شخص اللہ تعالیٰ کے مہمان ہیں، اللہ تعالیٰ نے انہیں بلایا ہوتا ہے، وہ اس کے بلاوے پر آتے ہیں۔“ [صحیح ابن حبان/كتاب السير/حدیث: 4613]

اردو ترجمہ · UrduUnverified translation

سیدنا کعب بن مرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص اللہ کی راہ میں ایک تیر چلاتا ہے تو یہ غلام آزاد کرنے کی مانند (ثواب کا باعث ہوتا ہے)۔“ [صحیح ابن حبان/كتاب السير/حدیث: 4614]

اردو ترجمہ · UrduUnverified translation

سیدنا ابونجیح سلمی رضی اللہ عنہ بیان کرتے ہیں کہ ہم نے نبی اکرم صلی اللہ علیہ وسلم کے ہمراہ طائف کا محاصرہ کیا ہوا تھا، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا: ”جو شخص اللہ کی راہ میں تیر چلاتا ہے (یعنی جو دشمن تک پہنچے) تو یہ بات اس کے لیے جنت میں ایک درجے کا باعث ہوتی ہے۔“ راوی بیان کرتے ہیں: اس دن میں نے سولہ تیر چلائے تھے (یعنی جو دشمن تک پہنچے)۔ شیخ ابوحاتم بیان کرتے ہیں: سیدنا ابونجیح رضی اللہ عنہ کا نام عمرو بن عبسہ سلمی ہے۔ [صحیح ابن حبان/كتاب السير/حدیث: 4615]

اردو ترجمہ · UrduUnverified translation

شرحبیل بن سمط بیان کرتے ہیں: ہم نے سیدنا کعب بن مرہ رضی اللہ عنہ سے کہا: اے سیدنا کعب رضی اللہ عنہ! آپ نبی اکرم صلی اللہ علیہ وسلم کے حوالے سے ہمیں کوئی حدیث بیان کیجیے اور احتیاط کیجیے گا، تو انہوں نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص دشمن کو تیر مارتا ہے، تو اللہ تعالیٰ اس کی وجہ سے اس کا درجہ بلند کر دیتا ہے۔“ تو سیدنا عبدالرحمن بن نحام رضی اللہ عنہ نے عرض کی: یا رسول اللہ صلی اللہ علیہ وسلم ! درجے سے مراد کیا ہے؟ نبی اکرم صلی اللہ علیہ وسلم نے ارشاد فرمایا: ”یہ (تمہاری والدہ کے گھر کی) چوکھٹ کی طرح نہیں ہے، بلکہ دو درجوں کے درمیان ایک سو سال کی مسافت کا فاصلہ ہوتا ہے۔“ (امام ابن حبان رحمہ اللہ فرماتے ہیں:) لوگوں کا سیدنا کعب بن مرہ رضی اللہ عنہ سے یہ کہنا کہ آپ ہمیں حدیث بیان کیجیے اور احتیاط کیجیے گا، اس قول کے ذریعے ان کی مراد یہ تھی کہ آپ اس بات سے احتیاط کیجیے گا کہ کہیں آپ سے غلطی نہ ہو جائے اور زیادہ یا کم الفاظ بیان نہ کر دیں، ان لوگوں کی یہ مراد نہیں تھی کہ آپ غلط بیانی کرنے سے احتیاط کیجیے گا، کیونکہ تمام صحابہ رضی اللہ عنہم عادل ہیں، اللہ تعالیٰ ان پر رحم کرے اور ہمیں بھی (آخرت میں) ان کا ساتھ نصیب کرے۔ [صحیح ابن حبان/كتاب السير/حدیث: 4616]

اردو ترجمہ · UrduUnverified translation

ابوبکر بن عبداللہ بن قیس بیان کرتے ہیں: میں نے اپنے والد (سیدنا ابوموسیٰ اشعری رضی اللہ عنہ) کو یہ بیان کرتے ہوئے سنا، وہ اس وقت دشمن کے قلعے کے پاس تھے (راوی کو شک ہے شاید یہ الفاظ ہیں) دشمن کے مدِ مقابل تھے، نبی اکرم صلی اللہ علیہ وسلم نے یہ ارشاد فرمایا ہے: «إِنَّ أَبْوَابَ الْجَنَّةِ تَحْتَ ظِلَالِ السُّيُوفِ» ”بے شک جنت تلواروں کے سائے کے نیچے ہے۔“ (راوی بیان کرتے ہیں) تو ایک شخص کھڑا ہوا جس کی حالت کوئی بہت اچھی نہیں تھی، اس نے کہا: اے ابوموسیٰ! کیا آپ نے خود نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے؟ سیدنا ابوموسیٰ رضی اللہ عنہ نے جواب دیا: جی ہاں۔ راوی بیان کرتے ہیں: تو وہ شخص اپنے ساتھیوں کے پاس گیا اور بولا: میری طرف سے تم سب کو سلام ہو، پھر اس شخص نے اپنی تلوار کی میان کو توڑ دیا اور اسے ایک طرف رکھ دیا، پھر وہ اپنی تلوار لے کر آگے کی طرف بڑھا اور ان کے ساتھ لڑتا رہا یہاں تک کہ شہید ہو گیا۔ [صحیح ابن حبان/كتاب السير/حدیث: 4617]

اردو ترجمہ · UrduUnverified translation

سیدنا معاذ بن جبل رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص اتنی دیر تک جنگ کرتا ہے جتنی دیر میں اونٹنی کا دودھ اترتا ہے تو ایسے شخص کے لیے جنت واجب ہو جاتی ہے۔“ [صحیح ابن حبان/كتاب السير/حدیث: 4618]

اردو ترجمہ · UrduUnverified translation

سیدنا فضالہ بن قیس انصاری رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”میں اس شخص کا ضامن ہوں جو مجھ پر ایمان لائے، اسلام قبول کرے اور ہجرت کرے (میں اس بات کا ضامن ہوں) کہ اسے جنت کے گوشے میں گھر ملے اور جنت کے درمیان میں گھر ملے گا، اور جو شخص مجھ پر ایمان لاتا ہے، اسلام قبول کرتا ہے اور اللہ کی راہ میں جہاد کرتا ہے، میں اس کے لیے اس بات کا ضامن ہوں کہ جنت کے ایک گوشے میں گھر ملے گا، جنت کے درمیان میں ایک گھر ملے گا اور جنت کے بالائی حصے میں گھر ملے گا، جو شخص ایسا کرتا ہے وہ بھلائی کے لیے مزید کسی طلب کو باقی نہیں رہنے دیتا اور برائی کے لیے بھاگنے کا راستہ باقی نہیں رہنے دیتا، اور پھر اس کی مرضی ہے وہ جہاں چاہے مر جائے۔“ (امام ابن حبان رحمہ اللہ فرماتے ہیں:) لفظ «الزَّعِيمُ» اہل مدینہ کے محاورے میں استعمال ہوتا ہے، لفظ «الْحَمِيلُ» اہل مصر کے محاورے میں استعمال ہوتا ہے اور لفظ «الْكَفِيلُ» اہل عراق کے محاورے میں استعمال ہوتا ہے، تو اس بات کا امکان موجود ہے کہ یہاں «الزَّعِيمُ» کی بجائے لفظ «الْحَمِيلُ» کا استعمال ابن وہب کے الفاظ ہوں جن کو اس روایت میں درج کر دیا گیا۔ [صحیح ابن حبان/كتاب السير/حدیث: 4619]

اردو ترجمہ · UrduUnverified translation

ابوعجفاء بن سلمی بیان کرتے ہیں کہ سیدنا عمر بن خطاب رضی اللہ عنہ نے ہمیں خطبہ دیتے ہوئے ارشاد فرمایا: خبردار! خواتین کے مہر میں غلو نہ کرو کیونکہ اگر یہ بات دنیا میں عزت افزائی کا باعث ہوتی، یا اللہ تعالیٰ کی بارگاہ میں پرہیزگاری کا باعث ہوتی، تو اس بارے میں تم میں سب سے زیادہ حق دار سیدنا محمد صلی اللہ علیہ وسلم ہوتے، لیکن نبی اکرم صلی اللہ علیہ وسلم نے اپنی ازواج میں سے اور اپنی صاحبزادیوں میں سے کسی بھی خاتون کا مہر بارہ اوقیہ سے زیادہ مقرر نہیں کیا، دوسری بات یہ ہے: جو شخص جنگ کے دوران مارا جاتا ہے تم کہتے ہو وہ شہید ہے، تم لوگ یہ بات نہ کہو بلکہ تم لوگ وہ بات کہو جو نبی اکرم صلی اللہ علیہ وسلم نے ارشاد فرمائی تھی، (راوی کو شک ہے شاید یہ الفاظ ہیں) سیدنا محمد صلی اللہ علیہ وسلم نے ارشاد فرمایا تھا: ”جو شخص اللہ کی راہ میں قتل ہو جائے (راوی کو شک ہے شاید یہ الفاظ ہیں) جو شخص اللہ کی راہ میں مر جائے وہ جنت میں ہو گا۔“ [صحیح ابن حبان/كتاب السير/حدیث: 4620]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ کی راہ میں جہاد کرنے والے کی مثال اس روزہ دار اور نوافل ادا کرنے والے کی مانند ہے جو کسی (نفلی) روزے کو ترک نہیں کرتا اور (نفل) نماز کو ترک نہیں کرتا جب تک وہ شخص (جہاد سے) واپس نہیں آ جاتا۔“ [صحیح ابن حبان/كتاب السير/حدیث: 4621]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ کی راہ میں جہاد کرنے والے کی مثال ایسے نفلی نماز پڑھنے والے روزہ دار کی مانند ہے جو اپنی نماز اور روزے میں کوئی وقفہ نہیں کرتا، یہاں تک کہ وہ مجاہد واپس آ جائے اور اس کے ہمراہ غنیمت اور اجر ہو یا پھر اللہ تعالیٰ اسے موت دے کر اسے جنت میں داخل کر دے۔“ [صحیح ابن حبان/كتاب السير/حدیث: 4622]

اردو ترجمہ · UrduUnverified translation

شرحبیل بن سمط بیان کرتے ہیں کہ ایک مرتبہ سیدنا سلمان رضی اللہ عنہ ان کے پاس سے گزرے جبکہ وہ اس وقت پہرہ داری کر رہے تھے۔ سیدنا سلمان رضی اللہ عنہ نے دریافت کیا: شرحبیل! تم یہاں کیا کر رہے ہو؟ شرحبیل نے جواب دیا: میں پہرہ دے رہا ہوں۔ سیدنا سلمان رضی اللہ عنہ نے فرمایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”ایک دن (راوی کو شک ہے شاید یہ الفاظ ہیں) ایک رات کی پہرہ داری ایک ماہ کے (نفلی) روزوں اور نوافل ادا کرنے سے زیادہ بہتر ہے۔“ [صحیح ابن حبان/كتاب السير/حدیث: 4623]

اردو ترجمہ · UrduUnverified translation

سیدنا فضالہ بن عبید رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ہر فوت ہونے والے شخص کے عمل پر مہر لگا دی جاتی ہے، ماسوائے اس شخص کے جو اللہ کی راہ میں پہرہ دیتے ہوئے انتقال کرتا ہے، اس شخص کا عمل قیامت کے دن تک بڑھتا رہتا ہے اور وہ شخص قبر کی آزمائش سے محفوظ رہتا ہے۔“ وہ بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”مجاہد شخص وہ ہے، جو اللہ تعالیٰ کی رضا کے لیے اپنی جان کے ہمراہ جہاد کرے۔“ [صحیح ابن حبان/كتاب السير/حدیث: 4624]

اردو ترجمہ · UrduUnverified translation

سیدنا سلمان رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص اللہ کی راہ میں پہرہ دیتے ہوئے انتقال کر جائے وہ قبر کے عذاب سے محفوظ رہتا ہے اور اس کا اجر قیامت کے دن تک بڑھتا رہتا ہے۔“ (امام ابن حبان رحمہ اللہ فرماتے ہیں:) نعمان نامی راوی نعمان بن منذر غسانی ہے اور یہ اہل دمشق سے تعلق رکھتا ہے۔ [صحیح ابن حبان/كتاب السير/حدیث: 4625]

اردو ترجمہ · UrduUnverified translation

شرحبیل بن سمط بیان کرتے ہیں کہ ایک مرتبہ سیدنا سلمان فارسی رضی اللہ عنہ ان کے پاس سے گزرے، وہ اس وقت پہرہ داری کے فرائض سر انجام دے رہے تھے، تو سیدنا سلمان فارسی رضی اللہ عنہ نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص پہرہ دیتے ہوئے انتقال کر جاتا ہے، اس کا عمل پہلے کی طرح مسلسل چلتا رہتا ہے اور اس شخص کو (قبر کی) آزمائشوں سے محفوظ رکھا جاتا ہے اور اسے (آخرت میں) رزق دیا جاتا ہے۔“ [صحیح ابن حبان/كتاب السير/حدیث: 4626]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں: لوگوں نے عرض کی: یا رسول اللہ صلی اللہ علیہ وسلم ! آپ ہمیں کسی ایسے عمل کے بارے میں بتائیں جو اللہ کی راہ میں جہاد کرنے کے برابر ہو؟ نبی اکرم صلی اللہ علیہ وسلم نے فرمایا: ”تم اس کی طاقت نہیں رکھ سکتے۔“ لوگوں نے عرض کی: یا رسول اللہ صلی اللہ علیہ وسلم ! آپ ہمیں بتائیں تو سہی، ہو سکتا ہے ہم اس کی طاقت رکھتے ہوں۔ نبی اکرم صلی اللہ علیہ وسلم نے ارشاد فرمایا: ”اللہ کی راہ میں جہاد کرنے والے کی مثال نوافل ادا کرنے والے ایسے روزہ دار کی مانند ہے جو اللہ تعالیٰ کی آیات کی تلاوت کرتا ہے اور وہ اپنے روزے میں اور صدقے میں کوئی وقفہ نہیں کرتا (اور وہ اتنی دیر تک مسلسل نوافل ادا کرتا رہتا ہے روزے رکھتا رہتا ہے) جب تک مجاہد اپنے گھر واپس نہیں آ جاتا۔“ [صحیح ابن حبان/كتاب السير/حدیث: 4627]

اردو ترجمہ · UrduUnverified translation

سیدنا عمر بن خطاب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص کسی مجاہد کے سر پر سایہ فراہم کرتا ہے اللہ تعالیٰ قیامت کے دن اسے سایہ نصیب کرے گا، جو شخص اللہ کی راہ میں جہاد کرنے والے شخص کو اس کے جہاد کے لیے سامان فراہم کرتا ہے تو اسے بھی اس شخص کی مانند اجر ملتا ہے، جو کوئی شخص مسجد تعمیر کرتا ہے جس میں اللہ کا ذکر کیا جائے تو اللہ تعالیٰ اس شخص کے لیے جنت میں گھر بنا دیتا ہے۔“ [صحیح ابن حبان/كتاب السير/حدیث: 4628]

اردو ترجمہ · UrduUnverified translation

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے بنو لحیان کی طرف یہ پیغام بھیجا کہ ”ان میں سے ہر دو آدمیوں میں سے ایک آدمی (جہاد کے لیے) روانہ ہو“ اور آپ صلی اللہ علیہ وسلم نے پیچھے رہ جانے والے شخص کے لیے یہ فرمایا: ”تم میں سے جو شخص جہاد میں جانے والے شخص کے اہل خانہ اور مال کے بارے میں ٹھیک طرح سے دیکھ بھال کرتا رہے گا اسے جہاد کے لیے جانے والے شخص کے اجر کے نصف کی مانند اجر ملے گا۔“ [صحیح ابن حبان/كتاب السير/حدیث: 4629]

اردو ترجمہ · UrduUnverified translation

سیدنا زید بن خالد جہنی رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص اللہ کی راہ میں جہاد کرنے والے کو سامان فراہم کرتا ہے یا اس کی غیر موجودگی میں اس کے گھر والوں کا خیال رکھتا ہے، تو اسے بھی اس مجاہد کی مانند اجر ملتا ہے، یہاں تک کہ جہاد کرنے والے کے اجر میں کوئی کمی نہیں ہوتی۔“ [صحیح ابن حبان/كتاب السير/حدیث: 4630]

اردو ترجمہ · UrduUnverified translation

سیدنا زید بن خالد جہنی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص اللہ کی راہ میں جہاد کرنے والے کو سامان فراہم کرتا ہے تو گویا اس نے بھی جہاد میں حصہ لیا اور جو شخص مجاہد کی غیر موجودگی میں اس کے گھر والوں کا خیال رکھتا ہے تو گویا اس نے بھی جہاد میں حصہ لیا۔“ [صحیح ابن حبان/كتاب السير/حدیث: 4631]

اردو ترجمہ · UrduUnverified translation

سیدنا زید بن خالد جہنی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص کسی مجاہد کو سامان فراہم کرتا ہے تو اسے بھی مجاہد کی مانند اجر ملتا ہے، اور جو شخص مجاہد کی غیر موجودگی میں اس کے گھر والوں کا خیال رکھتا ہے اسے بھی مجاہد کی مانند اجر ملتا ہے۔“ ابن شہاب بیان کرتے ہیں: بسر بن سعید نے مجھے یہ حدیث بیان کی ہے۔ [صحیح ابن حبان/كتاب السير/حدیث: 4632]

اردو ترجمہ · UrduUnverified translation

سیدنا زید بن خالد جہنی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص اللہ کی راہ میں جہاد کرنے والے شخص کو سامان فراہم کرتا ہے یا اس کی غیر موجودگی میں اس کے گھر والوں کا خیال رکھتا ہے تو اسے بھی مجاہد کی مانند اجر و ثواب ملتا ہے، البتہ مجاہد کے اجر و ثواب میں کوئی کمی نہیں ہوتی، اور اگر کوئی روزہ دار شخص کو افطاری کرواتا ہے تو اسے بھی روزہ دار کی مانند اجر ملتا ہے اور روزہ دار کے اجر میں کوئی کمی نہیں ہوتی۔“ [صحیح ابن حبان/كتاب السير/حدیث: 4633]

اردو ترجمہ · UrduUnverified translation

ابن بریدہ اپنے والد (سیدنا بریدہ رضی اللہ عنہ) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”مجاہدین کی خواتین کی حرمت پیچھے رہ جانے والوں کے لیے اسی طرح ہے جس طرح ان کی اپنی مائیں ہوتی ہیں اور پیچھے رہ جانے والوں میں سے جو بھی شخص کسی مجاہد کے ساتھ خیانت کرے گا تو اس شخص کو مجاہد کے سامنے رکھا جائے گا اور مجاہد سے کہا جائے گا: اے فلاں! یہ فلاں شخص ہے، تم اس کی نیکیوں میں سے جتنی چاہو حاصل کر لو۔“ (راوی بیان کرتے ہیں) پھر نبی اکرم صلی اللہ علیہ وسلم نے اپنے اصحاب کی طرف توجہ کی اور فرمایا: ”تمہارا کیا گمان ہے؟ میرا خیال ہے وہ اس کی نیکیوں میں سے کوئی بھی نیکی باقی نہیں رہنے دے گا۔“ [صحیح ابن حبان/كتاب السير/حدیث: 4634]

اردو ترجمہ · UrduUnverified translation

سلیمان بن بریدہ اپنے والد (رضی اللہ عنہ) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”مجاہدین کی خواتین کی پیچھے رہ جانے والوں کے لیے حرمت اسی طرح ہے جس طرح ان کی اپنی ماؤں کی حرمت ہوتی ہے اور پیچھے رہ جانے والا جو بھی شخص کسی مجاہد کی بیوی کے حوالے سے خیانت کرے تو اس شخص کو قیامت کے دن مجاہد کے سامنے پیش کر دیا جائے گا اور مجاہد سے کہا جائے گا: اس نے تمہاری غیر موجودگی میں تمہاری بیوی کے ساتھ خیانت کی تو تم اس کی نیکیوں کو حاصل کر لو۔“ [صحیح ابن حبان/كتاب السير/حدیث: 4635]

اردو ترجمہ · UrduUnverified translation

سیدنا ابوموسیٰ اشعری رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا اور عرض کی: ایک شخص حمیت کی خاطر لڑتا ہے، ایک شخص بہادری کے اظہار کے لیے لڑتا ہے اور ایک شخص دکھاوے کے لیے لڑتا ہے، تو ان میں سے کون سا شخص اللہ کی راہ میں شمار ہو گا؟ نبی اکرم صلی اللہ علیہ وسلم نے ارشاد فرمایا: ”جو شخص اس لیے جہاد میں حصہ لیتا ہے تاکہ اللہ تعالیٰ کا دین سربلند ہو، وہ اللہ کی راہ میں شمار ہو گا۔“ [صحیح ابن حبان/كتاب السير/حدیث: 4636]