Hadith 4326–4365

اردو ترجمہ · UrduUnverified translation

عمرہ بنت عبدالرحمن بیان کرتی ہیں کہ بریرہ رضی اللہ عنہا سیدہ عائشہ رضی اللہ عنہا سے مدد مانگنے کے لیے آئیں۔ سیدہ عائشہ رضی اللہ عنہا نے فرمایا کہ اگر تمہارے مالکان چاہیں تو میں انہیں ایک ہی مرتبہ میں ادائیگی کر دیتی ہوں اور پھر میں تمہیں آزاد کر دوں گی اور تمہاری ولاء کا حق مجھے حاصل ہو گا۔ بریرہ رضی اللہ عنہا نے اپنے مالکان کے سامنے اس کا تذکرہ کیا تو انہوں نے کہا: جی نہیں، ولاء کا حق ہمیں حاصل رہے گا۔ یحییٰ نامی راوی نے یہ بات بیان کی ہے اور عمرہ نامی خاتون نے یہ بات بیان کی ہے کہ سیدہ عائشہ رضی اللہ عنہا نے نبی اکرم صلی اللہ علیہ وسلم کے سامنے اس بات کا تذکرہ کیا تو نبی اکرم صلی اللہ علیہ وسلم نے ارشاد فرمایا: ”یہ چیز تمہیں اس بات سے نہ روکے، تم اسے خرید کر اسے آزاد کر دو، کیونکہ ولاء کا حق آزاد کرنے والے کو ملتا ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم سے منقول اوامر کی مختلف اقسام کے مجموعے کا یہ آخری حصہ ہے، ان اوامر کو ہم نے فصول اور ذیلی تقسیم کے تحت ذکر کیا ہے، اب اوامر میں سے کچھ احادیث باقی رہ گئی ہیں جنہیں ہم نے دیگر اقسام میں مختلف مقامات پر نقل کیا ہے کیونکہ وہ اس مقام کے ساتھ زیادہ مناسبت رکھتی ہیں، جس طرح ہم نے ان میں سے کچھ احادیث کو اوامر کے تحت بھی نقل کیا ہے تاکہ اس بارے میں مقصد حاصل ہو جائے، اس کے بعد ہم دوسری قسم املاء کروائیں گے جو نواہی سے تعلق رکھتی ہے، ہم اسے مختلف فصلوں اور ذیلی تقسیم کے تحت ذکر کریں گے جس طرح ہم نے اوامر کو املا کروایا تھا، اگر اللہ تعالیٰ نے یہ فیصلہ دیا اور یہ چاہا؛ اللہ تعالیٰ ہمیں ان لوگوں میں شامل کرے جو اللہ کے دین کے بارے میں حکم بیان کرتے ہوئے تکلف کرنے والوں کی نفسانی خواہشات سے لاتعلق رہتے ہیں اور نئے پیش آمدہ مسائل میں الٹی خواہشات اور منحوس آراء کی پیروی کرنے والوں کی رائے کے مطابق نہیں چلتے ہیں، بے شک وہ (یعنی اللہ تعالیٰ) سب سے بہتر مسئول ہے۔ [صحیح ابن حبان/كتاب العتق/حدیث: 4326]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے یہ بات ارشاد فرمائی: ”جو شخص اپنے آزاد کرنے والے کے علاوہ کسی اور کی طرف خود کو منسوب کرے، وہ جہنم میں اپنے مخصوص مقام پر پہنچنے کے لیے تیار رہے۔“ (امام ابن حبان رحمہ اللہ فرماتے ہیں:) حصن نامی راوی حصن بن عبدالرحمن تراغمی ہے، یہ اہل دمشق سے تعلق رکھتے ہیں اور یہ سلمہ بن عیار کے دادا ہیں، ان سے اس روایت کے علاوہ دو اور احادیث بھی منقول ہیں۔ [صحیح ابن حبان/كتاب العتق/حدیث: 4327]

اردو ترجمہ · UrduUnverified translation

سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم سے سوال کیا گیا کہ کون سے لوگ بہتر ہیں؟ تو نبی اکرم صلی اللہ علیہ وسلم نے فرمایا: ”میرے زمانے کے، پھر اس کے بعد والے، پھر اس کے بعد والے، پھر وہ لوگ آئیں گے کہ ان میں سے کسی کی گواہی قسم سے پہلے ہو گی اور قسم گواہی سے پہلے ہو گی (یعنی وہ جھوٹی قسمیں اٹھائیں گے اور جھوٹی گواہیاں دیں گے)۔“ [صحیح ابن حبان/كتاب الأيمان/حدیث: 4328]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ ایک دن نبی اکرم صلی اللہ علیہ وسلم کے سامنے کچھ بچے، کنیزیں اور انصار کے غلام آئے تو نبی اکرم صلی اللہ علیہ وسلم نے ارشاد فرمایا: ”اللہ کی قسم! میں تم لوگوں سے محبت کرتا ہوں۔“ [صحیح ابن حبان/كتاب الأيمان/حدیث: 4329]

اردو ترجمہ · UrduUnverified translation

سیدنا مستورد بن شداد رضی اللہ عنہ جو بنو فہر سے تعلق رکھتے ہیں بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اللہ کی قسم! آخرت کے مقابلے میں دنیا کی مثال بالکل اس طرح ہے جیسے کوئی شخص اپنی انگلی کو دریا میں ڈالے اور پھر اس بات کا جائزہ لے کہ وہ کس چیز کے ہمراہ واپس آئی ہے۔“ [صحیح ابن حبان/كتاب الأيمان/حدیث: 4330]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے مجھ سے فرمایا: ”یہ بات مجھ سے پوشیدہ نہیں رہتی جب تم مجھ سے ناراض ہوتی ہو اور جب تم مجھ سے راضی ہوتی ہو، جب تم ناراض ہوتی ہو تو یہ کہتی ہو سیدنا ابراہیم علیہ السلام کے پروردگار کی قسم اور جب تم راضی ہوتی ہو تو یہ کہتی ہو سیدنا محمد صلی اللہ علیہ وسلم کے پروردگار کی قسم۔“ تو میں نے کہا: آپ نے سچ کہا ہے لیکن میں تو صرف آپ کا نام لینا ترک کرتی ہوں۔ سیدہ عائشہ رضی اللہ عنہا بیان کرتی ہیں کہ میں نے عرض کی: یا رسول اللہ صلی اللہ علیہ وسلم ! اس بارے میں آپ صلی اللہ علیہ وسلم کی کیا رائے ہے؟ آپ صلی اللہ علیہ وسلم کسی ایسی وادی میں پڑاؤ کرتے ہیں جہاں بہت سے درخت ہوتے ہیں جن سے کھایا گیا ہوتا ہے اور وہاں آپ صلی اللہ علیہ وسلم کو ایک ایسا درخت ملتا ہے جس میں سے کچھ بھی نہ کھایا گیا ہو تو آپ صلی اللہ علیہ وسلم اپنے اونٹ کو کہاں چرائیں گے؟ نبی اکرم صلی اللہ علیہ وسلم نے فرمایا: ”اس درخت کے پاس جس میں سے کچھ نہ کھایا گیا ہو۔“ سیدہ عائشہ رضی اللہ عنہا کی مراد یہ تھی کہ نبی اکرم صلی اللہ علیہ وسلم نے ان کے علاوہ اور کسی کنواری خاتون کے ساتھ شادی نہیں کی تھی۔ [صحیح ابن حبان/كتاب الأيمان/حدیث: 4331]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم جب قسم اٹھاتے تھے تو یہ الفاظ استعمال کرتے تھے: «وَمُقَلِّبِ الْقُلُوبِ» ”دلوں کو پھیرنے والی ذات کی قسم۔“ [صحیح ابن حبان/كتاب الأيمان/حدیث: 4332]

اردو ترجمہ · UrduUnverified translation

ابراہیم صائغ بیان کرتے ہیں: میں نے عطاء سے لغو قسم کے بارے میں دریافت کیا، تو انہوں نے بتایا کہ سیدہ عائشہ رضی اللہ عنہا نے یہ بات بیان کی ہے کہ اللہ کے رسول صلی اللہ علیہ وسلم نے یہ بات ارشاد فرمائی ہے: ”اس سے مراد آدمی کا یہ کہنا ہے: ہرگز نہیں اللہ کی قسم! جی ہاں اللہ کی قسم۔“ [صحیح ابن حبان/كتاب الأيمان/حدیث: 4333]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”بے شک اللہ نے میری امت کی ہر اس چیز سے درگزر کیا ہے جو ان کے ذہن میں خیال آتا ہے جب تک وہ اس بارے میں کوئی بات نہ کریں یا اس پر عمل نہ کریں۔“ [صحیح ابن حبان/كتاب الأيمان/حدیث: 4334]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ نے میری امت کی ان چیزوں سے درگزر فرمایا ہے جو ان کے ذہن میں خیالات آتے ہیں، جب تک وہ اس بارے میں بات نہیں کرتے یا ان پر عمل نہیں کرتے۔“ [صحیح ابن حبان/كتاب الأيمان/حدیث: 4335]

اردو ترجمہ · UrduUnverified translation

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”سیدنا عیسیٰ بن مریم علیہ السلام نے ایک شخص کو دیکھا کہ اس نے چوری کی، سیدنا عیسیٰ علیہ السلام نے دریافت کیا: کیا تم نے چوری کی ہے؟ اس نے جواب دیا: جی نہیں، اس ذات کی قسم «لَا إِلَٰهَ إِلَّا هُوَ» ”جس کے علاوہ اور کوئی معبود نہیں ہے“ (میں نے چوری نہیں کی ہے) تو سیدنا عیسیٰ علیہ السلام نے کہا: میں اللہ تعالیٰ پر ایمان رکھتا ہوں اور میں اپنی آنکھوں کو غلط قرار دیتا ہوں۔“ [صحیح ابن حبان/كتاب الأيمان/حدیث: 4336]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”سیدنا سلیمان بن داؤد علیہما السلام نے یہ قسم اٹھائی کہ وہ اپنی ایک سو بیویوں کے پاس تشریف لے جائیں گے اور ان میں سے ہر ایک عورت ایسے لڑکے کو جنم دے گی جو اللہ کی راہ میں جہاد کرے گا۔“ نبی اکرم صلی اللہ علیہ وسلم فرماتے ہیں: ”تو ان میں سے صرف ایک خاتون نے نامکمل بچے کو جنم دیا۔“ نبی اکرم صلی اللہ علیہ وسلم ارشاد فرماتے ہیں: ”اگر وہ اس وقت «إِنْ شَاءَ اللّٰهُ» ”اگر اللہ نے چاہا“ کہہ دیتے تو اسی طرح ہونا تھا جس طرح انہوں نے بیان کیا تھا۔“ [صحیح ابن حبان/كتاب الأيمان/حدیث: 4337]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”سیدنا سلیمان بن داود علیہما السلام نے یہ قسم اٹھائی کہ وہ آج کی رات اپنی نوے بیویوں کے پاس جائیں گے اور ان میں سے ہر ایک خاتون ایک ایسے لڑکے کو جنم دے گی جو اللہ کی راہ میں جہاد کرے گا، تو ان کے ساتھی نے (راوی کو شک ہے شاید یہ الفاظ ہیں) فرشتے نے ان سے کہا: آپ «إِنْ شَاءَ اللّٰهُ» ”اگر اللہ نے چاہا“ کہہ دیجیے، لیکن وہ یہ کہنا بھول گئے، وہ اس رات اپنی نوے بیویوں کے پاس تشریف لے گئے لیکن ان میں سے صرف ایک بیوی نے نامکمل بچے کو جنم دیا۔ نبی اکرم صلی اللہ علیہ وسلم ارشاد فرماتے ہیں: اگر وہ «إِنْ شَاءَ اللّٰهُ» ”اگر اللہ نے چاہا“ کہہ دیتے تو وہ حانث نہ ہوتے اور ان کی خواہش بھی پوری ہو جاتی۔“ [صحیح ابن حبان/كتاب الأيمان/حدیث: 4338]

اردو ترجمہ · UrduUnverified translation

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص قسم اٹھاتے ہوئے «إِنْ شَاءَ اللّٰهُ» ”ان شاء اللہ“ کہہ دے تو وہ استثناء کر لیتا ہے۔“ [صحیح ابن حبان/كتاب الأيمان/حدیث: 4339]

اردو ترجمہ · UrduUnverified translation

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص قسم اٹھائے اور «إِنْ شَاءَ اللّٰهُ» ”ان شاء اللہ“ کہہ دے، وہ حانث نہیں ہوتا۔“ [صحیح ابن حبان/كتاب الأيمان/حدیث: 4340]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص حلف اٹھائے اور «إِنْ شَاءَ اللَّهُ» ”ان شاء اللہ“ کہہ دے تو اس نے استثناء کر لیا۔“ [صحیح ابن حبان/كتاب الأيمان/حدیث: 4341]

اردو ترجمہ · UrduUnverified translation

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص قسم اٹھائے اور استثناء کر لے، تو اسے اختیار ہوگا، اگر چاہے تو اسے برقرار رکھے اور اگر چاہے تو حانث ہوئے بغیر اسے ترک کر دے۔“ [صحیح ابن حبان/كتاب الأيمان/حدیث: 4342]

اردو ترجمہ · UrduUnverified translation

سیدنا عبداللہ بن عباس رضی اللہ عنہما سے روایت ہے کہ نبی اکرم صلی اللہ علیہ وسلم نے ارشاد فرمایا: ”اللہ کی قسم! میں قریش کے ساتھ ضرور لڑائی کروں گا، اللہ کی قسم! میں قریش کے ساتھ ضرور لڑائی کروں گا، اللہ کی قسم! میں قریش کے ساتھ ضرور لڑائی کروں گا۔“ پھر نبی اکرم صلی اللہ علیہ وسلم کچھ دیر خاموش رہے، پھر آپ صلی اللہ علیہ وسلم نے فرمایا: ”اگر اللہ نے چاہا۔“ [صحیح ابن حبان/كتاب الأيمان/حدیث: 4343]

اردو ترجمہ · UrduUnverified translation

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص اپنے غلام کے بارے میں یہ قسم اٹھائے کہ وہ اس کی پٹائی کرے گا تو اس کا کفارہ یہ ہے: وہ اس عمل کو ترک کر دے اور کفارے کے ہمراہ یہ نیکی بھی ہے۔“ [صحیح ابن حبان/كتاب الأيمان/حدیث: 4344]

اردو ترجمہ · UrduUnverified translation

سیدنا عدی بن حاتم رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص کوئی قسم اٹھائے اور اس کے برخلاف کام کو اس سے زیادہ بہتر سمجھے تو اسے وہ کام کرنا چاہیے جو زیادہ بہتر ہے اور اپنی قسم کو ترک کر دینا چاہیے۔“ [صحیح ابن حبان/كتاب الأيمان/حدیث: 4345]

اردو ترجمہ · UrduUnverified translation

سیدنا عدی بن حاتم رضی اللہ عنہ بیان کرتے ہیں کہ ایک شخص ان کے پاس آیا اور ان سے خرچ کا مطالبہ کیا، تو انہوں نے فرمایا: میرے پاس تمہیں دینے کے لیے کچھ نہیں ہے، صرف یہ زرہ ہے اور یہ خود ہے، میں اپنے گھر والوں کی طرف کاغذ لکھ دیتا ہوں کہ وہ تمہیں کچھ دے دیں، وہ شخص اس بات پر راضی نہیں ہوا تو سیدنا عدی رضی اللہ عنہ نے یہ قسم اٹھائی کہ وہ اسے کچھ نہیں دیں گے، پھر وہ شخص اس بات پر راضی ہو گیا تو سیدنا عدی رضی اللہ عنہ نے فرمایا: اگر میں نے نبی اکرم صلی اللہ علیہ وسلم کو یہ بات ارشاد فرماتے ہوئے نہ سنا ہوتا: ”جو شخص کوئی قسم اٹھائے اور پھر وہ (اس کے برخلاف صورت حال کو) دیکھے کہ وہ اس کے مقابلے میں اللہ تعالیٰ کی پرہیزگاری کے زیادہ قریب ہے، تو اسے وہ کام کرنا چاہیے جو پرہیزگاری والا ہو۔“ (سیدنا عدی رضی اللہ عنہ فرماتے ہیں: اگر یہ حدیث نہ ہوتی) تو میں اپنی قسم نہ توڑتا۔ [صحیح ابن حبان/كتاب الأيمان/حدیث: 4346]

اردو ترجمہ · UrduUnverified translation

سیدنا عبداللہ بن عمرو رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص کوئی قسم اٹھائے اور اس کے برخلاف کام کو اس سے زیادہ بہتر دیکھے، تو اسے وہ کام کرنا چاہیے جو زیادہ بہتر ہے اور اپنی قسم کا کفارہ دے دینا چاہیے۔“ [صحیح ابن حبان/كتاب الأيمان/حدیث: 4347]

اردو ترجمہ · UrduUnverified translation

سیدنا عبدالرحمن بن سمرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے عبدالرحمن! تم حکومتی عہدے کا سوال نہ کرنا کیونکہ اگر یہ تمہیں مانگنے سے ملے گا تو تمہیں اس کے حوالے کر دیا جائے گا اور اگر یہ تمہیں مانگے بغیر مل جائے گا تو اس بارے میں تمہاری مدد کی جائے گی اور جب تم کسی قسم کے بارے میں حلف اٹھا لو اور تم اس کے علاوہ دوسری صورت کو اس سے زیادہ بہتر پاؤ تو وہ کام کرو جو زیادہ بہتر ہے اور اپنی قسم کا کفارہ دے دو۔“ [صحیح ابن حبان/كتاب الأيمان/حدیث: 4348]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص کوئی قسم اٹھائے اور پھر اس کے علاوہ کام کو اس سے زیادہ بہتر محسوس کرے تو اسے اپنی قسم کا کفارہ دے دینا چاہیے اور وہ کام کرنا چاہیے جو زیادہ بہتر ہے۔“ [صحیح ابن حبان/كتاب الأيمان/حدیث: 4349]

اردو ترجمہ · UrduUnverified translation

سیدنا عبدالرحمن بن ابوبکر رضی اللہ عنہما بیان کرتے ہیں: ایک مرتبہ ہمارے ہاں کچھ مہمان آ گئے، میرے والد نماز کے وقت (عشاء کے بعد دیر تک) نبی اکرم صلی اللہ علیہ وسلم کے ساتھ بات چیت کیا کرتے تھے، جب وہ (نبی اکرم صلی اللہ علیہ وسلم کی خدمت میں) جانے لگے تو انہوں نے فرمایا: اے عبدالرحمٰن! مہمانوں کو کھانا کھلا دینا۔ جب شام ہوئی تو میں کھانا لے کر ان کے پاس آیا تو انہوں نے کھانا کھانے سے انکار کر دیا اور یہ کہا: جب تک تمہارے والد گھر واپس نہیں آتے اور ہمارے ساتھ کھانا نہیں کھاتے (ہم اس وقت تک کھانا نہیں کھائیں گے)۔ میں نے کہا: وہ غصے والے آدمی ہیں، اگر آپ لوگوں نے کھانا نہ کھایا تو مجھے یہ اندیشہ ہے وہ میری پٹائی کریں گے، لیکن مہمانوں نے یہ بات نہیں مانی۔ جب سیدنا ابوبکر رضی اللہ عنہ واپس تشریف لائے تو انہوں نے دریافت کیا: آپ لوگوں نے کھانا کھا لیا ہے؟ مہمانوں نے جواب دیا: جی نہیں، اللہ کی قسم! (ہم نے کھانا نہیں کھایا)۔ سیدنا ابوبکر رضی اللہ عنہ نے فرمایا: کیا میں نے عبدالرحمن کو یہ ہدایت نہیں کی تھی (کہ وہ آپ کو کھانا کھلا دے)؟ سیدنا عبدالرحمٰن رضی اللہ عنہما بیان کرتے ہیں: میں ایک طرف ہٹ چکا تھا، انہوں نے (بلند آواز میں) کہا: میں تمہیں قسم دیتا ہوں کہ اگر تم میری آواز سن رہے ہو تو آ جاؤ، تو میں آگیا۔ میں نے کہا: اللہ کی قسم! میرا کوئی قصور نہیں ہے، یہ آپ کے مہمان موجود ہیں، آپ ان سے دریافت کر لیں، میں ان کے پاس کھانا لے کر آیا تھا، لیکن انہوں نے اس وقت تک کھانے سے انکار کر دیا جب تک آپ نہیں آ جاتے۔ تو سیدنا ابوبکر رضی اللہ عنہ نے دریافت کیا: کیا وجہ ہے آپ لوگوں نے کھانا کیوں قبول نہیں کیا۔ سیدنا ابوبکر رضی اللہ عنہ نے یہ کہہ دیا: اللہ کی قسم! آج رات میں کھانا نہیں کھاؤں گا۔ مہمانوں نے کہا: اللہ کی قسم! ہم بھی اس وقت تک کھانا نہیں کھائیں گے جب تک آپ نہیں کھائیں گے۔ تو سیدنا ابوبکر رضی اللہ عنہ نے فرمایا: میں نے آج رات جیسی مشکل صورت کبھی نہیں دیکھی، پھر سیدنا ابوبکر رضی اللہ عنہ نے فرمایا: جہاں تک پہلی قسم کا تعلق ہے تو وہ شیطان کی طرف سے ہو گئی۔ آپ لوگ کھانے کی طرف آئیں، پھر کھانا لایا گیا، سیدنا ابوبکر رضی اللہ عنہ نے «بِسْمِ اللّٰهِ» ”اللہ کے نام سے“ پڑھی اور کھانا کھا لیا، مہمانوں نے بھی کھانا کھا لیا۔ اگلے دن سیدنا ابوبکر رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: یا رسول اللہ صلی اللہ علیہ وسلم ! ان لوگوں نے تو نیکی کر لی اور میں حانث ہو گیا، تو نبی اکرم صلی اللہ علیہ وسلم نے ارشاد فرمایا: ”تم ان سب سے زیادہ نیک اور ان سب سے بہتر ہو۔“ [صحیح ابن حبان/كتاب الأيمان/حدیث: 4350]

اردو ترجمہ · UrduUnverified translation

سیدنا عمران بن حصین رضی اللہ عنہ بیان کرتے ہیں کہ سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے تاکہ اپنی قوم سے تعلق رکھنے والے کچھ لوگوں کے لیے سواری کے جانور حاصل کریں، نبی اکرم صلی اللہ علیہ وسلم نے ارشاد فرمایا: ”اللہ کی قسم! میں ان لوگوں کو سواری فراہم نہیں کروں گا“، پھر نبی اکرم صلی اللہ علیہ وسلم کی خدمت میں کچھ اونٹ لائے گئے، آپ صلی اللہ علیہ وسلم نے انہیں الگ الگ کروایا، ان میں سے پندرہ اونٹ باقی رہ گئے، آپ صلی اللہ علیہ وسلم نے دریافت فرمایا: ”عبداللہ بن قیس کہاں ہے؟“ انہوں نے جواب دیا: وہ یہاں ہے، نبی اکرم صلی اللہ علیہ وسلم نے فرمایا: ”تم انہیں حاصل کر لو اور ان پر اپنی قوم کے افراد کو سوار کرواؤ“، انہوں نے عرض کی: یا رسول اللہ صلی اللہ علیہ وسلم ! آپ نے تو قسم اٹھائی تھی (کہ آپ صلی اللہ علیہ وسلم ہمیں سواری کے لیے جانور نہیں دیں گے)، نبی اکرم صلی اللہ علیہ وسلم نے فرمایا: ”اگرچہ میں نے قسم اٹھائی تھی (لیکن تم پھر بھی اسے حاصل کر لو)“۔ [صحیح ابن حبان/كتاب الأيمان/حدیث: 4351]

اردو ترجمہ · UrduUnverified translation

سیدنا عبداللہ بن عمرو رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص کوئی قسم اٹھائے اور پھر اس کے علاوہ کام کو اس سے زیادہ بہتر سمجھے تو اسے وہ کام کرنا چاہیے جو بہتر ہو اور اپنی قسم کا کفارہ دے دینا چاہیے۔“ [صحیح ابن حبان/كتاب الأيمان/حدیث: 4352]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب کوئی قسم اٹھاتے تھے تو آپ صلی اللہ علیہ وسلم اس کے برخلاف نہیں کیا کرتے تھے، یہاں تک کہ قسم کے کفارے سے متعلق آیت نازل ہو گئی، تو نبی اکرم صلی اللہ علیہ وسلم نے ارشاد فرمایا: ”اب میں جو بھی قسم اٹھاؤں گا اور اس کے علاوہ صورت کو زیادہ بہتر سمجھوں گا، تو میں وہ کام کروں گا جو زیادہ بہتر ہے اور اپنی قسم کا کفارہ دے دوں گا۔“ [صحیح ابن حبان/كتاب الأيمان/حدیث: 4353]

اردو ترجمہ · UrduUnverified translation

سیدنا ابوموسیٰ اشعری رضی اللہ عنہ بیان کرتے ہیں کہ ہم لوگ پیدل تھے، ہم نبی اکرم صلی اللہ علیہ وسلم کی خدمت میں سواری کے لیے جانور مانگنے کے لیے حاضر ہوئے تو نبی اکرم صلی اللہ علیہ وسلم نے ارشاد فرمایا: ”اللہ کی قسم! آج میں تمہیں سواری کے لیے جانور نہیں دوں گا“ (راوی کو شک ہے شاید یہ الفاظ ہیں) ”اللہ کی قسم! میں تمہیں سواری کے لیے جانور نہیں دوں گا۔“ راوی بیان کرتے ہیں کہ جب ہم اپنی رہائشی جگہ پر واپس آ گئے (راوی کو شک ہے شاید یہ الفاظ ہیں) جب ہم اپنی رہائشی جگہ کی طرف واپس آنے لگے تو اس وقت نبی اکرم صلی اللہ علیہ وسلم کی خدمت میں کچھ اونٹ لائے گئے۔ نبی اکرم صلی اللہ علیہ وسلم نے ان میں سے سفید کوہان والے تین اونٹ ہماری طرف بھجوا دیئے، ہم میں سے کسی ایک نے دوسرے سے کہا: کیا ہم اس پر سوار ہوں جب کہ نبی اکرم صلی اللہ علیہ وسلم یہ قسم اٹھا چکے ہیں (کہ آپ صلی اللہ علیہ وسلم ہمیں سواری کے لیے اونٹ نہیں دیں گے)؟ تو ہم نبی اکرم صلی اللہ علیہ وسلم کی خدمت میں حاضر ہوئے، ہم نے عرض کی: اے اللہ کے نبی! آپ صلی اللہ علیہ وسلم نے تو قسم اٹھائی ہوئی ہے، نبی اکرم صلی اللہ علیہ وسلم نے فرمایا: ”اللہ کی قسم! میں نے تمہیں سواری کے لیے اونٹ نہیں دیئے بلکہ اللہ تعالیٰ نے تمہیں سواری کے لیے جانور دیئے ہیں، روئے زمین پر میں جو بھی قسم اٹھاؤں اور پھر اس کے علاوہ صورت حال کو اس سے بہتر سمجھوں گا تو میں وہ کام کروں گا (جو زیادہ بہتر ہو)“ یہاں ایک لفظ کے بارے میں راوی کو شک ہے۔ [صحیح ابن حبان/كتاب الأيمان/حدیث: 4354]

اردو ترجمہ · UrduUnverified translation

سعید بن مسیّب رحمہ اللہ بیان کرتے ہیں کہ انصار سے تعلق رکھنے والے دو بھائی تھے جن کے درمیان وراثت سے متعلق کوئی مسئلہ تھا، ان میں سے ایک نے دوسرے سے تقسیم کا مطالبہ کیا تو اس نے کہا: اگر تم نے دوبارہ مجھ سے تقسیم کا مطالبہ کیا، تو میں تمہارے ساتھ کبھی بات چیت نہیں کروں گا اور یہ سارا مال خانہ کعبہ کے خزانے کے لیے مخصوص ہو جائے گا، تو سیدنا عمر بن خطاب رضی اللہ عنہ نے فرمایا: بے شک خانہ کعبہ تمہارے مال سے بے نیاز ہے، تم اپنی قسم کا کفارہ دو اور اپنے بھائی کے ساتھ بات چیت کرو کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”کسی گناہ کے کام میں، رشتے داری کے حقوق کی پامالی کے حوالے سے اور جو چیز تمہاری ملکیت میں نہ ہو اس کے بارے میں نہ تو تم پر کوئی قسم لازم ہو گی اور نہ ہی نذر لازم ہو گی۔“ [صحیح ابن حبان/كتاب الأيمان/حدیث: 4355]

اردو ترجمہ · UrduUnverified translation

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”قسم یا تو توڑنی پڑتی ہے یا پھر ندامت کا شکار کرتی ہے۔“ (امام ابن حبان رحمہ اللہ فرماتے ہیں:) بشار نامی راوی کے حوالے سے اس روایت کے علاوہ کوئی اور ”مرفوع“ حدیث منقول نہیں ہے، یہ صاحب مسعر بن کدام کے بھائی ہیں، ابوشعشاء نامی راوی کا نام علی بن حصین بن سلیمان واسطی ہے، یہ راوی ثقہ ہے۔ [صحیح ابن حبان/كتاب الأيمان/حدیث: 4356]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اپنے باپ دادا یا ماؤں کے نام کی یا اپنے بتوں کے نام کی قسم نہ اٹھاؤ، تم لوگ صرف اللہ کے نام کی قسم اٹھاؤ اور تم اسی وقت قسم اٹھاؤ جب تم سچے ہو۔“ [صحیح ابن حبان/كتاب الأيمان/حدیث: 4357]

اردو ترجمہ · UrduUnverified translation

سعد بن عبیدہ بیان کرتے ہیں کہ میں سیدنا عبداللہ بن عمر رضی اللہ عنہما کے پاس موجود تھا، ایک شخص نے خانہ کعبہ کے نام کی قسم اٹھائی تو سیدنا عبداللہ بن عمر رضی اللہ عنہما نے فرمایا: تمہارا ستیاناس ہو، تم ایسا نہ کرو، کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص اللہ تعالیٰ کے علاوہ کسی اور کے نام کی قسم اٹھاتا ہے وہ (گویا) شرک کا مرتکب ہوتا ہے۔“ [صحیح ابن حبان/كتاب الأيمان/حدیث: 4358]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سیدنا عمر بن خطاب رضی اللہ عنہ کو اپنے والد کے نام کی قسم اٹھاتے ہوئے پایا تو ارشاد فرمایا: ”بے شک اللہ تعالیٰ نے تم لوگوں کو اس بات سے منع کیا ہے کہ تم اپنے باپ دادا کے نام کی قسم اٹھاؤ، جس شخص نے قسم اٹھانی ہو وہ اللہ کے نام کی قسم اٹھائے ورنہ خاموش رہے۔“ [صحیح ابن حبان/كتاب الأيمان/حدیث: 4359]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں: ایک مرتبہ نبی اکرم صلی اللہ علیہ وسلم نے سیدنا عمر بن خطاب رضی اللہ عنہ کو ایسی صورت میں پایا کہ وہ کچھ سواروں کے درمیان چل رہے تھے اور اپنے والد کے نام کی قسم اٹھا رہے تھے، تو نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے تم لوگوں کو اس بات سے منع کیا ہے تم اپنے باپ دادا کے نام کی قسم اٹھاؤ، جس شخص نے قسم اٹھانی ہو وہ اللہ کے نام کی قسم اٹھائے یا پھر خاموش رہے۔“ [صحیح ابن حبان/كتاب الأيمان/حدیث: 4360]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سیدنا عمر بن خطاب رضی اللہ عنہ کو اپنے والد کے نام کی قسم اٹھاتے ہوئے پایا تو نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے تمہیں اس بات سے منع کیا ہے کہ تم لوگ اپنے باپ دادا کے نام کی قسم اٹھاؤ، قسم اٹھانے والے کو اللہ کے نام کی قسم اٹھانی چاہیے ورنہ خاموش رہنا چاہیے۔“ [صحیح ابن حبان/كتاب الأيمان/حدیث: 4361]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”جس شخص نے قسم اٹھانی ہو وہ صرف اللہ کے نام کی قسم اٹھائے۔“ قریش اپنے باپ دادا کے نام کی قسم اٹھایا کرتے تھے، تو نبی اکرم صلی اللہ علیہ وسلم نے فرمایا: ”تم اپنے باپ دادا کے نام کی قسم نہ اٹھاؤ۔“ [صحیح ابن حبان/كتاب الأيمان/حدیث: 4362]

اردو ترجمہ · UrduUnverified translation

ابن بریدہ اپنے والد رضی اللہ عنہ کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: ”جو شخص کسی دوسرے کی بیوی یا غلام کو خراب کرے وہ ہم میں سے نہیں ہے اور جو شخص امانت کی قسم اٹھائے وہ ہم میں سے نہیں ہے۔“ ابن بریدہ نامی راوی عبداللہ بن بریدہ بن حصیب ہیں۔ [صحیح ابن حبان/كتاب الأيمان/حدیث: 4363]

اردو ترجمہ · UrduUnverified translation

مصعب بن سعد اپنے والد (سیدنا سعد بن ابی وقاص رضی اللہ عنہ) کا یہ بیان نقل کرتے ہیں: میں نے لات اور عزیٰ کی قسم اٹھائی تو میرے ساتھیوں نے کہا: تم نے غلط بات کہی ہے، میں نبی اکرم صلی اللہ علیہ وسلم کی خدمت میں حاضر ہوا، میں نے عرض کی: یا رسول اللہ صلی اللہ علیہ وسلم ! ہم زمانہ جاہلیت سے قریب ہیں، میں نے لات اور عزیٰ کی قسم اٹھا لی ہے، تو نبی اکرم صلی اللہ علیہ وسلم نے ارشاد فرمایا: ”تم تین مرتبہ یہ کہو «لَا إِلٰهَ إِلَّا اللّٰهُ وَحْدَهُ» ”اللہ تعالیٰ کے علاوہ کوئی معبود نہیں ہے وہی ایک معبود ہے“ پھر تم اپنے بائیں طرف تین مرتبہ تھوکو اور «أَعُوذُ بِاللّٰهِ مِنَ الشَّيْطَانِ الرَّجِيمِ» ”مردود شیطان سے اللہ کی پناہ مانگو“ اور دوبارہ ایسا نہ کرنا۔“ [صحیح ابن حبان/كتاب الأيمان/حدیث: 4364]

اردو ترجمہ · UrduUnverified translation

مصعب بن سعد بن ابی وقاص اپنے والد (سعد بن ابی وقاص رضی اللہ عنہ) کا یہ بیان نقل کرتے ہیں: میں نے لات اور عزیٰ کی قسم اٹھائی تو میرے ساتھیوں نے مجھ سے کہا: تم نے بہت غلط بات کہی ہے، میں نبی اکرم صلی اللہ علیہ وسلم کی خدمت میں حاضر ہوا، میں نے عرض کی: زمانہ جاہلیت قریب ہی ہے، میں نے (غلطی سے) لات اور عزیٰ کی قسم اٹھا لی ہے، تو نبی اکرم صلی اللہ علیہ وسلم نے مجھ سے یہ فرمایا: ”تم تین مرتبہ یہ پڑھو: «لَا إِلٰهَ إِلَّا اللّٰهُ وَحْدَهُ» ”اللہ تعالیٰ کے علاوہ اور کوئی معبود نہیں ہے وہ ہی ایک معبود ہے“ تم اپنے بائیں طرف تین مرتبہ تھوکو، پھونک مارو اور شیطان سے اللہ تعالیٰ کی پناہ مانگو اور دوبارہ ایسا نہ کرنا۔“ [صحیح ابن حبان/كتاب الأيمان/حدیث: 4365]