Hadith 4212–4251

اردو ترجمہ · UrduUnverified translation

امام زہری نے سعید بن مسیّب، عروہ بن زبیر، علقمہ بن وقاص اور عبیداللہ بن عبداللہ کے حوالے سے سیدہ عائشہ رضی اللہ عنہا سے یہ روایت نقل کی ہے جس میں سیدہ عائشہ رضی اللہ عنہا پر جھوٹا الزام لگایا گیا تھا اور اللہ تعالیٰ نے سیدہ عائشہ رضی اللہ عنہا کو اس سے بری قرار دیا تھا، (ابن شہاب کہتے ہیں) ان تمام حضرات نے مجھے یہ حدیث سنائی تھی، کسی نے اس حدیث کے زیادہ الفاظ کو محفوظ رکھا اور کسی نے اس کو مختصر طور پر نقل کیا، میں نے اس تمام حدیث کو محفوظ کر لیا جو انہوں نے مجھے بیان کی تھی اور ان میں سے ایک کا بیان دوسرے کی تصدیق کرتا تھا، ان لوگوں نے یہ روایت ذکر کی۔ سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم کی عادت شریفہ تھی کہ جب آپ کسی سفر کے لیے تشریف لے جاتے تھے تو اپنی ازواج کے درمیان قرعہ اندازی کیا کرتے تھے، ان میں سے جس کا نام نکل آتا تھا آپ صلی اللہ علیہ وسلم اس خاتون کو اپنے ساتھ لے جایا کرتے تھے۔ سیدہ عائشہ رضی اللہ عنہا بیان کرتی ہیں: ایک مرتبہ نبی اکرم صلی اللہ علیہ وسلم نے کسی غزوہ کے لیے سفر کرنے سے پہلے ہمارے درمیان قرعہ اندازی کی تو میرا نام نکل آیا، ہم لوگ نبی اکرم صلی اللہ علیہ وسلم کے ہمراہ روانہ ہو گئے، یہ حجاب کا حکم نازل ہو جانے کے بعد کی بات ہے، مجھے ہودج میں ٹھهرایا گیا اور سفر کے دوران جب ہم پڑاؤ کرتے تھے تو وہ اس میں رہتی تھیں، یہاں تک کہ جب نبی اکرم صلی اللہ علیہ وسلم اس غزوہ سے فارغ ہوئے اور آپ صلی اللہ علیہ وسلم واپس تشریف لائے اور ہم مدینہ منورہ کے قریب پہنچے تو (ایک پڑاؤ کے دوران) نبی اکرم صلی اللہ علیہ وسلم نے رات کے وقت روانگی کا اعلان کر دیا، جب لوگوں نے روانگی کی تیاری کی اس وقت میں اٹھی اور چلتی ہوئی لشکر سے پرے چلی گئی، میں نے اپنی حاجت کو پورا کیا، جب میں واپس آئی اور میں نے اپنے سینے کو ہاتھ لگایا تو پتھروں سے بنا ہوا ہار کہیں گر چکا تھا، میں واپس آئی میں نے اپنے ہار کو تلاش کیا، اس کی تلاش میں میں وہیں رکی رہی، وہ لوگ آئے جو نبی اکرم صلی اللہ علیہ وسلم کے لیے (روانگی کے وقت ساز و سامان وغیرہ) اٹھاتے تھے، انہوں نے میرے ہودج کو اٹھایا اور اسے اٹھا کر اس اونٹ پر رکھ دیا جس پر میں سوار ہوا کرتی تھی، وہ یہ سمجھے کہ میں اس کے اندر موجود ہوں۔ سیدہ عائشہ رضی اللہ عنہا بیان کرتی ہیں: ان دنوں خواتین ہلکی پھلکی ہوتی تھیں انہیں گوشت نے ڈھانپا نہیں ہوتا تھا، ان لوگوں نے اسے اٹھایا اور اسے اونٹ پر رکھ دیا، جب وہ لوگ اس سے فارغ ہوئے تو لشکر روانہ ہو گیا، لشکر کے روانہ ہو جانے کے بعد مجھے اپنا ہار مل گیا، میں پڑاؤ کی جگہ پر آئی تو وہاں نہ کوئی بلانے والا تھا اور نہ کوئی جواب دینے والا تھا، میں اسی جگہ پر ٹھہر گئی جہاں میں پہلے موجود تھی، میں وہاں بیٹھی ہوئی تھی اسی دوران میری آنکھ لگ گئی اور میں سو گئی۔ سیدنا صفوان بن معطل سلمی رضی اللہ عنہ نے رات کے وقت پڑاؤ کیا تھا، وہ صبح کے وقت چلتے ہوئے میری رہائشی جگہ کے پاس آ گئے، انہوں نے کسی انسان کا ہیولا دیکھا تو (میری طرف آئے) جب انہوں نے مجھے دیکھا تو مجھے پہچان گئے کیونکہ وہ حجاب کا حکم نازل ہونے سے پہلے مجھے دیکھ چکے تھے، ان کے «إِنَّا لِلَّهِ وَإِنَّا إِلَيْهِ رَاجِعُونَ» ”ہم اللہ ہی کے لیے ہیں اور اسی کی طرف لوٹنے والے ہیں“ پڑھنے پر میں بیدار ہو گئی جو انہوں نے مجھے پہچان کر پڑھا تھا، میں نے اپنی چادر کے ذریعے اپنے چہرے کو ڈھانپ لیا، اللہ کی قسم! نہ تو انہوں نے میرے ساتھ کوئی بات کی اور نہ ہی میں نے ان کی زبانی «إِنَّا لِلَّهِ وَإِنَّا إِلَيْهِ رَاجِعُونَ» ”ہم اللہ ہی کے لیے ہیں اور اسی کی طرف لوٹنے والے ہیں“ کے علاوہ کوئی کلمہ سنا۔ انہوں نے اپنی سواری کو بٹھایا اور میں اس پر سوار ہو گئی پھر وہ اس سواری کو لے کر چل پڑے یہاں تک کہ ہم لشکر کے پاس آ گئے اس وقت جب انہوں نے دن چڑھ جانے کے بعد پڑاؤ کیا ہوا تھا۔ تو میرے اس واقعے کے حوالے سے کچھ لوگ ہلاکت کا شکار ہوئے اور ان میں سب سے زیادہ حصہ لینے والا شخص عبداللہ بن ابی بن سلول تھا۔ (سیدہ عائشہ رضی اللہ عنہا بیان کرتی ہیں:) میں مدینہ منورہ آ گئی، مدینہ منورہ آنے کے بعد میں ایک ماہ تک بیمار رہی، لوگ جھوٹا الزام لگانے والوں کے بارے میں جو بات چیت کر رہے تھے مجھے اس میں سے کسی بھی چیز کا علم نہیں تھا۔ نبی اکرم صلی اللہ علیہ وسلم کے حوالے سے مجھے کچھ الجھن ہوتی تھی، کیونکہ آپ صلی اللہ علیہ وسلم میرا اس طرح سے خیال نہیں رکھ رہے تھے جس طرح پہلے میری بیماری کے دوران آپ صلی اللہ علیہ وسلم میرا خیال رکھا کرتے تھے، آپ صلی اللہ علیہ وسلم میرے ہاں تشریف لاتے تھے اور دریافت کرتے تھے: ”تمہارا کیا حال ہے؟“ یہ چیز مجھے شک میں مبتلا کرتی تھی، لیکن مجھے حقیقت کا پتہ نہیں تھا، اپنی بیماری کی وجہ سے نقاہت کا شکار ہونے کے بعد ایک مرتبہ میں گھر سے (قضائے حاجت کے لیے) نکلی، میرے ساتھ ام مسطح تھیں، ہم مناصع (کھلے میدان) کی طرف گئے جو ہمارے قضائے حاجت کرنے کی جگہ تھی، ہم (خواتین) صرف رات کے وقت ہی وہاں جایا کرتی تھیں، اس کی وجہ یہ ہے: ہم لوگ اس چیز کو ناپسند کرتے تھے کہ بیت الخلاء گھر کے قریب موجود ہو، ہمارا معاملہ پہلے زمانے کے عربوں کے معاملے کی طرح تھا کہ ہم ان کی طرح (کھلی جگہوں پر جا کر) قضائے حاجت کیا کرتے تھے اور گھر کے قریب بیت الخلاء موجود ہونے سے ہمیں اذیت محسوس ہوتی تھی، میں جا رہی تھی میرے ساتھ ام مسطح تھیں، وہ ابورہم بن مطلب بن عبدمناف کی صاحبزادی تھیں، ان کی والدہ صخر بن عامر کی صاحبزادی تھیں جو سیدنا ابوبکر صدیق رضی اللہ عنہ کی خالہ تھیں اور ان کا بیٹا مسطح بن اثاثہ بن عباد بن مطلب تھا، ہم اپنے کام سے فارغ ہونے کے بعد گھر آنے کے لیے واپس آ رہی تھیں، اسی دوران ام مسطح کا پاؤں ان کی چادر میں الجھ گیا تو انہوں نے (گرنے سے بچتے ہوئے) یہ کہا: مسطح برباد ہو جائے، میں نے ان سے کہا: آپ نے بہت بری بات کہی ہے، آپ ایک ایسے شخص کو برا کہہ رہی ہیں جو غزوہ بدر میں شریک ہو چکا ہے، تو انہوں نے کہا: اے بھولی خاتون! کیا آپ نے نہیں سنا کہ اس نے کیا کیا ہے؟ میں نے دریافت کیا: اس نے کیا کیا ہے؟ تو انہوں نے مجھے الزام لگانے والوں کے بیان کے بارے میں بتایا۔ (سیدہ عائشہ رضی اللہ عنہا بیان کرتی ہیں:) اس سے میری بیماری میں اضافہ ہو گیا، میں اپنے گھر واپس آئی۔ نبی اکرم صلی اللہ علیہ وسلم میرے پاس تشریف لائے، آپ صلی اللہ علیہ وسلم نے سلام کیا، پھر آپ صلی اللہ علیہ وسلم نے دریافت کیا: ”تمہارا کیا حال ہے؟“ میں نے عرض کی: کیا آپ صلی اللہ علیہ وسلم مجھے اس بات کی اجازت دیں گے کہ میں اپنے ماں باپ کے پاس چلی جاؤں؟ اس وقت میں یہ چاہتی تھی کہ اپنے والدین سے اس خبر کے بارے میں یقینی معلومات حاصل کروں۔ نبی اکرم صلی اللہ علیہ وسلم نے مجھے اجازت دے دی، میں اپنے والدین کے ہاں آئی، میں نے اپنی والدہ سے دریافت کیا: اے امی جان! لوگ کیا بات چیت کر رہے ہیں؟ انہوں نے فرمایا: اے میری بیٹی! تم پرسکون رہو، اللہ کی قسم! جو بھی عورت اپنے شوہر کے نزدیک زیادہ خوب صورت ہو اور وہ مرد اس سے محبت کرتا ہو اور اس کی سوکنیں بھی ہوں، تو وہ اس سے زیادہ زیادتی کر دیا کرتی تھیں۔ سیدہ عائشہ رضی اللہ عنہا بیان کرتی ہیں: میں نے کہا: «سُبْحَانَ اللَّهِ» ”اللہ پاک ہے“، کیا لوگ اس قسم کی بات چیت کر رہے ہیں۔ سیدہ عائشہ رضی اللہ عنہا بیان کرتی ہیں: اس رات میرا یہ عالم تھا کہ میرے آنسو تھمتے نہیں تھے اور صبح ہو جانے تک مجھے نیند نہیں آئی، میں مسلسل روتی رہی۔ (اسی دوران کسی وقت میں) نبی اکرم صلی اللہ علیہ وسلم نے سیدنا علی بن ابوطالب اور سیدنا اسامہ بن زید رضی اللہ عنہما کو بلوایا، آپ ان دونوں صاحبان سے اپنی اہلیہ (یعنی سیدہ عائشہ رضی اللہ عنہا) سے علیحدگی اختیار کرنے کے بارے میں مشورہ کرنا چاہتے تھے، یہ اس وقت کی بات ہے جب اس بارے میں وحی نازل نہیں ہوئی تھی۔ جہاں تک سیدنا اسامہ بن زید رضی اللہ عنہ کا تعلق تھا تو انہوں نے نبی اکرم صلی اللہ علیہ وسلم کی خدمت میں یہی گزارش کی کہ وہ نبی اکرم صلی اللہ علیہ وسلم کی اہلیہ کے بری الذمہ ہونے سے واقف تھے اور اس چیز کا ذکر کیا جو نبی اکرم صلی اللہ علیہ وسلم کو اپنی اہلیہ سے محبت تھی، انہوں نے کہا: وہ آپ کی اہلیہ ہیں، ان کے بارے میں ہمیں صرف بھلائی کا علم ہے، لیکن جہاں تک سیدنا علی بن ابوطالب رضی اللہ عنہ کا تعلق تھا تو انہوں نے یہ کہا: اللہ تعالیٰ نے آپ کو کوئی تنگی نہیں دی ہے، ان کے علاوہ بھی خواتین بے شمار ہیں، لیکن اگر آپ گھر کی خادمہ سے پوچھیں گے تو وہ آپ کے ساتھ سچ بیانی کرے گی۔ سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم نے بریرہ رضی اللہ عنہا کو بلایا اور فرمایا: ”اے بریرہ! کیا تم نے عائشہ کے حوالے سے کوئی ایسی چیز دیکھی ہے جو تمہیں شک کا شکار کرے؟“ بریرہ رضی اللہ عنہا نے عرض کی: یا رسول اللہ صلی اللہ علیہ وسلم ! اس ذات کی قسم جس نے آپ کو حق کے ہمراہ مبعوث کیا ہے، میں نے ان میں صرف ایک چیز دیکھی ہے جس پر میں اعتراض کر سکتی ہوں یہ کہ وہ کم سن لڑکی ہیں ان کی عمر تھوڑی ہے وہ آٹا گوندھ کے سو جاتی ہیں اور بکری آ کر آٹے کو کھا جاتی ہے۔ نبی اکرم صلی اللہ علیہ وسلم (لوگوں کے درمیان) کھڑے ہوئے، آپ صلی اللہ علیہ وسلم نے عبداللہ بن ابی سلول کی شکایت کی اور فرمایا، آپ اس وقت منبر پر موجود تھے، (آپ صلی اللہ علیہ وسلم نے فرمایا): ”اے مسلمانوں کے گروہ! اس شخص کے حوالے سے کون میرے سامنے عذر پیش کرے گا جس کی اذیت میرے گھر والوں تک پہنچ چکی ہے، اللہ کی قسم! مجھے اپنی اہلیہ کے بارے میں صرف بھلائی کا علم ہے اور انہوں نے جس مرد پر الزام لگایا ہے اس کے بارے میں بھی مجھے صرف بھلائی کا علم ہے، وہ میرے گھر میں ہمیشہ میرے ساتھ ہی داخل ہوا ہے“۔ اس پر سیدنا سعد بن معاذ انصاری رضی اللہ عنہ کھڑے ہوئے، انہوں نے عرض کی: یا رسول اللہ صلی اللہ علیہ وسلم ! اس کی طرف سے میں آپ کی خدمت میں یہ گزارش کرتا ہوں کہ اگر وہ اوس قبیلے سے تعلق رکھتا ہے تو ہم اس کی گردن اڑا دیتے ہیں اور اگر وہ خزرج قبیلے سے تعلق رکھتا ہے تو آپ ہمیں حکم دیں ہم آپ کے حکم کی پابندی کریں گے۔ اس پر سیدنا سعد بن عبادہ رضی اللہ عنہ کھڑے ہو گئے، وہ خزرج قبیلے کے سردار تھے، وہ ویسے نیک آدمی تھے لیکن اس وقت قبائلی حمیت ان پر غالب آ گئی، انہوں نے کہا: اللہ کی قسم! تم اس شخص کو قتل نہیں کر سکتے اور نہ ہی تم اس شخص کو قتل کر سکو گے۔ اس پر سیدنا اسید بن حضیر رضی اللہ عنہ کھڑے ہوئے جو سیدنا سعد بن معاذ رضی اللہ عنہ کے چچا زاد تھے، انہوں نے کہا: آپ غلط کہہ رہے ہیں، اللہ کی قسم! ہم اس شخص کو ضرور قتل کر دیں گے، آپ منافق ہیں اور منافقوں کی طرف سے جھگڑا کر رہے ہیں، اس پر اوس اور خزرج قبیلے کے لوگوں کے درمیان جھگڑا شروع ہو گیا، یہاں تک کہ نوبت باقاعدہ لڑائی تک پہنچ گئی۔ نبی اکرم صلی اللہ علیہ وسلم انہیں خاموش کرواتے رہے یہاں تک کہ وہ خاموش ہو گئے۔ نبی اکرم صلی اللہ علیہ وسلم بھی خاموش ہو گئے، میں پورا دن روتی رہی، میرے آنسو تھمتے نہیں تھے اور مجھے نیند نہیں آتی تھی، میرے ماں باپ کو یوں لگتا تھا جیسے رونے کی وجہ سے میرا کلیجہ پھٹ جائے گا۔ ابھی وہ دونوں میرے پاس بیٹھے ہوئے تھے اسی دوران انصار کی ایک عورت نے میرے پاس اندر آنے کی اجازت مانگی، میں نے اسے اجازت دے دی وہ میرے پاس بیٹھ گئی، ابھی ہم اسی حالت میں بیٹھی ہوئی تھیں کہ نبی اکرم صلی اللہ علیہ وسلم تشریف لے آئے، آپ صلی اللہ علیہ وسلم نے سلام کیا پھر آپ صلی اللہ علیہ وسلم تشریف فرما ہوئے، جب سے میرے ساتھ یہ صورت حال درپیش آئی تھی اس کے بعد نبی اکرم صلی اللہ علیہ وسلم اس دن کے علاوہ کبھی بھی اس سے پہلے اس طرح نہیں بیٹھے تھے، ایک مہینہ گزر چکا تھا نبی اکرم صلی اللہ علیہ وسلم کی طرف کوئی وحی نازل نہیں ہوئی تھی۔ سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم نے کلمہ «تَشَهُّد» پڑھا پھر آپ صلی اللہ علیہ وسلم نے ارشاد فرمایا: ” «أَمَّا بَعْدُ» ! اے عائشہ تمہارے حوالے سے اس اس طرح کی اطلاعات مجھ تک پہنچی ہیں، اگر تم بری ہو تو اللہ تعالیٰ تمہاری برات کو ظاہر کر دے گا اور اگر تم نے گناہ کا ارادہ کیا تھا تو تم اللہ تعالیٰ سے مغفرت طلب کرو اور توبہ کرو کیونکہ جب انسان گناہ کا اعتراف کر لے اور پھر توبہ کر لے، تو اللہ تعالیٰ اس کی توبہ کو قبول کر لیتا ہے“۔ جب نبی اکرم صلی اللہ علیہ وسلم نے اپنی بات مکمل کر لی تو میرے آنسو رک گئے یہاں تک کہ مجھے ایک قطرہ بھی محسوس نہیں ہوا، میں نے اپنے والد سے کہا: آپ میری طرف سے اللہ کے رسول صلی اللہ علیہ وسلم کو جواب دیں۔ انہوں نے فرمایا: اللہ کی قسم! مجھے سمجھ نہیں آ رہی کہ میں اللہ کے رسول صلی اللہ علیہ وسلم کو کیا جواب دوں؟ میں نے اپنی والدہ سے کہا: آپ میری طرف سے اللہ کے رسول صلی اللہ علیہ وسلم کو جواب دیں، انہوں نے بھی یہی کہا: اللہ کی قسم! مجھے نہیں سمجھ آ رہی کہ میں اللہ کے رسول صلی اللہ علیہ وسلم سے کیا کہوں؟ (سیدہ عائشہ رضی اللہ عنہا بیان کرتی ہیں:) تو میں نے کہا: میں ایک لڑکی ہوں جس کی عمر کم ہے، مجھے زیادہ قرآن نہیں آتا لیکن اللہ کی قسم! مجھے اس بات کا پتہ ہے، آپ لوگوں نے اس بارے میں بات سنی اور یہ آپ کے ذہن میں پختہ ہو گئی اور آپ نے (دلی طور پر) اس کو سچ سمجھ لیا، اگر میں آپ سے یہ کہوں کہ میں بری ہوں اور اللہ جانتا ہے میں بری ہوں، تو آپ میری تصدیق نہیں کریں گے اور اگر میں اس حوالے سے آپ کے سامنے اعتراف کر لوں حالانکہ اللہ جانتا ہے میں اس سے بری ہوں تو پھر آپ مجھے سچا سمجھیں گے، اللہ کی قسم! اپنے اور آپ کے معاملے میں مجھے صرف وہی بات سمجھ آ رہی ہے جو سیدنا یوسف علیہ السلام کے والد نے کہی تھی: ﴿فَصَبْرٌ جَمِيلٌ وَاللَّهُ الْمُسْتَعَانُ عَلَى مَا تَصِفُونَ﴾ [سورة يوسف: 18] ”تو اب صبر کرنا ہی بہتر ہے اور جو لوگ تم کہہ رہے ہو اس کے حوالے سے اللہ ہی سے مدد لی جا سکتی ہے“۔ (سیدہ عائشہ رضی اللہ عنہا بیان کرتی ہیں:) پھر میں نے رخ موڑا اور اپنے بستر پر لیٹ گئی، اللہ کی قسم! اس وقت میں یہ بات جانتی تھی کہ میں بری الذمہ ہوں اور اللہ تعالیٰ میرے بری ہونے کا اظہار کر دے گا، لیکن مجھے یہ اندازہ نہیں تھا کہ اللہ تعالیٰ میرے بارے میں ایسی وحی نازل کر دے گا جس کی تلاوت کی جائے، مجھے یہ امید تھی کہ نبی اکرم صلی اللہ علیہ وسلم خواب میں کوئی ایسا خواب دیکھ لیں گے جس کے ذریعے اللہ تعالیٰ میری برات کا اظہار کر دے گا۔ سیدہ عائشہ رضی اللہ عنہا بیان کرتی ہیں: اللہ کی قسم! ابھی نبی اکرم صلی اللہ علیہ وسلم اپنی اس جگہ سے ہٹے بھی نہیں تھے اور گھر میں موجود افراد میں سے کوئی بھی شخص گھر سے باہر نہیں نکلا تھا کہ اسی دوران اللہ تعالیٰ نے اپنے نبی پر وحی نازل کر دی، وحی کے نزول کے وقت اس کے نزول کی شدت کی وجہ سے نبی اکرم صلی اللہ علیہ وسلم کی جو کیفیت ہوتی تھی وہ آپ صلی اللہ علیہ وسلم پر طاری ہو گئی، جب نبی اکرم صلی اللہ علیہ وسلم کی یہ کیفیت ختم ہوئی تو آپ صلی اللہ علیہ وسلم نے سب سے پہلے یہ بات کہی: ”اے عائشہ! اللہ کی قسم! اللہ تعالیٰ نے تمہارے بری الذمہ ہونے (کا حکم نازل کر دیا ہے)“۔ میری والدہ نے مجھ سے کہا: تم اٹھ کر نبی اکرم صلی اللہ علیہ وسلم کے پاس جاؤ، تو میں نے کہا: اللہ کی قسم! میں نبی اکرم صلی اللہ علیہ وسلم کے سامنے نہیں کھڑی ہوں گی اور میں صرف اللہ تعالیٰ کی تعریف بیان کروں گی، جس نے میری برات کا حکم نازل کیا ہے، اللہ تعالیٰ نے یہ آیت نازل کی: ﴿إِنَّ الَّذِينَ جَاءُوا بِالْإِفْكِ عُصْبَةٌ مِّنكُمْ﴾ [سورة النور: 11] ”تم میں سے ایک گروہ نے جو جھوٹا الزام لگایا“۔ اس کے بعد کی دس آیات ہیں۔ سیدہ عائشہ رضی اللہ عنہا بیان کرتی ہیں: تو اللہ تعالیٰ نے یہ آیات میرے بری ہونے کے بارے میں نازل کی تھیں۔ (سیدہ عائشہ رضی اللہ عنہا بیان کرتی ہیں:) سیدنا ابوبکر رضی اللہ عنہ، سیدنا مسطح رضی اللہ عنہ کے ساتھ اپنی رشتے داری اور ان کی غربت کی وجہ سے ان پر خرچ کیا کرتے تھے، انہوں نے یہ کہا: اس نے عائشہ کے بارے میں جو کہا ہے، اللہ کی قسم! اس کے بعد میں کبھی بھی اس پر کچھ خرچ نہیں کروں گا، تو اللہ تعالیٰ نے یہ آیت نازل کی: ﴿وَلَا يَأْتَلِ أُولُو الْفَضْلِ مِنكُمْ وَالسَّعَةِ أَن يُؤْتُوا أُولِي الْقُرْبَى﴾ [سورة النور: 22] ”تم میں سے فضیلت رکھنے والے لوگ اور گنجائش رکھنے والے لوگ یہ قسم نہ اٹھائیں“۔ یہ آیت یہاں تک ہے: ﴿أَلَا تُحِبُّونَ أَن يَغْفِرَ اللَّهُ لَكُمْ﴾ [سورة النور: 22] ”کیا تم اس بات کو پسند کرتے ہو کہ اللہ تعالیٰ تمہاری مغفرت کر دے؟“ تو سیدنا ابوبکر رضی اللہ عنہ نے کہا: اللہ کی قسم! میں اس بات کو پسند کرتا ہوں کہ اللہ تعالیٰ میری مغفرت کر دے، اس کے بعد انہوں نے سیدنا مسطح رضی اللہ عنہ کو اسی طرح خرچ دینا شروع کر دیا جس طرح وہ پہلے انہیں خرچ دیا کرتے تھے اور انہوں نے کہا: اللہ کی قسم! اس کے بعد میں اسے کبھی ترک نہیں کروں گا۔ سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم نے میرے معاملے کے بارے میں سیدہ زینب بنت جحش رضی اللہ عنہا سے بھی دریافت کیا تھا: ”تم اس بارے میں کیا جانتی ہو اور تمہاری اس بارے میں کیا رائے ہے؟“ تو سیدہ زینب رضی اللہ عنہا نے جواب دیا تھا: میں اپنے کانوں اور اپنی آنکھوں کو محفوظ کرتی ہوں، مجھے صرف بھلائی کا علم ہے۔ سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم کی ازواج میں سے یہ وہ خاتون تھیں جو میری برابری کی دعوے دار تھیں، لیکن اللہ تعالیٰ نے ان کی پرہیزگاری کی وجہ سے انہیں (الزام لگانے سے) محفوظ رکھا جبکہ ان کی بہن حمنہ بنت جحش نے ان کے لیے جھگڑا کرتے ہوئے (الزام لگانے والوں میں حصہ لیا) اور وہ ہلاکت کا شکار ہونے والوں میں شامل ہو گئی۔ امام زہری رحمہ اللہ بیان کرتے ہیں: ان لوگوں کے واقعہ کے بارے میں یہ وہ روایت ہے جو مجھ تک پہنچی ہے۔ [صحیح ابن حبان/كتاب النكاح/حدیث: 4212]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے سیدنا ابوحذیفہ رضی اللہ عنہ کی اہلیہ سیدہ سہلہ رضی اللہ عنہا کو یہ حکم دیا تھا کہ ”وہ سیدنا ابوحذیفہ رضی اللہ عنہ کے غلام سالم کو دودھ پلا دیں تاکہ سیدنا ابوحذیفہ رضی اللہ عنہ کے مزاج کی تیزی (یعنی ناراضگی) ختم ہو جائے“ تو اس خاتون نے اس لڑکے کو دودھ پلا دیا جو پورا مرد تھا۔ ربیعہ نامی راوی کہتے ہیں: یہ سالم کے لیے رخصت تھی۔ [صحیح ابن حبان/كتاب الرضاع/حدیث: 4213]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ سہلہ بنت سہیل رضی اللہ عنہا نبی اکرم صلی اللہ علیہ وسلم کی خدمت میں حاضر ہوئیں، انہوں نے عرض کی: یا رسول اللہ صلی اللہ علیہ وسلم ! سالم کو سیدنا ابوحذیفہ رضی اللہ عنہ کے منہ بولے بیٹے کے طور پر بلایا جاتا ہے، وہ ان کے ساتھ رہتا ہے، وہ میرے پاس بھی آ جاتا ہے اور مجھے (سر پر چادر وغیرہ کی موجودگی کے بغیر) دیکھ لیتا ہے، ہمارا گھر بھی چھوٹا سا ہے اور اللہ تعالیٰ نے یہ ارشاد فرمایا ہے: ﴿ادْعُوهُمْ لِآبَائِهِمْ هُوَ أَقْسَطُ عِنْدَ اللَّهِ﴾ [سورة الأحزاب: 5] ”تم ان کو ان کے حقیقی باپ کے حوالے سے بلاؤ، اللہ تعالیٰ کے نزدیک یہ انصاف کے زیادہ مطابق ہے“، تو نبی اکرم صلی اللہ علیہ وسلم نے فرمایا: ”تم اسے دودھ پلا دو، تم اس کے لیے حرمت والی ہو جاؤ گی“۔ [صحیح ابن حبان/كتاب الرضاع/حدیث: 4214]

اردو ترجمہ · UrduUnverified translation

امام مالک رحمہ اللہ، ابن شہاب زہری رحمہ اللہ سے یہ بات نقل کرتے ہیں کہ ان سے بڑی عمر کے فرد کی رضاعت کا مسئلہ دریافت کیا گیا، تو انہوں نے بتایا کہ عروہ بن زبیر رحمہ اللہ نے مجھے یہ بات بتائی ہے کہ سیدنا ابوحذیفہ بن عتبہ بن ربیعہ رضی اللہ عنہ نبی اکرم صلی اللہ علیہ وسلم کے اصحاب میں سے تھے، انہیں غزوہ بدر میں شرکت کا شرف حاصل ہے، انہوں نے سالم رضی اللہ عنہ کو منہ بولا بیٹا بنایا تھا، یہ وہی سالم رضی اللہ عنہ ہیں جنہیں سالم مولیٰ ابوحذیفہ کہا جاتا ہے، یہ بالکل اسی طرح تھا جس طرح نبی اکرم صلی اللہ علیہ وسلم نے سیدنا زید بن حارثہ رضی اللہ عنہ کو اپنا منہ بولا بیٹا بنایا تھا۔ سیدنا ابوحذیفہ رضی اللہ عنہ نے سالم رضی اللہ عنہ کی شادی اپنی بھتیجی سیدہ فاطمہ بنت ولید بن عتبہ بن ربیعہ رضی اللہ عنہا سے کی تھی، اس کی وجہ یہی تھی کہ وہ انہیں اپنا بیٹا سمجھتے تھے اور وہ لڑکی اس وقت ابتدائی طور پر ہجرت کرنے والی خواتین میں شامل تھیں اور قریش کی بیوہ عورتوں میں سب سے زیادہ فضیلت رکھنے والی خاتون تھیں، جب اللہ تعالیٰ نے سیدنا زید بن حارثہ رضی اللہ عنہ کے بارے میں حکم نازل کر دیا اور ارشاد فرمایا: ﴿ادْعُوهُمْ لِآبَائِهِمْ هُوَ أَقْسَطُ عِنْدَ اللَّهِ ۚ فَإِنْ لَمْ تَعْلَمُوا آبَاءَهُمْ فَإِخْوَانُكُمْ فِي الدِّينِ وَمَوَالِيكُمْ﴾ [سورة الأحزاب: 5] تم انہیں ان کے حقیقی باپوں کے حوالے سے بلاؤ یہ اللہ تعالیٰ کی بارگاہ میں انصاف کے زیادہ مطابق ہے اور اگر تمہیں ان کے حقیقی باپ کے بارے میں علم نہ ہو تو یہ تمہارے دینی بھائی ہیں اور آزاد کردہ غلام ہیں۔ تو ہر وہ شخص جس نے کسی کو منہ بولا بیٹا بنایا ہوا تھا، اس نے اس بچے کی نسبت اس کے حقیقی باپ کی طرف کر دی اور اگر کسی کے باپ کے بارے میں پتہ نہیں تھا تو اسے اس کے آزاد کرنے والے مولیٰ کی طرف منسوب کیا گیا۔ سیدہ سہلہ بنت سہیل رضی اللہ عنہا جو سیدنا ابوحذیفہ رضی اللہ عنہ کی اہلیہ تھیں اور ان کا تعلق بنو عامر بن لؤی سے تھا، وہ نبی اکرم صلی اللہ علیہ وسلم کی خدمت میں حاضر ہوئیں، انہوں نے عرض کی: یا رسول اللہ صلی اللہ علیہ وسلم ! ہم سالم کو اپنا بیٹا ہی سمجھتے تھے، وہ میرے پاس آیا کرتا تھا، ہمارا صرف ایک ہی گھر ہے تو اس کے معاملے کے بارے میں آپ کی کیا رائے ہے؟ نبی اکرم صلی اللہ علیہ وسلم نے فرمایا: ”تم اسے پانچ مرتبہ دودھ پلا دو، تمہارے دودھ کی وجہ سے وہ حرمت والا ہو جائے گا۔“ اس خاتون نے ایسا ہی کیا اور وہ اس لڑکے کو اپنا رضاعی بیٹا سمجھتی تھیں۔ سیدہ عائشہ رضی اللہ عنہا نے یہ حکم حاصل کیا کہ جس مرد کے بارے میں وہ یہ بات پسند کرتی تھیں کہ وہ ان کے ہاں آ جایا کرے، تو وہ اپنی بہن سیدہ ام کلثوم بنت ابوبکر رضی اللہ عنہما کو یا اپنی کسی بھتیجی کو یہ ہدایت کرتی تھیں کہ وہ اس لڑکے کو دودھ پلا دے جس کے بارے میں سیدہ عائشہ رضی اللہ عنہا اس بات کو پسند کرتی تھیں کہ وہ ان کے ہاں آ جایا کرے۔ نبی اکرم صلی اللہ علیہ وسلم کی دیگر تمام ازواجِ مطہرات رضی اللہ عنہن نے اس بات کو تسلیم نہیں کیا کہ اس نوعیت کی رضاعت کی وجہ سے کوئی بھی شخص ان کے ہاں داخل ہو، وہ ازواجِ مطہرات رضی اللہ عنہن یہ کہتی تھیں کہ ہم یہ سمجھتی ہیں کہ نبی اکرم صلی اللہ علیہ وسلم نے سہلہ بنت سہیل رضی اللہ عنہا کو یہ حکم اس حوالے سے دیا تھا کہ یہ صرف سالم کے لیے رخصت تھی جو نبی اکرم صلی اللہ علیہ وسلم کی طرف سے تھی، اس طرح کی رضاعت کی وجہ سے کوئی بھی شخص ہمارے ہاں نہیں آ سکتا۔ تو بڑی عمر کے شخص کی رضاعت کے بارے میں نبی اکرم صلی اللہ علیہ وسلم کی ازواجِ مطہرات رضی اللہ عنہن کی یہی رائے تھی جو اس روایت میں منقول ہے۔ [صحیح ابن حبان/كتاب الرضاع/حدیث: 4215]

اردو ترجمہ · UrduUnverified translation

سیدنا عقبہ بن حارث رضی اللہ عنہ بیان کرتے ہیں کہ میں نے ام یحییٰ بنت ابی اہاب سے شادی کر لی، ایک سیاہ فام عورت ہمارے ہاں آئی، اس نے اس بات کا تذکرہ کیا کہ اس نے ہم دونوں (میاں بیوی) کو دودھ پلایا ہوا ہے، میں نبی اکرم صلی اللہ علیہ وسلم کی خدمت میں حاضر ہوا، میں نے اس بات کا تذکرہ کیا تو نبی اکرم صلی اللہ علیہ وسلم نے ارشاد فرمایا: ”اب کیا ہو سکتا ہے جب کہ اس عورت نے یہ بات بیان کر دی ہے؟ تو تم اس عورت (یعنی اپنی بیوی) کو چھوڑ دو۔“ [صحیح ابن حبان/كتاب الرضاع/حدیث: 4216]

اردو ترجمہ · UrduUnverified translation

سیدنا عقبہ بن حارث رضی اللہ عنہ بیان کرتے ہیں کہ انہوں نے ابواہاب کی صاحبزادی کے ساتھ شادی کر لی تو ایک سیاہ فام عورت نے یہ بات بیان کی کہ اس نے ان دونوں (میاں بیوی) کو دودھ پلایا ہوا ہے، میں نبی اکرم صلی اللہ علیہ وسلم کی خدمت میں حاضر ہوا اور میں نے آپ کے سامنے اس بات کا تذکرہ کیا تو نبی اکرم صلی اللہ علیہ وسلم نے مجھ سے منہ پھیر لیا، میں دوسری طرف سے آپ صلی اللہ علیہ وسلم کی خدمت میں حاضر ہوا اور میں نے عرض کی: یا رسول اللہ صلی اللہ علیہ وسلم ! وہ عورت جھوٹ کہتی ہے، تو نبی اکرم صلی اللہ علیہ وسلم نے فرمایا: ”اب کیا ہو سکتا ہے جبکہ اس نے یہ بات بیان کر دی ہے کہ اس نے تم دونوں کو دودھ پلایا ہے؟“ تو نبی اکرم صلی اللہ علیہ وسلم نے ان صاحب کو اس خاتون سے منع کر دیا (یعنی انہیں اس خاتون سے علیحدگی اختیار کرنے کا حکم دیا)۔ (امام ابن حبان رحمہ اللہ فرماتے ہیں:) اس شیخ (یعنی امام ابن حبان رحمہ اللہ کے استاد محمد بن عمر) نے نصر بن علی کی یزید بن زریع کے حوالے سے ان کے مشائخ کے حوالے سے منقول روایات کے درمیان ہمیں اس روایت کے بارے میں بتایا۔ [صحیح ابن حبان/كتاب الرضاع/حدیث: 4217]

اردو ترجمہ · UrduUnverified translation

سیدنا عقبہ بن حارث رضی اللہ عنہ بیان کرتے ہیں: انہوں نے ابواہاب بن عزیز کی صاحبزادی کے ساتھ شادی کر لی، ایک خاتون ان کے پاس آئی اور ان سے کہا: میں نے عقبہ کو دودھ پلایا ہے اور جس عورت کے ساتھ اس نے شادی کی ہے اسے بھی دودھ پلایا ہے، تو عقبہ نے اس عورت سے کہا: مجھے تو اس بات کا علم نہیں ہے کہ تم نے مجھے دودھ پلایا ہے اور نہ ہی تم نے مجھے پہلے اس بارے میں بتایا ہے، پھر عقبہ نے ابواہاب کے خاندان والوں کی طرف پیغام بھجوایا اور ان سے اس بارے میں دریافت کیا: تو ان لوگوں نے بھی یہی بتایا کہ ہمیں یہ علم نہیں ہے کہ اس عورت نے اس لڑکی کو دودھ پلایا ہے، پھر سیدنا عقبہ رضی اللہ عنہ سوار ہو کر نبی اکرم صلی اللہ علیہ وسلم کی خدمت میں مدینہ منورہ حاضر ہوئے، انہوں نے اس بارے میں دریافت کیا تو نبی اکرم صلی اللہ علیہ وسلم نے ارشاد فرمایا: ”اب کیا ہو سکتا ہے جب کہ یہ بات بیان کی جا چکی ہے؟“ تو سیدنا عقبہ رضی اللہ عنہ نے اس خاتون سے علیحدگی اختیار کی اور اس عورت نے دوسری شادی کر لی۔ [صحیح ابن حبان/كتاب الرضاع/حدیث: 4218]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ سیدنا ابوقعیس رضی اللہ عنہ کے بھائی نے میرے ہاں اندر آنے کی اجازت مانگی، یہ حجاب کا حکم نازل ہو جانے کے بعد کی بات ہے، تو میں نے کہا: میں آپ کو اس وقت تک اجازت نہیں دوں گی جب تک نبی اکرم صلی اللہ علیہ وسلم تشریف نہیں لے آتے، جب نبی اکرم صلی اللہ علیہ وسلم تشریف لے آئے تو میں نے نبی اکرم صلی اللہ علیہ وسلم سے اس بارے میں اجازت مانگی، میں نے عرض کی: یا رسول اللہ صلی اللہ علیہ وسلم ! ابوقعیس کے بھائی نے میرے ہاں اندر آنے کی اجازت مانگی تو میں نے آپ سے اجازت لینے سے پہلے انہیں اجازت دینے سے انکار کر دیا کیونکہ مجھے ابوقعیس کی بیوی نے دودھ پلایا تھا، ابوقعیس نے مجھے دودھ نہیں پلایا تھا، تو نبی اکرم صلی اللہ علیہ وسلم نے ارشاد فرمایا: ”تم نے اسے اجازت دے دینی تھی، وہ تمہارا چچا ہے۔“ [صحیح ابن حبان/كتاب الرضاع/حدیث: 4219]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: ابو قعیس کے بھائی نے پردے کا حکم نازل ہو جانے کے بعد میرے ہاں اندر آنے کی اجازت مانگی تو میں نے کہا: میں آپ کو اس وقت تک اجازت نہیں دوں گی جب تک نبی اکرم صلی اللہ علیہ وسلم تشریف نہیں لے آتے، جب نبی اکرم صلی اللہ علیہ وسلم تشریف لے آئے تو میں نے نبی اکرم صلی اللہ علیہ وسلم سے اجازت مانگی، میں نے عرض کی: یا رسول اللہ صلی اللہ علیہ وسلم ! ابو قعیس کے بھائی نے میرے ہاں اندر آنے کی اجازت مانگی تو میں نے انہیں اس وقت تک اجازت دینے سے انکار کر دیا جب تک میں آپ سے اجازت نہ لے لوں کیونکہ ابو قعیس کی بیوی نے مجھے دودھ پلایا ہے، ابو قعیس نے مجھے دودھ نہیں پلایا۔ نبی اکرم صلی اللہ علیہ وسلم نے فرمایا: ”تم نے اسے اجازت دے دینی تھی، وہ تمہارا چچا ہے“۔ [صحیح ابن حبان/كتاب الرضاع/حدیث: 4220]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: قرآن میں یہ حکم نازل ہوا تھا کہ دس متعین مرتبہ میں دودھ پینے سے حرمت ثابت ہوتی ہے، پھر یہ حکم منسوخ ہو کر پانچ متعین مرتبہ میں تبدیل ہو گیا، جب نبی اکرم صلی اللہ علیہ وسلم کا وصال ہوا تو یہ حکم قرآن کی ان آیات میں شامل تھا جن کی ہم تلاوت کرتے تھے۔ [صحیح ابن حبان/كتاب الرضاع/حدیث: 4221]

اردو ترجمہ · UrduUnverified translation

ام المؤمنین سیدہ عائشہ صدیقہ رضی اللہ عنہا بیان کرتی ہیں: قرآن میں یہ حکم نازل ہوا کہ دس متعین مرتبہ دودھ پینے سے حرمت ثابت ہوتی ہے، پھر یہ حکم منسوخ ہو کر پانچ متعین مرتبہ میں تبدیل ہو گیا، جب نبی اکرم صلی اللہ علیہ وسلم کا وصال ہوا تو یہ آیات ان چیزوں میں شامل تھیں جنہیں ہم قرآن میں پڑھا کرتے۔ [صحیح ابن حبان/كتاب الرضاع/حدیث: 4222]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا ہے: ”رضاعت کے ذریعے وہی حرمت ثابت ہوتی ہے جو ولادت کے ذریعے ثابت ہوتی ہے۔“ [صحیح ابن حبان/كتاب الرضاع/حدیث: 4223]

اردو ترجمہ · UrduUnverified translation

سیدہ ام سلمہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”صرف وہی رضاعت حرمت ثابت کرتی ہے جو آنتوں کو کھول دے (یعنی جو نشوونما کا باعث بنے)“ [صحیح ابن حبان/كتاب الرضاع/حدیث: 4224]

اردو ترجمہ · UrduUnverified translation

سیدنا ابن زبیر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ایک گھونٹ یا دو گھونٹ حرمت کو ثابت نہیں کرتے ہیں۔“ [صحیح ابن حبان/كتاب الرضاع/حدیث: 4225]

اردو ترجمہ · UrduUnverified translation

سیدنا زبیر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ایک گھونٹ یا دو گھونٹ، ایک چسکی یا دو چسکی حرمت کو ثابت نہیں کرتے ہیں۔“ [صحیح ابن حبان/كتاب الرضاع/حدیث: 4226]

اردو ترجمہ · UrduUnverified translation

سیدہ عائشہ صدیقہ رضی اللہ عنہا مرفوع حدیث کے طور پر یہ بات نقل کرتی ہیں، نبی اکرم صلی اللہ علیہ وسلم نے ارشاد فرمایا ہے: ”ایک گھونٹ یا دو گھونٹ حرمت کو ثابت نہیں کرتے ہیں۔“ [صحیح ابن حبان/كتاب الرضاع/حدیث: 4227]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے ارشاد فرمایا ہے: ”ایک مرتبہ دودھ پینے یا دو مرتبہ دودھ پینے سے حرمت ثابت نہیں ہوتی ہے۔“ (امام ابن حبان رحمہ اللہ فرماتے ہیں:) میں اس بات کا انکار نہیں کرتا کہ سیدنا ابن زبیر رضی اللہ عنہ نے یہ روایت نبی اکرم صلی اللہ علیہ وسلم سے سنی ہوگی اور ایک مرتبہ انہوں نے اس طرح نقل کر دیا جو انہوں نے سنا تھا اور دوسری مرتبہ انہوں نے یہ روایت سیدہ عائشہ رضی اللہ عنہا کے حوالے سے نقل کر دی، یہ وہ چیز ہے جو صحابہ کرام کے درمیان عام تھی کہ کوئی صحابی بعض واقعات یا کوئی چیز نبی اکرم صلی اللہ علیہ وسلم کی زبانی سن لیتے تھے، پھر وہ اسی روایت کو اپنے سے زیادہ جلیل القدر اور عظیم المرتبہ صحابی کے حوالے سے نبی اکرم صلی اللہ علیہ وسلم سے سن لیتے تھے، تو ایک مرتبہ وہ اس روایت کو نقل کر دیتے تھے جو انہوں نے خود سنی ہوتی تھی اور ایک مرتبہ اس جلیل القدر صحابی کے حوالے سے اسے نقل کر دیتے تھے، ان کا اپنے سے بلند مرتبے کے صحابی کے حوالے سے اس روایت کو نقل کرنا اس بات پر دلالت نہیں کرتا کہ انہوں نے خود یہ روایت نہیں سنی ہوگی، یہ بالکل اسی طرح ہے جس طرح سیدنا عبداللہ بن عمر رضی اللہ عنہما نے سیدنا جبرائیل علیہ السلام کے ایمان اور اسلام کے بارے میں سوالات سے متعلق روایت نقل کی ہے، انہوں نے یہ روایت نبی اکرم صلی اللہ علیہ وسلم سے بھی سنی تھی اور پھر اس کے بعد انہوں نے اپنے والد کے حوالے سے بھی اسے سنا تو انہوں نے ایک مرتبہ وہ روایت نقل کر دی جس کا انہوں نے خود مشاہدہ کیا تھا اور ایک مرتبہ اسے سیدنا عمر رضی اللہ عنہ کے حوالے سے نقل کر دیا جسے انہوں نے سیدنا عمر رضی اللہ عنہ سے سنا تھا، کیونکہ ان کے نزدیک سیدنا عمر رضی اللہ عنہ کی قدر و منزلت زیادہ تھی۔ [صحیح ابن حبان/كتاب الرضاع/حدیث: 4228]

اردو ترجمہ · UrduUnverified translation

سیدہ ام فضل رضی اللہ عنہا بیان کرتی ہیں: ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: یا رسول اللہ صلی اللہ علیہ وسلم ! میں نے ایک عورت کے ساتھ شادی کی ہے، میری پہلے بھی ایک بیوی تھی، میری پہلی بیوی کا یہ کہنا ہے کہ اس نے میری نئی بیوی کو ایک یا دو مرتبہ دودھ پلایا ہوا ہے، تو نبی اکرم صلی اللہ علیہ وسلم نے ارشاد فرمایا: ”ایک یا دو گھونٹ حرمت کو ثابت نہیں کرتے ہیں۔“ [صحیح ابن حبان/كتاب الرضاع/حدیث: 4229]

اردو ترجمہ · UrduUnverified translation

حجاج بن حجاج اسلمی اپنے والد رضی اللہ عنہ سے روایت کرتے ہیں کہ انہوں نے عرض کی: یا رسول اللہ صلی اللہ علیہ وسلم ! میں دودھ پینے کے حق کو کیسے ادا کر سکتا ہوں؟ نبی اکرم صلی اللہ علیہ وسلم نے فرمایا: ”ایک پیشانی یعنی غلام یا کنیز (کو معاوضے کے طور پر ادا کر کے تم اس کا حق ادا کر سکتے ہو)۔“ [صحیح ابن حبان/كتاب الرضاع/حدیث: 4230]

اردو ترجمہ · UrduUnverified translation

حجاج بن حجاج اپنے والد رضی اللہ عنہ کا یہ بیان نقل کرتے ہیں کہ انہوں نے عرض کی: میں رضاعت کا معاوضہ کیسے ادا کر سکتا ہوں؟ نبی اکرم صلی اللہ علیہ وسلم نے فرمایا: ”پیشانی یعنی غلام یا کنیز کی شکل میں۔“ [صحیح ابن حبان/كتاب الرضاع/حدیث: 4231]

اردو ترجمہ · UrduUnverified translation

سیدنا ابوطفیل رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”جعرانہ“ کے مقام پر گوشت تقسیم کیا، میں ان دنوں لڑکا تھا، میں نے اونٹ کا ایک عضو اٹھایا ہوا تھا، ایک دیہاتی عورت آئی، جب وہ نبی اکرم صلی اللہ علیہ وسلم کے قریب پہنچی تو نبی اکرم صلی اللہ علیہ وسلم نے اس کے لیے اپنی چادر کو بچھا دیا، وہ عورت اس پر بیٹھ گئی، میں نے دریافت کیا: ”یہ کون ہے؟“ تو لوگوں نے بتایا: ”یہ نبی اکرم صلی اللہ علیہ وسلم کی رضاعی والدہ ہیں۔“ [صحیح ابن حبان/كتاب الرضاع/حدیث: 4232]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا اور عرض کی: یا رسول اللہ صلی اللہ علیہ وسلم ! میرے پاس ایک دینار ہے، میں اس کا کیا کروں؟ آپ صلی اللہ علیہ وسلم نے فرمایا: ”تم اسے اپنی ذات پر خرچ کرو۔“ اس نے کہا: میرے پاس ایک اور بھی ہے، میں اس کا کیا کروں؟ آپ صلی اللہ علیہ وسلم نے فرمایا: ”اسے تم اپنی بیوی پر خرچ کرو۔“ اس نے دریافت کیا: میرے پاس ایک اور بھی ہے۔ آپ صلی اللہ علیہ وسلم نے فرمایا: ”تم اسے اپنی اولاد پر خرچ کرو۔“ اس نے عرض کی: میرے پاس ایک اور بھی ہے، میں اس کا کیا کروں؟ آپ صلی اللہ علیہ وسلم نے فرمایا: ”اسے تم اپنے خادم پر خرچ کرو۔“ اس نے عرض کی: میرے پاس ایک اور بھی ہے، میں اس کا کیا کروں؟ آپ صلی اللہ علیہ وسلم نے فرمایا: ”تمہیں زیادہ پتہ ہو گا۔“ [صحیح ابن حبان/كتاب الرضاع/حدیث: 4233]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم کے اصحاب میں سے ایک شخص نے اپنے مرنے کے بعد اپنے غلام کو آزاد کرنے کی (وصیت کی)، ان صاحب کے پاس اس غلام کے علاوہ اور کوئی مال نہیں تھا، تو نبی اکرم صلی اللہ علیہ وسلم کے حکم کے تحت انہوں نے اس غلام کو فروخت کیا، نبی اکرم صلی اللہ علیہ وسلم نے ارشاد فرمایا: ”تم اس کی قیمت کے زیادہ حق دار ہو اور اللہ تعالیٰ اس سے بے نیاز ہے۔“ [صحیح ابن حبان/كتاب الرضاع/حدیث: 4234]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک دن صدقہ کرنے کی ترغیب دی تو ایک شخص نے عرض کی: یا رسول اللہ صلی اللہ علیہ وسلم ! میرے پاس ایک دینار ہے۔ نبی اکرم صلی اللہ علیہ وسلم نے فرمایا: ”تم اسے اپنی ذات پر خرچ کرو۔“ اس نے کہا: میرے پاس ایک اور بھی ہے۔ نبی اکرم صلی اللہ علیہ وسلم نے فرمایا: ”تم اسے اپنی اولاد پر خرچ کرو۔“ اس نے عرض کی: میرے پاس ایک اور بھی ہے۔ نبی اکرم صلی اللہ علیہ وسلم نے فرمایا: ”اسے تم اپنی بیوی پر خرچ کرو۔“ اس نے عرض کی: میرے پاس ایک اور بھی ہے۔ نبی اکرم صلی اللہ علیہ وسلم نے فرمایا: ”تم اسے اپنے خادم پر خرچ کرو۔“ اس نے عرض کی: میرے پاس ایک اور بھی ہے۔ نبی اکرم صلی اللہ علیہ وسلم نے فرمایا: ”تمہیں زیادہ سمجھ ہوگی (کہ تم اسے کہاں خرچ کرو)۔“ [صحیح ابن حبان/كتاب الرضاع/حدیث: 4235]

اردو ترجمہ · UrduUnverified translation

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص حلال مال کماتا ہے اور اسے خود کھاتا ہے یا اسے پہنتا ہے یا اپنے علاوہ اللہ کی مخلوق میں سے کسی دوسرے پر خرچ کرتا ہے، تو یہ چیز اس کے لیے طہارت کے حصول کا باعث ہو گی۔“ [صحیح ابن حبان/كتاب الرضاع/حدیث: 4236]

اردو ترجمہ · UrduUnverified translation

عمرو بن امیہ رضی اللہ عنہ بیان کرتے ہیں: ایک مرتبہ سیدنا عثمان غنی رضی اللہ عنہ یا شاید سیدنا عبدالرحمن بن عوف رضی اللہ عنہ ایک چادر کے پاس سے گزرے انہیں وہ چادر مہنگی لگی، پھر عمرو بن امیہ ضمری رضی اللہ عنہ اس چادر کے پاس سے گزرے انہوں نے وہ چادر خریدی اور اپنی اہلیہ سخیلہ بنت عبیدہ بن حارث بن مطلب رضی اللہ عنہا کو وہ پہننے کے لیے دے دی، پھر سیدنا عثمان غنی رضی اللہ عنہ یا شاید سیدنا عبدالرحمن بن عوف رضی اللہ عنہ کا گزر ان کے پاس سے ہوا تو انہوں نے دریافت کیا: اس چادر کا تم نے کیا کیا جو تم نے خریدی تھی؟ تو عمرو رضی اللہ عنہ نے بتایا: وہ میں نے (اپنی اہلیہ) سخیلہ بنت عبیدہ رضی اللہ عنہا کو دے دی ہے، ان صاحب نے دریافت کیا: تم نے اپنی بیوی کو جو کچھ دیا ہے کیا یہ سب صدقہ شمار ہو گا؟ تو عمرو رضی اللہ عنہ نے کہا: میں نے تو نبی اکرم صلی اللہ علیہ وسلم کو یہی بات ارشاد فرماتے ہوئے سنا ہے، نبی اکرم صلی اللہ علیہ وسلم کے سامنے اس بات کا ذکر کیا گیا جو عمرو رضی اللہ عنہ نے بیان کی تھی تو نبی اکرم صلی اللہ علیہ وسلم نے فرمایا: ”عمرو نے ٹھیک کیا ہے تم اپنی بیوی کے ساتھ جو بھی اچھائی کرتے ہو یہ ان کے لیے صدقہ ہو گئی (یعنی تمہیں اس کا اجر و ثواب ملے گا)۔“ [صحیح ابن حبان/كتاب الرضاع/حدیث: 4237]

اردو ترجمہ · UrduUnverified translation

سیدنا ابو مسعود رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”بے شک جب کوئی مسلمان اپنی بیوی پر خرچ کرتا ہے، تو یہ چیز اس کے لیے صدقہ ہوتی ہے (یعنی اسے اس کا اجر و ثواب ملے گا۔)“ [صحیح ابن حبان/كتاب الرضاع/حدیث: 4238]

اردو ترجمہ · UrduUnverified translation

سیدنا ابومسعود رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص اپنی بیوی پر ثواب کی امید رکھتے ہوئے خرچ کرتا ہے تو یہ چیز اس کے لیے صدقہ ہوتی ہے۔“ [صحیح ابن حبان/كتاب الرضاع/حدیث: 4239]

اردو ترجمہ · UrduUnverified translation

سیدنا عبداللہ بن عمرو رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”آدمی کے گناہ گار ہونے کے لیے اتنا کافی ہے، جس کا خرچ اس کے ذمے ہو وہ اس کا خرچ ادا نہ کرے۔“ [صحیح ابن حبان/كتاب الرضاع/حدیث: 4240]

اردو ترجمہ · UrduUnverified translation

خیثمہ بیان کرتے ہیں کہ ہم لوگ سیدنا عبداللہ بن عمرو رضی اللہ عنہما کے پاس بیٹھے ہوئے تھے، اسی دوران ان کا منشی ان کے پاس آیا تو سیدنا عبداللہ رضی اللہ عنہما نے دریافت کیا: ”کیا تم نے غلاموں کو ان کی خوراک دے دی ہے؟“ اس نے جواب دیا: جی نہیں، تو سیدنا عبداللہ رضی اللہ عنہما نے فرمایا: ”تم جاؤ اور وہ انہیں ادا کر دو، کیونکہ نبی اکرم صلی اللہ علیہ وسلم نے ارشاد فرمایا ہے: ”آدمی کے گنہگار ہونے کے لیے اتنا ہی کافی ہے کہ وہ ان لوگوں کو ادائیگی نہ کرے جن کی خوراک اس کے ذمے ہو۔““ [صحیح ابن حبان/كتاب الرضاع/حدیث: 4241]

اردو ترجمہ · UrduUnverified translation

سیدنا ثوبان رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”سب سے فضیلت والا دینار وہ ہے جسے آدمی اپنے بال بچوں پر خرچ کرتا ہے، اور وہ دینار ہے جسے آدمی اللہ کی راہ میں اپنی سواری پر خرچ کرتا ہے، اور وہ دینار ہے جسے آدمی اللہ کی راہ میں اپنے ساتھیوں پر خرچ کرتا ہے۔“ ابوقلابہ (نامی راوی) کہتے ہیں کہ نبی اکرم صلی اللہ علیہ وسلم نے پہلے بال بچوں کا ذکر کیا، پھر ابوقلابہ نے یہ کہا: اس شخص سے زیادہ اجر اور کسے ملے گا جو اپنے چھوٹے بال بچوں پر خرچ کرتا ہے، اللہ تعالیٰ اس شخص کی وجہ سے انہیں مانگنے سے محفوظ رکھتا ہے اور اللہ تعالیٰ اس شخص کی وجہ سے انہیں (دوسرے لوگوں سے) بے نیاز کر دیتا ہے۔ [صحیح ابن حبان/كتاب الرضاع/حدیث: 4242]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”سب سے بہتر صدقہ وہ ہے جو خوشحالی کے عالم میں دیا جائے (یعنی جسے کرنے کے بعد بھی آدمی خوشحال رہے) اور اوپر والا ہاتھ نیچے والے ہاتھ سے بہتر ہے اور تم (خرچ کرتے ہوئے) ان سے آغاز کرو جو تمہارے زیر کفالت ہیں۔“ [صحیح ابن حبان/كتاب الرضاع/حدیث: 4243]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں: ایک شخص نے عرض کی: یا رسول اللہ صلی اللہ علیہ وسلم ! میں اپنے ہاں زیر پرورش یتیم بچے کو کس چیز کے ذریعے ماروں؟ تو نبی اکرم صلی اللہ علیہ وسلم نے فرمایا: ”اس چیز سے جس کے ذریعے تم اپنے بیٹے کو مارتے ہو، تم اس زیر پرورش یتیم کے مال کے ذریعے اپنے مال کو بچانے کی کوشش نہ کرو اور اس کے ذریعے اپنے مال میں اضافہ کرنے کی کوشش نہ کرو۔“ [صحیح ابن حبان/كتاب الرضاع/حدیث: 4244]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”بیوہ عورتوں اور غریب لوگوں کی دیکھ بھال کرنے والا شخص اللہ کی راہ میں جہاد کرنے والے شخص کی مانند ہے“ (راوی کہتے ہیں) میرا خیال ہے روایت میں یہ الفاظ بھی ہیں: ”ایسے روزہ دار کی مانند ہے جو کوئی نفلی روزہ ترک نہیں کرتا اور ایسے نفل پڑھنے والے کی مانند ہے جو سوتا نہیں ہے۔“ (امام ابن حبان رحمہ اللہ فرماتے ہیں:) ابوالغیث نامی راوی کا نام سالم مولیٰ ابن مطیع ہے یہ بات شیخ نے بیان کی ہے۔ [صحیح ابن حبان/كتاب الرضاع/حدیث: 4245]

اردو ترجمہ · UrduUnverified translation

سیدہ زینب بنت ام سلمہ رضی اللہ عنہا اپنی والدہ سیدہ ام سلمہ رضی اللہ عنہا کا یہ بیان نقل کرتی ہیں: میں نے نبی اکرم صلی اللہ علیہ وسلم کی خدمت میں عرض کی: کیا سیدنا ابوسلمہ رضی اللہ عنہ کے بچوں کے حوالے سے مجھے کوئی اجر ملے گا؟ کیونکہ میں ان پر خرچ کرتی ہوں، وہ میری اولاد ہیں، میں انہیں اس حال میں ترک نہیں کر سکتی۔ سیدہ ام سلمہ رضی اللہ عنہا نے عرض کی: کیا مجھے اس کا اجر ملے گا یا نہیں ملے گا؟ تو نبی اکرم صلی اللہ علیہ وسلم نے ارشاد فرمایا: ”جی ہاں، تمہیں ان کے بارے میں اس چیز کا اجر ملے گا جو تم ان پر خرچ کرتی ہو۔“ [صحیح ابن حبان/كتاب الرضاع/حدیث: 4246]

اردو ترجمہ · UrduUnverified translation

عبیداللہ بن عبداللہ سیدنا عبداللہ بن مسعود رضی اللہ عنہ کی ام ولد سیدہ ریطہ رضی اللہ عنہا کے حوالے سے نقل کرتے ہیں کہ وہ ایک کاریگر خاتون تھیں، سیدنا عبداللہ بن مسعود رضی اللہ عنہ کے پاس مال نہیں تھا تو وہ خاتون سیدنا عبداللہ رضی اللہ عنہ اور ان کی اولاد پر اپنے ہنر کی آمدن خرچ کیا کرتی تھیں۔ ایک مرتبہ انہوں نے یہ کہا: ”اللہ کی قسم! آپ نے اور آپ کے بچوں نے مجھے صدقہ کرنے کے قابل نہیں رہنے دیا، میں آپ کی موجودگی میں صدقہ کرنے کی استطاعت نہیں رکھتی۔“ سیدنا عبداللہ بن مسعود رضی اللہ عنہ نے فرمایا: ”اگر اس میں اجر نہیں ہے، تو مجھے یہ بات پسند نہیں ہے کہ تم ایسا کرو۔“ پھر سیدنا عبداللہ بن مسعود رضی اللہ عنہ اور ان کی اہلیہ نے نبی اکرم صلی اللہ علیہ وسلم سے اس بارے میں دریافت کیا، اس خاتون نے عرض کی: ”یا رسول اللہ صلی اللہ علیہ وسلم ! میں ایک عورت ہوں جسے ایک ہنر آتا ہے، میں اس کام کو فروخت کر دیتی ہوں، میرا، میرے شوہر اور میری اولاد کا کوئی اور ذریعہ آمدن نہیں ہے، ان لوگوں کی وجہ سے میں صدقہ نہیں کر پاتی، تو کیا ان پر خرچ کرنے کا مجھے اجر ملے گا؟“ نبی کریم صلی اللہ علیہ وسلم نے فرمایا: ”تم ان پر جو خرچ کرتی ہو اس کا تمہیں اجر ملے گا، تم ان پر خرچ کرتی رہو۔“ [صحیح ابن حبان/كتاب الرضاع/حدیث: 4247]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ کی اہلیہ سیدہ زینب رضی اللہ عنہا بیان کرتی ہیں: نبی اکرم صلی اللہ علیہ وسلم نے ہم (خواتین) کو خطبہ دیتے ہوئے ارشاد فرمایا: ”اے خواتین کے گروہ! تم صدقہ کیا کرو، خواہ اپنے زیور ہی سے کرو؛ کیونکہ اہل جہنم میں اکثریت قیامت کے دن تمہاری ہوگی۔“ وہ خاتون بیان کرتی ہیں: سیدنا عبداللہ رضی اللہ عنہ کی آمدن بہت کم تھی، اس خاتون نے (سیدنا عبداللہ بن مسعود رضی اللہ عنہ سے) کہا: آپ نبی اکرم صلی اللہ علیہ وسلم سے میرے بارے میں دریافت کیجیے کہ اگر میں اپنے شوہر پر اور اپنے زیر پرورش یتیم بچوں پر خرچ کرتی ہوں، تو کیا ایسا کرنا میری طرف سے جائز ہوگا؟ وہ خاتون بیان کرتی ہیں: نبی اکرم صلی اللہ علیہ وسلم کا رعب بہت زیادہ تھا، سیدنا عبداللہ رضی اللہ عنہ نے کہا: نہیں، بلکہ تم خود نبی اکرم صلی اللہ علیہ وسلم سے سوال کرو۔ وہ خاتون کہتی ہیں: میں (نبی اکرم صلی اللہ علیہ وسلم کے ہاں) آئی تو وہاں دروازے پر انصار سے تعلق رکھنے والی ایک اور عورت بھی موجود تھی، اس کا بھی وہی مسئلہ تھا جو میرا تھا، اس عورت کا نام بھی زینب تھا۔ سیدنا بلال رضی اللہ عنہ باہر تشریف لائے، میں نے ان سے کہا: آپ نبی اکرم صلی اللہ علیہ وسلم سے ہمارے لیے مسئلہ دریافت کریں کہ ہم اپنے شوہروں اور اپنے زیر پرورش یتیم بچوں پر جو خرچ کرتی ہیں، کیا ہماری طرف سے یہ صدقہ کرنے کی جگہ کافی ہوگا؟ وہ خاتون بیان کرتی ہیں: سیدنا بلال رضی اللہ عنہ اندر گئے، انہوں نے عرض کی: یا رسول اللہ صلی اللہ علیہ وسلم ! دروازے پر زینب موجود ہیں۔ نبی اکرم صلی اللہ علیہ وسلم نے دریافت کیا: ”کون سی زینب؟“ سیدنا بلال رضی اللہ عنہ نے بتایا: سیدنا عبداللہ رضی اللہ عنہ کی اہلیہ زینب اور انصار سے تعلق رکھنے والی زینب، ان دونوں نے اپنے شوہروں پر اور اپنے زیر پرورش یتیم بچوں پر خرچ کرنے کے بارے میں دریافت کیا ہے: کیا یہ ان کی طرف سے صدقہ کی جگہ کافی ہوگا؟ تو نبی اکرم صلی اللہ علیہ وسلم نے فرمایا: ”جی ہاں! ان دونوں کو دگنا اجر ملے گا: رشتہ داری کے حقوق کی پاسداری کا اجر اور صدقہ کرنے کا اجر۔“ [صحیح ابن حبان/كتاب الرضاع/حدیث: 4248]

اردو ترجمہ · UrduUnverified translation

عامر بن سعد اپنے والد (سعد بن ابی وقاص رضی اللہ عنہ) کا یہ بیان نقل کرتے ہیں: فتح مکہ کے سال میں مکہ میں شدید بیمار ہو گیا یہاں تک کہ موت کے کنارے تک پہنچ گیا، نبی اکرم صلی اللہ علیہ وسلم میری عیادت کرنے کے لیے تشریف لائے، میں نے آپ کی خدمت میں عرض کی: یا رسول اللہ صلی اللہ علیہ وسلم ! میرے پاس بہت زیادہ مال ہے اور میری وارث صرف میری بیٹی ہے تو کیا میں اپنے دو تہائی مال کے بارے میں وصیت کر دوں؟ نبی اکرم صلی اللہ علیہ وسلم نے فرمایا: ”نہیں۔“ میں نے دریافت کیا: نصف؟ نبی اکرم صلی اللہ علیہ وسلم نے فرمایا: ”جی نہیں۔“ میں نے عرض کی: ایک تہائی؟ نبی اکرم صلی اللہ علیہ وسلم نے فرمایا: ”ایک تہائی کر دو ویسے ایک تہائی بھی زیادہ ہے۔ اگر تم اپنے ورثاء کو خوشحال چھوڑ کر جاتے ہو تو یہ اس سے زیادہ بہتر ہے کہ تم انہیں تنگ دست چھوڑ کر جاؤ اور وہ لوگوں سے مانگتے پھریں، تم اللہ تعالیٰ کی رضا کے حصول کے لیے جو کچھ بھی خرچ کرو گے اس کا تمہیں اجر ملے گا یہاں تک کہ جو لقمہ تم اپنی بیوی کے منہ کی طرف بڑھاؤ گے (اس کا بھی اجر ملے گا)۔“ میں نے عرض کی: یا رسول اللہ صلی اللہ علیہ وسلم ! کیا میں اپنی ہجرت سے پیچھے کر دیا جاؤں گا؟ نبی اکرم صلی اللہ علیہ وسلم نے فرمایا: ”بے شک تم میرے بعد بھی زندہ رہو گے تو اس کے نتیجے میں تمہاری قدر و منزلت اور درجے میں اضافہ ہو گا۔ ہو سکتا ہے تم میرے بعد زندہ رہو یہاں تک کہ بہت سے لوگ تم سے نفع حاصل کریں اور دوسرے لوگوں کو تم سے نقصان بھی ہو۔“ پھر آپ صلی اللہ علیہ وسلم نے دعا فرمائی: «اَللّٰهُمَّ أَمْضِ لِأَصْحَابِيْ هِجْرَتَهُمْ، وَلَا تَرُدَّهُمْ عَلٰى أَعْقَابِهِمْ» ”اے اللہ! میرے ساتھیوں کی ہجرت کو برقرار رکھنا اور انہیں ایڑیوں کے بل واپس نہ لوٹا دینا۔“ نیز نبی اکرم صلی اللہ علیہ وسلم نے فرمایا: ”البتہ سعد بن خولہ رضی اللہ عنہ پر افسوس ہے۔“ (راوی کہتے ہیں:) نبی اکرم صلی اللہ علیہ وسلم نے ان پر افسوس کا اظہار اس لیے کیا کیونکہ ان کا انتقال مکہ میں ہو گیا تھا۔ [صحیح ابن حبان/كتاب الرضاع/حدیث: 4249]

اردو ترجمہ · UrduUnverified translation

سیدہ فاطمہ بنت قیس رضی اللہ عنہا بیان کرتی ہیں کہ ان کے شوہر نے انہیں تین طلاقیں دے دیں تو نبی اکرم صلی اللہ علیہ وسلم نے انہیں خرچ اور رہائش کا حق نہیں دیا۔ راوی کہتے ہیں: میں نے اس روایت کا تذکرہ ابراہیم نخعی رحمہ اللہ سے کیا تو انہوں نے بتایا کہ سیدنا عمر بن خطاب رضی اللہ عنہ یہ فرماتے ہیں: ”ہم اپنے پروردگار کی کتاب اور اپنے نبی کی سنت (کا حکم) کسی عورت کے بیان کی وجہ سے نہیں چھوڑیں گے، ایسی عورت کو خرچ اور رہائش ملے گی۔“ [صحیح ابن حبان/كتاب الرضاع/حدیث: 4250]

اردو ترجمہ · UrduUnverified translation

سیدہ فاطمہ بنت قیس رضی اللہ عنہا بیان کرتی ہیں کہ نبی اکرم صلی اللہ علیہ وسلم کے زمانہ اقدس میں میرے شوہر نے مجھے طلاق دے دی تو نبی اکرم صلی اللہ علیہ وسلم نے فرمایا: ”تمہیں رہائش اور خرچ نہیں ملے گا۔“ [صحیح ابن حبان/كتاب الرضاع/حدیث: 4251]