Hadith 3336–3375

اردو ترجمہ · UrduUnverified translation

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص مرنے کے قریب صدقہ کرتا ہے اس کی مثال اس طرح ہے، جس طرح وہ خود سیر ہونے کے بعد کوئی چیز دیتا ہے۔“ [صحیح ابن حبان/كتاب الزكاة/حدیث: 3336]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک دن اپنے اصحاب سے فرمایا: ”تم لوگ صدقہ کرو۔“ ایک صاحب نے عرض کی: یا رسول اللہ صلی اللہ علیہ وسلم ! میرے پاس ایک دینار ہے۔ نبی اکرم صلی اللہ علیہ وسلم نے فرمایا: ”تم اس کو اپنے اوپر خرچ کرو۔“ اس نے عرض کی کہ اگر میرے پاس ایک اور ہو؟ نبی اکرم صلی اللہ علیہ وسلم نے فرمایا: ”تم اسے اپنی بیوی پر خرچ کرو۔“ اس نے عرض کی: اگر میرے پاس ایک اور ہو؟ تو نبی اکرم صلی اللہ علیہ وسلم نے فرمایا: ”تم اپنی اولاد پر خرچ کرو۔“ اس نے عرض کی: اگر میرے پاس ایک اور ہو؟ تو فرمایا: ”تم اس کو اپنے خادم پر خرچ کرو۔“ اس نے دریافت کیا: اگر میرے پاس ایک اور ہو؟ تو فرمایا: ”تم زیادہ سمجھ دار ہو۔“ (یعنی تمہیں خود اندازہ ہو گا اسے کسی پر خرچ کرنا چاہیے)۔ [صحیح ابن حبان/كتاب الزكاة/حدیث: 3337]

اردو ترجمہ · UrduUnverified translation

سیدنا ابومسعود رضی اللہ عنہ بیان کرتے ہیں: ہم لوگ اپنی پشتوں پر بوجھ لادا کرتے تھے (یعنی مزدوری کرتے تھے) اور پھر ہم میں سے کوئی شخص کوئی چیز لاتا اور اسے صدقہ کر دیتا تھا، ایک شخص نصف صاع لے آتا تھا اور ایک شخص اس سے تھوڑی سی زیادہ چیز لے آتا تھا، تو منافقین یہ کہتے تھے: اللہ تعالیٰ اس شخص کے صدقے سے بے نیاز ہے، اور وہ یہ کہتے تھے: یہ دکھاوے کے طور پر ہے، تو اللہ تعالیٰ نے اس بارے میں یہ آیت نازل فرمائی: ﴿الَّذِينَ يَلْمِزُونَ الْمُطَّوِّعِينَ مِنَ الْمُؤْمِنِينَ فِي الصَّدَقَاتِ وَالَّذِينَ لَا يَجِدُونَ إِلَّا جُهْدَهُمْ﴾ [سورة التوبة: 79] ”وہ لوگ جو اہل ایمان سے تعلق رکھنے والے افراد پر ان کے کیے گئے صدقے کے حوالے سے نکتہ چینی کرتے ہیں، (اور) وہ اہل ایمان جنہیں (صدقہ کرنے کے لیے) صرف اپنی محنت کی کمائی ملتی ہے۔“ [صحیح ابن حبان/كتاب الزكاة/حدیث: 3338]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں کہ بنو عذرہ سے تعلق رکھنے والے ایک شخص نے اپنے غلام کو مدبر کے طور پر آزاد کر دیا، نبی اکرم صلی اللہ علیہ وسلم نے اسے بلوایا، اسے فروخت کیا اور اس کی قیمت اس شخص کے سپرد کی اور پھر فرمایا: ”اپنی ذات سے آغاز کرو، اس پر خرچ کرو، پھر اپنے ماں باپ پر خرچ کرو، پھر اپنے قریبی رشتے داروں پر کرو، پھر اس طرح اور اس طرح کرو۔“ [صحیح ابن حبان/كتاب الزكاة/حدیث: 3339]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں کہ مدینہ منورہ میں سیدنا ابوطلحہ انصاری رضی اللہ عنہ کی زمینیں انصار میں سب سے زیادہ تھیں اور ان کے نزدیک ان کی سب سے پسندیدہ ملکیت ”بیرحاء“ نامی باغ تھا جو مسجد کے بالکل مدمقابل تھا۔ نبی اکرم صلی اللہ علیہ وسلم اس باغ میں تشریف لایا کرتے تھے اور اس کا میٹھا پانی پیا کرتے تھے۔ سیدنا انس رضی اللہ عنہ بیان کرتے ہیں کہ جب یہ آیت نازل ہوئی: ﴿لَن تَنَالُوا الْبِرَّ حَتَّىٰ تُنفِقُوا مِمَّا تُحِبُّونَ﴾ [سورة آل عمران: 92] ”تم لوگ اس وقت تک نیکی کو نہیں پہنچ سکتے جب تک تم اس چیز کو خرچ نہیں کرتے جسے تم پسند کرتے ہو۔“ تو سیدنا ابوطلحہ رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور انہوں نے عرض کی: یا رسول اللہ صلی اللہ علیہ وسلم ! اللہ تعالیٰ نے اپنی کتاب میں یہ بات ارشاد فرمائی ہے: ﴿لَن تَنَالُوا الْبِرَّ حَتَّىٰ تُنفِقُوا مِمَّا تُحِبُّونَ﴾ [سورة آل عمران: 92] ”تم لوگ اس وقت تک نیکی کو نہیں پہنچ سکتے جب تک اس چیز کو خرچ نہیں کرتے جسے تم پسند کرتے ہو۔“ میرے نزدیک میرا سب سے پسندیدہ مال ”بیرحاء“ ہے، یہ اللہ کے لیے صدقہ ہے، میں اس کے اجر و ثواب کا اللہ تعالیٰ کی بارگاہ میں امیدوار ہوں۔ یا رسول اللہ صلی اللہ علیہ وسلم ! آپ صلی اللہ علیہ وسلم جہاں چاہیں اسے خرچ کر دیں۔ نبی اکرم صلی اللہ علیہ وسلم نے ارشاد فرمایا: «بَخٍ ذٰلِكَ مَالٌ رَابِحٌ، ذٰلِكَ مَالٌ رَابِحٌ» ”بہت عمدہ! یہ فائدہ بخش مال ہے، بہت عمدہ! یہ فائدہ بخش مال ہے۔ تم نے اس کے بارے میں جو کہا میں نے وہ سن لیا ہے، میں سمجھتا ہوں کہ تم اس کو اپنے رشتے داروں میں بانٹ دو۔“ سیدنا ابوطلحہ رضی اللہ عنہ نے عرض کی: یا رسول اللہ صلی اللہ علیہ وسلم ! میں ایسا ہی کروں گا۔ (سیدنا انس رضی اللہ عنہ بیان کرتے ہیں:) تو سیدنا ابوطلحہ رضی اللہ عنہ نے اپنے قریبی رشتے داروں اور اپنے چچا زاد بھائیوں میں اسے تقسیم کر دیا۔ [صحیح ابن حبان/كتاب الزكاة/حدیث: 3340]

اردو ترجمہ · UrduUnverified translation

سیدنا طارق محاربی رضی اللہ عنہ بیان کرتے ہیں: پھر میں مدینہ منورہ آیا، وہاں نبی اکرم صلی اللہ علیہ وسلم کھڑے ہوئے لوگوں کو خطبہ دے رہے تھے، آپ صلی اللہ علیہ وسلم نے یہ بات ارشاد فرمائی: ”دینے والا ہاتھ اوپر والا ہے اور تم اپنے زیر کفالت (پر خرچ کرنے) سے آغاز کرو جو تمہاری والدہ، تمہارا باپ، تمہاری بہن، تمہارا بھائی ہے اور پھر درجہ بد درجہ قریبی عزیز ہیں۔“ [صحیح ابن حبان/كتاب الزكاة/حدیث: 3341]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں کہ ایک شخص کا نام ابومذکور تھا، اس نے اپنے غلام کو مدبر کے طور پر آزاد کر دیا، اس شخص کے پاس اس غلام کے علاوہ کوئی مال نہیں تھا۔ غلام کا نام یعقوب تھا۔ نبی اکرم صلی اللہ علیہ وسلم نے دریافت کیا: ”اسے کون خریدے گا؟“ تو بنو عدی سے تعلق رکھنے والے ایک شخص نے آٹھ سو درہم میں اسے خرید لیا۔ نبی اکرم صلی اللہ علیہ وسلم نے ارشاد فرمایا: ”جب کوئی شخص غریب ہو، تو اسے اپنی ذات سے آغاز کرنا چاہیے، اگر اس کے پاس اضافی مال ہو، تو اپنی بیوی پر خرچ کرے، اگر اضافی مال ہو، تو اپنے قریبی رشتے داروں پر خرچ کرے، اگر پھر بھی اضافی ہو، تو یہاں اور وہاں خرچ کرے۔“ [صحیح ابن حبان/كتاب الزكاة/حدیث: 3342]

اردو ترجمہ · UrduUnverified translation

سیدہ میمونہ بنت حارث رضی اللہ عنہا کے بارے میں یہ بات منقول ہے کہ نبی اکرم صلی اللہ علیہ وسلم کے زمانہ اقدس میں انہوں نے اپنی کنیز کو آزاد کر دیا، انہوں نے اس بات کا تذکرہ نبی اکرم صلی اللہ علیہ وسلم سے کیا، تو نبی اکرم صلی اللہ علیہ وسلم نے ارشاد فرمایا: ”اگر تم اسے اپنے ماموں کو دے دیتی، تو یہ تمہارے لیے زیادہ اجر کا باعث ہوتا۔“ [صحیح ابن حبان/كتاب الزكاة/حدیث: 3343]

اردو ترجمہ · UrduUnverified translation

سیدنا سلمان بن عامر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”غریب کو صدقہ دینا صدقہ ہے اور رشتے دار کو صدقہ دینے میں دو پہلو ہیں: صدقہ کرنا اور صلہ رحمی کرنا۔“ [صحیح ابن حبان/كتاب الزكاة/حدیث: 3344]

اردو ترجمہ · UrduUnverified translation

سیدنا جابر بن عبداللہ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”سب سے افضل صدقہ وہ ہے جو خوشحالی کے عالم میں دیا جائے اور تم ان سے آغاز کرو جو تمہارے زیر کفالت ہیں۔“ [صحیح ابن حبان/كتاب الزكاة/حدیث: 3345]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں، انہوں نے عرض کی: یا رسول اللہ صلی اللہ علیہ وسلم ! کون سا صدقہ زیادہ فضیلت رکھتا ہے؟ نبی اکرم صلی اللہ علیہ وسلم نے فرمایا: ”جس شخص کے پاس پیسے تھوڑے ہوں وہ محنت کر کے صدقہ کرے اور تم اپنے زیر کفالت سے آغاز کرو۔“ [صحیح ابن حبان/كتاب الزكاة/حدیث: 3346]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: ”بعض اوقات ایک درہم ایک لاکھ درہموں پر سبقت لے جاتا ہے۔“ ایک صاحب نے دریافت کیا: یا رسول اللہ صلی اللہ علیہ وسلم ! وہ کیسے؟ نبی اکرم صلی اللہ علیہ وسلم نے فرمایا: ”ایک شخص کے پاس بہت زیادہ مال ہوتا ہے وہ اپنے مال میں سے ایک لاکھ درہم لیتا ہے اور انہیں صدقہ کر دیتا ہے اور ایک شخص کے پاس صرف دو درہم ہوتے ہیں وہ ان میں سے ایک لے کر اسے صدقہ کر دیتا ہے۔“ [صحیح ابن حبان/كتاب الزكاة/حدیث: 3347]

اردو ترجمہ · UrduUnverified translation

سیدنا سعد بن عبادہ رضی اللہ عنہ بیان کرتے ہیں: میں نے عرض کی: ”یا رسول اللہ صلی اللہ علیہ وسلم ! کون سا صدقہ زیادہ فضیلت رکھتا ہے؟“ نبی اکرم صلی اللہ علیہ وسلم نے فرمایا: ”پانی پلانا۔“ [صحیح ابن حبان/كتاب الزكاة/حدیث: 3348]

اردو ترجمہ · UrduUnverified translation

سیدنا ابوذر غفاری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”تین لوگوں کو اللہ تعالیٰ پسند کرتا ہے اور تین لوگوں کو ناپسند کرتا ہے؛ جہاں تک ان لوگوں کا تعلق ہے جنہیں اللہ تعالیٰ پسند کرتا ہے، تو ایک وہ شخص ہے جو کچھ لوگوں کے پاس آئے اور ان سے اللہ کے نام پر کچھ مانگے، وہ ان کے ساتھ اپنی رشتے داری کی وجہ سے کچھ نہ مانگے، پھر ایک شخص ان کے پیچھے رہ جائے اور پوشیدہ طور پر اسے کچھ دے دے، اس عطیے کے بارے میں اللہ تعالیٰ کے علاوہ اور جس نے اسے دیا ہے اس کے علاوہ اور کسی کو علم نہ ہو۔ دوسرے وہ لوگ جو رات بھر سفر کرتے رہے، یہاں تک کہ جب وہ پڑاؤ کریں تو ان کے نزدیک نیند سب سے زیادہ پیاری ہو اور وہ سر رکھ کر سو جائیں، اور ان میں سے ایک شخص کھڑا ہو کر میری (یعنی اللہ تعالیٰ کی) خوشامد کرے اور میری آیات کی تلاوت کرے۔ اور ایک وہ شخص جو کسی مہم پر روانہ ہو، ان کا دشمنوں سے سامنا ہو تو وہ لوگ پسپا ہو جائیں، لیکن وہ شخص آگے بڑھے اور پھر یا قتل ہو جائے یا اسے فتح نصیب ہو۔ جہاں تک ان تین لوگوں کا تعلق ہے جنہیں اللہ تعالیٰ ناپسند کرتا ہے، تو وہ یہ ہیں: ایک بوڑھا زانی، دوسرا غریب متکبر اور تیسرا ظالم خوشحال شخص۔“ [صحیح ابن حبان/كتاب الزكاة/حدیث: 3349]

اردو ترجمہ · UrduUnverified translation

سیدنا ابوذر غفاری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”تین لوگوں کو اللہ تعالیٰ پسند کرتا ہے اور تین لوگوں کو ناپسند کرتا ہے۔ اللہ تعالیٰ ایسے شخص کو پسند کرتا ہے جو کچھ لوگوں میں موجود ہو، کوئی مانگنے والا ان کے پاس آئے اور اللہ کے نام پر ان سے مانگے، وہ ان لوگوں کے ساتھ اپنی کسی رشتہ داری کی وجہ سے ان سے نہ مانگے، تو وہ لوگ کنجوسی کا مظاہرہ کریں (اور اسے کچھ نہ دیں)، ان میں سے ایک شخص انہیں چھوڑ کر پیچھے رہ جائے اور ایسی جگہ (اس سائل سے ملے) جہاں اللہ تعالیٰ کے علاوہ اسے کوئی نہ دیکھ رہا ہو اور وہ شخص اسے کچھ دے دے۔ ایک وہ شخص جو کسی مہم پر ہو اور وہ لوگ بکھر جائیں، تو وہ تکبیر کہتے ہوئے لڑائی میں کود پڑے، یہاں تک کہ اللہ تعالیٰ اسے فتح نصیب کر دے یا وہ شہید ہو جائے۔ ایک وہ شخص جو کچھ لوگوں کے ہمراہ رات کے وقت سفر کر رہا ہو، جب رات زیادہ ہو جائے اور وہ لوگ کسی جگہ پڑاؤ کریں اور اس وقت نیند ان کے نزدیک سب سے زیادہ پیاری ہو، وہ لوگ سو جائیں اور وہ شخص کھڑا ہو کر آیات کی تلاوت کرے اور میری بارگاہ میں التجا کرے، اور اللہ تعالیٰ بوڑھے زانی، کنجوس اور متکبر کو پسند نہیں کرتا۔“ راوی نے تیسرے شخص کا بھی ذکر کیا تھا۔ [صحیح ابن حبان/كتاب الزكاة/حدیث: 3350]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”غریب وہ نہیں ہے جو ایک یا دو کھجوریں لے کر یا ایک یا دو لقمے لے کر واپس چلا جائے، غریب وہ شخص ہے جس کے پاس وہ چیز نہ ہو جو اس کی ضروریات کو پورا کرے اور اس کے حاجت مند ہونے کا پتہ بھی نہ چل سکے کہ اسے صدقہ ہی کر دیا جائے، «الْمَحْرُومُ» ﴿وَالْمَحْرُومِ﴾ [سورة الذاريات: 19] سے مراد یہ شخص ہے (جس کا ذکر قرآن میں ہے)۔“ [صحیح ابن حبان/كتاب الزكاة/حدیث: 3351]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”غریب وہ نہیں ہوتا جو لوگوں کے گھر چکر لگاتا ہے، ایک یا دو لقمے لے کر ایک یا دو کھجوریں لے کر واپس چلا جاتا ہے۔“ لوگوں نے دریافت کیا: یا رسول اللہ صلی اللہ علیہ وسلم ! پھر غریب کون ہوتا ہے؟ نبی اکرم صلی اللہ علیہ وسلم نے فرمایا: ”وہ شخص جس کے پاس اپنی ضرورت پوری کرنے کے لیے کوئی چیز نہ ہو اور اس کی حالت کا پتہ بھی نہ چل سکے کہ اسے صدقہ ہی کر دیا جائے اور وہ خود کھڑا ہو کر لوگوں سے مانگتا بھی نہیں ہے۔“ [صحیح ابن حبان/كتاب الزكاة/حدیث: 3352]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ ایک شخص نے نبی اکرم صلی اللہ علیہ وسلم کی خدمت میں عرض کی: میری والدہ کا اچانک انتقال ہو گیا، میرا خیال ہے، اگر انہیں بات کرنے کا موقع ملتا، تو وہ صدقہ کرنے کے لیے کہتیں، کیا میں ان کی طرف سے صدقہ کر دوں؟ نبی اکرم صلی اللہ علیہ وسلم نے ارشاد فرمایا: ”جی ہاں۔“ [صحیح ابن حبان/كتاب الزكاة/حدیث: 3353]

اردو ترجمہ · UrduUnverified translation

سعید بن عمرو اپنے والد کے حوالے سے اپنے دادا کا یہ بیان نقل کرتے ہیں: سیدنا سعد بن عبادہ رضی اللہ عنہ نبی اکرم صلی اللہ علیہ وسلم کے ہمراہ کسی جنگ میں شرکت کے لیے چلے گئے، مدینہ منورہ میں ان کی والدہ کا انتقال ہو گیا، ان سے کہا گیا: آپ کوئی تلقین کیجیے۔ انہوں نے فرمایا: میں کس بات کی وصیت کروں؟ سارا مال تو سعد کا ہے، پھر سیدنا سعد رضی اللہ عنہ کے واپس آنے سے پہلے ان کا انتقال ہو گیا، جب سیدنا سعد رضی اللہ عنہ تشریف لائے اور ان کے سامنے اس بات کا تذکرہ کیا گیا، تو سیدنا سعد رضی اللہ عنہ نے دریافت کیا: یا رسول اللہ صلی اللہ علیہ وسلم ! اگر میں ان کی طرف سے صدقہ کروں، تو کیا انہیں فائدہ ہو گا؟ نبی اکرم صلی اللہ علیہ وسلم نے ارشاد فرمایا: ”جی ہاں۔“ تو سیدنا سعد رضی اللہ عنہ نے کہا: فلاں فلاں باغ ان کی طرف سے صدقہ ہے، انہوں نے اس باغ کا نام بھی لیا تھا۔ [صحیح ابن حبان/كتاب الزكاة/حدیث: 3354]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک مرتبہ ایک شخص ایک ویران جگہ پر موجود تھا، اس نے ایک بادل میں آواز سنی (یعنی کسی فرشتے نے بادل کو حکم دیا): «اِسْقِ حَدِيقَةَ فُلَانٍ» ”تم فلاں شخص کے باغ کو سیراب کرو“، پھر وہ بادل وہاں سے ہٹا اور اس نے ایک پتھریلی زمین پر اپنا سارا پانی برسا دیا، وہ شخص کہتا ہے کہ جب میں اس جگہ پہنچا تو وہاں سے کچھ نالیاں نکل رہی تھیں، ان میں سے ایک نالی اس تمام پانی کو سمیٹے ہوئے تھی، میں اس پانی کے پیچھے ہولیا یہاں تک کہ ایک شخص کے پاس پہنچا جو کھڑا ہوا بیلچے کے ذریعے اپنے باغ میں کام کر رہا تھا اور پانی لگا رہا تھا، میں نے اس سے دریافت کیا: اے اللہ کے بندے! تمہارا نام کیا ہے؟ اس نے جواب دیا: فلاں، اور یہ وہی نام تھا جو اس شخص نے بادل میں سنا تھا، اس (باغ والے) شخص نے دریافت کیا: اے اللہ کے بندے! تم مجھ سے میرا نام کیوں پوچھ رہے ہو؟ اس نے بتایا: میں نے بادل میں جس سے یہ پانی آیا ہے، یہ سنا تھا کہ فرشتہ کہہ رہا تھا کہ تم فلاں بندے کے باغ کو سیراب کرو اور اس نے تمہارا نام لیا تھا، تو تم مجھے بتاؤ کہ تم اس باغ میں کیا کرتے ہو؟ اس نے کہا: اب جب کہ تم نے یہ بات پوچھ ہی لی ہے تو میں تمہیں بتا دیتا ہوں کہ اس کی جتنی بھی پیداوار ہوتی ہے، میں اس کے ایک تہائی حصے کو صدقہ کر دیتا ہوں، ایک تہائی حصہ اپنے اوپر اور اپنے اہل و عیال پر خرچ کرتا ہوں اور ایک تہائی حصہ دوبارہ اس (کی اصلاح) پر لگا دیتا ہوں۔“ [صحیح ابن حبان/كتاب الزكاة/حدیث: 3355]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ایک شخص نے طے کیا کہ میں ضرور صدقہ کروں گا، وہ اپنے صدقے کو لے کر نکلا اور (اندھیرے میں لاعلمی کی وجہ سے) کسی زانیہ عورت کے ہاتھ میں رکھ آیا، اگلے دن لوگ آپس میں بات چیت کر رہے تھے کہ گزشتہ رات ایک زانیہ عورت کو کسی نے صدقہ دیا ہے، تو اس شخص نے کہا: اے اللہ! حمد تیرے لیے مخصوص ہے (اگرچہ میرا صدقہ) زانیہ عورت کو ملا ہے، میں ضرور پھر صدقہ کروں گا؛ پھر وہ شخص اپنے صدقے کو لے کر نکلا اور اس نے (اندھیرے میں لاعلمی کی وجہ سے) کسی چور کے ہاتھ میں اسے رکھ دیا، اگلے روز لوگ بات چیت کر رہے تھے کہ گزشتہ رات کسی چور کو صدقہ دیا گیا ہے، تو وہ شخص بولا: اے اللہ! حمد تیرے لیے مخصوص ہے (اگرچہ میرا صدقہ) ایک چور کے ہاتھ میں چلا گیا ہے، میں آج بھی ضرور صدقہ کروں گا؛ پھر وہ شخص اپنا صدقہ لے کر نکلا اور اس نے اسے ایک خوشحال شخص کے ہاتھ پر رکھ دیا، اگلے دن لوگ بات کر رہے تھے کہ گزشتہ رات ایک خوشحال شخص کو صدقہ دے دیا گیا، تو وہ شخص بولا: اے اللہ! حمد تیرے لیے مخصوص ہے (اگرچہ میرا صدقہ) ایک خوشحال شخص کو ملا ہے؛ پھر اسے (اللہ تعالیٰ کی بارگاہ میں) لایا گیا تو اسے بتایا گیا: جہاں تک تمہارے صدقے کا تعلق ہے، تو وہ قبول ہو گیا ہے؛ زانیہ عورت کو ملنے والا اس لیے قبول ہوا کہ شاید وہ اس کے ملنے کی وجہ سے زنا کرنے سے باز آ جائے، چور والا اس لیے قبول ہوا کہ شاید وہ اس کی وجہ سے چوری سے بچ جائے، اور خوشحال شخص والا اس لیے قبول ہوا کہ وہ اس سے نصیحت حاصل کرے اور اللہ تعالیٰ نے جو اسے عطا کیا ہے وہ اس میں سے کچھ خرچ کرے۔“ [صحیح ابن حبان/كتاب الزكاة/حدیث: 3356]

اردو ترجمہ · UrduUnverified translation

سیدہ اسماء بنت ابوبکر رضی اللہ عنہما بیان کرتی ہیں: میں نبی اکرم صلی اللہ علیہ وسلم کی خدمت میں حاضر ہوئی، انہوں نے عرض کی: اللہ کے نبی صلی اللہ علیہ وسلم ! میرے پاس صرف وہی چیز ہوتی ہے، جو سیدنا زبیر رضی اللہ عنہ مجھے دیتے ہیں، تو وہ مجھے جو دیتے ہیں اگر اس میں سے کچھ خرچ کر لوں، تو کیا مجھ پر کوئی گناہ ہو گا۔ نبی اکرم صلی اللہ علیہ وسلم نے فرمایا: ”تم سے جہاں تک ہو سکے تم خرچ کرو اور تم (خرچ کرتے ہوئے) بندش کرنے کی کوشش نہ کرنا ورنہ اللہ تعالیٰ بھی تم پر بندش کر دے گا۔“ [صحیح ابن حبان/كتاب الزكاة/حدیث: 3357]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”جب کوئی عورت اپنے شوہر کے گھر میں سے، کوئی خرابی پیدا کیے بغیر، صدقہ کرتی ہے تو اس عورت کو اس کا اجر ملتا ہے، اس کے شوہر کو اس کا اجر ملتا ہے، آدمی کو کمانے کا اجر ملتا ہے اور عورت کو اس کی نیت کا اجر ملتا ہے اور خزانچی کی مثال بھی اسی کی مانند ہے۔“ [صحیح ابن حبان/كتاب الزكاة/حدیث: 3358]

اردو ترجمہ · UrduUnverified translation

سیدنا ابوموسیٰ اشعری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”امانت دار مسلمان خزانچی جو خرچ کرتا ہے (راوی کو شک ہے شاید یہ الفاظ ہیں) جو کچھ وہ عطا کرتا ہے، جس کا اسے حکم دیا گیا ہے اور وہ اسے کامل طور پر پورا اور اپنی رضا مندی کے ساتھ دیتا ہے اور اس شخص کے سپرد کرتا ہے، جسے دینے کا حکم دیا گیا تھا، تو وہ خزانچی بھی صدقہ کرنے والوں میں سے ایک شمار ہوتا ہے۔“ [صحیح ابن حبان/كتاب الزكاة/حدیث: 3359]

اردو ترجمہ · UrduUnverified translation

سیدنا عمیر رضی اللہ عنہ جو سیدنا آبی لحم رضی اللہ عنہ کے غلام ہیں، وہ بیان کرتے ہیں: میں غلام تھا، میں اپنے آقا کے گوشت میں سے کچھ گوشت صدقہ کر دیا کرتا تھا، میں نے اس بارے میں نبی اکرم صلی اللہ علیہ وسلم سے دریافت کیا تو آپ صلی اللہ علیہ وسلم نے ارشاد فرمایا: ”تم صدقہ کرو، اجر تم دونوں کے درمیان برابر برابر تقسیم ہو گا۔“ (امام ابن حبان رحمہ اللہ فرماتے ہیں): اس روایت میں یہ بات پوشیدہ ہے کہ انہوں نے اپنے آقا کی اجازت کے تحت صدقہ کیا تھا، تو اجازت کا ذکر اس روایت میں پوشیدہ ہے۔ سیدنا عمیر رضی اللہ عنہ، سیدنا آبی لحم رضی اللہ عنہ کے غلام ہیں، یہ بات بیان کی گئی ہے۔ سیدنا آبی لحم رضی اللہ عنہ کا یہ نام اس لیے تھا کیونکہ انہوں نے زمانہ جاہلیت میں گوشت کھانا اپنے لیے حرام قرار دیا تھا اور گوشت کھانے سے انکار کر دیا تھا، اسی لیے انہیں «آبِي اللَّحْمِ» ”آبی لحم“ کہا جاتا تھا (یعنی گوشت سے انکار کرنے والا شخص)۔ محمد بن زید نامی راوی محمد بن زید بن مہاجر بن قنفر جدعانی قرشی ہیں، انہوں نے سیدنا عبداللہ بن عمر رضی اللہ عنہما اور سیدنا معاویہ بن ابوسفیان رضی اللہ عنہ سے احادیث کا سماع کیا ہے، جبکہ امام مالک اور اہل مدینہ نے ان کے حوالے سے روایات نقل کی ہیں۔ [صحیح ابن حبان/كتاب الزكاة/حدیث: 3360]

اردو ترجمہ · UrduUnverified translation

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اوپر والا ہاتھ نیچے والے ہاتھ سے بہتر ہے۔“ [صحیح ابن حبان/كتاب الزكاة/حدیث: 3361]

اردو ترجمہ · UrduUnverified translation

سیدنا مالک بن نضلہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ہاتھ تین طرح کے ہوتے ہیں، اوپر والا ہاتھ اللہ تعالیٰ کا ہے، دینے والا ہاتھ اس کے بعد ہے اور نیچے والا ہاتھ مانگنے والے کا ہے، تو تم اضافی چیز کو دے دیا کرو اور اپنی ذات کے حوالے سے عاجز نہ آؤ۔“ (امام ابن حبان رحمہ اللہ فرماتے ہیں:) اس روایت میں اس بات کا واضح بیان موجود ہے کہ وہ روایات، جنہیں ہم اس سے پہلے اپنی کتاب میں ذکر کر چکے ہیں، اوپر والا ہاتھ نیچے والے ہاتھ سے بہتر ہے، اس سے مراد یہ ہے کہ دینے والے کا ہاتھ لینے والے سے بہتر ہوتا ہے، اگرچہ اس نے مانگا نہ ہو۔ ابوزعراء نامی راوی صغیر ہے، اس کا نام عمرو بن عمرو بن مالک ہے، (مالک کا باپ) ابواحوص کا بھائی ہے، جبکہ ابوزعراء کبیر کا نام عبداللہ بن ہانی ہے، اس نے سیدنا عبداللہ بن مسعود رضی اللہ عنہ سے روایات نقل کی ہیں۔ [صحیح ابن حبان/كتاب الزكاة/حدیث: 3362]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”سب سے بہتر صدقہ وہ ہے، جو خوشحالی کے عالم میں دیا جائے (یا جسے دینے کے بعد آدمی خوشحال رہے) اور اوپر والا ہاتھ نیچے والے ہاتھ سے بہتر ہے اور تم میں سے ہر شخص کو اپنے زیرِ کفالت سے آغاز کرنا چاہیے، کیونکہ اس کی بیوی کہے گی تم مجھ پر خرچ کرو، اس کی اولاد کہے گی تم مجھے کس کے حوالے کر رہے ہو، اس کا غلام کہے گا مجھے کھانے کے لیے دو پھر مجھ سے کام لینا۔“ (امام ابن حبان رحمہ اللہ فرماتے ہیں:): نبی اکرم صلی اللہ علیہ وسلم کا یہ فرمان ”اوپر والا ہاتھ نیچے والے ہاتھ سے بہتر ہوتا ہے۔“ میرے نزدیک اس سے مراد یہ ہے: صدقہ دینے والے شخص کا ہاتھ مانگنے والے ہاتھ سے افضل ہوتا ہے۔ اس سے یہ مراد نہیں ہے کہ مانگے بغیر لینے والے سے افضل ہوتا ہے، کیونکہ یہ بات ناممکن ہے کہ وہ ہاتھ جس کے لیے کسی فعل کے کرنے کو مباح قرار دیا گیا ہو، وہ اس مباح فعل پر عمل کرنے کی وجہ سے اس دوسرے شخص سے کم تر ہو جائے جس پر کسی کام کے کرنے کو فرض قرار دیا گیا ہو اور وہ اسے سرانجام دے، یا وہ دوسرا شخص کسی نفلی کام کے ذریعے اللہ تعالیٰ کی بارگاہ میں قرب حاصل کرنا چاہیے۔ بعض اوقات دینے والا شخص اپنے دینے میں کم اسباب اختیار کرتا ہے اس شخص کے مقابلے میں جس کے لیے اسے (لینا) مباح قرار دیا گیا ہے، اور بعض اوقات لینے والا شخص جس کے لیے اس کو مباح قرار دیا گیا ہے وہ زیادہ فضیلت رکھتا ہے اور اس شخص سے زیادہ پرہیزگار ہوتا ہے جو دے رہا ہے، تو جب کسی ایک کو افضل قرار دیے بغیر یہ اطلاق ناممکن ہو تو یہ بات ثابت ہو جاتی ہے کہ صدقہ دینے والا شخص اس شخص سے افضل ہے جو اسے مانگتا ہے۔ [صحیح ابن حبان/كتاب الزكاة/حدیث: 3363]

اردو ترجمہ · UrduUnverified translation

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”اوپر والا ہاتھ نیچے والے ہاتھ سے بہتر ہے، اوپر والا ہاتھ خرچ کرنے والا ہے اور نیچے والا ہاتھ مانگنے والا ہے۔“ [صحیح ابن حبان/كتاب الزكاة/حدیث: 3364]

اردو ترجمہ · UrduUnverified translation

سیدہ عائشہ رضی اللہ عنہا بیان کرتی ہیں کہ ایک مرتبہ ایک مانگنے والا ان کے ہاں آیا، سیدہ عائشہ رضی اللہ عنہا نے اسے کچھ دینے کی ہدایت کی، جب خادمہ اسے لے کر باہر نکلی، تو سیدہ عائشہ رضی اللہ عنہا نے اسے بلوایا، پھر سیدہ عائشہ رضی اللہ عنہا نے نبی اکرم صلی اللہ علیہ وسلم کی طرف دیکھا، تو نبی اکرم صلی اللہ علیہ وسلم نے ارشاد فرمایا: ”تم اپنے علم کے ساتھ ہی چیز باہر نکالتی ہو (یعنی تم جو بھی خیرات کرتی ہو اسے پہلے دیکھتی ہو پھر کرتی ہو)۔“ سیدہ عائشہ رضی اللہ عنہا نے عرض کی کہ میں پہلے جانتی ہوں، تو نبی اکرم صلی اللہ علیہ وسلم نے ان سے فرمایا: ”تم شمار نہ کرو ورنہ اللہ تعالیٰ بھی گنتی کر کے تمہیں دے گا۔“ [صحیح ابن حبان/كتاب الزكاة/حدیث: 3365]

اردو ترجمہ · UrduUnverified translation

مصعب بن سعد بیان کرتے ہیں کہ سیدنا عبداللہ بن عمر رضی اللہ عنہما، سیدنا ابن عامر رضی اللہ عنہما کی عیادت کرنے کے لیے تشریف لائے تو انہوں نے فرمایا: اے ابن عمر! کیا آپ میرے لیے دعا نہیں کریں گے؟ تو سیدنا عبداللہ بن عمر رضی اللہ عنہما نے فرمایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اللہ تعالیٰ وضو کے بغیر نماز کو قبول نہیں کرتا اور حرام مال میں سے دیے گئے صدقے کو قبول نہیں کرتا“ اور تم بصرہ کے گورنر رہ چکے ہو (جہاں سے تمہیں آمدن ہوئی تھی)۔ [صحیح ابن حبان/كتاب الزكاة/حدیث: 3366]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص حرام طور پر مال جمع کرے اور پھر اسے صدقہ کرے، اسے اس کا کوئی اجر نہیں ملے گا، اس کا وبال اس شخص کے ذمے ہو گا۔“ [صحیح ابن حبان/كتاب الزكاة/حدیث: 3367]

اردو ترجمہ · UrduUnverified translation

سیدنا جابر رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں کہ ایک مرتبہ آپ صلی اللہ علیہ وسلم سیدہ ام مبشر انصاریہ رضی اللہ عنہا کے باغ میں ان کے ہاں تشریف لے گئے، نبی اکرم صلی اللہ علیہ وسلم نے ان سے فرمایا: ”یہ باغ کس نے لگایا ہے؟ کسی مسلمان نے یا کافر نے؟“ انہوں نے جواب دیا: مسلمان نے۔ نبی اکرم صلی اللہ علیہ وسلم نے فرمایا: ”مسلمان جو بھی باغ لگاتا ہے یا کھیت لگاتا ہے، تو اس میں سے جو بھی انسان یا جانور یا جو بھی چیز کچھ کھاتے ہیں، تو یہ اس کے لیے صدقہ ہوتی ہے۔“ [صحیح ابن حبان/كتاب الزكاة/حدیث: 3368]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”مسلمان جو بھی باغ لگاتا ہے اور اس میں سے کوئی بھی درندہ یا پرندہ جو بھی کوئی چیز کھاتے ہیں، تو اس شخص کو اس کا اجر ملتا ہے۔“ [صحیح ابن حبان/كتاب الزكاة/حدیث: 3369]

اردو ترجمہ · UrduUnverified translation

عبدالرحمن بن کعب اپنے والد کعب بن مالک رضی اللہ عنہ کا بیان نقل کرتے ہیں کہ میں کبھی بھی کسی غزوہ میں نبی اکرم صلی اللہ علیہ وسلم سے پیچھے نہیں رہا، یہاں تک کہ غزوہ تبوک کا موقع آ گیا، البتہ میں غزوہ بدر میں شریک نہیں ہوا تھا، لیکن نبی اکرم صلی اللہ علیہ وسلم نے ایسے کسی شخص پر ناراضگی کا اظہار نہیں کیا تھا جو غزوہ بدر میں شریک نہیں ہوا تھا، نبی اکرم صلی اللہ علیہ وسلم دراصل قریش کے قافلے کی تلاش میں نکلے تھے اور قریش اپنے قافلے کی مدد کرنے کے لیے نکلے تھے، پہلے سے طے شدہ صورت حال کے بغیر دونوں لشکروں کا سامنا ہو گیا جس طرح اللہ تعالیٰ نے ارشاد فرمایا ہے۔ اور مجھے اپنی زندگی کی قسم! نبی اکرم صلی اللہ علیہ وسلم کے غزوات میں لوگوں کے نزدیک سب سے زیادہ باعث شرف بدر ہے، لیکن میری یہ خواہش نہیں ہے کہ میں اس میں شریک ہوا ہوتا اس کے بدلے میں کہ مجھے شب عقبہ میں بیعت کرنے کا شرف حاصل ہے، جب ہم نے اسلام پر ثابت قدم رہنے کا عہد کیا تھا؛ اس کے بعد نبی اکرم صلی اللہ علیہ وسلم نے جس بھی غزوہ میں شرکت کی میں پیچھے نہیں رہا، یہاں تک کہ غزوہ تبوک کا موقع آیا، وہ آخری غزوہ ہے جس میں نبی اکرم صلی اللہ علیہ وسلم نے شرکت کی۔ نبی اکرم صلی اللہ علیہ وسلم نے لوگوں کو روانگی کی اطلاع دی اور آپ صلی اللہ علیہ وسلم نے یہ ارادہ کیا کہ وہ لوگ جنگ میں حصہ لینے کی پوری طرح تیاری کر لیں۔ یہ اس وقت کی بات ہے جب سائے پاکیزہ ہو گئے تھے اور پھل تیار ہو چکے تھے۔ نبی اکرم صلی اللہ علیہ وسلم کا یہ معمول تھا کہ جب بھی آپ صلی اللہ علیہ وسلم کسی جنگ میں حصہ لیتے تھے تو اس کی سمت کا تعین نہیں کرتے تھے، آپ صلی اللہ علیہ وسلم یہ فرماتے تھے: «الْحَرْبُ خُدْعَةٌ» ”جنگ دھوکہ دینے کا نام ہے“، لیکن نبی اکرم صلی اللہ علیہ وسلم غزوہ تبوک کے بارے میں یہ چاہتے تھے کہ لوگ اچھی طرح سے تیاری کر لیں، میں اس وقت پہلے سے زیادہ خوشحال تھا، میں نے اپنی دو سواریاں بھی تیار کر لی تھیں، میں اسی حالت میں رہا یہاں تک کہ نبی اکرم صلی اللہ علیہ وسلم نے اگلے دن جانے کی تیاری کر لی، یہ جمعرات کے دن کی بات ہے۔ نبی اکرم صلی اللہ علیہ وسلم کو جمعرات کے دن روانہ ہونا پسند تھا، آپ صلی اللہ علیہ وسلم صبح کے وقت روانہ ہوئے، میں نے سوچا میں بازار جاتا ہوں اور سامان خریدتا ہوں پھر نبی اکرم صلی اللہ علیہ وسلم سے جا ملوں گا، میں اگلے دن بازار گیا وہاں میرا کوئی کام پورا نہیں ہوا، میں واپس آ گیا، میں نے سوچا میں ان شاء اللہ کل چلا جاؤں گا اور لوگوں سے جا ملوں گا، پھر میرا کوئی کام پھنس گیا، ایسا ہی ہوتا رہا یہاں تک کہ میرے لیے گناہ رکاوٹ بنتا چلا گیا اور میں نبی اکرم صلی اللہ علیہ وسلم سے پیچھے رہ گیا، پھر میں بازار میں چلتا پھرتا تھا اور مدینہ منورہ کے اطراف میں چلتا پھرتا تھا، مجھے اس بات کا بھی افسوس تھا کہ مجھے کوئی ایسا شخص نظر نہیں آتا تھا جو نبی اکرم صلی اللہ علیہ وسلم سے پیچھے رہ گیا ہو، صرف وہی شخص پیچھے رہا تھا جس کے بارے میں یہ خیال تھا کہ وہ منافق ہے، اور وہی شخص پیچھے رہ سکتا تھا جس کے بارے میں میری یہ رائے ہو گی کہ وہ نبی اکرم صلی اللہ علیہ وسلم سے مخفی رہ گیا۔ لوگوں کی تعداد بہت زیادہ تھی، آج کی طرح ان کے نام نوٹ نہیں ہوئے تھے۔ نبی اکرم صلی اللہ علیہ وسلم کے پیچھے رہ جانے والے تمام افراد اسی (80) کے لگ بھگ تھے۔ نبی اکرم صلی اللہ علیہ وسلم کو تبوک پہنچنے تک میرا خیال نہیں آیا، جب آپ صلی اللہ علیہ وسلم تبوک پہنچے تو آپ صلی اللہ علیہ وسلم نے دریافت فرمایا: ”کعب بن مالک کا کیا حال ہے؟“ قوم کے ایک فرد نے عرض کی: یا رسول اللہ صلی اللہ علیہ وسلم ! اس کی دو چادروں نے اور اس کی خود پسندی نے اسے پیچھے کر دیا ہے۔ سیدنا معاذ بن جبل رضی اللہ عنہ نے کہا: تم نے بہت غلط بات کہی ہے، اے اللہ کے نبی صلی اللہ علیہ وسلم ! اللہ کی قسم! ہمیں ان کے بارے میں صرف بھلائی کا علم ہے۔ راوی بیان کرتے ہیں کہ وہ لوگ ابھی اسی حالت میں تھے کہ دور سے سراب کی مانند ایک شخص آتا ہوا نظر آیا۔ نبی اکرم صلی اللہ علیہ وسلم نے فرمایا: ”کاش کہ تم ابو خثیمہ ہو!“ تو وہ ابو خثیمہ ہی تھے۔ جب نبی اکرم صلی اللہ علیہ وسلم نے غزوہ تبوک مکمل کر لیا اور واپس تشریف لائے اور مدینہ منورہ کے قریب پہنچے تو میں نے اس بات کے بارے میں سوچنا شروع کیا کہ میں نبی اکرم صلی اللہ علیہ وسلم کی ناراضگی سے کیسے بچ سکتا ہوں، میں نے اپنے خاندان کے ہر سمجھ دار شخص سے اس بارے میں مدد لی، یہاں تک کہ جب یہ پتا چلا کہ نبی اکرم صلی اللہ علیہ وسلم کل صبح تشریف لے آئیں گے تو باطل مجھ سے دور ہو گیا اور مجھے یہ بات معلوم ہو گئی کہ میں صرف سچ بول کر ہی نجات حاصل کر سکتا ہوں۔ نبی اکرم صلی اللہ علیہ وسلم چاشت کے وقت مدینہ منورہ میں داخل ہوئے، آپ صلی اللہ علیہ وسلم نے مسجد میں دو رکعات ادا کیں، آپ صلی اللہ علیہ وسلم جب بھی کسی سفر سے تشریف لاتے تھے تو ایسا ہی کیا کرتے تھے، آپ صلی اللہ علیہ وسلم مسجد میں تشریف لاتے تھے وہاں دو رکعات ادا کرتے تھے پھر تشریف فرما ہو جاتے تھے، پیچھے رہ جانے والے لوگ آپ صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم کے سامنے قسمیں اٹھانے لگے اور عذر پیش کرنے لگے۔ نبی اکرم صلی اللہ علیہ وسلم ان کے لیے دعائے مغفرت فرماتے، انہوں نے جو چیز ظاہر کی اسے قبول کرتے اور ان کے پوشیدہ معاملے کو اللہ کے سپرد کر دیتے۔ جب میں مسجد میں داخل ہوا تو نبی اکرم صلی اللہ علیہ وسلم تشریف فرما تھے، آپ صلی اللہ علیہ وسلم نے جب مجھے دیکھا تو مسکرائے یوں جیسے کوئی شخص ناراضگی کے عالم میں مسکراتا ہے۔ میں آیا اور نبی اکرم صلی اللہ علیہ وسلم کے سامنے بیٹھ گیا۔ نبی اکرم صلی اللہ علیہ وسلم نے دریافت فرمایا: ”کیا تم نے سواری نہیں خریدی تھی؟“ میں نے عرض کی: جی ہاں اے اللہ کے نبی صلی اللہ علیہ وسلم ۔ نبی اکرم صلی اللہ علیہ وسلم نے دریافت فرمایا: ”پھر تم پیچھے کیوں رہ گئے؟“ میں نے عرض کی: اللہ کی قسم! اگر میں آپ صلی اللہ علیہ وسلم کے بجائے کسی اور شخص کے سامنے بیٹھا ہوتا تو کوئی عذر پیش کر کے اس کی ناراضگی سے بچ جاتا کیونکہ مجھے بات چیت کرنے کا فن عطا کیا گیا ہے۔ اے اللہ کے نبی صلی اللہ علیہ وسلم ! میں یہ بات جانتا ہوں کہ آج اگر میں آپ صلی اللہ علیہ وسلم کے ساتھ کوئی ایسی بات کر لیتا ہوں جس کی وجہ سے آپ صلی اللہ علیہ وسلم کو مجھ پر غصہ آئے لیکن وہ بات سچ ہو، تو مجھے امید ہے کہ اللہ تعالیٰ آخرکار اس کو ٹھیک کرے گا اور اگر میں آج آپ صلی اللہ علیہ وسلم کے ساتھ ایسی بات کرتا ہوں جس کی وجہ سے آپ صلی اللہ علیہ وسلم مجھ سے راضی ہو جائیں لیکن وہ بات جھوٹ ہو، تو عنقریب میرے بارے میں اللہ تعالیٰ آپ صلی اللہ علیہ وسلم کو اطلاع دے دے گا۔ اللہ کی قسم! اے اللہ کے نبی صلی اللہ علیہ وسلم ! اب جب میں آپ صلی اللہ علیہ وسلم سے پیچھے رہ گیا تھا تو میں اس سے پہلے کبھی اتنا خوشحال اور فارغ البال نہیں تھا۔ نبی اکرم صلی اللہ علیہ وسلم نے ارشاد فرمایا: ”اس شخص نے تم لوگوں کے ساتھ سچی بات بیان کی ہے، تم اٹھ جاؤ جب تک اللہ تعالیٰ تمہارے بارے میں فیصلہ نہیں دے دیتا۔“ میں اٹھ گیا، میری قوم کے کچھ افراد میرے پیچھے آئے وہ مجھے ڈانٹ رہے تھے اور کہہ رہے تھے: اللہ کی قسم! ہمیں پتا ہے کہ اس سے پہلے تم نے کبھی کوئی گناہ نہیں کیا۔ تم نبی اکرم صلی اللہ علیہ وسلم کی خدمت میں کوئی عذر پیش کر دیتے جس سے نبی اکرم صلی اللہ علیہ وسلم تم سے راضی ہو جاتے اور نبی اکرم صلی اللہ علیہ وسلم اس کے بعد تمہارے لیے دعائے مغفرت کر دیتے، تم ایسی جگہ پر کھڑے نہ ہوتے جس کے بارے میں ہمیں اندازہ نہیں ہو پا رہا کہ تمہارے بارے میں کیا فیصلہ ہو گا؟ وہ لوگ مسلسل مجھے ٹوکتے رہے یہاں تک کہ میں نے یہ ارادہ کیا کہ میں واپس جا کر اپنی ہی بات کو جھٹلا دیتا ہوں، میں نے کہا: کیا میرے علاوہ کسی اور نے بھی اس طرح سچی بات کہی ہے؟ لوگوں نے جواب دیا: جی ہاں، سیدنا ہلال بن امیہ اور سیدنا مرارہ بن ربیعہ رضی اللہ عنہما نے بھی یہی بات کہی ہے۔ لوگوں نے دو ایسے افراد کا ذکر کیا تھا جو غزوہ بدر میں شریک ہو چکے تھے، میرے لیے ان دونوں کی پیروی میں نمونہ تھا، میں نے کہا: اللہ کی قسم! میں کبھی بھی نبی اکرم صلی اللہ علیہ وسلم کی طرف اس بارے میں واپس نہیں جاؤں گا اور اپنی بات کو غلط قرار نہیں دوں گا۔ نبی اکرم صلی اللہ علیہ وسلم نے ہم تین آدمیوں سے بات چیت کرنے سے لوگوں کو منع کر دیا، میں بازار میں نکلتا تھا لیکن کوئی میرے ساتھ بات نہیں کرتا تھا، لوگ ہمیں پہچاننا چھوڑ گئے یہاں تک کہ ان میں کوئی ایسا شخص نہیں رہا جس کے ساتھ ہم بات چیت کر سکتے۔ باغات ہمارے لیے اجنبی ہو گئے یہاں تک کہ باغات میں کوئی ایسا شخص نہیں تھا جسے ہم جانتے، زمین ہمارے لیے اجنبی ہو گئی یہاں تک کہ زمین ہمیں اجنبی محسوس ہوتی تھی، میں اپنے ساتھیوں سے زیادہ طاقتور تھا میں گھر سے باہر نکلتا تھا، بازار کا چکر لگاتا تھا اور مسجد آ جاتا تھا۔ نبی اکرم صلی اللہ علیہ وسلم کی خدمت میں حاضر ہوتا تھا آپ صلی اللہ علیہ وسلم کو سلام کرتا تھا اور پھر دیکھتا تھا کہ آپ صلی اللہ علیہ وسلم نے سلام کا جواب دیتے ہوئے ہونٹوں کو حرکت دی ہے؟ جب میں ستون کی طرف رخ کر کے نماز ادا کر رہا ہوتا تھا اور نماز کی طرف متوجہ ہوتا تھا تو نبی اکرم صلی اللہ علیہ وسلم اپنی آنکھوں کے گوشوں کے ذریعے میری طرف دیکھ لیتے تھے، جب میں آپ صلی اللہ علیہ وسلم کی طرف دیکھتا تھا تو آپ صلی اللہ علیہ وسلم مجھ سے منہ پھیر لیتے تھے، میرے دونوں ساتھی بیمار ہو گئے وہ رات دن روتے رہتے تھے وہ اپنا سر باہر نہیں نکالتے تھے۔ ایک مرتبہ میں بازار گھوم رہا تھا تو ایک عیسائی شخص وہاں کچھ فروخت کرنے کے لیے آیا ہوا تھا اور وہ یہ دریافت کر رہا تھا کہ کعب بن مالک تک مجھے کون پہنچا سکتا ہے؟ تو لوگوں نے میری طرف اشارہ کر دیا وہ غسان کے بادشاہ کا خط لے کر میرے پاس آیا اس میں یہ تحریر تھا: ”امابعد! مجھے یہ پتا چلا ہے کہ تمہارے آقا نے تمہارے ساتھ زیادتی کی ہے اور تمہیں پرے کر دیا ہے، تم بے عزتی کروانے کے لیے اور ضائع کیے جانے کے لیے نہیں ہو، تم ہم سے ملو ہم تمہاری خبر گیری کریں گے۔“ میں نے سوچا کہ یہ ایک اور مصیبت ہے، میں نے تنور جلایا اور خط اس میں جلا دیا، جب چالیس دن گزر گئے تو نبی اکرم صلی اللہ علیہ وسلم کی طرف سے ایک پیغام رساں میرے پاس آیا اور بولا: تم اپنی بیوی سے الگ رہو، میں نے دریافت کیا: کیا میں اسے طلاق دے دوں؟ اس نے جواب دیا: ”جی نہیں، لیکن تم اس کے قریب نہ جانا۔“ سیدنا ہلال بن امیہ رضی اللہ عنہ کی اہلیہ نبی اکرم صلی اللہ علیہ وسلم کی خدمت میں حاضر ہوئیں، انہوں نے عرض کی: اے اللہ کے نبی صلی اللہ علیہ وسلم ! سیدنا ہلال بن امیہ رضی اللہ عنہ بوڑھے اور کمزور شخص ہیں، کیا آپ صلی اللہ علیہ وسلم مجھے اس کی اجازت دیں گے کہ میں ان کی خدمت کرتی رہوں؟ نبی اکرم صلی اللہ علیہ وسلم نے فرمایا: ”جی ہاں، لیکن وہ تمہارے قریب نہ آنے پائے۔“ اس نے عرض کی: اے اللہ کے نبی صلی اللہ علیہ وسلم ! جب سے ان کا یہ معاملہ ہوا ہے انہوں نے پہلے بھی ایسا نہیں کیا وہ بس بیٹھے دن رات روتے رہتے ہیں۔ سیدنا کعب رضی اللہ عنہ بیان کرتے ہیں کہ جب میری آزمائش طویل ہو گئی تو میں سیدنا ابو قتادہ رضی اللہ عنہ کے باغ میں ان سے ملنے گیا وہ میرے چچازاد تھے، میں نے انہیں سلام کیا انہوں نے جواب نہیں دیا، میں نے کہا: اے ابو قتادہ! میں آپ کو اللہ کا واسطہ دے کر دریافت کرتا ہوں کیا آپ یہ بات جانتے ہیں کہ میں اللہ اور اس کے رسول صلی اللہ علیہ وسلم سے محبت کرتا ہوں؟ وہ خاموش رہے، میں نے کہا: اے ابو قتادہ! میں آپ کو اللہ کا واسطہ دے کر دریافت کرتا ہوں کیا آپ یہ بات جانتے ہیں کہ میں اللہ اور اس کے رسول صلی اللہ علیہ وسلم سے محبت کرتا ہوں؟ وہ خاموش رہے، میں نے کہا: اے ابو قتادہ! آپ کو اللہ کا واسطہ دے کر دریافت کرتا ہوں کیا آپ یہ بات جانتے ہیں کہ میں اللہ اور اس کے رسول صلی اللہ علیہ وسلم سے محبت کرتا ہوں؟ تو انہوں نے کہا: «اللهُ وَرَسُولُهُ أَعْلَمُ» ”اللہ اور اس کا رسول صلی اللہ علیہ وسلم زیادہ بہتر جانتے ہیں۔“ سیدنا کعب رضی اللہ عنہ بیان کرتے ہیں کہ مجھے اپنے آپ پر قابو نہیں رہا میں رونے لگا اور میں باغ سے باہر آ گیا، یہاں تک کہ جب نبی اکرم صلی اللہ علیہ وسلم کے لوگوں کو ہم سے بات چیت کرنے سے منع کرنے کو پچاس دن گزر گئے تو ایک دن میں اپنے گھر کی چھت پر فجر کی نماز ادا کر رہا تھا اور اس وقت میری یہ حالت تھی جس کا ذکر اللہ تعالیٰ نے کیا ہے کہ ہمارے لیے زمین اپنی تمام تر کشادگی کے باوجود تنگ ہو چکی تھی اور ہماری اپنی جان ہمارے لیے تنگ ہو چکی تھی، اسی دوران میں نے سلع پہاڑ کی چوٹی سے ایک شخص کی پکار سنی: اے کعب بن مالک! تمہیں خوشخبری ہو، میں سجدے میں گر گیا مجھے اندازہ ہو گیا کہ اللہ تعالیٰ نے فراخی عطا کر دی ہے، ایک شخص اپنے گھوڑے کو دوڑاتا ہوا مجھے خوش خبری دینے کے لیے آ رہا تھا لیکن دوسرے شخص کی آواز اس کے گھوڑے سے زیادہ تیزی سے آ گئی تھی، میں نے اس خوشخبری کی وجہ سے اپنے کپڑے اسے دے دیے اور خود دوسرے کپڑے پہن لیے۔ ہماری توبہ کے قبول ہونے کا حکم نبی اکرم صلی اللہ علیہ وسلم پر ایک تہائی رات گزر جانے کے بعد نازل ہوا تھا۔ سیدہ ام سلمہ رضی اللہ عنہا نے دریافت کیا: اے اللہ کے نبی صلی اللہ علیہ وسلم ! کیا ہم کعب بن مالک کو خوشخبری نہ سنا دیں؟ نبی اکرم صلی اللہ علیہ وسلم نے فرمایا: ”اس صورت میں لوگ تمہارے ہاں ہجوم کر لیں گے اور تمہیں ساری رات سونے نہیں دیں گے۔“ سیدنا کعب بن مالک رضی اللہ عنہ بیان کرتے ہیں کہ سیدہ ام سلمہ رضی اللہ عنہا نے میرے معاملے میں بڑی اچھائی کی تھی اور انہوں نے مجھے میرے معاملے کے بارے میں بتایا تھا۔ میں نبی اکرم صلی اللہ علیہ وسلم کی خدمت میں حاضر ہوا آپ صلی اللہ علیہ وسلم اس وقت مسجد میں تشریف فرما تھے آپ صلی اللہ علیہ وسلم کے اردگرد مسلمان بھی موجود تھے۔ نبی اکرم صلی اللہ علیہ وسلم کا چہرہ مبارک چاند کی طرح چمک رہا تھا، آپ صلی اللہ علیہ وسلم جب کسی بات پر خوش ہوتے تھے تو وہ اسی طرح چمکتا تھا، میں آیا اور آ کر آپ صلی اللہ علیہ وسلم کے سامنے بیٹھ گیا۔ آپ صلی اللہ علیہ وسلم نے فرمایا: ”اے کعب! تمہیں ایک ایسے دن کے بارے میں خوش خبری ہو جو اس دن کے بعد آنے والے دنوں میں سب سے بہتر ہے جب تمہاری والدہ نے تمہیں جنم دیا تھا۔“ سیدنا کعب رضی اللہ عنہ بیان کرتے ہیں کہ میں نے عرض کی: اے اللہ کے نبی صلی اللہ علیہ وسلم ! یہ اللہ تعالیٰ کی طرف سے ہے یا آپ صلی اللہ علیہ وسلم کی طرف سے؟ نبی اکرم صلی اللہ علیہ وسلم نے فرمایا: ”بلکہ اللہ تعالیٰ کی طرف سے ہے“، پھر نبی اکرم صلی اللہ علیہ وسلم نے ان لوگوں کے سامنے یہ آیت تلاوت فرمائی: ﴿لَقَد تَّابَ اللَّهُ عَلَى النَّبِيِّ وَالْمُهَاجِرِينَ وَالْأَنصَارِ...﴾ [سورة التوبة: 117] یعنی ”اللہ تعالیٰ نے مہاجرین اور انصار پر فضل کیا۔“ یہ آیت یہاں تک ہے ﴿إِنَّهُ بِهِمْ رَءُوفٌ رَّحِيمٌ﴾ [سورة التوبة: 117] کہ ”وہ بہت زیادہ توبہ قبول کرنے والا اور رحم کرنے والا ہے۔“ سیدنا کعب رضی اللہ عنہ بیان کرتے ہیں کہ ہمارے بارے میں یہ آیت نازل ہوئی تھی: ﴿يَا أَيُّهَا الَّذِينَ آمَنُوا اتَّقُوا اللَّهَ وَكُونُوا مَعَ الصَّادِقِينَ﴾ [سورة التوبة: 119] یعنی ”تم لوگ اللہ سے ڈرو اور سچوں کے ساتھ ہو جاؤ۔“ سیدنا کعب رضی اللہ عنہ کہتے ہیں کہ میں نے عرض کی: اے اللہ کے نبی صلی اللہ علیہ وسلم ! میری توبہ میں یہ بات بھی شامل ہے کہ میں ہمیشہ سچ بولوں گا اور یہ بات بھی شامل ہے کہ میں اپنا تمام مال اللہ اور اس کے رسول صلی اللہ علیہ وسلم کی بارگاہ میں صدقہ کرتا ہوں۔ نبی اکرم صلی اللہ علیہ وسلم نے ارشاد فرمایا: ”تم اپنے کچھ مال کو اپنے پاس رہنے دو یہ تمہارے لیے زیادہ بہتر ہے۔“ سیدنا کعب رضی اللہ عنہ کہتے ہیں کہ میں نے عرض کی: پھر میں خیبر میں موجود اپنا حصہ اپنے پاس رہنے دیتا ہوں۔ سیدنا کعب رضی اللہ عنہ بیان کرتے ہیں کہ اللہ تعالیٰ نے مجھے اسلام کی نعمت عطا کرنے کے بعد کوئی ایسی نعمت عطا نہیں کی جو میرے نزدیک اس سے زیادہ بڑی ہو جو میں نے نبی اکرم صلی اللہ علیہ وسلم کے سامنے سچ بولا تھا، میں نے بھی اور میرے دونوں ساتھیوں نے بھی، کیونکہ اس کے نتیجے میں ہم نے جھوٹ بول کر ہلاکت کا شکار ہو جانا تھا جس طرح دوسرے لوگ ہلاکت کا شکار ہو گئے تھے، اس کے بعد میں نے کبھی بھی جانتے بوجھتے ہوئے جھوٹ نہیں بولا، مجھے یہ امید ہے کہ باقی کی زندگی میں بھی اللہ تعالیٰ مجھے جھوٹ بولنے سے محفوظ رکھے۔ (زہری کہتے ہیں: یہ وہ روایت ہے، جو سیدنا کعب بن مالک رضی اللہ عنہ کے واقعہ کے بارے میں ہم تک پہنچی ہے۔) [صحیح ابن حبان/كتاب الزكاة/حدیث: 3370]

اردو ترجمہ · UrduUnverified translation

حصین بن سعد بیان کرتے ہیں کہ ان کے دادا سیدنا ابولبابہ رضی اللہ عنہ کے نبی اکرم صلی اللہ علیہ وسلم کے پیچھے جانے کے بارے میں اللہ تعالیٰ نے ان کی توبہ کو قبول کر لیا، اس سے پہلے بھی ایسے کچھ امور رونما ہو چکے تھے جس کی وجہ سے نبی اکرم صلی اللہ علیہ وسلم ان سے ناراض تھے (تو جب ان کی توبہ قبول ہو گئی)، تو انہوں نے عرض کی: یا رسول اللہ صلی اللہ علیہ وسلم ! میں اپنے اس علاقے کو چھوڑنا چاہتا ہوں جہاں میں نے گناہ کا ارتکاب کیا تھا اور میں آپ صلی اللہ علیہ وسلم کی طرف منتقل ہونا چاہتا ہوں اور آپ صلی اللہ علیہ وسلم کے ساتھ رہنا چاہتا ہوں۔ میں اپنے تمام مال کو اللہ اور اس کے رسول صلی اللہ علیہ وسلم کی بارگاہ میں صدقے کے طور پر پیش کرتا ہوں اور اس سے لاتعلق ہوتا ہوں، تو نبی اکرم صلی اللہ علیہ وسلم نے ارشاد فرمایا: ”اس میں سے ایک تہائی (صدقہ کرنا) تمہارے لیے جائز ہے (یا تمہارے لیے کافی ہو گا)۔“ [صحیح ابن حبان/كتاب الزكاة/حدیث: 3371]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں: میں نبی اکرم صلی اللہ علیہ وسلم کے پاس موجود تھا، اسی دوران ایک شخص سونے کا انڈہ لے کر آپ صلی اللہ علیہ وسلم کی خدمت میں حاضر ہوا جو کسی جنگ کے دوران اسے ملا تھا، اس نے عرض کی: یا رسول اللہ صلی اللہ علیہ وسلم ! اسے میری طرف سے صدقے کے طور پر قبول کر لیجئے۔ اللہ کی قسم! میرے پاس اس کے علاوہ اور کوئی مال نہیں ہے۔ نبی اکرم صلی اللہ علیہ وسلم نے اس سے منہ پھیر لیا، وہ دوسری طرف سے آپ صلی اللہ علیہ وسلم کی خدمت میں حاضر ہوا اور اس نے اسی کی مانند بات کہی، تو نبی اکرم صلی اللہ علیہ وسلم نے اس سے پھر منہ پھیر لیا، پھر وہ سامنے کی طرف سے آپ صلی اللہ علیہ وسلم کی خدمت میں حاضر ہوا، تو نبی اکرم صلی اللہ علیہ وسلم نے اسے اس سے لیا اور پھر اسے یوں مارا کہ اگر وہ اسے لگ جاتا تو اسے زخمی کر دیتا یا اسے تکلیف پہنچاتا، پھر آپ صلی اللہ علیہ وسلم نے ارشاد فرمایا: ”تم میں سے ایک شخص اپنے تمام مال کی طرف آتا ہے، تاکہ اسے صدقہ کر دے اور پھر خود بیٹھ جاتا ہے، تاکہ لوگوں سے مانگتا پھرے۔ صدقہ وہ ہوتا ہے، جو خوشحالی کے عالم میں کیا جائے، تم اپنا مال ہم سے لے لو ہمیں اس کی ضرورت نہیں ہے۔“ [صحیح ابن حبان/كتاب الزكاة/حدیث: 3372]

اردو ترجمہ · UrduUnverified translation

سیدہ ام بجید رضی اللہ عنہا جو نبی اکرم صلی اللہ علیہ وسلم کے دستِ اقدس پر اسلام قبول کرنے والی خواتین میں سے ایک ہیں، ان کے بارے میں یہ بات منقول ہے کہ انہوں نے نبی اکرم صلی اللہ علیہ وسلم کی خدمت میں عرض کی: یا رسول اللہ صلی اللہ علیہ وسلم ! بعض اوقات کوئی غریب میرے دروازے پر کھڑا ہوتا ہے مجھے اسے دینے کے لیے کچھ نہیں ملتا، تو نبی اکرم صلی اللہ علیہ وسلم نے ارشاد فرمایا: ”اگر تمہیں کوئی ایسی چیز نہیں ملتی جسے تم اسے دے سکو صرف جلا ہوا پایہ ملتا ہے، تو تم وہی اس کے ہاتھ میں دے دو۔“ [صحیح ابن حبان/كتاب الزكاة/حدیث: 3373]

اردو ترجمہ · UrduUnverified translation

سیدہ ام بجید انصاریہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”مانگنے والے کو (کچھ دے کر) لوٹاؤ خواہ جلا ہوا پایہ ہی دو۔“ (امام ابن حبان رحمہ اللہ فرماتے ہیں): نبی اکرم صلی اللہ علیہ وسلم کا یہ فرمان ”تم مانگنے والے کو لوٹاؤ“ اس کے ذریعے آپ کا مقصد یہ ہے: لفظی طور پر حکم دیا گیا ہے لیکن اصل مقصود منع کرنا ہے۔ آپ کی مراد یہ ہے: تم مانگنے والے کو کوئی چیز دے کر واپس لوٹاؤ، خواہ جلا ہوا پایہ ہی دو۔ [صحیح ابن حبان/كتاب الزكاة/حدیث: 3374]

اردو ترجمہ · UrduUnverified translation

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص اللہ تعالیٰ کے نام پر مانگے اسے کچھ دو، اور جو اللہ کے نام پر پناہ مانگے اسے پناہ دو، اور جو شخص تمہاری دعوت کرے، تو اسے قبول کرو۔“ [صحیح ابن حبان/كتاب الزكاة/حدیث: 3375]