Hadith 2878–2918

اردو ترجمہ · UrduUnverified translation

عروہ بن زبیر رحمہ اللہ بیان کرتے ہیں کہ میں نے سیدنا ابوہریرہ رضی اللہ عنہ کو سنا، مروان بن حکم نے ان سے نمازِ خوف کے بارے میں دریافت کیا تو سیدنا ابوہریرہ رضی اللہ عنہ نے بتایا: میں اس جنگ میں نبی اکرم صلی اللہ علیہ وسلم کے ساتھ موجود تھا، نبی اکرم صلی اللہ علیہ وسلم نے لوگوں کو دو حصوں میں تقسیم کر دیا، ایک گروہ آپ صلی اللہ علیہ وسلم کے پیچھے کھڑا ہو گیا اور دوسرا گروہ دشمن کے مدمقابل کھڑا ہو گیا، ان لوگوں کی پشت قبلہ کی طرف تھی۔ نبی اکرم صلی اللہ علیہ وسلم نے تکبیر کہی تو ان سب لوگوں نے تکبیر کہی، وہ بھی جو آپ صلی اللہ علیہ وسلم کے ساتھ کھڑے ہوئے تھے اور وہ بھی جو دشمن کے مدمقابل کھڑے ہوئے تھے۔ نبی اکرم صلی اللہ علیہ وسلم نے رکوع کیا تو جو گروہ آپ صلی اللہ علیہ وسلم کے ساتھ تھا انہوں نے آپ صلی اللہ علیہ وسلم کے ہمراہ رکوع کیا، نبی اکرم صلی اللہ علیہ وسلم سجدے میں گئے تو آپ صلی اللہ علیہ وسلم کے پاس والا گروہ بھی سجدے میں چلا گیا، جبکہ دوسرا گروہ دشمن کے مدمقابل کھڑا رہا، پھر نبی اکرم صلی اللہ علیہ وسلم کھڑے ہوئے تو جس گروہ نے آپ صلی اللہ علیہ وسلم کے ہمراہ ایک رکعت ادا کی تھی انہوں نے اپنا اسلحہ لیا اور الٹے قدموں چلتے ہوئے دشمن کے مدمقابل آ کر کھڑے ہو گئے اور وہ گروہ جو دشمن کے مدمقابل کھڑا ہوا تھا وہ آگے آ گیا، ان لوگوں نے رکوع کیا اور سجدہ کیا، نبی اکرم صلی اللہ علیہ وسلم پہلی حالت میں ہی کھڑے رہے، پھر وہ لوگ کھڑے ہو گئے تو نبی اکرم صلی اللہ علیہ وسلم نے ایک مرتبہ رکوع کیا، ان لوگوں نے بھی آپ صلی اللہ علیہ وسلم کے ہمراہ رکوع کیا، آپ صلی اللہ علیہ وسلم نے سجدہ کیا تو انہوں نے بھی آپ صلی اللہ علیہ وسلم کے ہمراہ سجدہ کیا، پھر وہ گروہ آ گیا جو دشمن کے مدمقابل تھا، پھر انہوں نے رکوع اور سجدہ کیا، نبی اکرم صلی اللہ علیہ وسلم اور آپ صلی اللہ علیہ وسلم کے ساتھ والے افراد بیٹھے رہے، پھر سلام کا وقت آیا تو نبی اکرم صلی اللہ علیہ وسلم نے سلام پھیرا اور ان سب لوگوں نے بھی سلام پھیر دیا، تو ان سب نے نبی اکرم صلی اللہ علیہ وسلم کے ہمراہ نماز ادا کی تھی۔ [صحیح ابن حبان/كتاب الصلاة/حدیث: 2878]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ہمیں نمازِ خوف پڑھائی، آپ صلی اللہ علیہ وسلم نے ایک گروہ کو ایک رکعت پڑھائی اور دوسرا گروہ دشمن کے مدمقابل موجود رہا، پھر وہ لوگ واپس آ گئے اور آ کر دشمن کی طرف رُخ کر کے کھڑے ہو گئے، وہ لوگ آئے تو نبی اکرم صلی اللہ علیہ وسلم نے ان لوگوں کو بھی ایک رکعت پڑھائی، نبی اکرم صلی اللہ علیہ وسلم نے ان سب سمیت سلام پھیر دیا، پھر یہ لوگ چلے گئے اور اپنے ساتھیوں کی جگہ دشمن کی طرف رُخ کر کے کھڑے ہو گئے، پھر وہ آئے تو نبی اکرم صلی اللہ علیہ وسلم نے ان لوگوں کو بھی ایک رکعت پڑھائی، نبی اکرم صلی اللہ علیہ وسلم نے ان سب سمیت سلام پھیر دیا، تو ان لوگوں نے بھی اور ان لوگوں نے بھی ایک، ایک رکعت ادا کی۔ [صحیح ابن حبان/كتاب الصلاة/حدیث: 2879]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم کھڑے ہوئے، آپ صلی اللہ علیہ وسلم کے ہمراہ لوگ بھی کھڑے ہوئے، آپ صلی اللہ علیہ وسلم نے تکبیر کہی، آپ صلی اللہ علیہ وسلم کے ساتھ لوگوں نے بھی تکبیر کہی، پھر آپ صلی اللہ علیہ وسلم رکوع میں چلے گئے، آپ صلی اللہ علیہ وسلم کے ساتھ ان میں سے کچھ لوگ رکوع میں چلے گئے، پھر آپ صلی اللہ علیہ وسلم سجدے میں گئے، تو وہ لوگ بھی سجدے میں چلے گئے، پھر آپ صلی اللہ علیہ وسلم دوسری رکعت کے لیے کھڑے ہوئے، تو وہ لوگ پیچھے ہٹ گئے جنہوں نے آپ صلی اللہ علیہ وسلم کے ہمراہ سجدہ کیا تھا، وہ اپنے بھائیوں کی حفاظت کرنے لگے، دوسرا گروہ آ گیا، ان لوگوں نے نبی اکرم صلی اللہ علیہ وسلم کے ہمراہ رکوع کیا اور سجدہ کیا، تو ان سب لوگوں نے نماز ادا کی، وہ تکبیر بھی کہتے رہے اور ایک دوسرے کی حفاظت بھی کرتے رہے۔ [صحیح ابن حبان/كتاب الصلاة/حدیث: 2880]

اردو ترجمہ · UrduUnverified translation

سیدنا ابوبکرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے لوگوں کی دو صفیں بنا دیں، جو صف آپ صلی اللہ علیہ وسلم کے پاس موجود تھی آپ صلی اللہ علیہ وسلم نے انہیں دو رکعات پڑھائیں، پھر انہوں نے سلام پھیر دیا اور وہ پیچھے ہٹ گئے، اور دوسرے لوگ آگے آ گئے، نبی اکرم صلی اللہ علیہ وسلم نے انہیں بھی دو رکعات پڑھائیں، پھر انہوں نے بھی سلام پھیر دیا، تو یوں نبی اکرم صلی اللہ علیہ وسلم کی چار رکعات ہوئیں اور ان مسلمانوں نے دو دو رکعات ادا کیں۔ [صحیح ابن حبان/كتاب الصلاة/حدیث: 2881]

اردو ترجمہ · UrduUnverified translation

سلیمان یشکری سے مروی ہے، انہوں نے سیدنا جابر بن عبداللہ رضی اللہ عنہما سے خوف کے عالم میں نماز مختصر ادا کرنے کے بارے میں دریافت کیا کہ اس کا حکم کہاں نازل ہوا تھا اور یہ صورتِ حال کہاں درپیش آئی تھی؟ انہوں نے بتایا: ہم لوگ قریش کے ایک قافلے کا پیچھا کرتے ہوئے نکلے جو شام جا رہا تھا، جب ہم نخل کے مقام پر پہنچے تو ایک شخص نبی اکرم صلی اللہ علیہ وسلم کی خدمت میں حاضر ہوا، اس نے تلوار لٹکائی ہوئی تھی، اس نے کہا: کیا آپ محمد ( صلی اللہ علیہ وسلم ) ہیں؟ نبی اکرم صلی اللہ علیہ وسلم نے فرمایا: ”جی ہاں۔“ اس نے دریافت کیا: کیا آپ مجھ سے ڈرتے نہیں ہیں؟ نبی اکرم صلی اللہ علیہ وسلم نے فرمایا: ”جی نہیں۔“ اس نے دریافت کیا: آپ کو مجھ سے کون بچائے گا؟ نبی اکرم صلی اللہ علیہ وسلم نے فرمایا: ”اللہ تعالیٰ مجھے تم سے بچائے گا۔“ راوی کہتے ہیں: اس شخص نے اپنی تلوار کھینچ لی، لوگوں نے اسے ڈانٹا اور اسے جھڑکا، نبی اکرم صلی اللہ علیہ وسلم نے لوگوں کو وہاں سے روانگی کا اور اسلحہ اختیار کرنے کا حکم دیا، پھر نماز کے لیے اذان دی گئی۔ نبی اکرم صلی اللہ علیہ وسلم نے اپنے پیچھے موجود گروہ کو نماز پڑھائی اور ایک گروہ دشمن کی طرف رخ کر کے حفاظت کرتا رہا، نبی اکرم صلی اللہ علیہ وسلم نے اپنے ساتھ والے گروہ کو دو رکعات پڑھائیں، پھر دوسرا گروہ آ کر اس جگہ کھڑا ہو گیا جہاں وہ لوگ کھڑے تھے جنہوں نے نبی اکرم صلی اللہ علیہ وسلم کے ہمراہ نماز ادا کی تھی اور وہ دشمن کی طرف رخ کر کے حفاظت کے فرائض سر انجام دینے لگے۔ نبی اکرم صلی اللہ علیہ وسلم نے ان لوگوں کو بھی دو رکعات پڑھائیں، تو یوں نبی اکرم صلی اللہ علیہ وسلم کی چار رکعات ہو گئیں اور آپ صلی اللہ علیہ وسلم کے ساتھیوں نے دو رکعات ادا کیں۔ [صحیح ابن حبان/كتاب الصلاة/حدیث: 2882]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے نخل کے مقام پر موجود ”محارب خصفہ“ میں لڑائی کی، ان لوگوں نے مسلمانوں کو غافل دیکھا تو ان کا ایک شخص آیا جس کا نام عوف بن حارث یا شاید غورث بن حارث تھا، وہ تلوار لے کر نبی اکرم صلی اللہ علیہ وسلم کے سرہانے آ کر کھڑا ہو گیا اور دریافت کیا: آپ صلی اللہ علیہ وسلم کو مجھ سے کون بچائے گا؟ نبی اکرم صلی اللہ علیہ وسلم نے فرمایا: «اللهُ» ”اللہ تعالیٰ۔“ راوی کہتے ہیں: اس کے ہاتھ سے تلوار گر گئی۔ نبی اکرم صلی اللہ علیہ وسلم نے تلوار کو پکڑا اور دریافت کیا: ”تمہیں مجھ سے کون بچائے گا؟“ اس نے کہا: آپ صلی اللہ علیہ وسلم مجھ سے بہتر ہو جائیں۔ نبی اکرم صلی اللہ علیہ وسلم نے فرمایا: ”کیا تم اس بات کی گواہی دیتے ہو کہ اللہ تعالیٰ کے علاوہ اور کوئی معبود نہیں ہے؟“ اس نے کہا: جی نہیں، میں آپ صلی اللہ علیہ وسلم کے ساتھ یہ عہد کرتا ہوں کہ میں آپ صلی اللہ علیہ وسلم کے ساتھ جنگ نہیں کروں گا اور نہ ہی اس قوم کے ساتھ رہوں گا جو آپ صلی اللہ علیہ وسلم کے ساتھ جنگ کرے گی۔ راوی کہتے ہیں: نبی اکرم صلی اللہ علیہ وسلم نے اسے چھوڑ دیا، وہ اپنے ساتھیوں کے پاس آیا اور بولا: میں سب سے بہتر شخص کے پاس سے تمہارے پاس آیا ہوں۔ جب ظہر یا شاید عصر کا وقت ہوا، یہ شک ابوعوانہ نامی راوی کو ہے، تو نبی اکرم صلی اللہ علیہ وسلم نے نمازِ خوف کا حکم دیا، راوی بیان کرتے ہیں: لوگوں کے دو گروہ بن گئے، ایک گروہ دشمن کے مدمقابل ہو گیا اور ایک گروہ نبی اکرم صلی اللہ علیہ وسلم کے ساتھ نماز ادا کرنے لگا۔ نبی اکرم صلی اللہ علیہ وسلم نے اپنے ساتھ والے گروہ کو دو رکعات پڑھائیں، پھر ان لوگوں نے نماز ختم کر دی اور وہ ان لوگوں کی جگہ پر آ گئے اور وہ لوگ آ کر نبی اکرم صلی اللہ علیہ وسلم کی اقتدا میں نماز ادا کرنے لگے، انہوں نے دو رکعات ادا کیں، یوں نبی اکرم صلی اللہ علیہ وسلم کی چار رکعات ہوئیں اور ان لوگوں کی دو رکعات ہوئیں۔ [صحیح ابن حبان/كتاب الصلاة/حدیث: 2883]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں: ہم نبی اکرم صلی اللہ علیہ وسلم کے ہمراہ آئے یہاں تک کہ جب ہم ذات الرقاع کے مقام پر پہنچے، تو اعلان کیا گیا: ”باجماعت نماز ہونے لگی ہے“، پھر نبی اکرم صلی اللہ علیہ وسلم نے ایک گروہ کو دو رکعات پڑھائیں، پھر وہ پیچھے ہٹ گئے اور آپ صلی اللہ علیہ وسلم نے دوسرے گروہ کو دو رکعات پڑھائیں، تو نبی اکرم صلی اللہ علیہ وسلم کی چار رکعات ہوئیں اور ان لوگوں کی دو رکعات ہوئیں۔ [صحیح ابن حبان/كتاب الصلاة/حدیث: 2884]

اردو ترجمہ · UrduUnverified translation

سیدنا سہل بن ابوحثمہ رضی اللہ عنہ نمازِ خوف کے بارے میں بیان کرتے ہیں: ”ایک گروہ امام کے سامنے کھڑا ہوگا، دوسرا گروہ امام کے پیچھے کھڑا ہوگا، امام اس گروہ کو ایک رکعت اور دو سجدے پڑھائے گا جو اس کے پیچھے کھڑا ہے، پھر وہ اپنی جگہ پر بیٹھا رہے گا، یہاں تک کہ وہ لوگ (دوسری رکعت کا) ایک رکوع اور دو سجدے ادا کر لیں گے، پھر وہ لوگ اپنے ساتھیوں کی جگہ پر چلے جائیں گے اور ان کے ساتھی اس جگہ پر آ جائیں گے، امام انہیں ایک رکوع اور دو سجدے پڑھائے گا، امام اپنی جگہ بیٹھا رہے گا، یہاں تک کہ وہ لوگ بھی ایک رکوع اور دو سجدے ادا کر لیں گے، تو امام سلام پھیر دے گا۔“ [صحیح ابن حبان/كتاب الصلاة/حدیث: 2885]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے نمازِ خوف کے بارے میں یہ بات ارشاد فرمائی: ”امام کھڑا ہو گا، اس کے ہمراہ ایک گروہ کھڑا ہو گا، وہ لوگ بھی ایک رکعت ادا کر لیں گے اور دوسرا گروہ ان کے اور دشمن کے درمیان رہے گا، پھر وہ لوگ واپس چلے جائیں گے جنہوں نے امام کے ہمراہ ایک رکعت ادا کی اور ان لوگوں کی جگہ چلے جائیں گے جنہوں نے نماز ادا نہیں کی، پھر وہ لوگ آئیں گے اور امام کے ہمراہ ایک رکعت ادا کریں گے، پھر امام اپنی نماز ختم کر دے گا، دونوں گروہوں میں سے ہر ایک گروہ الگ سے ایک رکعت ادا کرے گا، اگر خوف اس سے زیادہ شدید ہو، تو پیادہ یا سواری کی حالت میں نماز ادا کر لی جائے گی۔“ [صحیح ابن حبان/كتاب الصلاة/حدیث: 2887]

اردو ترجمہ · UrduUnverified translation

سیدنا جابر بن عبداللہ رضی اللہ عنہما نبی اکرم صلی اللہ علیہ وسلم کے حوالے سے نمازِ خوف کے بارے میں یہ بات نقل کرتے ہیں کہ نبی اکرم صلی اللہ علیہ وسلم کھڑے ہوئے، ایک گروہ آپ کے پیچھے کھڑا ہو گیا اور ایک گروہ ان کے پیچھے کھڑا ہو گیا، جو نبی اکرم صلی اللہ علیہ وسلم کے پیچھے کھڑے تھے وہ لوگ بیٹھے ہوئے تھے، ان سب کے چہرے نبی اکرم صلی اللہ علیہ وسلم کی طرف تھے، آپ نے تکبیر کہی، ان دونوں گروہوں نے تکبیر کہی، نبی اکرم صلی اللہ علیہ وسلم نے رکوع کیا، آپ کے پیچھے والے گروہ نے بھی رکوع کیا اور دوسرے لوگ بیٹھے رہے، پھر نبی اکرم صلی اللہ علیہ وسلم نے سجدہ کیا تو ان لوگوں نے سجدہ کیا اور دوسرے لوگ بیٹھے رہے، نبی اکرم صلی اللہ علیہ وسلم کھڑے ہوئے وہ لوگ بھی کھڑے ہوئے اور وہ پیچھے ہٹتے ہوئے ان لوگوں کی جگہ پر آ گئے جہاں ان کے ساتھی بیٹھے ہوئے تھے، پھر دوسرا گروہ آ گیا تو نبی اکرم صلی اللہ علیہ وسلم نے ان لوگوں کو بھی ایک رکوع اور دو سجدے پڑھائے اور دوسرے لوگ بیٹھے رہے، پھر نبی اکرم صلی اللہ علیہ وسلم نے سلام پھیرا تو دونوں گروہ کھڑے ہوئے انہوں نے انفرادی طور پر ایک رکعت ادا کی۔ (امام ابن حبان رحمہ اللہ فرماتے ہیں:) ان روایات میں کوئی تضاد اور اختلاف نہیں پایا جاتا بلکہ نبی اکرم صلی اللہ علیہ وسلم نے نمازِ خوف مختلف مواقع پر مختلف طریقوں سے کئی مرتبہ ادا کی تھی جس کا ذکر ہم نے کیا ہے، نبی اکرم صلی اللہ علیہ وسلم کا اس سے ارادہ یہ تھا کہ آپ اپنی امت کو نمازِ خوف کے طریقے کی تعلیم دیں کیونکہ ان کے لیے یہ بات مباح ہے کہ وہ ان نو طریقوں میں سے کسی بھی طریقے کے مطابق نماز ادا کر سکتے ہیں جس طرح نبی اکرم صلی اللہ علیہ وسلم نے خوف کے عالم میں نماز ادا کی تھی، یعنی صورت حال کے مطابق جو بھی طریقہ مناسب ہو، آدمی کے لیے یہ بات مباح ہے کہ وہ خوف کے عالم میں ان طریقوں میں سے جس طریقے کے مطابق چاہے نماز ادا کرے جن طریقوں کا ہم نے ذکر کیا ہے، یہ مباح اختلاف کی قسم سے تعلق رکھتے ہیں، ان روایات میں کوئی تضاد یا کوئی اختلاف نہیں ہے۔ [صحیح ابن حبان/كتاب الصلاة/حدیث: 2888]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں کہ غزوہ خندق کے موقع پر سیدنا عمر بن خطاب رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: یا رسول اللہ صلی اللہ علیہ وسلم ! میں ابھی تک عصر کی نماز ادا نہیں کر سکا، یہاں تک کہ سورج غروب ہو گیا۔ یہ اس کے بعد کی بات ہے جب روزہ دار افطاری کر لیتا ہے۔ نبی اکرم صلی اللہ علیہ وسلم نے ارشاد فرمایا: ”اللہ کی قسم! ہم بھی ابھی تک یہ نماز ادا نہیں کر سکے۔“ پھر نبی اکرم صلی اللہ علیہ وسلم «بُطْحَانَ» کے مقام پر رکے اور میں آپ کے ساتھ تھا۔ آپ صلی اللہ علیہ وسلم نے وضو کیا، اور آپ صلی اللہ علیہ وسلم نے سورج غروب ہو جانے کے بعد اور اس کے بعد جب روزہ دار افطار کر لیتا ہے، عصر کی نماز ادا کی۔ [صحیح ابن حبان/كتاب الصلاة/حدیث: 2889]

اردو ترجمہ · UrduUnverified translation

عبدالرحمن بن ابوسعید خدری رحمہ اللہ اپنے والد (سیدنا ابوسعید خدری رضی اللہ عنہ) کا یہ بیان نقل کرتے ہیں کہ غزوہ خندق کے موقع پر ہم (لڑائی میں) مصروف رہے، یہاں تک کہ مغرب کے بعد کا وقت ہو گیا، یہ جنگ کے بارے میں حکم نازل ہونے سے پہلے کی بات ہے۔ جب جنگ کے حوالے سے ہماری کفایت ہو گئی (اس سے مراد اللہ تعالیٰ کا فرمان ہے:) ﴿وَكَفَى اللَّهُ الْمُؤْمِنِينَ الْقِتَالَ وَكَانَ اللَّهُ قَوِيًّا عَزِيزًا﴾ [سورة الأحزاب: 25] ”جنگ میں اللہ تعالیٰ مومنین کے لیے کافی ہے، اللہ تعالیٰ طاقت ور اور غالب ہے۔“ (مغرب ہو جانے کے بعد) نبی اکرم صلی اللہ علیہ وسلم نے سیدنا بلال رضی اللہ عنہ کو حکم دیا، انہوں نے ظہر کے لیے اقامت کہی تو نبی اکرم صلی اللہ علیہ وسلم نے یہ نماز اسی طرح ادا کی جس طرح آپ صلی اللہ علیہ وسلم اسے اس کے وقت میں ادا کرتے تھے، پھر انہوں نے عصر کے لیے اقامت کہی تو نبی اکرم صلی اللہ علیہ وسلم نے یہ نماز اسی طرح ادا کی جس طرح آپ صلی اللہ علیہ وسلم اسے اس کے وقت میں ادا کرتے تھے، پھر انہوں نے مغرب کے لیے اقامت کہی تو نبی اکرم صلی اللہ علیہ وسلم نے یہ نماز اسی طرح ادا کی جس طرح آپ صلی اللہ علیہ وسلم اس کے وقت میں ادا کرتے تھے۔ [صحیح ابن حبان/كتاب الصلاة/حدیث: 2890]

اردو ترجمہ · UrduUnverified translation

سیدنا حذیفہ رضی اللہ عنہ بیان کرتے ہیں کہ غزوہ خندق کے موقع پر میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”ان لوگوں نے ہمیں عصر کی نماز ادا کرنے نہیں دی، «مَلَأَ اللّٰهُ قُبُوْرَهُمْ وَبُيُوْتَهُمْ نَارًا» ”اللہ تعالیٰ ان کی قبروں اور گھروں کو آگ سے بھر دے۔““ راوی بیان کرتے ہیں کہ نبی اکرم صلی اللہ علیہ وسلم وہ نماز اس دن سورج غروب ہونے تک ادا نہیں کر سکے تھے۔ [صحیح ابن حبان/كتاب الصلاة/حدیث: 2891]

اردو ترجمہ · UrduUnverified translation

سیدہ خولہ بنت قیس رضی اللہ عنہا بیان کرتی ہیں کہ نبی اکرم صلی اللہ علیہ وسلم ہمارے ہاں تشریف لائے، میں نے آپ صلی اللہ علیہ وسلم کی خدمت میں کھانا پیش کیا۔ آپ صلی اللہ علیہ وسلم نے اپنا دستِ مبارک اس میں رکھا، آپ صلی اللہ علیہ وسلم کو وہ گرم محسوس ہوا تو آپ صلی اللہ علیہ وسلم نے فرمایا: ” «حَسِّ» (یعنی ”اوئی“)۔“ پھر آپ صلی اللہ علیہ وسلم نے ارشاد فرمایا: ”اگر ابنِ آدم کو سردی لگتی ہے تو وہ یہ کہتا ہے: «حَسِّ» (یعنی ”اوئی“)، اگر اسے گرمی لگتی ہے تو وہ یہ کہتا ہے: «حَسِّ» (یعنی ”اوئی“)۔“ پھر نبی اکرم صلی اللہ علیہ وسلم اور سیدنا حمزہ بن عبدالمطلب رضی اللہ عنہ دنیا کا تذکرہ کرنے لگے تو نبی اکرم صلی اللہ علیہ وسلم نے ارشاد فرمایا: ”دنیا سرسبز اور میٹھی ہے، جو شخص اس کے حق کے ہمراہ اسے حاصل کرے گا، اس کے لیے اس میں برکت رکھی جائے گی اور کئی لوگ ایسے ہیں جو اللہ اور اس کے رسول کے مال کو حاصل کرنا چاہتے ہیں، تو ان کو قیامت کے دن جہنم ملے گی۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2892]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں: میں نے دس سال نبی اکرم صلی اللہ علیہ وسلم کی خدمت کی، آپ صلی اللہ علیہ وسلم نے کبھی ”اف“ نہیں کہا اور کبھی یہ نہیں فرمایا: ”یہ کیوں کیا ہے؟“ اور ”یہ کیوں نہیں کیا؟“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2893]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں: میں نے دس سال نبی اکرم صلی اللہ علیہ وسلم کی خدمت کی، آپ نے کبھی مجھے ”اف“ نہیں کہا اور کبھی یہ نہیں فرمایا: ”تم نے یہ نہیں کیا؟“ ”یہ کیوں نہیں کیا ہے؟“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2894]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک خاتون کے پاس سے گزرے جو قبر کے پاس بیٹھی رو رہی تھی، نبی اکرم صلی اللہ علیہ وسلم نے فرمایا: ”اے عورت! صبر سے کام لو۔“ اس نے کہا کہ آپ نہیں جانتے مجھے کیا مصیبت لاحق ہوئی ہے، بعد میں اس خاتون کو بتایا گیا کہ وہ اللہ کے نبی صلی اللہ علیہ وسلم تھے، وہ خاتون نبی اکرم صلی اللہ علیہ وسلم کی خدمت میں حاضر ہوئی اور اس نے عرض کی کہ میں آپ کو پہچانی نہیں تھی۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2895]

اردو ترجمہ · UrduUnverified translation

سیدنا صہیب رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بندہ مومن کے بارے میں حیرت ہوتی ہے، اس کا معاملہ ہر حالت میں بہتر ہوتا ہے؛ اگر اسے خوشخبری ملتی ہے تو وہ شکر کرتا ہے، اگر اسے پریشانی لاحق ہوتی ہے تو وہ صبر سے کام لیتا ہے اور یہ بھی اس کے لیے بہتر ہوتی ہے، یہ خصوصیت صرف مومن کو حاصل ہے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2896]

اردو ترجمہ · UrduUnverified translation

سیدنا خباب بن ارت رضی اللہ عنہ بیان کرتے ہیں کہ ہم لوگ نبی اکرم صلی اللہ علیہ وسلم کی خدمت میں حاضر ہوئے۔ آپ صلی اللہ علیہ وسلم اس وقت خانہ کعبہ کے سائے میں چادر کے ساتھ ٹیک لگا کر بیٹھے ہوئے تھے۔ ہمیں مشرکین کی طرف سے تکالیف کا سامنا کرنا پڑ رہا تھا۔ میں نے عرض کی: کیا آپ اللہ تعالیٰ سے ہمارے لیے دعا نہیں کریں گے؟ نبی اکرم صلی اللہ علیہ وسلم غضب کی حالت میں سیدھے ہو کر بیٹھ گئے اور آپ صلی اللہ علیہ وسلم کا چہرہ سرخ ہو گیا۔ آپ صلی اللہ علیہ وسلم نے ارشاد فرمایا: ”تم سے پہلے لوگوں سے کلمے کا مطالبہ کیا جاتا تھا، اگر وہ اسے پورا نہیں کرتا تھا تو آرے کو اس کے سر پر رکھ کر اسے دو حصوں میں چیر دیا جاتا تھا لیکن یہ چیز بھی انہیں ان کے دین سے نہیں پھیر سکی، اور بعض اوقات کسی شخص پر (لوہے کی بنی ہوئی) کنگھی پھیری جاتی تھی جو اس کے گوشت اور پٹھوں میں سے گزر کر اس کی ہڈیوں تک پہنچ جاتی تھی لیکن یہ چیز بھی انہیں ان کے دین سے نہیں پھیر سکی۔ البتہ تم لوگ جلد بازی کا اظہار کر رہے ہو، اللہ تعالیٰ اس معاملے کو ضرور پورا کرے گا یہاں تک کہ ایک سوار صنعاء سے چل کر حضرموت تک جائے گا اور اسے صرف اللہ کا خوف ہو گا یا اپنی بکریوں کے حوالے سے بھیڑیے کا خوف ہو گا۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2897]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”اللہ کے نبی سیدنا ایوب علیہ السلام اٹھارہ سال تک بیماری میں مبتلا رہے، ہر قریبی اور دور کے شخص نے ان سے لاتعلقی اختیار کر لی، سوائے دو آدمیوں کے جو ان کے انتہائی قریبی دوست تھے۔ وہ صبح و شام ان کے پاس جایا کرتے تھے۔ ان میں سے ایک اپنے ساتھی سے کہتا تھا: تم یہ بات جانتے ہو، اللہ کی قسم! ایوب نے کسی ایسے گناہ کا ارتکاب کیا ہے، جو تمام جہانوں میں سے کسی نے نہیں کیا۔ اس کے ساتھی نے اس سے کہا: وہ کیا ہے؟ وہ بولا: اٹھارہ سال ہو گئے ہیں، اللہ تعالیٰ کو ان پر رحم نہیں آیا ورنہ اللہ تعالیٰ ان کی تکلیف کو ختم کر دیتا۔ جب وہ شخص سیدنا ایوب علیہ السلام کے پاس گیا تو اس سے صبر نہیں ہوا، اس نے سیدنا ایوب علیہ السلام کے سامنے اس بات کا تذکرہ کر دیا، تو سیدنا ایوب علیہ السلام نے فرمایا: مجھے نہیں معلوم تم کیا کہہ رہے ہو، البتہ یہ ہے کہ اللہ تعالیٰ یہ بات جانتا ہے، میں دو آدمیوں کے پاس سے گزرا جو آپس میں جھگڑ رہے تھے اور وہ دونوں اللہ تعالیٰ کا ذکر کر رہے تھے، میں اپنے گھر واپس آ گیا اور میں نے ان دونوں کی طرف سے کفارہ دیا، اس بات کو ناپسند کرتے ہوئے کہ اللہ تعالیٰ کا ذکر ناحق طور پر کیا جائے۔ راوی کہتے ہیں: پھر وہ قضائے حاجت کے لیے گئے، جب انہوں نے اپنی حاجت مکمل کر لی، تو ان کی بیوی نے ان کے ہاتھ کو پکڑا، پھر ایک دن وہ اس عورت کے پاس نہیں آئے، تو اللہ تعالیٰ نے سیدنا ایوب علیہ السلام پر اس جگہ وحی نازل کی: ﴿ارْكُضْ بِرِجْلِكَ ۖ هَٰذَا مُغْتَسَلٌ بَارِدٌ وَشَرَابٌ﴾ [سورة ص: 42] ”تم اپنا پاؤں مارو تو یہاں سے غسل کرنے اور پینے کے لیے ٹھنڈا (پانی پھوٹ پڑے گا)۔“ وہ عورت کچھ تاخیر سے ان کے پاس آئی، جب سیدنا ایوب علیہ السلام نے اس کی طرف رخ کیا، تو ان کی بیماری ختم ہو چکی تھی اور وہ پہلے کی طرح خوبصورت (اور تندرست تھے)۔ جب اس عورت نے انہیں دیکھا تو بولی: اے (صاحب!) اللہ تعالیٰ آپ کو برکت دے، کیا آپ نے بیماری میں مبتلا اللہ تعالیٰ کے نبی (سیدنا ایوب علیہ السلام) کو دیکھا ہے؟ اللہ تعالیٰ کی قسم! میں نے آپ سے زیادہ ان سے مشابہت رکھنے والا شخص نہیں دیکھا، یعنی جب وہ تندرست تھے، سیدنا ایوب علیہ السلام نے فرمایا: وہ میں ہی ہوں۔ سیدنا ایوب علیہ السلام کے دو گودام تھے، ایک گودام گندم کا تھا اور دوسرا گودام جَو کا تھا، اللہ تعالیٰ نے دو بادل بھیجے، ان میں سے ایک گندم والے گودام پر آیا اور اس نے اس پر سونے کی بارش کی یہاں تک کہ وہ (گودام سونے سے) بھر گیا اور دوسرے بادل نے جَو کے گودام پر چاندی کی بارش کی یہاں تک کہ وہ (گودام چاندی سے) بھر گیا (یعنی سیدنا ایوب علیہ السلام پھر سے خوب مالدار ہو گئے)۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2898]

اردو ترجمہ · UrduUnverified translation

سیدنا معاویہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”دنیا میں اب صرف آزمائش اور فتنہ ہی باقی رہ گئے ہیں۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2899]

اردو ترجمہ · UrduUnverified translation

مصعب بن سعد رحمہ اللہ اپنے والد (سیدنا سعد بن ابی وقاص رضی اللہ عنہ) کا یہ بیان نقل کرتے ہیں کہ انہوں نے عرض کی: یا رسول اللہ صلی اللہ علیہ وسلم ! سب سے زیادہ آزمائش کا سامنا کن لوگوں کو کرنا پڑتا ہے؟ نبی اکرم صلی اللہ علیہ وسلم نے فرمایا: ”انبیاء کو، پھر اس کے بعد درجہ بدرجہ (نیک لوگوں کو)، بندے کو اس کے دین کے حساب سے آزمائش میں مبتلا کیا جاتا ہے اور آزمائش مسلسل بندے کے ساتھ رہتی ہے، یہاں تک کہ اسے ایسی حالت میں کر دیتی ہے کہ وہ زمین پر چلتا ہے اور اس پر کوئی گناہ نہیں ہوتا۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2900]

اردو ترجمہ · UrduUnverified translation

مصعب بن سعد اپنے والد (رضی اللہ عنہ) کا یہ بیان نقل کرتے ہیں کہ میں نے عرض کی: ”یا رسول اللہ صلی اللہ علیہ وسلم ! لوگوں میں سب سے زیادہ آزمائش کا شکار کون لوگ ہوتے ہیں؟“ نبی اکرم صلی اللہ علیہ وسلم نے فرمایا: ”انبیاء، پھر درجہ بدرجہ (مذہبی لوگ)، آدمی کو اس کے دین کے حساب سے آزمائش میں مبتلا کیا جاتا ہے، اگر اس کا دین مضبوط ہو تو اس کی آزمائش شدید ہوتی ہے اور اگر اس کے دین میں کمزوری ہو تو اس کے دین کے حساب سے ہی آزمائش میں مبتلا کیا جاتا ہے، اور آدمی مسلسل آزمائش کا شکار ہوتا رہتا ہے، یہاں تک کہ وہ آزمائش انسان کو ایسی حالت میں کر دیتی ہے کہ وہ زمین پر چل رہا ہوتا ہے اور اس پر کوئی گناہ نہیں ہوتا (یعنی اس کے سب گناہ معاف ہو چکے ہوتے ہیں)۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2901]

اردو ترجمہ · UrduUnverified translation

سیدنا انس رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”میرے ہاں گزشتہ رات بچے کی پیدائش ہوئی ہے، میں نے اپنے جدِ امجد کے نام پر اس کا نام ابراہیم رکھا ہے۔“ (راوی بیان کرتے ہیں:) پھر نبی اکرم صلی اللہ علیہ وسلم نے انہیں مدینہ منورہ کے ایک سنار کی بیوی کے سپرد کیا۔ نبی اکرم صلی اللہ علیہ وسلم اس کے پاس تشریف لے گئے، جس وقت آپ صلی اللہ علیہ وسلم ابوسیف کے گھر پہنچے وہ اس وقت اپنی بھٹی میں آگ لگا رہا تھا، پورا گھر دھوئیں سے بھرا ہوا تھا، میں نبی اکرم صلی اللہ علیہ وسلم کے آگے تیزی سے چلتا ہوا گیا اور میں نے بتایا: اے ابوسیف! نبی اکرم صلی اللہ علیہ وسلم تشریف لا رہے ہیں، تو وہ رک گیا، پھر نبی اکرم صلی اللہ علیہ وسلم نے بچے کو بلوایا اور اسے اپنے ساتھ چمٹا لیا اور جو اللہ کو منظور تھا وہ آپ صلی اللہ علیہ وسلم نے کہا۔ راوی بیان کرتے ہیں: اس کے بعد میں نے دیکھا کہ وہ بچہ نبی اکرم صلی اللہ علیہ وسلم کے سامنے آخری سانس لے رہا تھا اور نبی اکرم صلی اللہ علیہ وسلم کی آنکھوں سے آنسو جاری تھے، آپ صلی اللہ علیہ وسلم نے ارشاد فرمایا: ”آنکھوں سے آنسو جاری ہیں، دل غمگین ہے اور ہم وہی کہتے ہیں جس سے ہمارا پروردگار راضی ہے اور اے ابراہیم! ہم تمہاری وجہ سے غمگین ہیں۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2902]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ معراج کی رات نبی اکرم صلی اللہ علیہ وسلم کا گزر ایک پاکیزہ خوشبو کے پاس سے ہوا، تو آپ صلی اللہ علیہ وسلم نے دریافت کیا: ”اے جبرائیل! یہ کس چیز کی خوشبو ہے؟“ انہوں نے بتایا: ”یہ فرعون کی بیٹی کو کنگھی کرنے والی عورت اور اس کی اولاد کی خوشبو ہے۔ ایک مرتبہ وہ فرعون کی بیٹی کو کنگھی کر رہی تھی، اسی دوران اس کے ہاتھ سے کنگھی گر گئی، تو اس نے (کنگھی کو اٹھاتے ہوئے) «بِسْمِ اللّٰهِ» ”اللہ کے نام سے“ کہا۔ فرعون کی بیٹی نے دریافت کیا: کیا میرے والد؟ اس عورت نے جواب دیا: جی نہیں، بلکہ میرا اور تمہارا پروردگار اللہ تعالیٰ ہے۔ فرعون کی بیٹی نے دریافت کیا: کیا میرے باپ کے علاوہ بھی تمہارا کوئی پروردگار ہے؟ اس عورت نے جواب دیا: جی ہاں، اللہ تعالیٰ ہے۔ فرعون کی بیٹی نے کہا: کیا میں یہ بات اپنے والد کو بتا دوں؟ اس عورت نے جواب دیا: جی ہاں، تو فرعون کی بیٹی نے فرعون کو یہ بات بتا دی، فرعون نے اس عورت کو بلوایا اور اس سے دریافت کیا: کیا میرے علاوہ بھی تمہارا کوئی پروردگار ہے؟ اس عورت نے جواب دیا: جی ہاں، میرا اور تمہارا پروردگار اللہ تعالیٰ ہے، تو فرعون نے سیسہ پگھلانے کا حکم دیا، اسے پگھلا دیا گیا، اس عورت نے اس سے کہا: مجھے تم سے ایک کام ہے، اس نے جواب دیا: ٹھیک ہے۔“ نبی اکرم صلی اللہ علیہ وسلم فرماتے ہیں: ”پھر وہ اس کے بچوں کو ایک ایک کر کے (آگ میں) ڈالتا رہا یہاں تک کہ اس کے دودھ پیتے بچے کی باری آئی، تو اس بچے نے کہا: اے امی جان! آپ ثابت قدم رہیے گا، آپ حق پر ہیں۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2903]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے یہ بات ارشاد فرمائی: ”جس رات مجھے معراج کروائی گئی، تو میرا گزر ایک پاکیزہ خوشبو کے پاس سے ہوا، میں نے دریافت کیا: اے جبرائیل! یہ کس چیز کی خوشبو ہے؟ انہوں نے بتایا: یہ فرعون کی بیٹی کے بال سنوارنے والی عورت کی خوشبو ہے، ایک مرتبہ وہ بال سنوار رہی تھی کہ اس کے ہاتھ سے کنگھی گر گئی، تو اس نے کہا: «بِسْمِ اللّٰهِ» ”اللہ کے نام سے (برکت حاصل کرتے ہوئے میں اسے اٹھاتی ہوں)“، فرعون کی بیٹی نے کہا: کیا میرے والد؟ اس نے جواب دیا: نہیں، بلکہ وہ جو میرا، تمہارا اور تمہارے باپ کا پروردگار ہے۔ فرعون کی لڑکی نے کہا: میں ان سے (یعنی اپنے باپ سے) یہ کہوں گی؟ اس عورت نے کہا: تم کہہ دینا۔ اس لڑکی نے (فرعون کو بتا دیا)، تو فرعون نے اس عورت سے دریافت کیا: کیا تمہارا میرے علاوہ کوئی اور پروردگار ہے؟ اس عورت نے جواب دیا: میرا اور تمہارا پروردگار وہ ہے، جو آسمان میں ہے۔“ نبی اکرم صلی اللہ علیہ وسلم فرماتے ہیں: ”پھر اس عورت کے لیے پگھلا ہوا سیسہ گرم کیا گیا، اس عورت نے فرعون سے کہا: مجھے تم سے ایک کام ہے، فرعون نے دریافت کیا: تمہیں کیا کام ہے؟ اس عورت نے کہا: میری یہ خواہش ہے کہ تم میری اور میری اولاد کی ہڈیوں کو اکٹھا کر دینا۔ فرعون نے کہا: ایسا ہی ہو گا، کیونکہ تمہارا ہم پر کچھ حق بھی ہے۔ پھر فرعون نے اس کے بچوں کو ایک ایک کر کے اس سیسے میں ڈالنا شروع کیا، ان کے آخر میں ایک چھوٹا بچہ آیا، تو اس بچے نے کہا: اے امی جان! آپ حق پر ہیں۔“ سیدنا عبداللہ بن عباس رضی اللہ عنہما بیان کرتے ہیں: چار بچوں نے کم سنی میں کلام کیا تھا: فرعون کی بیٹی کے بال سنوارنے والی عورت کے بیٹے نے، وہ بچہ جس کے ساتھ جریج کا واقعہ ہوا تھا، سیدنا عیسیٰ بن مریم نے، اور (راوی کہتے ہیں) چوتھے بچے کے بارے میں مجھے یاد نہیں ہے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2904]

اردو ترجمہ · UrduUnverified translation

سیدنا ابوہریرہ اور سیدنا ابوسعید خدری رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”مومن بندے کو جو بھی تکلیف، پریشانی، غم اور اذیت لاحق ہوتی ہے، یہاں تک کہ اسے جو کانٹا چبھتا ہے، تو اللہ تعالیٰ اس کی وجہ سے بھی اس کے گناہوں کو ختم کر دیتا ہے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2905]

اردو ترجمہ · UrduUnverified translation

سیدہ عائشہ صدیقہ رضی اللہ عنہا یہ بات بیان کرتی ہیں کہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”مسلمان کو جو بھی کانٹا لگے یا اس سے اوپر (جو بھی تکلیف لاحق ہو)، تو اللہ تعالیٰ اس کی وجہ سے اس شخص کے درجے کو بلند کرتا ہے اور اس کی وجہ سے اس شخص کے گناہ کو معاف کر دیتا ہے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2906]

اردو ترجمہ · UrduUnverified translation

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”اللہ تعالیٰ جس شخص کے بارے میں بھلائی کا ارادہ کر لے اسے آزمائش میں مبتلا کرتا ہے۔“ (امام ابن حبان رحمہ اللہ فرماتے ہیں: ابن ابوصعصعہ نامی راوی محمد بن عبداللہ بن عبدالرحمن بن صعصعہ ہے، جو اہل مدینہ کے سرداروں میں سے ہے)۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2907]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ایک شخص کا اللہ تعالیٰ کی بارگاہ میں ایک خاص مرتبہ ہوتا ہے جہاں تک وہ کسی عمل کے ذریعے نہیں پہنچ سکتا، تو اللہ تعالیٰ اسے مسلسل ناپسندیدہ صورت حال میں مبتلا رکھتا ہے، یہاں تک کہ اس شخص کو اس مرتبے تک پہنچا دیتا ہے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2908]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں: ایک خاتون نبی کریم صلی اللہ علیہ وسلم کی خدمت میں حاضر ہوئی اسے مرگی کی شکایت تھی۔ اس نے عرض کی: یا رسول اللہ صلی اللہ علیہ وسلم ! آپ اللہ تعالیٰ سے دعا کیجیے کہ وہ مجھے شفا عطا کرے، تو نبی اکرم صلی اللہ علیہ وسلم نے فرمایا: ”اگر تم چاہو، تو میں تمہارے لیے اللہ تعالیٰ سے دعا کر دیتا ہوں وہ تمہیں شفا نصیب کر دے گا اور اگر تم چاہو، تو صبر سے کام لو، تو تم سے حساب نہیں لیا جائے گا۔“ اس نے عرض کی: میں صبر سے کام لیتی ہوں، تاکہ مجھ سے حساب نہ لیا جائے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2909]

اردو ترجمہ · UrduUnverified translation

سیدنا ابوبکر صدیق رضی اللہ عنہ کے بارے میں یہ بات منقول ہے، انہوں نے عرض کی: اس آیت ﴿لَّيْسَ بِأَمَانِيِّكُمْ وَلَا أَمَانِيِّ أَهْلِ الْكِتَابِ ۗ مَن يَعْمَلْ سُوءًا يُجْزَ بِهِ﴾ [سورة النساء: 123] ”نہ وہ تمہاری آرزوؤں کے مطابق ہے نہ اہل کتاب کی آرزوؤں کے مطابق ہے، جو شخص برا عمل کرے گا اسے اس کا بدلہ مل جائے گا“ کے بعد بہتری کیسے ہو سکتی ہے؟ (سیدنا ابوبکر صدیق رضی اللہ عنہ نے عرض کی:) تو کیا ہم جو بھی عمل کریں گے ہمیں اس کا بدلہ ملے گا؟ نبی اکرم صلی اللہ علیہ وسلم نے فرمایا: ”اے ابوبکر! اللہ تعالیٰ تمہاری مغفرت فرمائے، کیا تم بیمار نہیں ہوتے ہو؟ کیا تم غمگین نہیں ہوتے ہو؟ کیا تمہیں پریشانیاں لاحق نہیں ہوتی ہیں؟“ سیدنا ابوبکر صدیق رضی اللہ عنہ بیان کرتے ہیں: میں نے عرض کی: جی ہاں۔ نبی اکرم صلی اللہ علیہ وسلم نے فرمایا: ”یہ وہ چیز ہے، جس کی تم لوگوں کو جزا دی جائے گی۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2910]

اردو ترجمہ · UrduUnverified translation

سیدنا عبداللہ بن مغفل رضی اللہ عنہ بیان کرتے ہیں کہ زمانہ جاہلیت میں ایک شخص کی ایک فاحشہ عورت کے ساتھ ملاقات ہوئی، اس نے اس کے ساتھ خوش فعلیاں شروع کیں، یہاں تک کہ اپنا ہاتھ اس عورت کی طرف بڑھایا، تو اس عورت نے کہا: رک جاؤ، کیونکہ اللہ تعالیٰ نے شرک کو رخصت کر دیا ہے اور اسلام آ گیا ہے، اس شخص نے اس عورت کو چھوڑ دیا اور منہ پھیر کر چلا گیا، وہ مڑ کر اپنے پیچھے دیکھتا رہا اور وہ عورت بھی اس کی طرف دیکھتی رہی، یہاں تک کہ اس شخص کا چہرہ ایک دیوار پر لگ گیا، پھر وہ نبی اکرم صلی اللہ علیہ وسلم کی خدمت میں حاضر ہوا تو اس کے چہرے سے خون بہہ رہا تھا، اس نے سارا واقعہ آپ صلی اللہ علیہ وسلم کو بتایا، تو نبی اکرم صلی اللہ علیہ وسلم نے ارشاد فرمایا: ”تم ایک ایسے بندے ہو، جس کے بارے میں اللہ تعالیٰ نے بھلائی کا ارادہ کیا ہے“، پھر نبی اکرم صلی اللہ علیہ وسلم نے ارشاد فرمایا: ”بیشک اللہ تعالیٰ جب کسی بندے کے بارے میں بھلائی کا ارادہ کر لے، تو اس کے گناہ کی سزا اسے جلدی (یعنی دنیا میں ہی) دے دیتا ہے اور جب کسی بندے کے بارے میں برا ارادہ کرے، تو اسے گناہ کرنے دیتا ہے، یہاں تک کہ قیامت کے دن اس کا پورا بدلہ اسے دے گا، یوں جیسے وہ «عائر» (یعنی گناہ سے پاک) ہے“۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2911]

اردو ترجمہ · UrduUnverified translation

عبداللہ بن عامر بیان کرتے ہیں کہ سیدنا عمر بن خطاب رضی اللہ عنہ شام جانے کے لیے روانہ ہوئے، جب وہ شام کے قریب پہنچے تو انہیں اطلاع ملی کہ وہاں طاعون کی وبا پھیل چکی ہے، تو سیدنا عبدالرحمن بن عوف رضی اللہ عنہ نے انہیں یہ حدیث بیان کی کہ نبی اکرم صلی اللہ علیہ وسلم نے ارشاد فرمایا ہے: ”بے شک یہ تکلیف ایک عذاب ہے، جس کے ذریعے تم سے پہلے لوگوں کو عذاب دیا گیا، جب یہ کسی ایسی سرزمین پر واقع ہو جہاں تم موجود نہیں ہو تو تم وہاں نہ جاؤ اور جب یہ ایسی سرزمین پر واقع ہو جہاں تم موجود ہو تو تم وہاں سے فرار اختیار کرتے ہوئے نہ نکلو۔“ تو سیدنا عمر رضی اللہ عنہ اس سال لوگوں کو لے کر واپس آ گئے۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا انبیاء کرام اور سابقہ امتوں کے بارے میں اطلاع دینا تین نوعیت کا ہے۔ پہلی قسم یہ ہے کہ آپ نے کچھ متعین چیزوں کی تعریف کی ہو اور اس کا مقصد یہ ہو کہ یہ امت ان چیزوں پر عمل کرے، دوسری قسم یہ ہے کہ آپ نے کچھ چیزوں کی مذمت بیان کی ہو اور آپ کی مراد یہ ہو کہ یہ امت اس نوعیت کے کاموں کے ارتکاب سے بچ جائے اور تیسری قسم یہ ہے کہ آپ نے کوئی صفت بیان کی ہو اور آپ کا ارادہ یہ ہو کہ یہ امت اس صفت سے عبرت حاصل کرے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2912]

اردو ترجمہ · UrduUnverified translation

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”مومن مرد اور مومن عورت کے جسم، مال اور جان کے حوالے سے آزمائش درپیش رہتی ہے، یہاں تک کہ جب وہ اللہ تعالیٰ کی بارگاہ میں حاضر ہوتا ہے، تو اس کا کوئی گناہ نہیں ہوتا۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2913]

اردو ترجمہ · UrduUnverified translation

سیدنا عبداللہ بن عباس رضی اللہ عنہما کے بارے میں یہ بات منقول ہے، وہ بکثرت یہ حدیث بیان کیا کرتے تھے: نبی اکرم صلی اللہ علیہ وسلم کی ایک صاحبزادی کا آخری وقت قریب آیا، نبی اکرم صلی اللہ علیہ وسلم نے انہیں لیا اور اپنے دونوں ہاتھوں میں رکھ لیا، پھر آپ صلی اللہ علیہ وسلم نے انہیں اپنے ساتھ چمٹا لیا، اس وقت ان پر نزع کا عالم طاری تھا، یہاں تک کہ ان کا انتقال ہو گیا۔ نبی اکرم صلی اللہ علیہ وسلم اس وقت رو رہے تھے، آپ صلی اللہ علیہ وسلم نے اس صاحبزادی کو رکھا، تو سیدہ ام ایمن رضی اللہ عنہا نے بلند آواز میں چیخ ماری۔ نبی اکرم صلی اللہ علیہ وسلم نے فرمایا: ”تم نہ روؤ۔“ انہوں نے عرض کی: کیا میں اللہ کے رسول کو روتے ہوئے نہیں دیکھ رہی ہوں؟ نبی اکرم صلی اللہ علیہ وسلم نے ارشاد فرمایا: ”میرا رونا رحمت ہے، مومن کی ہر صورت بہتر ہوتی ہے، اس کے دونوں پہلوؤں سے جان نکلتی ہے، تو وہ اس وقت اللہ کی حمد بیان کر رہا ہوتا ہے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2914]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”مومن کی مثال کھیت کی طرح ہے، جسے مسلسل ہوا ادھر ادھر جھکاتی رہتی ہے، اسی طرح مومن کو بھی ہمیشہ آزمائش لاحق رہتی ہے اور منافق کی مثال اخروٹ کے درخت کی طرح ہے، جو لہراتا نہیں ہے، یہاں تک کہ (ایک ہی مرتبہ) اسے جڑ سے اکھاڑ لیا جاتا ہے۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2915]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ ایک دیہاتی نبی اکرم صلی اللہ علیہ وسلم کی خدمت میں حاضر ہوا، نبی اکرم صلی اللہ علیہ وسلم نے دریافت کیا: ”کیا تمہیں «أُمُّ مِلْدَم» نے جکڑ لیا ہے؟“ اس نے دریافت کیا: «أُمُّ مِلْدَم» کیا ہوتا ہے؟ نبی اکرم صلی اللہ علیہ وسلم نے فرمایا: ”یہ ایک تپش ہے، جو جلد اور گوشت کے درمیان ہوتی ہے۔“ اس نے کہا: مجھے تو یہ صورت حال کبھی لاحق نہیں ہوئی۔ نبی اکرم صلی اللہ علیہ وسلم نے دریافت کیا: ”کیا تمہیں «صُدَاع» کی شکایت ہے؟“ اس نے دریافت کیا: «صُدَاع» کیا ہوتا ہے؟ نبی اکرم صلی اللہ علیہ وسلم نے فرمایا: ”یہ ایک رگ ہے، جو آدمی کے سر میں آدمی پر ضرب لگاتی ہے۔“ اس نے کہا: مجھے یہ صورت حال کبھی درپیش نہیں آئی۔ جب وہ شخص چلا گیا، تو نبی اکرم صلی اللہ علیہ وسلم نے فرمایا: ”جو شخص کسی جہنمی کو دیکھنا چاہے وہ اس شخص کو دیکھ لے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”جو شخص اہل جہنم سے تعلق رکھنے والے کسی شخص کی طرف دیکھنا چاہتا ہو وہ اس شخص کو دیکھ لے،“ اس میں لفظی طور پر ایک چیز کے بارے میں اطلاع دی گئی ہے لیکن اس سے مراد یہ ہے کہ اس چیز کی طرف مائل ہونے سے منع کیا جائے اور اس کی متضاد چیز پر صبر کی کمی (سے منع کیا جائے)۔ اس کی وجہ یہ ہے کہ اللہ تعالیٰ نے اس دنیا میں غم اور پریشانیاں رکھی ہیں تاکہ یہ مسلمانوں کے گناہوں کا کفارہ بن جائیں، تو نبی اکرم صلی اللہ علیہ وسلم اپنی امت کو یہ اطلاع دینا چاہتے ہیں کہ آدمی دن اور رات میں بعض اوقات ان چیزوں سے اجتناب نہیں کرتا جن چیزوں سے اللہ تعالیٰ نے منع کیا ہے اور اس وجہ سے اس کے لیے جہنم واجب ہو جاتی ہے، وہ اس کے بعد معافی نہیں مانگتا، تو ہر شخص اپنے عمل کے بدلے میں رہن ہوتا ہے اور یہ علتیں اس دنیا میں اس کے بعض گناہوں کا کفارہ بن جاتی ہیں۔ اس سے یہ مراد نہیں ہے کہ جس شخص کو اس دنیا میں عافیت نصیب ہو جائے وہ جہنمی ہوتا ہے۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2916]

اردو ترجمہ · UrduUnverified translation

سیدنا عبداللہ رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم نے کوئی چیز تقسیم کی، تو ایک شخص نے کسی چیز کے بارے میں یہ کہا کہ اس میں انصاف سے کام نہیں لیا گیا۔ راوی کہتے ہیں: میں نے کہا: اللہ کی قسم! میں اللہ کے رسول صلی اللہ علیہ وسلم کو اس بارے میں ضرور بتاؤں گا، میں نے نبی اکرم صلی اللہ علیہ وسلم کو بتایا، تو آپ صلی اللہ علیہ وسلم نے ارشاد فرمایا: ”اللہ تعالیٰ سیدنا موسیٰ علیہ السلام پر رحم کرے، انہیں اس سے زیادہ تکلیف پہنچائی گئی، لیکن پھر بھی انہوں نے صبر سے کام لیا۔“ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2917]

اردو ترجمہ · UrduUnverified translation

ابووائل بیان کرتے ہیں کہ سیدہ عائشہ رضی اللہ عنہا نے یہ بات بیان کی ہے: میں نے کسی کو (بیماری کے دوران) نبی اکرم صلی اللہ علیہ وسلم سے زیادہ تکلیف کا شکار نہیں دیکھا۔ [صحیح ابن حبان/كتاب الجنائز وما يتعلق بها مقدما أو مؤخرا/حدیث: 2918]