Hadith 2536–2575

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں: ”میرے خلیل سیدنا ابوالقاسم صلی اللہ علیہ وسلم نے مجھے تین چیزوں کی تلقین کی تھی: سونے سے پہلے وتر ادا کرنے کی، چاشت کے وقت دو رکعات ادا کرنے کی اور ہر مہینے میں تین روزے رکھنے کی۔“ [صحیح ابن حبان/كتاب الصلاة/حدیث: 2536]

اردو ترجمہ · UrduUnverified translation

محمد بن عمرو بیان کرتے ہیں: میں نے ابومرہ کو دیکھا ہے، وہ ایک عمر رسیدہ شخص تھے، انہیں سیدہ ام ہانی رضی اللہ عنہا کی زیارت کا شرف حاصل تھا، وہ سیدہ ام ہانی رضی اللہ عنہا کے حوالے سے یہ بات نقل کرتے ہیں، وہ بیان کرتی ہیں: فتح مکہ کے موقع پر میں نے نبی اکرم صلی اللہ علیہ وسلم کو دیکھا، میں نے عرض کی: یا رسول اللہ صلی اللہ علیہ وسلم ! میں نے اپنے دو دیوروں کو پناہ دی ہے اور میرے بھائی یعنی سیدنا علی رضی اللہ عنہ انہیں قتل کرنا چاہتے ہیں، سیدہ ام ہانی رضی اللہ عنہا بیان کرتی ہیں: نبی اکرم صلی اللہ علیہ وسلم نے ارشاد فرمایا: ”ام ہانی! جسے تم نے پناہ دی ہے، ہم بھی اسے پناہ دیتے ہیں۔“ سیدہ ام ہانی رضی اللہ عنہا بیان کرتی ہیں: نبی اکرم صلی اللہ علیہ وسلم نے پانی انڈیلا اور غسل کیا، پھر کپڑے کو لحاف کے طور پر لپیٹ لیا، اس کے کنارے مخالف سمت میں (کندھوں) پر ڈال لیے، پھر آپ صلی اللہ علیہ وسلم نے چاشت کے وقت آٹھ رکعات ادا کیں۔ [صحیح ابن حبان/كتاب الصلاة/حدیث: 2537]

اردو ترجمہ · UrduUnverified translation

عبید اللہ بن عبد اللہ بن حارث اپنے والد کا یہ بیان نقل کرتے ہیں: میں نے اس بارے میں تحقیق کی اور مجھے اس بات کی بڑی جستجو تھی کہ مجھے کوئی ایسا شخص ملے جو مجھے اس بارے میں بتائے کہ نبی اکرم صلی اللہ علیہ وسلم نے چاشت کی نماز ادا کی ہے، تو مجھے صرف سیدہ ام ہانی رضی اللہ عنہا ملیں جنہوں نے مجھے اس بارے میں بتایا، انہوں نے مجھے بتایا کہ نبی اکرم صلی اللہ علیہ وسلم فتح مکہ کے دن، دن چڑھ جانے کے بعد تشریف لائے، آپ صلی اللہ علیہ وسلم کے حکم کے تحت آپ کے پردے کے لیے کپڑا لٹکا دیا گیا، آپ صلی اللہ علیہ وسلم نے غسل کیا، پھر آپ صلی اللہ علیہ وسلم نے اٹھ کر آٹھ رکعات ادا کیں، میں اندازہ نہیں کر سکتی کہ ان میں آپ صلی اللہ علیہ وسلم کا قیام زیادہ طویل تھا یا رکوع زیادہ طویل تھا یا سجدہ زیادہ طویل تھا، یہ سب ایک دوسرے کے قریب قریب تھے؛ سیدہ ام ہانی رضی اللہ عنہا بیان کرتی ہیں: میں نے اس سے پہلے یا اس کے بعد کبھی بھی آپ صلی اللہ علیہ وسلم کو اس وقت میں نوافل ادا کرتے ہوئے نہیں دیکھا۔ [صحیح ابن حبان/كتاب الصلاة/حدیث: 2538]

اردو ترجمہ · UrduUnverified translation

سیدنا زید بن ارقم رضی اللہ عنہ سے منقول ہے کہ انہوں نے مسجدِ قباء میں کچھ لوگوں کو چاشت کے وقت نماز ادا کرتے ہوئے دیکھا تو یہ بات ارشاد فرمائی: یہ لوگ یہ بات جانتے ہیں کہ اس وقت کے علاوہ کسی اور وقت میں نماز ادا کرنا زیادہ فضیلت رکھتا ہے، نبی اکرم صلی اللہ علیہ وسلم نے ارشاد فرمایا: ”نیک لوگوں کی نماز اس وقت ہوتی ہے، جب (اونٹ کے) بچوں کے لیے ریت گرم ہو جائے۔“ [صحیح ابن حبان/كتاب الصلاة/حدیث: 2539]

اردو ترجمہ · UrduUnverified translation

سیدنا عبداللہ بن بریدہ رحمہ اللہ اپنے والد (سیدنا بریدہ رضی اللہ عنہ) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”انسان میں تین سو ساٹھ (360) جوڑ ہوتے ہیں اور ہر جوڑ پر صدقہ کرنا لازم ہے۔“ ہم نے عرض کی: یا رسول اللہ صلی اللہ علیہ وسلم ! کون اس کی طاقت رکھتا ہے؟ نبی اکرم صلی اللہ علیہ وسلم نے ارشاد فرمایا: ”تم تکلیف دہ چیز کو پرے کر دو، ورنہ چاشت کے وقت دو رکعات ادا کر لو۔“ [صحیح ابن حبان/كتاب الصلاة/حدیث: 2540]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم تشریف لائے تو لوگ رمضان کے مہینے میں مسجد کے ایک گوشے میں نماز ادا کر رہے تھے۔ نبی اکرم صلی اللہ علیہ وسلم نے دریافت فرمایا: ”یہ کون لوگ ہیں؟“ عرض کی گئی: یہ کچھ لوگ ہیں جنہیں قرآن نہیں آتا، سیدنا ابی بن کعب رضی اللہ عنہ انہیں نماز پڑھا رہے ہیں اور وہ ان کی نماز کی پیروی کر رہے ہیں۔ پھر نبی اکرم صلی اللہ علیہ وسلم نے ارشاد فرمایا: ”انہوں نے ٹھیک کیا ہے“ (راوی کو شک ہے شاید یہ الفاظ ہیں) ”انہوں نے جو کیا ہے وہ عمدہ ہے۔“ [صحیح ابن حبان/كتاب الصلاة/حدیث: 2541]

اردو ترجمہ · UrduUnverified translation

سیدہ عائشہ رضی اللہ عنہا بیان کرتی ہیں کہ ایک رات نبی اکرم صلی اللہ علیہ وسلم نے مسجد میں نماز ادا کی، کچھ لوگوں نے آپ صلی اللہ علیہ وسلم کی نماز کی پیروی میں نماز ادا کی، اگلی رات جب آپ صلی اللہ علیہ وسلم نے نماز ادا کی تو لوگوں کی تعداد زیادہ ہو گئی، تیسری یا چوتھی رات میں بہت سے لوگ اکٹھے ہو گئے، تو نبی اکرم صلی اللہ علیہ وسلم ان کے پاس تشریف نہیں لے گئے، جب صبح ہوئی تو آپ صلی اللہ علیہ وسلم نے ارشاد فرمایا: ”تم لوگوں نے جو کیا (یعنی تم لوگ جو نماز ادا کرنے آئے تھے) وہ میں نے دیکھ لیا تھا لیکن میں اس لیے تمہاری طرف نہیں آیا مجھے یہ اندیشہ تھا، یہ تم پر فرض ہو جائے گی۔“ (راوی کہتے ہیں) یہ رمضان کے مہینے کی بات ہے۔ [صحیح ابن حبان/كتاب الصلاة/حدیث: 2542]

اردو ترجمہ · UrduUnverified translation

عروہ بن زبیر بیان کرتے ہیں کہ سیدہ عائشہ رضی اللہ عنہا نے انہیں بتایا: ایک مرتبہ نبی اکرم صلی اللہ علیہ وسلم رات کے وقت تشریف لے گئے، آپ نے مسجد میں نماز ادا کی، لوگوں نے بھی (آپ کی اقتداء میں) نماز ادا کی، اگلے دن لوگوں نے اس بارے میں بات چیت کی تو (دوسری رات) لوگوں کی تعداد زیادہ ہو گئی۔ نبی اکرم صلی اللہ علیہ وسلم دوسری رات بھی ان لوگوں کے پاس تشریف لے گئے، آپ نے نماز ادا کی تو لوگوں نے آپ کی نماز کی پیروی کی، اگلے دن لوگوں نے اس بارے میں بات کی تو لوگوں کی تعداد زیادہ ہو گئی۔ نبی اکرم صلی اللہ علیہ وسلم تیسری رات بھی تشریف لے گئے، آپ نے نماز ادا کی، لوگوں نے آپ کی نماز کی اقتداء کی، اگلے دن لوگوں نے اس بارے میں بات چیت کی تو لوگوں کی تعداد زیادہ ہو گئی یہاں تک کہ مسجد ان کے لیے کم پڑ گئی۔ نبی اکرم صلی اللہ علیہ وسلم ان کے پاس تشریف نہیں لے گئے، لوگ کہتے رہے: نماز (کے لیے تشریف لے آئیں) لیکن نبی اکرم صلی اللہ علیہ وسلم ان کے پاس تشریف نہیں لے گئے، نبی اکرم صلی اللہ علیہ وسلم فجر کی نماز کے لیے ان کے پاس تشریف لے گئے، جب آپ نے فجر کی نماز ادا کر لی، تو آپ لوگوں کی طرف متوجہ ہوئے اور آپ نے کلمہ شہادت پڑھا اور پھر یہ بات ارشاد فرمائی: ” «أَمَّا بَعْدُ» ! گزشتہ رات تمہاری حالت مجھ سے مخفی نہیں تھی لیکن مجھے یہ اندیشہ ہوا کہ رات کی نماز تم پر فرض قرار دے دی جائے گی اور تم اسے ادا نہیں کر پاؤ گے۔“ (سیدہ عائشہ رضی اللہ عنہا بیان کرتی ہیں) نبی اکرم صلی اللہ علیہ وسلم رمضان میں لوگوں کو نوافل ادا کرنے کی ترغیب دیتے تھے، آپ عزیمت کے ساتھ انہیں حکم نہیں دیتے تھے۔ آپ ارشاد فرماتے تھے: ”جو شخص ایمان کی حالت میں ثواب کی امید رکھتے ہوئے شب قدر میں نوافل ادا کرے گا، اللہ تعالیٰ اس کے گزشتہ گناہوں کی بخشش کر دے گا۔“ راوی بیان کرتے ہیں: جب نبی اکرم صلی اللہ علیہ وسلم کا وصال ہوا، تو یہ معاملہ یوں ہی رہا۔ سیدنا ابوبکر صدیق رضی اللہ عنہ کے عہد خلافت میں اور سیدنا عمر رضی اللہ عنہ کے عہد کے ابتدائی دور میں معاملہ اسی طرح رہا یہاں تک کہ سیدنا عمر بن خطاب رضی اللہ عنہ نے لوگوں کو سیدنا ابی بن کعب رضی اللہ عنہ کے پیچھے اکٹھا کیا، تو وہ رمضان میں انہیں تراویح پڑھایا کرتے تھے، یہ لوگوں کا وہ پہلا اجتماع تھا جو رمضان میں کسی قاری کے پیچھے ہوا تھا۔ [صحیح ابن حبان/كتاب الصلاة/حدیث: 2543]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نصف رات کے وقت تشریف لے گئے، آپ نے مسجد میں نماز ادا کی اور سب لوگوں نے آپ کی اقتدا میں نماز ادا کی۔ اگلے دن لوگوں نے اس بارے میں بات چیت کی تو پہلے سے زیادہ لوگ اکٹھے ہو گئے، پھر نبی اکرم صلی اللہ علیہ وسلم دوسری رات بھی تشریف لے گئے، آپ نے نماز ادا کی اور لوگوں نے آپ کی اقتدا میں نماز ادا کی۔ اگلی رات لوگوں نے اس بات کا تذکرہ کیا تو تیسری رات تعداد زیادہ ہو چکی تھی، نبی اکرم صلی اللہ علیہ وسلم تشریف لے گئے، آپ نے انہیں نماز پڑھائی اور لوگوں نے آپ کے پیچھے اقتدا میں نماز ادا کی۔ جب چوتھی رات آئی تو مسجد مکمل بھر چکی تھی، نبی اکرم صلی اللہ علیہ وسلم تشریف نہیں لے گئے، کچھ لوگوں نے عرض کرنا شروع کیا: نماز (کے لیے تشریف لے آئیں)، لیکن نبی اکرم صلی اللہ علیہ وسلم ان کے پاس تشریف نہیں لے گئے یہاں تک کہ آپ فجر کی نماز کے لیے تشریف لے گئے، جب آپ نے فجر کی نماز ادا کر لی تو آپ لوگوں کی طرف متوجہ ہوئے، پھر آپ نے کلمہ شہادت پڑھا اور یہ بات ارشاد فرمائی: ”گزشتہ رات تمہارا معاملہ مجھ سے مخفی نہیں تھا، مجھے یہ اندیشہ ہوا کہ تم پر رات کی نماز فرض کر دی جائے گی اور تم اس سے عاجز آ جاؤ گے (یعنی اسے ادا نہیں کر پاؤ گے)۔“ [صحیح ابن حبان/كتاب الصلاة/حدیث: 2544]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نصف رات کے وقت مسجد تشریف لے گئے، کچھ لوگوں نے آپ کی اقتدا میں نماز ادا کی، اگلے دن لوگوں نے آپس میں اس بارے میں بات چیت کی تو زیادہ تعداد میں لوگ اکٹھے ہو گئے۔ نبی اکرم صلی اللہ علیہ وسلم دوسری رات بھی تشریف لے گئے، کچھ لوگوں نے آپ کی اقتدا میں نماز ادا کی۔ اگلے دن لوگوں نے آپس میں اس بات کا تذکرہ کیا، تو تیسری رات اہل مسجد کی تعداد زیادہ ہو گئی۔ نبی اکرم صلی اللہ علیہ وسلم تشریف لے گئے، آپ نے انہیں نماز پڑھائی اور لوگوں نے آپ کی اقتدا میں نماز ادا کی۔ چوتھی رات آئی تو مسجد مکمل بھر چکی تھی۔ نبی اکرم صلی اللہ علیہ وسلم تشریف نہیں لے گئے یہاں تک کہ آپ فجر کی نماز کے لیے تشریف لے گئے، جب آپ نے فجر کی نماز ادا کر لی، تو ان لوگوں کی طرف متوجہ ہوئے پھر آپ نے کلمہ شہادت پڑھا اور ارشاد فرمایا: ” «أَمَّا بَعْدُ» ! گزشتہ رات تمہارا معاملہ مجھ سے مخفی نہیں تھا، لیکن مجھے یہ اندیشہ ہوا کہ تم پر رات کے نوافل فرض کر دیے جائیں گے اور تم اس سے عاجز آ جاؤ گے (یعنی انہیں ادا نہ کر پاؤ گے)۔“ [صحیح ابن حبان/كتاب الصلاة/حدیث: 2545]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو رمضان کے بارے میں یہ بات ارشاد فرماتے ہوئے سنا ہے: ”جو شخص ایمان کی حالت میں ثواب کی امید رکھتے ہوئے اس میں نوافل ادا کرے گا، اس کے گزشتہ گناہوں کی مغفرت ہو جائے گی۔“ (امام ابن حبان رحمہ اللہ فرماتے ہیں:) «اِحْتِسَاب» سے مراد یہ ہے کہ بندہ اطاعت کے ہمراہ اپنے پروردگار کی بارگاہ کا قصد کرے اس کی قبولیت کی امید رکھتے ہوئے۔ [صحیح ابن حبان/كتاب الصلاة/حدیث: 2546]

اردو ترجمہ · UrduUnverified translation

سیدنا ابوذر غفاری رضی اللہ عنہ بیان کرتے ہیں: ہم نے نبی اکرم صلی اللہ علیہ وسلم کے ہمراہ رمضان کے روزے رکھے۔ آپ صلی اللہ علیہ وسلم نے ہمیں چھٹی رات میں نوافل نہیں پڑھائے۔ آپ صلی اللہ علیہ وسلم نے ہمیں پانچویں رات میں نوافل پڑھائے تھے یہاں تک کہ آدھی رات بیت گئی۔ ہم نے عرض کی: یا رسول اللہ صلی اللہ علیہ وسلم ! اگر آپ اس باقی رہ جانے والی رات میں نفل پڑھائیں، (تو یہ مناسب ہو گا)۔ نبی اکرم صلی اللہ علیہ وسلم نے ارشاد فرمایا: ”جو شخص امام کے ہمراہ نماز ادا کرے یہاں تک کہ اسے مکمل کرے تو اسے رات بھر نوافل ادا کرنے کا ثواب ملتا ہے۔“ پھر نبی اکرم صلی اللہ علیہ وسلم نے ہمیں نماز نہیں پڑھائی یہاں تک کہ اس مہینے میں تین دن باقی رہ گئے، تو آپ صلی اللہ علیہ وسلم نے ہمیں تیسری رات میں نماز پڑھائی۔ آپ صلی اللہ علیہ وسلم نے اپنے اہل خانہ اور اپنی ازواج کو بھی اکٹھا کیا، آپ صلی اللہ علیہ وسلم نے ہمیں نوافل پڑھائے یہاں تک کہ ہمیں یہ اندیشہ ہوا کہ ہماری فلاح رہ جائے گی۔ (راوی کہتے ہیں:) میں نے دریافت کیا: فلاح سے مراد کیا ہے؟ تو انہوں نے جواب دیا: سحری۔ (امام ابن حبان رحمہ اللہ فرماتے ہیں: سیدنا ابوذر غفاری رضی اللہ عنہ کا یہ کہنا کہ چھٹی رات میں آپ صلی اللہ علیہ وسلم نے ہمیں نوافل نہیں پڑھائے، آپ صلی اللہ علیہ وسلم نے پانچویں رات میں ہمیں نوافل پڑھائے، اس سے مراد یہ ہے کہ جو عشرہ باقی رہ گیا تھا اس کی چھٹی یا پانچویں رات۔ اس سے یہ مراد نہیں ہے جو مہینہ گزر چکا تھا اس کی پانچویں یا چھٹی رات، کیونکہ وہ مہینہ جس میں نبی اکرم صلی اللہ علیہ وسلم نے اپنی امت کو یہ خطاب کیا تھا، اس میں انتیس دن تھے۔ تو انتیس دنوں والے مہینے کے باقی حصے کی چھٹی رات چوبیسویں رات تھی اور 29 دن والے مہینے کے باقی حصے کی پانچویں رات پچیسویں رات ہو گی۔) [صحیح ابن حبان/كتاب الصلاة/حدیث: 2547]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ ہم نے نبی اکرم صلی اللہ علیہ وسلم کے سامنے شب قدر کا ذکر کیا، تو نبی اکرم صلی اللہ علیہ وسلم نے ارشاد فرمایا: ”مہینے کا کتنا حصہ گزر چکا ہے؟“ ہم نے عرض کی: بائیس (22) دن گزر گئے ہیں اور آٹھ دن باقی رہ گئے ہیں۔ نبی اکرم صلی اللہ علیہ وسلم نے فرمایا: ”نہیں، بلکہ بائیس (22) دن گزر گئے ہیں اور سات دن باقی رہ گئے ہیں، مہینہ کبھی انتیس (29) کا ہوتا ہے، تو تم اس رات کو تلاش کرو۔“ [صحیح ابن حبان/كتاب الصلاة/حدیث: 2548]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں کہ سیدنا ابی بن کعب رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: یا رسول اللہ! گزشتہ رات رمضان کے حوالے سے مجھے کچھ مشکل پیش آئی۔ نبی اکرم صلی اللہ علیہ وسلم نے دریافت فرمایا: ”وہ کیا تھی؟ اے ابی!“ انہوں نے عرض کی: ہمارے گھر کی کچھ خواتین تھیں، انہوں نے یہ کہا: ہم قرآن نہیں پڑھ سکتیں، ہم آپ کی نماز کی پیروی کرتی ہیں۔ راوی کہتے ہیں: میں نے انہیں آٹھ رکعات پڑھائیں پھر میں نے وتر ادا کر لیے۔ (سیدنا جابر بن عبداللہ رضی اللہ عنہما بیان کرتے ہیں) نبی اکرم صلی اللہ علیہ وسلم نے گویا رضا مندی کا اظہار فرمایا اور آپ صلی اللہ علیہ وسلم نے انہیں کچھ نہیں کہا۔ [صحیح ابن حبان/كتاب الصلاة/حدیث: 2549]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں کہ سیدنا ابی بن کعب رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور عرض کی: ”یا رسول اللہ صلی اللہ علیہ وسلم ! گزشتہ رات مجھے کچھ پریشانی ہوئی“ (یعنی رمضان کے حوالے سے)۔ نبی اکرم صلی اللہ علیہ وسلم نے دریافت کیا: ”اے ابی! وہ کیا تھی؟“ انہوں نے عرض کی: میرے گھر کی خواتین نے کہا: ”ہم قرآن نہیں پڑھ سکتی ہیں، تو ہم آپ کی نماز کی پیروی کریں گی۔“ سیدنا ابی نے بتایا: ”میں نے ان خواتین کو آٹھ رکعات نماز پڑھائی، پھر میں نے وتر ادا کر لیے۔“ (سیدنا جابر بن عبداللہ رضی اللہ عنہما بیان کرتے ہیں) تو نبی اکرم صلی اللہ علیہ وسلم نے گویا رضامندی کا اظہار کیا، تاہم آپ صلی اللہ علیہ وسلم نے انہیں کچھ نہیں کہا۔ [صحیح ابن حبان/كتاب الصلاة/حدیث: 2550]

اردو ترجمہ · UrduUnverified translation

سعد بن ہشام بیان کرتے ہیں کہ انہوں نے سیدہ عائشہ رضی اللہ عنہا کی خدمت میں عرض کی کہ آپ مجھے نبی اکرم صلی اللہ علیہ وسلم کے اخلاق کے بارے میں بتائیں، تو سیدہ عائشہ رضی اللہ عنہا نے فرمایا: کیا تم نے قرآن کی تلاوت نہیں کی ہے؟ میں نے جواب دیا: جی ہاں! کی ہے، تو انہوں نے فرمایا: نبی اکرم صلی اللہ علیہ وسلم کے اخلاق قرآن تھے۔ راوی کہتے ہیں کہ میں نے یہ ارادہ کیا کہ اب میں اٹھ جاتا ہوں اور اب ان سے کسی چیز کے بارے میں دریافت نہیں کروں گا، پھر میں نے کہا: اے ام المؤمنین! آپ مجھے نبی اکرم صلی اللہ علیہ وسلم کے قیام کے بارے میں بتائیں، تو سیدہ عائشہ رضی اللہ عنہا نے فرمایا: کیا تم نے اس سورت ﴿يَا أَيُّهَا الْمُزَّمِّلُ﴾ [سورة المزمل: 1] ”اے چادر اوڑھنے والے“ کی تلاوت نہیں کی ہے؟ میں نے جواب دیا: جی ہاں! کی ہے۔ سیدہ عائشہ رضی اللہ عنہا نے فرمایا: اللہ تعالیٰ نے اس سورت کے آغاز میں رات کے وقت نوافل ادا کرنا فرض قرار دیا تھا، نبی اکرم صلی اللہ علیہ وسلم اور آپ کے اصحاب ایک سال تک رات کے وقت نوافل ادا کرتے رہے یہاں تک کہ ان کے پاؤں ورم آلود ہو گئے۔ اللہ تعالیٰ نے اس سورت کے اختتامی حصے کو بارہ ماہ تک آسمان میں روکے رکھا، پھر اللہ تعالیٰ نے اس سورت کے آخر میں تخفیف کا حکم نازل کر دیا، تو رات کے وقت نوافل ادا کرنا نفل قرار پایا جو پہلے فرض تھا۔ [صحیح ابن حبان/كتاب الصلاة/حدیث: 2551]

اردو ترجمہ · UrduUnverified translation

سعد بن ہشام، سیدہ عائشہ رضی اللہ عنہا کا یہ بیان نقل کرتے ہیں کہ نبی اکرم صلی اللہ علیہ وسلم جب کوئی نماز ادا کرتے تھے، تو آپ اس بات کو پسند کرتے تھے کہ اسے باقاعدگی سے ادا کریں اور اگر آپ نیند یا بیماری یا تکلیف وغیرہ جیسی کسی مصروفیت کی وجہ سے رات کے وقت نوافل ادا نہیں کر پاتے تھے، تو آپ دن کے وقت بارہ رکعات ادا کرتے تھے۔ [صحیح ابن حبان/كتاب الصلاة/حدیث: 2552]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”شیطان کسی شخص کی گدی پر تین گرہیں لگاتا ہے جب وہ سوتا ہے، ہر گرہ پر وہ یہ کہتا ہے: «عَلَيْكَ لَيْلٌ طَوِيلٌ، فَارْقُدْ» ”رات بہت لمبی ہے، تم سوئے رہو۔“ اگر وہ شخص بیدار ہو کر اللہ تعالیٰ کا ذکر کرے تو ایک گرہ کھل جاتی ہے، وہ وضو کرے تو دوسری گرہ کھل جاتی ہے اور اگر وہ نماز ادا کرے تو تیسری گرہ بھی کھل جاتی ہے، تو وہ شخص صبح کے وقت چاق و چوبند اور خوش مزاج ہوتا ہے، ورنہ اس کا مزاج بھی ٹھیک نہیں ہوتا اور وہ کاہل ہوتا ہے۔“ [صحیح ابن حبان/كتاب الصلاة/حدیث: 2553]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھ سے فرمایا: ”جو بھی مرد یا عورت (سوتے ہیں) تو ان کے سونے کے وقت ان کے سر پر گرہ لگا دی جاتی ہے، اگر وہ بیدار ہو کر اللہ تعالیٰ کا ذکر کریں تو گرہ کھل جاتی ہے، اگر وہ اٹھ کر وضو کریں اور نماز ادا کریں تو تمام گرہیں کھل جاتی ہیں۔“ [صحیح ابن حبان/كتاب الصلاة/حدیث: 2554]

اردو ترجمہ · UrduUnverified translation

سیدنا عقبہ بن عمرو رضی اللہ عنہ بیان کرتے ہیں: میں نے آج تک نبی اکرم صلی اللہ علیہ وسلم کے حوالے سے کوئی ایسی بات بیان نہیں کی جو نبی اکرم صلی اللہ علیہ وسلم نے ارشاد نہ فرمائی ہو، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص جان بوجھ کر میری طرف کوئی جھوٹی بات منسوب کرے اس کو جہنم میں اپنے گھر تک پہنچنے کے لیے تیار رہنا چاہیے۔“ تو میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”میری امت کا ایک شخص رات کے وقت اٹھتا ہے، وہ وضو کرنے کے لیے جاتا ہے، اس پر گرہیں لگی ہوئی ہوتی ہیں، جب وہ اپنے ہاتھ دھوتا ہے، تو ایک گرہ کھل جاتی ہے، جب وہ اپنا چہرہ دھوتا ہے، تو دوسری گرہ کھل جاتی ہے، جب وہ اپنے سر کا مسح کرتا ہے، تو تیسری گرہ کھل جاتی ہے، جب وہ اپنے پاؤں دھوتا ہے، تو ایک اور گرہ کھل جاتی ہے، تو اللہ تعالیٰ حجاب کے پیچھے سے فرماتا ہے: تم لوگ میرے اس بندے کی طرف دیکھو جو اپنے آپ کو اس لیے تیار کر رہا ہے تاکہ مجھ سے مانگے، آج یہ میرا بندہ جو مانگے گا وہ اس کو ملے گا، میرا یہ بندہ مجھ سے جو مانگے گا وہ اسے ملے گا۔“ [صحیح ابن حبان/كتاب الصلاة/حدیث: 2555]

اردو ترجمہ · UrduUnverified translation

سیدنا جابر رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو بھی مسلمان مرد یا عورت ہوتا ہے، اس پر گرہیں لگ جاتی ہیں، وہ بیدار ہو کر اللہ تعالیٰ کا ذکر کرتا ہے، تو ایک گرہ کھل جاتی ہے، اگر وہ وضو کر کے نماز کے لیے اٹھتا ہے، تو وہ چاق و چوبند حالت میں صبح کرتا ہے، اس نے بھلائی حاصل کر لی ہوتی ہے اور اس کی تمام گرہیں کھل چکی ہوتی ہیں اور اگر وہ ایسی حالت میں صبح کرتا ہے، اللہ تعالیٰ کا ذکر نہیں کرتا، تو وہ ایسی حالت میں صبح کرتا ہے، اس کی سب گرہیں لگی ہوئی ہوتی ہیں اور وہ بوجھل ذہن کے ساتھ کاہلی کے عالم میں صبح کرتا ہے، اسے بھلائی نصیب نہیں ہوتی۔“ [صحیح ابن حبان/كتاب الصلاة/حدیث: 2556]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ہمارا پروردگار دو بندوں پر خوش ہوتا ہے، ایک وہ شخص جو (رات کے وقت) اپنے بستر اور لحاف میں سے، اپنی بیوی کے پاس سے اٹھ کر نماز کی طرف جاتا ہے، تو اللہ تعالیٰ فرماتا ہے: میرے اس بندے کو دیکھو، یہ اپنے بستر اور لحاف میں سے، اپنی بیوی کے پاس سے اٹھ کر نماز کی طرف آیا ہے، اس چیز کی رغبت رکھتے ہوئے جو میرے پاس ہے اور اس چیز سے ڈرتے ہوئے جو میرے پاس ہے۔ دوسرا شخص وہ ہے جو اللہ کی راہ میں جہاد میں حصہ لیتا ہے، لوگ پسپا ہو جاتے ہیں وہ شخص بھی جانتا ہے، پسپا ہونے کی صورت میں اس پر کیا وبال ہو گا اور واپس آنے کی صورت میں اسے کیا اجر و ثواب ملے گا، تو وہ واپس (میدان جنگ میں) آ جاتا ہے یہاں تک کہ اس کا خون بہا دیا جاتا ہے، تو اللہ تعالیٰ اپنے فرشتوں سے فرماتا ہے: میرے اس بندے کی طرف دیکھو، یہ اس چیز کی امید رکھتے ہوئے واپس آیا ہے جو میرے پاس ہے اور اس چیز سے ڈرتے ہوئے آیا ہے جو میرے پاس ہے، یہاں تک کہ اس کے خون کو بہا دیا گیا۔“ [صحیح ابن حبان/كتاب الصلاة/حدیث: 2557]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”ہمارا پروردگار دو آدمیوں پر خوش ہوتا ہے؛ ایک وہ شخص جو اپنے بستر اور لحاف میں سے اپنی بیوی کے پاس سے اٹھ کر نماز کی طرف جاتا ہے، تو اللہ تعالیٰ اپنے فرشتوں سے فرماتا ہے: میرے اس بندے کی طرف دیکھو جو اپنے بستر سے اپنی بیوی کے پاس سے اٹھ کر نماز کی طرف آیا ہے اس چیز کی رغبت رکھتے ہوئے جو میرے پاس ہے اور اس چیز سے ڈرتے ہوئے جو میرے پاس ہے، اور دوسرا وہ شخص جو اللہ کی راہ میں جہاد میں حصہ لیتا ہے اس کے ساتھی پسپا ہو جاتے ہیں وہ شخص جانتا ہے پسپا ہونے پر اسے کیا وبال ہوگا اور واپس (جنگ میں) آنے پر کیا اجر و ثواب ملے گا، تو وہ واپس آتا ہے یہاں تک کہ اس کا خون بہا دیا جاتا ہے، تو اللہ تعالیٰ فرشتوں سے فرماتا ہے: میرے اس بندے کی طرف دیکھو یہ اس چیز کی امید رکھتے ہوئے واپس آیا ہے جو میرے پاس ہے اور اس چیز سے ڈرتے ہوئے آیا ہے جو میرے پاس ہے یہاں تک کہ اس کا خون بہا دیا گیا۔“ [صحیح ابن حبان/كتاب الصلاة/حدیث: 2558]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ میں نے عرض کی: یا رسول اللہ صلی اللہ علیہ وسلم ! میں نے آپ کو دیکھا تو میرا نفس پاکیزہ ہو گیا اور میری آنکھیں ٹھنڈی ہو گئیں، آپ مجھے ہر چیز کے بارے میں بتا دیجیے۔ نبی اکرم صلی اللہ علیہ وسلم نے فرمایا: ”ہر چیز کو پانی سے پیدا کیا گیا ہے۔“ میں نے عرض کی: آپ مجھے ایسی چیز کے بارے میں بتائیں کہ جب میں اس پر عمل کروں تو میں جنت میں داخل ہو جاؤں؟ نبی اکرم صلی اللہ علیہ وسلم نے فرمایا: ”تم کھانا کھلاؤ، سلام کو پھیلاؤ، صلہ رحمی کرو اور رات کے وقت نوافل ادا کرو جب لوگ سو رہے ہوں، تم سلامتی کے ساتھ جنت میں داخل ہو جاؤ گے۔“ (امام ابن حبان رحمہ اللہ فرماتے ہیں:) سیدنا ابوہریرہ رضی اللہ عنہ کا یہ کہنا کہ ”مجھے ہر چیز کے بارے میں بتا دیں“ اس سے ان کی مراد یہ ہے کہ ہر اس چیز کے بارے میں بتائیں جو پانی سے پیدا کی گئی ہے، اور اس بات کے صحیح ہونے کی دلیل نبی اکرم صلی اللہ علیہ وسلم کا ان کو دیا جانے والا جواب ہے کہ آپ صلی اللہ علیہ وسلم نے یہ فرمایا: ”ہر چیز کو پانی سے پیدا کیا گیا ہے۔“ تو یہ جواب اسی طرح صادر ہوا ہے جس طرح سوال تھا۔ اس سے یہ مراد نہیں ہے کہ ہر چیز کو پیدا ہی پانی سے کیا گیا ہے، خواہ وہ مخلوق نہ بھی ہو۔ [صحیح ابن حبان/كتاب الصلاة/حدیث: 2559]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ عرض کی گئی: یا رسول اللہ صلی اللہ علیہ وسلم ! فلاں شخص ساری رات نفل پڑھتا رہتا ہے، جب صبح ہوتی ہے تو وہ چوری کر لیتا ہے۔ نبی اکرم صلی اللہ علیہ وسلم نے ارشاد فرمایا: ”وہ جو پڑھتا ہے وہ چیز عنقریب اسے اس عمل سے روک دے گی۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کے یہ الفاظ ”وہ جو پڑھتا ہے وہ چیز اسے عنقریب روک دے گی“ یہ اس نوعیت کے الفاظ ہیں جس کے بارے میں ہم اپنی کتابوں میں یہ بات تحریر کر چکے ہیں کہ بعض اوقات عرب کسی فعل کی نسبت اس فعل کی طرف کر دیتے ہیں جس طرح وہ اس کی نسبت فاعل کی طرف کر دیتے۔ تو نبی اکرم صلی اللہ علیہ وسلم کی مراد یہ ہے کہ جب نماز اپنے آغاز اور اختتام کے حوالے سے حقیقت پر مبنی ہو، تو نمازی شخص اس نماز کے ہمراہ ممنوعہ چیزوں سے مجتنب رہتا ہے، اس کی مثال اللہ تعالیٰ کا یہ فرمان ہے: ﴿إِنَّ الصَّلَاةَ تَنْهَى عَنِ الْفَحْشَاءِ وَالْمُنْكَرِ﴾ [سورة العنكبوت: 45] ”بے شک نماز فحاشی اور گناہوں سے روکتی ہے۔“ [صحیح ابن حبان/كتاب الصلاة/حدیث: 2560]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”رات میں ایک گھڑی ایسی ہے اس میں جو بھی مسلمان بندہ اللہ تعالیٰ سے دنیا یا آخرت کی جس بھی بھلائی کا سوال کرتا ہے، اللہ تعالیٰ اسے وہ عطا کر دے گا۔“ [صحیح ابن حبان/كتاب الصلاة/حدیث: 2561]

اردو ترجمہ · UrduUnverified translation

سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم سے ایسے شخص کے بارے میں دریافت کیا گیا جو سوتا ہے یہاں تک کہ وہ صبح کر دیتا ہے، تو نبی اکرم صلی اللہ علیہ وسلم نے ارشاد فرمایا: ”شیطان نے اس کے کان میں پیشاب کر دیا“ (راوی کو شک ہے شاید یہ الفاظ ہیں: ”دونوں کانوں میں کیا ہے؟“)، سفیان نامی راوی بیان کرتے ہیں: ہمارے نزدیک اس سے مراد یہ ہوگا کہ وہ شخص فرض نماز کے وقت سویا رہ جاتا ہے۔ [صحیح ابن حبان/كتاب الصلاة/حدیث: 2562]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم سے دریافت کیا گیا: فرض نماز کے بعد کون سی نماز زیادہ فضیلت رکھتی ہے؟ نبی اکرم صلی اللہ علیہ وسلم نے فرمایا: ”نصف رات میں ادا کی جانے والی نماز۔“ اس نے دریافت کیا: رمضان کے مہینے کے بعد کون سا روزہ زیادہ فضیلت رکھتا ہے؟ نبی اکرم صلی اللہ علیہ وسلم نے فرمایا: ”اللہ تعالیٰ کے اس مہینے کا روزہ جسے لوگ محرم کہتے ہیں۔“ [صحیح ابن حبان/كتاب الصلاة/حدیث: 2563]

اردو ترجمہ · UrduUnverified translation

ابومسلم بیان کرتے ہیں کہ میں نے سیدنا ابوذر غفاری رضی اللہ عنہ سے سوال کیا کہ رات کے وقت کون سا قیام افضل ہے؟ تو سیدنا ابوذر غفاری رضی اللہ عنہ نے بتایا کہ میں نے نبی اکرم صلی اللہ علیہ وسلم سے یہی سوال کیا تھا جو تم نے مجھ سے کیا ہے، تو نبی اکرم صلی اللہ علیہ وسلم نے ارشاد فرمایا: ”نصف رات کے وقت کا، یا شاید رات کے درمیان کا۔“ یہ شک عوف نامی کو ہے۔ [صحیح ابن حبان/كتاب الصلاة/حدیث: 2564]

اردو ترجمہ · UrduUnverified translation

سیدنا جابر رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”تم میں سے جس شخص کو یہ اندیشہ ہو کہ وہ رات کے آخری حصے میں بیدار نہیں ہو سکے گا، تو وہ رات کے ابتدائی حصے میں وتر ادا کر لے اور تم میں سے جس شخص کو یہ امید ہو کہ وہ رات کے آخری حصے میں نوافل ادا کرے گا، تو اسے رات کے آخری حصے میں وتر ادا کرنا چاہیے کیونکہ رات کے آخری وقت میں کی جانے والی قرأت میں (فرشتوں کی) حاضری ہوتی ہے اور یہ زیادہ فضیلت رکھتی ہے۔“ [صحیح ابن حبان/كتاب الصلاة/حدیث: 2565]

اردو ترجمہ · UrduUnverified translation

ابن شہاب زہری بیان کرتے ہیں کہ امام زین العابدین رحمہ اللہ نے مجھے یہ بات بتائی کہ ان کے والد (سیدنا امام حسین رضی اللہ عنہ) نے انہیں یہ بتایا اور سیدنا علی بن ابی طالب رضی اللہ عنہ نے انہیں یہ بتایا کہ نبی اکرم صلی اللہ علیہ وسلم رات کے وقت ان کے ہاں تشریف لائے، آپ صلی اللہ علیہ وسلم نے دریافت کیا: ”کیا تم لوگوں نے نماز ادا نہیں کی؟“ میں نے عرض کی: یا رسول اللہ صلی اللہ علیہ وسلم ! ہماری جانیں اللہ تعالیٰ کے دستِ قدرت میں ہیں، وہ جب ہمیں بیدار کرنا چاہتا ہے بیدار کر دیتا ہے (تو آج اس نے بیدار نہیں کیا، تو ہم بھی نہیں اٹھے)؛ نبی اکرم صلی اللہ علیہ وسلم کو جب میں نے یہ گزارش کی تو آپ صلی اللہ علیہ وسلم واپس مڑ گئے اور آپ صلی اللہ علیہ وسلم نے مجھے کوئی ارشاد نہیں فرمایا، پھر میں نے آپ صلی اللہ علیہ وسلم کو سنا، آپ صلی اللہ علیہ وسلم اپنا ہاتھ مارتے ہوئے یہ آیت پڑھ رہے تھے: ﴿وَكَانَ الْإِنْسَانُ أَكْثَرَ شَيْءٍ جَدَلًا﴾ [سورة الكهف: 54] ”انسان سب سے زیادہ بحث کرتا ہے۔“ [صحیح ابن حبان/كتاب الصلاة/حدیث: 2566]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ اس شخص پر رحم کرے جو رات کے وقت اٹھ کر نماز ادا کرتا ہے، اپنی بیوی کو بھی بیدار کرتا ہے، اگر وہ بات نہیں مانتی تو وہ اس کے چہرے پر پانی چھڑک دیتا ہے اور اللہ تعالیٰ اس عورت پر بھی رحم کرے جو اس وقت نوافل ادا کرتی ہے اور اپنے شوہر کو بھی بیدار کرتی ہے، اور اگر وہ بیدار نہیں ہوتا تو وہ عورت اس کے چہرے پر پانی چھڑک دیتی ہے۔“ [صحیح ابن حبان/كتاب الصلاة/حدیث: 2567]

اردو ترجمہ · UrduUnverified translation

سیدنا ابوسعید خدری اور سیدنا ابوہریرہ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص رات کے وقت بیدار ہو اور اپنی بیوی کو بھی بیدار کرے اور وہ دونوں کھڑے ہو کر دو رکعات ادا کریں تو ان دونوں کا نام اللہ تعالیٰ کا کثرت سے ذکر کرنے والے مردوں اور کثرت سے ذکر کرنے والی خواتین میں لکھ دیا جاتا ہے۔“ [صحیح ابن حبان/كتاب الصلاة/حدیث: 2568]

اردو ترجمہ · UrduUnverified translation

سیدنا ابوسعید خدری اور سیدنا ابوہریرہ رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص رات کے وقت بیدار ہو اور اپنی بیوی کو بھی بیدار کرے اور وہ دونوں کھڑے ہو کر دو رکعات ادا کریں تو ان دونوں کا (نام) اللہ تعالیٰ کا کثرت سے ذکر کرنے والے مردوں اور خواتین میں نوٹ کر لیا جاتا ہے۔“ [صحیح ابن حبان/كتاب الصلاة/حدیث: 2569]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو دیکھا، آپ نے رات کے وقت اپنی حضرمی چادر کو «تَوْشِيح» کے طور پر لپیٹ کر نفل ادا کیے، آپ کے جسم پر اس کے علاوہ اور کوئی چیز نہیں تھی۔ [صحیح ابن حبان/كتاب الصلاة/حدیث: 2570]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم رات کے وقت چٹائی کا حجرہ بنا لیتے تھے اور اس میں نماز ادا کیا کرتے تھے، آپ صلی اللہ علیہ وسلم دن کے وقت اسے بچھا لیتے تھے اور اس پر تشریف فرما ہوتے تھے۔ راوی کہتے ہیں: لوگ نبی اکرم صلی اللہ علیہ وسلم کی طرف آئے اور آپ کی نماز کی اقتدا میں نماز ادا کرنے لگے یہاں تک کہ لوگوں کی تعداد زیادہ ہو گئی۔ راوی بیان کرتے ہیں: نبی اکرم صلی اللہ علیہ وسلم ان لوگوں کی طرف متوجہ ہوئے اور آپ نے ارشاد فرمایا: ”اے لوگو! اتنے عمل کو اختیار کرو جتنے کی تم طاقت رکھتے ہو، کیونکہ اللہ تعالیٰ تھکاوٹ کا شکار نہیں ہوتا یہاں تک کہ تم تھکاوٹ کا شکار ہو جاؤ، اور اللہ تعالیٰ کے نزدیک سب سے پسندیدہ عمل وہ ہے جو باقاعدگی سے کیا جائے، اگرچہ وہ تھوڑا ہو۔“ [صحیح ابن حبان/كتاب الصلاة/حدیث: 2571]

اردو ترجمہ · UrduUnverified translation

سیدنا عبداللہ بن عمرو رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص نوافل میں دس آیات کی تلاوت کرتا ہے اس کا شمار «الْغَافِلِيْنَ» ”غافلین“ میں نہیں ہوتا، جو شخص نوافل میں ایک سو آیات کی تلاوت کرتا ہے اس کا شمار «الْقَانِتِيْنَ» ”قانتین“ میں ہوتا ہے اور جو شخص ایک ہزار آیات کی تلاوت کرتا ہے اس کا شمار «الْمُقَنْطِرِيْنَ» ”مقنطرین“ میں ہوتا ہے۔“ (امام ابن حبان رحمہ اللہ فرماتے ہیں:) ابوسوید نامی راوی کا نام حمید بن سوید ہے اور یہ مصر سے تعلق رکھتے ہیں۔ اس شخص کو غلط فہمی ہوئی ہے جس نے ان کا نام ابوسویہ بیان کیا ہے۔ [صحیح ابن حبان/كتاب الصلاة/حدیث: 2572]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ایک قنطار بارہ ہزار اوقیہ کا ہوتا ہے، جن میں سے ہر ایک اوقیہ آسمان اور زمین میں موجود ہر چیز سے زیادہ بہتر ہے۔“ [صحیح ابن حبان/كتاب الصلاة/حدیث: 2573]

اردو ترجمہ · UrduUnverified translation

سیدنا جندب رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”جو شخص اللہ تعالیٰ کی رضا کے حصول کے لیے رات کے وقت سورۃ ﴿یسین﴾ [سورة يس: 1] کی تلاوت کرتا ہے، اس کی مغفرت ہو جاتی ہے۔“ [صحیح ابن حبان/كتاب الصلاة/حدیث: 2574]

اردو ترجمہ · UrduUnverified translation

سیدنا ابومسعود رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص رات کے وقت سورہ بقرہ کی آخری دو آیات کی تلاوت کر لیتا ہے، یہ دونوں اس کے لیے کافی ہوتی ہیں۔“ (امام ابن حبان رحمہ اللہ فرماتے ہیں:) عبدالرحمن بن یزید نے یہ روایت علقمہ کے حوالے سے سیدنا ابومسعود رضی اللہ عنہ کے حوالے سے سنی ہے، پھر ان کی ملاقات سیدنا ابومسعود رضی اللہ عنہ کے ساتھ طواف کے دوران ہوئی، انہوں نے ان سے اس بارے میں دریافت کیا تو سیدنا ابومسعود رضی اللہ عنہ نے انہیں یہ حدیث بیان کر دی۔ [صحیح ابن حبان/كتاب الصلاة/حدیث: 2575]