Hadith 2576–2609

اردو ترجمہ · UrduUnverified translation

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”کیا تم میں سے کوئی ایک شخص اس بات سے عاجز ہے کہ وہ ہر رات تہائی قرآن کی تلاوت کیا کرے؟“ ہم نے عرض کی: یا رسول اللہ صلی اللہ علیہ وسلم ! کون ایسا کر سکتا ہے؟ نبی اکرم صلی اللہ علیہ وسلم نے ارشاد فرمایا: ”سورہ اخلاص کی تلاوت کرنا (ایک تہائی قرآن پڑھنے کے برابر ہے)۔“ [صحیح ابن حبان/كتاب الصلاة/حدیث: 2576]

اردو ترجمہ · UrduUnverified translation

سیدنا ثوبان رضی اللہ عنہ بیان کرتے ہیں: ہم لوگ نبی صلی اللہ علیہ وسلم کے ہمراہ سفر کر رہے تھے۔ آپ صلی اللہ علیہ وسلم نے ارشاد فرمایا: ”یہ سفر مشقت اور بوجھ کا باعث ہوتا ہے، تو جب کوئی شخص وتر ادا کرے تو اسے دو رکعات ادا کر لینی چاہیے، اگر وہ (فجر کی نماز کے وقت) بیدار ہو گیا تو ٹھیک ہے، ورنہ یہ دونوں اس کے لیے کافی ہوں گی۔“ [صحیح ابن حبان/كتاب الصلاة/حدیث: 2577]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک مہم روانہ کی، وہ کچھ لوگ تھے، نبی اکرم صلی اللہ علیہ وسلم نے انہیں بلایا اور دریافت فرمایا: ”تمہیں کتنا قرآن آتا ہے؟“ نبی اکرم صلی اللہ علیہ وسلم ان سے قرأت کے بارے میں دریافت کرتے رہے، یہاں تک کہ آپ کا گزر ان میں سے ایک ایسے شخص پر ہوا جو ان میں سب سے کم سن تھا، نبی اکرم صلی اللہ علیہ وسلم نے دریافت فرمایا: ”اے فلاں! تمہیں کتنا قرآن آتا ہے؟“ اس نے عرض کی: مجھے فلاں، فلاں سورتیں اور سورہ بقرہ بھی آتی ہے، آپ صلی اللہ علیہ وسلم نے دریافت فرمایا: ”کیا تمہیں سورہ بقرہ آتی ہے؟“ اس نے عرض کی: جی ہاں! نبی اکرم صلی اللہ علیہ وسلم نے فرمایا: ”تم جاؤ، تم ہی ان لوگوں کے امیر ہو۔“ تو ایک صاحب جو ان میں بڑے معزز تھے، انہوں نے عرض کی: یا رسول اللہ صلی اللہ علیہ وسلم ! اس ذات کی قسم جس میں یہ، یہ خوبیاں پائی جاتی ہیں، میں نے قرآن کا علم صرف اس لیے حاصل نہیں کیا کیونکہ مجھے یہ اندیشہ تھا کہ میں نوافل میں اس کی تلاوت نہیں کر سکوں گا، نبی اکرم صلی اللہ علیہ وسلم نے ارشاد فرمایا: ”تم قرآن کا علم حاصل کرو اور اس کی تلاوت بھی کرو اور سو بھی جایا کرو، جو شخص قرآن کا علم حاصل کرتا ہے اور پھر (نوافل میں) ان کی تلاوت کرتا ہے اس کی مثال ایک ایسے مشکیزے کی مانند ہے جس میں مشک موجود ہو اور اس کا منہ کھلا ہوا ہو اور اس کی خوشبو ہر طرف پھیل رہی ہو، اور جو شخص قرآن کا علم حاصل کر لے اور سو جائے اور وہ قرآن اس کے ذہن میں ہو، تو اس کی مثال ایسے مشکیزے کی طرح ہے جس میں مشک موجود ہو لیکن اس کا منہ بند کر دیا گیا ہو۔“ [صحیح ابن حبان/كتاب الصلاة/حدیث: 2578]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم سو گئے یہاں تک کہ جب نصف رات ہو گئی، یا نصف رات سے کچھ پہلے یا بعد کا وقت تھا تو نبی اکرم صلی اللہ علیہ وسلم بیدار ہوئے۔ آپ صلی اللہ علیہ وسلم نے اپنے دونوں ہاتھ چہرے پر پھیر کر نیند کے اثرات کو دور کیا، پھر آپ صلی اللہ علیہ وسلم نے سورہ آل عمران کی آخری دس آیات کی تلاوت کی، اس کے بعد آپ صلی اللہ علیہ وسلم لٹکے ہوئے مشکیزے کی طرف بڑھے اور آپ صلی اللہ علیہ وسلم نے اس سے وضو کیا۔ [صحیح ابن حبان/كتاب الصلاة/حدیث: 2579]

اردو ترجمہ · UrduUnverified translation

سیدہ حفصہ رضی اللہ عنہا بیان کرتی ہیں کہ (بعض اوقات) نبی اکرم صلی اللہ علیہ وسلم بیٹھ کر نوافل ادا کرنا شروع کرتے تھے، آپ صلی اللہ علیہ وسلم جس سورت کی تلاوت فرماتے تھے اسے ٹھہر ٹھہر کر پڑھتے تھے، یہاں تک کہ وہ اپنے سے طویل سورت سے بھی زیادہ طویل محسوس ہوتی تھی۔ [صحیح ابن حبان/كتاب الصلاة/حدیث: 2580]

اردو ترجمہ · UrduUnverified translation

کریب بیان کرتے ہیں: میں نے سیدنا عبداللہ بن عباس رضی اللہ عنہما سے سوال کیا، میں نے کہا: نبی اکرم صلی اللہ علیہ وسلم رات کے وقت کیسے نماز ادا کرتے تھے؟ انہوں نے بتایا: نبی اکرم صلی اللہ علیہ وسلم اپنے حجرے میں تلاوت کر رہے ہوتے تھے اور حجرے کے باہر موجود شخص اسے سن سکتا تھا۔ [صحیح ابن حبان/كتاب الصلاة/حدیث: 2581]

اردو ترجمہ · UrduUnverified translation

غضیف بن حارث رضی اللہ عنہ بیان کرتے ہیں کہ میں نے سیدہ عائشہ رضی اللہ عنہا کی خدمت میں عرض کی: نبی اکرم صلی اللہ علیہ وسلم کے بارے میں آپ کیا فرماتی ہیں؟ آپ صلی اللہ علیہ وسلم نماز پڑھتے وقت بلند آواز میں قرأت کرتے تھے یا پست آواز میں کرتے تھے؟ سیدہ عائشہ رضی اللہ عنہا نے فرمایا: بعض اوقات آپ صلی اللہ علیہ وسلم بلند آواز میں قرأت کرتے تھے اور بعض اوقات پست آواز میں کرتے تھے، تو میں نے کہا: «الْحَمْدُ لِلّٰهِ الَّذِي جَعَلَ فِي الْأَمْرِ سَعَةً» ”ہر طرح کی حمد اللہ تعالیٰ کے لیے مخصوص ہے، جس نے اس معاملے میں گنجائش رکھی ہے۔“ [صحیح ابن حبان/كتاب الصلاة/حدیث: 2582]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”جب کسی شخص کو نماز کے وقت نیند آ جائے تو اسے سو جانا چاہیے، یہاں تک کہ اس کی نیند ختم ہو جائے، کیونکہ ایسا ہو سکتا ہے کہ کوئی شخص نماز کے لیے کھڑا ہو اور وہ اونگھ رہا ہو اور اپنی طرف سے دعائے مغفرت کر رہا ہو لیکن درحقیقت خود کو برا بھلا کہہ رہا ہو۔“ [صحیح ابن حبان/كتاب الصلاة/حدیث: 2583]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کسی شخص کو نماز کے دوران اونگھ آنے لگے، تو اسے نماز ختم کر دینی چاہیے کیونکہ ایسا ہو سکتا ہے وہ اپنی طرف سے نماز کے دوران دعا مانگ رہا ہو حالانکہ درحقیقت اپنے لیے دعائے ضرر کر رہا ہو اور اسے اس بات کا علم بھی نہ ہو۔“ [صحیح ابن حبان/كتاب الصلاة/حدیث: 2584]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب کوئی شخص رات کے وقت نوافل ادا کر رہا ہو اور قرآن کی تلاوت اس کی زبان پر دشوار ہو جائے اور اسے یہ اندازہ نہ ہو پائے کہ وہ کیا کہہ رہا ہے، تو اسے سو جانا چاہیے۔“ [صحیح ابن حبان/كتاب الصلاة/حدیث: 2585]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ ایک مرتبہ حولاء بنت تویت ان کے پاس سے گزری، نبی اکرم صلی اللہ علیہ وسلم بھی ان کے پاس موجود تھے، سیدہ عائشہ رضی اللہ عنہا بیان کرتی ہیں: میں نے کہا: یہ حولاء بنت تویت ہے، لوگ یہ کہتے ہیں کہ یہ رات کے وقت سوتی نہیں ہے، سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم نے فرمایا: ”یہ رات کے وقت سوتی نہیں ہے؟ تم لوگ اتنا عمل کرو جس کی تم طاقت رکھتے ہو، اللہ کی قسم! اللہ تعالیٰ کا فضل اس وقت تک منقطع نہیں ہوتا، جب تک تم اکتاہٹ کا شکار نہیں ہو جاتے۔“ [صحیح ابن حبان/كتاب الصلاة/حدیث: 2586]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم مسجد میں دو ستونوں کے درمیان بندھی ہوئی رسی کے پاس سے گزرے تو آپ صلی اللہ علیہ وسلم نے دریافت فرمایا: ”یہ رسی کیوں ہے؟“ لوگوں نے عرض کی: فلاں خاتون نماز ادا کرتی ہے، اسے یہ اندیشہ ہوتا ہے، اسے نیند آ رہی ہے، تو اسے پکڑ لیتی ہے، تو نبی اکرم صلی اللہ علیہ وسلم نے ارشاد فرمایا: ”اسے اس وقت تک نماز ادا کرنی چاہیے جب تک وہ جاگ رہی ہو اور جب نیند آنے لگے، تو اسے سو جانا چاہیے۔“ [صحیح ابن حبان/كتاب الصلاة/حدیث: 2587]

اردو ترجمہ · UrduUnverified translation

سوید بن غفلہ بیان کرتے ہیں کہ وہ زر بن حبیش کی بیماری کے دوران ان کی عیادت کے لیے گئے تو انہوں نے بتایا کہ سیدنا ابوذر غفاری رضی اللہ عنہ نے (راوی کو شک ہے) یا شاید سیدنا ابودرداء رضی اللہ عنہ نے، یہ شک شعبہ نامی راوی کو ہے، انہوں نے یہ بات بیان کی ہے کہ نبی اکرم صلی اللہ علیہ وسلم نے یہ ارشاد فرمایا ہے: ”جو بھی بندہ ذہن میں یہ طے کرتا ہے کہ وہ رات کے کسی حصے میں نوافل ادا کرے گا اور وہ اس وقت میں سویا رہ جاتا ہے، تو وہ نیند صدقہ ہوتی ہے جو اللہ تعالیٰ نے اس پر کیا ہوتا ہے اور اس شخص کو اس کی نیت کے مطابق اجر مل جاتا ہے۔“ [صحیح ابن حبان/كتاب الصلاة/حدیث: 2588]

اردو ترجمہ · UrduUnverified translation

اسود بیان کرتے ہیں کہ ہم نے سیدہ عائشہ رضی اللہ عنہا سے نبی اکرم صلی اللہ علیہ وسلم کی رات کی نماز کے بارے میں دریافت کیا تو انہوں نے بتایا: ”آپ صلی اللہ علیہ وسلم رات کے ابتدائی حصے میں سو جاتے تھے اور آخری حصے میں نوافل ادا کیا کرتے تھے۔“ [صحیح ابن حبان/كتاب الصلاة/حدیث: 2589]

اردو ترجمہ · UrduUnverified translation

سیدنا عبداللہ بن عمرو بن عاص رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ کے نزدیک پسندیدہ ترین نماز سیدنا داؤد علیہ السلام کی نماز ہے، وہ نصف رات سوئے رہتے تھے اور ایک تہائی رات میں نوافل ادا کرتے تھے اور پھر رات کے چھٹے حصے میں سو جاتے تھے، اور اللہ تعالیٰ کے نزدیک پسندیدہ ترین روزہ رکھنے کا طریقہ سیدنا داؤد علیہ السلام کا روزہ رکھنے کا طریقہ ہے، وہ ایک دن روزہ رکھتے تھے اور ایک دن روزہ نہیں رکھتے تھے۔“ [صحیح ابن حبان/كتاب الصلاة/حدیث: 2590]

اردو ترجمہ · UrduUnverified translation

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم جب رات کے وقت بیدار ہوتے تھے، تو آپ مسواک کیا کرتے تھے۔ [صحیح ابن حبان/كتاب الصلاة/حدیث: 2591]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ ایک مرتبہ انہوں نے نبی اکرم صلی اللہ علیہ وسلم کی زوجہ محترمہ سیدہ میمونہ رضی اللہ عنہا کے ہاں رات بسر کی جو سیدنا عبداللہ بن عباس رضی اللہ عنہما کی خالہ تھیں، وہ بیان کرتے ہیں کہ میں بستر پر چوڑائی کی سمت لیٹ گیا، نبی اکرم صلی اللہ علیہ وسلم اور آپ کی اہلیہ لمبائی کی سمت میں لیٹ گئے۔ نبی اکرم صلی اللہ علیہ وسلم سو گئے یہاں تک کہ جب نصف رات ہوئی یا شاید اس سے کچھ پہلے یا بعد کی بات ہے، تو نبی اکرم صلی اللہ علیہ وسلم بیدار ہوئے، آپ نے اپنے دونوں ہاتھ چہرے پر پھیر کر نیند کے اثرات کو دور کیا، پھر آپ نے سورہ آل عمران کی آخری دس آیات کی تلاوت کی، پھر آپ لٹکے ہوئے مشکیزے کی طرف بڑھے، آپ نے اس سے وضو کیا اور اچھی طرح وضو کیا، پھر آپ کھڑے ہو کر نماز ادا کرنے لگے۔ سیدنا عبداللہ بن عباس رضی اللہ عنہما بیان کرتے ہیں کہ میں اٹھا، میں نے بھی اسی طرح کیا جس طرح نبی اکرم صلی اللہ علیہ وسلم نے کیا تھا، پھر میں آیا اور آ کر آپ کے پہلو میں کھڑا ہو گیا تو نبی اکرم صلی اللہ علیہ وسلم نے اپنا دست مبارک میرے سر پر رکھا اور میرے دائیں کان کو پکڑ کر اسے ملنے لگے، آپ نے دو رکعات نماز ادا کیں، پھر آپ نے دو رکعات ادا کیں، پھر دو رکعات ادا کیں، پھر دو رکعات ادا کیں، پھر دو رکعات ادا کیں، پھر آپ نے وتر ادا کیے۔ پھر آپ لیٹ گئے (پھر سو گئے) یہاں تک کہ مؤذن آپ کی خدمت میں حاضر ہوا، آپ اٹھے، آپ نے دو مختصر رکعات ادا کیں، پھر آپ صبح کی نماز پڑھانے کے لیے تشریف لے گئے۔ [صحیح ابن حبان/كتاب الصلاة/حدیث: 2592]

اردو ترجمہ · UrduUnverified translation

اسود بیان کرتے ہیں: میں نے سیدہ عائشہ رضی اللہ عنہا سے نبی اکرم صلی اللہ علیہ وسلم کی رات کی نماز کے بارے میں دریافت کیا، انہوں نے بتایا: نبی اکرم صلی اللہ علیہ وسلم رات کے ابتدائی حصے میں سو جاتے تھے، پھر آپ صلی اللہ علیہ وسلم بیدار ہو کر نماز ادا کرتے تھے، جب سحری کا وقت قریب آ جاتا تھا تو آپ صلی اللہ علیہ وسلم وتر ادا کر لیتے تھے، اگر آپ صلی اللہ علیہ وسلم کو اپنی اہلیہ سے کوئی حاجت ہوتی تھی تو اسے پورا کرتے تھے ورنہ سو جاتے تھے، پھر آپ صلی اللہ علیہ وسلم اذان کی آواز سنتے تھے تو اٹھ جاتے تھے، اگر آپ صلی اللہ علیہ وسلم جنابت کی حالت میں ہوتے تھے تو آپ صلی اللہ علیہ وسلم غسل کر لیتے تھے ورنہ وضو کر کے نماز کے لیے تشریف لے جاتے تھے (یہاں راوی نے کچھ الفاظ کی وضاحت کی ہے)۔ [صحیح ابن حبان/كتاب الصلاة/حدیث: 2593]

اردو ترجمہ · UrduUnverified translation

سیدنا ربیع بن کعب اسلمی رضی اللہ عنہ بیان کرتے ہیں: میں ایک مرتبہ رات کے وقت نبی اکرم صلی اللہ علیہ وسلم کے ساتھ تھا، میں آپ صلی اللہ علیہ وسلم کے وضو اور قضائے حاجت کے لیے پانی لے کر آپ صلی اللہ علیہ وسلم کی خدمت میں حاضر ہوا، آپ صلی اللہ علیہ وسلم رات کے وقت نوافل ادا کرتے ہوئے یہ پڑھتے رہے: «سُبْحَانَ رَبِّي وَبِحَمْدِهِ، سُبْحَانَ رَبِّي وَبِحَمْدِهِ» ”پاک ہے میرا پروردگار اور حمد اس کے لیے مخصوص ہے، پاک ہے میرا پروردگار، حمد اسی کے لیے مخصوص ہے۔“ آپ صلی اللہ علیہ وسلم خاصی دیر یہ پڑھتے رہے، پھر آپ صلی اللہ علیہ وسلم یہ پڑھتے رہے: «سُبْحَانَ رَبِّ الْعَالَمِينَ، سُبْحَانَ رَبِّ الْعَالَمِينَ» ”پاک ہے تمام جہانوں کا پروردگار اور پاک ہے تمام جہانوں کا پروردگار۔“ آپ صلی اللہ علیہ وسلم خاصی دیر یہ پڑھتے رہے۔ [صحیح ابن حبان/كتاب الصلاة/حدیث: 2594]

اردو ترجمہ · UrduUnverified translation

سیدنا ربیع بن کعب اسلمی رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کے حجرے کے پاس رات بسر کی جب آپ صلی اللہ علیہ وسلم رات کے وقت نوافل ادا کر رہے تھے، تو میں آپ صلی اللہ علیہ وسلم کو سنتا رہا آپ صلی اللہ علیہ وسلم یہ پڑھ رہے تھے: «سُبْحَانَ رَبِّ الْعَالَمِينَ» ”تمام جہانوں کا پروردگار پاک ہے“، آپ صلی اللہ علیہ وسلم خاصی دیر یہ پڑھتے رہے: «سُبْحَانَ اللّٰهِ وَبِحَمْدِهِ» ”اللہ تعالیٰ کی ذات ہر عیب سے پاک ہے، حمد اسی کے لیے مخصوص ہے“۔ [صحیح ابن حبان/كتاب الصلاة/حدیث: 2595]

اردو ترجمہ · UrduUnverified translation

سیدنا عبادہ بن صامت رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جو شخص رات کے وقت بیدار ہو اور بیدار ہونے کے بعد یہ پڑھے: «لَا إِلٰهَ إِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ، وَهُوَ عَلَى كُلِّ شَيْءٍ قَدِيرٌ، سُبْحَانَ اللّٰهِ، وَالْحَمْدُ لِلّٰهِ، وَلَا إِلٰهَ إِلَّا اللّٰهُ، وَاللّٰهُ أَكْبَرُ، وَلَا حَوْلَ وَلَا قُوَّةَ إِلَّا بِاللّٰهِ» ”اللہ تعالیٰ کے علاوہ اور کوئی معبود نہیں ہے، وہی ایک معبود ہے، اس کا کوئی شریک نہیں ہے، بادشاہی اسی کے لیے مخصوص ہے، حمد اسی کے لیے مخصوص ہے اور وہ ہر شے پر قدرت رکھتا ہے، اللہ تعالیٰ کی ذات ہر عیب سے پاک ہے، ہر طرح کی حمد اللہ تعالیٰ کے لیے مخصوص ہے، اللہ تعالیٰ کے علاوہ اور کوئی معبود نہیں ہے، اللہ تعالیٰ سب سے بڑا ہے، اللہ تعالیٰ کی مدد کے بغیر کچھ نہیں ہو سکتا، اے اللہ! تو میری مغفرت کر دے۔“ (نبی اکرم صلی اللہ علیہ وسلم فرماتے رہے) اس شخص کی مغفرت ہو جاتی ہے، اگر وہ اٹھ کر وضو کرے اور نماز ادا کرے تو اس کی نماز قبول ہوتی ہے۔“ ولید نامی راوی نے یہ بات بیان کی ہے، روایت میں یہ الفاظ ہیں: ”اس شخص کی مغفرت ہو جاتی ہے۔“ راوی کو شک ہے شاید یہ الفاظ ہیں: ”اس شخص کی دعا قبول ہوتی ہے۔“ [صحیح ابن حبان/كتاب الصلاة/حدیث: 2596]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم رات کے وقت جب تہجد کی نماز ادا کرنے کے لیے کھڑے ہوتے تھے، تو یہ پڑھتے تھے: «اللَّهُمَّ لَكَ الْحَمْدُ أَنْتَ نُورُ السَّمَاوَاتِ وَالْأَرْضِ وَمَنْ فِيهِنَّ، وَلَكَ الْحَمْدُ أَنْتَ قَيِّمُ السَّمَاوَاتِ وَالْأَرْضِ وَمَنْ فِيهِنَّ، وَلَكَ الْحَمْدُ أَنْتَ مَلِكُ السَّمَاوَاتِ وَالْأَرْضِ وَمَنْ فِيهِنَّ، وَلَكَ الْحَمْدُ أَنْتَ الْحَقُّ، وَوَعْدُكَ الْحَقُّ، وَلِقَاؤُكَ حَقٌّ، وَالْجَنَّةُ حَقٌّ، وَالنَّارُ حَقٌّ، وَالسَّاعَةُ حَقٌّ، وَالنَّبِيُّونَ حَقٌّ، وَمُحَمَّدٌ صلی اللہ علیہ وسلم حَقٌّ، اللَّهُمَّ لَكَ أَسْلَمْتُ، وَبِكَ آمَنْتُ، وَعَلَيْكَ تَوَكَّلْتُ، وَإِلَيْكَ أَنَبْتُ، وَبِكَ خَاصَمْتُ، وَإِلَيْكَ حَاكَمْتُ، فَاغْفِرْ لِي مَا قَدَّمْتُ وَمَا أَخَّرْتُ، وَمَا أَسْرَرْتُ وَمَا أَعْلَنْتُ، أَنْتَ الْمُقَدِّمُ، وَأَنْتَ الْمُؤَخِّرُ، لَا إِلَهَ إِلَّا أَنْتَ» ”اے اللہ! حمد تیرے ہی لیے مخصوص ہے، تو آسمانوں اور زمین میں موجود ہر چیز کا نور ہے، حمد تیرے لیے مخصوص ہے، تو آسمانوں اور زمین میں موجود ہر چیز کو قائم رکھنے والا ہے۔ حمد تیرے لیے مخصوص ہے، تو آسمانوں اور زمین میں موجود ہر چیز کا بادشاہ ہے، حمد تیرے لیے مخصوص ہے، تو حق ہے، تیری بارگاہ میں حاضری حق ہے، تیرا وعدہ حق ہے، جنت حق ہے، جہنم حق ہے، قیامت حق ہے، انبیاء حق ہیں، سیدنا محمد صلی اللہ علیہ وسلم حق ہیں، اے اللہ! میں تجھ پر ہی ایمان لایا اور تیرے ہی لیے اسلام قبول کیا، تجھ پر ہی توکل کیا، تیری طرف رجوع کیا، تیری مدد سے میں جھگڑا کرتا ہوں، تجھے ہی ثالث مقرر کرتا ہوں، میں نے جو پہلے کیا، جو بعد میں کروں گا، جو پوشیدہ طور پر کیا، جو علانیہ طور پر کیا ان سب کی مغفرت کر دے، تو ہی آگے کرنے والا ہے، تو ہی پیچھے کرنے والا ہے، صرف تو ہی معبود ہے، تیرے علاوہ اور کوئی معبود نہیں ہے۔“ سفیان نامی راوی بیان کرتے ہیں: اس میں عبدالکریم نامی راوی نے یہ الفاظ زائد نقل کیے ہیں: «لَا إِلَهَ إِلَّا أَنْتَ، وَلَا حَوْلَ وَلَا قُوَّةَ إِلَّا بِاللَّهِ» ”تیرے علاوہ اور کوئی معبود نہیں ہے، اللہ تعالیٰ کی مدد کے بغیر کچھ نہیں ہو سکتا۔“ سفیان نامی راوی کہتے ہیں: میں نے یہ الفاظ عبدالکریم ابوامیہ کے سامنے بیان کیے، تو وہ بولے: تم یہ پڑھو: «أَنْتَ إِلَهِي، لَا إِلَهَ إِلَّا أَنْتَ» ”تو میرا معبود ہے، صرف تو ہی معبود ہے، تیرے علاوہ اور کوئی معبود نہیں ہے۔“ [صحیح ابن حبان/كتاب الصلاة/حدیث: 2597]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم جب نصف رات کے وقت نماز پڑھنے کے لیے کھڑے ہوتے تھے، تو یہ پڑھتے تھے: «اللَّهُمَّ لَكَ الْحَمْدُ أَنْتَ نُورُ السَّمَاوَاتِ وَالْأَرْضِ، وَلَكَ الْحَمْدُ أَنْتَ قَيَّامُ السَّمَاوَاتِ وَالْأَرْضِ، وَلَكَ الْحَمْدُ أَنْتَ رَبُّ السَّمَاوَاتِ وَالْأَرْضِ وَمَنْ فِيهِنَّ، أَنْتَ الْحَقُّ، وَوَعْدُكَ الْحَقُّ، وَلِقَاؤُكَ حَقٌّ، وَالْجَنَّةُ حَقٌّ، وَالنَّارُ حَقٌّ، وَالسَّاعَةُ حَقٌّ، اللَّهُمَّ لَكَ أَسْلَمْتُ، وَبِكَ آمَنْتُ، وَعَلَيْكَ تَوَكَّلْتُ، وَإِلَيْكَ أَنَبْتُ، وَبِكَ خَاصَمْتُ، وَإِلَيْكَ حَاكَمْتُ، فَاغْفِرْ لِي مَا قَدَّمْتُ وَمَا أَخَّرْتُ، وَمَا أَسْرَرْتُ وَمَا أَعْلَنْتُ، أَنْتَ إِلَهِي لَا إِلَهَ إِلَّا أَنْتَ» ”اے اللہ! حمد تیرے لیے مخصوص ہے، تو آسمانوں اور زمین کا نور ہے۔ حمد تیرے لیے مخصوص ہے، تو آسمانوں اور زمین کو قائم رکھنے والا ہے۔ حمد تیرے لیے مخصوص ہے، تو آسمانوں اور زمین میں موجود ہر چیز کا پروردگار ہے۔ تو حق ہے، تیرا وعدہ حق ہے، تیری بارگاہ میں حاضری حق ہے، جنت حق ہے، جہنم حق ہے، قیامت حق ہے۔ اے اللہ! میں نے تیرے لیے اسلام قبول کیا ہے، تجھ پر ایمان لایا، تجھ پر ہی توکل کیا، تیری ہی طرف رجوع کیا، تیری مدد سے میں جھگڑا کرتا ہوں اور تجھے ہی ثالث مقرر کرتا ہوں، میں نے جو پہلے کیا، اور جو بعد میں کروں گا، جو پوشیدہ طور پر کیا، اور جو اعلانیہ طور پر کیا، تو ان سب کی مغفرت کر دے، تو میرا معبود ہے، تیرے علاوہ اور کوئی معبود نہیں ہے۔“ [صحیح ابن حبان/كتاب الصلاة/حدیث: 2598]

اردو ترجمہ · UrduUnverified translation

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کے بارے میں یہ بات نقل کرتے ہیں کہ جب آپ صلی اللہ علیہ وسلم رات کے وقت بیدار ہوتے تھے، تو تکبیر کہتے پھر یہ پڑھتے تھے: «اللَّهُمَّ لَكَ الْحَمْدُ، أَنْتَ قَيِّمُ السَّمَاوَاتِ وَالْأَرْضِ، وَلَكَ الْحَمْدُ، أَنْتَ رَبُّ السَّمَاوَاتِ وَالْأَرْضِ وَمَنْ فِيهِنَّ، أَنْتَ الْحَقُّ، وَقَوْلُكَ الْحَقُّ، وَوَعْدُكَ الْحَقُّ، وَلِقَاؤُكَ الْحَقُّ، وَالْجَنَّةُ حَقٌّ، وَالنَّارُ حَقٌّ، وَالسَّاعَةُ حَقٌّ، اللَّهُمَّ لَكَ أَسْلَمْتُ، وَبِكَ آمَنْتُ، وَعَلَيْكَ تَوَكَّلْتُ، وَإِلَيْكَ أَنَبْتُ، وَبِكَ خَاصَمْتُ، وَإِلَيْكَ حَاكَمْتُ، فَاغْفِرْ لِي مَا قَدَّمْتُ وَمَا أَخَّرْتُ، وَمَا أَسْرَرْتُ وَمَا أَعْلَنْتُ، أَنْتَ إِلَهِي، لَا إِلَهَ إِلَّا أَنْتَ» ”اے اللہ! حمد تیرے لیے مخصوص ہے، تو آسمانوں اور زمین کو قائم رکھنے والا ہے۔ حمد تیرے لیے مخصوص ہے، تو آسمانوں اور زمین میں موجود ہر چیز کا پروردگار ہے، تو حق ہے، تیرا فرمان حق ہے، تیرا وعدہ حق ہے، تیری بارگاہ میں حاضری حق ہے، جنت حق ہے، جہنم حق ہے اور قیامت حق ہے۔ اے اللہ! میں نے تیرے ہی لیے اسلام قبول کیا، میں تجھ پر ہی ایمان لایا، میں نے تجھ پر ہی توکل کیا، تیری ہی طرف رجوع کیا، میں نے تیرے ہی ذریعے مقابلہ کیا اور تجھے ہی ثالث (فیصلہ کرنے والا) مانا ہے۔ اے اللہ! میں نے جو پہلے کیا اور جو بعد میں کروں گا، جو پوشیدہ طور پر کیا اور جو علانیہ طور پر کیا، ان سب کے حوالے سے میری مغفرت کر دے، تو ہی میرا معبود ہے، تیرے علاوہ اور کوئی معبود نہیں ہے۔“ [صحیح ابن حبان/كتاب الصلاة/حدیث: 2599]

اردو ترجمہ · UrduUnverified translation

سیدنا جبیر بن مطعم رضی اللہ عنہ کے صاحبزادے اپنے والد کا یہ بیان نقل کرتے ہیں کہ میں نے نبی اکرم صلی اللہ علیہ وسلم کو دیکھا، جب آپ صلی اللہ علیہ وسلم نے نماز شروع کی تو یہ پڑھا: ” «اللَّهُ أَكْبَرُ كَبِيرًا» ”اللہ تعالیٰ سب سے بڑا ہے، وہ بڑا ہے“، «اللَّهُ أَكْبَرُ كَبِيرًا» ”اللہ تعالیٰ سب سے بڑا ہے، وہ بڑا ہے“، «اللَّهُ أَكْبَرُ كَبِيرًا» ”اللہ تعالیٰ سب سے بڑا ہے، وہ بڑا ہے“، «وَالْحَمْدُ لِلَّهِ كَثِيرًا» ”ہر طرح کی حمد اللہ تعالیٰ کے لیے مخصوص ہے، جو زیادہ ہو“، «وَسُبْحَانَ اللَّهِ بُكْرَةً وَأَصِيلًا» ”میں ہر صبح و شام اللہ تعالیٰ کے ہر عیب سے پاک ہونے کو بیان کرتا ہوں“، «وَسُبْحَانَ اللَّهِ بُكْرَةً وَأَصِيلًا» ”میں ہر صبح و شام اللہ تعالیٰ کے ہر عیب سے پاک ہونے کو بیان کرتا ہوں“، «اللَّهُمَّ إِنِّي أَعُوذُ بِكَ مِنَ الشَّيْطَانِ مِنْ هَمْزِهِ وَنَفْخِهِ وَنَفْثِهِ» ”اے اللہ! میں شیطان سے اس کے ”ہمز“ اور اس کے ”نفث“ سے اور اس کے ”نفخ“ سے پناہ مانگتا ہوں۔““ عمرو نامی راوی کہتے ہیں: ہمز سے مراد مرگی، اس کے ”نفخ“ سے مراد تکبر اور اس کے ”نفث“ سے مراد شعر کہنا ہے۔ [صحیح ابن حبان/كتاب الصلاة/حدیث: 2601]

اردو ترجمہ · UrduUnverified translation

عاصم بن حمید رحمہ اللہ بیان کرتے ہیں کہ انہوں نے نبی اکرم صلی اللہ علیہ وسلم کی زوجہ محترمہ سیدہ عائشہ رضی اللہ عنہا سے سوال کیا، وہ کہتے ہیں: میں نے دریافت کیا کہ نبی اکرم صلی اللہ علیہ وسلم جب رات کے نوافل پڑھنے کے لیے کھڑے ہوتے تھے، تو آپ صلی اللہ علیہ وسلم کس چیز سے آغاز کرتے تھے؟ سیدہ عائشہ رضی اللہ عنہا نے فرمایا: ”تم نے مجھ سے ایک ایسی چیز کے بارے میں دریافت کیا ہے کہ تم سے پہلے کسی نے بھی مجھ سے اس بارے میں دریافت نہیں کیا۔ نبی اکرم صلی اللہ علیہ وسلم جب رات کے وقت نوافل ادا کرنے کے لیے کھڑے ہوتے تو آپ صلی اللہ علیہ وسلم پہلے دس مرتبہ «اللّٰهُ أَكْبَرُ» ”اللہ سب سے بڑا ہے“ کہتے تھے، پھر دس مرتبہ «سُبْحَانَ اللّٰهِ» ”اللہ پاک ہے“ کہتے تھے، دس مرتبہ «الْحَمْدُ لِلّٰهِ» ”تمام تعریفیں اللہ ہی کے لیے ہیں“ کہتے تھے، پھر دس مرتبہ «لَا إِلٰهَ إِلَّا اللّٰهُ» ”اللہ کے سوا کوئی معبودِ برحق نہیں“ پڑھتے تھے۔ پھر دس مرتبہ استغفار پڑھتے تھے اور یہ کہتے تھے: «اللّٰهُمَّ اغْفِرْ لِي وَاهْدِنِي وَارْزُقْنِي وَعَافِنِي» ”اے اللہ! میری مغفرت فرما، مجھے ہدایت دے، مجھے رزق عطا کر اور مجھے عافیت دے۔“ یہ بھی آپ صلی اللہ علیہ وسلم دس مرتبہ پڑھتے تھے، پھر آپ صلی اللہ علیہ وسلم دس مرتبہ «اللّٰهُمَّ إِنِّي أَعُوذُ بِكَ مِنْ ضِيقِ الْمَقَامِ يَوْمَ الْقِيَامَةِ» ”اے اللہ! میں قیامت کے دن کی تنگی سے تیری پناہ مانگتا ہوں“ کہہ کر اللہ کی پناہ مانگتے تھے۔“ [صحیح ابن حبان/كتاب الصلاة/حدیث: 2602]

اردو ترجمہ · UrduUnverified translation

سیدنا ابوہریرہ رضی اللہ عنہ کے بارے میں منقول ہے کہ جب وہ رات کے وقت نوافل ادا کرتے تھے تو وہ اپنی آواز کو کچھ بلند کیا کرتے تھے اور وہ یہ بات ذکر کرتے تھے کہ ”نبی اکرم صلی اللہ علیہ وسلم بھی اسی طرح کیا کرتے تھے۔“ [صحیح ابن حبان/كتاب الصلاة/حدیث: 2603]

اردو ترجمہ · UrduUnverified translation

سیدنا حذیفہ رضی اللہ عنہ بیان کرتے ہیں کہ ایک رات میں نے نبی اکرم صلی اللہ علیہ وسلم کی اقتدا میں نماز ادا کی، آپ صلی اللہ علیہ وسلم جب بھی کسی ایسی آیت کی تلاوت کرتے جس میں رحمت کا مضمون ہوتا تو وہاں ٹھہر کر اس رحمت کا سوال کرتے تھے اور جب بھی کسی ایسی آیت کی تلاوت کرتے جس میں عذاب کا ذکر ہوتا تو آپ صلی اللہ علیہ وسلم وہاں ٹھہر کر اس سے پناہ مانگتے تھے۔ [صحیح ابن حبان/كتاب الصلاة/حدیث: 2604]

اردو ترجمہ · UrduUnverified translation

سیدنا حذیفہ رضی اللہ عنہ بیان کرتے ہیں: میں نے ایک رات نبی اکرم صلی اللہ علیہ وسلم کی اقتدا میں نماز ادا کی تو آپ جب بھی رحمت کے مضمون والی آیت پر پہنچتے تو وہاں آپ ٹھہر کر اس رحمت کا سوال کرتے تھے اور جب بھی عذاب کے مضمون والی آیت پڑھتے تو وہاں ٹھہر کر اس عذاب سے پناہ مانگا کرتے تھے۔ [صحیح ابن حبان/كتاب الصلاة/حدیث: 2605]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”جب کوئی رات کے وقت بیدار ہو، تو اسے آغاز میں دو مختصر رکعات ادا کرنی چاہییں۔“ [صحیح ابن حبان/كتاب الصلاة/حدیث: 2606]

اردو ترجمہ · UrduUnverified translation

ابووائل بیان کرتے ہیں: ایک مرتبہ ہم صبح کی نماز ادا کرنے کے بعد سیدنا عبداللہ بن مسعود رضی اللہ عنہ کی خدمت میں حاضر ہوئے، ہم نے انہیں دروازے پر سلام کہا اور انہوں نے ہمیں اندر آنے کی اجازت دی، ہم تھوڑی دیر ٹھہرے رہے۔ خادمہ باہر آئی، اس نے دریافت کیا: آپ لوگ اندر کیوں نہیں آتے؟ راوی کہتے ہیں: ہم لوگ اندر گئے، تو سیدنا عبداللہ بن مسعود رضی اللہ عنہ بیٹھے ہوئے تھے اور تسبیح پڑھ رہے تھے۔ انہوں نے فرمایا: جب تم لوگوں کو اجازت مل گئی تھی، تو تم لوگ اندر کیوں نہیں آئے۔ ان لوگوں نے کہا: جی نہیں، ہم یہ گمان کر رہے تھے کہ اہل خانہ میں سے کچھ لوگ سوئے ہوئے ہوں گے۔ سیدنا عبداللہ رضی اللہ عنہ نے فرمایا: کیا تم نے ام عبد کے گھرانے کے بارے میں غفلت کا گمان کیا تھا؟ پھر وہ تسبیح پڑھنے کی طرف متوجہ ہو گئے، یہاں تک کہ جب انہوں نے یہ گمان کیا کہ سورج نکل آیا ہو گا، تو انہوں نے فرمایا: اے لڑکی! تم جا کر دیکھو، کیا سورج نکل آیا ہے؟ راوی کہتے ہیں: اس لڑکی نے دیکھا تو وہ نکل چکا تھا، تو سیدنا عبداللہ رضی اللہ عنہ نے فرمایا: «الْحَمْدُ لِلّٰهِ الَّذِي أَقَالَنَا يَوْمَنَا هَذَا» ”ہر طرح کی حمد اللہ کے لیے مخصوص ہے، جس نے ہمیں یہ دن بھی عطا کیا ہے“۔ مہدی نامی راوی نے یہ بات بیان کی ہے، میرا خیال ہے روایت میں یہ الفاظ بھی ہیں: «وَلَمْ يُهْلِكْنَا بِذُنُوبِنَا» ”ہمارے گناہوں کی وجہ سے ہمیں ہلاک نہیں کیا ہے“۔ حاضرین میں سے ایک صاحب نے گزارش کی: گزشتہ رات میں نے تمام مفصل سورتوں کی تلاوت کی، تو سیدنا عبداللہ رضی اللہ عنہ نے فرمایا: یہ تو شعر پڑھنے کی طرح تیزی سے پڑھنا ہوا، مجھے ایک دوسرے کے قریب قریب کی وہ سورتیں یاد ہیں، جنہیں نبی اکرم صلی اللہ علیہ وسلم تلاوت کیا کرتے تھے، وہ مفصل سورتوں سے تعلق رکھنے والی اٹھارہ سورتیں ہیں اور آل حم سے تعلق رکھنے والی دو سورتیں ہیں۔ [صحیح ابن حبان/كتاب الصلاة/حدیث: 2607]

اردو ترجمہ · UrduUnverified translation

سیدنا زید بن خالد جہنی رضی اللہ عنہ بیان کرتے ہیں کہ انہوں نے یہ سوچا: آج رات میں نبی اکرم صلی اللہ علیہ وسلم کی نماز کا جائزہ لوں گا۔ وہ کہتے ہیں: میں آپ صلی اللہ علیہ وسلم کی چوکھٹ پر (شاید یہ الفاظ ہیں) آپ کے خیمہ کے باہر ٹیک لگا کر بیٹھ گیا۔ نبی اکرم صلی اللہ علیہ وسلم کھڑے ہوئے اور آپ صلی اللہ علیہ وسلم نے دو مختصر رکعات ادا کیں، پھر آپ صلی اللہ علیہ وسلم نے دو رکعات ادا کیں جو لمبی تھیں، پھر آپ صلی اللہ علیہ وسلم نے دو رکعات ادا کیں جو ان سے پہلے کی دو رکعات سے کچھ کم تھیں، پھر آپ صلی اللہ علیہ وسلم نے دو رکعات ادا کیں جو ان سے پہلے کی دو رکعات سے کچھ کم تھیں، پھر آپ صلی اللہ علیہ وسلم نے دو رکعات ادا کیں جو ان کی دو رکعات سے کچھ کم تھیں، پھر آپ صلی اللہ علیہ وسلم نے وتر ادا کیے، تو یہ تیرہ رکعات ہو گئیں۔ [صحیح ابن حبان/كتاب الصلاة/حدیث: 2608]

اردو ترجمہ · UrduUnverified translation

سیدنا حذیفہ رضی اللہ عنہ بیان کرتے ہیں کہ ایک رات میں نے نبی اکرم صلی اللہ علیہ وسلم کی اقتداء میں نماز ادا کی، نبی اکرم صلی اللہ علیہ وسلم نے سورہ بقرہ کی تلاوت شروع کی، میں نے سوچا آپ صلی اللہ علیہ وسلم ایک سو آیات کی تلاوت کر کے رکوع میں چلے جائیں گے لیکن آپ صلی اللہ علیہ وسلم مسلسل تلاوت کرتے رہے، میں نے سوچا دو رکعات میں یہ سورہ پوری پڑھ لیں گے لیکن آپ صلی اللہ علیہ وسلم مسلسل تلاوت کرتے رہے، میں نے سوچا آپ صلی اللہ علیہ وسلم یہ سورہ مکمل کر کے پھر رکوع میں جائیں گے لیکن آپ صلی اللہ علیہ وسلم مسلسل تلاوت کرتے رہے یہاں تک کہ آپ صلی اللہ علیہ وسلم نے سورہ نساء کی تلاوت شروع کی، پھر آپ صلی اللہ علیہ وسلم نے سورہ آل عمران بھی پڑھ لی۔ پھر آپ صلی اللہ علیہ وسلم رکوع میں گئے اور تقریباً اتنی دیر رکوع میں رہے جتنا آپ صلی اللہ علیہ وسلم نے قیام کیا تھا، آپ صلی اللہ علیہ وسلم اس میں «سُبْحَانَ رَبِّيَ الْعَظِيمِ» ”پاک ہے میرا رب جو بہت عظمت والا ہے“ پڑھتے رہے، پھر آپ صلی اللہ علیہ وسلم نے اپنا سر اٹھایا، «سَمِعَ اللّٰهُ لِمَنْ حَمِدَهُ» ”اللہ نے اس کی بات سن لی جس نے اس کی تعریف کی“، «رَبَّنَا وَلَكَ الْحَمْدُ» ”اے ہمارے رب! اور تیرے ہی لیے تمام تعریفیں ہیں“ پڑھا، پھر آپ صلی اللہ علیہ وسلم نے اتنا طویل قیام کیا، پھر آپ صلی اللہ علیہ وسلم سجدے میں گئے تو آپ صلی اللہ علیہ وسلم نے سجدے کو طول دیا، سجدے میں «سُبْحَانَ رَبِّيَ الْأَعْلَىٰ» ”پاک ہے میرا رب جو سب سے بلند ہے“ پڑھتے رہے۔ (اس تلاوت کے دوران) آپ صلی اللہ علیہ وسلم جب بھی خوف دلانے یا عظمت کے اظہار والی کسی آیت کی تلاوت کرتے تھے، تو آپ صلی اللہ علیہ وسلم اس کا ذکر کیا کرتے تھے۔ [صحیح ابن حبان/كتاب الصلاة/حدیث: 2609]