Hadith 1849–1888

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم اس نماز سے فارغ ہوئے جس میں آپ نے بلند آواز میں قرأت کی تھی، پھر آپ نے دریافت فرمایا: ”کیا تم میں سے کسی نے ابھی تلاوت کی ہے؟“ ایک شخص نے عرض کی: جی ہاں! یا رسول اللہ! میں نے کی ہے۔ نبی اکرم صلی اللہ علیہ وسلم نے فرمایا: ”میں بھی سوچ رہا تھا کیا وجہ ہے، قرآن (کی تلاوت) کے حوالے سے مجھ سے مقابلہ کیا جا رہا ہے؟“ پھر لوگ ان نمازوں میں قرأت کرنے سے رک گئے جن میں نبی اکرم صلی اللہ علیہ وسلم بلند آواز میں تلاوت کیا کرتے تھے، یہ اس وقت ہوا جب انہوں نے نبی اکرم صلی اللہ علیہ وسلم کی زبانی یہ بات سنی۔ (امام ابن حبان رحمہ اللہ فرماتے ہیں:) ابن اکیمہ کا نام عمرو بن مسلم بن عمار بن اکیمہ ہے، یہ دو بھائی ہیں: عمرو بن مسلم اور عمر بن مسلم؛ جہاں تک عمرو بن مسلم کا تعلق ہے تو وہ تابعی ہیں، انہوں نے سیدنا ابوہریرہ رضی اللہ عنہ سے سماع کیا ہے اور زہری نے ان سے سماع کیا ہے، جہاں تک عمر بن مسلم کا تعلق ہے تو وہ تبع تابعی ہیں، انہوں نے سعید بن مسیب سے سماع کیا ہے اور ان سے امام مالک اور محمد بن عمرو نے روایات نقل کی ہیں، یہ دونوں ”ثقہ“ ہیں۔ [صحیح ابن حبان/كتاب الصلاة/حدیث: 1849]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک نماز پڑھائی، اس میں بلند آواز میں قراءت فرمائی۔ کچھ لوگوں نے آپ صلی اللہ علیہ وسلم کی اقتدا میں تلاوت کی۔ جب نبی اکرم صلی اللہ علیہ وسلم نے سلام پھیرا تو آپ صلی اللہ علیہ وسلم نے دریافت فرمایا: ”کیا تم میں سے کسی ایک نے ابھی تلاوت کی ہے؟“ تو لوگوں نے عرض کی: ”جی ہاں، یا رسول اللہ!“ نبی اکرم صلی اللہ علیہ وسلم نے فرمایا: ”میں بھی سوچ رہا تھا کہ کیا وجہ ہے، (قرآن کی تلاوت) میں میرے ساتھ مقابلہ کیا جا رہا ہے۔“ راوی کہتے ہیں: انہوں نے اس سے نصیحت حاصل کی اور (اس کے بعد لوگ آپ صلی اللہ علیہ وسلم کی اقتدا میں) تلاوت نہیں کرتے تھے۔ [صحیح ابن حبان/كتاب الصلاة/حدیث: 1850]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں نماز پڑھائی، آپ صلی اللہ علیہ وسلم نے بلند آواز میں قرأت کی، جب آپ صلی اللہ علیہ وسلم نے سلام پھیرا تو دریافت فرمایا: ”کیا ابھی تم میں سے کسی نے میرے ساتھ تلاوت کی ہے؟“ لوگوں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے فرمایا: ”میں بھی سوچ رہا تھا کہ کیا وجہ ہے، قرآن (کی تلاوت) میں میرے ساتھ مقابلہ کیا جا رہا ہے۔“ زہری رحمہ اللہ بیان کرتے ہیں: مسلمان اس سے باز آ گئے اور وہ لوگ آپ صلی اللہ علیہ وسلم کی اقتدا میں تلاوت نہیں کیا کرتے تھے۔ امام ابو حاتم رحمہ اللہ بیان کرتے ہیں: یہ روایت زہری سے منقول ہونے کے حوالے سے مشہور ہے جو ان کے اصحاب نے ابن اکیمہ کے حوالے سے سیدنا ابوہریرہ رضی اللہ عنہ سے نقل کی ہے، اس میں امام اوزاعی رحمہ اللہ کو وہم ہوا ہے کیونکہ گھوڑا بھی ٹھوکر کھا جاتا ہے، انہوں نے یہ کہا: یہ زہری کے حوالے سے سعید بن مسیب سے منقول ہے، ولید بن مسلم یہ بات جانتے تھے کہ انہیں وہم ہوا ہے، اس لیے انہوں نے یہ کہا: یہ اس شخص کے حوالے سے منقول ہے جس نے سیدنا ابوہریرہ رضی اللہ عنہ سے اسے سنا ہے، انہوں نے سعید کا تذکرہ نہیں کیا، جہاں تک زہری کے اس قول کا تعلق ہے کہ ”لوگ قرأت کرنے سے باز آ گئے“ تو اس سے مراد یہ ہے کہ انہوں نے نبی اکرم صلی اللہ علیہ وسلم کی ممانعت کی پیروی کرتے ہوئے آپ صلی اللہ علیہ وسلم کے پیچھے بلند آواز میں تلاوت نہیں کی، جب امام بلند آواز میں قرأت کر رہا ہو، اس کا تذکرہ نبی اکرم صلی اللہ علیہ وسلم کے اس فرمان میں ہے: ”کیا وجہ ہے کہ قرآن میں میرے ساتھ تنازع کیا جا رہا ہے۔“ [صحیح ابن حبان/كتاب الصلاة/حدیث: 1851]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اپنے اصحاب کو نماز پڑھائی، جب آپ صلی اللہ علیہ وسلم نے نماز مکمل کی تو آپ صلی اللہ علیہ وسلم نے لوگوں کی طرف رخ کیا اور دریافت فرمایا: ”کیا تم لوگ اپنی نماز میں امام کے پیچھے تلاوت کرتے ہو جبکہ امام قرأت کر رہا ہو؟“ تو لوگ خاموش رہے، نبی اکرم صلی اللہ علیہ وسلم نے یہ بات تین مرتبہ ارشاد فرمائی تو ایک صاحب نے (یا شاید لوگوں نے) عرض کی: جی ہاں، ہم ایسا کرتے ہیں۔ نبی اکرم صلی اللہ علیہ وسلم نے فرمایا: ”تم ایسا نہ کرو، تم میں سے ہر شخص دل میں سورۃ فاتحہ پڑھ لے۔“ (امام ابن حبان رحمہ اللہ فرماتے ہیں:) ابوقلابہ نے یہ روایت محمد بن ابوعائشہ سے سنی ہے، جو نبی اکرم صلی اللہ علیہ وسلم کے کسی صحابی سے منقول ہے، انہوں نے یہ روایت سیدنا انس بن مالک رضی اللہ عنہ سے بھی سنی ہے، تو یہ دونوں طرق محفوظ ہیں۔ [صحیح ابن حبان/كتاب الصلاة/حدیث: 1852]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں: ”ہر نماز میں قرأت ہوتی ہے، نبی اکرم صلی اللہ علیہ وسلم جس میں ہمیں سنا دیتے تھے ہم تمہیں سنا دیتے ہیں اور جس میں آپ ہم سے پوشیدہ رکھتے تھے ہم تم سے پوشیدہ رکھتے ہیں۔“ [صحیح ابن حبان/كتاب الصلاة/حدیث: 1853]

اردو ترجمہ · UrduUnverified translation

قزعہ بیان کرتے ہیں کہ میں نے سیدنا ابوسعید خدری رضی اللہ عنہ سے نبی اکرم صلی اللہ علیہ وسلم کی نماز کے بارے میں دریافت کیا، تو انہوں نے فرمایا: اس میں تمہارے لیے بھلائی نہیں ہے۔ نبی اکرم صلی اللہ علیہ وسلم کے لیے نماز کی اقامت کہہ دی جاتی تھی، پھر ہم میں سے کوئی ایک شخص قضائے حاجت کرنے کے لیے بقیع (کے میدان) کی طرف چلا جاتا تھا، پھر وہ واپس آتا، وضو کر لیتا اور نبی اکرم صلی اللہ علیہ وسلم کو ظہر کی نماز کی پہلی رکعت ہی میں پا لیتا تھا۔ [صحیح ابن حبان/كتاب الصلاة/حدیث: 1854]

اردو ترجمہ · UrduUnverified translation

سیدنا قتادہ رضی اللہ عنہ بیان کرتے ہیں کہ نبی اکرم صلی اللہ علیہ وسلم فجر اور ظہر کی پہلی دو رکعتیں طویل ادا کیا کرتے تھے۔ راوی بیان کرتے ہیں کہ ہم یہ سمجھتے ہیں کہ آپ صلی اللہ علیہ وسلم ایسا اس لیے کرتے تھے تاکہ لوگ (باجماعت نماز میں) شریک ہو جائیں۔ [صحیح ابن حبان/كتاب الصلاة/حدیث: 1855]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم مکمل لیکن سب سے زیادہ مختصر نماز ادا کرتے تھے۔ اس سے ان کی مراد یہ ہے: نبی اکرم صلی اللہ علیہ وسلم اس زمانے میں لوگوں کی عام عادت کے حوالے سے مختصر نماز ادا کرتے تھے، جو نبی اکرم صلی اللہ علیہ وسلم کی عام عادت کے مطابق ہوتی تھی۔ جہاں تک سیدنا ابوسعید خدری رضی اللہ عنہ کی نقل کردہ روایت کا تعلق ہے وہ کہتے ہیں: ہم میں سے کوئی ایک شخص قضائے حاجت کے لیے بقیع کی طرف چلا جاتا اور پھر وہ آ کر وضو کرتا تو نبی اکرم صلی اللہ علیہ وسلم کو ظہر کی نماز کی پہلی رکعت میں پا لیتا، نبی اکرم صلی اللہ علیہ وسلم ایسا اس لیے کرتے تھے تاکہ لوگ بھی آ کر نماز میں شامل ہو جائیں، آپ ہر رکعت میں ایسا نہیں کرتے تھے۔ آپ صرف پہلی رکعت میں ایسا کرتے تھے۔ اس میں اس بات کی دلیل موجود ہے، رکوع کو پانے والا تکبیرِ اولیٰ کو پانے والا شمار ہو گا۔ [صحیح ابن حبان/كتاب الصلاة/حدیث: 1856]

اردو ترجمہ · UrduUnverified translation

سیدنا ابوقتادہ رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمیں ظہر کی نماز پڑھاتے ہوئے پہلی دو رکعتوں میں تلاوت کرتے تھے، آپ صلی اللہ علیہ وسلم پہلی رکعت کو طویل ادا کرتے تھے اور دوسری کو (نسبتاً) مختصر ادا کرتے تھے۔ [صحیح ابن حبان/كتاب الصلاة/حدیث: 1857]

اردو ترجمہ · UrduUnverified translation

سیدنا ابوسعید خدری رضی اللہ عنہ بیان کرتے ہیں کہ ہم نبی اکرم صلی اللہ علیہ وسلم کے ظہر اور عصر کی نماز میں قیام کا اندازہ لگاتے تھے، تو ہم نے یہ اندازہ لگایا کہ ظہر کی نماز کی پہلی دو رکعات میں آپ صلی اللہ علیہ وسلم کا قیام 30 آیات کی تلاوت جتنا ہوتا تھا اور آخری دو رکعات میں آپ صلی اللہ علیہ وسلم کے قیام کے بارے میں ہم نے اندازہ لگایا کہ وہ اس سے نصف ہوتا تھا، اور عصر کی نماز کی پہلی دو رکعات میں آپ صلی اللہ علیہ وسلم کے قیام کے بارے میں ہم نے یہ اندازہ لگایا کہ وہ ظہر کی آخری دو رکعات جتنا ہوتا تھا اور عصر کی نماز کی آخری دو رکعات کے بارے میں ہم نے اندازہ لگایا کہ وہ اس سے نصف ہوتا تھا۔ (امام ابن حبان رحمہ اللہ فرماتے ہیں:) سیدنا ابوسعید خدری رضی اللہ عنہ کا یہ کہنا کہ ہم نے اندازہ لگایا، پہلی دو رکعات میں آپ صلی اللہ علیہ وسلم کا قیام تیس آیات کی تلاوت جتنا ہوتا تھا، یہ روایت بظاہر سیدنا ابوقتادہ رضی اللہ عنہ کے اس قول کے برخلاف ہے کہ نبی اکرم صلی اللہ علیہ وسلم پہلی رکعت طویل ادا کرتے تھے اور دوسری رکعت مختصر ادا کرتے تھے، حالانکہ «الْحَمْدُ لِلّٰهِ» ! ایسا نہیں ہے؛ کیونکہ پہلی رکعت میں نبی اکرم صلی اللہ علیہ وسلم تیس آیات ٹھہر ٹھہر کر ترتیل اور ترجیع کے ہمراہ پڑھتے تھے اور دوسری رکعت میں اتنی ہی آیات ترتیل اور ترجیع کے بغیر پڑھتے تھے، تو قرأت ایک جتنی ہوتی تھی لیکن پہلی رکعت دوسری سے طویل ہوتی تھی۔ [صحیح ابن حبان/كتاب الصلاة/حدیث: 1858]

اردو ترجمہ · UrduUnverified translation

سیدنا جابر بن سمرہ رضی اللہ عنہ بیان کرتے ہیں کہ میں سیدنا عمر بن خطاب رضی اللہ عنہ کے پاس بیٹھا ہوا تھا، اسی دوران اہل کوفہ سے تعلق رکھنے والے کچھ لوگ آپ کی خدمت میں حاضر ہوئے، انہوں نے سیدنا سعد رضی اللہ عنہ کی شکایت کی، یہاں تک کہ انہوں نے سیدنا عمر رضی اللہ عنہ سے یہ کہا کہ سیدنا سعد رضی اللہ عنہ اچھی طرح نماز نہیں پڑھاتے، تو سیدنا عمر رضی اللہ عنہ بولے کہ کچھ عرصہ پہلے تک تو وہ بہت عمدہ نماز ادا کیا کرتے تھے، انہوں نے سیدنا سعد رضی اللہ عنہ کو بلایا اور ان کو اس بارے میں بتایا تو سیدنا سعد رضی اللہ عنہ نے کہا: ”جہاں تک نبی اکرم صلی اللہ علیہ وسلم کی نماز کا تعلق ہے، میں ان لوگوں کو وہ نماز (یعنی اس طریقے کے مطابق نماز) پڑھاتا ہوں، میں پہلی دو رکعتیں طویل ادا کرتا ہوں اور آخری دو رکعات نسبتاً مختصر ادا کرتا ہوں،“ سیدنا عمر رضی اللہ عنہ نے فرمایا: ”اے ابواسحاق! آپ کے بارے میں میرا یہی گمان تھا،“ پھر سیدنا عمر رضی اللہ عنہ نے ان کے ہمراہ ایک ایسے شخص کو بھیجا جو ان کے بارے میں کوفہ میں دریافت کرے، اس نے کوفہ کی تمام مساجد کا چکر لگایا اور ہر شخص نے ان کے بارے میں بھلائی کی بات کہی، یہاں تک کہ جب وہ بنو عبس کی مسجد کے قریب پہنچے تو وہاں ایک شخص تھا جس کا نام ابوسعدہ تھا، وہ بولا: اللہ جانتا ہے کہ یہ کسی جنگی مہم کے لیے نہیں نکلتے اور (مالِ غنیمت کو) برابری کی بنیاد پر تقسیم نہیں کرتے اور فیصلہ کرتے ہوئے انصاف سے کام نہیں لیتے، راوی بیان کرتے ہیں کہ سیدنا سعد رضی اللہ عنہ غصے میں آ گئے اور بولے: «اللَّهُمَّ إِنْ كَانَ عَبْدُكَ هَذَا كَاذِبًا، فَأَطِلْ عُمْرَهُ، وَأَطِلْ فَقْرَهُ، وَعَرِّضْهُ لِلْفِتَنِ» ”اے اللہ! اگر یہ شخص جھوٹا ہے، تو اس کی عمر کو لمبا کر دے اور اس کی غربت کو شدید کر دے اور اس پر آزمائش ڈال دے،“ راوی کہتے ہیں کہ عمیر نامی راوی نے یہ بات بیان کی ہے، انہوں نے اس شخص کو دیکھا کہ عمر زیادہ ہونے کی وجہ سے اس کی بھنویں اس کی آنکھوں پر آ رہی تھیں، وہ انتہائی غریب تھا اور آزمائش میں مبتلا ہو گیا تھا لیکن اسے کوئی چیز نہیں ملتی تھی، اس سے دریافت کیا گیا: اے ابوسعدہ! تمہارا کیا حال ہے؟ تو وہ کہتا تھا: ایک عمر رسیدہ بوڑھا شخص جو آزمائش کا شکار ہے، میرے بارے میں سیدنا سعد رضی اللہ عنہ کی بددعا قبول ہو گئی ہے۔ [صحیح ابن حبان/كتاب الصلاة/حدیث: 1859]

اردو ترجمہ · UrduUnverified translation

سیدنا وائل بن حجر حضرمی رضی اللہ عنہ بیان کرتے ہیں کہ میں نے سوچا کہ میں ضرور اس بات کا جائزہ لوں گا کہ نبی اکرم صلی اللہ علیہ وسلم کس طرح نماز ادا کرتے ہیں۔ میں نے آپ صلی اللہ علیہ وسلم کا جائزہ لیا، جب آپ صلی اللہ علیہ وسلم کھڑے ہوئے تو آپ صلی اللہ علیہ وسلم نے تکبیر کہی اور اپنے ہاتھ بلند کیے یہاں تک کہ آپ صلی اللہ علیہ وسلم انہیں کانوں کے برابر لے آئے۔ آپ صلی اللہ علیہ وسلم نے اپنا دایاں دستِ مبارک اپنے بائیں ہاتھ کی ہتھیلی کی پشت، گٹے اور کلائی پر رکھا۔ پھر آپ صلی اللہ علیہ وسلم نے جب رکوع میں جانے کا ارادہ کیا، تو آپ صلی اللہ علیہ وسلم نے اپنے دونوں ہاتھوں کو اتنا ہی بلند کیا (جتنا آغاز میں کیا تھا)۔ پھر آپ صلی اللہ علیہ وسلم رکوع میں چلے گئے اور آپ صلی اللہ علیہ وسلم نے اپنے دونوں ہاتھ گھٹنوں پر رکھے۔ پھر آپ صلی اللہ علیہ وسلم نے اپنا سر اٹھایا اور اتنا ہی دونوں ہاتھوں کو بلند کیا۔ پھر آپ صلی اللہ علیہ وسلم سجدے میں چلے گئے اور آپ صلی اللہ علیہ وسلم نے اپنی دونوں ہتھیلیاں کانوں کے مقابل رکھی تھیں۔ پھر آپ صلی اللہ علیہ وسلم بیٹھ گئے۔ آپ صلی اللہ علیہ وسلم نے اپنے بائیں زانو کو بچھا لیا اور آپ صلی اللہ علیہ وسلم نے بایاں ہاتھ اپنے بائیں زانو اور دائیں گھٹنے پر رکھا اور اپنی دائیں کہنی کو دائیں زانو پر رکھا۔ آپ صلی اللہ علیہ وسلم نے اپنی دو انگلیوں کو ملا کر ان کے ذریعے حلقہ بنایا اور پھر ایک انگلی کو بلند کیا۔ میں نے آپ صلی اللہ علیہ وسلم کو دیکھا کہ آپ صلی اللہ علیہ وسلم اسے حرکت دیتے ہوئے اس کے ہمراہ دعا مانگ رہے تھے۔ اس کے بعد ایک مرتبہ میں آپ صلی اللہ علیہ وسلم کی خدمت میں سردیوں کے موسم میں حاضر ہوا تو میں نے دیکھا کہ لوگوں نے سردیوں کے کپڑے پہنے ہوئے ہیں اور وہ کپڑوں کے اندر ہی اپنے ہاتھوں کو حرکت دے رہے ہیں (یعنی چادروں کے اندر ہی رفع یدین کر رہے تھے)۔ [صحیح ابن حبان/كتاب الصلاة/حدیث: 1860]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں، نبی اکرم صلی اللہ علیہ وسلم جب نماز کا آغاز کرتے تھے، تو دونوں ہاتھ کندھوں تک بلند کرتے تھے، جب آپ صلی اللہ علیہ وسلم رکوع میں جانے کے لیے تکبیر کہتے تھے اور جب آپ صلی اللہ علیہ وسلم رکوع سے سر اٹھاتے تھے، تو انہیں اس طرح سے بلند کرتے تھے اور آپ صلی اللہ علیہ وسلم یہ کہتے تھے: «سَمِعَ اللّٰهُ لِمَنْ حَمِدَهٗ» ”اللہ تعالیٰ نے اس شخص کو سن لیا جس نے اس کی حمد بیان کی“ «رَبَّنَا لَكَ الْحَمْدُ» ”اے ہمارے پروردگار! حمد تیرے لیے مخصوص ہے“ اور نبی اکرم صلی اللہ علیہ وسلم سجدوں میں (یعنی دو سجدوں کے درمیان) ایسا نہیں کیا کرتے تھے۔ [صحیح ابن حبان/كتاب الصلاة/حدیث: 1861]

اردو ترجمہ · UrduUnverified translation

سیدنا وائل بن حجر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کے پیچھے نماز ادا کی، جب آپ صلی اللہ علیہ وسلم صف میں داخل ہوئے (یعنی نماز پڑھنا شروع کی) تو آپ صلی اللہ علیہ وسلم نے دونوں ہاتھ بلند کیے اور تکبیر کہی، آپ صلی اللہ علیہ وسلم نے «اِلْتِحَاف» ”کپڑا لپیٹنا“ کے طور پر کپڑا لپیٹا تھا، آپ صلی اللہ علیہ وسلم نے تھوڑا سا اپنا ہاتھ کپڑے کے اندر داخل کر لیا اور دائیں ہاتھ کے ذریعے بائیں ہاتھ کو پکڑ لیا، پھر جب آپ صلی اللہ علیہ وسلم نے رکوع میں جانے کا ارادہ کیا تو دونوں ہاتھ باہر نکال لیے اور ان کو بلند کیا اور تکبیر کہی، پھر آپ صلی اللہ علیہ وسلم رکوع میں چلے گئے، جب آپ صلی اللہ علیہ وسلم نے رکوع سے سر اٹھایا تو آپ صلی اللہ علیہ وسلم نے دونوں ہاتھ بلند کیے اور تکبیر کہتے ہوئے سجدے میں چلے گئے، پھر آپ صلی اللہ علیہ وسلم نے اپنا چہرہ دونوں ہاتھوں کے درمیان رکھا۔ ابن جحادہ نامی راوی بیان کرتے ہیں: میں نے اس بات کا تذکرہ حسن بن ابو الحسن رحمہ اللہ سے کیا تو وہ بولے: یہ نبی اکرم صلی اللہ علیہ وسلم کی نماز ہے، جس نے ایسا کرنا تھا اس نے ایسا کیا اور جس نے اس کو چھوڑنا تھا اس نے اسے چھوڑ دیا۔ امام ابوحاتم رحمہ اللہ بیان کرتے ہیں: محمد بن جحادہ نامی راوی ثقہ اور متقن راویوں میں سے ایک ہیں، یہ دین داری کے حوالے سے اہل فضل ہیں، تاہم اس راوی کے نام کے بارے میں انہیں وہم ہوا کیونکہ گھوڑا بھی ٹھوکر کھا جاتا ہے؛ انہوں نے کہا: یہ وائل بن علقمہ ہے، حالانکہ وہ علقمہ بن وائل ہے۔ [صحیح ابن حبان/كتاب الصلاة/حدیث: 1862]

اردو ترجمہ · UrduUnverified translation

سیدنا مالک بن حویرث رضی اللہ عنہ بیان کرتے ہیں کہ نبی اکرم صلی اللہ علیہ وسلم جب نماز شروع کرتے تھے تو آپ تکبیر کہتے ہوئے دونوں ہاتھ بلند کرتے تھے، یہاں تک کہ دونوں ہاتھ کانوں تک لے آتے تھے، اور جب آپ رکوع میں جاتے تھے اور جب آپ رکوع سے سر اٹھاتے تھے (تو بھی ایسا ہی کیا کرتے تھے)۔ [صحیح ابن حبان/كتاب الصلاة/حدیث: 1863]

اردو ترجمہ · UrduUnverified translation

سالم اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں: میں نے نبی اکرم صلی اللہ علیہ وسلم کو دیکھا کہ جب آپ نے نماز کا آغاز کیا، تو آپ نے اپنے دونوں ہاتھ بلند کر لیے یہاں تک کہ انہیں دونوں کندھوں کے برابر لے آئے۔ جب آپ نے رکوع میں جانے کا ارادہ کیا اور جب آپ نے رکوع سے سر اٹھایا (تو بھی رفع یدین) کیا۔ آپ صلی اللہ علیہ وسلم نے سجدوں کے درمیان رفع یدین نہیں کیا۔ [صحیح ابن حبان/كتاب الصلاة/حدیث: 1864]

اردو ترجمہ · UrduUnverified translation

محمد بن عمرو بیان کرتے ہیں: میں نے سیدنا ابوحمید رضی اللہ عنہ کو دس صحابہ کرام، جن میں سے ایک سیدنا ابوقتادہ رضی اللہ عنہ بھی تھے، ان کی موجودگی میں یہ کہتے ہوئے سنا: میں تم سب کے مقابلے میں نبی اکرم صلی اللہ علیہ وسلم کی نماز کے بارے میں زیادہ علم رکھتا ہوں۔ لوگوں نے دریافت کیا: آپ نہ تو پرانے صحابی ہیں اور نہ ہم سے زیادہ نبی اکرم صلی اللہ علیہ وسلم کے پیروکار ہیں۔ سیدنا ابوحمید رضی اللہ عنہ نے کہا: ایسا ہی ہے۔ دیگر صحابہ کرام نے فرمایا: پھر آپ پیش کیجیے (آپ صلی اللہ علیہ وسلم کس طرح نماز ادا کرتے تھے) تو سیدنا ابوحمید رضی اللہ عنہ نے فرمایا: نبی اکرم صلی اللہ علیہ وسلم جب نماز کے لیے کھڑے ہوتے تھے، تو آپ قبلہ کی طرف رخ کرتے تھے اور دونوں ہاتھ بلند کرتے تھے، یہاں تک کہ انہیں کندھوں تک اٹھا لیتے تھے۔ پھر آپ «اللّٰهُ أَكْبَرُ» ”اللہ اکبر“ کہتے، پھر آپ جب رکوع میں جاتے تو تکبیر کہتے تھے اور دونوں ہاتھ بلند کرتے تھے۔ پھر آپ اپنی پشت کو سیدھا کر لیتے اور سر کو اٹھاتے نہیں تھے اور بالکل جھکاتے بھی نہیں تھے۔ پھر آپ اپنا سر اٹھاتے تھے (یعنی رکوع سے اٹھتے تھے) اور یہ کہتے تھے: «سَمِعَ اللّٰهُ لِمَنْ حَمِدَهُ» ”اللہ تعالیٰ نے اس شخص کو سن لیا جس نے اس کی حمد بیان کی“، پھر آپ اپنے دونوں ہاتھ بلند کرتے، انہیں کندھوں کے برابر لے آتے تھے، پھر آپ سیدھے کھڑے ہو جاتے تھے، پھر آپ سجدے میں جاتے تھے اور اپنے پاؤں کی انگلیوں کے کنارے قبلہ کی طرف کر لیتے تھے، پھر آپ اپنا سر اٹھاتے تھے، «اللّٰهُ أَكْبَرُ» ”اللہ اکبر“ کہتے تھے اور اپنی بائیں ٹانگ کو بچھا لیتے تھے اور اس ٹانگ پر تورک کے طور پر بیٹھ جاتے تھے، پھر آپ سلام پھیر لیتے تھے۔ [صحیح ابن حبان/كتاب الصلاة/حدیث: 1865]

اردو ترجمہ · UrduUnverified translation

سیدنا عباس بن سہل رضی اللہ عنہ بیان کرتے ہیں کہ وہ ایک محفل میں موجود تھے، وہاں ان کے والد بھی موجود تھے جو نبی اکرم صلی اللہ علیہ وسلم کے صحابی ہیں، اس محفل میں سیدنا ابوہریرہ رضی اللہ عنہ، سیدنا ابواسید رضی اللہ عنہ اور سیدنا ابوحمید ساعدی رضی اللہ عنہ موجود تھے جن کا تعلق انصار سے تھا۔ ان حضرات نے نماز کا تذکرہ کیا، تو سیدنا ابوحمید رضی اللہ عنہ بولے کہ میں نبی اکرم صلی اللہ علیہ وسلم کی نماز کے بارے میں آپ سب سے زیادہ علم رکھتا ہوں۔ لوگوں نے کہا کہ پھر آپ ہمیں دکھائیے۔ راوی کہتے ہیں کہ پھر وہ نماز ادا کرنے کے لیے کھڑے ہوئے، دیگر حضرات دیکھ رہے تھے، انہوں نے شروع میں تکبیر کہی، دونوں ہاتھ کندھوں تک بلند کیے، پھر انہوں نے رکوع میں جانے کے لیے تکبیر کہی، پھر انہوں نے رفع یدین کیا۔ پھر انہوں نے اپنے دونوں ہاتھ گھٹنوں پر رکھ لیے، اپنے سر کو بالکل جھکایا بھی نہیں اور اوپر بھی نہیں کیا، پھر انہوں نے سر اٹھایا اور «سَمِعَ اللّٰهُ لِمَنْ حَمِدَهُ» ”اللہ نے اس کی سن لی جس نے اس کی تعریف کی“ پڑھا۔ پھر انہوں نے رفع یدین کیا۔ «اَللّٰهُ أَکْبَرُ» ”اللہ بہت بڑا ہے“ کہتے ہوئے سجدے میں چلے گئے۔ انہوں نے اپنی دونوں ہتھیلیاں، دونوں گھٹنے اور اپنے دونوں پاؤں کے کنارے زمین پر رکھے، وہ سجدے کی حالت میں تھے۔ پھر انہوں نے تکبیر کہی اور بیٹھ گئے۔ انہوں نے اپنی ایک ٹانگ کو «تَوَرُّک» کے طور پر بچھا لیا اور دوسرے پاؤں کو کھڑا کر لیا۔ پھر انہوں نے تکبیر کہتے ہوئے دوسرا سجدہ کیا، تکبیر کہی اور کھڑے ہو گئے لیکن انہوں نے «تَوَرُّک» نہیں کیا۔ پھر انہوں نے ایسا ہی کیا اور دوسری رکعت ادا کی۔ اس طرح تکبیر کہی اور دو رکعات ادا کرنے کے بعد بیٹھ گئے۔ پھر جب انہوں نے کھڑے ہونے کا ارادہ کیا، تو تکبیر کہی۔ پھر انہوں نے آخری دو رکعات بھی اسی طرح ادا کیں، پھر جب انہوں نے سلام پھیرا تو پہلے دائیں طرف سلام پھیرتے ہوئے «اَلسَّلَامُ عَلَیْکُمْ وَرَحْمَةُ اللّٰهِ» ”تم پر سلامتی ہو اور اللہ کی رحمت ہو“ اور بائیں طرف سلام پھیرتے ہوئے «اَلسَّلَامُ عَلَیْکُمْ وَرَحْمَةُ اللّٰهِ» ”تم پر سلامتی ہو اور اللہ کی رحمت ہو“ کہا۔ حسن بن حر نامی راوی نے یہ بات بیان کی ہے۔ عیسیٰ نامی راوی نے مجھے یہ حدیث بیان کی ہے، اس حدیث میں تشہد کے بارے میں یہ الفاظ بھی ہیں: انہوں نے اپنا بایاں ہاتھ اپنے بائیں زانو پر رکھا اور دایاں ہاتھ دائیں زانو پر رکھا اور پھر انہوں نے ایک انگلی کے ذریعے اشارہ کیا۔ امام ابوحاتم رحمہ اللہ بیان کرتے ہیں: محمد بن عمرو نے یہ روایت سیدنا ابوحمید ساعدی رضی اللہ عنہ سے سنی ہے۔ انہوں نے یہ روایت عباس بن سہل کے حوالے سے ان کے والد رضی اللہ عنہ سے بھی سنی ہے۔ ان کے دونوں طرق محفوظ ہیں۔ [صحیح ابن حبان/كتاب الصلاة/حدیث: 1866]

اردو ترجمہ · UrduUnverified translation

محمد بن عمرو بیان کرتے ہیں کہ میں نے سیدنا ابوحمید ساعدی رضی اللہ عنہ کو نبی اکرم صلی اللہ علیہ وسلم کے دس صحابہ کرام، جن میں سیدنا ابوقتادہ رضی اللہ عنہ بھی تھے، ان کی موجودگی میں یہ کہتے ہوئے سنا، سیدنا ابوحمید رضی اللہ عنہ نے فرمایا: ”میں نبی اکرم صلی اللہ علیہ وسلم کی نماز کے بارے میں زیادہ علم رکھتا ہوں۔“ ان حضرات نے دریافت کیا: ”وہ کیسے؟ اللہ کی قسم! آپ نہ تو ہم سے زیادہ نبی اکرم صلی اللہ علیہ وسلم کے پیروکار ہیں اور نہ پرانے صحابی ہیں۔“ سیدنا ابوحمید رضی اللہ عنہ نے کہا: ”جی ہاں۔“ دیگر صحابہ کرام نے کہا: ”پھر آپ پیش کیجیے“، تو سیدنا ابوحمید رضی اللہ عنہ نے فرمایا: ”آپ صلی اللہ علیہ وسلم جب نماز کے لیے کھڑے ہوتے تھے تو تکبیر کہتے تھے، پھر آپ دونوں ہاتھ بلند کرتے ہوئے کندھوں تک اٹھا لیتے تھے، پھر آپ اس طرح قیام کرتے تھے کہ ہر ہڈی اپنی جگہ پر ہوتی تھی، پھر آپ تلاوت کرتے تھے۔ پھر آپ دونوں ہاتھ بلند کرتے تھے یہاں تک کہ انہیں کندھوں کے برابر لے آتے تھے۔ پھر آپ رکوع میں چلے جاتے تھے اور اپنی دونوں ہتھیلیاں دونوں گھٹنوں پر رکھ لیتے، آپ اعتدال کی حالت میں رہتے، آپ اپنے سر کو اٹھاتے بھی نہیں تھے اور جھکاتے بھی نہیں تھے۔ پھر «سَمِعَ اللّٰهُ لِمَنْ حَمِدَهُ» ”اللہ نے اس کی سن لی جس نے اس کی تعریف کی“ کہتے ہوئے رفع یدین کرتے یہاں تک کہ دونوں ہاتھوں کو کندھوں کے برابر لے آتے تھے (اور اس طرح کھڑے ہوتے تھے کہ) ہر ہڈی اپنی جگہ پر آ جاتی تھی۔ پھر آپ زمین کی طرف آتے تھے۔ آپ اپنے دونوں بازو اپنے پہلوؤں سے دور رکھتے تھے، پھر آپ اپنا سر اٹھاتے تھے اور ایک ٹانگ کو بچھا لیتے تھے اور اس پر بیٹھ جاتے تھے۔ جب آپ سجدے میں جاتے تھے تو اپنے پاؤں کی انگلیوں کو کشادہ رکھتے تھے۔ پھر آپ سجدہ کرتے تھے۔ پھر آپ تکبیر کہتے تھے اور بائیں ٹانگ کے بل بیٹھ جاتے تھے، یہاں تک کہ ہر ہڈی اپنی مخصوص جگہ پر آ جاتی تھی۔ پھر آپ کھڑے ہوتے تھے اور دوسری رکعت میں بھی ایسے کرتے تھے۔ پھر آپ جب دو رکعات ادا کرنے کے بعد کھڑے ہوتے تھے، دونوں ہاتھ کندھوں تک بلند کرتے تھے، جس طرح نماز کے آغاز میں کیے تھے۔ پھر آپ بقیہ نماز بھی اس طرح ادا کرتے تھے، یہاں تک کہ جب آپ سجدہ کر لیتے تھے، اس کے بعد سلام پھیرنا ہوتا تھا تو آپ اپنے دونوں پاؤں نکال لیتے تھے اور بائیں پہلو کے بل تورک کے طور پر بیٹھ جاتے تھے۔“ تو دیگر صحابہ کرام نے کہا: ”آپ نے سچ کہا ہے، نبی اکرم صلی اللہ علیہ وسلم اسی طرح نماز ادا کرتے تھے۔“ امام ابوحاتم رحمہ اللہ بیان کرتے ہیں: ”چار رکعات میں چھ سو چیزیں سنت ہیں، جو نبی اکرم صلی اللہ علیہ وسلم سے منقول ہیں، ہم نے انہیں ان کی فصول کے ہمراہ کتاب ”نماز کا طریقہ“ میں ذکر کیا ہے۔ اب اس کتاب میں اس نوع کی ترتیب کے ذریعے میں نے اس کتاب سے بے نیاز کر دیا ہے۔“ امام ابوحاتم رحمہ اللہ فرماتے ہیں: ”عبدالحمید نامی راوی ثقہ اور متقن راویوں میں سے ایک ہیں۔ میں نے ان کے حالات کی تحقیق کی ہے، میں نے نہیں دیکھا کہ یہ کسی منکر روایت کو نقل کرنے میں منفرد ہوں جس میں ان کے ساتھ کوئی شریک نہ ہو۔ فلیح بن سلیمان اور عیسیٰ بن عبداللہ، محمد بن عمرو کے حوالے سے سیدنا ابوحمید رضی اللہ عنہ سے یہ روایت نقل کرنے میں عبدالحمید کے موافق ہیں۔“ [صحیح ابن حبان/كتاب الصلاة/حدیث: 1867]

اردو ترجمہ · UrduUnverified translation

سالم رحمہ اللہ اپنے والد (سیدنا عبداللہ بن عمر رضی اللہ عنہما) کے حوالے سے یہ بات نقل کرتے ہیں کہ جب آپ صلی اللہ علیہ وسلم نماز شروع کرتے تھے تو رفع یدین کرتے تھے، جب رکوع میں جاتے تھے تو رفع یدین کرتے تھے، جب «سَمِعَ اللّٰهُ لِمَنْ حَمِدَهُ» ”اللہ نے اس کی سن لی جس نے اس کی تعریف کی“ کہتے تھے (یعنی جب رکوع سے کھڑے ہو جاتے تھے) تو رفع یدین کرتے تھے اور جب آپ صلی اللہ علیہ وسلم دو رکعات کے بعد کھڑے ہوتے تھے، تو بھی دونوں ہاتھ کندھوں تک بلند کرتے تھے۔ [صحیح ابن حبان/كتاب الصلاة/حدیث: 1868]

اردو ترجمہ · UrduUnverified translation

محمد بن عمرو بیان کرتے ہیں کہ وہ صحابہ کرام رضی اللہ عنہم کے ہمراہ بیٹھے تھے، تو سیدنا ابوحمید ساعدی رضی اللہ عنہ نے کہا: میں نبی اکرم صلی اللہ علیہ وسلم کی نماز کے بارے میں آپ سب سے زیادہ یاد رکھے ہوئے ہوں۔ میں نے نبی اکرم صلی اللہ علیہ وسلم کو دیکھا جب آپ تکبیر کہتے تھے، تو دونوں ہاتھ کندھوں تک بلند کرتے تھے، جب رکوع میں جاتے تو دونوں ہاتھ گھٹنوں پر رکھ لیتے تھے۔ آپ اپنی پشت کو سیدھا رکھتے تھے۔ جب آپ سر اٹھاتے تھے، تو سیدھا کھڑے ہو جاتے تھے اور جب سجدے میں جاتے تو دونوں بازوؤں کو بچھاتے بھی نہیں تھے اور اٹھا کر بھی نہیں رکھتے تھے۔ آپ اپنے دونوں پاؤں کا رخ قبلہ کی طرف رکھتے تھے، جب آپ آخری رکعت میں بیٹھتے تھے، تو بائیں ٹانگ کو باہر نکال لیتے تھے اور تشریف گاہ پر بیٹھتے تھے۔ [صحیح ابن حبان/كتاب الصلاة/حدیث: 1869]

اردو ترجمہ · UrduUnverified translation

محمد بن عمرو بیان کرتے ہیں: میں نے سیدنا ابوحمید ساعدی رضی اللہ عنہ کو یہ بیان کرتے ہوئے سنا کہ نبی اکرم صلی اللہ علیہ وسلم جب نماز ادا کرنے کے لیے کھڑے ہوتے تھے، تو آپ صلی اللہ علیہ وسلم قبلہ کی طرف رخ کرتے تھے اور دونوں ہاتھ بلند کرتے تھے یہاں تک کہ انہیں کندھوں کے برابر لے آتے تھے، پھر آپ صلی اللہ علیہ وسلم «اللَّهُ أَكْبَرُ» ”اللہ سب سے بڑا ہے“ کہتے تھے۔ جب آپ صلی اللہ علیہ وسلم رکوع میں جاتے تھے، تو تکبیر کہتے تھے اور جب آپ صلی اللہ علیہ وسلم رکوع میں جاتے تھے، تو رفع یدین کرتے تھے، پھر آپ صلی اللہ علیہ وسلم اپنی پشت کو سیدھا کر لیتے تھے۔ آپ صلی اللہ علیہ وسلم اپنے سر کو اٹھاتے بھی نہیں تھے اور جھکاتے بھی نہیں تھے، پھر آپ صلی اللہ علیہ وسلم «سَمِعَ اللَّهُ لِمَنْ حَمِدَهُ» ”اللہ نے اس کی پکار سن لی جس نے اس کی تعریف کی“ کہتے تھے اور دونوں ہاتھ بلند کرتے ہوئے انہیں کندھوں کے برابر تک لے آتے تھے، پھر آپ صلی اللہ علیہ وسلم سیدھے کھڑے ہو جاتے تھے یہاں تک کہ ہر ہڈی اپنی مخصوص جگہ پر اعتدال کی حالت میں آ جاتی تھی، پھر آپ صلی اللہ علیہ وسلم زمین کی طرف جھکتے تھے اور «اللَّهُ أَكْبَرُ» ”اللہ سب سے بڑا ہے“ کہتے تھے، جب آپ صلی اللہ علیہ وسلم سجدے میں جاتے تھے، تو اپنے دونوں بازو پہلو سے الگ رکھتے تھے اور اپنے پاؤں کی انگلیوں کے کناروں کا رخ قبلہ کی طرف رکھتے تھے، پھر آپ صلی اللہ علیہ وسلم اپنا سر اٹھاتے تھے اور «اللَّهُ أَكْبَرُ» ”اللہ سب سے بڑا ہے“ کہتے تھے۔ آپ صلی اللہ علیہ وسلم اپنی بائیں ٹانگ کو بچھا کر اس پر تشریف فرما ہو جاتے تھے، یہاں تک کہ ہر ہڈی اپنی مخصوص جگہ پر اعتدال کی حالت میں آ جاتی تھی، پھر آپ صلی اللہ علیہ وسلم «اللَّهُ أَكْبَرُ» ”اللہ سب سے بڑا ہے“ کہتے ہوئے دوبارہ سجدے میں چلے جاتے تھے، پھر آپ صلی اللہ علیہ وسلم اپنا سر اٹھاتے تھے اور «اللَّهُ أَكْبَرُ» ”اللہ سب سے بڑا ہے“ کہتے تھے، پھر بائیں ٹانگ کو بچھا دیتے تھے اور اس پر تشریف فرما ہو جاتے تھے، یہاں تک کہ ہر ہڈی اپنی مخصوص جگہ پر آ جاتی تھی، پھر آپ صلی اللہ علیہ وسلم کھڑے ہوتے تھے اور دوسری (رکعت) میں بھی اسی طرح کرتے تھے، یہاں تک کہ جب آپ صلی اللہ علیہ وسلم دو رکعات ادا کرنے کے بعد کھڑے ہوتے تھے، تو تکبیر کہنے کے بعد اسی طرح کرتے تھے جس طرح آپ صلی اللہ علیہ وسلم نے نماز کے آغاز میں کیا تھا (یعنی رفع یدین کرتے تھے)، یہاں تک کہ جب وہ سجدہ آتا جس پر نماز ختم ہو رہی ہوتی (یعنی آخری سجدہ آتا) تو آپ صلی اللہ علیہ وسلم دو سجدوں کے بعد اپنے سر کو اٹھاتے تھے اور اپنی ٹانگ کو پیچھے کر کے اپنی ٹانگ پر تورک کے طور پر بیٹھ جاتے تھے۔ [صحیح ابن حبان/كتاب الصلاة/حدیث: 1870]

اردو ترجمہ · UrduUnverified translation

عباس بن سہل ساعدی بیان کرتے ہیں کہ ایک مرتبہ سیدنا ابوحمید ساعدی رضی اللہ عنہ، سیدنا ابواسید ساعدی رضی اللہ عنہ، سیدنا سہل بن سعد ساعدی رضی اللہ عنہ اور سیدنا محمد بن مسلمہ رضی اللہ عنہ اکٹھے ہوئے۔ ان حضرات نے نبی اکرم صلی اللہ علیہ وسلم کی نماز کا تذکرہ کیا، تو سیدنا ابوحمید رضی اللہ عنہ نے فرمایا: ”نبی اکرم صلی اللہ علیہ وسلم کی نماز کے بارے میں، میں آپ سب سے زیادہ علم رکھتا ہوں۔“ (پھر انہوں نے بیان کیا) نبی اکرم صلی اللہ علیہ وسلم جب کھڑے ہوتے تھے، تو آپ صلی اللہ علیہ وسلم تکبیر کہتے ہوئے رفع یدین کرتے تھے، جب آپ صلی اللہ علیہ وسلم رکوع میں جانے کے لیے تکبیر کہتے تھے، پھر رفع یدین کرتے تھے، پھر آپ صلی اللہ علیہ وسلم رکوع میں چلے جاتے تھے اور اپنے دونوں ہاتھ گھٹنوں پر یوں رکھ لیتے تھے جس طرح انہیں پکڑے ہوئے ہیں۔ آپ صلی اللہ علیہ وسلم اپنے دونوں بازو سیدھے رکھتے تھے اور انہیں پہلو سے الگ رکھتے تھے۔ آپ صلی اللہ علیہ وسلم اپنے سر کو اٹھا کر بھی نہیں رکھتے تھے اور جھکا کر بھی نہیں رکھتے تھے۔ پھر آپ صلی اللہ علیہ وسلم کھڑے ہو جاتے اور رفع یدین کرتے، یہاں تک کہ سیدھے کھڑے ہو جاتے اور آپ صلی اللہ علیہ وسلم کا ہر ایک عضو اپنی مخصوص جگہ پر آ جاتا۔ پھر آپ صلی اللہ علیہ وسلم سجدے میں جاتے تو اپنی ناک اور پیشانی کو جما کر رکھتے۔ آپ صلی اللہ علیہ وسلم اپنے دونوں بازو اپنے پہلو سے الگ رکھتے تھے۔ آپ صلی اللہ علیہ وسلم اپنی دونوں ہتھیلیاں اپنے کندھوں کے برابر رکھتے تھے، پھر آپ صلی اللہ علیہ وسلم اپنا سر اٹھاتے تھے یہاں تک کہ ہر عضو اپنی مخصوص جگہ پر آ جاتا، یہاں تک کہ جب آپ (نماز کی رکعات ادا کر کے) فارغ ہوتے تو آپ صلی اللہ علیہ وسلم تشریف فرما ہوتے، آپ صلی اللہ علیہ وسلم اپنی بائیں ٹانگ کو بچھا لیتے تھے۔ آپ صلی اللہ علیہ وسلم اپنے دائیں (پاؤں کی انگلیوں) کو قبلہ کی طرف رکھتے تھے۔ آپ صلی اللہ علیہ وسلم اپنی دائیں ہتھیلی کو دائیں زانو پر رکھتے تھے اور بائیں ہتھیلی کو بائیں زانو پر رکھتے تھے اور اپنی شہادت کی انگلی کے ذریعے اشارہ کرتے تھے۔ [صحیح ابن حبان/كتاب الصلاة/حدیث: 1871]

اردو ترجمہ · UrduUnverified translation

سیدنا مالک بن حویرث رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کی خدمت میں حاضر ہوئے، ہم نوجوان اور ہم عمر لوگ تھے۔ ہم نے آپ صلی اللہ علیہ وسلم کے ہاں بیس دن قیام کیا، جب آپ صلی اللہ علیہ وسلم کو یہ اندازہ ہوا کہ ہمیں اپنے اہل خانہ (سے دور رہنے میں) دشواری ہو رہی ہے، تو آپ صلی اللہ علیہ وسلم نے ہم سے دریافت فرمایا: ”تم نے اپنے پیچھے اہل خانہ کے لیے کیا چھوڑا ہے؟“ ہم نے آپ صلی اللہ علیہ وسلم کو اس بارے میں بتایا، اور نبی اکرم صلی اللہ علیہ وسلم بڑے مہربان اور نرم دل تھے۔ آپ صلی اللہ علیہ وسلم نے ارشاد فرمایا: ”تم اپنے گھر والوں کی طرف واپس چلے جاؤ، تم انہیں تعلیم دو، تم انہیں حکم دو اور اس طرح نماز ادا کرو جس طرح تم نے مجھے نماز ادا کرتے ہوئے دیکھا ہے، جب نماز کا وقت ہو جائے، تو تم میں سے کوئی ایک شخص اذان دے اور جو شخص تم میں سے عمر میں بڑا ہو وہ تمہاری امامت کرے۔“ [صحیح ابن حبان/كتاب الصلاة/حدیث: 1872]

اردو ترجمہ · UrduUnverified translation

ابوقلابہ بیان کرتے ہیں کہ انہوں نے سیدنا مالک بن حویرث رضی اللہ عنہ کو دیکھا، جب انہوں نے نماز ادا کی تو تکبیر کہی اور رفع یدین کیا، جب انہوں نے رکوع میں جانے کا ارادہ کیا تو رفع یدین کیا، اور جب رکوع سے سر اٹھایا تو رفع یدین کیا، انہوں نے یہ بات بیان کی کہ ”نبی اکرم صلی اللہ علیہ وسلم بھی اس طرح کیا کرتے تھے۔“ [صحیح ابن حبان/كتاب الصلاة/حدیث: 1873]

اردو ترجمہ · UrduUnverified translation

اسود بیان کرتے ہیں: میں اور علقمہ سیدنا عبداللہ بن مسعود رضی اللہ عنہ کی خدمت میں حاضر ہوئے۔ انہوں نے ہم سے دریافت کیا: کیا ان لوگوں نے نماز ادا کر لی ہے؟ ہم نے جواب دیا: جی نہیں، تو انہوں نے فرمایا: تم لوگ کھڑے ہو کر نماز ادا کرو۔ ہم اٹھ کر ان کے پیچھے کھڑے ہونے لگے، تو انہوں نے ہم دونوں میں سے ایک کو اپنے دائیں طرف کھڑا کر لیا اور دوسرے کو بائیں طرف کھڑا کر لیا، پھر انہوں نے اذان دیے بغیر اور اقامت کہے بغیر نماز ادا کی۔ نماز کے دوران جب وہ رکوع میں گئے، تو انہوں نے انگلیاں ایک دوسرے میں داخل کیں اور انہیں اپنے دونوں گھٹنوں کے درمیان رکھ لیا، جب انہوں نے نماز ادا کر لی، تو یہ بات بیان کی کہ میں نے نبی اکرم صلی اللہ علیہ وسلم کو اسی طرح نماز ادا کرتے ہوئے دیکھا ہے۔ آپ صلی اللہ علیہ وسلم نے ارشاد فرمایا تھا: ”اے لوگو! عنقریب تم پر ایسے حکمران مسلط ہوں گے، جو نماز کو فوت کر دیں گے وہ اس کا گلا یوں گھونٹیں گے جس طرح قریب المرگ شخص ہوتا ہے۔ تم میں سے جو شخص یہ صورت حال پائے وہ نماز کو اس کے مخصوص وقت میں ادا کر لے اور ان لوگوں کے ساتھ اپنی نماز کو نفل بنا لے۔“ (امام ابن حبان رحمہ اللہ فرماتے ہیں:) سیدنا عبداللہ بن مسعود رضی اللہ عنہ رکوع کے دوران انگلیاں ایک دوسرے میں داخل کیا کرتے تھے اور وہ اس بات کے قائل تھے کہ انہوں نے نبی اکرم صلی اللہ علیہ وسلم کو ایسا کرتے ہوئے دیکھا ہے۔ حالانکہ نبی اکرم صلی اللہ علیہ وسلم کے زمانے سے لے کر ہمارے آج کے دن تک تمام مسلمانوں کا اس بات پر اتفاق ہے کہ یہ فعل ابتدائے اسلام میں تھا اور پھر رکوع میں دونوں ہاتھ گھٹنوں پر رکھنے کے حکم نے اسے منسوخ کر دیا۔ تو جب سیدنا عبداللہ بن مسعود رضی اللہ عنہ جیسی شخصیت کے تمام تر علم و فضل اور زہد و تقویٰ اور ان کے دینی احکام پر بکثرت عمل پیرا ہونے اور نبی اکرم صلی اللہ علیہ وسلم کے پیچھے ان کے پہلی صف میں نماز ادا کرنے، کیونکہ وہ سمجھدار اور تجربہ کار افراد میں سے ایک تھے، اس سب کے باوجود ان سے یہ چیز مخفی کیسے رہ سکتی ہے جو تمام مسلمانوں کے اتفاق کے ساتھ منسوخ ہے یا پھر انہوں نے اسے دیکھا اور وہ اسے بھول گئے تو یہ بات بھی ممکن ہے کہ رکوع کے دوران انگلیاں ایک دوسرے میں داخل کرنے کی طرح رکوع کے وقت اور رکوع سے سر اٹھانے کے وقت نبی اکرم صلی اللہ علیہ وسلم کا رفع یدین کرنا، ان سے مخفی رہ گیا ہو یا انہوں نے اسے دیکھا ہو پھر وہ اسے بھول گئے ہوں۔ [صحیح ابن حبان/كتاب الصلاة/حدیث: 1874]

اردو ترجمہ · UrduUnverified translation

اسود بیان کرتے ہیں کہ میں اور علقمہ سیدنا عبداللہ بن مسعود رضی اللہ عنہ کی خدمت میں حاضر ہوئے، تو انہوں نے ہم سے فرمایا: ”تم لوگ اٹھو اور نماز ادا کر لو۔“ ہم اٹھ کر ان کے پیچھے کھڑے ہونے لگے، تو انہوں نے ہم میں سے ایک کو اپنے دائیں طرف کھڑا کر لیا اور دوسرے کو اپنے بائیں طرف کھڑا کر لیا۔ انہوں نے اذان دیے بغیر اور اقامت کہے بغیر ہمیں نماز پڑھائی، جب وہ رکوع میں گئے، تو انہوں نے اپنی انگلیاں ایک دوسرے میں داخل کیں اور انہیں دونوں گھٹنوں کے درمیان رکھ لیا۔ جب انہوں نے نماز ادا کر لی، تو یہ بات بیان کی: ”میں نے نبی اکرم صلی اللہ علیہ وسلم کو اسی طرح کرتے ہوئے دیکھا ہے۔“ [صحیح ابن حبان/كتاب الصلاة/حدیث: 1875]

اردو ترجمہ · UrduUnverified translation

محمد بن عمرو بیان کرتے ہیں: میں نے سیدنا ابوحمید ساعدی رضی اللہ عنہ کو دس صحابہ کرام رضی اللہ عنہم کی موجودگی میں، جن میں سے ایک سیدنا ابوقتادہ رضی اللہ عنہ بھی تھے، یہ بیان کرتے ہوئے سنا، سیدنا ابوحمید رضی اللہ عنہ نے فرمایا: ”میں نبی اکرم صلی اللہ علیہ وسلم کی نماز کے بارے میں آپ سب سے زیادہ علم رکھتا ہوں۔“ ان حضرات نے ان سے کہا: ”وہ کیوں؟ اللہ کی قسم! آپ نہ تو ہم سے زیادہ نبی اکرم صلی اللہ علیہ وسلم کے پیروکار ہیں اور نہ ہم سے زیادہ پرانے صحابی ہیں۔“ سیدنا ابوحمید رضی اللہ عنہ نے کہا: ”جی ہاں!“ ان حضرات نے کہا: ”پھر آپ پیش کیجئے!“ تو سیدنا ابوحمید رضی اللہ عنہ نے بتایا: ”جب نبی اکرم صلی اللہ علیہ وسلم نماز کے لیے کھڑے ہوتے تھے، تو آپ صلی اللہ علیہ وسلم تکبیر کہتے تھے اور دونوں ہاتھ کندھوں تک بلند کر لیتے تھے۔ آپ صلی اللہ علیہ وسلم اپنی ہر ہڈی کو اس کی مخصوص جگہ پر اعتدال کی حالت میں رکھتے تھے، پھر آپ صلی اللہ علیہ وسلم تلاوت کرتے تھے۔ پھر آپ صلی اللہ علیہ وسلم تکبیر کہتے تھے، پھر آپ صلی اللہ علیہ وسلم رفع یدین کرتے ہوئے دونوں ہاتھ کندھوں تک اٹھاتے تھے اور رکوع میں چلے جاتے تھے۔ آپ صلی اللہ علیہ وسلم اپنی دونوں ہتھیلیاں دونوں گھٹنوں پر رکھتے تھے، پھر آپ صلی اللہ علیہ وسلم اعتدال کی حالت میں رہتے تھے۔ آپ صلی اللہ علیہ وسلم اپنے سر کو نہ تو جھکاتے تھے اور نہ ہی اٹھاتے تھے، پھر آپ صلی اللہ علیہ وسلم اپنا سر اٹھاتے تھے اور «سَمِعَ اللّٰهُ لِمَنْ حَمِدَهُ» ”اللہ نے اس کی سن لی جس نے اس کی تعریف کی“ پڑھتے تھے، آپ صلی اللہ علیہ وسلم دونوں ہاتھ کندھوں تک اعتدال کی حالت میں بلند کرتے تھے، پھر تکبیر کہتے تھے، پھر آپ صلی اللہ علیہ وسلم زمین کی طرف جھک جاتے تھے اور دونوں بازو پہلو سے دور رکھتے تھے، پھر آپ صلی اللہ علیہ وسلم اپنا سر اٹھاتے تھے، آپ صلی اللہ علیہ وسلم اپنی بائیں ٹانگ کو بچھا لیتے تھے اور اس پر تشریف فرما ہو جاتے تھے، جب آپ صلی اللہ علیہ وسلم سجدے میں جاتے تھے، تو آپ صلی اللہ علیہ وسلم اپنے پاؤں کی انگلیوں کو کشادہ رکھتے تھے، پھر آپ صلی اللہ علیہ وسلم دوبارہ سجدے میں چلے جاتے تھے، پھر آپ صلی اللہ علیہ وسلم اپنا سر اٹھاتے تھے اور تکبیر کہتے تھے۔ آپ صلی اللہ علیہ وسلم اپنی بائیں ٹانگ کو بچھا کر اس پر تشریف فرما ہو جاتے تھے، یہاں تک کہ ہر ہڈی اپنی مخصوص جگہ پر اعتدال کی حالت میں آ جاتی تھی، پھر آپ صلی اللہ علیہ وسلم دوسری رکعت بھی اسی طرح ادا کرتے تھے۔ جب آپ صلی اللہ علیہ وسلم دو رکعات ادا کرنے کے بعد کھڑے ہوتے تھے، تو تکبیر کہتے تھے اور دونوں ہاتھ کندھوں تک بلند کرتے تھے جس طرح آپ صلی اللہ علیہ وسلم نے نماز کے آغاز میں کیا تھا، پھر آپ صلی اللہ علیہ وسلم بقیہ نماز اسی طریقے سے ادا کرتے تھے، یہاں تک کہ جب اس سجدے کے بعد والا قعدہ آتا جس میں سلام پھیرنا ہوتا تو آپ صلی اللہ علیہ وسلم اپنی بائیں ٹانگ کو پیچھے کر لیتے تھے اور بائیں پہلو کے بل تورک کے طور پر تشریف فرما ہو جاتے تھے۔“ ان حضرات (یعنی دیگر صحابہ کرام رضی اللہ عنہم) نے فرمایا: ”نبی اکرم صلی اللہ علیہ وسلم اسی طرح نماز ادا کیا کرتے تھے۔“ [صحیح ابن حبان/كتاب الصلاة/حدیث: 1876]

اردو ترجمہ · UrduUnverified translation

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کے بارے میں یہ بات نقل کرتے ہیں: ”جب آپ نماز شروع کرتے تھے، تو آپ رفع یدین کرتے تھے، جب آپ رکوع میں جانے کا ارادہ کرتے تھے، جب رکوع سے سر اٹھاتے تھے اور جب دو رکعات ادا کرنے کے بعد کھڑے ہوتے تھے، تو آپ ان تمام مقامات پر دونوں ہاتھ کندھوں تک بلند کیا کرتے تھے۔“ [صحیح ابن حبان/كتاب الصلاة/حدیث: 1877]

اردو ترجمہ · UrduUnverified translation

سیدنا جابر بن سمرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمارے پاس تشریف لائے، اس دوران کچھ لوگوں نے نماز کے دوران رفع یدین کیا، تو آپ صلی اللہ علیہ وسلم نے ارشاد فرمایا: ”کیا وجہ ہے کہ میں تمہیں دیکھ رہا ہوں، تم اپنے ہاتھ یوں بلند کر رہے ہو، جس طرح وہ سرکش گھوڑوں کی دمیں ہوتی ہیں، تم لوگ نماز کے دوران سکون کی حالت میں رہا کرو۔“ [صحیح ابن حبان/كتاب الصلاة/حدیث: 1878]

اردو ترجمہ · UrduUnverified translation

سیدنا جابر بن سمرہ رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں، آپ مسجد میں تشریف لائے، تو آپ نے کچھ لوگوں کو رفع یدین کرتے ہوئے دیکھا تو آپ نے ارشاد فرمایا: ”ان لوگوں نے ہاتھ یوں اٹھائے ہیں جس طرح وہ سرکش گھوڑوں کی دمیں ہوتی ہیں، تم لوگ نماز کے دوران سکون کی حالت میں رہا کرو۔“ [صحیح ابن حبان/كتاب الصلاة/حدیث: 1879]

اردو ترجمہ · UrduUnverified translation

سیدنا جابر بن سمرہ رضی اللہ عنہ بیان کرتے ہیں کہ ہم جب نبی اکرم صلی اللہ علیہ وسلم کے پیچھے نماز ادا کرتے تھے، تو ہم اپنے ہاتھ کے ذریعے (اشارہ کرتے ہوئے) دائیں طرف اور بائیں طرف «السَّلَامُ عَلَيْكُمْ» ”تم پر سلامتی ہو“ کہتے تھے، تو نبی اکرم صلی اللہ علیہ وسلم نے ارشاد فرمایا: ”کیا وجہ ہے، میں دیکھ رہا ہوں، تمہارے ہاتھ سرکش گھوڑوں کی دم کی مانند ہیں، تم میں سے ہر ایک کے لیے اتنا کافی ہے، وہ اپنے دونوں ہاتھ اپنے زانوں پر رکھے اور پھر دائیں طرف اور بائیں طرف سلام پھیر دے۔“ [صحیح ابن حبان/كتاب الصلاة/حدیث: 1880]

اردو ترجمہ · UrduUnverified translation

سیدنا جابر بن سمرہ رضی اللہ عنہ بیان کرتے ہیں: ہم پہلے، جب نبی اکرم صلی اللہ علیہ وسلم کی اقتدا میں نماز ادا کیا کرتے تھے، تو ہم میں سے کوئی ایک شخص دائیں طرف اور بائیں طرف (سلام پھیرتے ہوئے) اپنا ہاتھ بلند کرتا تھا، تو نبی اکرم صلی اللہ علیہ وسلم نے ارشاد فرمایا: ”کیا وجہ ہے، میں تمہیں یوں ہاتھ اٹھاتے ہوئے دیکھتا ہوں، جس طرح وہ سرکش گھوڑوں کی دمیں ہوتی ہیں؟ کیا تم میں سے کسی ایک کے لیے یہ کافی نہیں ہے کہ وہ اپنا ہاتھ اپنے زانو پر رکھے اور پھر اپنے دائیں طرف موجود شخص اور بائیں طرف موجود شخص کو سلام کرے۔“ [صحیح ابن حبان/كتاب الصلاة/حدیث: 1881]

اردو ترجمہ · UrduUnverified translation

مصعب بن سعد رحمہ اللہ بیان کرتے ہیں: میں نے اپنے والد (سعد بن ابی وقاص رضی اللہ عنہ) کے پہلو میں نماز ادا کی، میں نے اپنی دونوں ہتھیلیوں کے درمیان «التَّطْبِيقُ» ”تطبیق“ دی، پھر میں نے انہیں اپنے دونوں زانوں کے درمیان رکھ لیا تو میرے والد نے مجھے اس سے منع کیا اور فرمایا: ”ہم پہلے ایسا کیا کرتے تھے، پھر ہمیں اس سے منع کر دیا گیا اور ہمیں یہ حکم دیا گیا کہ ہم (اپنے ہاتھ) گھٹنوں پر رکھیں۔“ [صحیح ابن حبان/كتاب الصلاة/حدیث: 1882]

اردو ترجمہ · UrduUnverified translation

مصعب بن سعد بن ابی وقاص رحمہ اللہ بیان کرتے ہیں: میں جب نماز ادا کرتا تھا تو میں «التَّطْبِیقُ» ”تطبیق“ کیا کرتا تھا اور اپنے دونوں ہاتھ دونوں گھٹنوں کے درمیان رکھا کرتا تھا۔ میرے والد سیدنا سعد رضی اللہ عنہ نے مجھے (ایسا کرتے ہوئے) دیکھا تو ارشاد فرمایا: پہلے ہم اس طرح کیا کرتے تھے، پھر ہمیں اس سے منع کر دیا گیا، اور ہمیں گھٹنوں (پر ہاتھ رکھنے کا) حکم دیا گیا۔ [صحیح ابن حبان/كتاب الصلاة/حدیث: 1883]

اردو ترجمہ · UrduUnverified translation

سیدنا براء بن عازب رضی اللہ عنہما بیان کرتے ہیں کہ نبی اکرم صلی اللہ علیہ وسلم کا رکوع، آپ کا رکوع کے بعد سر کو اٹھانا، آپ کا سجدہ کرنا اور آپ کا دونوں سجدوں کے درمیان بیٹھنا تقریباً ایک جتنا ہوتا تھا۔ [صحیح ابن حبان/كتاب الصلاة/حدیث: 1884]

اردو ترجمہ · UrduUnverified translation

ثابت بیان کرتے ہیں کہ سیدنا انس بن مالک رضی اللہ عنہ نے ہم سے فرمایا: ”میں اس حوالے سے کوئی کوتاہی نہیں کروں گا، میں تمہیں اسی طرح نماز پڑھاؤں جس طرح میں نے نبی اکرم صلی اللہ علیہ وسلم کو ہمیں نماز پڑھاتے ہوئے دیکھا ہے“۔ ثابت بیان کرتے ہیں کہ میں نے سیدنا انس بن مالک رضی اللہ عنہ کو دیکھا ہے، وہ کچھ ایسا کیا کرتے تھے جو میں تمہیں کرتے ہوئے نہیں دیکھتا؛ جب وہ رکوع سے سر اٹھانے کے بعد کھڑے ہوتے تھے، تو کہنے والا یہ کہہ سکتا تھا کہ شاید یہ (سجدے میں جانا) بھول گئے ہیں، اور جب وہ پہلے سجدے سے سر اٹھا کر بیٹھتے تھے، تو کہنے والا یہ کہہ سکتا تھا کہ یہ (دوسرے سجدے میں جانا) بھول گئے ہیں۔ [صحیح ابن حبان/كتاب الصلاة/حدیث: 1885]

اردو ترجمہ · UrduUnverified translation

شریک بن ابونمر بیان کرتے ہیں کہ انہوں نے سیدنا انس بن مالک رضی اللہ عنہ کو یہ کہتے ہوئے سنا: میں نے کسی ایسے شخص کے پیچھے نماز ادا نہیں کی جو نبی اکرم صلی اللہ علیہ وسلم سے زیادہ مختصر اور آپ سے زیادہ مکمل نماز ادا کرتا ہو۔ بعض اوقات نبی اکرم صلی اللہ علیہ وسلم اپنے پیچھے کسی بچے کے رونے کی آواز سنتے تھے، تو آپ نماز کو مختصر کر دیتے تھے، اس اندیشے کے تحت کہ کہیں اس بچے کی والدہ آزمائش کا شکار نہ ہو جائے۔ [صحیح ابن حبان/كتاب الصلاة/حدیث: 1886]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ انصار سے تعلق رکھنے والا ایک شخص نبی اکرم صلی اللہ علیہ وسلم کی خدمت میں حاضر ہوا۔ اس نے عرض کی: یا رسول اللہ صلی اللہ علیہ وسلم ! کچھ کلمات ہیں، جن کے بارے میں، میں دریافت کرنا چاہتا ہوں۔ نبی اکرم صلی اللہ علیہ وسلم نے فرمایا: ”تم بیٹھ جاؤ۔“ پھر ثقیف قبیلے سے تعلق رکھنے والا ایک شخص آیا اس نے عرض کی: یا رسول اللہ صلی اللہ علیہ وسلم ! کچھ کلمات ہیں، جن کے بارے میں، میں جاننا چاہتا ہوں۔ نبی اکرم صلی اللہ علیہ وسلم نے فرمایا: ”انصاری شخص تم سے سبقت لے گیا ہے۔“ انصاری نے کہا: یہ شخص مسافر ہے اور مسافر کا حق ہوتا ہے آپ اس سے آغاز کیجیے، تو نبی اکرم صلی اللہ علیہ وسلم ثقفی شخص کی طرف متوجہ ہوئے اور ارشاد فرمایا: ”اگر تم چاہو تو میں تمہیں اس چیز کے بارے میں بتا دیتا ہوں، جس کے بارے میں تم دریافت کرنا چاہتے تھے اور اگر تم چاہو تو تم مجھ سے پوچھ لو میں تمہیں بتا دیتا ہوں۔“ اس شخص نے عرض کی: یا رسول اللہ صلی اللہ علیہ وسلم ! آپ مجھے اس چیز کے بارے میں بتائیے جس کے بارے میں، میں آپ سے دریافت کرنا چاہتا تھا۔ نبی اکرم صلی اللہ علیہ وسلم نے ارشاد فرمایا: ”تم مجھ سے رکوع و سجود، نماز اور روزے کے بارے میں دریافت کرنے کے لیے آئے تھے؟“ تو اس نے کہا: جی ہاں! اس ذات کی قسم جس نے آپ کو حق کے ہمراہ مبعوث کیا ہے، میرے ذہن میں جو تھا آپ نے اس کے بارے میں کوئی غلطی نہیں کی ہے۔ نبی اکرم صلی اللہ علیہ وسلم نے ارشاد فرمایا: ”جب تم رکوع میں جاؤ تو اپنی دونوں ہتھیلیاں اپنے گھٹنوں پر رکھ لو، تم اپنی انگلیوں کے درمیان کشادگی رکھو اور تم اتنی دیر وہاں ٹھہرے رہو کہ ہر عضو اپنی جگہ پر آ جائے۔ جب تم سجدے میں جاؤ تو اپنی پیشانی کو جما کر رکھو، تم ٹھونگ نہ مارو، تم دن کے ابتدائی حصے اور اس کے آخری حصے میں نماز ادا کرو۔“ اس نے عرض کی: اے اللہ کے نبی! اگر میں ان دونوں کے درمیان میں نماز ادا کر لیتا ہوں؟ تو نبی اکرم صلی اللہ علیہ وسلم نے ارشاد فرمایا: ”پھر تم نمازی ہو گئے۔ تم ہر مہینے میں تیرہ، چودہ اور پندرہ تاریخ کو روزے رکھو۔“ تو وہ ثقفی شخص کھڑا ہوا پھر نبی اکرم صلی اللہ علیہ وسلم اس انصاری کی طرف متوجہ ہوئے۔ آپ صلی اللہ علیہ وسلم نے ارشاد فرمایا: ”اگر تم چاہو تو میں تمہیں اس چیز کے بارے میں بتا دیتا ہوں، جس کے بارے میں دریافت کرنے کے لیے تم آئے ہو اور اگر تم چاہو تو تم مجھ سے سوال کرو اور میں تمہیں خبر دوں گا۔“ اس نے عرض کی: جی نہیں! اے اللہ کے نبی! آپ مجھے اس چیز کے بارے میں بتا دیجیے جس کے بارے میں، میں آپ سے دریافت کرنا چاہتا تھا۔ نبی اکرم صلی اللہ علیہ وسلم نے فرمایا: ”تم مجھ سے حاجی کے بارے میں دریافت کرنے کے لیے آئے تھے، جب وہ اپنے گھر سے نکلتا ہے، تو اس کے کیا احکام ہوتے ہیں، جب وہ عرفات میں قیام کرتا ہے، تو اس کے کیا احکام ہوتے ہیں، جب وہ جمرات کو کنکریاں مارتا ہے، تو اس کے کیا احکام ہوتے ہیں، جب وہ اپنے سر کو منڈواتا ہے، تو اس کے کیا احکام ہوتے ہیں اور جب وہ آخر میں بیت اللہ کا طواف کرتا ہے، تو اس کے کیا احکام ہوتے ہیں۔“ اس شخص نے عرض کی: اے اللہ کے نبی! اس ذات کی قسم جس نے آپ کو حق کے ہمراہ مبعوث کیا ہے، جو چیز میرے ذہن میں تھی اس کے بارے میں آپ نے کوئی غلطی نہیں کی ہے۔ نبی اکرم صلی اللہ علیہ وسلم نے ارشاد فرمایا: ”اس شخص کے لیے حکم یہ ہے، جب وہ اپنے گھر سے نکلتا ہے، تو اس کی سواری جو بھی قدم اٹھاتی ہے اس کے بدلے میں اس شخص کو نیکی ملتی ہے یا اس کے کسی گناہ کو مٹا دیا جاتا ہے، جب وہ حاجی عرفہ میں وقوف کرتا ہے، تو اللہ تعالیٰ آسمانِ دنیا کی طرف نزول کرتا ہے اور ارشاد فرماتا ہے: ”میرے ان بکھرے ہوئے بالوں اور غبار آلود (اجسام) والے بندوں کو دیکھو، تم لوگ گواہ ہو جاؤ، میں نے ان کے گناہوں کی مغفرت کر دی ہے۔“ اگرچہ وہ آسمان (یعنی بارش) کے قطروں کے برابر ہوں اور ریت کے ذروں کے برابر ہوں، جب حاجی جمرات کو کنکریاں مارتا ہے تو کوئی شخص یہ نہیں جان سکتا کہ اسے کیا اجر و ثواب ملے گا، یہاں تک کہ قیامت کے دن اس کا اجر و ثواب مکمل طور پر اسے دیا جائے گا، جب وہ اپنے سر کو منڈواتا ہے، تو اس کے سر سے گرنے والے ہر ایک بال کے عوض میں قیامت کے دن اسے نور نصیب ہوگا اور جب وہ بیت اللہ کا آخری طواف کرتا ہے، تو وہ اپنے گناہوں سے یوں باہر آ جاتا ہے جیسے اس دن تھا جب اس کی والدہ نے اسے جنم دیا تھا۔“ [صحیح ابن حبان/كتاب الصلاة/حدیث: 1887]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”لوگوں میں سب سے برا چور وہ ہے، جو اپنی نماز کی چوری کرتا ہے۔“ انہوں نے عرض کی: وہ اپنی نماز کی کیسے چوری کرتا ہے؟ نبی اکرم صلی اللہ علیہ وسلم نے ارشاد فرمایا: ”وہ اس کے رکوع اور اس کے سجود کو مکمل ادا نہیں کرتا۔“ [صحیح ابن حبان/كتاب الصلاة/حدیث: 1888]