اردو ترجمہ · Urdu

ام المومنین سیدہ عائشہ رضی اللہ عنہا سے روایت ہے کہ بے شک ام المومنین سیدہ صفیہ بنت حیی رضی اللہ عنہا حیض میں مبتلا ہو گئیں ، چنانچہ میں نے نبی کریم ﷺ کے حضور اس کا تذکرہ کیا ، تو آپ ﷺ نے فرمایا :’’ کیا وہ ہمیں روکنے والی ہیں ؟‘‘ تو آپ ﷺ کو بتایا گیا کہ یقیناً وہ طواف افاضہ کر چکی ہیں تو آپ ﷺ نے فرمایا :’’ تو پھر ( رُکنے کی کوئی بات ) نہیں ۔‘‘

اردو ترجمہ · Urdu

اُمّ المومنین سیدہ عائشہ رضی اللہ عنہا سے روایت ہے ، انھوں نے رسول اللہ ﷺ سے عرض کیا کہ اے اللہ کے رسول ! یقیناً سیدہ صفیہ بنت حیی رضی اللہ عنہا کو حیض آ گیا ہے تو رسول اللہ ﷺ نے فرمایا :’’ شاید کہ وہ ہمیں روک دے ، کیا اس نے تمھارے ساتھ بیت اللہ کا طواف ( افاضہ ) نہیں کیا ؟‘‘ عورتوں نے جواب دیا کہ کیوں نہیں ( وہ طوافِ افاضہ کر چکی ہیں ) تو آپ ﷺ نے فرمایا :’’ پھر نکل پڑو ۔‘‘

اردو ترجمہ · Urdu

عمرہ بنت عبدالرحمن رحمہ اللہ سے روایت ہے کہ بے شک اُم المومنین سیدہ عائشہ رضی اللہ عنہا جب حج کرتیں اور ان کے ساتھ عورتیں ہوتیں ، ( پھر اگر ) انھیں خطرہ ہوتا کہ اُن کو حیض شروع ہو جائے گا تو انھیں یوم نحر 10 ذوالحج کو ( باقی لوگوں سے ) پہلے ہی ( مکہ کی طرف ) بھیج دیتیں ، چنانچہ وہ ( حیض شروع ہونے سے پہلے پہلے طواف افاضہ کر لیتیں ، پھر اگر اس کے بعد ان کو حیض شروع ہو جاتا تو وہ ان ) ( کے حیض رُکنے ) کا انتظار نہ کرتیں اور ان کو لے کر ( مدینہ کی طرف ) چل پڑتیں ، اس حال میں کہ وہ حیض میں مبتلا ہوتی تھیں ، ( اور یہ روانگی تبھی ہوتی تھی ) جب کہ وہ عورتیں طواف افاضہ کر چکی ہوتیں ۔

اردو ترجمہ · Urdu

اُم المومنین سیدہ عائشہ رضی اللہ عنہا سے روایت ہے کہ یقیناً رسول اللہ ﷺ نے سیدہ صفیہ رضی اللہ عنہا کا تذکرہ فرمایا ، تو آپ ﷺ کو بتایا گیا کہ بے شک وہ تو حیض سے ہیں تو رسول اللہ ﷺ نے فرمایا :’’ ممکن ہے کہ وہ ہمیں ( روانگی سے ) روک دے ۔‘‘ تو گھر والوں نے بتایا کہ بلاشبہ وہ طواف افاضہ کر چکی ہیں تو رسول اللہ ﷺ نے فرمایا :’’ پھر ( ہم ) نہیں ( رکیں گے ) ۔‘‘

اردو ترجمہ · Urdu

عروہ رحمہ اللہ سے روایت ہے کہ سیدہ عائشہ رضی اللہ عنہا نے فرمایا ، عروہ رحمہ اللہ کہتے ہیں اس حال میں کہ ہم ( آپس میں ) اس ( مسئلے ) کا تذکرہ کر رہے تھے ( کہ کیا عورت طواف الوداع کے لیے انتظار کرے گی یا نہیں ؟ تو سیدہ عائشہ رضی اللہ عنہا نے فرمایا : ) تو پھر لوگ اپنی عورتوں کو ( حیض کی آمد کے خطرے کے پیش نظر 10 ذوالحج کو عام لوگوں سے ) پہلے ہی کیوں آگے ( مکہ کی طرف طواف افاضہ کے لیے ) بھیج دیتے ہیں ؟ اگر یہ عمل ان عورتوں کو نفع نہیں دیتا ( تو پھر لوگ ایسا کیوں کرتے ہیں ؟ ) اور اگر وہی بات ہوتی جو یہ ( چند ) لوگ کہہ رہے ہیں ( کہ طواف الوداع کیے بغیر عورتیں نہیں جا سکتیں ) تو پھر چھ ہزار سے زائد حیض والی عورتیں منیٰ میں پڑی رہتیں جو سب کی سب طواف افاضہ بھی کر چکی ہوتیں ۔

اردو ترجمہ · Urdu

ابوسلمہ بن عبدالرحمن رحمہ اللہ سے روایت ہے کہ حضرت اُمِّ سلیم بنت مِلحان رضی اللہ عنہا نے رسول اللہ ﷺ سے فتویٰ پوچھا ، اس حال میں کہ یوم نحر 10 ذوالحج کو طواف افاضہ کر لینے کے بعد انھیں حیض شروع ہو گیا تھا ، یا اُن کے ہاں ولادت ہو گئی تھی ( اور نفاس کا خون آنے لگا تھا اور خون حیض اور خون نفاس مسجد میں جا کر طواف الوداع کرنے میں رکاوٹ تھے ) تو رسول اللہ ﷺ نے انھیں اجازت دے دی ( کہ بغیر طواف الوداع کے وہ واپس جا سکتی ہیں ) ، چنانچہ وہ ( مدینہ کی طرف ) نکل کھڑی ہوئیں ۔