اردو ترجمہ · Urdu

امام مالک رحمہ اللہ کو یہ خبر پہنچی کہ بے شک حضرت عمر بن خطاب رضی اللہ عنہ اور حضرت علی بن ابی طالب رضی اللہ عنہ اور حضرت ابوہریرہ رضی اللہ عنہ سے اس شخص کے متعلق سوال کیا گیا جو حالت احرام میں اپنی بیوی سے ہم بستری کر لیتا ہے تو سب نے فرمایا : وہ دونوں ( خاوند اور بیوی ) اپنے مقصود کے لیے جاری رہیں ، یہاں تک کہ وہ اپنا حج پورا کر لیں ، پھر ان دونوں پر آئندہ سال حج اور ہدی لازم ہے ، امام مالک رحمہ اللہ فرماتے ہیں کہ حضرت علی بن ابی طالب رضی اللہ عنہ نے یہ بھی فرمایا کہ جب وہ آئندہ سال حج کا احرام باندھیں گے تو جدا جدا رہیں گے یہاں تک کہ اپنا حج مکمل کر لیں ۔

اردو ترجمہ · Urdu

یحیی بن سعید رحمہ اللہ سے روایت ہے کہ انھوں نے سعید بن مسیب رحمہ اللہ کو یہ فرماتے ہوئے سنا : تمھارا اس شخص کے متعلق کیا خیال ہے جو محرم ہونے کی حالت میں اپنی بیوی سے مباشرت کر لے تو لوگوں ( شاگردوں ) نے انھیں کوئی جواب نہ دیا ، پھر سعید بن مسیب رحمہ اللہ نے فرمایا : بے شک ایک شخص نے اپنی بیوی کے ساتھ حالت احرام میں صحبت کر لی ، پھر اس نے مدینہ منورہ میں ( کسی کو ) بھیجا کہ وہ اس مسئلے کے متعلق ( وہاں کے علمائے کرام سے ) پوچھ کر آئے ، تو ( ان علماء ) لوگوں میں سے کسی نے یہ جواب دیا تھا کہ ان دونوں میں آئندہ سال تک جدائی ڈال دی جائے گی ، ( لیکن چونکہ یہ جواب درست نہ تھا اس لیے اس کا ردّ کرتے ہوئے ) سعید بن مسیب رحمہ اللہ نے فرمایا : وہ دونوں اپنے ( حج والے ) کام میں جاری رہیں اور اس حج کو پورا کریں جسے انھوں نے فاسد کر دیا ہے ، پھر جب وہ فارغ ہوں تو واپس لوٹ جائیں ، پھر اگر ان کو ( زندگی میں ) آئندہ حج پا لے تو ان پر حج کرنا اور ہدی ( قربان کرنا ) لازم ہے اور وہ وہیں سے احرام باندھیں گے جہاں سے انھوں نے اس حج کا احرام باندھا تھا جسے وہ ( پچھلے سال ) فاسد کر چکے ، اور وہ دونوں جدا جدا رہیں گے یہاں تک کہ اپنا حج مکمل کر لیں ۔