اردو ترجمہ · Urdu

ہشام بن عروہ رحمہ اللہ اپنے والد ( عروہ رحمہ اللہ ) سے روایت کرتے ہیں ، انھوں نے کہا کہ میں نے ( اپنی خالہ ) اُم المؤمنین سیدہ عائشہ رضی اللہ عنہا سے پوچھا ، اس حال میں کہ میں ان دنوں نو عمر ہی تھا ، ( میں نے کہا کہ ) مجھے اس فرمان الٰہی کے متعلق بتائیے : { اِنَّ الصَّفَا وَ الْمَرْوَۃَ مِنْ شَعَآئِرِ اللّٰہِ فَمَنْ حَجَّ الْبَیْتَ اَوِاعْتَمَرَ فَــلَا جُنَاحَ عَلَیْہِ اَنْ یَّطَّوَّفَ بِہِمَا } ( البقرۃ 2 : 158 ) ’’ بے شک صفا و مروہ اللہ کی نشانیوں میں سے ہیں ، پس جو شخص بیت اللہ کا حج یا عمرہ کرے تو اس پر کوئی گناہ نہیں کہ وہ ان دونوں کا طواف کرے ۔‘‘ ( یعنی ان دونوں کے درمیان سعی کے چکر لگائے … تو کیا اس سے یہ بھی ثابت ہوتا ہے کہ ) آدمی پر اس میں ( بھی ) کچھ گناہ نہیں ہو گا کہ ان دونوں کے درمیان چکر نہ لگائے ، تو سیدہ عائشہ رضی اللہ عنہا نے فرمایا : ہرگز نہیں ، اگر اس کا مفہوم اس طرح ہوتا جیسا کہ تو کہہ رہا ہے تو آیت یوں ہوتی : (( فَلَا جُنَاحَ عَلَیْہِ اَنْ لَّایَطَّوَّفَ بِھِمَا )) ’’ اس پر کوئی گناہ نہ ہو گا اس میں کہ وہ ان دونوں کے درمیان چکر نہ لگائے ۔‘‘ ( دراصل بات یہ ہے کہ ) بلاشبہ یہ آیت تو صرف اور صرف انصار کے متعلق نازل ہوئی تھی جو ( اسلام سے قبل ) مَنَاۃ بت کے نام کا احرام باندھتے ( اور اس کا حج کرتے تھے ) اور مناۃ بت قُدید جگہ کے سامنے تھا اور وہ ( انصار دورِ جاہلیت میں ) صفا و مروہ کے درمیان چکر لگانے میں حرج ( اور گناہ ) محسوس کرتے تھے ، چنانچہ جب اسلام آیا تو انھوں نے رسول اللہ ﷺ سے اس کے متعلق سوال کیا تو اللہ تبارک و تعالیٰ نے یہ آیت نازل فرما دی : { اِنَّ الصَّفَا وَ الْمَرْوَۃَ مِنْ شَعَآئِرِ اللّٰہِ فَمَنْ حَجَّ الْبَیْتَ اَوِاعْتَمَرَ فَــلَا جُنَاحَ عَلَیْہِ اَنْ یَّطَّوَّفَ بِہِمَا } ( البقرۃ 2 : 158 )

اردو ترجمہ · Urdu

ہشام بن عروہ رحمہ اللہ سے روایت ہے کہ حضرت عبداللہ بن عمر رضی اللہ عنہ کی بیٹی ’’ سودہ رحمہ اللہ ‘‘ ( میرے والد ) عروہ بن زبیر رحمہ اللہ کے نکاح میں تھیں ، وہ حج یا عمرہ میں صفا و مروہ کے درمیان میں پیدل چکر لگانے کے لیے نکلیں ، وہ بھاری بدن والی عورت تھیں ، چنانچہ وہ ( سعی کے لیے اس وقت ) آئیں جب لوگ نماز عشاء سے فارغ ہوئے ، پھر وہ اپنے ( سعی والے ) یہ چکر پورے نہ کر پائیں یہاں تک کہ فجر کی پہلی اذان ہو گئی ، یوں انھوں نے نماز عشاء سے لے کر اذان فجر تک کے درمیان میں اپنی سعی کو پورا کیا ( بھاری بدن اور پیدل چلنے کی دشواری کے باوجود ان کے خاوند عروہ رحمہ اللہ نے انھیں سواری کی اجازت نہ دی ) اور عروہ رحمہ اللہ جب لوگوں کو دیکھتے کہ وہ جانوروں پر سعی کر رہے ہیں تو وہ انھیں بہت سختی سے منع کرتے تو وہ ( لوگ ) ان سے حیا کرتے ہوئے بیماری کا عذر پیش کرتے تو عروہ رحمہ اللہ ہمارے اور اپنے درمیان ( بات کو خاص رکھتے ہوئے اور خاص ہم ہی کو مخاطب کرتے ہوئے ) ہم سے کہتے کہ یقیناً یہ لوگ ناکام ہو گئے اور گھاٹے میں رہے ۔

اردو ترجمہ · Urdu

حضرت جابر بن عبداللہ رضی اللہ عنہ سے روایت ہے کہ بلاشبہ رسول اللہ ﷺ جب صفا و مروہ کے درمیان ( پہاڑی سے ) اُترنے لگتے تو پیدل ( معمول کے مطابق ) چلتے یہاں تک کہ جب آپ ﷺ کے مبارک قدم وادی کے نشیب میں پڑتے تو آپ ﷺ دوڑنے لگتے ، یہاں تک کہ اس وادی سے نکل جاتے ( اور دوسری پہاڑی پر چڑھنے لگتے تو پھر پیدل چلنے لگتے ) ۔