اردو ترجمہ · Urdu

حضرت جابر بن عبداللہ رضی اللہ عنہ سے روایت ہے ، کہتے ہیں کہ میں نے رسول اللہ ﷺ کو یہ فرماتے ہوئے سنا ، جس وقت کہ آپ ﷺ مسجد حرام سے نکل رہے تھے اور صفا پہاڑی کا ارادہ کر رہے تھے ، آپ فرما رہے تھے :’’ ہم ( عمل کرتے وقت ) اسی چیز کے ساتھ آغاز کریں گے جس کے ساتھ اللہ تعالیٰ نے ( تذکرہ کرنے میں ) آغاز کیا ہے ، چنانچہ آپ ﷺ نے صفا پہاڑی کے ساتھ ( اپنی سعی کا ) آغاز فرمایا ۔

اردو ترجمہ · Urdu

حضرت جابر بن عبداللہ رضی اللہ عنہ سے روایت ہے کہ بلاشبہ رسول اللہ ﷺ جب صفا پر کھڑے ہوتے تو تین بار اللہ اکبر کہتے اور فرماتے : (( لَا اِلٰہَ اللّٰہُ وَحْدَہٗ لَا شَرِیْکَ لَہٗ لَہُ الْمُلْکُ وَلَہُ الْحَمْدُ وَھُوَ عَلٰی کُلِّ شَیْ ئٍ قَدِیْرٌ )) ’’ اللہ کے سوا کوئی معبود برحق نہیں ، وہ یکتا ہے ، اس کا کوئی شریک نہیں ، اسی کے لیے بادشاہت ہے اور اسی کے لیے سب حمد ہے اور وہ ہر چیز پر خوب قدرت رکھنے والا ہے ۔‘‘ آپ ﷺ تین بار یہی ( عمل ) کرتے اور دعا مانگتے اور مروہ پہاڑی پر بھی اسی طرح ہی کرتے ۔

اردو ترجمہ · Urdu

نافع رحمہ اللہ سے روایت ہے ، انھوں نے حضرت عبداللہ بن عمر رضی اللہ عنہ کو سنا ، اس حال میں کہ وہ صفا پر تھے ، اور یہ کہتے رہے تھے : اے اللہ ! یقیناً تو نے فرمایا : { اُدْعُوْنِیْ اَسْتَجِبْ لَکُمْ } ( المؤمن 40 : 60 ) ’’ تم مجھے پکارو ، میں تمھاری دعائیں قبول کروں گا ۔‘‘ اور بلاشبہ تو وعدے کی خلاف ورزی نہیں کرتا اور بے شک میں تجھ سے یہ سوال کرتا ہوں کہ جیسے تو نے مجھے اسلام کی طرف ہدایت عطا فرمائی ہے ، اسی طرح اسے ( یعنی اسلام کو موت تک باقی رکھنا ) مجھ سے نکال نہ لینا ، یہاں تک کہ تو مجھے اس حال میں فوت کرے کہ میں مسلمان ہی ہوں ۔