اردو ترجمہ · Urdu

سیدہ اُم سلمہ رضی اللہ عنہ زوجہ رسول ﷺ سے روایت ہے ، انھوں نے کہا کہ میں نے رسول اللہ ﷺ کے حضور یہ شکایت کی کہ بے شک میں بیمار ہوں تو آپ ﷺ نے فرمایا :’’ لوگوں کے پیچھے سے اس حال میں طواف کر لے کہ تُو سوار ہو ۔‘‘ وہ کہتی ہیں کہ پھر میں نے ( سواری پر بیٹھ کر ) طواف کیا اور رسول اللہ ﷺ اس وقت بیت اللہ کے ایک جانب نماز پڑھ رہے تھے اور آپ ﷺ سورۃ وَالطُّوْرِ وَ کِتَابٍ مَّسْطُوْرٍ کی تلاوت فرما رہے تھے ۔

اردو ترجمہ · Urdu

حضرت ابو ماعز اسلمی عبداللہ بن سفیان رضی اللہ عنہ سے روایت ہے کہ بلاشبہ وہ حضرت عبداللہ بن عمر رضی اللہ عنہ کے ہمراہ بیٹھے ہوئے تھے ، ( اتنے میں ) اُن کے پاس ایک عورت آئی ، وہ آپ سے فتوی لینا چاہتی تھی ، چنانچہ وہ کہنے لگی کہ بے شک میں ( حرم کعبہ کی طرف ) متوجہ ہوئی ، میرا ارادہ تھا کہ بیت اللہ کا طواف کروں ، یہاں تک کہ جب میں مسجد کے دروازے کے پاس پہنچی تو مجھے کافی زیادہ خون آنا شروع ہو گیا ، میں واپس لوٹ گئی ، یہاں تک کہ وہ خون مجھ سے ختم ہو گیا ، میں پھر متوجہ ہوئی یہاں تک کہ جب میں مسجد کے دروازے کے پاس آئی تو مجھے کافی خون آنے لگا ، میں پھر لوٹ گئی یہاں تک کہ وہ خون مجھ سے چلا گیا ، میں نے پھر ( مسجد کا ) رخ کیا یہاں تک کہ جب میں مسجد کے دروازے کے قریب ہوئی تو پھر مجھے بہت خون آنے لگا ، ( اب میں کیا کروں ؟ ) تو حضرت عبداللہ بن عمر رضی اللہ عنہ فرمانے لگے کہ یقیناً یہ تو شیطان کی ٹھوکر ہے ، لہٰذا تم غسل کر لو ، پھر کپڑے کے ساتھ لنگوٹ باندھ لو ، پھر طواف کر لو ۔

اردو ترجمہ · Urdu

امام مالک رحمہ اللہ کو یہ خبر پہنچی کہ حضرت سعد بن ابی وقاص رضی اللہ عنہ جب مکہ میں اس حال میں آتے کہ ( 9 ذوالحج کا دن ختم ہو رہا ہوتا اور ) انھیں وقوف عرفہ کے فوت ہو جانے کا اندیشہ ہوتا تو وہ ( سیدھے ) عرفات کی طرف نکل جاتے ، پہلے اس لیے کہ بیت اللہ کا طواف اور صفا و مروہ کے درمیان سعی کریں ، پھر وہ ( عرفات سے ) واپس آنے کے بعد ہی طواف کرتے ۔