اردو ترجمہ · Urdu

سلیمان بن یسار رحمہ اللہ سے روایت ہے کہ رسول اللہ ﷺ نے ( اپنے آزاد کردہ غلام ) حضرت ابو رافع رضی اللہ عنہ اور ایک انصاری شخص کو بھیجا چنانچہ اُن دونوں نے سیدہ میمونہ بنت حارث رضی اللہ عنہا سے آپ ﷺ کی شادی کر دی ، اس حال میں کہ رسول اللہ ﷺ ( عمرۃ القضاء 7 ھ کے لیے ) نکلنے سے پہلے ابھی مدینہ منورہ ہی میں تھے ۔

اردو ترجمہ · Urdu

نبیہ بن وَہْب رحمہ اللہ جو کہ بنو عبدالدار میں سے ایک فرد ہیں ، روایت کرتے ہیں کہ عمر بن عبیداللہ رحمہ اللہ نے ( ان کو ) ابان بن عثمان رحمہ اللہ کی طرف بھیجا ، اس وقت ابان رحمہ اللہ ( خلیفہ عبدالملک بن مروان کی طرف سے ) حاجیوں کے امیر تھے اور وہ دونوں ( عمر بن عبیداللہ اور ابان رحمہ اللہ ) حالت احرام میں تھے ۔ ( یہ پیغام دے کر بھیجا کہ ) بلاشبہ میں ( یعنی عمر بن عبیداللہ رحمہ اللہ ) نے یہ ارادہ کیا ہے کہ ( اپنے بیٹے ) طلحہ بن عمر رحمہ اللہ کا شیبہ بن جُبَیر رحمہ اللہ کی صاحبزادی سے نکاح کر دوں ، میں چاہتا ہوں کہ آپ بھی اس موقع پر حاضر ہو جائیں ، تو ابان رحمہ اللہ نے اُن پر اس کام کا انکار کیا اور فرمایا : میں نے ( اپنے والد ) حضرت عثمان بن عفان رضی اللہ عنہ کو سنا ، وہ کہہ رہے تھے کہ میں نے رسول اللہ ﷺ کو یہ فرماتے ہوئے سنا :’’ محرم شخص نہ ( خود کسی سے ) نکاح کرے اور نہ کسی کا ( کسی سے ) نکاح کرے اور نہ ہی وہ نکاح کا پیغام بھیجے ۔‘‘

اردو ترجمہ · Urdu

حضرت ابو غطفان بن طَرِیف مُرّی رحمہ اللہ سے روایت ہے کہ ان کے والد طریف رحمہ اللہ نے ایک عورت سے اس حالت میں شادی کی کہ وہ محرم تھے تو حضرت عمر بن خطاب رضی اللہ عنہ نے اس نکاح کو مسترد کر دیا ۔

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہ فرمایا کرتے تھے کہ محرم نہ تو نکاح کرے اور نہ پیغام نکاح بھیجے ، نہ اپنے لیے اور نہ ہی کسی اور کے لیے ۔

اردو ترجمہ · Urdu

امام مالک رحمہ اللہ کو یہ خبر پہنچی کہ ( تین فقہائے مدینہ ) سعید بن مسیب رحمہ اللہ ، سالم بن عبداللہ رحمہ اللہ اور سلیمان بن یسار رحمہ اللہ سے محرم کے نکاح کے متعلق سوال کیا گیا تو سب نے کہا کہ محرم نہ ( خود کسی سے ) نکاح کرے اور نہ کسی کا ( کسی سے ) نکاح کرے ۔