اردو ترجمہ · Urdu

محمد بن عبداللہ بن حارث رحمہ اللہ سے روایت ہے ، انھوں نے حضرت سعد بن ابی وقاص رضی اللہ عنہ اور حضرت ضحاک بن قیس رضی اللہ عنہ کو سنا ، ( یہ ) اس سال ( کی بات ہے ) کہ جس میں حضرت امیر معاویہ بن ابی سفیان رضی اللہ عنہ نے ( 41 ھ میں اپنے دورِ خلافت کا پہلا ) حج کیا تھا ، دونوں ( حضرت سعد اور حضرت ضحاک رضی اللہ عنہ ) حج کے ساتھ عمرہ ملا کر حج تمتع کرنے کا تذکرہ کر رہے تھے ، حضرت ضحاک بن قیس رضی اللہ عنہ کہنے لگے کہ یہ کام تو اس شخص کے سوا کوئی نہیں کر سکتا جو حکم الٰہی سے جاہل و ناواقف ہو ، حضرت سعد رضی اللہ عنہ فرمانے لگے : اے میرے ( دینی ) بھائی کے بیٹے ! تو نے یہ بری بات کہی ہے ، حضرت ضحاک رضی اللہ عنہ کہنے لگے کہ یقیناً حضرت عمر بن خطاب رضی اللہ عنہ نے اس سے منع فرما دیا تھا ، تو حضرت سعد رضی اللہ عنہ نے فرمایا : رسول اللہ ﷺ نے بھی یہ حج کیا تھا ، اور ہم نے بھی آپ ﷺ کے ہمراہ اسے ادا کیا تھا ۔

اردو ترجمہ · Urdu

حضرت عبداللہ بن عمر رضی اللہ عنہ سے روایت ہے ، انھوں نے کہا : اللہ کی قسم ! میں حج سے پہلے عمرہ بھی ادا کروں اور ہدی کا جانور بھی ساتھ لے جاؤں ، یہ مجھے اس سے زیادہ محبوب ہے کہ میں حج کے بعد ذوالحج کے مہینے ہی میں عمرہ کروں ۔

اردو ترجمہ · Urdu

حضرت عبداللہ بن عمر رضی اللہ عنہ سے روایت ہے ، وہ کہا کرتے تھے کہ جس شخص نے حج سے پہلے حج کے مہینوں میں عمرہ کیا یعنی شوال میں یا ذوالقعدہ میں یا ذوالحج میں ، پھر وہ مکہ ہی میں ٹھہرا رہا ، یہاں تک کہ اُسے حج نے آ لیا ، چنانچہ اگر وہ حج کر لے تو وہ حج تمتع کرنے والا شمار ہو گا اور اس پر وہ ہدی کا جانور لازم ہو گا جو میسر ہو ، پھر اگر وہ ( قربانی ) نہ پائے تو تین روزے حج ( کے ایام ) میں رکھ لے اور سات روزے اس وقت رکھے جب وہ گھر لوٹ آئے ۔

اردو ترجمہ · Urdu

یحیی بن سعید رحمہ اللہ سے روایت ہے ، انھوں نے سعید بن مسیب رحمہ اللہ کو سنا ، وہ کہہ رہے تھے کہ جس شخص نے ( حج کے مہینوں مثلاً ) شوال میں یا ذوالقعدہ میں یا ذوالحج میں عمرہ کیا ، پھر وہ ( احرام کھول کر ) مکہ میں ٹھہر گیا ، یہاں تک کہ اُسے حج نے پا لیا ، چنانچہ ( اب ) اگر وہ حج کرے گا تو حج تمتع والا شمار ہو گا اور اس پر ہدی ( کا جانور قربان کرنا ) لازم ہے جو بھی میسر ہو ، پھر جو ( ایسا شخص قربانی کی طاقت ) نہ پا سکے تو ( اس پر دس دنوں کے ) روزے ( لازم ) ہیں ، تین ایام حج میں اور سات ، جب وہ واپس لوٹ جائے ۔