اردو ترجمہ · Urdu

جعفر بن محمد رحمہ اللہ اپنے والد ( محمد باقر رحمہ اللہ ) سے روایت کرتے ہیں کہ حضرت مقداد بن اسود رضی اللہ عنہ سُقیا نامی جگہ پر حضرت علی بن ابی طالب رضی اللہ عنہ کے پاس آئے ، وہ اُس وقت اپنے نوجوان اونٹوں کو پانی میں آٹا اور پتوں کا سفوف گھول کر پلا رہے تھے ، چنانچہ حضرت مقداد رضی اللہ عنہ نے اُن سے کہا کہ یہ حضرت عثمان بن عفان رضی اللہ عنہ اس سے منع کر رہے ہیں کہ حج و عمرہ کو ملا کر کیا جائے تو حضرت علی رضی اللہ عنہ ( اُسی وقت ) باہر آئے ، اس حال میں کہ ان کے ہاتھوں پر آٹے اور چارے کا نشان بھی تھا ۔ ( محمد باقر رحمہ اللہ کہتے ہیں کہ ) میں ان کے بازوؤں پر موجود آٹے اور چارے کے نشان کو ( ابھی تک ) نہیں بھولا ہوں ، ( وہ اسی حال میں چلتے آئے ) یہاں تک کہ حضرت علی رضی اللہ عنہ حضرت عثمان رضی اللہ عنہ کے پاس آ گئے ، پھر فرمانے لگے : کیا آپ نے اس سے منع کیا ہے کہ حج اور عمرہ کو ملا کر ( حج قران ) ادا کیا جائے ؟ حضرت عثمان رضی اللہ عنہ فرمانے لگے کہ یہ میری رائے ( ہی ) ہے ، چنانچہ حضرت علی رضی اللہ عنہ غصے کی حالت میں باہر تشریف لائے ، درحالیکہ وہ ( سرعام ، علانیہ ) یہ کہہ رہے تھے : (( لَبَّیْکَ اللّٰھُمَّ لَبَّیْکَ ، بِحَجَّۃٍ وَّعُمْرَۃٍ مَّعاً )) ’’ میں تیری جناب میں بار بار حاضر ہوتا ہوں ، اے اللہ ! میں بار بار تیرے پاس حاضری دیتا ہوں ، اکٹھے حج اور عمرہ کے ساتھ ۔‘‘

اردو ترجمہ · Urdu

سلیمان بن یسار رحمہ اللہ سے روایت ہے کہ بلاشبہ رسول اللہ ﷺ حجۃ الوداع کے سال حج کی طرف نکلے ، آپ ﷺ کے صحابہ میں بعض وہ تھے جنھوں نے حج کا احرام باندھا تھا ، بعض وہ تھے جنھوں نے حج اور عمرہ کو جمع کیا تھا اور بعض وہ تھے جنھوں نے ( حج تمتع کے طور پر ) صرف عمرے کا احرام باندھا تھا ، چنانچہ جس نے ( حج مفرد کے لیے ) صرف حج کا احرام باندھا تھا یا ( حج قران کرنے کے لیے ) حج و عمرہ کو جمع کیا تھا تو اس نے ( قربانی کے دن سے پہلے ) احرام نہ کھولا اور رہا وہ شخص جس نے ( حج تمتع کرنے کے لیے ) صرف عمرے کا احرام باندھا تھا تو اس نے ( عمرہ کر کے ) احرام کھول دیا ( اور پھر آٹھ ذوالحج کو حج کے لیے دوبارہ احرام باندھا ) ۔