اردو ترجمہ · Urdu

حضرت عائشہ رضی اللہ عنہا زوجہ پیغمبر ﷺ سے روایت ہے ، کہتی ہیں کہ دورِ جاہلیت میں عاشوراء کے دن قریش مکہ بھی روزہ رکھا کرتے تھے اور رسول اللہ ﷺ بھی زمانۂ جاہلیت میں ( نبوت سے پہلے ) یہ روزہ رکھا کرتے تھے ، پھر جب آپ ﷺ مدینہ منورہ تشریف لائے تو ( یہاں بھی ) آپ ﷺ نے یہ روزہ رکھا اور اپنے صحابہ رضی اللہ عنہم کو بھی اس کا روزہ رکھنے کا حکم دیا ، پھر جب رمضان فرض کر دیا گیا تو صرف وہی فرض ٹھہرا اور یوم عاشور ( کی فرضیت ) کو ترک کر دیا گیا ، پھر جو چاہتا اس کا روزہ رکھ لیتا اور جو چاہتا اسے چھوڑ دیتا ۔

اردو ترجمہ · Urdu

حمید بن عبدالرحمن بن عوف رضی اللہ عنہ سے روایت ہے کہ انھوں نے حضرت معاویہ بن ابی سفیان رضی اللہ عنہما کو عاشورہ کے دن سنا ، جس سال کہ وہ حج کے لیے گئے ، وہ منبر پر ( تشریف فرما ) تھے ( اور ) کہہ رہے تھے کہ اے مدینہ والو ! تمھارے علماء کہاں ہیں ؟ میں نے تو رسول اللہ ﷺ کو اس دن کے متعلق یہ فرماتے ہوئے سنا :’’ یہ عاشوراء کا دن ہے جس کا روزہ تم پر فرض تو قرار نہیں دیا گیا لیکن میں ( اس دن کا ) روزہ رکھے ہوئے ہوں ، لہٰذا جو چاہے روزہ رکھ لے اور جو چاہے نہ رکھے ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ حضرت عمر بن خطاب رضی اللہ عنہ نے حضرت حارث بن ہشام رضی اللہ عنہ کی طرف یہ پیغام بھیجا کہ یقیناً کل یوم عاشور ہے ، لہٰذا خود بھی اس کا روزہ رکھو اور اپنے گھر والوں کو بھی حکم دو کہ وہ اس دن کا روزہ رکھیں ۔