اردو ترجمہ · Urdu

حضرت عبداللہ بن عباس رضی اللہ عنہما سے روایت ہے کہ رسول اللہ ﷺ فتح مکہ کے سال ماہِ رمضان میں مکہ کی طرف نکلے تو آپ ﷺ روزہ رکھتے رہے ، یہاں تک کہ جب آپ کدید کے مقام پر پہنچے تو ( لوگوں کی مشقت دیکھ کر عصر کے بعد ) روزہ کھول دیا ، چنانچہ لوگوں نے بھی روزہ ختم کر دیا ۔ ( امام مالک رحمہ اللہ کے شیخ امام زہری رحمہ اللہ کہتے ہیں کہ ) صحابہ کرام رضی اللہ عنہم رسول اللہ ﷺ کے کاموں میں سے جو آخر آخر میں وقوع پذیر ہوتا اسے اختیار کر لیتے تھے ۔

اردو ترجمہ · Urdu

ابوبکر بن عبدالرحمن رحمہ اللہ کسی صحابی رسول ﷺ سے بیان کرتے ہیں کہ رسول اللہ ﷺ نے فتح مکہ کے سال اپنے ( اسی فتح مکہ کے ) سفر میں لوگوں کو روزہ کھول دینے کا حکم دیا اور فرمایا :’’ دشمن ( کے مقابلے ) کے لیے قوت حاصل کر لو ۔‘‘ البتہ رسول اللہ ﷺ خود روزہ رکھتے رہے ، ابوبکر بن عبدالرحمن رحمہ اللہ کہتے ہیں کہ مجھے بیان کرنے والے صحابی رضی اللہ عنہ نے بتایا کہ یقیناً میں نے عرج نامی جگہ میں رسول اللہ ﷺ کو دیکھا کہ آپ پیاس یا گرمی کی وجہ سے اپنے سر مبارک پر پانی انڈیل رہے تھے ، پھر رسول اللہ ﷺ کو بتایا گیا کہ چونکہ آپ نے روزہ رکھا ہوا ہے اس لیے لوگوں میں سے ایک جماعت نے بھی روزہ رکھا ہوا ہے ، وہ صحابی کہتے ہیں کہ پھر جب رسول اللہ ﷺ کدید جگہ پر پہنچ گئے تو ایک پیالہ منگوایا پھر ( پانی ) نوش فرما لیا تو لوگوں نے بھی روزہ توڑ دیا ۔

اردو ترجمہ · Urdu

حضرت انس بن مالک رضی اللہ عنہ سے روایت ہے ، کہتے ہیں کہ ہم رسول اللہ ﷺ کے ہمراہ ماہِ رمضان میں سفر پر نکلے تو نہ روزہ رکھنے والے نے روزہ نہ رکھنے والے پر عیب لگایا اور نہ ہی روزہ چھوڑنے والے نے روزہ رکھنے والے پر کوئی عیب لگایا ۔

اردو ترجمہ · Urdu

ہشام بن عروہ رحمہ اللہ اپنے والد ( عروہ بن زبیر رحمہ اللہ ) سے روایت کرتے ہیں کہ حضرت حمزہ بن عمرو اسلمی رضی اللہ عنہ نے رسول اللہ ﷺ سے عرض کیا کہ اے اللہ کے رسول ! میں ایک ایسا شخص ہوں جو ( کثرت سے ) روزہ رکھتا ہوں ، تو کیا میں سفر میں روزہ رکھ سکتا ہوں ؟ تو رسول اللہ ﷺ نے ان سے فرمایا :’’ اگر تم چاہو تو روزہ رکھ لو اور اگر چاہو تو روزہ چھوڑ دو ۔‘‘

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہما سفر میں روزہ نہیں رکھتے تھے ۔

اردو ترجمہ · Urdu

ہشام بن عروہ رحمہ اللہ اپنے باپ ( عروہ بن زبیر رحمہ اللہ ) سے روایت کرتے ہیں کہ وہ ماہِ رمضان میں سفر کرتے تھے اور ہم بھی ان کے ساتھ سفر کرتے ، چنانچہ عروہ رحمہ اللہ تو روزہ رکھتے اور ہم روزہ چھوڑ دیتے تو وہ ہمیں روزہ رکھنے کا حکم نہیں دیتے تھے ۔