اردو ترجمہ · UrduUnverified translation

ابوبکر بن محمد بن عمرو بن حزم اپنے باپ (محمد) سے اور وہ ان (ابوبکر) کے داد (عمرو بن حزم) سے روایت کرتے ہیں کہ نبی صلی اللہ علیہ وسلم نے اہل یمن کو لکھا۔ پھر لمبی حدیث بیان کی۔ اس میں یہ بھی ہے: ’’جو شخص کسی بے گناہ مسلمان کو قتل کر ڈالے اور اس قتل کا ثبوت بھی ہو تو اس پر قصاص لازم ہے‘ الّا یہ کہ مقتول کے ورثاء (دیت پر) راضی ہو جائیں۔ اور ایک جان کے قتل کی دیت سو اونٹ ہے۔ اور ناک میں بھی پوری دیت ہے جبکہ اسے جڑ سے کاٹ دیا جائے۔ اور دونوں آنکھوں‘ زبان اور دونوں ہونٹوں کے عوض بھی پوری دیت ہے۔ (اسی طرح) عضو مخصوص میں پوری دیت ہے۔ اور دو خصیوں میں پوری دیت ہے۔ اور پشت میں بھی پوری دیت ہے۔ اور ایک پاؤں میں آدھی دیت ہے۔ اور دماغ اور پیٹ کے گہرے زخم میں تہائی دیت ہے۔ اور وہ زخم جس سے ہڈی ٹوٹ جائے اور اپنی جگہ سے ہٹ جائے اس میں پندرہ اونٹ دیت ہے۔ اور ہاتھ اور پاؤں کی ہر ایک انگلی میں دس دس اونٹ دیت ہے۔ اور ایک دانت کی دیت پانچ اونٹ ہے۔ اور ایسے زخم میں جس سے ہڈی نظر آنے لگے‘ پانچ اونٹ دیت ہے۔ اور مرد کو عورت کے بدلے میں قتل کیا جائے گا۔ اور جن کے پاس (اونٹ نہ ہوں اور) سونا ہو تو ان سے ایک ہزار دینار وصول کیے جائیں گے۔‘‘ (ابوداود نے اسے مراسیل میں ذکر کیا ہے اور نسائی‘ ابن خزیمہ‘ ابن جارود‘ ابن حبان اور احمد نے بھی اسے روایت کیا ہے اور اس کے صحیح ہونے میں انھوں نے اختلاف کیا ہے۔)

اردو ترجمہ · UrduUnverified translation

حضرت عبداللہ بن مسعود رضی اللہ عنہ نے نبی صلی اللہ علیہ وسلم سے روایت کیا ہے کہ آپ نے فرمایا: ’’قتل خطا کی دیت پانچ حصوں میں ہوگی: بیس حقے ‘ بیس جذعے‘ بیس بنات مخاض‘ بیس بنات لبون اور بیس بنی لبون۔‘‘(اسے دارقطنی نے روایت کیا ہے۔) اور چاروں نے ’’بنی لبون‘‘ کی بجائے ’’ بیس بنی مخاض ‘‘ کے الفاظ سے اسے ذکر کیا ہے‘ جبکہ پہلی سند زیادہ قوی ہے۔ اور ابن ابی شیبہ نے ایک اور طریق سے اسے موقوفاًروایت کیا ہے اور وہ مرفوع کی نسبت زیادہ صحیح ہے۔ اور ابوداود اور ترمذی نے اسے عمرو بن شعیب عن أبیہ عن جدہ کے طریق سے مرفوعاً نقل کیا ہے : ’’دیت میں تیس حقے‘ تیس جذعے اور چالیس حاملہ اونٹنیاں ‘ جن کے پیٹوں میں بچے ہوں‘ (وصول کیے جائیں گے۔‘‘)

اردو ترجمہ · UrduUnverified translation

حضرت ابن عمر رضی اللہ عنہما نبی صلی اللہ علیہ وسلم سے روایت کرتے ہیں‘ آپ نے فرمایا: ’’اللہ تعالیٰ کی سب سے زیادہ سرکشی کرنے والے لوگ تین قسم کے ہیں:(ایک وہ) جو اللہ کے حرم میں قتل کرے‘ (دوسراوہ ) جو اپنے غیر قاتل کو قتل کرے‘ اور (تیسرا وہ) جو جاہلیت کی عداوت کی بنا پر قتل کرے۔‘‘ (ابن حبان نے اسے ایک (طویل) حدیث کے ضمن میں بیان کیا ہے جسے انھوں نے صحیح قرار دیا ہے۔)

اردو ترجمہ · UrduUnverified translation

حضرت عبداللہ بن عمرو بن عاص رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’قتل خطا‘ یعنی شبہ عمد ‘ جو کوڑے اور لاٹھی سے ہو‘کی دیت سو اونٹ ہے۔ ان میں چالیس اونٹنیاں ایسی ہوں گی جن کے پیٹوں میں ان کے بچے ہوں۔‘‘ (اسے ابوداود‘ نسائی اور ابن ماجہ نے بیان کیا ہے‘ نیز ابن حبان نے اسے صحیح کہا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ نبی صلی اللہ علیہ وسلم نے فرمایا: ’’یہ اور یہ‘ یعنی چھنگلی اور انگوٹھا برابر ہیں۔‘‘ (اسے بخاری نے روایت کیا ہے۔) ابوداود اور ترمذی کی روایت میں ہے: ’’سب انگلیوں کی دیت برابر ہے‘ سارے دانت برابرہیں اور ثنیہ (سامنے والا دانت) اور ڈاڑھ برابر ہیں۔‘‘ اور ابن حبان کی روایت میں ہے: ’’ہاتھوں اور پاؤں کی انگلیوں کی دیت برابر ہے‘ یعنی ہر انگلی کے بدلے میں دس اونٹ۔‘‘

اردو ترجمہ · UrduUnverified translation

حضرت عمرو بن شعیب نے اپنے باپ سے اور انھوں نے اپنے دادا (عبداللہ بن عمرو بن عاص رضی اللہ عنہما ) سے روایت کیا ہے‘ وہ مرفوعاً بیان کرتے ہیں کہ رسول اللہ صلی اللہ علیہ وسلم نے فرمایا: ’’جس شخص نے علاج کیا‘ حالانکہ وہ طب میں معروف نہیں ہے‘ پس کسی جان کو ہلاک کر ڈالا یا کوئی اور نقصان کر دیاتو وہ ذمہ دار ٹھہرے گا۔‘‘ (اسے دارقطنی نے روایت کیا ہے اور حاکم نے اسے صحیح قرار دیا ہے۔ ابوداود اور نسائی وغیرہ کے ہاں بھی یہ روایت منقول ہے مگر جس نے اس روایت کو مرسل بیان کیا ہے وہ ان راویوں سے زیادہ قوی ہے جنھوں نے اسے موصول بیان کیا ہے۔)

اردو ترجمہ · UrduUnverified translation

حضرت عبداللہ بن عمرو رضی اللہ عنہما ہی سے روایت ہے‘ نبی صلی اللہ علیہ وسلم نے فرمایا: ’’جن زخموں میں ہڈی سے گوشت ہٹ جائے ان میں پانچ پانچ اونٹ (دیت) ہے۔‘‘ (اسے امام احمد رحمہ اللہ اور چاروں نے روایت کیا ہے) اور امام احمد رحمہ اللہ نے یہ اضافہ نقل کیا ہے: ’’تمام انگلیاں برابر ہیں‘ یعنی ان کی دیت دس دس اونٹ ہے۔‘‘ (اس روایت کو ابن خزیمہ اور ابن جارود نے صحیح قرار دیا ہے۔)

اردو ترجمہ · UrduUnverified translation

حضرت عبداللہ بن عمرو رضی اللہ عنہما ہی سے مروی ہے‘ رسول اللہ صلی اللہ علیہ وسلم نے فرمایا: ’’ذمیوں کی دیت مسلمانوں کی دیت سے آدھی ہے۔‘‘ (اسے احمد اور چاروں نے روایت کیا ہے۔) اور ابوداود کے الفاظ ہیں: ’’ذمی کی دیت آزاد کی دیت سے آدھی ہے‘‘ اور نسائی کی روایت میں ہے: ’’عورت کی دیت مرد کی دیت کی مانند ہے یہاں تک کہ وہ اس کی دیت کے تہائی تک پہنچے۔‘‘ (اسے ابن خزیمہ نے صحیح قرار دیا ہے۔)

اردو ترجمہ · UrduUnverified translation

انھی (حضرت عبداللہ بن عمرو رضی اللہ عنہما ) سے مروی ہے کہ رسول اللہ صلی اللہ علیہ وسلم نے فرمایا: ’’قتل شبہ عمد کی دیت قتل عمد کی طرح مغلظہ ہے۔ لیکن (شبہ عمد کے) قاتل کو قتل نہیں کیا جائے گا۔ وہ (شبہ عمد) یوں ہے کہ (لوگوں میں) شیطان کود پڑتا ہے (اور انھیں قتل و قتال پر آمادہ اور برانگیختہ کرتا ہے) جس کے نتیجے میں بغیر کسی عداوت اور ہتھیار اٹھانے کے خون خرابا ہوجاتا ہے۔‘‘ (اسے دارقطنی نے روایت کیاہے اور اسے ضعیف قرار دیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم کے عہد میں ایک آدمی نے دوسرے آدمی کو قتل کردیا تو نبی صلی اللہ علیہ وسلم نے اس کی دیت بارہ ہزار (درہم) مقرر فرمائی۔ (اسے چاروں نے روایت کیا ہے۔ اورنسائی اور ابوحاتم نے اس روایت کے مرسل ہونے کو ترجیح دی ہے۔)

اردو ترجمہ · UrduUnverified translation

حضرت ابو رمثہ رضی اللہ عنہ سے روایت ہے‘ وہ بیان کرتے ہیں کہ میں نبی صلی اللہ علیہ وسلم کی خدمت میں حاضر ہوا جبکہ میرے ساتھ میرا بیٹا بھی تھا۔ آپ نے دریافت فرمایا: ’’یہ کون ہے؟‘‘ میں نے عرض کیا: میرا بیٹا ہے۔ میں (کھلم کھلا) اس بات کی گو اہی دیتا ہوں۔ آپ نے فرمایا: ’’بے شک تو اس کے جرم کا ذمہ دار نہیں اور نہ یہ تیرے جرم کا ذمہ دار ہے۔‘‘ (اسے نسائی اور ابوداود نے روایت کیا ہے اور ابن خزیمہ اور ابن جارود نے اسے صحیح کہا ہے۔)

اردو ترجمہ · UrduUnverified translation

حضرت سہل بن ابو حثمہ اپنی قوم کے بعض بزرگوں سے روایت کرتے ہیں کہ عبداللہ بن سہل اور حضرت مُحَیِّصہ بن مسعود رضی اللہ عنہ اپنی تنگ دستی کی وجہ سے خیبر کی طرف نکلے‘ چنانچہ حضرت مُحَیِّصہ رضی اللہ عنہ کو اطلاع دی گئی کہ عبداللہ بن سہل رضی اللہ عنہ کو قتل کر دیا گیا ہے اور اسے ایک چشمے میں پھینک دیا گیا ہے۔ مُحَیِّصہ رضی اللہ عنہ یہودیوں کے پاس آئے اور کہا : اللہ کی قسم! تم لوگوں نے اسے قتل کیا ہے۔ انھوں نے کہا: اللہ کی قسم! ہم نے اسے قتل نہیں کیا۔ پھر محیصہ اور ان کا بھائی حُوَیِّصہ اور عبدالرحمن بن سہل رضی اللہ عنہم تینوں (رسول اللہ صلی اللہ علیہ وسلم کے پاس) آئے اور مُحَیِّصـہ نے گفتگو کرنی چاہی تو رسول اللہ صلی اللہ علیہ وسلم نے فرمایا: ’’بڑے کو بات کرنے دو اور اس کے حق کا لحاظ کرو۔‘‘ آپ کی مراد تھی کہ جو تم میں عمر میں بڑا ہے وہ بات کرے‘ چنانچہ حویصہ رضی اللہ عنہ نے گفتگو کی‘ پھر محیصہ نے بات کی تو رسول اللہ صلی اللہ علیہ وسلم نے فرمایا: ’’وہ لوگ یا تو تمھارے صاحب اور ساتھی کی دیت ادا کریں گے یا اعلانِ جنگ کریں گے۔‘‘ پھر اس سلسلے میں آپ نے ان کے نام ایک خط تحریر فرمایا جس کے جواب میں انھوں نے لکھا: اللہ کی قسم! ہم نے اسے قتل نہیں کیا۔ تب رسول اللہ صلی اللہ علیہ وسلم نے حُوَیِّصہ‘ مُحَیِّصہ اور عبدالرحمن بن سہل رضی اللہ عنہم سے فرمایا: ’’کیا تم لوگ قسم کھا کر اپنے صاحب کے خون کے حق دار بنو گے؟‘‘ انھوں نے کہا: نہیں۔ آپ نے فرمایا: ’’تو پھر تم کو یہودی قسم دیں؟‘‘ انھوں نے کہا کہ وہ تو مسلمان نہیں ہیں (اس لیے ان کی قسم کا کوئی اعتبار نہیں۔) چنانچہ رسول اللہ صلی اللہ علیہ وسلم نے اس (عبداللہ بن سہل رضی اللہ عنہ ) کی دیت اپنے پاس (بیت المال) سے دی اور ان کی طرف سو اونٹنیاں بھیج دیں۔ حضرت سہل رضی اللہ عنہ نے بتایا کہ ان میں سے ایک سرخ رنگ کی اونٹنی نے مجھے لات ماری تھی۔(بخاری و مسلم)

اردو ترجمہ · UrduUnverified translation

ایک انصاری صحابی رضی اللہ عنہ سے روایت ہے کہ رسول اللہ صلی اللہ علیہ وسلم نے زمانۂ جاہلیت کے طریقۂ قسامت کو برقرار رکھا۔ اور آپ نے اسی کے مطابق انصار کے کچھ لوگوں کے درمیان ایک مقتول کے بارے میں فیصلہ کیا جس کا انھوں نے یہودیوں کے خلاف دعویٰ کیا تھا۔ (اسے مسلم نے روایت کیا ہے۔)