اردو ترجمہ · UrduUnverified translation

حضرت ابن مسعود رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جو مسلمان آدمی اس بات کی گواہی دیتا ہو کہ اللہ کے سوا کوئی معبود نہیں اور میں (محمد صلی اللہ علیہ وسلم ) اللہ کا رسول ہوں‘ تو تین صورتوں کے علاوہ اسے قتل کرنا جائز اور حلال نہیں: شادی شدہ زانی‘ جان کے بدلے جان اور اپنے دین کو چھوڑ کر (مسلمانوں کی) جماعت سے علیحدہ ہونے والا۔‘‘ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ رسول اللہ صلی اللہ علیہ وسلم نے فرمایا: ’’تین صورتوں میں سے کسی ایک کے سوا کسی مسلمان آدمی کا قتل حلال و جائز نہیں: شادی شدہ زانی‘ اسے سنگسار کیا جائے گا۔ (دوسرا) وہ آدمی جو عمداً کسی مسلمان کو قتل کرے‘ اسے قتل کیا جائے گا۔ اور (تیسرا) وہ آدمی جو دائرۂ اسلام سے خارج ہو جائے اور اللہ اور اس کے رسول سے لڑائی شروع کر دے‘ اسے قتل کیا جائے گا یا سولی دی جائے گی یا جلا وطن کیا جائے گا۔‘‘ (اسے ابوداود اور نسائی نے روایت کیا ہے اور حاکم نے اسے صحیح کہا ہے۔)

اردو ترجمہ · UrduUnverified translation

حضرت عبداللہ بن مسعود رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’قیامت کے روز لوگوں کے درمیان سب سے پہلے جن مقدمات کا فیصلہ کیا جائے گا وہ خون کے مقدمات ہوں گے۔‘‘ (بخاری و مسلم)

اردو ترجمہ · UrduUnverified translation

حضرت سمرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس مالک نے اپنے غلام کو قتل کیا ہم اسے قتل کریں گے۔ اور جس نے اس کا کوئی عضو کاٹا ہم اس کا وہ عضو کاٹ دیں گے۔‘‘ (اسے احمد اور چاروں نے روایت کیا ہے اور ترمذی نے اسے حسن کہا ہے۔ یہ سمرہ سے حسن بصری کی روایت ہے اور سمرہ سے حسن بصری کے سماع میں اختلاف ہے۔) ابوداود اور نسائی کی روایت میں ہے: ’’جس مالک نے اپنے غلام کو خصی کیا ہم اسے خصی کر دیں گے۔‘‘ (اس اضافے کو امام حاکم نے صحیح قرار دیا ہے۔)

اردو ترجمہ · UrduUnverified translation

حضرت عمر رضی اللہ عنہ سے روایت ہے‘ وہ فرماتے ہیں کہ میں نے رسول اللہ صلی اللہ علیہ وسلم کو یہ فرماتے ہوئے سنا : ’’باپ سے بیٹے کا قصاص نہیں لیا جائے گا۔‘‘ (اسے احمد‘ ترمذی اور ابن ما جہ نے روایت کیا ہے‘ ابن جارود اور بیہقی نے اسے صحیح قرار دیا ہے اور ترمذی نے کہا ہے کہ اس حدیث میں اضطراب ہے۔)

اردو ترجمہ · UrduUnverified translation

حضرت ابوجحیفہ رضی اللہ عنہ سے روایت ہے کہ میں نے حضرت علی رضی اللہ عنہ سے دریافت کیا : کیا آپ لوگوں کے پاس قرآن کے علاوہ وحی کے ذریعے سے نازل شدہ کوئی اور چیز بھی ہے؟ انھوں نے جواب دیا: نہیں‘ اس ذات کی قسم جس نے دانہ اگایا اور جان کو پیدا فرمایا! سوائے اس فہم کے جو اللہ تعالیٰ کسی انسان کو قرآن کے بارے میں عطا فرماتا ہے‘ اور جو کچھ اس صحیفے میں تحریر ہے۔ میں نے سوال کیا کہ اس صحیفے میں کیا ہے؟ انھوں نے بتایا کہ دیت کے احکام‘ قیدی کو آزاد کرنے کا حکم اور یہ کہ کسی مسلمان کو کافر کے بدلے میں قتل نہیں کیا جائے گا۔(اسے بخاری نے روایت کیا ہے۔) اس روایت کو احمد‘ ابوداود اور نسائی نے ایک دوسری سند سے حضرت علی رضی اللہ عنہ کے واسطے سے بیان کیا ہے اور اس میں یہ قول ہے: ’’سب مومنوں کے خون برابر ہیں۔ اور ان میں سے ادنیٰ آدمی بھی ان کی طرف سے امان دے سکتا ہے۔ اور وہ غیروں کے مقابلے میں ایک ہاتھ ہیں۔ اور کوئی مومن کسی کافر کے بدلے میں قتل نہیں کیا جائے گا اور نہ کسی معاہد (ذمی) کو اس کے زمانۂ عہد میں قتل کیا جا سکتا ہے۔‘‘ (اس روایت کو حاکم نے صحیح قرار دیا ہے۔)

اردو ترجمہ · UrduUnverified translation

حضرت انس بن مالک رضی اللہ عنہ سے روایت ہے کہ ایک لونڈی ایسی حالت میں پائی گئی کہ اس کا سر دو پتھروں کے درمیان رکھ کر کچل دیا گیا تھا۔ لوگوں نے اس سے دریافت کیا کہ تمھارے ساتھ ایسا کس نے کیا ہے؟ فلاں نے؟ فلاں نے؟ یہاں تک کہ انھوں نے ایک یہودی کا ذکر کیا تو اس نے سر سے اشارہ کیا: (ہاں۔) چنانچہ یہودی گرفتار کر لیا گیا‘ پھر اس نے اقرار بھی کر لیا۔ تو رسول اللہ صلی اللہ علیہ وسلم نے اس کا سر دو پتھروں کے درمیان رکھ کر کچل دینے کا حکم دیا۔ (بخاری و مسلم۔ یہ الفاظ مسلم کے ہیں۔)

اردو ترجمہ · UrduUnverified translation

حضرت عمران بن حصین رضی اللہ عنہما سے روایت ہے کہ فقیر لوگوں کے ایک لڑکے نے مال دار لوگوں کے لڑکے کا کان کاٹ دیا تو یہ (امیر) لوگ نبی صلی اللہ علیہ وسلم کے پاس آئے۔ آپ نے ان کے لیے کوئی چیز مقرر نہ فرمائی۔ (اسے احمد اور تینوں نے صحیح سند سے روایت کیا ہے۔)

اردو ترجمہ · UrduUnverified translation

حضرت عمرو بن شعیب نے اپنے والد سے اور انھوں نے اپنے دادا سے روایت کیا ہے کہ ایک شخص نے دوسرے کے گھٹنے میں سینگ چبھو دیا۔ وہ نبی صلی اللہ علیہ وسلم کے پاس آیا اور عرض کیا: مجھے اس سے قصاص دلوائیں۔ آپ نے فرمایا: ’’(نہیں!) حتیٰ کہ تو شفایاب ہو جائے۔‘‘ وہ پھر آپ کے پاس آیا اور بولا: مجھے قصاص دلوائیں۔ آپ نے اسے قصاص دلوا دیا۔ اس کے بعد وہ پھر آپ کے پاس آیا اور کہنے لگا: اے اللہ کے رسول! میں لنگڑا ہوگیا ہوں۔ آپ نے فرمایا: ’’میں نے تجھے منع کیا تھا لیکن تو نے میری نافرمانی کی۔ اللہ تعالیٰ تجھے دور کرے اور تیرا لنگڑا پن باطل ہو گیا۔‘‘ پھر رسول اللہ صلی اللہ علیہ وسلم نے زخمی کے شفایاب ہونے سے پہلے زخم کا قصاص لینے سے منع فرما دیا۔ (اس روایت کو احمد اور دارقطنی نے روایت کیا ہے اور اسے مرسل ہونے کی وجہ سے معلول کہا گیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ ہُذَیل قبیلے کی دو عورتیں آپس میں لڑ پڑیں تو ایک نے دوسری کو پتھر دے مارا اور اس عورت کو اور جو اس کے پیٹ میں (حمل) تھا ‘ اسے قتل کر ڈالا۔ تو وہ لوگ رسول اللہ صلی اللہ علیہ وسلم کے پاس جھگڑالائے‘ چنانچہ رسول اللہ صلی اللہ علیہ وسلم نے فیصلہ فرمایاکہ جنین کی دیت غرّہ‘ یعنی ایک غلام یا لونڈی ہے۔ اور (قاتلہ) عورت کی (طرف سے) دیت اس کے ورثاء کے ذمے قرار دی۔ اور اس (دیت) کا وارث مقتولہ کی اولاد اور ان کے ساتھ دیگر وارث بننے والوں کو ٹھہرایا۔ حمل بن نابغہ ہذلی نے کہا: اے اللہ کے رسول ! ہم ایسے بچے کا تاوان کیسے دیں جس نے نہ پیا‘ نہ کھایا‘ نہ وہ بولا اور نہ چیخا؟ ایسا تو رائیگاں جائے گا۔ آپ نے فرمایا: ’’یہ اس قافیہ دار کلام کی وجہ سے‘ جو اس نے کہا ہے‘ یہ کاہنوں کے بھائیوں میں سے لگتا ہے۔‘‘ (بخاری و مسلم) اسے ابوداود اور نسائی نے حضرت ابن عباس رضی اللہ عنہما کی حدیث سے بیان کیا ہے کہ حضرت عمر رضی اللہ عنہ نے پوچھا: جنین کے بارے میں نبی صلی اللہ علیہ وسلم کے فیصلے کے موقع پر کون حاضر تھا؟ حضرت ابن عباس رضی اللہ عنہما کہتے ہیں کہ حمل بن نابغہ کھڑا ہوا اور اس نے بیان کیا کہ میں دو عورتوں کے درمیان تھا کہ ایک نے دوسری کو مارا۔ (انھوں نے اسے اختصار سے بیان کیا ہے اور ابن حبان اور حاکم نے اسے صحیح کہا ہے۔)

اردو ترجمہ · UrduUnverified translation

حضرت انس رضی اللہ عنہ سے روایت ہے کہ ان کی پھوپھی رُبَیِّع بنت نضر نے ایک لڑکی کا سامنے والا دانت توڑ دیا۔ رُبَیِّع کے رشتہ داروں نے اس سے معافی طلب کی تو لڑکی والوں نے انکار کر دیا۔ پھر انھوں نے دیت دینے کی پیش کش کی تو اسے بھی انھوں نے رد کر دیا‘ چنانچہ وہ رسول اللہ صلی اللہ علیہ وسلم کے پاس آئے اور قصاص کے سوا کسی بھی چیز کو لینے سے انکار کر دیا۔ تو رسول اللہ صلی اللہ علیہ وسلم نے قصاص کا حکم فرما دیا۔ یہ سن کر حضرت انس بن نضر نے عرض کیا: اے اللہ کے رسول! کیا رُبَیِّعکا دانت توڑا جائے گا؟ نہیں‘ اس ذات اقدس کی قسم جس نے آپ کو حق دے کر مبعوث فرمایا ہے! اس کا دانت نہیں توڑا جائے گا۔ رسول اللہ صلی اللہ علیہ وسلم نے فرمایا: ’’اے انس! اللہ کا فیصلہ تو قصاص ہی ہے۔‘‘ اتنے میں وہ لوگ رضامند ہوگئے اور انھوں نے معافی دے دی۔ پھر رسول اللہ صلی اللہ علیہ وسلم نے فرمایا: ’’اللہ کے کچھ بندے ایسے بھی ہیں کہ اگر وہ اللہ کی قسم کھا لیں تو اللہ تعالیٰ ان کی قسم کو پورا فرما دیتا ہے۔‘‘ (بخاری و مسلم۔ اور یہ الفاظ بخاری کے ہیں۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’جو شخص کسی بلوے میں مارا گیا ہو (کہ اس کے قاتل کے بارے میں پتہ نہ چلے) یا پتھر‘ کوڑے یا لاٹھی سے اس طرح مارا گیا ہو کہ مارنے والے کا علم نہ ہو تو اس کی دیت‘ قتل خطا کی دیت ہوگی۔ اور جو شخص عمداً قتل کیا جائے گا تو اس کا قصاص ہے۔ جو شخص قصاص لینے میں حائل ہوا تو اس پر اللہ کی لعنت ہے۔‘‘ (اس حدیث کو ابوداود‘نسائی اور ابن ماجہ نے قوی سند سے روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ نبی صلی اللہ علیہ وسلم نے فرمایا: ’’جب ایک آدمی کسی آدمی کو پکڑے رکھے اور کوئی دوسرا پکڑے ہوئے آدمی کو قتل کر ڈالے تو قاتل کو قتل کیا جائے گا اور پکڑنے والے کو قید کیا جائے گا۔‘‘(اسے دارقطنی نے موصولاً اور مرسلا ً روایت کیا ہے اور ابن قطان نے اسے صحیح قرار دیا ہے۔ اس کے راوی ثقہ ہیں مگر بیہقی نے اس کے مرسل ہونے کو ترجیح دی ہے۔)

اردو ترجمہ · UrduUnverified translation

حضرت عبدالرحمن بن بیلمانی سے مروی ہے کہ نبی صلی اللہ علیہ وسلم نے ایک معاہد (ذمی) کے بدلے میں ایک مسلمان کو قتل کیا اور فرمایا: ’’میں اس شخص کے زیادہ قریب ہوں جو اپنے عہد کو پورا کرتا ہے۔‘‘ (اسے عبدالرزاق نے اسی طرح مرسل روایت کیا ہے اور دارقطنی نے اس میں ابن عمر رضی اللہ عنہما کا ذکر کرکے اسے موصول بیان کیا ہے لیکن موصول کی سند کمزور ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ ایک غلام دھوکے سے قتل کر دیا گیا تو (اس پر) حضرت عمر رضی اللہ عنہ نے فرمایا: اگر اس کے قتل میں سارے اہل صنعاء شریک ہوتے تو میں اس کے بدلے میں ان سب کو قتل کر ڈالتا۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابوشریح خزاعی رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’میرے اس خطبے کے بعد اگر کسی کا کوئی آدمی مارا جائے تو اس کے ورثاء کو دو اختیار ہیں: یا تو دیت لے لیں یا قاتل کو مقتول کے بدلے میں قتل کر دیں۔‘‘ (اسے ابوداود اور نسائی نے روایت کیا ہے اور اس روایت کی اصل صحیحین میں حضرت ابوہریرہ رضی اللہ عنہ سے اسی مفہوم میں مروی ہے۔)