اردو ترجمہ · UrduUnverified translation

حضرت عبداللہ بن عمرو رضی اللہ عنہما سے روایت ہے کہ ایک خاتون نے عرض کیا: اے اللہ کے رسول !یہ جو میرا لخت جگر ہے میرا پیٹ اس کے لیے برتن تھا‘ میری چھاتی اس کے لیے مشکیزہ اور میری آغوش اس کے لیے ٹھکانا تھی۔ اس کے والد نے مجھے طلاق دے دی ہے اور وہ مجھ سے اس بچے کو چھین لینا چاہتا ہے۔ آپ نے فرمایا: ’’جب تک تو (دوسرا) نکاح نہیں کرتی اس وقت تک تو ہی اس کی زیادہ حقدار ہے۔‘‘ (اسے احمد اور ابوداود نے روایت کیا ہے اور حاکم نے اسے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ ایک عورت نے عرض کیا: اے اللہ کے رسول!میرا شوہر مجھ سے میرا بچہ چھیننا چاہتا ہے‘ حالانکہ وہ (بچہ) مجھے فائدہ دیتا ہے اور ابو عنبہ کے کنویں سے مجھے پانی لا کر دیتا ہے۔ اسی اثنا میں اس کا شوہر بھی آگیا۔ تو نبی صلی اللہ علیہ وسلم نے فرمایا: ’’اے بچے! یہ تیرا باپ ہے اور یہ تیری والدہ۔ ان دونوں میں سے جس کا چاہے ہاتھ پکڑ لے۔‘‘ اس بچے نے ماں کا ہاتھ پکڑ لیا اور وہ اسے لے کر چل دی۔ (اسے احمد اور چاروں نے بیان کیا ہے اور ترمذی نے اسے صحیح کہا ہے۔)

اردو ترجمہ · UrduUnverified translation

حضرت رافع بن سنان رضی اللہ عنہ سے روایت ہے کہ وہ خود مسلمان ہوگئے اور ان کی بیوی نے اسلام قبول کرنے سے انکار کر دیا‘ چنانچہ نبی صلی اللہ علیہ وسلم نے ماں کو ایک طرف اور باپ کو دوسرے گوشے میں بٹھا دیا اور بچے کو دونوں کے درمیان میں بٹھا دیا‘ بچہ ماں کی جانب مائل ہوا تو رسول اللہ صلی اللہ علیہ وسلم نے دعا کی: ’’الٰہی! اس بچے کو ہدایت دے۔‘‘ چنانچہ وہ بچہ باپ کی جانب مائل ہوگیا اور باپ نے اسے پکڑ لیا۔ (اسے ابوداود اور نسائی نے روایت کیاہے اور حاکم نے اسے صحیح کہا ہے۔)

اردو ترجمہ · UrduUnverified translation

حضرت براء بن عازب رضی اللہ عنہما سے روایت ہے کہ نبی صلی اللہ علیہ وسلم نے حضرت حمزہ رضی اللہ عنہ کی بیٹی کا فیصلہ اس کی خالہ کے حق میں کیا اور فرمایا: ’’خالہ بمنزلہ ماں کے ہے۔‘‘ اسے بخاری نے روایت کیا ہے۔ اور احمد نے اسے حضرت علی رضی اللہ عنہ کی حدیث سے بیان کیا ہے کہ آپ صلی اللہ علیہ وسلم نے فرمایا: ’’لڑکی اپنی خالہ کے پاس ہوگی کیونکہ خالہ ماں ہے۔‘‘

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا : ’’جب تم میں سے کسی کے پاس اس کا خادم کھانا لے کر آئے تو اگر وہ اس خادم کو اپنے ساتھ (کھانے کے لیے ) نہ بٹھائے تو اسے ایک یا دو لقمے ضرور دے دے۔‘‘ (بخاری و مسلم- یہ الفاظ بخاری کے ہیں۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ نبی صلی اللہ علیہ وسلم نے فرمایا : ’’ایک عورت کو بلی کی وجہ سے عذاب دیا گیا۔ اس نے بلی کو (اتنی دیر تک) قید رکھا کہ وہ مر گئی‘ چنانچہ وہ عورت اس بلی کی وجہ سے جہنم میں چلی گئی۔ اس (عورت) نے بلی کو کچھ کھلایا نہ پلایا بلکہ اسے باندھ رکھا اور نہ اسے آزاد چھوڑا کہ وہ زمین کے حشرات وغیرہ کھا لیتی۔‘‘ (بخاری و مسلم)