اردو ترجمہ · UrduUnverified translation

حضرت عائشہ رضی اللہ عنہا سے مروی ہے‘ انھوں نے فرمایا کہ ابوسفیان کی بیوی ہند بنت عتبہ رسول اللہ صلی اللہ علیہ وسلم کی خدمت میں حاضر ہوئی اور عرض کیا: اے اللہ کے رسول ! ابوسفیان ایک کنجوس اور حریص آدمی ہے۔ وہ مجھے اتنا خرچ نہیں دیتا جو میرے لیے اور میرے بچوں کے لیے کافی ہو سوائے اس کے جو میں اسے بتائے بغیر اس کے مال میں سے کچھ لے لوں‘ تو ایسا کرنے میں مجھ پر کوئی گناہ ہو گا؟ آپ صلی اللہ علیہ وسلم نے فرمایا: ’’بھلے طریقے سے تم اس کا اتنا مال لے سکتی ہو جو تمھارے لیے اور تمھارے بچوں کے لیے کافی ہو۔‘‘ (بخاری و مسلم)

اردو ترجمہ · UrduUnverified translation

حضرت طارق محاربی رضی اللہ عنہ سے مروی ہے‘ وہ فرماتے ہیں کہ ہم مدینہ میں آئے تو رسول اللہ صلی اللہ علیہ وسلم منبر پر کھڑے لوگوں سے خطاب فرما رہے تھے۔ آپ فرما رہے تھے: ’’دینے والے کا ہاتھ بالا و بلند ہوتا ہے۔ اور تو ان سے شروع کر جن کا تو کفیل ہے‘ یعنی تیری ماں‘ تیرا باپ‘ تیری بہن اور تیرابھائی‘ پھر درجہ بدرجہ تیرے قریبی ۔‘‘ (اسے نسائی نے روایت کیا ہے اور ابن حبان اور دارقطنی نے اسے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’غلام کا کھانا پینا اور لباس مہیا کرنا (مالک پر واجب) ہے۔ اور اسے صرف اس کام پر مامور کیا جائے جس کی وہ طاقت رکھتا ہو۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت حکیم بن معاویہ قشیری‘ اپنے باپ رضی اللہ عنہ سے روایت کرتے ہیں‘ انھوں نے فرمایا کہ میں نے عرض کیا: اے اللہ کے رسول ! ہم میں سے کسی پر اس کی اہلیہ کا کیا حق ہے؟ آپ نے فرمایا: ’’(وہ حق) یہ ہے کہ جب خود کھاؤ تو اسے بھی کھلاؤ۔ جب خود پہنو تو اسے بھی پہناؤ اور اس کے منہ پر نہ مارو اور اسے برا بھلا نہ کہو۔‘‘ (یہ ایک لمبی حدیث ہے۔ اور باب عشرۃ النساء میں (۸۷۲ کے تحت) گزر چکی ہے۔)

اردو ترجمہ · UrduUnverified translation

حضرت جابر رضی اللہ عنہ نبی صلی اللہ علیہ وسلم سے حج کے بارے میں لمبی حدیث میں بیان کرتے ہیں کہ آپ نے عورتوں کے بارے میں فرمایا: ’’ان کا نان و نفقہ اور ان کا لباس دستور کے مطابق مہیا کرنا ان کی طرف سے تم پر لازم ہے۔‘‘(اسے مسلم نے روایت کیا ہے۔)

اردو ترجمہ · UrduUnverified translation

حضرت عبداللہ بن عمرو رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’آدمی کے گناہ گار ہونے کے لیے یہی کافی ہے کہ جن کے رزق و اخراجات کا وہ ذمہ دار اور کفیل ہو‘ انھیں ضائع کر دے۔‘‘ (اسے نسائی نے روایت کیا ہے۔ اور یہی روایت مسلم میں ان الفاظ سے ہے: ’’(آدمی کے لیے یہی گناہ کافی ہے کہ) وہ جن کی روزی کا مالک ہے ان کی روزی روک لے۔‘‘

اردو ترجمہ · UrduUnverified translation

حضرت جابر رضی اللہ عنہ سے اس حاملہ عورت کے بارے میں جس کا شوہر فوت ہوگیا ہو‘ مرفوعاً روایت ہے کہ اس کے لیے نفقہ نہیں ہے۔ (اسے بیہقی نے روایت کیاہے اور اس کے راوی ثقہ ہیں لیکن امام بیہقی نے کہا ہے کہ اس کا موقوف ہونا محفوظ ہے۔ نفقہ کی نفی فاطمہ بنت قیس رضی اللہ عنہا کی حدیث سے ثابت ہے جو (۹۴۷ کے تحت) گزر چکی ہے۔ اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’اوپر والا ہاتھ نیچے والے ہاتھ سے بہتر ہے۔ تم میں سے ہر کوئی ان سے (خرچ کی) ابتدا کرے جن کی وہ کفالت کرتا ہے۔ ایسا نہ ہو کہ بیوی کہنے لگے کہ مجھے نان و نفقہ دو یا طلاق دو۔‘‘ (اسے دارقطنی نے روایت کیا ہے اور اس کی سند حسن ہے۔)

اردو ترجمہ · UrduUnverified translation

حضرت سعید بن مسیب رحمہ اللہ سے ایسے آدمی کے متعلق‘ جس کے پاس اپنی بیوی کو نان و نفقہ دینے کے لیے کچھ نہ ہو‘ مروی ہے کہ ان (میاں بیوی) کے درمیان علیحدگی کر دی جائے گی۔ (اس روایت کو سعید بن منصور نے سفیان سے اور انھوں نے ابو زناد سے روایت کیا ہے کہ میں نے سعید بن مسیب سے پوچھا : کیا یہ سنت ہے؟ تو انھوں نے جواب دیا کہ ہاں سنت ہے۔ اور یہ روایت مرسل قوی ہے۔)

اردو ترجمہ · UrduUnverified translation

حضرت عمر رضی اللہ عنہ کے بارے میں مروی ہے کہ انھوں نے امرائے لشکر کے نام ایسے مردوں کے بارے میں تحریر فرمایا جو (فوج میں شریک رہنے کی وجہ سے) اپنی بیویوں سے غائب تھے کہ وہ اپنی بیویوں کو نفقہ روانہ کریں ورنہ طلاق دے دیں۔ اگر طلاق دیں تو جتنی مدت انھوں نے روکے رکھا ہے اس کا نفقہ روانہ کریں۔ (اسے امام شافعی رحمہ اللہ اور بیہقی نے حسن سند سے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ ایک آدمی نے نبی صلی اللہ علیہ وسلم کی خدمت میں حاضر ہو کر عرض کیا: اے اللہ کے رسول! میرے پاس ایک دینار ہے۔ آپ نے فرمایا: ’’اپنے آپ پر خرچ کر۔‘‘ اس نے عرض کیا: میرے پاس ایک اور ہے۔ فرمایا: ’’اپنی اولاد پر خرچ کر۔‘‘ وہ پھر بولا: میرے پاس ایک اور ہے۔ فرمایا: ’’اپنی بیوی پر خرچ کر۔‘‘ اس نے عرض کیا: میرے پاس ایک اور ہے۔ فرمایا: ’’اپنے خادم پر خرچ کر۔‘‘ وہ بولا: میرے پاس ایک اور ہے۔ فرمایا: ’’تو بہتر جانتا ہے (کہ اسے کہاں خرچ کیا جائے۔‘‘) (شافعی اور ابوداود نے اسے بیان کیا ہے اور یہ الفاظ ابوداود کے ہیں۔ اور نسائی اور حاکم نے بھی اسے روایت کیا ہے۔ ان کی روایت میں اولاد سے پہلے بیوی کا ذکر ہے۔)

اردو ترجمہ · UrduUnverified translation

بہز بن حکیم اپنے والد (حکیم) سے اور وہ ان (بہز) کے دادا (معاویہ قشیری رضی اللہ عنہ ) سے روایت کرتے ہیں کہ میں نے عرض کیا: اے اللہ کے رسول! میں حسن سلوک اور بھلائی کس سے کروں؟ آپ نے فرمایا: ’’اپنی والدہ سے۔‘‘ میں نے پھر عرض کیا: پھر کس سے؟ آپ نے فرمایا: ’’اپنی والدہ سے۔‘‘ میں نے پھر عرض کیا: پھر کس سے؟ آپ صلی اللہ علیہ وسلم نے پھر فرمایا: ’’اپنی والدہ سے۔‘‘ میں نے پھر عرض کیا: پھر کس سے؟ آپ صلی اللہ علیہ وسلم نے فرمایا: ’’اپنے والد سے۔پھر درجہ بدرجہ قرابت داروں سے۔‘‘ (اسے ابوداود اور ترمذی نے روایت کیا ہے۔اور ترمذی نے اسے حسن قرار دیا ہے۔)