اردو ترجمہ · UrduUnverified translation

حضرت انس بن مالک رضی اللہ عنہ سے مروی ہے کہ نبی صلی اللہ علیہ وسلم نے حضرت عبدالرحمن بن عوف رضی اللہ عنہ (کے کپڑوں) پر زردی کا نشان دیکھا تو فرمایا: ’’یہ کیا ہے؟‘‘ انھوں نے کہا: اللہ کے رسول! میں نے ایک عورت سے کھجور کی گٹھلی کے مساوی سونے کے عوض نکاح کیا ہے۔ آپ نے فرمایا: ’’اللہ تعالیٰ تجھے برکت دے‘ ولیمہ ضرور کر‘ خواہ ایک بکری ہی ہو۔‘‘ (بخاری و مسلم۔ اور الفاظ مسلم کے ہیں۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’جب تم میں سے کسی کو دعوت ولیمہ پر مدعو کیا جائے تو اسے وہاں پہنچنا چاہیے۔‘‘ (بخاری و مسلم) اور مسلم کی روایت میں ہے: ’’جب تم میں سے کوئی اپنے بھائی کو مدعو کرے تو اسے دعوت قبول کرنی چاہیے‘ خواہ وہ شادی ہو یا اسی طرح کی کوئی اور دعوت۔‘‘

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’بدترین کھانا اس ولیمے کا کھانا ہے جس میں (بخوشی) آنے والے کو منع کر دیا جائے اور جو آنے سے انکاری ہو اسے بلایا جائے۔ اور جس نے دعوت ولیمہ کو قبول نہ کیا تو اس نے اللہ اور اس کے رسول کی نافرمانی کی۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’جب تم میں سے کسی کو (کھانے کی دعوت پر) مدعو کیا جائے تو اسے قبول کرنا چاہیے۔ اگر وہ روزے سے ہو تو (دعوت دینے والے کے لیے) دعا کرے اور اگر روزے سے نہ ہو تو پھر اسے کھانا کھانا چاہیے۔‘‘ (اسے بھی مسلم نے روایت کیا ہے۔)اور مسلم میں حضرت جابر رضی اللہ عنہ سے بھی اسی طرح کی روایت ہے اور اس میں آپ کا ارشاد ہے: ’’اگر وہ چاہے تو کھا لے اور اگر چاہے تو چھوڑ دے۔‘‘

اردو ترجمہ · UrduUnverified translation

حضرت ابن مسعود رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’ولیمے کا کھانا پہلے روز حق ہے اور دوسرے روز کا کھانا مروجہ طریقہ ہے اور تیسرے روز کا کھانا شہرت و ریاکاری ہے۔ اور جو شخص ریاکاری کرتا ہے اللہ تعالیٰ اسے رسو اکرے گا۔‘‘ (اسے ترمذی نے روایت کیا ہے اور اسے غریب قرار دیا ہے۔ اور اس حدیث کے راوی صحیح (بخاری) کے راوی ہیں اور ابن ماجہ میں حضرت انس رضی اللہ عنہ سے مروی روایت اس کا شاہد ہے۔)

اردو ترجمہ · UrduUnverified translation

حضرت صفیہ بنت شیبہ رضی اللہ عنہا سے مروی ہے‘ وہ فرماتی ہیں کہ نبی صلی اللہ علیہ وسلم نے اپنی بیویوں میں سے کسی بیوی کا ولیمہ دو مُدجو سے کیا۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت انس رضی اللہ عنہ سے مروی ہے‘ وہ فرماتے ہیں کہ نبی صلی اللہ علیہ وسلم نے خیبر اور مدینہ کے درمیان تین روز تک قیام کیا۔ حضرت صفیہ رضی اللہ عنہا (کے ساتھ شب زفاف گزارنے) کے لیے آپ کی خاطر وہاں خیمہ لگایا گیا‘ چنانچہ میں نے مسلمانوں کو آپ صلی اللہ علیہ وسلم کے ولیمے کی دعوت دی۔ اس (دعوت) میں روٹی تھی نہ گوشت۔ اس (تقریب) میں بس یہی تھا کہ آپ نے چرمی دسترخوان (بچھانے ) کا حکم دیا تو وہ بچھا دیے گئے اور ان پر کھجوریں‘ پنیر اور گھی لا کر رکھ دیا گیا۔ (بخاری و مسلم۔ اور یہ الفاظ بخاری کے ہیں۔)

اردو ترجمہ · UrduUnverified translation

نبی صلی اللہ علیہ وسلم کے صحابۂ کرام رضی اللہ عنہم میں سے ایک آدمی سے مروی ہے‘ انھوں نے فرمایا: جب دو آدمیوں نے دعوت طعام دی ہو تو جس کا دروازہ زیادہ قریب ہو اس کی دعوت قبول کرو‘ اور اگر ان میں سے ایک نے پہل کی ہو تو پہل کرنے والے کی دعوت قبول کرو۔‘‘ (اسے ابوداود نے روایت کیا ہے‘ اوراس کی سند ضعیف ہے۔)

اردو ترجمہ · UrduUnverified translation

حضرت ابوجحیفہ رضی اللہ عنہ سے مروی ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’میں ٹیک لگا کر نہیں کھایا کرتا۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت عمر بن ابوسلمہ رضی اللہ عنہ سے مروی ہے‘ وہ فرماتے ہیں کہ رسول اللہ صلی اللہ علیہ وسلم نے مجھ سے فرمایا: ’’اے بچے! بِسْمِ اللّٰہ پڑھو ‘اپنے دائیں ہاتھ سے کھاؤ اور اپنے سامنے سے کھاؤ۔‘‘ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ نبی صلی اللہ علیہ وسلم کی خدمت میں ثرید سے بھرا ہوا ایک بڑا پیالہ پیش کیا گیا تو آپ نے فرمایا: ’’پیالے کے اطراف سے کھاؤ‘ اس کے درمیان سے نہ کھاؤ‘ اس لیے کہ اس کے درمیان میں برکت نازل ہوتی ہے۔‘‘ (اسے چاروں نے روایت کیا ہے اور یہ الفاظ نسائی کے ہیں اور اس کی سند صحیح ہے۔)

اردو ترجمہ · UrduUnverified translation

حضرت جابر رضی اللہ عنہ نبی صلی اللہ علیہ وسلم سے بیان کرتے ہیں کہ آپ نے فرمایا: ’’بائیں ہاتھ سے نہ کھاؤ‘ اس لیے کہ شیطان بائیں ہاتھ سے کھاتا ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوقتادہ رضی اللہ عنہ سے روایت ہے‘ نبی ٔاکرم صلی اللہ علیہ وسلم نے فرمایا: ’’جب تم میں سے کوئی شخص پیے تو برتن میں سانس نہ لے۔‘‘ (بخاری و مسلم) حضرت ابن عباس رضی اللہ عنہما سے اسی طرح کی روایت ابوداود میں بھی ہے اور اس میں یہ اضافہ ہے: ’’اس میں پھونک نہ مارے۔‘‘ (ترمذی نے اسے صحیح قرار دیا ہے۔)