اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ وہ فرماتی ہیں کہ رسول اللہ صلی اللہ علیہ وسلم اپنی ازواج مطہرات کے درمیان باری تقسیم کرتے تھے اور اس معاملے میں انصاف سے کام لیتے تھے اور فرمایا کرتے تھے: ’’الٰہی! جو میرے بس میں ہے‘ اس کے مطابق یہ میری تقسیم ہے اور جو میرے بس میں نہیں بلکہ تیرے اختیار میں ہے‘ اس میں مجھے ملامت نہ کرنا۔‘‘ (اسے چاروں نے روایت کیا ہے اور ابن حبان اور حاکم نے اسے صحیح قرار دیا ہے۔ لیکن ترمذی نے اس روایت کے مرسل ہونے کو ترجیح دی ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’جس شخص کی دو بیویاں ہوں اور اس کا رجحان ایک کی طرف ہو تو وہ قیامت کے روز ایسی حالت میں آئے گا کہ اس کا ایک پہلو مفلوج ہو گا۔‘‘ (اسے احمد اور چاروں نے روایت کیا ہے اور اس کی سند صحیح ہے۔)

اردو ترجمہ · UrduUnverified translation

حضرت انس رضی اللہ عنہ سے روایت ہے‘ وہ فرماتے ہیں کہ مسنون طریقہ یہ ہے کہ اگر کوئی شخص شوہر دیدہ کی موجودگی میں کنواری سے شادی کرے تو اس (نئی دلھن) کے پاس سات دن قیام کرے‘ پھر باری تقسیم کرے۔ اور جب کنواری کی موجودگی میں شوہر دیدہ سے نکاح کرے تو اس کے پاس تین روز قیام کرے‘ پھر باری تقسیم کرے۔ (بخاری و مسلم ۔ یہ الفاظ بخاری کے ہیں۔)

اردو ترجمہ · UrduUnverified translation

حضرت ام سلمہ رضی اللہ عنہا سے مروی ہے کہ نبی صلی اللہ علیہ وسلم نے جب ان سے نکاح کیا تو ان کے پاس تین روز قیام کیا اور فرمایا: ’’تو اپنے اہل خانہ کے ہاں بے قدر (اور حقیر) نہیں ہے۔ اگرتو چاہتی ہے تو میں تیرے لیے سات روز مقرر کرتا ہوں۔ اوراگر تیرے لیے سات دن مقرر کیے تو اپنی باقی سب عورتوں کے ہاں بھی سات سات دن گزاروں گا۔‘‘ (مسلم)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ حضرت سودہ بنت زمعہ رضی اللہ عنہا نے اپنی باری کا دن حضرت عائشہ رضی اللہ عنہا کو ہبہ کر دیا‘ اور نبی صلی اللہ علیہ وسلم حضرت عائشہ رضی اللہ عنہا کے لیے ان کا اپنا دن اور حضرت سودہ رضی اللہ عنہا کا دن بھی تقسیم کرتے تھے۔ (بخاری و مسلم)

اردو ترجمہ · UrduUnverified translation

حضرت عروہ رحمہ اللہ سے روایت ہے‘ وہ فرماتے ہیں کہ حضرت عائشہ رضی اللہ عنہا نے فرمایا: اے بھانجے! رسول اللہ صلی اللہ علیہ وسلم ہمارے پاس ٹھہرنے کی تقسیم میں ہم میں سے کسی کو کسی پر فوقیت و فضیلت نہیں دیتے تھے۔ اور کم ہی ایسا کوئی دن ہوگا جس میں آپ ہم سب کے پاس نہ آتے ہوں۔ آپ ہر بیوی کے پاس جاتے مگر مباشرت نہ کرتے حتیٰ کہ اس بیوی کے پاس پہنچ جاتے جس (کی باری) کا دن ہوتا‘ چنانچہ آپ رات اس کے پاس بسر کرتے۔ (اسے احمد اور ابوداود نے روایت کیا ہے۔اور یہ الفاظ ابوداود کے ہیں‘ نیز حاکم نے اسے صحیح کہا ہے۔) اور مسلم میں حضرت عائشہ رضی اللہ عنہا سے مروی ہے‘ وہ فرماتی ہیں کہ رسول اللہ صلی اللہ علیہ وسلم جب نماز عصر ادا فرما لیتے تو اپنی ساری بیویوں کے پاس چکر لگاتے، پھر ان کے قریب بھی ہوتے …الحدیث۔

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ رسول اللہ صلی اللہ علیہ وسلم نے جس مرض میں وفات پائی اس میں دریافت فرماتے تھے: ’’میں کل کہاں ہوں گا؟ (کل میری باری کس کے ہاں ہے؟‘‘) آپ کا مقصود حضرت عائشہ رضی اللہ عنہا کا دن تھا‘ چنانچہ آپ کی ازواج مطہرات نے اس بات کی اجازت دے دی کہ آپ جہاں چاہیں رہیں‘ پھر آپ حضرت عائشہ رضی اللہ عنہا کے ہاں ہی رہے۔ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا ہی سے روایت ہے‘ وہ فرماتی ہیں کہ رسول اللہ صلی اللہ علیہ وسلم جب کسی سفر کا ارادہ فرماتے تو اپنی بیویوں کے درمیان قرعہ ڈالتے‘ چنانچہ جس بیوی کے نام قرعہ نکلتا اسے ساتھ لے جاتے۔(بخاری و مسلم)

اردو ترجمہ · UrduUnverified translation

حضرت عبداللہ بن زمعہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’تم میں سے کوئی اپنی بیوی کو غلاموں کی طرح نہ مارے۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ حضرت ثابت بن قیس رضی اللہ عنہ کی اہلیہ نبی صلی اللہ علیہ وسلم کی خدمت میں حاضر ہوئی اور عرض کیا: اے اللہ کے رسول! میں ثابت بن قیس کے اخلاق اور دین میں کوئی عیب نہیں نکالتی لیکن اسلام (کی موجودگی )میں نافرمانی و ناشکری کو مکروہ جانتی ہوں۔ رسول اللہ صلی اللہ علیہ وسلم نے فرمایا: ’’کیا تو اس کا باغ اسے واپس کر دے گی؟‘‘ اس نے کہا: جی ہاں!۔ تو رسول اللہ صلی اللہ علیہ وسلم نے فرمایا: ’’(اے ثابت!) اپنا باغ لے لو اور اسے طلاق دے دو۔‘‘ (اسے بخاری نے روایت کیا ہے‘ اور بخاری ہی کی ایک روایت میں ہے: آپ نے اسے طلاق دینے کا حکم دیا۔ ابوداود اور ترمذی میں ہے‘ اور امام ترمذی نے اسے حسن قرار دیا ہے‘ کہ حضرت ثابت بن قیس رضی اللہ عنہ کی بیوی نے ان سے خلع کیا تو نبی صلی اللہ علیہ وسلم نے اس کے لیے عدت ایک حیض مقرر فرمائی۔ اور ابن ماجہ میں عمرو بن شعیب عن ابیہ عن جدہ کی سند سے منقول روایت میں ہے: ثابت بن قیس رضی اللہ عنہ خوبصورت نہ تھے اور ان کی بیوی نے کہا: اگر مجھے اللہ کا خوف اور ڈر نہ ہوتا تو جس وقت وہ (خلوت میں) میرے پاس آیا تھا‘ میں اس کے منہ پر تھوک دیتی۔ اور مسند احمد میں حضرت سہل بن ابی حثمہ رضی اللہ عنہ سے مروی ہے کہ اسلام میں یہ پہلا خلع تھا۔