اردو ترجمہ · UrduUnverified translation

حضرت مسور بن مخرمہ رضی اللہ عنہ سے روایت ہے کہ سُبَیْعہ اسلَمِیّہ رضی اللہ عنہا نے اپنے شوہر کی وفات کے چند روز بعد بچہ جنا۔ بعد ازاں وہ نبی صلی اللہ علیہ وسلم کی خدمت میں حاضر ہوئی اور نکاح کی اجازت طلب کی۔ آپ نے اسے نکاح کی اجازت دے دی اور اس نے نکاح کر لیا۔ (اسے بخاری نے روایت کیا ہے اور اس حدیث کی اصل بخاری و مسلم دونوں میں موجود ہے۔) اور ایک روایت میں ہے کہ اس نے اپنے شوہر کی وفات کے چالیس روز بعد بچہ جنم دیا۔ اور مسلم کی روایت کے الفاظ ہیں کہ زہری نے کہا: میں اس میں کوئی مضائقہ نہیں سمجھتا کہ عورت حالت نفاس ہی میں نکاح کر لے مگر اس کا شوہر اس وقت تک اس کے قریب نہ جائے جب تک کہ وہ (نفاس سے غسل کر کے) پاک صاف نہ ہو جائے۔

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ حضرت بریرہ رضی اللہ عنہا کو حکم دیا گیا کہ وہ تین حیض عدت گزارے۔ (اسے ابن ماجہ نے روایت کیا ہے اوراس کے راوی ثقہ ہیں‘ لیکن یہ روایت معلول ہے۔)

اردو ترجمہ · UrduUnverified translation

شعبی نے فاطمہ بنت قیس رضی اللہ عنہا سے روایت کیا ہے کہ نبی صلی اللہ علیہ وسلم نے مطلقۂ ثلاثہ کے متعلق فرمایا: ’’اس کے لیے رہائش ہے نہ نان و نفقہ۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ام عطیہ رضی اللہ عنہا سے مروی ہے‘ رسول اللہ صلی اللہ علیہ وسلم نے فرمایا: ’’کوئی عورت کسی میت پر تین روز سے زیادہ سوگ نہ منائے سوائے خاوند کے‘ اس پر چار ماہ دس دن سوگ منائے۔ (سوگ کی مدت میں) رنگ دار لباس نہ پہنے لیکن (رنگے ہوئے سوت کا) دھاری دار کپڑا پہن سکتی ہے۔ نہ سرمہ لگائے‘ نہ خوشبو کو چھوئے‘ مگر جب ایام حیض سے پاک ہو تو تھوڑی سی عود ہندی یا اظفار استعمال کر سکتی ہے۔‘‘ (بخاری و مسلم- اوریہ الفاظ مسلم کے ہیں۔) اور ابوداود اور نسائی میں یہ اضافہ ہے:’’ مہندی و خضاب بھی نہ لگائے۔‘‘ اور نسائی میں ہے:’’ کنگھی بھی نہ کرے۔‘‘

اردو ترجمہ · UrduUnverified translation

حضرت ام سلمہ رضی اللہ عنہا سے روایت ہے‘ وہ فرماتی ہیں کہ حضرت ابوسلمہ رضی اللہ عنہ کی وفات کے بعد میں نے اپنی آنکھوں پر ایلوا لگایا تو رسول اللہ صلی اللہ علیہ وسلم نے فرمایا: ’’یہ چہرے کے حسن کو دوبالا کرتا ہے‘ اس لیے اسے صرف رات کے اوقات میں لگایا کرو اور دن کو اتار دیا کرو۔ اور کسی خوشبو والی چیز کے ساتھ اور مہندی کے ساتھ کنگھی نہ کرو (سر نہ دھوؤ) کیونکہ یہ خضاب ہے۔‘‘ میں نے عرض کیا: تو پھر کس چیز کے ساتھ کنگھی کروں؟ آپ نے فرمایا: ’’بیری کے پتوں (کو پانی میں جوش دے کر اس) کے ساتھ۔‘‘ (اسے ابوداود اور نسائی نے روایت کیا ہے اور اس کی سند حسن ہے۔)

اردو ترجمہ · UrduUnverified translation

حضرت ام سلمہ رضی اللہ عنہا ہی سے مروی ہے کہ ایک عورت نے عرض کیا: اے اللہ کے رسول ! میری بیٹی کا شوہر وفات پا گیا ہے اور وہ آشوب چشم میں مبتلا ہوگئی ہے۔ کیا ہم اس کی آنکھوں میں سرمہ لگا دیں؟ آپ نے فرمایا: ’’نہیں۔‘‘ (بخاری و مسلم)

اردو ترجمہ · UrduUnverified translation

حضرت جابر رضی اللہ عنہ سے روایت ہے‘ وہ فرماتے ہیں کہ میری خالہ کو طلاق دی گئی تو انھوں نے (دوران عدت میں) اپنی کھجور کا پھل اتارنے کے ارادے سے باہر جانا چاہا تو ایک آدمی نے انھیں گھر سے باہر نکلنے سے ڈانٹا۔ وہ نبی صلی اللہ علیہ وسلم کی خدمت میں حاضر ہوئیں‘ تو آپ نے فرمایا: ’’ہاں! تم اپنی کھجوروں کا پھل توڑ سکتی ہو۔ عین ممکن ہے کہ تم اس میں سے صدقہ کرو یا کوئی اور عمل خیر کرو۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت فُرَیعہ بنت مالک رضی اللہ عنہا سے مروی ہے کہ ان کا شوہر اپنے (بھاگے ہوئے) غلاموں کی تلاش میں نکلا تو انھوں نے اسے قتل کر دیا۔ فریعہ کا بیان ہے کہ میں نے رسول اللہ صلی اللہ علیہ وسلم سے اپنے میکے لوٹ جانے کے متعلق دریافت کیا کیونکہ میرے شوہر نے اپنی ملکیت میں میرے لیے کوئی گھر چھوڑا نہ نفقہ۔ آپ نے فرمایا: ’’ہاں! (تم اپنے میکے جا سکتی ہو۔‘‘) جب میں حجرے میں پہنچی تو آپ نے مجھے آواز دی اور فرمایا: ’’تم اس وقت تک اپنے گھر ہی میں ٹھہری رہو جب تک کہ تمھاری عدت پوری نہ ہو جائے۔‘‘ فریعہ کا بیان ہے کہ پھر میں نے عدت‘ چار ماہ دس دن اسی مکان میں پوری کی۔ فرماتی ہیں کہ پھر حضرت عثمان رضی اللہ عنہ نے بھی اس کے بعد اسی کے مطابق فیصلہ دیا۔ (اسے احمد اور چاروں نے بیان کیا ہے۔ ترمذی‘ ذہلی‘ ابن حبان اور حاکم وغیرہم نے اسے صحیح قرار دیا ہے۔)

اردو ترجمہ · UrduUnverified translation

حضرت فاطمہ بنت قیس رضی اللہ عنہا سے روایت ہے‘ وہ فرماتی ہیں کہ میں نے عرض کیا: اے اللہ کے رسول ! میرے خاوند نے مجھے تین طلاقیں دے دی ہیں اور مجھے اندیشہ ہے کہ کوئی میرے پاس زبردستی گھس نہ آئے ۔ راوی کا بیان ہے کہ آپ نے اسے حکم دیا تو وہ وہاں سے منتقل ہوگئی۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت عمرو بن عاص رضی اللہ عنہ سے مروی ہے کہ ہمارے نبی صلی اللہ علیہ وسلم کی سنت ہم پر خلط ملط نہ کرو۔ جب ام ولد کا مالک وفات پا جائے تو اس کی عدت چار ماہ اور دس دن ہے۔(اس روایت کو احمد‘ ابوداود اور ابن ماجہ نے روایت کیا ہے۔ حاکم نے اسے صحیح قرار دیا ہے اور دارقطنی نے اسے انقطاع کی وجہ سے معلول قرار دیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ أَقْرَآء سے طہر ہی مراد ہیں۔ (اسے امام مالک نے ایک قصے کے تحت صحیح سند کے ساتھ نقل کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے کہ لونڈی کی طلاق دو طلاقیں ہیں اور اس کی عدت دو حیض ہیں۔ (اسے دارقطنی نے روایت کیا ہے اور انھوں نے اسے مرفوع بھی بیان کیا ہے مگر اسے ضعیف کہا ہے‘ نیز اس روایت کو امام ابوداود‘ ترمذی اور ابن ماجہ نے حضرت عائشہ رضی اللہ عنہا کے حوالے سے بیان کیا ہے۔ اورحاکم نے اسے صحیح کہا ہے مگر دوسرے محدثین نے ان کی مخالفت کی ہے‘ وہ اس کے ضعیف ہونے پر متفق ہیں۔)

اردو ترجمہ · UrduUnverified translation

حضرت رویفع بن ثابت رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’جو شخص اللہ اور یوم آخرت پر ایمان رکھتا ہو اس کے لیے حلال نہیں کہ وہ اپنے پانی سے غیر کی کھیتی کو سیراب کرے۔‘‘ (اسے ابوداود اور ترمذی نے روایت کیا ہے۔ ابن حبان نے اسے صحیح قرار دیا ہے اور بزار نے اسے حسن کہا ہے۔)

اردو ترجمہ · UrduUnverified translation

حضرت عمر رضی اللہ عنہ سے‘ گم شدہ مرد کی بیوی کے بارے میں‘ مروی ہے کہ وہ چار سال انتظار کرے گی‘ پھر چار ماہ دس دن عدت گزارے گی۔ (اسے مالک و شافعی رحمہما اللہ نے روایت کیا ہے۔)

اردو ترجمہ · UrduUnverified translation

حضرت مغیرہ بن شعبہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’مفقود الخبر کی بیوی‘ اس کی بیوی ہی رہتی ہے جب تک کہ اس (بیوی) کو واضح طور پر اطلاع موصول نہ ہو جائے۔‘‘ (دارقطنی نے اسے ضعیف سند سے روایت کیا ہے۔)

اردو ترجمہ · UrduUnverified translation

حضرت جابر رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’کوئی شخص کسی عورت کے پاس رات بسر نہ کرے‘ الا یہ کہ وہ مرد اس کا شوہر ہو یا محرم ہو۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’کوئی بھی شخص کسی عورت کے ساتھ تنہائی اور خلوت اختیار نہ کرے جب تک کہ اس کے ساتھ اس کا محرم نہ ہو۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے مروی ہے کہ نبی صلی اللہ علیہ وسلم نے اوطاس کی قیدی عورتوں کے متعلق فرمایا: ’’کسی حاملہ عورت سے مباشرت نہ کی جائے حتی کہ اس کے بچے کی ولادت ہو جائے‘ اور غیر حاملہ سے بھی اس وقت تک مباشرت نہ کی جائے جب تک اسے ایک حیض نہ آجائے۔‘‘ (اسے ابوداود نے روایت کیا ہے اور حاکم نے اسے صحیح قرار دیا ہے۔ دارقطنی میں ابن عباس رضی اللہ عنہما سے بھی اس کا شاہد مروی ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’بچہ صاحب ِفراش کا ہے اور زانی کے لیے پتھر ہیں۔‘‘ (بخاری و مسلم بروایت حضرت ابوہریرہ و حضرت عائشہ رضی اللہ عنہما جبکہ حضرت عائشہ رضی اللہ عنہا کی حدیث میں ایک قصہ بھی مروی ہے۔ اور حضرت عبداللہ بن مسعود رضی اللہ عنہ کے حوالے سے نسائی نے اور حضرت عثمان رضی اللہ عنہ کے حوالے سے ابوداود نے یہی روایت بیان کی ہے۔)