اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ فلاں شخص نے سوال کیا: اے اللہ کے رسول !بتائیے اگر ہم میں سے کوئی اپنی اہلیہ کو برائی کی حالت میں پائے تو وہ کیا کرے؟ اگر وہ اسے دوسروں سے بیان کرتا ہے تو یہ نہایت قبیح فعل ہے اور اگر خاموش رہتا ہے تو یہ بھی نہایت مشکل کام ہے۔ آپ نے اس کا کوئی جواب نہ دیا۔ پھر جب بعد میں وہ آیا تو اس نے کہا کہ تحقیق جو کچھ میں نے آپ سے پوچھا ہے‘ میں خود ہی اس میں مبتلا ہوا ہوں‘ چنانچہ اللہ تعالیٰ نے سورۂ نور کی آیات نازل فرمائیں۔ آپ نے وہ آیات اس کے سامنے پڑھیں اور اسے نصیحت فرمائی اور اللہ کی سزا یاد کرائی اور اسے متنبہ کیا کہ دنیا کی سزا آخرت کے عذاب سے بہت ہلکی ہے۔ اس نے کہا: نہیں‘ اس ذات کی قسم جس نے آپ کو حق کے ساتھ مبعوث فرمایا ہے! میں نے اس پر الزام نہیں لگایا ہے۔ پھر رسول اللہ صلی اللہ علیہ وسلم نے اس عورت کو بلوایا اور اسے بھی اسی طرح نصیحت فرمائی۔ اس نے بھی کہا: نہیں اس ذات کی قسم جس نے آپ کو حق کے ساتھ مبعوث فرمایا ہے! یقینا یہ جھوٹا ہے۔ پھر آپ نے اس مرد سے آغاز فرمایا۔ اس نے اللہ کی چار قسمیں کھائیں ‘پھر آپ نے عورت سے بھی قسمیں لیں‘ پھر دونوں کے درمیان تفریق کردی۔ (اسے مسلم نے روایت کیا ہے۔ )

اردو ترجمہ · UrduUnverified translation

حضرت ابن عمر رضی اللہ عنہما ہی سے مروی ہے کہ رسول اللہ صلی اللہ علیہ وسلم نے دو لعان کرنے والوں سے فرمایا: ’’تم دونوں کا حساب اللہ کے ذمے ہے۔ دونوں میں سے ایک جھوٹا ہے‘ اب تیرا اس عورت پر کوئی حق نہیں۔‘‘ اس (مرد) نے عرض کیا: اے اللہ کے رسول! میرا مال (مجھے دلوا دیجیے۔) آپ نے فرمایا: ’’اگر تو نے اس پر سچ کہا ہے تو پھر وہ مال اس کا عوض ہے جو تونے اس کی شرمگاہ کو اپنے لیے حلال کیا ہے۔ اور اگر تو نے اس پر الزام لگایا ہے تو اس مال کا تجھے ملنا اور بھی بعید ہے۔‘‘ (بخاری و مسلم)

اردو ترجمہ · UrduUnverified translation

حضرت انس رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’عورت پر نظر رکھو‘ اگر اس نے سفید رنگ کا‘ سیدھے بالوں والا بچہ جنم دیا تو وہ اس کے شوہر کا ہے۔ اور اگر اس نے ایسا بچہ جنم دیا جس کی آنکھیں سرمگیں اور بال گھنگھریالے ہوں تو پھر وہ بچہ اس کا ہوگا جس کے متعلق شوہر نے اس پر تہمت لگائی ہے۔‘‘ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے ایک شخص کو حکم دیا کہ وہ پانچویں قسم کے وقت قسم کھانے والے کے منہ پر ہاتھ رکھ دے اور آپ نے فرمایا: ’’یہ (پانچویں قسم) واجب کر دینے والی ہے۔‘‘ (اسے ابوداود اور نسائی نے روایت کیا ہے۔ اس کے راوی ثقہ ہیں۔)

اردو ترجمہ · UrduUnverified translation

حضرت سہل بن سعد رضی اللہ عنہ سے دو لعان کرنے والوں کے قصے میں مروی ہے‘ وہ فرماتے ہیں کہ جب وہ دونوں لعان سے فارغ ہوگئے تو مرد نے کہا: اے اللہ کے رسول ! اگر میں اب اسے اپنے پاس ٹھہرا لوں تو گویا میں نے اس پر جھوٹا الزام لگایا ہے‘ چنانچہ (یہ کہہ کر) اس نے اس سے پہلے کہ رسول اللہ صلی اللہ علیہ وسلم اسے حکم فرماتے‘ اسے تین طلاقیں دے دیں۔ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ ایک آدمی رسول اللہ صلی اللہ علیہ وسلم کی خدمت میں حاضر ہوا اور عرض کیا: (اے اللہ کے رسول!) میری بیوی کسی چھونے والے کا ہاتھ رد نہیں کرتی۔ آپ نے فرمایا: ’’اسے دور کر دے۔‘‘ اس نے کہا: مجھے اندیشہ ہے کہ میرا جی اس کے پیچھے رہے گا۔ آپ نے فرمایا: ’’تو پھر اس سے فائدہ اٹھاتا رہ۔‘‘ ( اسے ابوداود اور بزار نے روایت کیا ہے اور اس کے راوی ثقہ ہیں۔) اور امام نسائی نے ایک دوسری سند سے حضرت ابن عباس رضی اللہ عنہما کے واسطے سے اسے ان الفاظ کے ساتھ روایت کیا ہے کہ آپ صلی اللہ علیہ وسلم نے فرمایا: ’’اسے طلاق دے دو۔‘‘ اس نے کہا: میں تو اس کے بغیر صبر نہیں کر سکتا۔ آپ نے فرمایا: ’’تو پھر اسے اپنے پاس ٹھہرائے رکھو۔‘‘

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ جب دو لعان کرنے والوں کے بارے میں آیت نازل ہوئی تو انھوں نے رسول اللہ صلی اللہ علیہ وسلم کو یہ فرماتے ہوئے سنا: ’’جو عورت کسی قوم میں ایسا بچہ شامل کرے جو اس قوم میں سے نہ ہو تو اس عورت کا اللہ تعالیٰ (کی رحمت اور دین) سے کوئی تعلق نہیں۔ اور اللہ تعالیٰ ایسی عورت کو ہرگز اپنی جنت میں داخل نہیں کرے گا۔ اور جس مرد نے اپنے بچے کا انکار کیا جبکہ وہ اس کی طرف دیکھ رہا ہو ‘ تو (قیامت کے روز) اللہ تعالیٰ اس سے پردے میں ہو جائے گا اور اسے پہلی اور پچھلی ساری مخلوق کے سامنے ذلیل و رسوا کرے گا۔‘‘ (اسے ابوداود‘ نسائی اور ابن ماجہ نے روایت کیا ہے اور ابن حبان نے اسے صحیح کہا ہے۔)

اردو ترجمہ · UrduUnverified translation

حضرت عمر رضی اللہ عنہ سے روایت ہے کہ جس شخص نے لمحہ بھر کے لیے بھی اپنے بچے کا اقرار کیا تو اسے اس کی نفی کرنے کا کوئی اختیار نہیں ہے۔ (اسے بیہقی نے روایت کیا ہے اور یہ روایت حسن موقوف ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ ایک شخص نے عرض کیا: اے اللہ کے رسول ! میری بیوی نے کالے رنگ کا بچہ جنا ہے۔ آپ نے اس سے پوچھا: ’’کیا تمھارے پاس کچھ اونٹ ہیں؟‘‘ اس نے کہا: جی ہاں۔ آپ نے دریافت فرمایا: ’’ان کے رنگ کیا ہیں؟‘‘ اس نے کہا: سرخ۔ آپ نے دریافت فرمایا: ’’ان میں کوئی خاکستری رنگ کا بھی ہے؟‘‘ اس نے کہا: جی ہاں۔ آپ نے دریافت فرمایا: ’’وہ (رنگ) کہاں سے آگیا؟‘‘ اس نے کہا: کوئی رگ اسے کھینچ لائی ہوگی۔ چنانچہ آپ نے فرمایا: ’’پھر تیرے اس بیٹے کو بھی کوئی رگ کھینچ لائی ہوگی۔‘‘ (بخاری و مسلم) اور مسلم کی ایک روایت میں ہے: وہ اس بچے کی نفی کی طرف اشارہ کر رہا تھا۔ اور اس روایت کے آخر میں ہے کہ آپ نے اسے بچے کی نفی کی رخصت و اجازت نہ دی۔