اردو ترجمہ · UrduUnverified translation

حضرت عبداللہ بن مسعود رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے ہم سے فرمایا: ’’اے نوجوانوں کی جماعت! تم میں سے جسے نکاح کرنے کی استطاعت ہو‘ اسے نکاح کرنا چاہیے کیونکہ نکاح نگاہ کو خوب جھکانے والا اور شرمگاہ کو محفوظ رکھنے والا ہے۔ اور جسے اس کی استطاعت نہ ہو اسے روزے کا اہتمام کرنا چاہیے‘ اس لیے کہ وہ (روزہ) اس کی خواہشات کو کچل دیتا ہے۔‘‘ (بخاری و مسلم)

اردو ترجمہ · UrduUnverified translation

حضرت انس بن مالک رضی اللہ عنہ سے مروی ہے کہ نبی صلی اللہ علیہ وسلم نے اللہ تعالیٰ کی حمد و ثنا کی اور فرمایا: ’’لیکن میں (رات کے وقت) نماز بھی ادا کرتا ہوں اور سوتا بھی ہوں‘ (نفلی) روزے رکھتا بھی ہوں اور چھوڑ بھی دیتا ہوں اور میں عورتوں سے نکاح بھی کرتا ہوں‘ لہٰذا جس کسی نے میری سنت سے منہ پھیرا اس کا مجھ سے کوئی تعلق نہیں۔‘‘ (بخاری و مسلم)

اردو ترجمہ · UrduUnverified translation

حضرت انس رضی اللہ عنہ ہی سے روایت ہے‘ وہ فرماتے ہیں کہ رسول اللہ صلی اللہ علیہ وسلم نکاح کرنے کا حکم دیا کرتے اور تجرد کی زندگی سے سختی سے منع کرتے اور فرماتے تھے: ’’بہت محبت کرنے والی‘ بہت بچے جننے والی خواتین سے نکاح کرو‘ اس لیے کہ میں تمھاری کثرت کی بدولت قیامت کے روز دوسرے انبیاء پر فخر کروں گا۔‘‘ (اسے احمد نے روایت کیا ہے اور ابن حبان نے اسے صحیح کہا ہے‘ نیز اس حدیث کا ایک شاہد ابوداود‘ نسائی اور ابن حبان میں حضرت معقل بن یسار رضی اللہ عنہ کے حوالے سے مروی ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’عورت سے نکاح چار اسباب و وجوہ کی بنا پر کیا جاتا ہے: اس کے مال کی وجہ سے‘ اس کے خاندان کی وجہ سے‘ اس کے حسن و جمال کی وجہ سے اور اس کے دین کی بنا پر۔ تو دین دار کے ذریعے سے کامیابی حاصل کر۔ تیرے دونوں ہاتھ خاک آلود ہوں۔‘‘ (بخاری و مسلم‘ نیز ساتوں میں سے باقی نے بھی اسے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے کہ نبی صلی اللہ علیہ وسلم جب کسی شخص کو اس کی شادی پر مبارکباد دیتے تو فرماتے: [بَارَکَ اللّٰہُ لَکَ‘ وَبَارَکَ عَلَیْکَ‘ وَجَمَعَ بَیْنَکُمَا فِي خَیْرٍ ] ’’اللہ تعالیٰ تیرے لیے (معاملات میں) برکت فرمائے اور تجھ پر برکت نازل فرمائے اور تم دونوں کو بھلائی اور خیر پر جمع رکھے۔‘‘ (اسے احمد اور چاروں نے روایت کیا ہے‘ نیز ترمذی‘ ابن خزیمہ اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت عبداللہ بن مسعود رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے ہمیں حاجت و ضرورت میں یہ تشہد سکھایا: [إِنَّ الْحَمْــدَ لِلّٰــہِ‘ نَحْمَدُہُ… وَأَشْھَدُ أَنَّ مُحَمَّدًا عَبْدُہُ وَرَسُولُہُ] ’’سب تعریفیں اللہ ہی کے لیے ہیں۔ ہم اس کی حمد کرتے ہیں‘ اس سے مدد کے طلب گار ہیں‘ اس سے مغفرت و بخشش مانگتے ہیں۔ اور اپنے نفسوں کے شر سے (بچنے کے لیے) اللہ کی پناہ میں آتے ہیں۔ جسے اللہ ہدایت سے نوازے اسے کوئی گمراہ کرنے والا نہیں اور جسے اللہ گمراہ کرے اسے کوئی ہدایت دینے والا نہیں۔ اور میں شہادت دیتا ہوں کہ اللہ کے سوا کوئی معبود (حقیقی) نہیں اور میں شہادت دیتا ہوں کہ محمد ( صلی اللہ علیہ وسلم ) اس کے بندے اور رسول ہیں۔‘‘ اور پھر آپ نے تین آیات تلاوت فرمائیں۔ (اسے احمد اور چاروں نے روایت کیا ہے۔ ترمذی اور حاکم نے اسے حسن کہا ہے۔)

اردو ترجمہ · UrduUnverified translation

حضرت جابر رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جب تم میں سے کوئی شخص کسی عورت کو پیغام نکاح دے تو اگر ممکن ہو کہ اس کی وہ چیز (قدوقامت اور حسن و جمال وغیرہ) دیکھ لے جو اس کے لیے نکاح کا باعث ہو تو ایسا کرلے۔‘‘ (اسے احمد اور ابوداود نے روایت کیا ہے‘ اس کے راوی ثقہ ہیں۔ اور حاکم نے اسے صحیح قرار دیا ہے‘ نیز ترمذی اور نسائی میں مغیرہ کی روایت اس کے لیے شاہد ہے۔ اور ابن ماجہ اور ابن حبان میں محمد بن مسلمہ کی روایت شاہد ہے۔)

اردو ترجمہ · UrduUnverified translation

صحیح مسلم میں حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے ایک شخص سے‘ جو ایک عورت سے شادی کرنا چاہتا تھا‘ فرمایا: ’’کیا تو نے اسے دیکھ لیا ہے؟‘‘ اس نے کہا: نہیں۔ آپ نے فرمایا: ’’جاؤ اور اسے دیکھ لو۔‘‘

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’تم میں سے کوئی شخص اپنے بھائی کے پیغام نکاح پر پیغام نکاح نہ دے یہاں تک کہ اس سے پہلے پیغام نکاح دینے والا ازخود چھوڑ دے یا پیغام نکاح دینے والا اسے اجازت دے دے۔‘‘ (بخاری و مسلم- یہ الفاظ بخاری کے ہیں۔)

اردو ترجمہ · UrduUnverified translation

حضرت سہل بن سعد ساعدی رضی اللہ عنہما سے مروی ہے کہ ایک عورت رسول اللہ صلی اللہ علیہ وسلم کی خدمت میں حاضر ہوئی اور عرض کیا: اے اللہ کے رسول! میں اپنے آپ کو آپ کے لیے ہبہ کرنے آئی ہوں‘ چنانچہ رسول اللہ صلی اللہ علیہ وسلم نے اس کی طرف دیکھا‘ پہلے اوپر کی طرف‘ پھر نیچے کی طرف‘ پھر رسول اللہ صلی اللہ علیہ وسلم نے اپنا سر نیچے کر لیا۔ جب اس عورت نے دیکھا کہ آپ نے اس کے بارے میں کوئی فیصلہ نہیں فرمایا تو وہ بیٹھ گئی۔ اتنے میں ایک صحابی کھڑے ہوئے اور عرض کیا: اے اللہ کے رسول! اگر اس عورت کی آپ کو ضرورت نہیں تو اس سے میرا نکاح کر دیں۔ آپ نے اس سے دریافت فرمایا: ’’کیا تمھارے پاس کوئی چیز ہے؟‘‘ اس نے کہا : اے اللہ کے رسول! اللہ کی قسم! کچھ بھی نہیں۔ آپ نے فرمایا: ’’اپنے گھر جاؤ اور تلاش کرو آیا کوئی چیز تمھیں ملتی ہے؟‘‘ چنانچہ وہ چلا گیا‘ پھر واپس آکر کہنے لگا: اللہ کی قسم! مجھے کوئی چیز نہیں ملی۔ تو رسول اللہ صلی اللہ علیہ وسلم نے پھر فرمایا: ’’تلاش کرو‘ خواہ لوہے کی انگوٹھی ہی ہو۔‘‘ وہ آدمی پھر دوبارہ گیا اور واپس آکر عرض کیا: اے اللہ کے رسول! اللہ کی قسم! لوہے کی انگوٹھی تک بھی میسر نہیں۔ لیکن میرا یہ ایک تہ بند ہے (حضرت سہل رضی اللہ عنہ فرماتے ہیں کہ اس کے پاس اوپر کی چادر نہ تھی۔) آدھا حصہ میں اسے دے دوں گا۔ رسول اللہ صلی اللہ علیہ وسلم نے فرمایا: ’’یہ (خاتون) تیرے اس تہ بند کو کیا کرے گی؟ اگر تو اسے زیب تن کرے گا تو اس کے لیے کچھ نہیں بچے گا اور اگر یہ اسے پہنے گی تو پھر تیرے لیے اس میں سے کچھ بھی نہیں ہوگا۔‘‘ یہ سن کر وہ آدمی بیٹھ گیا حتیٰ کہ جب کافی دیر تک بیٹھا رہنے کے بعد وہ اٹھ کھڑا ہوا (اور پیٹھ پھیر کر جانے لگا) تو رسول اللہ صلی اللہ علیہ وسلم نے اسے مڑتے ہوئے دیکھ لیا۔ آپ نے اسے واپس بلانے کا حکم دیا۔ جب وہ واپس آگیا تو آپ نے اس سے دریافت فرمایا: ’’تجھے کتنا قرآن یاد ہے؟‘‘ اس نے بتایا کہ مجھے فلاں فلاں سورت یاد ہے اور انھیں شمار کرنے لگا۔ آپ نے پوچھا: ’’تم انھیں زبانی پڑھ سکتے ہو؟‘‘ وہ بولا: جی ہاں۔ آپ نے فرمایا: ’’جا! میں نے تجھے اس کا مالک بنا دیا‘ قرآن کی ان سورتوں کے بدلے میں جو تجھے یاد ہیں۔‘‘ (بخاری و مسلم‘ یہ الفاظ مسلم کے ہیں۔) اور ایک روایت میں ہے: ’’جا! میں نے اسے تیری زوجیت میں دے دیا‘ چنانچہ تو اسے کچھ قرآن سکھا دے۔‘‘ اور بخاری میں ہے: ’’ہم نے تجھے اس کا مالک بنا دیا قرآن کے اس حصے کے عوض جو تجھے یاد ہے۔‘‘ اور ابوداود میں حضرت ابوہریرہ رضی اللہ عنہ سے مروی ہے کہ آپ نے فرمایا: ’’تجھے کتنا قرآن حفظ ہے؟‘‘ اس نے کہا کہ سورۂ بقرہ اور اس کے ساتھ والی سورت (آل عمران۔) آپ نے فرمایا: ’’اٹھو اور اسے بیس آیات سکھا دو۔‘‘

اردو ترجمہ · UrduUnverified translation

حضرت عامر بن عبداللہ بن زبیر سے روایت ہے‘ انھوں نے اپنے والد سے بیان کیا کہ رسول اللہ صلی اللہ علیہ وسلم نے فرمایا: ’’نکاح کا اعلان کرو۔‘‘ (اسے احمد نے روایت کیا ہے اور حاکم نے اسے صحیح کہا ہے۔)

اردو ترجمہ · UrduUnverified translation

حضرت ابوبردہ بن ابو موسیٰ اپنے باپ سے بیان کرتے ہیں کہ رسول اللہ صلی اللہ علیہ وسلم نے فرمایا: ’’ولی و سرپرست کے بغیر نکاح نہیں ہوتا۔‘‘ (اسے احمد اور چاروں نے روایت کیا ہے۔ امام ابن مدینی‘ ترمذی اور ابن حبان نے اسے صحیح قرار دیا ہے۔ اور مرسل ہونے کی وجہ سے اسے معلول قرار دیا گیا ہے۔) اور امام احمد رحمہ اللہ نے حسن سے اور انھوں نے عمران بن حصین رضی اللہ عنہما سے مرفوعاً بیان کیا ہے: ’’نکاح ولی و سرپرست اور دو گواہوں کے بغیر منعقد نہیں ہوتا۔‘‘

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ رسول اللہ صلی اللہ علیہ وسلم نے فرمایا: ’’جس خاتون نے اپنے ولی کی اجازت کے بغیر نکاح کیا‘ اس کا نکاح باطل ہے۔ پھر اگر شوہر نے اس سے مباشرت کی ہے تو اس عورت کے لیے حق مہر ہے‘ اس کی شرم گاہ کو حلال کرنے کے بدلے میں۔ اگر سرپرستوں میں جھگڑا ہو جائے تو پھر جس کا کوئی ولی نہ ہو اس کا ولی حاکم وقت ہے۔‘‘ (نسائی کے سوا اسے چاروں نے روایت کیا ہے۔ اور اسے ابوعوانہ‘ ابن حبان اور حاکم نے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’بیوہ یا مطلقہ عورت کا نکاح اس سے مشورہ لیے بغیر نہ کیا جائے۔ اور کنواری کا نکاح اس سے اجازت لیے بغیر نہ کیا جائے۔‘‘ انھوں نے عرض کیا: اے اللہ کے رسول! اس (کنواری) کی اجازت کیسے ہے؟ آپ نے فرمایا: ’’اس کا خاموش رہنا۔‘‘ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ نبی صلی اللہ علیہ وسلم نے فرمایا: ’’شوہر دیدہ عورت (دوبارہ نکاح کے لیے) اپنے ولی کی بہ نسبت اپنے بارے میں زیادہ استحقاق رکھتی ہے۔ اور کنواری سے اجازت لی جائے گی اور اس کا اذن اس کی خاموشی ہے۔‘‘ (مسلم) اور ایک روایت میں ہے: ’’شوہر دیدہ عورت کے بارے میں ولی کا کوئی اختیار نہیں اور یتیم لڑکی سے بھی مشورہ لیا جائے۔‘‘ (اسے ابوداود اور نسائی نے روایت کیا ہے اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’کوئی عورت (ولی بن کر) کسی دوسری عورت کا نکاح نہیں کر سکتی اور نہ کوئی عورت خود اپنا نکاح کر سکتی ہے۔‘‘ (اسے ابن ماجہ اور دارقطنی نے روایت کیا ہے۔ اور اس کے تمام راوی ثقہ ہیں۔)

اردو ترجمہ · UrduUnverified translation

حضرت نافع حضرت ابن عمر رضی اللہ عنہما سے بیان کرتے ہیں کہ نبی صلی اللہ علیہ وسلم نے شغار سے منع فرمایا ہے۔ اور شغار یہ ہے کہ ایک آدمی اپنی بیٹی دوسرے آدمی سے اس شرط پر بیاہ دے کہ وہ اپنی بیٹی اس سے بیاہ دے گا اور دونوں کے مابین کوئی مہر بھی نہ ہو۔ (بخاری و مسلم) اور بخاری و مسلم ایک دوسری سند سے اس بات پر متفق ہیں کہ شغار کی یہ تعریف نافع کی بیان کردہ ہے۔

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے کہ ایک کنواری لڑکی نبی صلی اللہ علیہ وسلم کی خدمت میں حاضر ہوئی اور بتایا کہ اس کے والد نے اس کا نکاح کر دیا ہے جبکہ وہ اسے ناپسند کرتی ہے۔ (یہ سن کر) نبی صلی اللہ علیہ وسلم نے اس لڑکی کو (نکاح باقی رکھنے یا اسے فسخ کرنے کا) اختیار دے دیا۔ (اسے احمد‘ ابوداود اور ابن ماجہ نے روایت کیا ہے۔ اور اس حدیث کو مرسل ہونے کی بنا پر معلول کہا گیا ہے۔)

اردو ترجمہ · UrduUnverified translation

حضرت حسن‘ حضرت سمرہ رضی اللہ عنہ سے نبی صلی اللہ علیہ وسلم کا ارشاد بیان کرتے ہیں: ’’جس عورت کا نکاح دو ولی (دو مختلف شخصوں سے) کر دیں تو یہ خاتون ان میں سے پہلے خاوند کی ہوگی۔‘‘ (اسے احمد اور چاروں نے روایت کیا ہے اور ترمذی نے اسے حسن قرار دیا ہے۔)

اردو ترجمہ · UrduUnverified translation

حضرت جابر رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس غلام نے اپنے مالکوں اور اپنے اہل کی اجازت کے بغیر نکاح کیا وہ بدکار (زانی) ہے۔‘‘ (اسے احمد‘ ابوداود اور ترمذی نے روایت کیا ہے۔ ترمذی اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’(ایک مرد کے نکاح میں) پھوپھی و بھتیجی اور خالہ و بھانجی کو جمع نہیں کیا جا سکتا۔‘‘ (بخاری و مسلم)

اردو ترجمہ · UrduUnverified translation

حضرت عثمان رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’احرام والا آدمی خود اپنا نکاح کر سکتا ہے نہ کسی دوسرے کا۔‘‘ (اسے مسلم نے روایت کیا ہے۔) اور مسلم کی ایک روایت میں ہے: ’’اور نہ وہ پیغام نکاح دے سکتا ہے۔‘‘ اور ابن حبان نے یہ اضافہ نقل کیا ہے: ’’اور نہ اسے پیغام نکاح دیا جا سکتا ہے۔‘‘

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ وہ فرماتے ہیں کہ نبی صلی اللہ علیہ وسلم نے جب حضرت میمونہ رضی اللہ عنہا سے نکاح کیا تو اس وقت آپ حالت احرام میں تھے۔ (بخاری و مسلم) اور مسلم میں حضرت میمونہ رضی اللہ عنہا کا اپنا بیان ہے کہ نبی صلی اللہ علیہ وسلم نے ان سے نکاح کیا تو اس وقت آپ حلال تھے‘ یعنی حالت احرام میں نہیں تھے۔

اردو ترجمہ · UrduUnverified translation

حضرت عقبہ بن عامر رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’شروط میں سے وہ شرط پورا کیے جانے کا زیادہ حق رکھتی ہے جس کے ذریعے سے تم نے عورتوں کی شرم گاہوں کو اپنے لیے حلال کیا ہے۔‘‘ (بخاری و مسلم)

اردو ترجمہ · UrduUnverified translation

حضرت سلمہ بن اکوع رضی اللہ عنہ سے روایت ہے کہ رسول اللہ صلی اللہ علیہ وسلم نے غزوۂ اوطاس کے سال تین روز کے لیے (نکاح) متعہ کی اجازت دی‘ پھر اس سے منع فرما دیا۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت علی رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے خیبر کے سال متعہ سے منع فرما دیا تھا۔ (بخاری و مسلم)

اردو ترجمہ · UrduUnverified translation

حضرت علی رضی اللہ عنہ ہی سے روایت ہے کہ نبی صلی اللہ علیہ وسلم نے عورتوں سے متعہ کرنے اور پالتو گدھے کھانے سے خیبر کے روز منع فرمایا۔ (ابوداود کے سوا ساتوں نے اس روایت کو نقل کیا ہے۔)

اردو ترجمہ · UrduUnverified translation

حضرت ربیع بن سبرہ اپنے باپ سے بیان کرتے ہیں کہ رسول اللہ صلی اللہ علیہ وسلم نے فرمایا: ’’میں نے تمھیں عورتوں سے متعہ کرنے کی اجازت دی تھی۔ اب اللہ تعالیٰ نے اسے تاروز قیامت حرام قرار دے دیا ہے‘ لہٰذا جس کسی کے پاس ان (متعہ والی عورتوں) میں سے کوئی ہو تو وہ اسے چھوڑ دے اور جو کچھ تم انھیں دے چکے ہو اس میں سے کچھ بھی واپس نہ لو۔‘‘ (اسے مسلم‘ ابوداود‘ نسائی‘ ابن ماجہ‘ احمد اور ابن حبان نے روایت کیا ہے۔)

اردو ترجمہ · UrduUnverified translation

حضرت ابن مسعود رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے حلالہ کرنے والے اور جس کے لیے حلالہ کیا جائے دونوں پر لعنت فرمائی ہے۔ (اسے احمد‘ نسائی اور ترمذی نے روایت کیا ہے اور ترمذی نے اسے صحیح کہا ہے۔ اور اس مسئلہ میں حضرت علی رضی اللہ عنہ سے بھی روایت ہے جسے نسائی کے سوا چاروں نے ذکر کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’کوئی زانی جسے زنا کی حد لگی ہو‘ اپنے جیسی (حد لگی ہوئی عورت) ہی سے نکاح کرتا ہے۔‘‘ (اسے احمد اور ابوداود نے روایت کیا ہے اور اس کے راوی ثقہ ہیں۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ وہ فرماتی ہیں کہ ایک مرد نے اپنی بیوی کو تین طلاقیں دے دیں‘ پھر اس عورت سے ایک دوسرے آدمی نے نکاح کر لیا اور اس سے ہم بستری کیے بغیر ہی اسے طلاق دے دی۔ تو پہلے شوہر نے اس سے نکاح کرنا چاہا اور رسول اللہ صلی اللہ علیہ وسلم سے اس کے متعلق استفسار کیا تو آپ نے فرمایا: ’’نہیں! یہاں تک کہ دوسرا خاوند اس سے اسی طرح لطف اندوز ہو لے جس طرح پہلا خاوند ہوا تھا۔‘‘ (بخاری و مسلم۔ اور یہ الفاظ مسلم کے ہیں۔)