اردو ترجمہ · UrduUnverified translation

حضرت جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے سود لینے والے‘ دینے والے‘ اس کے تحریر کرنے والے اور اس کے گواہوں پر لعنت فرمائی ہے‘ نیز فرمایا: ’’(گناہ کے ارتکاب میں) یہ سب مساوی اور برابر ہیں۔‘‘ (اسے مسلم نے روایت کیا ہے۔ اور بخاری میں حضرت ابوجحیفہ رضی اللہ عنہ سے مروی حدیث بھی اسی طرح ہے۔)

اردو ترجمہ · UrduUnverified translation

حضرت عبداللہ بن مسعود رضی اللہ عنہ نبی صلی اللہ علیہ وسلم سے بیان کرتے ہیں کہ آپ نے فرمایا: ’’سود کے تہتر درجے ہیں۔ سب سے کم تر درجہ اس گناہ کے مثل ہے کہ کوئی آدمی اپنی ماں کے ساتھ نکاح کرے۔ اور سب سے بڑھ کر سود کسی مسلمان کی آبرو ریزی کرنا ہے۔‘‘ (اسے ابن ماجہ نے مختصراً اور حاکم نے مکمل بیان کیا ہے اور اسے صحیح بھی قرار دیا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’سونے کو سونے کے بدلے میں فروخت نہ کرو مگر برابر برابر‘ ایک دوسرے کے وزن میں اضافہ نہ کرو۔ اور چاندی کو چاندی کے بدلے میں فروخت نہ کرو مگر برابر برابر‘ ایک دوسرے کے وزن میں اضافہ نہ کرو۔ اور ان (دونوں) میں ادھار کو نقد کے بدلے میں نہ بیچو۔‘‘ (بخاری و مسلم)

اردو ترجمہ · UrduUnverified translation

حضرت عبادہ بن صامت رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’سونا سونے کے عوض‘ چاندی چاندی کے عوض‘ گندم گندم کے عوض‘ جو جو کے عوض‘ کھجور کھجور کے عوض اور نمک نمک کے عوض ایک دوسرے کی طرح‘ برابر برابر اور نقد بنقد (فروخت کیے جائیں۔) اگر اجناس میں اختلاف ہو تو پھر جس طرح چاہو فروخت کرو بشرطیکہ (اجناس کا تبادلہ دونوں طرف سے) نقد بنقد ہو۔‘‘ (مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’سونا سونے کے بدلے میں (تبادلہ کرلو جب) وزن اور مثل میں برابر برابر ہو اور چاندی چاندی کے بدلے میں (تبادلہ کرلو جب) وزن اور مثل میں برابر برابر ہو‘ پھر اگر کوئی شخص زیادہ دے یا زیادہ کا مطالبہ کرے تو وہ سود ہے۔‘‘ (مسلم)

اردو ترجمہ · UrduUnverified translation

حضرت ابوسعید خدری اور حضرت ابوہریرہ رضی اللہ عنہما سے روایت ہے کہ رسول اللہ صلی اللہ علیہ وسلم نے ایک شخص کو خیبر پر عامل مقرر کیا‘ چنانچہ وہ آپ کی خدمت میں بہت عمدہ کھجوریں لے کر حاضر ہوا تو رسول اللہ صلی اللہ علیہ وسلم نے (اس سے دریافت) فرمایا: ’’کیا خیبر میں پیدا ہونے والی سب کھجوریں اسی طرح کی ہوتی ہیں؟‘‘ اس نے عرض کیا: نہیں اے اللہ کے رسول! اللہ کی قسم! ہم دوسری کھجوریں دو صاع اور (کبھی) تین صاع دے کر یہ کھجوریں ایک صاع لیتے ہیں۔ رسول اللہ صلی اللہ علیہ وسلم نے فرمایا: ’’ایسا نہ کرو۔ گھٹیا کھجوروں کو دراہم کے عوض فروخت کرو‘ پھر دراہم کے ساتھ عمدہ کھجوریں خریدو۔‘‘ اور تولنے والی اشیاء کے بارے میں بھی اسی طرح فرمایا۔ (بخاری و مسلم) اور مسلم میں ہے: ’’تول میں بھی اسی طرح کرو۔‘‘

اردو ترجمہ · UrduUnverified translation

حضرت جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے کھجوروں کے کسی ایسے ڈھیر کو جس کا ماپ نہ کیا گیا ہو‘ کھجوروں کے معین ماپ کے بدلے میں فروخت کرنے سے منع فرمایا ہے۔ (مسلم)

اردو ترجمہ · UrduUnverified translation

حضرت معمر بن عبداللہ رضی اللہ عنہ سے روایت ہے کہ میں رسول اللہ صلی اللہ علیہ وسلم کو یہ فرماتے سنا کرتا تھا: ’’طعام (اناج) طعام کے بدلے میں (مقدار میں) برابر ہو۔‘‘ ان دنوں ہمارا طعام جَو ہوتے تھے۔ (مسلم)

اردو ترجمہ · UrduUnverified translation

حضرت فضالہ بن عبید رضی اللہ عنہ سے روایت ہے کہ میں نے خیبر کے روز ایک ہار بارہ دینار میں خریدا۔ اس میں سونے اور پتھر کے نگینے تھے۔ میں نے انھیں الگ کر دیا تو اس میں بارہ دینار سے زیادہ سونا پایا۔ میں نے اس کا ذکر نبی صلی اللہ علیہ وسلم سے کیا تو آپ نے فرمایا: ’’اسے فروخت نہ کیا جائے جب تک انھیں الگ الگ نہ کر لیا جائے۔‘‘(مسلم)

اردو ترجمہ · UrduUnverified translation

حضرت سمرہ بن جندب رضی اللہ عنہ سے روایت ہے کہ نبی صلی اللہ علیہ وسلم نے حیوان کو حیوان کے بدلے میں ادھار فروخت کرنے سے منع فرمایا ہے۔ (اسے پانچوں نے روایت کیا ہے‘ نیز ترمذی اور ابن جارود نے اسے صحیح قرار دیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: ’’جب تم عینہ کی تجارت کرنے لگو گے‘ بیلوں کی دمیں پکڑ لوگے‘ زراعت و کھیتی باڑی کو پسند کرنے لگو گے اور جہاد کو ترک کر دو گے تو (اس وقت) اللہ تعالیٰ تم پر ذلت و خواری مسلط کر دے گا۔ اس (ذلت) کو تم سے اس وقت تک دور نہیں فرمائے گا جب تک تم اپنے دین کی طرف پلٹ نہیں آؤ گے۔‘‘ (اسے ابوداود نے نافع رحمہ اللہ کی روایت سے نقل کیا ہے‘ اس کی سند میں کلام ہے۔ اور مسند احمد میں مروی عطاء رحمہ اللہ کی روایت میں بھی اسی طرح آیا ہے۔ اس کے راوی ثقہ ہیں اور ابن قطان نے اسے صحیح کہا ہے۔)

اردو ترجمہ · UrduUnverified translation

حضرت ابوامامہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’جس کسی نے اپنے بھائی کے لیے کوئی سفارش کی (اس کے بعد) وہ اسے کوئی تحفہ دے اور وہ اسے قبول کر لے تو وہ سود کے بہت ہی بڑے دروازے پر پہنچ گیا۔‘‘ (اسے احمد اور ابوداود نے روایت کیا ہے اور اس کی سند میں کلام ہے۔)

اردو ترجمہ · UrduUnverified translation

حضرت عبداللہ بن عمرو بن عاص رضی اللہ عنہما سے روایت ہے کہ رسول اللہ صلی اللہ علیہ وسلم نے رشوت دینے والے اور رشوت لینے والے پر لعنت کی ہے۔ (اسے ابوداود اور ترمذی نے روایت کیا ہے اور ترمذی نے صحیح کہا ہے۔)

اردو ترجمہ · UrduUnverified translation

حضرت عبداللہ بن عمرو بن عاص رضی اللہ عنہما ہی سے مروی ہے کہ نبی صلی اللہ علیہ وسلم نے انھیں ایک لشکر کی تیاری کا حکم دیا‘ اونٹ ختم ہو گئے‘ چنانچہ آپ نے انھیں صدقے کے اونٹوں کے عوض (ادھار اونٹ) لینے کا حکم فرمایا۔ حضرت عبداللہ بن عمرو رضی اللہ عنہما کہتے ہیں: میں ایک اونٹ‘ صدقے کے آنے والے دو اونٹوں کے بدلے میں لیتا تھا۔ (اسے حاکم اور بیہقی نے روایت کیا ہے‘ اس کے راوی ثقہ ہیں۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے بیع مزابنہ سے منع فرمایا ہے۔ اور وہ یہ ہے کہ آدمی اپنے باغ کی تازہ کھجوریں خشک کھجوروں کے عوض‘ یا تازہ انگور کشمش اور منقیٰ کے عوض ماپ کر فروخت کرے اور اگر کھیتی ہوتو اسے غلے کے عوض ماپ کر فروخت کرے۔ آپ نے ان سب صورتوں میں ہونے والی بیع سے منع فرمایا ہے۔ (بخاری و مسلم)

اردو ترجمہ · UrduUnverified translation

حضرت سعد بن ابی وقاص رضی اللہ عنہ سے مروی ہے کہ میں نے رسول اللہ صلی اللہ علیہ وسلم سے سنا۔ آپ سے سوال کیا جا رہا تھا کہ تازہ کھجوریں خشک کھجوروں کے بدلے میں فروخت کی جاسکتی ہیں؟ تو آپ نے فرمایا: ’’کیا تازہ کھجور خشک ہو کر (وزن میں) کم ہو جاتی ہے؟‘‘ لوگوں نے کہا: ہاں! تو آپ نے اس سے منع فرما دیا۔ (اسے پانچوں نے روایت کیا ہے‘ نیز ابن مدینی‘ ترمذی‘ ابن حبان اور حاکم نے اسے صحیح کہا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ نبی صلی اللہ علیہ وسلم نے ادھار کے بدلے میں ادھار‘ یعنی قرض کے بدلے میں قرض کو فروخت کرنے سے منع فرمایا ہے۔ (اسے اسحاق اور بزار نے ضعیف سند سے روایت کیا ہے۔)