اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’(وراثت کے) مقررہ حصے ان کے حق داروں کو دو‘ پھر جو کچھ باقی بچ جائے وہ میت کے سب سے زیادہ قریبی مذکر (وارث) کے لیے ہے۔‘‘ (بخاری و مسلم)

اردو ترجمہ · UrduUnverified translation

حضرت اسامہ بن زید رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’مسلمان کافر کا اور کافر مسلمان کا وارث نہیں ہوسکتا۔‘‘ (بخاری و مسلم)

اردو ترجمہ · UrduUnverified translation

حضرت ابن مسعود رضی اللہ عنہ سے بیٹی‘ پوتی اور بہن کے بارے میں روایت ہے کہ رسول اللہ صلی اللہ علیہ وسلم نے اس کی بابت یہ فیصلہ فرمایا کہ بیٹی کو نصف (آدھا حصہ) اور پوتی کو دو تہائی پورا کرنے کے لیے سدس (چھٹا حصہ) ملے گا‘ پھر جو کچھ باقی بچے وہ بہن کا ہوگا۔‘‘ (بخاری)

اردو ترجمہ · UrduUnverified translation

حضرت عبداللہ بن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’دو مختلف دینوں کے پیروکار ایک دوسرے کے وارث نہیں ہو سکتے۔‘‘ (اسے احمد نے اور ترمذی کے سوا چاروں نے روایت کیا ہے۔ اور حاکم نے اس روایت کو اسامہ کے الفاظ سے نقل کیا ہے۔ اور نسائی نے اسامہ کی حدیث کو انھی الفاظ سے بیان کیا ہے۔ یعنی جو عبداللہ بن عمر رضی اللہ عنہما کی حدیث کے ہیں۔)

اردو ترجمہ · UrduUnverified translation

حضرت عمران بن حصین رضی اللہ عنہما سے روایت ہے کہ ایک آدمی نبی صلی اللہ علیہ وسلم کی خدمت میں حاضر ہوا اور کہا: میرا پوتا وفات پا گیا ہے۔ اس کی میراث میں میرا حصہ کتنا ہے؟ آپ نے فرمایا: ’’تجھے سدس (چھٹا حصہ) ملے گا۔‘‘ پھر جب وہ جانے لگا تو آپ نے اسے بلایا اور فرمایا: ’’تیرے لیے ایک اور سدس ہے۔‘‘ پھر جب وہ جانے لگا تو اسے بلایا اور فرمایا: ’’آخری سدس تیرے لیے رزق ہے۔‘‘ (اسے احمد اور چاروں نے روایت کیا ہے اور ترمذی نے صحیح کہا ہے۔ اور یہ حدیث حسن بصری رحمہ اللہ حضرت عمران رضی اللہ عنہ سے روایت کرتے ہیں۔ مگر یہ کہا گیا ہے کہ حسن بصری کا حضرت عمران بن حصین رضی اللہ عنہما سے سماع ثابت نہیں۔)

اردو ترجمہ · UrduUnverified translation

حضرت (عبداللہ) ابن بریدہ اپنے والد (بریدہ رضی اللہ عنہ ) سے روایت کرتے ہیں کہ نبی صلی اللہ علیہ وسلم نے جدہ (دادی‘ نانی) کے لیے چھٹا حصہ مقرر فرمایا جب کہ اس سے پہلے ماں نہ ہو۔ (اسے ابوداود اور نسائی نے روایت کیا ہے‘ ابن خزیمہ اور ابن جارود نے صحیح قرار دیا ہے اور ابن عدی نے اسے قوی قرار دیا ہے۔)

اردو ترجمہ · UrduUnverified translation

حضرت مقدام بن معدیکرب رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ماموں اس کا وارث ہوگا جس کا کوئی (اصحاب الفروض یا عصبات میں سے) وارث نہ ہو۔‘‘ (اسے احمد اور چاروں نے بیان کیا ہے سوائے ترمذی کے۔ اور ابوزرعہ رازی نے اسے حسن کہا ہے۔ حاکم اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت ابوامامہ بن سہل رضی اللہ عنہ بیان کرتے ہیں کہ حضرت عمر رضی اللہ عنہ نے مجھے حضرت ابوعبیدہ رضی اللہ عنہ کے لیے لکھ کر دیا کہ رسول اللہ صلی اللہ علیہ وسلم نے فرمایا: ’’جس کا کوئی مولیٰ نہ ہو‘ اللہ اور اس کا رسول اس کا مولیٰ ہے‘ اور جس کا کوئی وارث نہ ہو‘ ماموں اس کا وارث ہے۔‘‘ (اسے احمد نے اور سوائے ابوداود کے چاروں نے روایت کیا ہے اور ترمذی نے اسے حسن قرار دیا ہے اور ابن حبان نے صحیح کہا ہے۔)

اردو ترجمہ · UrduUnverified translation

حضرت جابر رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’جب نومولود بچہ آواز نکالے تو اسے وارث بنایا جاتا ہے۔‘‘ (اسے ابوداود نے روایت کیا ہے اور ابن حبان نے اسے صحیح کہا ہے۔)

اردو ترجمہ · UrduUnverified translation

حضرت عمرو بن شعیب اپنے والد (شعیب) سے اور وہ (شعیب) اپنے دادا سے روایت کرتے ہیں‘ وہ فرماتے ہیں‘ رسول اللہ صلی اللہ علیہ وسلم نے فرمایا: ’’قاتل کو مقتول کی میراث میں سے کچھ نہیں ملتا۔‘‘ (اسے نسائی اور دارقطنی نے روایت کیا ہے اور ابن عبدالبر نے اسے قوی قرار دیا ہے۔ اور نسائی نے اسے معلول کہا ہے۔ اور درست بات یہ ہے کہ یہ عمرو ( رضی اللہ عنہ ) کی موقوف روایت ہے۔)

اردو ترجمہ · UrduUnverified translation

حضرت عمر بن خطاب رضی اللہ عنہ سے مروی ہے‘ وہ فرماتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ’’والد یا بیٹا جو کچھ جمع کرے وہ اس کے عصبہ کے لیے ہے خواہ وہ (عصبہ) کوئی بھی ہو۔‘‘ (اسے ابوداود‘ نسائی اور ابن ماجہ نے روایت کیا ہے‘ نیز ابن مدینی اور ابن عبدالبر نے اسے صحیح کہا ہے۔)

اردو ترجمہ · UrduUnverified translation

حضرت عبداللہ بن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’ولا ‘ نسب کے تعلق کی طرح ایک تعلق ہے جسے فروخت کیا جا سکتا ہے نہ ہبہ کیا جا سکتا ہے۔‘‘ (اسے حاکم نے بطریق شافعی‘ محمد بن حسن سے اور انھوں نے ابویوسف سے روایت کیا ہے‘ نیز ابن حبان نے اسے صحیح قرار دیا ہے اور بیہقی نے اسے معلول کہا ہے۔)

اردو ترجمہ · UrduUnverified translation

حضرت ابوقلابہ حضرت انس رضی اللہ عنہ سے بیان کرتے ہیں کہ رسول اللہ صلی اللہ علیہ وسلم نے فرمایا: ’’تم میں سے سب سے زیادہ علم میراث کے ماہر زید بن ثابت ( رضی اللہ عنہ ) ہیں۔‘‘ (اس حدیث کو احمد نے اور ماسوا ابوداود کے چاروں نے روایت کیا ہے۔ ترمذی‘ ابن حبان اور حاکم نے اسے صحیح قرار دیا ہے۔ لیکن اسے مرسل ہونے کی بنا پر معلول قرار دیا گیا ہے۔)