اردو ترجمہ · UrduUnverified translation

حضرت انس رضی اللہ عنہ سے روایت ہے‘ وہ فرماتے ہیں کہ نبی صلی اللہ علیہ وسلم کا گزر راستے میں گری پڑی ایک کھجور کے پاس سے ہوا تو آپ نے فرمایا: ’’اگر مجھے یہ اندیشہ نہ ہوتا کہ یہ صدقے کی ہو گی تو میں اسے ضرور کھا لیتا۔‘‘(بخاری و مسلم)

اردو ترجمہ · UrduUnverified translation

حضرت زید بن خالد جہنی رضی اللہ عنہ سے مروی ہے‘ وہ فرماتے ہیں کہ ایک آدمی نبی صلی اللہ علیہ وسلم کی خدمت میں آیا اور اس نے لقطہ کے بارے میں پوچھا۔ آپ نے فرمایا: ’’اس کی تھیلی (یا وہ چیز جس میں وہ ہو) اور تسمہ خوب پہچان کے رکھو‘ پھر سال بھر اس کا اعلان کرتے رہو۔ اگر اس کا اصل مالک آجائے تو اس کے سپرد کر دو ورنہ جو چاہو کرو۔‘‘ پھر اس نے گم شدہ بکریوں کے بارے میں سوال کیا۔ آپ نے فرمایا: ’’وہ تیری ہے یا تیرے بھائی کی یا بھیڑیے کی۔‘‘ پھر اس نے گم شدہ اونٹوں کے بارے میں پوچھا۔ آپ نے فرمایا: ’’تجھے اس سے کیا سروکار؟ اس کا پانی اور اس کے جوتے اس کے پاس ہیں۔ گھاٹ پر آ کر پانی پی لے گا اور درختوں کے پتے کھا لے گا‘ یہاں تک کہ اس کا مالک اس کے پاس پہنچ جائے گا۔‘‘ (بخاری و مسلم)

اردو ترجمہ · UrduUnverified translation

حضرت زید بن خالد جہنی رضی اللہ عنہ ہی سے مروی ہے‘ رسول اللہ صلی اللہ علیہ وسلم نے فرمایا: ’’جس کسی نے گم شدہ جانور کو اپنے ہاں پناہ دی تو وہ جب تک اس کا اعلان نہ کرے وہ خود گمراہ ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عیاض بن حمار رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جس کسی کو کوئی لقطہ ملے تو اسے چاہیے کہ دو منصف آدمیوں کو اس پر گواہ بنا لے اور اس کے برتن اور سربند کو خوب یاد رکھے‘ پھر اسے چھپائے نہ غائب کرے۔ اگر اس کا اصل مالک آجائے تو وہی اس کا زیادہ حق دار ہے۔ اگر نہ آئے تو وہ اللہ کا مال ہے وہ جسے چاہتا ہے عنایت فرما دیتا ہے۔‘‘ (اسے احمد نے اور ترمذی کے سوا چاروں نے روایت کیا ہے اور ابن خزیمہ‘ ابن جارود اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت عبدالرحمن بن عثمان تیمی رضی اللہ عنہ سے مروی ہے کہ نبی صلی اللہ علیہ وسلم نے حاجیوں کے لقطہ (کو اٹھانے) سے منع فرمایا ہے۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت مقدام بن معد یکرب رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’سن لو! درندوں میں سے کچلی والا جانور‘ گھریلو گدھا اور ذِمّی کے مال میں سے گری ہوئی اٹھائی جانے والی چیز حلال نہیں‘ الایہ کہ وہ (ذمی) اس سے بے نیاز ہو۔‘‘ (اسے ابوداود نے روایت کیا ہے۔)