اردو ترجمہ · UrduUnverified translation

حضرت نعمان بن بشیر رضی اللہ عنہما سے روایت ہے کہ ان کے والد (بشیر) انھیں رسول اللہ صلی اللہ علیہ وسلم کی خدمت میں لائے اور عرض کیا کہ میں نے اپنا ذاتی غلام اپنے اس بیٹے کو ہبہ کر دیا ہے۔ رسول اللہ صلی اللہ علیہ وسلم نے فرمایا: ’’کیا تو نے اپنی ساری اولاد کو اس طرح ہبہ کیا ہے؟‘‘ انھوں نے کہا: نہیں! چنانچہ رسول اللہ صلی اللہ علیہ وسلم نے فرمایا: ’’تو پھر اسے واپس کر لو۔‘‘ اور ایک روایت کے الفاظ ہیں: میرے والد نبی صلی اللہ علیہ وسلم کی خدمت میں حاضر ہوئے کہ میرے صدقہ (ہبہ) پر آپ کو گواہ بنائیں۔ آپ نے فرمایا: ’’کیا تو نے اپنی ساری اولاد کے ساتھ ایسا کیا ہے؟‘‘ انھوں نے جواب دیا: نہیں! آپ نے فرمایا: ’’اللہ سے ڈرو اور اپنی اولاد کے درمیان عدل و انصاف کرو۔‘‘ چنانچہ میرے والد واپس آئے اور انھوں نے وہ صدقہ (ہبہ) واپس لے لیا۔ (بخاری و مسلم) اور مسلم کی ایک روایت میں ہے: رسول اللہ صلی اللہ علیہ وسلم نے فرمایا: ’’تو پھر میرے سوا اس پر کسی اور کو گواہ بنا لو۔‘‘ پھر فرمایا: ’’کیا تجھے یہ پسند ہے کہ تیری ساری اولاد تیرے ساتھ یکساں بھلائی کا سلوک کرے؟‘‘ انھوں نے کہا: کیوں نہیں! آپ نے فرمایا: ’’پھر تو ایسا مت کر۔‘‘

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ نبی صلی اللہ علیہ وسلم نے فرمایا: ’’ہبہ کر کے اسے واپس لینے والا اس کتے کی طرح ہے جو قے کرتا ہے اور پھر خود اپنی قے چاٹ لیتا ہے۔‘‘ (بخاری و مسلم) اور بخاری کی ایک روایت میں ہے: ’’بری مثال ہمارے شایان شان نہیں‘ جو شخص ہبہ کر کے واپس لیتا ہے وہ اس کتے کی مانند ہے جو قے کرتا ہے اور پھر خود ہی اسے چاٹ لیتا ہے۔‘‘

اردو ترجمہ · UrduUnverified translation

حضرت ابن عمر اور حضرت ابن عباس رضی اللہ عنہم سے مروی ہے‘ نبی صلی اللہ علیہ وسلم نے فرمایا: ’’کسی مسلمان مرد کے لیے جائز نہیں ہے کہ عطیہ دے کر واپس لے لے‘ سوائے والد کے جو وہ اپنی اولاد کو دیتا ہے۔ (اسے وہ واپس لے سکتا ہے)۔‘‘ (اسے احمد اور چاروں نے روایت کیا ہے اور ترمذی‘ ابن حبان اور حاکم نے صحیح قرار دیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ وہ فرماتی ہیں کہ رسول اللہ صلی اللہ علیہ وسلم ہدیہ و تحفہ قبول فرما لیتے تھے اور اس کے بدلے میں کچھ عنایت بھی فرمایا کرتے تھے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ وہ فرماتے ہیں کہ ایک آدمی نے رسول اللہ صلی اللہ علیہ وسلم کو ایک اونٹنی ہبہ کی۔ آپ نے اس کے بدلے میں اسے کچھ ہدیہ دیا اور فرمایا: ’’کیا تو راضی ہے؟‘‘ اس نے کہا: نہیں! پھر مزید کچھ مرحمت فرما کر پوچھا: ’’اب تو خوش ہے؟‘‘ اس نے پھر یہی کہا کہ نہیں۔ پھر آپ نے اسے مزید براں دے کر دریافت فرمایا: ’’اب تو راضی ہے؟‘‘ وہ بولا ہاں! (اسے احمد نے روایت کیا ہے اور ابن حبان نے اسے صحیح کہا ہے۔)

اردو ترجمہ · UrduUnverified translation

حضرت جابر رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’عمریٰ اسی کا ہے جسے ہبہ کیا گیا ہے۔‘‘ (بخاری و مسلم) اور مسلم کی روایت میں ہے: ’’تم اپنے اموال کو اپنے پاس محفوظ رکھو۔ انھیں ضائع نہ کرو کیونکہ جس شخص نے کسی کو عمریٰ دیا تو وہ عمریٰ اسی کا ہے جسے وہ دیا گیا ہے‘ زندگی میں اور موت کے بعد بھی‘ اور اس کی وفات کے بعد اس کی اولاد کے لیے ہے۔‘‘ایک اور روایت کے الفاظ ہیں: جس عمریٰ کو رسول اللہ صلی اللہ علیہ وسلم نے جائز قرار دیا ہے وہ یہ ہے کہ عمریٰ دینے والا یہ کہے: یہ تیرے لیے ہے اور تیرے بعد تیری اولاد کے لیے ہے۔ لیکن جب یہ کہے کہ جب تک تو زندہ ہے اس وقت تک تیرے لیے ہے‘ تو وہ (عمریٰ) اپنے دینے والے کی طرف پلٹ جائے گا۔ ابوداود اور نسائی کی روایت میں ہے: ’’تم رقبیٰ اور عمریٰ کے انداز میں ہدیہ مت دو۔ چنانچہ جو شخص کوئی رقبیٰ دیا گیا یا عمریٰ دیا گیا تو وہ اس کے ورثاء کے لیے ہے۔‘‘

اردو ترجمہ · UrduUnverified translation

حضرت عمر رضی اللہ عنہ سے روایت ہے کہ میں نے ایک آدمی کو اللہ کے راستے میں ایک گھوڑا سواری کے لیے دیا۔ اس نے اسے ناکارہ کر دیا۔ میں نے خیال کیا کہ وہ اسے سستے داموں بیچنے والا ہے۔ میں نے رسول اللہ صلی اللہ علیہ وسلم سے اس کے بارے میں دریافت کیا (کیا میں اسے خرید سکتا ہوں؟) تو آپ نے فرمایا: ’’وہ تمھیں اگر یہ (گھوڑا) ایک درہم کے عوض بھی دے‘ تب بھی نہ خریدو۔‘‘ (راوی نے) مکمل حدیث بیان کی۔ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’ایک دوسرے کو ہدیہ دیا کرو اس سے باہمی محبت پیدا ہوتی ہے۔‘‘ (اسے بخاری نے ’’الادب المفرد ‘‘میں روایت کیا ہے اور ابویعلیٰ نے حسن سند سے نقل کیاہے۔)

اردو ترجمہ · UrduUnverified translation

حضرت انس رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’تحفے تحائف کا باہمی تبادلہ کیا کرو کیونکہ ہدیہ بغض و کینے کو کھینچ نکالتا ہے۔‘‘ (اسے بزار نے ضعیف سند سے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’اے مسلمان عورتو! کوئی پڑوسن اپنی پڑوسن (کے لیے ہدیہ بھیجنے) کو ہرگز حقیر نہ سمجھے‘ خواہ وہ (ہدیہ) بکری کا کھر ہی کیوں نہ ہو۔‘‘ (بخاری و مسلم)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ نبی صلی اللہ علیہ وسلم نے فرمایا: ’’جو شخص کوئی چیز ہبہ کرے وہی اس کا زیادہ حقدار ہے جب تک کہ اس کا بدلہ نہ دیا جائے۔‘‘ (اسے حاکم نے روایت کیا ہے اور اسے صحیح قرار دیا ہے اور صحیح یہ ہے کہ ابن عمر رضی اللہ عنہما کے حوالے سے یہ حضرت عمر رضی اللہ عنہ کا قول ہے۔)