اردو ترجمہ · UrduUnverified translation

حضرت عروہ نے حضرت عائشہ رضی اللہ عنہا سے روایت کیا ہے کہ نبی صلی اللہ علیہ وسلم نے فرمایا: ’’جس کسی نے غیرمملوکہ زمین کو آباد کیا وہ اس زمین کا زیادہ حقدار ہے۔‘‘ عروہ کہتے ہیں کہ حضرت عمر رضی اللہ عنہ نے اپنے دورِ خلافت میں اسی پر فیصلہ فرمایا۔ (اسے بخاری نے روایت کیا ہے۔)

اردو ترجمہ · UrduUnverified translation

[أَرْضًا مَیِّـتَۃً] میتۃ میں ’’یا‘‘ مخفف بھی ہے اور اس پر تشدید بھی۔ اس سے مراد وہ زمین ہے جسے آباد نہ کیا گیا ہو۔ اسے آباد کرنے کو زندہ کرنے سے تشبیہ دی گئی ہے اور بیکار چھوڑے رکھنے کو اس کی موت سے تعبیر کیا گیا ہے۔

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے کہ حضرت صعب بن جثامہ لیثی رضی اللہ عنہ نے انھیں بتایا کہ نبی صلی اللہ علیہ وسلم نے فرمایا: ’’اللہ اور اس کے رسول کے سوا کسی کے لیے جائز نہیں کہ وہ اپنے لیے چراگاہ مخصوص کر لے۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما ہی سے روایت ہے‘ رسول اللہ صلی اللہ علیہ وسلم نے فرمایا: ’’نہ (پہلے پہل) کسی کو نقصان پہنچانا اور تکلیف دینا جائز ہے اور نہ بدلے کے طور پر نقصان پہنچانا اور تکلیف دینا۔‘‘ (اسے احمد اور ابن ماجہ دونوں نے روایت کیا ہے اور ابن ماجہ میں ابوسعید کے حوالے سے اسی طرح کی حدیث منقول ہے اور یہی حدیث موطا میں مرسل ہے۔)

اردو ترجمہ · UrduUnverified translation

حضرت سمرہ بن جندب رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس نے کسی (غیر مملوکہ) زمین کے اردگرد دیوار بنا لی‘ وہ زمین اسی کی ملکیت ہو گی۔‘‘ (اسے ابوداود نے روایت کیا ہے اور ابن جارود نے اسے صحیح قرار دیا ہے۔)

اردو ترجمہ · UrduUnverified translation

حضرت عبداللہ بن مغفل رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’جس شخص نے کنواں کھودا تو اس کے مویشیوں کے بیٹھنے کے لیے چالیس ہاتھ زمین اسی کی ہے۔‘‘ (اسے ابن ماجہ نے ضعیف سند سے روایت کیاہے۔)

اردو ترجمہ · UrduUnverified translation

حضرت علقمہ بن وائل اپنے باپ حضرت وائل رضی اللہ عنہ سے بیان کرتے ہیں کہ نبی صلی اللہ علیہ وسلم نے انھیں حَضْر موت میں ایک قطعۂ زمین بطور جاگیر عطا فرمایا۔ (اسے ابوداود اور ترمذی نے روایت کیا ہے اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ نبی صلی اللہ علیہ وسلم نے حضرت زبیر رضی اللہ عنہ کو اس کے گھوڑے کی دوڑ کے برابر زمین‘ جاگیر کے طور پر عنایت فرمائی‘ چنانچہ انھوں نے گھوڑے کو دوڑایا حتیٰ کہ وہ ٹھہر گیا‘ پھر انھوں نے اپنا چابک آگے پھینک دیا۔ آپ نے فرمایا: ’’جہاں تک چابک پہنچا ہے وہاں تک کی زمین ان (زبیر) کو دے دو۔‘‘ (اسے ابوداود نے روایت کیا ہے اور اس میں ضعف ہے۔)

اردو ترجمہ · UrduUnverified translation

ایک صحابی رضی اللہ عنہ سے روایت ہے‘ وہ فرماتے ہیں کہ میں نبی صلی اللہ علیہ وسلم کے ساتھ ایک غزوے میں شریک تھا کہ میں نے آپ کو فرماتے ہوئے سنا: ’’تین چیزوں میں سب لوگ حصہ دار ہیں: گھاس‘ پانی اور آگ۔‘‘ (احمد اور ابوداود نے اسے روایت کیا ہے اور اس کے راوی ثقہ ہیں۔)