اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے اہل خیبر سے اس طرح معاملہ طے کیا کہ پھل اور کھیتی باڑی سے جو کچھ حاصل ہو اس میں سے آدھا ان کا۔ (بخاری و مسلم) صحیح بخاری اور صحیح مسلم کی ایک دوسری روایت میں ہے: اہل خیبر (یہود) نے خود مطالبہ کیا کہ آپ انھیں (ان کی) زمینوں پر برقرار رہنے دیں‘ اس شرط پر کہ (زمین کے متعلقہ تمام) کام وہ کریں گے اور اس کے پھلوں (پیداوار) میں سے آدھا حصہ ان کا ہو گا۔ رسول اللہ صلی اللہ علیہ وسلم نے فرمایا: ’’ہم تمھیں اسی شرط پر ان زمینوں پر برقرار رکھتے ہیں‘ (لیکن) ہم جب تک چاہیں گے (رہنے دیں گے۔‘‘) پھر یہ زمینوں پر برقرار رہے یہاں تک کہ حضرت عمر رضی اللہ عنہ نے انھیں جلا وطن کر دیا۔اور مسلم کی ایک روایت میں ہے: رسول اللہ صلی اللہ علیہ وسلم نے خیبر کے یہود کو خیبر کی کھجوریں اور زمین اس شرط پر دی تھیں کہ وہ اپنے اموال سے ان پر کام کریں گے اور ان کے لیے ان کے پھلوں (پیداوار) کا آدھا حصہ ہوگا۔

اردو ترجمہ · UrduUnverified translation

حضرت حنظلہ بن قیس رحمہ اللہ سے رو ایت ہے کہ میں نے حضرت رافع بن خدیج رضی اللہ عنہ سے پوچھا کہ سونے اور چاندی کے عوض زمین ٹھیکے پر دینا کیسا ہے؟ انھوں نے جواب دیا کہ اس میں کوئی مضائقہ نہیں۔ رسول اللہ صلی اللہ علیہ وسلم کے زمانے میں تو لوگ صرف پانی کے بہاؤ والی جگہوں‘ نالوں کے شروع والی زمین (جہاں پانی خوب لگتا ہے) اور کھیتی کے کچھ حصے کے عوض زمین اجرت پر دیتے تھے‘ تو کبھی مالک کا حصہ تباہ و برباد ہو جاتا اور مزارع کا حصہ بچ جاتا اور کبھی یہ بچ جاتا اور وہ تباہ ہو جاتا۔ اور لوگوں میں ٹھیکے کی اس کے سوا اور کوئی شکل نہیں تھی‘ اس لیے نبی ٔاکرم صلی اللہ علیہ وسلم نے اس سے منع فرمایا۔ بنابریں اگر کوئی معین چیز ہو جس کے تلف نہ ہونے کی ضمانت ہو تو اس میں کوئی حرج نہیں۔ (اسے مسلم نے روایت کیا ہے۔) اور اس حدیث میں بخاری و مسلم کی ان مجمل روایات کی وضاحت ہے جن میں مطلقاً زمین ٹھیکے پر دینے کی ممانعت آئی ہے۔

اردو ترجمہ · UrduUnverified translation

حضرت ثابت بن ضحاک رضی اللہ عنہ سے روایت ہے کہ رسول اللہ صلی اللہ علیہ وسلم نے مزارعت سے منع فرمایا ہے اور ٹھیکے پر دینے کی اجازت مرحمت فرمائی ہے۔ (اسے بھی مسلم نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے سینگی لگوائی اور سینگی لگانے والے کو اس کا معاوضہ اور اجرت بھی عطا فرمائی۔ اگر یہ اجرت حرام ہوتی تو آپ یہ معاوضہ عنایت نہ فرماتے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت رافع بن خدیج رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ’’حجام (سینگی لگانے والے) کی کمائی خبیث ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’ارشاد باری تعالیٰ ہے کہ میں قیامت کے روز تین آدمیوں کے خلاف مدعی ہوں گا: پہلا آدمی جو میرے نام کا عہد اور ضمانت دے کر بدعہدی کرے۔ دوسرا وہ آدمی جو کسی آزاد آدمی کو فروخت کرے اور اس کی قیمت کھائے۔ تیسرا وہ آدمی جس نے کوئی مزدور رکھا اور اس سے کام تو پورا لیا مگر اس کی مزدوری نہ دی۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’بے شک سب سے زیادہ مستحق کام‘ جس کی تم اجرت لو‘ کتاب اللہ ہے۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’مزدور کو اس کی مزدوری اس کا پسینہ خشک ہونے سے پہلے ادا کر دو۔‘‘ (اسے ابن ما جہ نے روایت کیا ہے۔) اور اسی مضمون سے متعلق روایت حضرت ابوہریرہ رضی اللہ عنہ سے بھی مروی ہے جسے ابو یعلیٰ اور بیہقی نے نقل کیا ہے اور حضرت جابر رضی اللہ عنہ سے بھی مروی ہے جسے طبرانی نے بیان کیا ہے‘ مگر یہ ساری روایات ضعیف ہیں۔

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’جو آدمی کوئی مزدور رکھے تو وہ اس کی اجرت و مزدوری (پہلے) متعین کرے ۔‘‘ (اسے عبدالرزاق نے روایت کیا ہے اور اس کی سند میں انقطاع ہے۔ اور بیہقی نے اس حدیث کو امام ابوحنیفہ رحمہ اللہ کے واسطے سے موصول روایت کیا ہے۔)