اردو ترجمہ · UrduUnverified translation

حضرت سعید بن زید رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس شخص نے ایک بالشت بھر زمین کسی سے ظلماً لے لی‘ اللہ تعالیٰ قیامت کے روز اتنا حصۂ زمین‘ ساتوں زمینوں سے اس کے گلے میں طوق بنا کر ڈالے گا۔‘‘ (بخاری و مسلم)

اردو ترجمہ · UrduUnverified translation

حضرت انس رضی اللہ عنہ سے روایت ہے کہ نبی صلی اللہ علیہ وسلم اپنی کسی بیوی کے ہاں تشریف فرما تھے۔ کسی دوسری ام المومنین نے اپنے خادم کے ذریعے سے ایک پیالہ بھیجا جس میں کچھ کھانا تھا۔ تو اس بیوی نے اپنا ہاتھ مارا اور وہ پیالہ ٹوٹ گیا‘ چنانچہ رسول اللہ صلی اللہ علیہ وسلم نے اس پیالے کو جوڑ کر اس میں کھانا ڈال دیا اور فرمایا: ’’کھاؤ۔‘‘ اور لانے والے کے ہاتھ سالم پیالہ بھیج دیا اور ٹوٹا ہوا اپنے پاس رکھ لیا۔ (بخاری و ترمذی) ترمذی نے ہاتھ مار کر پیالہ توڑنے والی کا نام حضرت عائشہ رضی اللہ عنہا بتلایا ہے۔ اور اتنا اضافہ کیا ہے کہ نبی صلی اللہ علیہ وسلم نے فرمایا: ’’کھانے کے بدلے میں کھانا اور برتن کے بدلے میں برتن۔‘‘ (اور ترمذی نے اسے صحیح کہا ہے۔)

اردو ترجمہ · UrduUnverified translation

حضرت رافع بن خدیج رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس کسی نے دوسرے لوگوں کی زمین میں ان کی اجازت کے بغیر فصل کاشت کی تو اسے اس فصل میں سے کچھ نہیں ملے گا۔ اسے صرف وہ اخراجات ملیں گے جو اس نے خرچ کیے ہیں۔‘‘ (اسے احمد اور چاروں نے روایت کیا ہے سوائے نسائی کے اور ترمذی نے اسے حسن کہا ہے۔ اور یہ بھی کہا جاتا ہے کہ بخاری نے اسے ضعیف قرار دیا ہے۔)

اردو ترجمہ · UrduUnverified translation

حضرت عروہ بن زبیر سے روایت ہے کہ رسول اللہ صلی اللہ علیہ وسلم کے صحابہ میں سے ایک آدمی نے بتایا کہ دو آدمی رسول اللہ صلی اللہ علیہ وسلم کے پاس ایک زمین کا جھگڑا لے کر آئے‘ جس میں ان میں سے ایک نے کھجور کے درخت لگا دیے تھے جبکہ زمین دوسرے شخص کی تھی‘ چنانچہ رسول اللہ صلی اللہ علیہ وسلم نے فیصلہ فرمایا کہ زمین ‘ زمین والے کی ہے اور کھجور کے درخت لگانے والا اپنے درخت اکھاڑ لے‘ نیز فرمایا: ’’ظالم رگ (انسان کے اندر دوسرے کا حق مارنے کا منفی جذبہ یا منفی جذبے کے تحت کی گئی غاصبانہ کارروائی) کا کوئی حق نہیں۔‘‘ (اسے ابوداود نے روایت کیا ہے اور اس کی سند حسن ہے۔ اس حدیث کا آخری جز اصحابِ سنن نے عروہ عن سعید بن زید کی سند سے روایت کیا ہے۔ اس روایت کے مرسل اور موصول ہونے اور اس کے صحابی کے تعین میں اختلاف ہے۔)

اردو ترجمہ · UrduUnverified translation

حضرت ابوبکرہ رضی اللہ عنہ سے روایت ہے کہ نبی صلی اللہ علیہ وسلم نے قربانی کے روز منیٰ میں اپنے خطبے میں فرمایا: ’’بے شک تمھارے خون‘ تمھارے اموال اور تمھاری آبروئیں تم پر اسی طرح حرام ہیں جس طرح تمھارا آج کا یہ دن تمھارے اس شہر اور تمھارے اس مہینے میں حرمت والا ہے۔‘‘ (بخاری و مسلم)