اردو ترجمہ · UrduUnverified translation

حضرت جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے حج کیا تو ہم آپ کے ساتھ نکلے یہاں تک کہ ہم ذوالحلیفہ پہنچے تو اسماء بنت عمیس رضی اللہ عنہا نے بچے کو جنم دیا۔ آپ نے فرمایا: ’’غسل کر کے ایک لنگوٹ باندھ لے اور احرام باندھ لے۔‘‘ رسول اللہ صلی اللہ علیہ وسلم نے (ذوالحلیفہ کی) مسجد میں نماز پڑھی اور قصواء (اونٹنی) پر سوار ہو گئے یہاں تک کہ جب آپ بیداء کے برابر آئے تو آپ نے توحیدکا تلبیہ پکارا [لَـبَّیْکَ‘ اللّٰھُمَّ لَـبَّیْکَ لَـبَّیْکَ…لاَشَرِیکَ لَکَ] ’’حاضر ہوں‘ اے میرے اللہ! میں حاضر ہوں۔ میں حاضر ہوں‘تیرا کوئی شریک نہیں۔ میں حاضر ہوں۔ بلاشبہ سب تعریفیں اور نعمتیں تیری ہیں۔ اوربادشاہت بھی تیری ہے‘ تیرا کوئی شریک نہیں۔‘‘ یہاں تک کہ ہم بیت اللہ میں داخل ہوئے۔ آپ نے رکن (حجر اسود) کو بوسہ دیا‘ تین چکروں میں رمل کیا اور چار چکروں میں معمول کے مطابق چلے‘ پھر آپ مقام ابراہیم پر آئے اور نماز پڑھی‘ پھر رکن (حجر اسود) کی طرف واپس آئے اور اسے بوسہ دیا‘ پھر (مسجد حرام کے) دروازے سے صفا کی طرف نکلے۔ جب صفا کے نزدیک پہنچے تو یہ آیت پڑھی: ﴿اِنَّ الصَّفَا وَالْمَرْوَۃَ مِنْ شَعَآئِرِ اللّٰہِ﴾ (البقرۃ۲:۱۵۸) ’’بلاشبہ صفا اور مروہ اللہ تعالیٰ کی نشانیوں میں سے ہیں۔‘‘ (پھر فرمایا:) ’’میں (سعی کو) اس مقام سے شروع کرتا ہوں جہاں سے اللہ نے شروع کیا ہے۔‘‘ (میں اسی سے شروع کرتا ہوں جس کا نام اللہ نے پہلے لیا ہے۔) پھر آپ صفا پر چڑھے یہاں تک کہ آپ نے بیت اللہ کو دیکھا‘ پھر قبلہ رخ ہوئے اور اللہ کی وحدانیت اور کبریائی بیان کی اور کہا: [لاَ إلٰہَ إِلاَّ اللّٰہُ‘ وَحْدَہُ‘ لاَشَرِیکَ لَہُ... وَھَزَمَ الْأَحْزَابَ وَحْدَہُ] ’’اللہ کے سوا کوئی معبود برحق نہیں۔ وہ یکتا ہے‘ کوئی اس کا شریک نہیں۔ بادشاہی اور سب خوبیاں اسی کی ہیں اور وہ ہر چیز پر قادر ہے۔ اللہ کے سوا کوئی معبود برحق نہیں۔ اس نے اپنا وعدہ پورا کر دیا اور اپنے بندے کی مدد کی اور کفار کی جماعتوں کو اسی اکیلے نے شکست دی۔‘‘ پھر ان (الفاظ کو پہلی بار اور دوسری بار پڑھنے) کے درمیان دعا مانگی۔ تین بار ایسا کیا‘ پھر صفا سے اترکر مروہ کی طرف چلے حتی کہ جب آپ کے قدم وادی کے نشیب میں پڑے تو آپ دوڑنے لگے یہاں تک کہ آپ بلند جگہ پہنچے تو مروہ کی طرف پیدل چلنے لگے‘ پھر مروہ پر وہی کچھ کیا جو صفا پر کیا تھا‘ پھر حضرت جابر رضی اللہ عنہ نے ساری حدیث بیان کی جس میں یہ ہے کہ جب ترویہ کا دن (۸ ذوالحجہ) ہوا تو لوگ منیٰ کی طرف متوجہ ہوئے اور نبی صلی اللہ علیہ وسلم سوار ہوئے (اور منی پہنچے)۔ آپ نے وہاں ظہر‘ عصر‘ مغرب‘ عشاء اور صبح کی نمازیں پڑھیں‘ پھر تھوڑی دیر ٹھہرے رہے یہاں تک کہ سورج نکل آیا تو وہاں سے روانہ ہوئے اور (مزدلفہ سے گزرتے ہوئے) عرفات میں پہنچے تو وہاں ایک خیمہ لگا ہوا پایا جو آپ کے لیے نمرہ میں لگایا گیا تھا‘ آپ وہاں تشریف فرما ہوئے‘ پھر جب سورج ڈھلنے لگا تو آپ نے قصواء پر پالان رکھنے کا حکم دیا۔ آپ سوار ہو کر وادی کے نشیب میں آئے اور لوگوں کو خطبہ دیا‘ پھر اذان دلوائی‘ پھر اقامت کہلواکر نماز ظہر ادا کی‘ پھر اقامت کہلواکر عصر کی نماز پڑھی اور ان دونوں کے درمیان کوئی نماز نہ پڑھی‘ پھر سوار ہو کر ٹھہرنے کی جگہ پر پہنچے تو اپنی اونٹنی قصواء کا پیٹ پتھروں کی طرف کر دیا اور پیدل چلنے والوں کے راستے کو اپنے سامنے کرلیا اور اپنا رخ قبلے کی جانب کر لیا‘ پھر آپ ٹھہرے رہے یہاں تک کہ سورج غروب ہوگیا اور تھوڑی سی زردی ختم ہو گئی۔ جب سورج مکمل طور پر غروب ہوگیا تو آپ (اسی حالت میں) واپس ہوئے۔ آپ نے قصواء کی مہار اتنی کھینچ رکھی تھی کہ اس کا سر آپ کے پالان کے اگلے ابھرے ہوئے حصے کو پہنچتا تھا اور آپ اپنے داہنے ہاتھ سے اشارہ کرتے ہوئے فرما رہے تھے: ’’لوگو! آرام سے چلو‘ آرام سے چلو۔‘‘ اور جب بھی آپ کسی ٹیلے پر آتے تو مہار تھوڑی سی ڈھیلی کردیتے حتی کہ وہ (اونٹنی) اوپر چڑھ جاتی یہاں تک کہ آپ مزدلفہ تشریف لائے اور وہاں ایک اذان اور دو اقامتوں کے ساتھ مغرب اور عشاء کی نماز پڑھی اور دونوں کے درمیان کوئی نفل نماز نہیں پڑھی‘ پھر آپ لیٹ گئے یہاں تک کہ صبح ہوگئی۔ جب صبح کا وقت ظاہر ہوا تو آپ نے اذان اور اقامت سے فجر کی نماز پڑھی‘ پھر سوار ہو کر مشعر حرام پر آئے‘ چنانچہ آپ قبلہ رو ہوئے‘ دعا کی اور تکبیر و تہلیل کہتے رہے۔ خوب روشنی ہونے تکآپ وہاں ٹھہرے رہے‘ پھر سورج نکلنے سے پہلے واپس ہو کر وادی ٔ محسر کے نشیب میں آئے تو سواری کو کچھ تیز کر دیا‘ پھر درمیانی راستے پر چلے جو جمرۂ کبریٰ (بڑے شیطان) پر پہنچتا ہے‘ پھر آپ اس جمرے پر آئے جو درخت کے پاس ہے اور اسے سات کنکریاں وادی کے نشیب سے ماریں۔ ہر کنکری کے ساتھ اللہ اکبر کہتے تھے۔ ان میں سے ہر کنکری خذف (لوبیا اور چنے وغیرہ کے دانے) کے برابر تھی‘ پھر آپ قربان گاہ کی طرف گئے اور وہاں قربانی کی‘ پھر رسول اللہ صلی اللہ علیہ وسلم سوار ہوئے اور بیت اللہ کی طرف روانہ ہوئے‘ پھر مکہ میں ظہر کی نماز پڑھی۔ (اسے مسلم نے تفصیل سے بیان کیا ہے۔)

اردو ترجمہ · UrduUnverified translation

حضرت خزیمہ بن ثابت رضی اللہ عنہ سے روایت ہے کہ نبی صلی اللہ علیہ وسلم جب حج یا عمرے میں تلبیہ‘ یعنی لبیک کہنے سے فارغ ہوتے تو اللہ تعالیٰ سے اس کی رضامندی اور جنت طلب کرتے اور اس کی رحمت کے ساتھ آگ سے پناہ مانگتے۔ (اسے امام شافعی رحمہ اللہ نے ضعیف سند سے روایت کیا ہے۔)

اردو ترجمہ · UrduUnverified translation

حضرت جابر رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’میں نے قربانی اس جگہ کی ہے مگر منیٰ سارے کا سارا قربان گاہ ہے‘ لہٰذا تم اپنے اپنے ٹھہرنے کے مقامات پر قربانی کر و۔ اور میں نے اس جگہ قیام کیا ہے مگر عرفات کا سارا میدان جائے قیام ہے۔ اور میں نے یہاں قیام کیا مگر مزدلفہ سارا جائے قیام ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ نبی صلی اللہ علیہ وسلم جب (حج کے لیے) مکہ میں داخل ہوئے تو مکہ کی بالائی جانب سے داخل ہوئے اور اس کے زیریں حصے سے نکلے۔ (بخاری و مسلم)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ وہ جب بھی مکہ میں آتے تو ذی طویٰ میں صبح تک شب بسر کرتے اور غسل کرتے اور کہتے تھے کہ رسول اللہ صلی اللہ علیہ وسلم اسی طرح کیا کرتے تھے۔ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ آپ حجر اسود کو بوسہ دیتے اور اس پر سجدہ کرتے۔ (اسے حاکم نے مرفوع اور بیہقی نے موقوف روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما ہی سے روایت ہے کہ نبی صلی اللہ علیہ وسلم نے صحابۂ کرام رضی اللہ عنہم کو حکم دیا کہ تین چکروں میں ہلکا ہلکا دوڑ کر چلیں اور چار چکر عام معمول کے مطابق چل کر لگائیں اور دونوں رکنوں کے مابین پیدل چلیں۔ (بخاری و مسلم)

اردو ترجمہ · UrduUnverified translation

حضرت عبداللہ بن عمر رضی اللہ عنہما سے روایت ہے کہ وہ جب بھی بیت اللہ کا طواف قدوم (پہلا طواف) کرتے تو اس کے پہلے تین چکروں میں پہلوانوں کی سی چال چلتے اور (باقی) چار میں آہستہ چلتے۔ ایک اور روایت میں ہے کہ (حضرت عبداللہ بن عمر رضی اللہ عنہما رسول اللہ صلی اللہ علیہ وسلم کا عمل بیان کرتے ہوئے فرماتے ہیں:) میں نے اللہ کے رسول صلی اللہ علیہ وسلم کو دیکھا کہ آپ حج یا عمرے کے لیے جب بھی طواف قدوم کرتے تو اس کے پہلے تین چکر دوڑ کر لگاتے اور باقی چار میں آپ آہستہ چال چلتے۔ (بخاری ومسلم)

اردو ترجمہ · UrduUnverified translation

حضرت عبداللہ بن عمر رضی اللہ عنہما ہی سے روایت ہے کہ میں نے رسول اللہ صلی اللہ علیہ وسلم کو دونوں یمانی رکنوں کے سوا بیت اللہ کے کسی رکن کو چھوتے ہوئے نہیں دیکھا۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت عمر رضی اللہ عنہ سے مروی ہے کہ انھوں نے حجر اسود کو بوسہ دیا اور فرمایا: مجھے اچھی طرح معلوم ہے کہ تو پتھر ہے۔ تو کسی قسم کے نفع و نقصان کا مالک نہیں۔ اگر میں نے رسول اللہ صلی اللہ علیہ وسلم کو تجھے بوسہ دیتے ہوئے نہ دیکھا ہوتا تو میں تجھے کبھی بوسہ نہ دیتا۔ (بخاری و مسلم)

اردو ترجمہ · UrduUnverified translation

حضرت ابوطفیل رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو بیت اللہ کا طواف کرتے دیکھا ہے۔ آپ چھڑی سے‘ جو آپ کے پاس تھی‘ حجر اسود کو چھوتے اور پھر اس چھڑی کو بوسہ دیتے تھے۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت یعلیٰ بن امیہ رضی اللہ عنہ سے روایت ہے کہ رسول اللہ صلی اللہ علیہ وسلم نے ایک سبز چادر میں طواف کیا جس کو آپ نے دائیں بغل سے نکال کر بائیں کندھے پر ڈال رکھا تھا۔ (اسے نسائی کے سوا پانچوں نے روایت کیا ہے اور ترمذی نے صحیح قرار دیا ہے۔)

اردو ترجمہ · UrduUnverified translation

حضرت انس رضی اللہ عنہ سے روایت ہے کہ ہم میں سے کچھ لوگ تلبیہ کہتے تھے‘ انھیں بھی برا نہیں سمجھا جاتا تھا اور بعض ہم میں سے تکبیریں کہتے تھے، انھیں بھی برا نہیں سمجھا جاتا تھا۔ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ انھوں نے کہا کہ مجھے نبی صلی اللہ علیہ وسلم نے مسافروں کے سامان کے ساتھ‘ یا کہا کہ کمزوروں کے ساتھ رات ہی کو مزدلفہ سے (منیٰ کی جانب) بھیج دیا تھا۔ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ حضرت سودہ رضی اللہ عنہا نے مزدلفہ کی رات رسول اللہ صلی اللہ علیہ وسلم سے اجازت طلب کی کہ وہ آپ سے پہلے واپس آجائے اور (یہ اجازت انھوں نے اس لیے طلب کی کہ) وہ بھاری جسم والی تھیں۔ آپ نے انھیں اجازت دے دی۔ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ رسول اللہ صلی اللہ علیہ وسلم نے ہم سے فرمایا: ’’طلوع آفتاب سے پہلے کنکریاں نہ مارو۔‘‘ (اسے نسائی کے علاوہ پانچوں نے روایت کیا ہے۔ اس کی سند میں انقطاع ہے)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ نبی صلی اللہ علیہ وسلم نے ام سلمہ رضی اللہ عنہا کو قربانی والی رات پہلے بھیج دیا تھا‘ چنانچہ انھوں نے طلوع فجر سے پہلے کنکریاں ماریں‘ پھر جاکر طواف افاضہ کیا۔ (اسے ابوداود نے روایت کیا ہے اور اس کی سند مسلم کی شرط پر ہے۔)

اردو ترجمہ · UrduUnverified translation

حضرت عروہ بن مضرس رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جو شخص ہمارے ساتھ اس نماز‘ یعنی مزدلفہ میں (فجر کی نماز میں) شامل ہوا اور ہمارے ساتھ وقوف کیا یہاں تک کہ ہم نے کوچ کیا اور اس سے پہلے وہ رات کو یا دن کو عرفہ میں وقوف (عرفات میں قیام) کر چکا ہو تو اس کا حج مکمل ہوگیا اور اس نے اپنا میل کچیل دور کرلیا۔‘‘ (اسے پانچوں نے روایت کیا ہے اور ترمذی اور ابن خزیمہ نے اسے صحیح قرار دیا ہے۔)

اردو ترجمہ · UrduUnverified translation

حضرت عمر رضی اللہ عنہ بیان کرتے ہیں کہ مشرکین (مزدلفہ سے) طلوع آفتاب کے بعد واپس لوٹتے تھے اور کہتے تھے: اے ثبیر (پہاڑ!) روشن ہو جا۔ لیکن نبی صلی اللہ علیہ وسلم نے ان کی مخالفت کی اور طلوع آفتاب سے پہلے وہاں سے کوچ کیا۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عباس اور اسامہ بن زید رضی اللہ عنہم دونوں سے مروی ہے کہ نبی صلی اللہ علیہ وسلم جمرۂ عقبہ کو کنکری مارنے تک تلبیہ کہتے رہے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت عبداللہ بن مسعود رضی اللہ عنہ سے منقول ہے کہ انھوں نے بیت اللہ کو اپنی بائیں جانب اور منیٰ کو اپنی دائیں جانب رکھا اور جمرے کو سات کنکریاں ماریں اور فرمایا کہ یہ اس ہستی کے کھڑے ہونے کی جگہ ہے جس پر سورۂ بقرہ کا نزول ہوا تھا۔ (بخاری و مسلم)

اردو ترجمہ · UrduUnverified translation

حضرت جابر رضی اللہ عنہ سے روایت ہے کہ رسول اللہ صلی اللہ علیہ وسلم نے جمرہ کو قربانی کے روز چاشت کے وقت کنکریاں ماریں اور اس روز کے بعد آفتاب ڈھلنے کے بعد (کنکریاں مارتے رہے۔) (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ وہ (مسجد خیف کے) سب سے قریبی جمرے کو سات کنکریاں مارتے اور ہر کنکری مارتے وقت تکبیر کہتے‘ پھر آگے تشریف لے جاتے اور نرم جگہ (میدان میں) آکر کھڑے ہو جاتے اور قبلہ رخ ہو کر طویل قیام فرماتے اور اپنے دونوں ہاتھ اٹھا کر دعا کرتے‘ پھر جمرۂ وسطیٰ (درمیانی جمرے) کو کنکریاں مارتے‘ پھر بائیں جانب ہو جاتے اور نرم جگہ (میدان) میں آکر قبلہ رخ کھڑے ہو جاتے‘ پھر اپنے دونوں ہاتھ اٹھاتے اور دعا کرتے ہوئے طویل قیام فرماتے۔ اس کے بعد جمرۂ عقبہ کو کنکریاں وادی کی نچلی جگہ سے مارتے مگر وہاں قیام نہ فرماتے‘ پھر واپس تشریف لے آتے۔ حضرت ابن عمر رضی اللہ عنہما کا بیان ہے کہ میں نے رسول اللہ صلی اللہ علیہ وسلم کو اسی طرح کرتے دیکھا ہے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما ہی سے مروی ہے‘ رسول اللہ صلی اللہ علیہ وسلم نے فرمایا: ’’الٰہی! سر منڈانے والے (حاجیوں) پر رحم فرما۔‘‘ صحابۂ کرام نے عرض کیا: اے اللہ کے رسول! بال کٹوانے والوں پر بھی۔ تو رسول اللہ صلی اللہ علیہ وسلم نے تیسری مرتبہ فرمایا: ’’بال کٹوانے والوں پر بھی (رحم فرما)۔‘‘ (بخاری و مسلم)

اردو ترجمہ · UrduUnverified translation

حضرت عبداللہ بن عمرو بن عاص رضی اللہ عنہما سے روایت ہے کہ رسول اللہ صلی اللہ علیہ وسلم حجۃ الوداع میں ایک مقام پر کھڑے ہوگئے۔ صحابۂ کرام رضی اللہ عنہم نے آپ سے سوالات کرنے شروع کیے۔ کسی نے کہا: مجھے علم نہیں تھا تو میں نے قربانی سے پہلے حجامت بنوا لی۔ آپ نے اس سے فرمایا: ’’اب قربانی کرلو ‘کوئی حرج نہیں۔‘‘ اور ایک آدمی نے عرض کیا کہ مجھے معلوم نہیں تھا تومیں نے کنکریاں مارنے سے پہلے قربانی کر لی۔ آپ نے اس سے فرمایا: ’’اب کنکریاں مار لے ‘کوئی حرج نہیں۔‘‘ اس روز آپ سے جس عمل کے مقدم و مؤخر کرنے کے متعلق بھی استفسار کیا گیا‘ آپ نے یہی فرمایا: ’’اب کر لو‘ کوئی حرج نہیں۔‘‘ (بخاری و مسلم)

اردو ترجمہ · UrduUnverified translation

حضرت مسور بن مخرمہ رضی اللہ عنہما سے روایت ہے کہ رسول اللہ صلی اللہ علیہ وسلم نے خود حجامت کرانے سے پہلے قربانی کی اور اپنے صحابہ کو بھی اس کا حکم دیا۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ رسول اللہ صلی اللہ علیہ وسلم نے فرمایا: ’’جب کنکریاں مار لو اور سر کے بال منڈوا لو تو تمھارے لیے بیویوں کے علاوہ خوشبو اور دیگر تمام چیزیں حلال ہوگئیں۔‘‘ (اسے احمد اور ابوداود نے روایت کیا ہے اور اس کی سند میں ضعف ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’عورتوں کے لیے سر منڈوانا نہیں بلکہ ان کے لیے صرف بال کٹوانا ہے۔‘‘ (اسے ابوداود نے حسن سند سے روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ حضرت عباس بن عبدالمطلب رضی اللہ عنہ نے رسول اللہ صلی اللہ علیہ وسلم سے منیٰ والی راتیں مکہ میں گزارنے کی اجازت طلب کی تاکہ وہ آب زمزم پلا سکیں‘ چنانچہ آپ نے انھیں اجازت دے دی۔ (بخاری و مسلم)

اردو ترجمہ · UrduUnverified translation

حضرت عاصم بن عدی رضی اللہ عنہ سے مروی ہے کہ رسول اللہ صلی اللہ علیہ وسلم نے اونٹوں کے چرواہوں کو منیٰ سے باہر رات گزارنے کی اجازت دے دی کہ قربانی کے دن کنکریاں ماریں‘ پھر کل اور پرسوں دو روز کی (اکٹھی ایک دن) کنکریاں ماریں‘ پھر کوچ کے روز کنکریاں ماریں۔ (اسے پانچوں نے روایت کیا ہے اور ترمذی اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت ابوبکرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ہمیں قربانی کے روز خطبہ دیا۔ اور ساری حدیث ذکر کی۔ (بخاری و مسلم)

اردو ترجمہ · UrduUnverified translation

حضرت سراء بنت نبہان رضی اللہ عنہا سے روایت ہے کہ رسول اللہ صلی اللہ علیہ وسلم نے ہمیں سروں والے دن خطبہ دیا اور فرمایا: ’’کیا یہ دن ایام تشریق کا درمیانی دن نہیں ہے؟‘‘ اور ساری حدیث ذکر کی۔ (اسے ابوداود نے حسن سند کے ساتھ روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے‘ نبی صلی اللہ علیہ وسلم نے ان سے فرمایا: ’’تیرا بیت اللہ کا طواف کر لینا اور صفا اور مروہ کے مابین سعی کر لینا تیرے حج اور تیرے عمرے (دونوں) کے لیے کافی ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے کہ نبی صلی اللہ علیہ وسلم نے طواف افاضہ کے سات چکروں میں رمل نہیں کیا۔ (اسے ترمذی کے علاوہ پانچوں نے روایت کیا ہے اور حاکم نے صحیح قرار دیا ہے۔)

اردو ترجمہ · UrduUnverified translation

حضرت انس رضی اللہ عنہ سے مروی ہے کہ نبی صلی اللہ علیہ وسلم نے محصب میں ظہر و عصر اور مغرب و عشاء کی نمازیں پڑھیں‘ پھر (وہاں) تھوڑا سا سوگئے۔ پھر (بعدازاں) سوار ہو کر بیت اللہ کی جانب تشریف لے گئے اور اس کا طواف کیا۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ وہ ابطح (محصب) میں قیام نہیں کرتی تھیں اور فرماتی تھیں کہ رسول اللہ صلی اللہ علیہ وسلم نے اس مقام پر اس لیے قیام فرمایا تھا کہ یہاں سے واپسی میں آسانی و سہولت زیادہ تھی۔(اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے لوگوں کو حکم دیا کہ ان کا سب سے آخری عمل بیت اللہ کا طواف ہو مگر حائضہ عورتوں کے لیے تخفیف کر دی گئی ہے۔ (بخاری و مسلم)

اردو ترجمہ · UrduUnverified translation

حضرت ابن زبیر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’میری اس مسجد میں ایک نماز ادا کرنے کا ثواب دوسری مساجد میں نماز ادا کرنے کے مقابلے میں ہزار گنا زیادہ ہے سوائے مسجد حرام کے۔ اور مسجد حرام میں ایک نماز کی ادائیگی میری اس مسجد میں سو نماز پڑھنے سے افضل ہے۔‘‘ (اسے احمد نے روایت کیا ہے اور ابن حبان نے صحیح قرار دیا ہے۔)