اردو ترجمہ · UrduUnverified translation

حضرت عبداللہ بن عمر رضی اللہ عنہما سے مروی ہے کہ رسول اللہ صلی اللہ علیہ وسلم نے مسجد (ذوالحلیفہ) کے پاس سے تلبیہ شروع کیا ۔ (بخاری و مسلم)

اردو ترجمہ · UrduUnverified translation

حضرت خلاد بن سائب رحمہ اللہ اپنے باپ (سائب بن خلاد بن سوید رضی اللہ عنہ ) سے روایت کرتے ہیں کہ رسول اللہ صلی اللہ علیہ وسلم نے فرمایا: ’’جبریل علیہ السلام میرے پاس آئے اور مجھے حکم دیا کہ میں اپنے صحابہ کو حکم دوں کہ وہ تلبیہ بلند آواز سے پکاریں۔‘‘ (اسے پانچوں نے روایت کیا ہے اور امام ترمذی اور امام ابن حبان نے صحیح کہا ہے۔)

اردو ترجمہ · UrduUnverified translation

حضرت زید بن ثابت رضی اللہ عنہ سے مروی ہے کہ نبی صلی اللہ علیہ وسلم نے احرام باندھنے کے وقت کپڑے اتارے اور غسل کیا۔ (اسے ترمذی نے روایت کیا ہے اور حسن کہا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم سے پوچھا گیا : احرام باندھنے والا کون سا لباس پہنے؟ آپ نے فرمایا: ’’وہ قمیص‘ پگڑی‘ شلوار ‘ برانڈی (ٹوپی والا اوورکوٹ) اور موزے نہ پہنے۔ لیکن اگر کسی کے پاس جوتے نہ ہوں تو وہ موزے پہن لے اور اسے چاہیے کہ دونوں کو ٹخنوں کے نیچے سے کاٹ لے۔ اور ایسا کوئی کپڑا نہ پہنو جسے زعفران اور ورس لگا ہوا ہو۔‘‘ (بخاری و مسلم- یہ الفاظ مسلم کے ہیں۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ میں رسول اللہ صلی اللہ علیہ وسلم کو احرام باندھنے سے پہلے اور طواف (زیارت) سے پہلے احرام کھولتے وقت خوشبو لگاتی تھی۔ (بخاری و مسلم)

اردو ترجمہ · UrduUnverified translation

حضرت عثمان بن عفان رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’احرام والا خود اپنا نکاح کرے نہ کسی دوسرے کا اور نہ شادی کا پیغام ہی دے۔‘‘(اسے مسلم نے روایت کیا ہے۔)

اردو ترجمہ · UrduUnverified translation

حضرت ابوقتادہ انصاری رضی اللہ عنہ سے… ان کے جنگلی گدھے کو شکار کرنے کے قصے میں جبکہ انھوں نے احرام نہیں باندھا تھا… مروی ہے کہ رسول اللہ صلی اللہ علیہ وسلم نے اپنے صحابہ سے‘ جو احرام والے تھے‘ فرمایا: ’’کیا تم میں سے کسی نے اسے حکم دیا تھا یا اس کی طرف کسی قسم کا اشارہ کیا تھا؟‘‘ انھوں نے کہا: نہیں۔ آپ نے فرمایا: ’’اس کے گوشت سے جو بچ گیا ہے اسے کھا لو۔‘‘ (بخاری و مسلم)

اردو ترجمہ · UrduUnverified translation

حضرت صعب بن جثامہ لیثی رضی اللہ عنہ سے روایت ہے کہ انھوں نے رسول اللہ صلی اللہ علیہ وسلم کو ایک وحشی گدھا بطور تحفہ بھیجا جبکہ آپ ’’ابواء‘‘ یا ’’ودان‘‘ مقام پر تھے۔ آپ نے وہ انھیں واپس کر دیا اور فرمایا: ’’ہم نے یہ صرف اس لیے واپس کیا ہے کہ ہم احرام والے ہیں۔‘‘ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے‘ رسول اللہ صلی اللہ علیہ وسلم نے فرمایا: ’’پانچ جانور ایسے موذی ہیں کہ انھیں حرم کے اندر اور حرم سے باہر (ہر جگہ) قتل کیا جا سکتا ہے۔ اور وہ ہیں: بچھو‘ چیل‘ کوا‘ چوہا اور کاٹ کھانے والا کتا ۔‘‘ (بخاری و مسلم)

اردو ترجمہ · UrduUnverified translation

حضرت عبداللہ بن عباس رضی اللہ عنہما سے مروی ہے کہ بے شک نبی صلی اللہ علیہ وسلم نے احرام کی حالت میں سینگی لگوائی۔ (بخاری و مسلم)

اردو ترجمہ · UrduUnverified translation

حضرت کعب بن عجرہ رضی اللہ عنہ سے روایت ہے کہ مجھے رسول اللہ صلی اللہ علیہ وسلم کے پاس اٹھا کر لایا گیا اس حال میں کہ جوئیں میرے چہرے پر گر رہی تھیں۔ آپ نے فرمایا: ’’میرا یہ خیال نہ تھا کہ بیماری نے تمھیں اس حالت تک پہنچا دیا ہو گا جو میں دیکھ رہا ہوں۔ کیا تیرے پاس بکری ہے؟‘‘ میں نے عرض کیا: نہیں۔ آپ نے فرمایا: ’’تین دن کے روزے رکھ یا چھ مسکینوں کو کھانا کھلا۔ ہر مسکین کو آدھا آدھا صاع دے۔‘‘ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ جب اللہ تعالیٰ نے اپنے رسول صلی اللہ علیہ وسلم کو مکہ پر فتح عطا کی تو رسول اللہ صلی اللہ علیہ وسلم لوگوں کے درمیان کھڑے ہوئے‘ پھر اللہ کی حمد و ثنا بیان کی اور فرمایا: ’’بے شک اللہ تعالیٰ نے ہاتھیوں کو مکہ سے روک دیا مگر اپنے رسول اور مومنوں کو اس پر غلبہ عطا فرمایا۔ اور تحقیق مجھ سے پہلے مکہ کسی کے لیے حلال نہ تھا۔ میرے لیے دن کی ایک گھڑی حلال کر دیا گیا ہے اور یقینا میرے بعد یہ کسی کے لیے حلال نہیں ہوگا‘ لہٰذا نہ اس کا شکار بھگایا جائے‘ نہ اس کا کوئی کانٹاکاٹا جائے اور اعلان کرنے والے کے سوا اس کی گری ہوئی چیز کو اٹھانا حلال نہیں ہے۔ اور جس کا کوئی آدمی مارا جائے اسے دو میں سے ایک بہتر بات کا اختیار ہے۔‘‘ حضرت عباس رضی اللہ عنہ نے عرض کیا: اے اللہ کے رسول! اذخر (ایک قسم کی گھاس‘ یعنی اس کے کاٹنے) کی اجازت دیجیے کیونکہ اسے ہم اپنی قبروں اور اپنے گھروں میں استعمال کرتے ہیں۔ تو آپ نے فرمایا: ’’سوائے اذخر کے۔‘‘ (اسے کاٹنے کی اجازت ہے۔) (بخاری و مسلم)

اردو ترجمہ · UrduUnverified translation

حضرت عبداللہ بن زید بن عاصم رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’بلاشبہ حضرت ابراہیم علیہ السلام نے مکے کو حرم قرار دیا اور اس کے بسنے والوں کے لیے دعا کی۔ اور یقینا میں مدینے کو حرم قرار دیتا ہوں‘ جس طرح ابراہیم علیہ السلام نے مکے کو حرم قرار دیا۔ اور میں نے مدینے کے صاع اور مد میں برکت کی دعا کی ہے جس طرح حضرت ابراہیم علیہ السلام نے مکے میں بسنے والوں کے لیے کی تھی۔‘‘ (بخاری و مسلم)

اردو ترجمہ · UrduUnverified translation

حضرت علی رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’مدینہ عیـر پہاڑ سے ثور پہاڑ تک حرم ہے۔‘‘ (اسے مسلم نے روایت کیا ہے۔)