اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ایک عمرہ دوسرے عمرے تک کے مابین گناہوں کا کفارہ ہوتا ہے اور حج مبرور کا بدلہ جنت کے سوا اور کچھ نہیں۔‘‘ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ انھوں نے فرمایا: میں نے عرض کیا: اے اللہ کے رسول! کیا عورتوں پر جہاد ہے؟ آپ نے فرمایا: ’’ہاں‘ ان پر ایسا جہاد ہے جس میں لڑائی وغیرہ نہیں ہوتی۔ وہ حج اور عمرہ ہے۔‘‘ (اسے احمد اور ابن ماجہ نے روایت کیا ہے اور یہ الفاظ ابن ماجہ کے ہیں۔ اس کی سند صحیح ہے اور اس کی اصل بخاری میں ہے۔)

اردو ترجمہ · UrduUnverified translation

حضرت جابر بن عبداللہ رضی اللہ عنہما سے مروی ہے کہ نبی صلی اللہ علیہ وسلم کی خدمت میں ایک بدوی حاضر ہوا اور کہنے لگا: اے اللہ کے رسول ! مجھے عمرے کے بارے میں بتائیں کہ کیا وہ واجب ہے؟ تو آپ نے فرمایا: ’’نہیں ‘ اور تو عمرہ کرے تو یہ تیرے لیے بہتر ہے۔‘‘ (اسے احمد اور ترمذی نے روایت کیا ہے اور اس کا موقوف ہونا راجح ہے۔) امام ابن عدی نے ایک اور ضعیف سند سے حضرت جابر رضی اللہ عنہ سے مرفوعاً روایت کیا ہے: ’’حج اور عمرہ دونوں فرض ہیں۔‘‘

اردو ترجمہ · UrduUnverified translation

حضرت انس رضی اللہ عنہ سے روایت ہے کہ عرض کیا گیا: اے اللہ کے رسول! ’’سبیل‘‘ سے کیا مراد ہے؟ آپ نے فرمایا: ’’راستے کا خرچ اور سواری۔‘‘ (اسے دارقطنی نے روایت کیا ہے اور حاکم نے صحیح کہا ہے مگر اس کا مرسل ہونا راجح ہے۔ اور اسے ترمذی نے ابن عمر رضی اللہ عنہما کی حدیث سے بھی روایت کیا ہے اور اس کی سند میں ضعف ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ نبی صلی اللہ علیہ وسلم مقام روحاء پر کچھ سواروں سے ملے تو آپ نے پوچھا: ’’تم کون ہو؟‘‘ انھوں نے عرض کیاکہ ہم مسلمان ہیں‘ پھر انھوں نے پوچھا کہ آپ کون ہیں؟ تو آپ نے فرمایا: ’’اللہ کا رسول ہوں۔‘‘ پھر ایک عورت اپنے بچے کو اٹھا کر آپ کی خدمت میں لائی اور پوچھا کہ کیا اس پر حج ہے؟ آپ نے فرمایا: ’’ہاں‘ اور اس کا ثواب تجھے ملے گا۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما ہی سے روایت ہے‘ انھوں نے فرمایا کہ ایک دفعہ حضرت فضل بن عباس رضی اللہ عنہما رسول اللہ صلی اللہ علیہ وسلم کے پیچھے سوار تھے کہ قبیلۂ خثعم کی ایک عورت آئی تو حضرت فضل رضی اللہ عنہ اس کی طرف دیکھنے لگے اور وہ ان کی طرف دیکھنے لگی‘ چنانچہ نبی صلی اللہ علیہ وسلم نے فضل رضی اللہ عنہ کا منہ دوسری جانب کر دیا۔ اس عورت نے پوچھا: اے اللہ کے رسول! بے شک حج جو بندوں پر اللہ کا فریضہ ہے اس نے میرے بوڑھے باپ کو پا لیا ہے مگر وہ سواری پر نہیں بیٹھ سکتا تو کیا میں اس کی طرف سے حج کر سکتی ہوں؟ آپ نے فرمایا: ’’ہاں۔‘‘ اور یہ واقعہ حجۃ الوداع کا ہے۔ (بخاری و مسلم- یہ الفاظ بخاری کے ہیں۔)

اردو ترجمہ · UrduUnverified translation

حضرت ابن عباس رضی اللہ عنہما ہی سے مروی ہے کہ قبیلۂجہینہ کی ایک عورت نبی صلی اللہ علیہ وسلم کے پاس آئی اور عرض کیا کہ بے شک میری ماں نے حج کرنے کی نذر مانی تھی لیکن وہ حج نہ کرسکی اور فوت ہو گئی۔ کیا میں اس کی طرف سے حج کروں؟ آپ نے فرمایا: ’’ہاں‘ اس کی طرف سے حج کر‘ اگر تیری ماں کے ذمے قرض ہوتا تو کیا تو وہ قرض اتارتی؟ اللہ کا حق پورا کرو کیونکہ اللہ زیادہ حق دار ہے کہ اس کا حق پورا کیا جائے۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’جو بچہ حج کرے‘ پھر وہ بلوغت کو پہنچ جائے تو اس پر ضروری ہے کہ دوسرا حج کرے۔ اور جو غلام حج کرے‘ پھر آزاد کر دیا جائے تو اس پر لازم ہے کہ دوسرا حج کرے۔‘‘ (اسے ابن ابی شیبہ اور بیہقی نے روایت کیا ہے اور اس کے راوی ثقہ ہیں مگر اس کے مرفوع ہونے میں اختلاف کیا گیا ہے۔ اور محفوظ یہ ہے کہ یہ حدیث موقوف ہے۔)

اردو ترجمہ · UrduUnverified translation

حضرت عبداللہ بن عباس رضی اللہ عنہما فرماتے ہیں کہ میں نے رسول اللہ صلی اللہ علیہ وسلم کو خطبے میں یہ فرماتے ہوئے سنا: ’’کوئی مرد کسی عورت کے ساتھ تنہائی میں ہرگز علیحدگی اختیار نہ کرے‘ الا یہ کہ اس عورت کے ساتھ محرم ہو۔ اور کوئی عورت محرم کے بغیر سفر نہ کرے۔‘‘ ایک آدمی کھڑا ہوکر کہنے لگا: اے اللہ کے رسول! بے شک میری بیوی حج کے لیے روانہ ہوگئی ہے اور میرا نام فلاں فلاں غزوے میں شامل ہونے کے لیے لکھا گیا ہے۔ آپ نے فرمایا: ’’جاؤ اپنی بیوی کے ہمراہ حج کرو۔‘‘ (بخاری ومسلم- یہ الفاظ مسلم کے ہیں۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ نبی صلی اللہ علیہ وسلم نے ایک آدمی کو یوں کہتے ہوئے سنا : شبرمہ کی طرف سے لبّیک۔ آپ نے فرمایا: ’’شبرمہ کون ہے؟‘‘ اس نے کہاکہ میرا بھائی یا میرا قریبی ہے۔ آپ نے فرمایا: ’’تو نے اپنی طرف سے حج کیا ہے؟‘‘ اس نے کہا: نہیں۔ آپ نے فرمایا:’’ پہلے اپنی طرف سے حج کر‘ پھر شبرمہ کی طرف سے حج کرنا۔‘‘ (اسے ابوداود اور ابن ماجہ نے روایت کیا ہے اور ابن حبان نے صحیح کہا ہے۔ اور امام احمد کے نزدیک اس کا موقوف ہونا راجح ہے۔)

اردو ترجمہ · UrduUnverified translation

حضرت ابن عباس رضی اللہ عنہما ہی بیان کرتے ہیں کہ رسول اللہ صلی اللہ علیہ وسلم نے ہمیں خطبہ دیا تو فرمایا: ’’بے شک اللہ تعالیٰ نے تم پر حج فرض کیا ہے۔‘‘ چنانچہ حضرت اقرع بن حابس رضی اللہ عنہ کھڑے ہوئے اور انھوں نے عرض کیا: کیا ہر سال‘ اے اللہ کے رسول! (کیا ہر سال حج فرض ہے؟)آپ نے فرمایا: ’’اگر میں ہاں کہہ دیتا تو یہ (ہر سال کے لیے) فرض ہو ج??تا۔ حج ایک بار (فرض) ہے۔ اور جو اس سے زائد ہے وہ نفل ہے۔‘‘ (اسے ترمذی کے علاوہ پانچوں نے روایت کیا ہے اور اس کی اصل مسلم میں حضرت ابوہریرہ رضی اللہ عنہ سے مروی ہے۔)

اردو ترجمہ · UrduUnverified translation

حضرت عبداللہ بن عباس رضی اللہ عنہما سے روایت ہے کہ نبی صلی اللہ علیہ وسلم نے مدینے والوں کے لیے ذوالحلیفہ‘ شام والوں کے لیے جحفہ‘ نجد والوں کے لیے قرن منازل اور یمن والوں کے لیے یلملم کو احرام باندھنے کی جگہیں مقرر کیا ہے۔ اور یہ میقات ان (جگہوں والے لوگوں) کے لیے ہیں (جن کا ذکر ہوا) اور ان لوگوں کے لیے بھی ہیں جو دوسرے شہروں سے آئیں اور ان کے پاس سے حج یا عمرے کے ارادے سے گزریں۔ اور جو لوگ ان میقات کے اندر کی جانب ہیں وہ جہاں سے چلیں وہیں سے احرام باندھیں یہاں تک کہ مکہ والے مکہ سے احرام باندھیں۔ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ نبی صلی اللہ علیہ وسلم نے اہل عراق کے لیے ذات عرق کو میقات مقرر کیا۔ (اسے ابوداود اور نسائی نے روایت کیا ہے اور اس کی اصل مسلم میں حضرت جابر رضی اللہ عنہ کی روایت سے ہے مگر اس کے راوی نے اس کے مرفوع ہونے میں شک کیا ہے۔) اور صحیح بخاری میں ہے کہ حضرت عمر رضی اللہ عنہ وہ شخص ہیں جنھوں نے ذات عرق کو میقات مقرر کیا تھا۔ اور احمد‘ ابوداود اور ترمذی میں حضرت ابن عباس رضی اللہ عنہما سے مروی ہے کہ نبی صلی اللہ علیہ وسلم نے مشرق والوں کے لیے عقیق کو میقات مقرر فرمایا تھا۔

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ ہم رسول اللہ صلی اللہ علیہ وسلم کے ساتھ حجۃ الوداع کے سال نکلے‘ ہم میں سے بعض وہ تھے جنھوں نے عمرے کے لیے تلبیہ کہا اور ہم میں سے کچھ وہ تھے جنھوں نے حج اور عمرے دونوں کے لیے تلبیہ کہا اور ہم میں سے بعض وہ تھے جنھوں نے حج کے لیے لبیک پکارا اور رسول اللہ صلی اللہ علیہ وسلم نے صرف حج کا تلبیہ پکارا‘ چنانچہ جنھوں نے عمرے کے لیے لبیک کہا تھا وہ (طواف کے بعد) حلال ہوگئے‘ یعنی احرام کھول دیا۔ اور جنھوں نے حج کے لیے لبیک کہا یا حج اور عمرے کو جمع کیا تھا وہ حلال نہ ہوئے یہاں تک کہ قربانی کا دن ہوا۔ (بخاری و مسلم)