اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جو شخص ایمان اور ثواب کی نیت سے رمضان کا قیام کرتا ہے اس کے پہلے گناہ معاف کر دیے جاتے ہیں۔‘‘ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا فرماتی ہیں کہ جب رمضان کا آخری عشرہ شروع ہو جاتا تو رسول اللہ صلی اللہ علیہ وسلم اپنی کمر کس لیتے‘ رات بھر جاگتے رہتے اور اپنی بیویوں کو بھی جگاتے۔ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا ہی سے روایت ہے کہ نبی صلی اللہ علیہ وسلم وفات پانے تک رمضان کے آخری عشرے کا اعتکاف کرتے رہے‘ پھر آپ کے بعد آپ کی بیویوں نے اعتکاف کیا۔ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا ہی سے روایت ہے کہ نبی صلی اللہ علیہ وسلم جب اعتکاف کا ارادہ کرتے تو فجر کی نماز پڑھتے اور پھر اعتکاف کی جگہ میں داخل ہو جاتے۔ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا ہی سے روایت ہے کہ رسول اللہ صلی اللہ علیہ وسلم بحالت اعتکاف مسجد سے اپنا سر مبارک میرے آگے کر دیتے‘ میں آپ کو کنگھی کر دیتی تھی۔ اور جب آپ اعتکاف میں ہوتے تو گھر میں بلاضرورت تشریف نہ لاتے۔ (بخاری و مسلم- یہ الفاظ بخاری کے ہیں۔)

اردو ترجمہ · UrduUnverified translation

حضرت عائشہ رضی اللہ عنہا ہی سے مروی ہے کہ اعتکاف کرنے والے کے لیے سنت یہ ہے کہ وہ کسی مریض کی بیمار پرسی کرے نہ جنازے میں شرکت کرے‘ عورت کو ہاتھ لگائے نہ اس سے مباشرت کرے اور انتہائی ضروری کام کے بغیر مسجد میں سے نہ نکلے‘ نیز روزے کے بغیر اعتکاف نہیں ہے اور جامع مسجد کے علاوہ کہیں اعتکاف نہیں۔ (اسے ابوداود نے روایت کیا ہے اور اس کے راویوں میں کوئی خلل نہیں لیکن راجح یہ ہے کہ اس کے آخری الفاظ موقوف ہیں۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’اعتکاف کرنے والے پر روزہ نہیں الا یہ کہ وہ اسے اپنے آپ پر مقرر کر لے۔‘‘ (اسے دارقطنی اور حاکم نے روایت کیا ہے اور اس کا بھی موقوف ہونا ہی راجح ہے۔)

اردو ترجمہ · UrduUnverified translation

حضرت عبداللہ بن عمر رضی اللہ عنہما سے مروی ہے کہ نبی صلی اللہ علیہ وسلم کے کچھ صحابہ کو آخری سات راتوں میں شب قدر دکھائی گئی تو رسول اللہ صلی اللہ علیہ وسلم نے فرمایا: ’’میری رائے یہ ہے کہ تمھارے خواب اس پر موافق ہیں کہ وہ آخری سات راتوں میں ہے۔ پس اگر کوئی شخص اسے تلاش کرنا چاہے تو وہ اسے آخری سات راتوں میں تلاش کرے۔‘‘ (بخاری و مسلم)

اردو ترجمہ · UrduUnverified translation

حضرت معاویہ بن ابو سفیان رضی اللہ عنہما سے مروی ہے کہ نبی ٔاکرم صلی اللہ علیہ وسلم نے شب قدر کے بارے میں فرمایا: ’’یہ ستائیس کی رات ہے۔‘‘ (اسے ابوداود نے روایت کیا ہے اور اس حدیث کا موقوف ہونا زیادہ راجح ہے۔) حافظ ابن حجر رحمہ اللہ فرماتے ہیں کہ شب قدر کی تعیین میں اختلاف کیا گیا ہے اور اس بارے میں چالیس اقوال ہیں جنھیں میں نے فتح الباری میں نقل کیاہے۔

اردو ترجمہ · UrduUnverified translation

حضرت عائشہ رضی اللہ عنہا فرماتی ہیں کہ میں نے عرض کیا: اے اللہ کے رسول! مجھے بتلائیں کہ اگر میں جان لوں کہ شب قدر کون سی ہے تو میں اس میں کیا دعا کروں؟ آپ نے فرمایا: ’’یوں کہنا: [اَللّٰھُمَّ! إِنَّکَ عَفُوٌّ‘ تُحِبُّ الْعَفْوَ‘ فَاعْفُ عَنِّـي]’’اے اللہ! بے شک تو بہت زیادہ معاف کرنے والا ہے‘ تو معاف کرنا پسند کرتا ہے‘ لہٰذا مجھے معاف فرما دے۔‘‘ (اسے ابوداود کے علاوہ پانچوں نے روایت کیا ہے اور ترمذی اور حاکم نے صحیح کہا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’تین مسجدوں کے سوا کسی اور کی طرف رخت سفر نہ باندھا جائے: مسجد حرام‘ میری یہ مسجد (مسجد نبوی) اور مسجد اقصیٰ ۔‘‘ (بخاری و مسلم)