اردو ترجمہ · UrduUnverified translation

حضرت ابوقتادہ انصاری رضی اللہ عنہ سے روایت ہے کہ رسول اللہ صلی اللہ علیہ وسلم سے عرفہ (۹ ذوالحج) کے دن کا روزہ رکھنے کے متعلق سوال کیا گیا تو آپ نے فرمایا: ’’(یہ روزہ) گزشتہ سال اور آئندہ سال کے گناہ دور کر دیتا ہے۔‘‘ اور آپ سے عاشورہ کے دن کا روزہ رکھنے کے بارے میں پوچھا گیا تو آپ نے فرمایا: ’’یہ گزشتہ سال کے گناہ دور کر دیتا ہے۔‘‘ اور آپ سے سوموار کا روزہ رکھنے کے بارے میں پوچھا گیا تو آپ نے فرمایا: ’’میں اسی دن میں پیدا ہوا‘ اسی دن مجھے نبوت دی گئی اور اسی دن مجھ پر قرآن اتارا گیا۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوایوب انصاری رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جو شخص رمضان کے روزے رکھے‘ پھر اس کے بعد شوال کے چھ روزے رکھے تو یہ (عمل) سارے سال کے روزے رکھنے کی مانند ہوگا۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جو شخص اللہ کی راہ میں ایک دن روزہ رکھے‘ اللہ تعالیٰ اس کے چہرے سے ستر سال کے لیے جہنم کی آگ کو دور کر دیتا ہے۔‘‘ (بخاری و مسلم- یہ الفاظ مسلم کے ہیں۔)

اردو ترجمہ · UrduUnverified translation

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم روزے رکھتے چلے جاتے تھے یہاں تک کہ ہم کہتے: آپ کبھی افطار نہیں کریں گے۔ اور آپ روزے چھوڑ دیتے یہاں تک کہ ہم کہتے: اب آپ روزے نہیں رکھیں گے۔ میں نے رسول اللہ صلی اللہ علیہ وسلم کو نہیں دیکھا کہ آپ نے رمضان کے سوا کبھی کسی دوسرے مہینے کے مکمل روزے رکھے ہوں۔ اور میں نے آپ کو نہیں دیکھا کہ کسی مہینے میں آپ نے شعبان سے زیادہ روزے رکھے ہوں۔ (بخاری و مسلم- یہ الفاظ مسلم کے ہیں۔)

اردو ترجمہ · UrduUnverified translation

حضرت ابوذر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ہمیں حکم دیا کہ ہم ہر ماہ تیرہ‘ چودہ اور پندرہ (تاریخ) کو تین دن کے روزے رکھیں۔ (اسے نسائی اور ترمذی نے روایت کیا ہے اور ابن حبان نے صحیح کہا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’کسی عورت کے لیے جائز نہیں کہ وہ (نفلی) روزہ رکھے جبکہ اس کا خاوند گھر میں ہو‘ الا یہ کہ شوہر اس کی اجازت دے۔‘‘ (بخاری و مسلم- یہ الفاظ بخاری کے ہیں۔) ابوداود نے ’’سوائے رمضان‘‘ کے الفاظ کا اضافہ کیاہے۔

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے دو دن کا روزہ رکھنے سے منع فرمایا: عیدالفطر کے دن کا اور قربانی کے دن کا ۔ (بخاری و مسلم)

اردو ترجمہ · UrduUnverified translation

حضرت نُبیشہ ہذلی رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’تشریق کے دن کھانے‘ پینے اور اللہ تعالیٰ کے ذکر کے دن ہیں۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عائشہ اور حضرت عبداللہ بن عمر رضی اللہ عنہم فرماتے ہیں کہ ایام تشریق میں روزہ رکھنے کی اجازت نہیں دی گئی سوائے اس شخص کے جسے قربانی کا جانور نہ ملا ہو۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’دوسری راتوں میں سے جمعے کی رات کو قیام کرنے کے لیے مخصوص نہ کرو اور نہ دوسرے دنوں ہی میں سے جمعہ کے دن کو روزے کے لیے مختص کرو‘ سوائے اس کے کہ جمعہ ایسے دن میں آجائے کہ جس دن کا روزہ تم میں سے کوئی شخص رکھتا چلاآرہا ہو۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے‘ رسول اللہ صلی اللہ علیہ وسلم نے فرمایا: ’’تم میں سے کوئی بھی جمعے کے دن روزہ نہ رکھے‘ الا یہ کہ اس سے ایک دن پہلے یا ایک دن بعد بھی روزہ رکھے۔‘‘ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے‘ رسول اللہ صلی اللہ علیہ وسلم نے فرمایا: ’’جب شعبان آدھا گزر جائے تو روزہ نہ رکھو۔‘‘ (اسے پانچوں نے روایت کیا ہے اور امام احمد رحمہ اللہ نے منکر کہا ہے۔)

اردو ترجمہ · UrduUnverified translation

حضرت صماء بنت بسر رضی اللہ عنہا سے مروی ہے‘ رسول اللہ صلی اللہ علیہ وسلم نے فرمایا: ’’ہفتے کے دن کا روزہ نہ رکھو‘ سوائے اس روزے کے جو تم پر فرض کیا گیا ہو۔ چنانچہ ہفتے کے دن اگر تمھیں انگور کا چھلکا یا کسی درخت کی لکڑی میسر آئے تو اسے ہی چبا لو۔‘‘ (اسے پانچوں نے روایت کیا ہے اور اس کے راوی ثقہ ہیں مگر اس میں اضطراب ہے۔ اور امام مالک رحمہ اللہ نے اسے منکر کہاہے۔ اور ابوداود نے کہا ہے کہ یہ منسوخ ہے۔)

اردو ترجمہ · UrduUnverified translation

حضرت ام سلمہ رضی اللہ عنہا سے مروی ہے کہ رسول اللہ صلی اللہ علیہ وسلم ہفتے اور اتوار کو اکثر روزہ رکھتے تھے اور فرمایا کرتے تھے: ’’یہ دونوں دن مشرکوں کی عید کے دن ہیں اور میں ان کی مخالفت کرنا چاہتا ہوں۔‘‘ (اسے امام نسائی رحمہ اللہ نے روایت کیا ہے اور امام ابن خزیمہ رحمہ اللہ نے صحیح کہا ہے اور یہ الفاظ ابن خزیمہ کے ہیں۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے عرفات میں عرفے کے دن کا روزہ رکھنے سے منع فرمایا ہے۔ (اسے ترمذی کے علاوہ پانچوں نے روایت کیا ہے اور امام ابن خزیمہ اور امام حاکم رحمہما اللہ نے صحیح کہا ہے جبکہ امام عقیلی رحمہ اللہ نے اسے منکر کہا ہے۔)

اردو ترجمہ · UrduUnverified translation

حضرت عبداللہ بن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’جس نے ہمیشہ روزہ رکھا‘ اس نے روزہ نہیں رکھا۔‘‘ (بخاری و مسلم) اور مسلم میں حضرت ابوقتادہ رضی اللہ عنہ سے یہ الفاظ مروی ہیں: ’’اس نے روزہ رکھا نہ افطار کیا۔‘‘