اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’رمضان (شروع ہونے) سے ایک یا دو دن پہلے روزہ نہ رکھو‘ سوائے اس شخص کے جو پہلے سے روزہ رکھتا آرہا ہو تو وہ اس دن کا بھی روزہ رکھ لے۔‘‘ (بخاری و مسلم)

اردو ترجمہ · UrduUnverified translation

حضرت عمار بن یاسر رضی اللہ عنہ سے مروی ہے کہ جس شخص نے شک کے دن کا روزہ رکھا اس نے ابوالقاسم صلی اللہ علیہ وسلم کی نافرمانی کی۔ (اسے بخاری نے تعلیقاً اور پانچوں نے موصولاً ذکر کیا ہے، نیز ابن خزیمہ اور ابن حبان نے اسے صحیح کہا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ میں نے رسول اللہ صلی اللہ علیہ وسلم کو فرماتے ہوئے سنا: ’’جب تم (رمضان کا) چاند دیکھ لو تو روزہ رکھو اور جب (شوال کا) چاند دیکھ لو تو رکھنا موقوف کر دو۔ اگر مطلع ابر آلود ہو تو اس کے لیے اندازہ لگا لو۔‘‘ (بخاری ومسلم) اور مسلم میں یہ بھی ہے: ’’اگر مطلع ابرآلود ہو تو پھر اس کے لیے تیس دن کی گنتی کا اندازہ رکھو۔‘‘ اور بخاری میں ہے: ’’پھر تیس روز کی گنتی اور تعداد پوری کرو۔‘‘ اور بخاری میں حضرت ابوہریرہ رضی اللہ عنہ کی روایت میں ہے: ’’پھر تم شعبان کے تیس دن پورے کرو۔‘‘ (بخاری و مسلم)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے کہ لوگوں نے چاند دیکھنے کی کوشش کی‘ اور میں نے نبی صلی اللہ علیہ وسلم کو اطلاع دی کہ میں نے چاند دیکھ لیا ہے‘ چنانچہ آپ نے خود بھی روزہ رکھا اور لوگوں کو بھی روزہ رکھنے کا حکم دیا۔ (اسے ابوداود نے روایت کیا ہے اور حاکم اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت عبداللہ بن عباس رضی اللہ عنہما سے مروی ہے کہ ایک اعرابی نبی صلی اللہ علیہ وسلم کی خدمت میں حاضر ہوا اور عرض کیا: میں نے چاند دیکھا ہے۔ آپ نے فرمایا: ’’کیا تو گواہی دیتا ہے کہ اللہ کے سوا دوسرا کوئی الٰہ نہیں؟‘‘ اس نے کہا: ہاں۔ آپ نے فرمایا: ’’کیا تو اس بات کی گواہی دیتا ہے کہ محمد ( صلی اللہ علیہ وسلم ) اللہ کے رسول ہیں؟‘‘ اس نے کہا: ہاں۔ آپ نے فرمایا: ’’بلال! اٹھو اور لوگوں میں اعلان کر دو کہ کل روزہ رکھیں۔‘‘ (اسے پانچوں نے روایت کیا ہے اور ابن خزیمہ اور ابن حبان نے صحیح قرار دیا ہے جبکہ نسائی نے اس کے مرسل ہونے کو ترجیح دی ہے۔)

اردو ترجمہ · UrduUnverified translation

ام المومنین حضرت حفصہ رضی اللہ عنہا سے مروی ہے کہ نبی صلی اللہ علیہ وسلم نے فرمایا: ’’جس شخص نے رات کو صبح صادق سے پہلے روزے کی نیت نہ کی اس کا کوئی روزہ نہیں۔‘‘ (اسے پانچوں نے روایت کیا ہے۔ ترمذی اور نسائی کا رجحان اس کے موقوف ہونے کی طرف ہے اور ابن خزیمہ اور ابن حبان نے اس کا مرفوع ہونا صحیح قرار دیا ہے۔) اور دارقطنی کی روایت میں ہے: ’’جس نے رات کو اسے اپنے آپ پر واجب نہ کیا اس کا کوئی روزہ نہیں۔‘‘

اردو ترجمہ · UrduUnverified translation

حضرت عائشہ رضی اللہ عنہا سے مروی ہے‘ وہ بیان کرتی کہ ہیں ایک روز نبی صلی اللہ علیہ وسلم ہمارے پاس تشریف لائے اور دریافت فرمایا: ’’کیا تمھارے پاس کوئی چیز ہے؟‘‘ ہم نے عرض کیا: نہیں۔ تو آپ نے فرمایا: ’’اچھا‘ تو میں روزے سے ہوں۔‘‘ اس کے بعد پھر ایک روز آپ تشریف لائے تو ہم نے عرض کیا: حَیْسکا تحفہ ہمیں (کہیں سے) دیا گیا ہے۔ آپ نے فرمایا: ’’ذرا مجھے تو دکھاؤ‘ صبح سے میں روزے سے تھا۔‘‘ (یہ فرما کر) آپ نے حَیْس تناول فرما لیا۔ (اسے مسلم نے روایت کیاہے۔)

اردو ترجمہ · UrduUnverified translation

حضرت سہل بن سعد رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ’’لوگ اس وقت تک بھلائی پر قائم رہیں گے جب تک روزہ افطار کرنے میں جلدی کریں گے۔‘‘ (بخاری و مسلم) ترمذی میں حضرت ابوہریرہ رضی اللہ عنہ کی نبی صلی اللہ علیہ وسلم سے مروی حدیث میں ہے کہ آپ نے فرمایا: ’’اللہ تعالیٰ کا ارشاد ہے : میرے محبوب و پسندیدہ بندے وہ ہیں جو افطار کرنے میں عجلت سے کام لیتے ہیں۔‘‘

اردو ترجمہ · UrduUnverified translation

حضرت انس بن مالک رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’سحری کھایا کرو کیونکہ سحری میں بڑی برکت ہے۔‘‘ (بخاری و مسلم)

اردو ترجمہ · UrduUnverified translation

حضرت سلمان بن عامر ضبی رضی اللہ عنہ نبی صلی اللہ علیہ وسلم سے بیان کرتے ہیں کہ آپ نے فرمایا: ’’جب تم میں سے کوئی روزہ افطار کرے تو اسے خشک کھجور سے افطار کرنا چاہیے۔ اگر کھجور دستیاب نہ ہو سکے تو پانی سے افطار کر لے کیونکہ وہ پاک کرنے والا ہے۔‘‘ (اسے پانچوں نے روایت کیا ہے اور ابن خزیمہ‘ ابن حبان اور حاکم نے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ انھوں نے کہا: رسول اللہ صلی اللہ علیہ وسلم نے وصال (کھائے پیے بغیر مسلسل دو یا تین روزے رکھنے) سے منع فرمایا۔ مسلمانوں میں سے ایک آدمی نے کہا: اللہ کے رسول ! آپ خود تو وصال فرماتے ہیں؟ آپ نے فرمایا: ’’تم میں سے میرے جیسا کون ہے؟ میں تو اس حال میں رات گزارتا ہوں کہ میرا پروردگار مجھے کھلاتا اور پلاتا ہے۔‘‘ چنانچہ جب لوگ وصال سے باز نہ آئے تو آپ نے انھیں ایک دن‘ پھر دوسرے دن وصال کرایا۔ پھر انھوں نے چاند دیکھ لیا تو آپ نے فرمایا: ’’اگر آج چاند نظر نہ آتا تو میں تمھیں زیادہ دن وصال کراتا۔‘‘ گویا آپ لوگوں کو اس سے باز نہ رہنے کی وجہ سے سزا دے رہے تھے۔ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے روایت ہے‘ رسول اللہ صلی اللہ علیہ وسلم نے فرمایا: ’’جو شخص جھوٹ اور بے ہودہ بولنا اور اس پر عمل کرنا نہ چھوڑے اور حماقت و بیوقوفی کو ترک نہ کرے تو اللہ تعالیٰ کو کوئی ضرورت نہیں کہ وہ اپنا کھانا پینا چھوڑ دے۔‘‘ (اسے بخاری اور ابوداود نے روایت کیا ہے اور یہ الفاظ ابوداود کے ہیں۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ رسول اللہ صلی اللہ علیہ وسلم روزے کی حالت میں اپنی بیوی کو بوسہ دیتے تھے اور معانقہ وغیرہ بھی کر لیتے تھے لیکن آپ تمھاری نسبت اپنے جذبات پر خوب ضبط رکھنے والے تھے۔ (بخاری و مسلم۔ یہ الفاظ مسلم کے ہیں۔) اور ایک روایت میں اتنااضافہ ہے کہ (آپ یہ دونوں فعل) رمضان میں کرتے تھے۔

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے کہ نبی صلی اللہ علیہ وسلم نے حالت ِاحرام میں پچھنے لگوائے۔ اور آپ نے روزے کی حالت میں بھی پچھنے لگوائے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت شداد بن اوس رضی اللہ عنہ سے مروی ہے کہ نبی صلی اللہ علیہ وسلم بقیع میں ایک ایسے شخص کے پاس تشریف لائے جو رمضان میں پچھنے لگوا رہا تھا۔ (اسے دیکھ کر) آپ نے فرمایا: ’’سینگی (پچھنے) لگانے والے اور لگوانے والے دونوں کا روزہ ٹوٹ گیا۔‘‘ (اسے ترمذی کے سوا پانچوں نے روایت کیا ہے اور احمد‘ ابن خزیمہ اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت انس رضی اللہ عنہ فرماتے ہیں کہ پہلے پہل روزے دار کے لیے سینگی لگوانا اس طرح مکروہ ہوا کہ حضرت جعفر بن ابی طالب رضی اللہ عنہ نے روزے کی حالت میں سینگی لگوائی‘ نبی صلی اللہ علیہ وسلم اس کے پاس سے گزرے تو آپ نے فرمایا: ’’ان دونوں کا روزہ ٹوٹ گیا۔‘‘ اس کے بعد نبی صلی اللہ علیہ وسلم نے روزے دار کے لیے سینگی لگوانے کی رخصت دے دی۔ اور انس رضی اللہ عنہ روزے کی حالت میں سینگی لگواتے تھے۔ (اسے دارقطنی نے روایت کیا ہے اور قوی کہا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ نبی صلی اللہ علیہ وسلم نے رمضان میں روزے کی حالت میں سرمہ لگایا۔ (اسے ابن ماجہ نے ضعیف سند سے بیان کیا ہے۔ اور امام ترمذی نے کہا ہے کہ اس بارے میں کوئی حدیث بھی صحیح نہیں ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جو شخص روزے کی حالت میں بھول کر کچھ کھا پی لے تو اسے چاہیے کہ اپنا روزہ پورا کر لے کیونکہ اللہ تعالیٰ ہی نے اسے کھلایا پلایا ہے۔‘‘ (بخاری و مسلم) اور مستدرک حاکم میں یوں مروی ہے: ’’اگر کوئی شخص بھول کر رمضان میں روزہ افطار کر لے تو اس پر قضا اور کفارہ نہیں۔‘‘ (اور یہ حدیث صحیح ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ’’جسے خود بخود قے آجائے (اس پر قے غالب آجائے) تو اس پر (روزے کی) قضا نہیں اور جو جان بوجھ کر قے کرے اس پر قضا ہے۔‘‘ (اسے پانچوں نے روایت کیا ہے۔ امام احمد نے اسے معلول کہا ہے اور دارقطنی نے قوی کہا ہے۔)

اردو ترجمہ · UrduUnverified translation

حضرت جابر بن عبداللہ رضی اللہ عنہما سے مروی ہے کہ رسول اللہ صلی اللہ علیہ وسلم فتح مکہ کے سال مکہ مکرمہ کی طرف رمضان میں نکلے تو آپ نے روزہ رکھا‘ یہاں تک کہ آپ کُرَاع الغَمِیم (ایک جگہ کا نام) پہنچے۔ اس دن لوگوں نے بھی روزہ رکھا۔ پھر آپ نے پانی کا پیالہ منگوایا اور اسے اتنا اونچا کیا کہ لوگوں نے دیکھ لیا‘ پھر آپ نے اسے پی لیا۔ پھر اس کے بعد آپ سے کہا گیا کہ بعض لوگوں نے اب بھی روزہ رکھا ہوا ہے۔ آپ نے فرمایا: ’’یہی لوگ نافرمان ہیں‘ یہی لوگ نافرمان ہیں۔‘‘ اور ایک حدیث کے الفاظ یوں ہیں: آپ سے کہا گیا کہ یقینا روزے نے لوگوں کو مشقت میں ڈال دیا ہے اور وہ صرف آپ کے عمل کا انتظار کررہے ہیں تو آپ نے عصر کے بعد پانی کا پیالہ منگوایا اور پی لیا۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت حمزہ بن عمرو اسلمی رضی اللہ عنہ سے مروی ہے‘ انھوں نے کہا: اللہ کے رسول! میں سفر میں روزہ رکھنے کی طاقت رکھتا ہوں‘ (اگر میں روزہ رکھ لوں) تو کیا مجھ پر کوئی حرج ہے؟ تو رسول اللہ صلی اللہ علیہ وسلم نے فرمایا: ’’یہ اللہ تعالیٰ کی طرف سے رخصت ہے‘ جو اسے لے لے تو بہتر ہے اور جو کوئی روزہ رکھنا پسند کرے تو اس پر کوئی گناہ نہیں۔‘‘ (اسے مسلم نے روایت کیا ہے اور اس حدیث کی اصل حضرت عائشہ رضی اللہ عنہا سے بخاری و مسلم میں یوں مروی ہے کہ حضرت حمزہ بن عمرو رضی اللہ عنہ نے سوال کیا۔)

اردو ترجمہ · UrduUnverified translation

حضرت ا بن عباس رضی اللہ عنہما سے روایت ہے کہ بڑی عمر والے بوڑھے کو رخصت دی گئی ہے کہ وہ افطار کرے (روزے نہ رکھے)اور ہر دن کے بدلے ایک مسکین کو کھانا کھلائے اور اس پر قضا نہیں ہے۔ (اسے دارقطنی اور حاکم نے روایت کیا ہے اور دونوں نے صحیح کہا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ ایک آدمی نبی صلی اللہ علیہ وسلم کی خدمت میں حاضر ہوا اور کہنے لگا: اے اللہ کے رسول! میں ہلاک ہوگیا۔ آپ نے فرمایا: ’’کس چیز نے تجھے ہلاک کیا؟‘‘ اس نے کہا کہ میں رمضان میں (روزے کی حالت میں) اپنی بیوی سے جماع کر بیٹھا ہوں۔ تو آپ نے فرمایا: ’’کیا تجھ میں اتنی استطاعت ہے کہ تو ایک گردن کو آزاد کر دے؟‘‘ اس نے کہا: نہیں۔ آپ نے فرمایا: ’’کیا تو طاقت رکھتا ہے کہ دو ماہ کے متواتر روزے رکھے؟‘‘ اس نے کہا: نہیں۔ آپ نے فرمایا: ’’کیا تیرے پاس اتنا مال ہے کہ ساٹھ مسکینوں کو کھانا کھلا سکے؟‘‘ اس نے کہا: نہیں۔ پھر وہ بیٹھ گیا۔ (اتنی دیر میں) نبی صلی اللہ علیہ وسلم کے پاس ایک بڑا ٹوکرا لایا گیا۔ اس میں کھجوریں تھیں۔ آپ نے فرمایا: ’’انھیں صدقہ کر دے۔‘‘ اس نے کہا: کیا اپنے سے زیادہ محتاج پر (خیرات کروں؟) کیونکہ دو سیاہ پتھروں والے میدانوں کے مابین (مدینے میں) کوئی گھر والا مجھ سے زیادہ محتاج نہیں۔ چنانچہ نبی صلی اللہ علیہ وسلم مسکرائے یہاں تک کہ آپ کی ڈاڑھیں ظاہر ہوگئیں۔ پھر آپ نے فرمایا: ’’جاؤ اسے اپنے گھر والوں کو کھلا دو۔‘‘ (اسے ساتوں نے روایت کیا ہے اور یہ الفاظ مسلم کے ہیں۔)

اردو ترجمہ · UrduUnverified translation

حضرت عائشہ اور حضرت ام سلمہ رضی اللہ عنہما سے مروی ہے کہ نبی صلی اللہ علیہ وسلم جماع کی وجہ سے جنابت کی حالت میں صبح کرتے‘ پھر آپ غسل کرتے اور روزہ رکھتے۔ (بخاری و مسلم) اور مسلم نے ام سلمہ رضی اللہ عنہا کی حدیث میں یہ زائد الفاظ نقل کیے ہیں: قضا نہیں دیتے تھے۔

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ نبی صلی اللہ علیہ وسلم نے فرمایا: ’’جو شخص فوت ہو جائے اور اس پر روزہ لازم ہو تو اس کی طرف سے اس کا ولی روزہ رکھے۔‘‘ (بخاری ومسلم)