اردو ترجمہ · UrduUnverified translation

حضرت ابواسحٰق رحمہ اللہ سے مروی ہے کہ حضرت عبداللہ بن یزید رضی اللہ عنہ نے میت کو قبر کی پائینتی کی طرف سے قبر میں اتارا اور کہا کہ سنت طریقہ یہی ہے۔ (اسے ابوداود نے روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’جب اپنے مرنے والوں کو قبروں میں اتارو تو یوں کہو: [بِسْمِ اللّٰہِ‘ وَ عَلٰی مِلَّۃِ رَسُولِ اللّٰہِ] ’’اللہ کے نام سے اور رسول اللہ صلی اللہ علیہ وسلم کے دین پر(دفن کررہے ہیں)۔‘‘ (اسے احمد‘ ابوداود اور نسائی نے روایت کیا ہے اور ابن حبان نے صحیح قرار دیا ہے جبکہ دارقطنی نے معلول قرار دیتے ہوئے اسے موقوف کہا ہے۔)

اردو ترجمہ · UrduUnverified translation

حضرت عائشہ رضی اللہ عنہا روایت کرتی ہیں‘ رسول اللہ صلی اللہ علیہ وسلم نے فرمایا: ’’میت کی ہڈی توڑنا ایسے ہی ہے جیسے زندہ انسان کی ہڈی توڑنا۔‘‘ (اسے ابوداود نے مسلم کی شرط والی سند سے روایت کیا ہے۔ اور ابن ماجہ نے ام سلمہ رضی اللہ عنہا کی روایت میں اتنا اضافہ نقل کیا ہے: ’’گناہ میں۔‘‘)

اردو ترجمہ · UrduUnverified translation

حضرت سعد بن ابی وقاص رضی اللہ عنہ سے روایت ہے کہ انھوں نے کہا: میرے لیے لحد والی‘ یعنی بغلی قبر بنانا اور اس پر کچی اینٹیں چننا‘ جس طرح رسول اللہ صلی اللہ علیہ وسلم کے ساتھ کیا گیا۔ (اسے مسلم نے روایت کیا ہے۔) اور بیہقی نے حضرت جابر رضی اللہ عنہ کے حوالے سے اسی طرح روایت کیا ہے اور اتنا اضافہ نقل کیا ہے کہ آپ کی قبر زمین سے صرف ایک بالشت برابر اونچی بنائی گئی۔ (اسے ابن حبان نے صحیح قرار دیا ہے۔) اور مسلم میں جابر رضی اللہ عنہ سے مروی ہے کہ رسول اللہ صلی اللہ علیہ وسلم نے منع فرمایا ہے کہ قبر کو پختہ کیا جائے اور اس پر بیٹھا جائے اور اس پر عمارت تعمیر کی جائے۔

اردو ترجمہ · UrduUnverified translation

حضرت عامر بن ربیعہ رضی اللہ عنہ سے مروی ہے کہ نبی صلی اللہ علیہ وسلم نے عثمان بن مظعون رضی اللہ عنہ کی نماز جنازہ پڑھی اور ان کی قبر پر تشریف لائے اور کھڑے کھڑے تین لپ مٹی ڈالی۔ (اسے دارقطنی نے روایت کیا ہے۔)

اردو ترجمہ · UrduUnverified translation

حضرت عثمان رضی اللہ عنہ سے مروی ہے کہ رسول اللہ صلی اللہ علیہ وسلم جب میت کی تدفین سے فارغ ہوتے تو قبر پر (قبر کے پاس) کھڑے ہو جاتے اور فرماتے: ’’اپنے بھائی کے لیے بخشش مانگو اور ثابت قدم رہنے کی دعا کرو کیونکہ اب اس سے بازپرس کی جائے گی۔‘‘ (اسے ابوداود نے روایت کیا ہے اور حاکم نے صحیح قرار دیا ہے۔)

اردو ترجمہ · UrduUnverified translation

حضرت ضمرہ بن حبیب رحمہ اللہ ۔جو ایک تابعی ہیں۔ سے مروی ہے کہ لوگ مستحب سمجھتے تھے کہ جب میت کی قبر برابر اور ہموار کر دی جائے اور لوگ جانے لگیں تو قبر کے پاس کھڑے ہو کر میت کو مخاطب ہو کر یوں کہا جائے: اے فلاں! لَا إِلٰہَ إِلَّا اللّٰہ کہو۔ اسے تین مرتبہ کہے۔ اے فلاں!کہو: [رَبِّيَ اللّٰہُ وَ دِینِيَ الإِْسْلاَمُ وَنَبِیِّـي مُحَمَّدٌ] ’’میرا رب اللہ ہے‘ میرا دین اسلام ہے اور محمد صلی اللہ علیہ وسلم میرے نبی ہیں۔‘‘ (اسے سعید بن منصور نے موقوف بیان کیا ہے اور طبرانی نے بھی ابوامامہ رضی اللہ عنہ سے بالکل اسی طرح لمبی مرفوع حدیث بیان کی ہے۔)

اردو ترجمہ · UrduUnverified translation

حضرت بریدہ بن حصیب اسلمی رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’میں نے تمھیں قبروں کی زیارت سے منع کیا تھا۔ اب ان کی زیارت کیا کرو۔‘‘ (اسے مسلم نے روایت کیا ہے۔) ترمذی نے اتنا اضافہ نقل کیا ہے: ’’کیونکہ قبروں کی زیارت آخرت کی یاد دلاتی ہے۔‘‘ اور ابن ماجہ نے حضرت ابن مسعود رضی اللہ عنہ سے مروی حدیث میں یہ اضافہ بیان کیا ہے : ’’یہ زیارت دنیا سے بے رغبت بنادیتی ہے۔‘‘

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے قبروں کی زیارت کے لیے جانے والی خواتین پر لعنت کی ہے۔ (اسے ترمذی نے روایت کیا ہے اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے نوحہ کرنے والی اور سننے والی پر لعنت کی ہے۔ (اسے ابوداود نے روایت کیا ہے۔)

اردو ترجمہ · UrduUnverified translation

حضرت ام عطیہ رضی اللہ عنہا سے مروی ہے کہ رسول اللہ صلی اللہ علیہ وسلم نے ہم سے یہ عہد لیا تھا کہ ہم میت پر نوحہ نہیں کریں گی۔ (بخاری و مسلم)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے ‘نبی صلی اللہ علیہ وسلم نے فرمایا: ’’مرنے والے کو اس پر نوحہ کیے جانے کے سبب سے اس کی قبر میں عذاب دیا جاتا ہے۔‘‘ (بخاری و مسلم‘ نیز ان دونوں نے مغیرہ بن شعبہ کے واسطے سے بھی اسی طرح روایت بیان کی ہے۔)

اردو ترجمہ · UrduUnverified translation

حضرت انس رضی اللہ عنہ کا بیان ہے کہ میں نبی صلی اللہ علیہ وسلم کی ایک صاحبزادی کی تدفین کے موقع پر حاضر تھا۔ رسول اللہ صلی اللہ علیہ وسلم قبر کے پاس بیٹھے ہوئے تھے۔ میں نے دیکھا کہ آپ کی دونوں آنکھوں سے آنسو جاری تھے۔(اسے بخاری نے روایت کیا ہے۔)

اردو ترجمہ · UrduUnverified translation

حضرت جابر رضی اللہ عنہ سے مروی ہے کہ نبی صلی اللہ علیہ وسلم نے فرمایا: ’’اپنے مرنے والوں کو رات کے اوقات میں دفن نہ کرو الا یہ کہ تم اس کے لیے مجبور ہو جاؤ۔‘‘ (اسے ابن ماجہ نے روایت کیا ہے اور اس کی اصل مسلم میں ہے لیکن اسی میں ہے کہ آپ نے رات کو دفن کرنے پر ڈانٹا حتیٰ کہ اس کی نماز جنازہ پڑھ لی جائے۔)

اردو ترجمہ · UrduUnverified translation

حضرت عبداللہ بن جعفر رضی اللہ عنہما سے روایت ہے‘ انھوں نے فرمایا: جب جعفر (بن ابی طالب) رضی اللہ عنہ کی شہادت کی خبر موصول ہوئی تو رسول اللہ صلی اللہ علیہ وسلم نے فرمایا : ’’جعفر کے گھر والوں کے لیے کھانا تیار کرو کیونکہ ان کے پاس وہ چیز آ گئی جس نے انھیں (کھانا پکانے سے) مشغول کر دیا ہے۔‘‘ (اسے نسائی کے علاوہ پانچوں نے روایت کیا ہے۔)

اردو ترجمہ · UrduUnverified translation

حضرت سلیمان بن بریدہ رحمہ اللہ اپنے والد سے روایت کرتے ہیں کہ رسول اللہ صلی اللہ علیہ وسلم صحابۂ کرام رضی اللہ عنہم کو سکھایا کرتے تھے کہ وہ جب قبرستان جائیں تو کہیں: ’’ سلامتی ہو تم پر اے گھر وں والو! مومنوں اور مسلمانوں میں سے۔ اور ہم بھی اِن شاء اللہ تم سے ملنے والے ہیں۔ اور ہم اپنے اور تمھارے لیے اللہ سے عافیت کا سوال کرتے ہیں۔‘‘ (اسے مسلم نے روایت کیاہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم کا گزر مدینے کے قبرستان سے ہوا۔ آپ ان کی طرف متوجہ ہوئے اور فرمایا: ’’اے اہل قبور! تم پر سلامتی ہو۔ اللہ ہماری اور تمھاری مغفرت فرمائے۔ تم ہمارے پیش رو ہو اور ہم تمھارے پیچھے چلے آرہے ہیں۔‘‘ (اسے ترمذی نے روایت کیا ہے اور حسن قرار دیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے‘ وہ بیان کرتی ہیں کہ رسول اللہ صلی اللہ علیہ وسلم نے فرمایا: ’’مردوں کو برا بھلا نہ کہو‘ اس لیے کہ انھوں نے جو کچھ آگے بھیجا ہے وہ اس تک پہنچ چکے ہیں۔‘‘ (اسے بخاری نے روایت کیا ہے۔ اور ترمذی نے حضرت مغیرہ رضی اللہ عنہ کے حوالے سے اسی طرح روایت کیا ہے لیکن اس میں [فَتُؤْذُوا الْأَحْیَائَ] کے الفاظ ہیں‘ یعنی پھر (برا بھلا کہنے سے) تم زندہ لوگوں کو تکلیف پہنچاؤ گے۔‘‘)