اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’لذتوں کو توڑ دینے والی‘ یعنی موت کا کثرت سے ذکر کیا کرو۔‘‘ (اسے ترمذی اور نسائی نے روایت کیا ہے اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت انس رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’تم میں سے کسی کو اس مصیبت و تکلیف کی و جہ سے‘ جو اس پر نازل ہوئی ہو‘ موت کی تمنا و خواہش ہرگز ہرگز نہیں کرنی چاہیے۔ اور اگر اس کی تمنا ضروری ہو تو پھر اس طرح کہنا چاہیے: اے اللہ! مجھے زندہ رکھ جب تک زندگی میرے لیے خیر کا باعث ہو اور جب موت میرے لیے بہتر ہوتو مجھے وفات دے دے۔‘‘ (بخاری و مسلم)

اردو ترجمہ · UrduUnverified translation

حضرت بریدہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’مومن پیشانی کے پسینے کے ساتھ مرتا ہے۔‘‘ (اس روایت کو تینوں نے روایت کیا ہے اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت ابوسعید اور حضرت ابوہریرہ رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’اپنے مرنے والوں کو [لَا إِلٰـہَ إِلَّا اللّٰہُ]کی تلقین کرو۔‘‘ (اسے مسلم اور چاروں نے روایت کیا ہے۔)

اردو ترجمہ · UrduUnverified translation

حضرت معقل بن یسار رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’اپنے مرنے والوں کے قریب سورۂ یٰسٓ پڑھا کرو۔‘‘ (اسے ابوداود اور نسائی نے روایت کیا ہے اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت ام سلمہ رضی اللہ عنہا سے مروی ہے کہ رسول اللہ صلی اللہ علیہ وسلم حضرت ابوسلمہ رضی اللہ عنہ کی موت کے وقت تشریف لائے تو اس وقت ان کی آنکھ کھلی ہوئی تھی۔ آپ نے اسے بند کر دیا اور پھر فرمایا: ’’جب روح قبض کی جاتی ہے تو آنکھ اس کا پیچھا کرتی ہے۔‘‘ (یہ سن کر) گھر کے لوگ گھبراہٹ اور پریشانی سے رونے اور چیخنے لگے تو آپ نے فرمایا: ’’اپنے لیے اچھی اور بہتر دعا کے سوا کچھ نہ کہا کرو کیونکہ جو کچھ تم کہتے ہو اس پر فرشتے آمین کہتے ہیں۔‘‘ پھر آپ نے دعا فرمائی: ’’الٰہی! ابوسلمہ ( رضی اللہ عنہ ) کی مغفرت فرما ‘ ہدایت یافتہ لوگوں میں اس کا درجہ و مرتبہ بلند فرما ‘ اس کی قبر کشادہ و وسیع فرما‘ اسے منور فرما‘اس کے پیچھے رہنے والوں میں نائب و قائم مقام ہوجا۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ نبی صلی اللہ علیہ وسلم جب فوت ہوئے تو آپ کو ایک دھاری دار چادر سے ڈھانپ دیا گیا۔ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ حضرت ابوبکر رضی اللہ عنہ نے نبی صلی اللہ علیہ وسلم کی وفات کے بعد آپ (کی پیشانی) کو بوسہ دیا۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’مومن کی روح اس کے قرض کی وجہ سے لٹکی رہتی ہے حتی کہ اس کی طرف سے (قرض) ادا کر دیا جائے۔‘‘ (اسے احمد اور ترمذی نے روایت کیا ہے اور ترمذی نے حسن قرار دیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ نبی صلی اللہ علیہ وسلم نے اس آدمی کے متعلق‘ جو اپنی سواری سے گر کر جاں بحق ہو گیا تھا‘ فرمایا: ’’اسے پانی اور بیری (کے پتوں) سے غسل دو اور اسے اس کے (احرام والے) دونوں کپڑوں میں کفن دو۔‘‘ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ صحابۂ کرام رضی اللہ عنہم نے جب رسول اللہ صلی اللہ علیہ وسلم کو غسل دینے کا ارادہ کیا تو انھوں نے کہا: اللہ کی قسم! ہمیں معلوم نہیں کہ ہم رسول اللہ صلی اللہ علیہ وسلم کے کپڑے اتاریں جس طرح ہم اپنے مرنے والوں کے اتارتے ہیں یا نہ اتاریں؟ یہ لمبی حدیث ہے۔ (اسے احمد اور ابوداود نے روایت کیا ہے۔)

اردو ترجمہ · UrduUnverified translation

حضرت ام عطیہ رضی اللہ عنہا سے مروی ہے کہ نبی صلی اللہ علیہ وسلم ہمارے پاس اس وقت تشریف لائے جب ہم آپ کی صاحبزادی کو غسل دے رہی تھیں۔ آپ نے فرمایا: ’’اسے تین یا پانچ مرتبہ غسل دو‘ یا اس سے بھی زیادہ‘ اگر ضرورت محسوس کرو‘ ایسے پانی کے ساتھ جس میں بیری کے پتے ملے ہوں اور آخری بار میں کافور ڈالو یا فرمایا کہ کچھ کافور ڈالو۔‘‘ جب ہم فارغ ہوئیں تو ہم نے آپ کو اطلاع بھجوا دی‘ چنانچہ آپ نے اپنا تہبند ہماری طرف پھینک دیا اور فرمایا: ’’اسے اس کے جسم کے ساتھ لپیٹ دو‘ یعنی سب سے پہلے اسے یہ پہناؤ۔‘‘ (بخاری و مسلم) اور ایک روایت میں ہے: ’’غسل ان کی دائیں اطراف اور اعضائے وضو سے شروع کرو ۔‘‘ بخاری کی ایک روایت میں ہے: ہم نے ان کے سر کے بالوں کو تین مینڈھیاں بنا کر انھیں ان کی پشت پر ڈال دیا۔

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ رسول اللہ صلی اللہ علیہ وسلم کو سحولیہ بستی کے ساختہ‘ سفید رنگ کے تین ایسے کپڑوں میں کفن دیا گیا تھا جو سُوتی تھے اور ان میں قمیص اور پگڑی نہیں تھی۔ (بخاری و مسلم)

اردو ترجمہ · UrduUnverified translation

حضرت ابن عمر رضی اللہ عنہما بیان کرتے ہیں کہ جب عبداللہ بن ابی (منافق) فوت ہوا تو اس کا بیٹا (عبداللہ رضی اللہ عنہ ) رسول اللہ صلی اللہ علیہ وسلم کی خدمت میں حاضر ہوا اور عرض کیا کہ مجھے آپ اپنی قمیص عنایت فرما دیں تاکہ میں اس میں اسے کفن دے دوں‘ چنانچہ آپ نے اسے اپنی قمیص عنایت فرما دی۔ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’اپنے کپڑوں میں سے سفید لباس زیب تن کیا کرو کیونکہ یہ تمھارے سب ملبوسات میں سے بہترین اور عمدہ لباس ہے۔ اور اپنے مرنے والوں کو بھی اس میں کفن دیا کرو۔‘‘ (اسے نسائی کے علاوہ پانچوں نے روایت کیا ہے اور ترمذی نے صحیح قرار دیا ہے۔)

اردو ترجمہ · UrduUnverified translation

حضرت جابر رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جب تم میں سے کوئی اپنے بھائی کو کفن دے تو اسے اچھا کفن دینا چاہیے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت جابر رضی اللہ عنہ ہی سے مروی ہے کہ نبی صلی اللہ علیہ وسلم شہدائے احد میں سے دو دو آدمیوں کو ایک کپڑے (کفن) میں اک??ھا کرتے اور دریافت فرماتے : ’’ان میں سے قرآن کسے زیادہ یاد تھا؟‘‘ چنانچہ جسے زیادہ یاد ہوتا‘ اسے لحد میں آگے رکھتے۔ نہ تو ان شہداء کو غسل دیا گیا اور نہ ان کی نماز جنازہ پڑھی گئی۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت علی رضی اللہ عنہ بیان کرتے ہیں کہ میں نے نبی صلی اللہ علیہ وسلم کو سنا‘ آپ فرما رہے تھے: ’’(اپنے مردوں کو بہت) قیمتی کفن نہ دیا کرو کیونکہ وہ تو بہت جلد چھین لیا جاتا ہے۔‘‘ (اسے ابوداود نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا بیان کرتی ہیں کہ نبی صلی اللہ علیہ وسلم نے ان سے فرمایا: ’’اگر تو مجھ سے پہلے فوت ہو گئی تو میں تمھیں غسل دوں گا۔‘‘ یہ لمبی حدیث ہے۔ (اسے احمد اور ابن ماجہ نے روایت کیا ہے اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت اسماء بنت عمیس رضی اللہ عنہا سے مروی ہے کہ حضرت فاطمہ رضی اللہ عنہا نے یہ وصیت کی تھی کہ حضرت علی رضی اللہ عنہ خود انھیں غسل دیں۔ (اسے دارقطنی نے روایت کیا ہے۔)

اردو ترجمہ · UrduUnverified translation

حضرت بریدہ رضی اللہ عنہ سے غامدیہ کے قصے میں مروی ہے جس کے متعلق نبی صلی اللہ علیہ وسلم نے ارتکاب زنا کی پاداش میں سنگساری کا حکم دیا تھا۔ وہ کہتے ہیں: آپ نے اس کی (نماز جنازہ کی)بابت حکم دیا‘ پھر خود اس کی نماز جنازہ پڑھائی اور اسے دفن کیا گیا۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت جابر بن سمرہ رضی اللہ عنہ سے مروی ہے کہ نبی صلی اللہ علیہ وسلم کی خدمت میں ایک آدمی لایا گیا جس نے چوڑے نیزے سے خودکشی کی تھی۔ آپ نے اس کی نماز نہ پڑھی۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے اس عورت کے بارے میں‘ جو مسجد میں جھاڑو دیا کرتی تھی‘ روایت ہے کہ نبی صلی اللہ علیہ وسلم نے اس کے متعلق صحابۂ کرام رضی اللہ عنہم سے دریافت فرمایا تو انھوں نے جواب دیا کہ وہ تو فوت ہو چکی ہے۔ آپ نے فرمایا: ’’تم نے مجھے اطلاع کیوں نہ دی؟‘‘ گویا انھوں نے اس کے معاملۂ وفات کو معمولی خیال کیا۔ آپ نے فرمایا: ’’مجھے اس کی قبر بتاؤ۔‘‘ صحابۂ کرام نے آپ کو قبر بتا دی‘ چنانچہ آپ نے اس کی نماز جنازہ پڑھی۔ (بخاری و مسلم) اور مسلم نے اتنا اضافہ نقل کیا ہے کہ پھر آپ نے فرمایا: ’’یہ قبریں اہل قبور کے لیے اندھیروں سے بھری ہوئی ہیں اور اللہ تعالیٰ میری نماز سے ان کی قبروں کو ان کے لیے روشن کردیتا ہے۔‘‘

اردو ترجمہ · UrduUnverified translation

حضرت حذیفہ رضی اللہ عنہ سے مروی ہے کہ نبی صلی اللہ علیہ وسلم نعي (موت کے لیے کھلے عام منادی) سے منع فرمایا کرتے تھے۔ (اسے احمد اور ترمذی نے روایت کیا ہے اور ترمذی نے حسن قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ نبی صلی اللہ علیہ وسلم نے نجاشی کی وفات کی خبر اسی روز دی جس روز وہ فوت ہوا تھا۔ آپ صحابۂ کرام کو لے کر جنازگاہ کی طرف تشریف لے گئے‘ صف بندی کروائی اور اس پر چار تکبیریں کہیں۔ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ میں نے نبی صلی اللہ علیہ وسلم کو فرماتے سنا ہے: ’’جس کسی مسلمان کے جنازے میں ایسے چالیس آدمی شریک ہوں جو اللہ تعالیٰ کے ساتھ کسی بھی چیز کو شریک نہ ٹھہراتے ہوں تو اللہ تعالیٰ اس (مرنے والے) کے حق میں ان کی شفاعت قبول فرما لیتا ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت سمرہ بن جندب رضی اللہ عنہ سے مروی ہے کہ میں نے نبی صلی اللہ علیہ وسلم کے پیچھے ایک ایسی عورت کی نماز جنازہ پڑھی جو حالت نفاس میں فوت ہوئی تھی۔ آپ اس کے درمیان میں کھڑے ہوئے تھے۔ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ اللہ کی قسم! رسول اللہ صلی اللہ علیہ وسلم نے بیضاء کے دونوں بیٹوں کی نماز جنازہ مسجد میں ادا فرمائی۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت عبدالرحمن بن ابی لیلیٰ رحمہ اللہ سے روایت ہے کہ حضرت زید بن ارقم رضی اللہ عنہ ہمارے جنازوں پر چار تکبیریں کہتے تھے۔ (مگر خلاف معمول) ایک مرتبہ انھوں نے پانچ تکبیریں کہیں تو میں نے ان سے دریافت کیا۔ انھوں نے جواب دیا کہ نبی صلی اللہ علیہ وسلم بھی پانچ تکبیریں کہتے تھے۔ (اسے مسلم اور چاروں نے روایت کیا ہے۔)

اردو ترجمہ · UrduUnverified translation

حضرت علی رضی اللہ عنہ سے مروی ہے کہ انھوں نے حضرت سہل بن حنیف رضی اللہ عنہ کی نماز جنازہ میں چھ تکبیریں کہیں اور فرمایا کہ یہ بدری ہیں۔ (اسے سعید بن منصور نے روایت کیا ہے اور اس کی اصل بخاری میں ہے۔)

اردو ترجمہ · UrduUnverified translation

حضرت جابر رضی اللہ عنہ سے مروی ہے کہ رسول اللہ صلی اللہ علیہ وسلم ہمارے جنازوں پر چار تکبیریں کہا کرتے تھے اور پہلی تکبیر میں سورۂ فاتحہ (بھی) پڑھتے تھے۔ (اسے امام شافعی رحمہ اللہ نے ضعیف سند سے روایت کیا ہے۔)

اردو ترجمہ · UrduUnverified translation

حضرت طلحہ بن عبداللہ بن عوف رحمہ اللہ سے مروی ہے کہ میں نے حضرت ابن عباس رضی اللہ عنہما کے پیچھے نماز جنازہ پڑھی۔ انھوں نے اس میں سورۂ فاتحہ پڑھی اور فرمایا: (میں نے اس لیے سورۂ فاتحہ پڑھی ہے) تاکہ تمھیں معلوم ہو جائے کہ یہ سنت ہے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت عوف بن مالک رضی اللہ عنہ سے مروی ہے کہ رسول اللہ صلی اللہ علیہ وسلم نے ایک نماز جنازہ پڑھائی تو میں نے آپ کی دعا میں سے اتنا حصہ یاد کر لیا: [اَللّٰھُمَّ! … وَعَذَابَ النَّارِ] ’’اے اللہ! اس کی مغفرت فرما اور اس پر رحم فرما۔ اور اسے عافیت دے اور اس سے درگزر فرما۔ اس کی مہمان نوازی اچھی فرما۔ اس کی قبر کشادہ و فراخ کر دے۔ اسے پانی‘ برف اور اولوں سے دھو دے (بالکل صاف کر دے۔) اسے گناہوں سے ایسا صاف کر دے جیسا کہ سفید کپڑا میل کچیل سے صاف کیا جاتا ہے۔ اور اسے اس (دنیاوی) گھر سے بہتر و عمدہ گھر اور اہل و عیال سے بہتر اہل و عیال عطا فرما۔ اسے جنت میں داخل فرما۔ اسے قبر کے فتنہ و آزمائش اور عذاب دوزخ سے محفوظ رکھ۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم جب کسی کی نماز جنازہ پڑھتے تو یوں فرماتے: ’’الٰہی! ہمارے زندہ اور مردہ‘ ہمارے حاضر و غائب‘ ہمارے چھوٹے اور بڑے‘ ہمارے مرد و عورت (سب) کی مغفرت و بخشش فرما دے۔ الٰہی! ہم میں سے جسے تو زندہ رکھے اسے اسلام پر زندہ رکھنا اور جسے تو موت دے اسے ایمان کی موت سے سرفراز فرمانا۔ الٰہی! ہمیں اس (میت)کے اجر و ثواب سے محروم نہ کرنا اور نہ ہمیں اس کے بعد فتنے میں ڈالنا۔‘‘ (اسے مسلم اور چاروں نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے‘ نبی صلی اللہ علیہ وسلم نے فرمایا: ’’جب تم کسی میت کی نماز جنازہ پڑھو تو اس کے لیے خوب خلوص دل سے دعا کرو۔‘‘ (اسے ابوداود نے روایت کیا ہے اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’جنازہ لے جانے میں جلدی کیا کرو‘ اس لیے کہ اگر وہ نیک ہے تو پھر وہ بھلائی ہی ہے جس کی طرف تم اسے لے جا رہے ہو اور اگر وہ نیک نہیں ہے تو پھر شر ہے جسے تم اپنی گردن سے اتار رہے ہو۔‘‘(بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جو شخص جنازے کے ساتھ حاضر رہے یہاں تک کہ اس پر نماز پڑھی جائے‘ اسے ایک قیراط کے برابر ثواب ملے گا۔ اور جو شخص دفن ہونے تک حاضر رہے اسے دو قیراط اجر ملے گا۔‘‘ دریافت کیا گیا کہ دو قیراط سے کیا مراد ہے؟ آپ نے فرمایا: ’’دو قیراط دو بڑے بڑے پہاڑوں کے برابرہیں۔‘‘ (بخاری و مسلم) اور مسلم کی روایت میں ہے: ’’میت کو قبر میں اتارے جانے تک حاضر رہے۔‘‘ اور بخاری کی روایت میں ہے: ’’جس نے کسی مسلمان کے جنازے میں ایمان کی حالت میں اور حصول ثواب کی نیت سے شرکت کی اور نماز جنازہ کے اختتام تک اس کے ساتھ بھی رہا اور تدفین سے فراغت کے بعد واپس لوٹا تو وہ دو قیراط لے کر واپس لوٹا۔ ہر قیراط احد پہاڑ کی مقدار کے برابر ہے۔‘‘

اردو ترجمہ · UrduUnverified translation

حضرت سالم رحمہ اللہ اپنے والد (ابن عمر رضی اللہ عنہما ) سے روایت کرتے ہیں کہ انھوں نے نبی صلی اللہ علیہ وسلم اور حضرت ابوبکرو عمر رضی اللہ عنہما کو جنازے کے آگے چلتے دیکھا ہے۔ (اسے پانچوں نے روایت کیا ہے اور ابن حبان نے صحیح قرار دیا ہے۔ اور نسائی اور ایک گروہ نے اس میں مرسل ہونے کی علت بیان کی ہے۔)

اردو ترجمہ · UrduUnverified translation

حضرت ام عطیہ رضی اللہ عنہا سے مروی ہے کہ ہمیں جنازوں میں شرکت سے منع کیا گیا لیکن پختہ حکم نہیں دیا گیا۔ (بخاری و مسلم)

اردو ترجمہ · UrduUnverified translation

حضرت ابوسعید رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جب تم کسی جنازے کو آتا دیکھو تو کھڑے ہو جاؤ‘ نیز جو شخص جنازے کے ساتھ ہو وہ جنازے کے (زمین پر) رکھے جانے سے پہلے نہ بیٹھے۔‘‘ (بخاری و مسلم)