اردو ترجمہ · UrduUnverified translation

حضرت ابوعامر اشعری رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’میری امت میں لازماً کچھ ایسی قومیں ہوں گی جو زنا اور ریشم کو حلال سمجھیں گی۔‘‘(اسے ابوداود نے روایت کیا ہے اور اس کی اصل بخاری میں ہے۔)

اردو ترجمہ · UrduUnverified translation

حضرت حذیفہ رضی اللہ عنہ سے مروی ہے کہ ہمیں رسول اللہ صلی اللہ علیہ وسلم نے سونے چاندی کے برتنوں میں کھانے پینے‘ باریک اور موٹا ریشم پہننے اور اس پر بیٹھنے سے منع فرمایا ہے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت عمر رضی اللہ عنہ روایت کرتے ہیں کہ رسول اللہ صلی اللہ علیہ وسلم نے ریشم پہننے سے منع فرمایا‘ سوائے دویا تین یا چار انگشت جگہ کے برابر۔ (بخاری و مسلم۔ الفاظ مسلم کے ہیں۔)

اردو ترجمہ · UrduUnverified translation

حضرت انس رضی اللہ عنہ سے مروی ہے کہ نبی صلی اللہ علیہ وسلم نے حضرت عبدالرحمن بن عوف اور زبیر بن عوام رضی اللہ عنہما کو دوران سفر میں ریشمی قمیص پہننے کی اجازت مرحمت فرمائی‘ اس وجہ سے کہ انھیں خارش تھی۔ (بخاری و مسلم)

اردو ترجمہ · UrduUnverified translation

حضرت علی بن ابی طالب رضی اللہ عنہ سے مروی ہے کہ نبی صلی اللہ علیہ وسلم نے مجھے ریشمی دھاریوں والا حلّہ (جوڑا) عنایت فرمایا۔ میں اسے پہن کر باہر نکلا تو میں نے آپ کے رخ انور پر غصے اور ناراضی کے آثار دیکھے‘ چنانچہ میں نے اسے پھاڑ کر اپنی (رشتے دار) خواتین میں تقسیم کر دیا۔ (بخاری و مسلم۔ یہ الفاظ مسلم کے ہیں۔)

اردو ترجمہ · UrduUnverified translation

حضرت ابو موسیٰ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’سونا اور ریشم میری امت کی عورتوں کے لیے حلال کر دیا گیا ہے اور مردوں پر حرام۔‘‘ (اسے احمد‘ نسائی اور ترمذی نے روایت کیا ہے اور ترمذی نے صحیح بھی قرار دیا ہے۔)

اردو ترجمہ · UrduUnverified translation

حضرت عمران بن حصین رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’اللہ تعالیٰ پسند کرتاہے کہ جب وہ اپنے کسی بندے پر انعام فرمائے تو اس نعمت کا اثر اس پر دیکھے۔‘‘ (اسے بیہقی نے روایت کیا ہے۔)

اردو ترجمہ · UrduUnverified translation

حضرت علی رضی اللہ عنہ سے مروی ہے کہ نبی صلی اللہ علیہ وسلم نے ’’قس‘‘ (شہر) کے بنے ہوئے کپڑے اور زرد رنگ کے کپڑے پہننے سے منع فرمایا ہے۔ (اسے مسلم نے روایت کیاہے۔)

اردو ترجمہ · UrduUnverified translation

حضرت عبداللہ بن عمرو رضی اللہ عنہما سے مروی ہے کہ نبی صلی اللہ علیہ وسلم نے میرے جسم پر زرد رنگ کے دو کپڑے دیکھے تو فرمایا: ’’کیا تیری ماں نے تجھے یہ پہننے کا حکم دیا ہے؟‘‘(اسے مسلم نے روایت کیا ہے۔)

اردو ترجمہ · UrduUnverified translation

حضرت اسماء بنت ابی بکر رضی اللہ عنہما سے مروی ہے کہ انھوں نے رسول اللہ صلی اللہ علیہ وسلم کا ایک چوغہ نکالا جس کے گریبان‘ آستینیں اور چاک (سینے کی پٹیوں) پر دبیز ریشم کا حاشیہ تھا۔ (اسے ابوداود نے روایت کیا ہے اور اس کی اصل مسلم میں ہے۔) مسلم نے اتنا اضافہ نقل کیا ہے کہ وہ جبہ حضرت عائشہ رضی اللہ عنہا کی تحویل میں رہا‘ جب وہ وفات پا گئیں تو میں نے اسے اپنے قبضے میں لے لیا۔ نبی صلی اللہ علیہ وسلم اسے زیب تن فرمایا کرتے تھے۔ ہم اسے دھو کر مریضوں کو پلاتے اور شفا طلب کرتے ہیں۔ بخاری نے الأدب المفرد میں یہ اضافہ نقل کیا ہے کہ آپ صلی اللہ علیہ وسلم اسے وفود کی آمد پر اور نماز جمعہ کے لیے پہنتے تھے۔