اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ نبی صلی اللہ علیہ وسلم تواضع کرتے ہوئے‘ ترک زینت کرتے ہوئے‘ خشوع ظاہر کرتے ہوئے ‘ آہستہ آہستہ چلتے ہوئے اور بڑی زاری اور تضرع کرتے ہوئے نماز کے لیے باہر نکلے اور نماز عید کی طرح لوگوں کو دو رکعات نماز پڑھائی۔ تمھارے اس خطبے کی طرح خطبہ ارشاد نہیں فرمایا۔ (اسے پانچوں نے روایت کیا ہے اور ترمذی‘ ابوعوانہ اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ لوگوں نے رسول اللہ صلی اللہ علیہ وسلم سے بارش بند ہو جانے کی شکایت کی تو آپ نے منبر (لے جانے) کا حکم فرمایا‘ چنانچہ آپ کے لیے عیدگاہ میں منبر لا کر رکھ دیا گیا۔ آپ نے لوگوں سے ایک دن کا وعدہ کیا کہ وہ سارے باہر نکلیں‘ پھر آپ اس وقت نکلے جب سورج کا کنارہ ظاہر ہوا‘ آپ منبر پر بیٹھ گئے اور اللہ تعالیٰ کی کبریائی اور حمد و ستائش بیان کی‘ پھر (لوگوں سے مخاطب ہو کر) فرمایا: ’’تم نے اپنے علاقوں کی خشک سالی کا شکوہ کیا ہے‘ اللہ تعالیٰ نے تمھیں حکم دیا ہے کہ اسے پکارو وہ تمھاری دعا قبول فرمائے گا۔‘‘ پھر فرمایا: ’’تمام تعریف اللہ ہی کے لیے ہے جو کائنات کا پروردگار ‘ بڑا مہربان‘ نہایت رحم کرنے والا ہے۔ روز جزا کا مالک ہے۔ اللہ کے سوا دوسرا کوئی الٰہ نہیں۔ وہ جو چاہتا ہے کر گزرتا ہے۔ الٰہی! تو ہی اللہ ہے‘ تیرے سوا کوئی دوسرا معبود نہیں۔ تو غنی ہے اور ہم فقیر و محتاج ہیں۔ ہم پر باران رحمت کا نزول فرما۔ جو کچھ تو ہم پر نازل فرمائے اسے ہمارے لیے قوت اور ایک وقت تک کے لیے گزران بنا دے۔‘‘ اس کے بعد آپ صلی اللہ علیہ وسلم نے اپنے دونوں دست مبارک اوپر اٹھائے کہ وہ بتدریج آہستہ آہستہ اوپر اٹھتے گئے اور آپ دعا میں مشغول رہے یہاں تک کہ آپ کی بغلوں کی سفیدی نظر آنے لگی۔ پھر لوگوں کی جانب اپنی پشت کر کے کھڑے ہوگئے (قبلہ رو ہو گئے) اور اپنی چادر کو پلٹایا جبکہ آپ اپنے ہاتھ اوپر اٹھائے ہوئے تھے‘ بعدازاں لوگوں کی جانب منہ کیا اور منبر سے نیچے تشریف لے آئے اور دو رکعت نماز پڑھائی۔ اسی لمحے اللہ تعالیٰ نے ایک بدلی بھیجی‘ وہ گرجی‘ چمکی‘ پھر برسنے لگی۔ (اسے ابوداود نے روایت کیا ہے اور غریب کہا ہے اور اس کی سند عمدہ ہے۔) صحیح بخاری میں حضرت عبداللہ بن زید رضی اللہ عنہ کی روایت میں چادر تبدیل کرنے کا قصہ موجود ہے۔ اور اس روایت میں ہے: پھر آپ نے قبلے کی طرف رخ کیا اور دعا فرماتے رہے‘ پھر دو رکعت نماز ادا فرمائی اور ان میں قراء ت بلند آواز سے کی۔ اور دارقطنی میں ابوجعفر باقر کی مرسل روایت میں ہے کہ آپ نے اپنی چادر اس لیے پلٹی کہ قحط سالی بھی اسی طرح پلٹ جائے۔

اردو ترجمہ · UrduUnverified translation

حضرت انس رضی اللہ عنہ سے مروی ہے کہ ایک آدمی جمعے کے روز مسجد میں داخل ہوا‘ اس وقت نبی صلی اللہ علیہ وسلم کھڑے خطبہ ارشاد فرما رہے تھے۔ اس نے کہا: اے اللہ کے رسول! اموال (مویشی) ہلاک ہوگئے اور آمدورفت کے راستے بند ہوگئے ہیں۔ اللہ کے حضور دعا فرمائیں کہ وہ ہم پر بارش نازل فرمائے۔ آپ نے اسی وقت اپنے ہاتھ اوپر اٹھائے اور دعا فرمائی: ’’الٰہی! بارش سے ہماری فریاد رسی فرما۔ یاالٰہی! باران رحمت سے ہماری فریاد رسی فرما۔ اے اللہ! باران رحمت سے ہماری فریاد رسی فرما۔‘‘ پھر ساری حدیث بیان کی۔ اس میں بارش کے بند کروانے کی دعا کا بھی ذکر ہے۔ (بخاری و مسلم)

اردو ترجمہ · UrduUnverified translation

حضرت انس رضی اللہ عنہ ہی سے مروی ہے کہ حضرت عمر رضی اللہ عنہ (کے زمانے میں) جب لوگ قحط میں مبتلا ہو جاتے تو وہ حضرت عباس بن عبدالمطلب رضی اللہ عنہ (کی دعا) کے ذریعے سے بارش طلب فرماتے اور یوں دعا کرتے: ’’اے اللہ! ہم تجھ سے تیرے نبی صلی اللہ علیہ وسلم (کی دعا) کے ذریعے سے بارش طلب کرتے تھے‘ تو ہمیں باران رحمت سے نواز دیتا تھا۔ اب ہم تیرے حضور تیرے نبی صلی اللہ علیہ وسلم کے چچا (کی دعا کے ذریعے سے) بارش طلب کرتے ہیں‘ لہٰذا تو ہمیں بارش سے سیراب فرما دے۔ (اس دعا کی قبولیت کے نتیجے میں) انھیں بارش سے سیراب کر دیا جاتا۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت انس رضی اللہ عنہ ہی سے یہ حدیث بھی مروی ہے کہ ہم ایک دفعہ رسول اللہ صلی اللہ علیہ وسلم کے ساتھ تھے کہ بارش ہونے لگی۔ تو آپ نے اپنے بدن اطہر سے کپڑا ہٹا لیا حتی کہ بارش آپ کے جسم اطیب پر پڑنے لگی اور آپ نے فرمایا: ’’یہ ابھی ابھی اپنے رب کے ہاں سے آئی ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ نبی صلی اللہ علیہ وسلم جب بارش کو دیکھتے تو اس طرح دعا مانگتے: ’’اے اللہ! اس بارش کو نفع بخش بنا دے۔‘‘ (اسے بخاری و مسلم نے روایت کیا ہے۔)

اردو ترجمہ · UrduUnverified translation

حضرت سعد رضی اللہ عنہ سے مروی ہے کہ نبی صلی اللہ علیہ وسلم نے بارش طلب کرنے کے لیے یہ دعا مانگی: ’’الٰہی! ہمیں ایسے بادل سے ڈھانپ لے جو گہرا تہ بہ تہ ‘ کڑکنے والا‘ زور سے برسنے والا‘ چمکنے گرجنے والا ہو‘ تو اس سے ہم پر چھوٹے چھوٹے قطرات والی‘ انتہائی باریک بوندوں والی اور موسلا دھار بارش برسا۔اے بزرگی اور عزت کے مالک!‘‘ (اسے ابو عوانہ نے اپنی ’’صحیح‘‘ میں روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’حضرت سلیمان علیہ السلام بارش طلب کرنے کے لیے باہر نکلے تو انھوں نے ایک چیونٹی کو پشت کے بل لیٹے ہوئے‘ ٹانگیں آسمان کی جانب اٹھائے ہوئے دیکھا‘ جو بارگاہ رب العزت میں عرض کر رہی تھی: الٰہی! ہم بھی تیری مخلوق میں سے ایک مخلوق ہیں اور تیری بارش سے بے نیاز و مستغنی نہیں ہیں۔ یہ سن کر حضرت سلیمان علیہ السلام نے فرمایا: چلو واپس چلیں‘ تم اپنے غیر کی دعا کی بدولت بارش سے سیراب کر دیے گئے ہو۔‘‘ (اسے احمد نے روایت کیا ہے اور حاکم نے صحیح قرار دیاہے۔)

اردو ترجمہ · UrduUnverified translation

حضرت انس رضی اللہ عنہ سے مروی ہے کہ نبی صلی اللہ علیہ وسلم نے بارش کے لیے دعا فرمائی تو اپنی دونوں ہتھیلیوں کی پشت کے ساتھ آسمان کی طرف اشارہ کیا۔ (اسے مسلم نے روایت کیا ہے۔)