اردو ترجمہ · UrduUnverified translation

حضرت مغیرہ بن شعبہ رضی اللہ عنہ سے مروی ہے کہ رسول اللہ صلی اللہ علیہ وسلم کے عہد میں (آپ کے لخت جگر) ابراہیم رضی اللہ عنہ کی وفات کے روز سورج گرہن لگا تو لوگوں نے کہا کہ سورج گرہن ابراہیم کی وفات کی وجہ سے لگا ہے۔ اس پر رسول اللہ صلی اللہ علیہ وسلم نے فرمایا: ’’شمس و قمر اللہ کی نشانیوں میں سے دو نشانیاں ہیں۔ انھیں گرہن کسی کی موت و حیات کی وجہ سے نہیں لگتا‘ چنانچہ جب تم انھیں اس حالت میں دیکھو تو اللہ تعالیٰ سے دعا کرو اور نماز پڑھو یہاں تک کہ وہ (سورج) واضح ہو جائے (گرہن کھل جائے۔)‘‘ (بخاری و مسلم) اور بخاری کی ایک روایت میں ہے : ’’نماز پڑھتے رہو یہاں تک کہ وہ روشن ہو جائے۔‘‘ اور بخاری میں حضرت ابوبکرہ رضی اللہ عنہ کی حدیث میں ہے: ’’چنانچہ نماز پڑھو اور دعا مانگو یہاں تک کہ وہ کیفیت جو تمھارے سامنے ہے‘ دور ہو جائے۔‘‘

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ نبی صلی اللہ علیہ وسلم نے گرہن کی نماز میں قراء ت بلند آواز سے کی اور دو رکعتوں میں چار رکوع اور چار ہی سجدے کیے۔ (بخاری و مسلم۔ یہ الفاظ مسلم کے ہیں) اور مسلم کی ایک روایت میں ہے: آپ نے منادی کرنے والے کو بھیجا جو [اَلصَّلَاۃُ جَامِعَۃٌ] ’’نماز جمع کرنے والی ہے۔‘‘ کی منادی کرتا تھا۔

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم کے عہد مبارک میں سورج گرہن ہوا۔ آپ نے نماز کسوف ادا فرمائی‘ اس میں لمبا قیام کیا‘ سورۂ بقرہ کی تلاوت کے برابر۔ پھر رکوع بھی بہت لمبا کیا‘ پھر سر اٹھایا (رکوع سے کھڑے ہوئے) تو قیام بھی طویل کیا مگر پہلے قیام سے کم۔ پھر لمبا رکوع کیا لیکن پہلے رکوع سے کم۔ پھر سجدہ ریز ہوئے (اس کے بعد) پھر لمبا قیام کیا اور وہ پہلے قیام سے کچھ کم تھا۔ پھر ایک لمبا رکوع کیا جو پہلے رکوع سے کچھ کم تھا۔ پھر (رکوع سے) اپنا سر مبارک اٹھایا اور ایک لمبا قیام کیا جو پہلے قیام سے کچھ کم تھا۔ اس کے بعد پھر ایک اور لمبا رکوع کیا جو پہلے رکوع سے کچھ کم تھا۔ پھر اپنا سر مبارک (رکوع سے) اٹھایا‘ پھر سجدہ کیا پھر (آخر کار) سلام پھیر دیا تو (اس دوران میں) سورج روشن ہو چکا تھا‘ پھر آپ نے لوگوں کو وعظ بھی کیا۔ (بخاری و مسلم- یہ الفاظ بخاری کے ہیں۔) مسلم کی ایک روایت میں ہے: آپ نے سورج گرہن کے موقع پر نماز پڑھی تو آٹھ رکوع ‘چار سجدوں کے درمیان ادا کیے۔حضرت علی رضی اللہ عنہ سے بھی اسی طرح روایت ہے۔اور مسلم ہی کی ایک روایت حضرت جابر رضی اللہ عنہ سے یوں بھی ہے: آپ نے چھ رکوع‘ چار سجدوں کے ساتھ ادا کیے۔اور ابوداود میں حضرت ابی بن کعب رضی اللہ عنہ سے روایت ہے کہ آپ نے نماز کسوف پڑھی اور پانچ رکوع اور دو سجدے پہلی رکعت میں کیے اور اسی طرح دوسری رکعت میں کیا۔

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ جب بھی تیز و تند ہوا چلتی تو نبی صلی اللہ علیہ وسلم اپنے گھٹنوں کے بل بیٹھ کر یوں (بارگاہ الٰہی میں) عرض کرتے: ’’الٰہی! اس (ہوا) کو رحمت بنا‘ اسے عذاب نہ بنا۔‘‘ (اسے شافعی اور طبرانی دونوں نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما ہی سے یہ حدیث بھی مروی ہے کہ آپ نے زلزلے کی وجہ سے چار سجدوں اور چھ رکوعوں سے نماز پڑھی اور فرمایا کہ آیات الٰہی کی نماز اسی طرح پڑھی جاتی ہے۔ (اسے بیہقی نے روایت کیا ہے۔ اور امام شافعی نے حضرت علی بن ابی طالب رضی اللہ عنہ سے اسی طرح کی روایت ذکر کی ہے‘ البتہ اس میں روایت کے آخری الفاظ نہیں ہیں۔)